Vikrant jungle ki taraf dekhte hue muda to akshad boat walle ko kuch keh raha tha. Use ek-ek pal ab intezar karna thoda mushkil ho raha tha, dimag mein bas do sawal the pehla ki agar dad yahan mile to vo yahan kaise aye aur tabse yahan kya kar rahe hain aur dusra ki agar vo yahan nahi mile to phir vo aage kya karega?
" kya kuch aisa hi tha us waqt bhi ? " akshad ki awaz sun kar vikrant hosh mein aya.
" jungle ka koi roop nahi hota, ab chalein? " vikrant ki baat par akshad ne hami bhari aur teeno jungle ki gehrai mein ghuste gaye. Andhera bhale hi abhi nahi hua tha lekin jungle ke andar roshni na ke barabar thi. Vikrant compass ki madad se aage badta hua paidon par nishan laga raha tha.
" akshad tumhe ye treasure kyun chahie ? "
" tum janti ho is jagah ki khoj kab hui ? "
" nahi "
" che saal pehle "
" kya ? to phir yahan par itna purana treasure kaise ho sakta hai "
" wahi to sawal hai itni purani sabhyata ka khajana yahan kya kar raha hai jis jagah ki khoj hi che saal pehle hui aur itna hi nahi iski khabar itne purane map mein pehle se kaise thi, jarur kuch bahut bada chupa hai yahan " akshad aur pratiksha baat karte hue vikrant ke piche chal rahe the. Vikrant ko rukta dekh dono ne apni batein band kar di.
" baarish ane wali hai, apne apne suit pehen lo " vikrant ne kaha aur rain suit pehen kar teeno aage badhe ki baarish eka-ek tez ho gayi. Badlon mein kad-kadati bizli itni tez thi ki kuch duri par ped ke uppar bizli aa giri jiske girte hi dharti kanp uthi. " jaldi chalo " vikrant ne kadam tez kar diye, chalte hue use wahi raat yaad aa rahi thi. Achanak uska compass bigad gaya aur vo charon taraf ghumne laga. " ise kya hua ? " vo ruk gaya aur use theek karne ki kosish karne laga.
" kya hua ? " akshad uske sath khade hote hi bola.
" compass ki magnetic field mein koi interferance hai " usne akshad ko compass dikhaya. " yani jarur aas pass hi hai vo, hum karib hai jaldi chalo " vikrant ne compass pocket mein dala aur usi direction mein dauda. Akshad aur pratiksha uske piche daud pade, vikrant daudta hua jhadiyun mein ghusa aur hath se ped hatate hue daudta gaya, uski sans ful rahi thi, ek pal piche atte akshad aur pratiksha ki bhi usne koi chinta nahi ki vo bhagta raha aur phir jhadiyun ke us paar nikalte hi uske kadam ruk gaye. Muh se tez chalti sanson ki awaz baarish ke shor mein gum ho rahi thi. Eka-ek bizli kadki aur uski ankhon ke aage roshni se usne vo dekha jise dekhne ke liye vo kab se bechain tha.
" hum pahunche gaye " akshad aur pratiksha ki ukhdi sanson ko sunte hi vo bola jo abhi-abhi uske sath aa kahde hue the.
Pass pahunch kar dekha to do pillar ke bich ek rasta andar ki taraf jaa raha tha, vikrant ne roshni se uske pathar ko dekha aur uski mitti ko jise dekh use samajh aya ki ye jagah utni purani nahi hai jitni usne dad ke sath dekhi thi. Vikrant dekhne ke baad us raste se andar chal diya. Dono taraf ki jagah khali thi aur baarish ke pani se bhar rahi thi, kuch hi dur chalne par vo ek jagah akar ruk gaya. Samne kuch sidiyan bani hui thi aur uske dono taraf badi badi akriti bani hui thi jiske piche deewar thi aur andar jane ke liye rasta bhi par rasta anjan tha yani kahan se tha vo dikhai nai de raha tha.
" akshad ek baar dekh kar aao ki koi aur rasta bana hai " vikrant ne sidiyan chad kar jab samne deewar dekhi to usne akshad ko dusra rasta khojne ke liye kaha aur tab tak vo vahin khada deewar ko dhayan se dekhne laga. Baarish ki vajah se deewar par bani akriti ke uppar mitti utar ayi thi isliye kuch samajh nahi aa raha tha. Vikrant ne phir dhayan se dekhna shuru kiya lekin kuch nahi mila. Vo vapis niche utar aya aur torch se bani hui akrityun ko dekhne laga jo shayad koi insan ki hi thi par chehra samajh nahi aa raha tha. Usne kaha to akshad ko tha par pratiksha bhi dusri taraf se jakar rasta khojne nikal chuki thi.
" koi rasta nahi hai " roshni mein akshad use ata hua dikha aur atte hi usne kaha. Kuch hi pal baad pratiksha bhi vapis aa gayi jise bhi rasta nahi mila. " vikrant jagah jada badhi bhi nahi hai aisa lag raha hai jaise bas kisi ne deewar khadi kar di ho " akshad ki baat sun pratiksha ne bhi use yahi kaha. Ye baat vikrant bhi samajh raha tha ki jagah vaisi nahi thi jaisi usne sochi thi.
" is it good for nothing ? " pratiksha boli par vikrant ne use koi jawab nahi diya. Vo janta tha ki chiz samne hai par samajh nahi aa rahi, itna sab bekar nahi ho sakta. Vo thoda aage badha aur phir jo itni der se kuch dhundne ki kosish kar raha tha usme use kuch dikha. Vahi akriti jo sidiyun ke dono taraf bani hui thi. Vikrant jhuk kar wahan baitha aur dhayan se dekhne laga jise dekh vo fauran samajh gaya. Usne apna bag kandhe se utara aur aur usme se vahi key nikali jo treasure box se mili thi. Key ko usne deewar ke andar lagaya aur use ghuma diya jaise box mein ghumaya tha, ek baar, do baar aur jaise hi tisri baar ghumaya ek shor teeno ke kano mein pada. Nazar utha kar jab vikrant ne dekha to akriti ke piche ki deewar bich mein se khulne lagi aur ek bada hissa uppar ki taraf uth gaya.
" unbelievable " pratiksha ne aisa pehli baar dekha tha.
" yani ye jagah use judi hai " akshad bol pada. Vikrant ne bina kuch kahe key ko deewar par ghumaya aur bahar nikal kar khada ho gaya. Usne jaise hi aisa kiya akshad aur pratiksha ke badhte kadam ruk gaye. Jo darwaja deewar mein khula tha vo band hone laga.
" ye band ho raha hai, yani tumhe us key ko wahin laga chhodna hoga " akshad ne vikrant ki taraf dekha. Vikrant ne key ko vapis deewar par lagaya aur usi tarah ghuma diya. Darwaja phir khulne laga " tum dono andar jao "
" tum ? " akshad ne pucha.
" mei key nahi chhod sakta "
" par ? "
" tum chalo mei ata hun " vikrant ki baat maan kar akshad aur pratiksha phir aage badhe aur dono andar jaa khade hue aur ghum kar vikrant ki taraf dekhne lage. Vikrant ne khade-khade hi key ko ghuma kar bahar khincha aur bhaga. Deewar niche ani shuru ho gayi, vo sidiyan chada aur adhi deewar niche thi jiske baad vo tezzi se niche zamen par fisla aur deewar ke niche se uska sar piste hue bacha lekin vo andar pahunch gaya. Andar ghuste hi deewar band ho gayi, vo kuch der zameen par hi pada raha aur hanfne laga.
" is key ke liye itna bada risk ? " akshad ek pal baad bola.
" jo chiz bahar chhodne par majbur kar de uspar bharosa nahi kiya ja sakta " vikrant apni jagah se khada hua aur apna rain suit utarne laga. Use dekh akshad aur pratiksha ko bhi yaad aya to unhone bhi use utar kar wahin rakh diya. Teeno bahut pass khade the, pratiksha ki nazar vikrant par thi jo bag mein us key ko vapis dal raha tha, use dekhte hue vo andhere mein roshni dalte hue mudi aur aage badhne lagi, bahar se to ye jagah choti thi lekin andar se iski gehrai jada lag rahi hai. Sochte hue usne do kadam aage badhaye taki vo is andhere mein chupi jagah ka jayza le sake ki tabhi vikrant ne uska hath pakad liya.
" ee-hhhhh " uske muh se ek cheekh nikli aur hath se torch gir gayi jiske sath jab usne niche dekha to torch ki roshni niche jati hui andhere mein kahin kho gayi.
" har kadam par ankhein khuli rakho varna pata nahi chalega kahan gayi " vikrant ne use piche khinch liya. Pratiksha ki to ankhein hairani mein aise khuli thi mano maut ko chu kar ayi ho. Ek kadam use niche gheraiyun mein gira deta, vo vapis ghumi aur vikrant ki taraf dekhne lagi jisne abhi uski jaan bachai thi.
" aage jane ka to rasta nahi hai " akshad us kone tak aya jahan pratiksha girte hue bachi thi " are you ok ? " usne phir use pucha to usne han mein sar hila diya.
" rasta hoga bas ankhon ko dekhna hai " vikrant ne apne samne aur dono taraf glow stick fenkni shuru ki lekin sab niche andhere mein gir kar kho gayi yani teeno taraf koi bhi rasta nahi tha. Akshad ne bhi vikrant ki baat suni aur dhayan se dekhne laga ki tabhi uski nazar uppar ki taraf gayi.
" shayad uppar kuch hai " akshad ke bolte vikrant ne bhi usi taraf dekha jahan vo dekh raha tha. " shayad koi hook hai "
" kis chiz ka ? "
" abhi pata chalega " vikrant ne apne saman se ek choti ball jasi chiz nikali.
" ye kya hai ? " akshad ne pucha par vikrant ne use us hook ki taraf fenk diya. Ek chota blast sa hua aur kuch pathar ke tukde tut kar niche girne lagi, sabhi ne apna sar chupa liya. Akshad use hairani bhari nazron se dekhne laga par agle pal ek shor hua aur uppar se ek pathar ka bada sa tukda latak gaya jaise fisalne wala jhulla hota hai usi tarah jiske uppari hisse mein khinch kar aage badhane ka zariya bana hua tha lekin dikat ye thi ki unke aur pather ke bich mein kuch duri thi.
" ye to dur hai hum nahi pahunch payenge " pratiksha use dekhte hue boli.
" aur koi option nahi hai, bahar jane ke liye aage hi badna padega varna sari zindagi yahin khadi raho " vikrant ne use samjhaya.
" mei pehle jata hun " akshad ne rassi ko dekha jo uske bich mein latki dikh rahi thi.
" achi baat hai, par rassi ko mat pakdna, pata nahi kitni kamjor hai kitni nahi agar tumne kudte hi use pakda to vo tut bhi sakti hai, apni nazar kone par rakho taki uski madad se uppar chadh sako " akshad ko laga jaise vikrant ne uska man padh liya. Abhi vo bas itna hi bola ki jahan vo khade the vo hissa hilne laga aur aage se ek pathar ka tukda niche gir gaya.
" jaldi " vikrant use dekhte hi bola. Akshad bhi samajh chuka tha, vo thoda piche hua aur gehri sans chhodte hue bhagte hue kuda. Ek pal ke liye sabhi ki sansein ruk gayi, akshad ko hawa mein ek pal dekh kar laga ki vo nahi pahunch payega lekin vo pahunch gaya aur usne ek kona pakad liya aur usko pakad kar uppar chadne ki kosish karne laga.
" akshad jaldi " vikrant chillaya kyun ki unke pas samay kam tha kyun ki zameen tutne ki wajah se vo choti hoti jaa rahi thi. Akshad bhi janta tha ki jaldi karna hai, usne kosish ki par uska hath fisla jise dekh pratiksha chilla padi lekin usne phir kosish ki aur is baar vo uppar chad gaya lekin use aisa laga vo fisal jayega.
" rassi pakdo lekin dabav nahi dalna " akshad ne usi tarah kiya. Kone ko ek hath se pakad kar dusre hath se rassi jo theek bich mein se jaa rahi thi use pakadne laga, kuch hi pal mein vo hath mein aa gayi aur use usne apni taraf khinch liya. " pratiksha tumhari bari "
" mei nahi kar sakti " vo ghabrate hue boli.
" waqt nahi hai, nahi kar paogi to niche gir jaogi lekin kudna padega " vikrant ne use apni taraf khincha " niche mat dekhna varna pakdna bhool jaogi "
" tum kabhi kisi ko advice mat dena " pratiksha ne sans bhari aur phir vo bhagi, janti thi ki use akshad se jada duri tay karni padegi. Vo chillai aur chalang lagai, use laga ki vo nahi pahunch payegi bahut dur reh jayegi lekin vo pahunch gayi aur usne kone ko pakad liya par niche latak gayi " aaaaaaaa... i can't " vo chillai. Par agle pal akshad ne use piche akar hath de diya aur vo use uppar khinchte hue dhire-dhire piche hone laga, per fisal raha tha lekin kisi tarah usne khud ko sambhal rakha tha. Vikrant ne unse nazar hata kar niche dekha, adhi zameen deh chuki thi aur ab bilkul samay nahi tha.
Pratiksha uppar chadh chuki thi par aur intezar karna bhari padh sakta tha isliye vikrant piche hue aur bhagta hua kud pada. Uski nazar bas samne hi thi, vo janta tha pakad lega aur usne dusri chor ka kona pakad liya lekin agle hi pal uska ek hath chhut gaya aur vo hawa mein jhulne laga.
" vikrant " akshad ko laga vo gir gaya lekin agle hi pal usne jawba de diya " mei theek hun tum uppar chado " vikrant janta tha ki uska hath chhut jayega. Akshad ne uski baat suni aur dhire-dhire uppar chadne laga, bich-bich mein vo fisalta to rassi ko pakad leta lekin vo itni kachi thi ki khnchti hui tar-tar hone lagi. Usne ek pal piche dekha pratiksha ghabrayi hui use umeed bhari nazron se dekh rahi thi, akshad ne phir samne nazar ki aur akhir vo uppar pahunch gaya. Jaisa niche se laga tha uppar wesa hi tha, rasiyun ki madad se khinchne par deewar khisak sakti thi. Akshad ne dono hath se rasiyun ko majbuti se hath mein bandha aur ek taraf se khinch kar dusri taraf se chhoda. " aaaaaaaarrrhhhhhhh " pehli hi baar mein itni takat lagi ki uske hath chill gaye par aisa karne ki wajah se deewar khiski lekin bahut thodi. Vikrant ka hath fisalne laga vo kosish karke dusra hath uppar laya aur use pakad kar khoni ke bal lataka lekin sharir namb padne laga aur ise jada takat vo ikhati nahi kar paya.
Akshad ne phir takat lagai aur is baar vo pehle se jada khiska, iske baad vo ruka nahi aur takat lagata gaya, uske kandhe mano jawab de chuke the lekin vo ruka nahi dhire-dhire hi sahi vo manzil tak pahunch gaya. ' dhaaaammmmmm ' awaz ayi aur deewar se takrate hi vikrant ka hath chut gaya aur vo niche gir gaya.
" vikrant " pratiksha uske girte hi chillai lekin agle hi pal vikrant ki awaz sun usne chain ki sans chhodi.
mega.nz
....abb samhaj aa gaya hai
padhkar mazaa aa gaya
