- 11
- 7
- 4
11th standard
Yeh kahani 11th class ke mid se shuru hoti hai. Tabhi se mere dimaag me tha ki mujhe ghar se nikalna hai, apni life khud ke dum pe jeeni hai. Mujhe hamesha lagta tha ki main rukne walon me se nahi hoon. Mera dream tha Mumbai jana, lekin samajhta tha ki wahan survive karne ke liye paise honi chahiye.
Main plan banata ki 10–12k jama kar lunga aur fir nikal jaunga. Ek baar chance bhi mila — ghar me cash padha tha, mummy papa ghar pe nahi the. Tab meri 11th ke PT3 exams chal rahe the. Maine socha: “Isse better chance nahi milega, abhi nikal ja.” Lekin ussi din relatives aa gaye aur mera plan cancel ho gaya.
Aise hi 5–6 mahine nikal gaye. 12th class aa gayi, July me ek aur try kiya but again unsuccessful. Tab mujhe samajh aa gaya: “Lakshya, ab planning se kuch nahi hoga, agar nikalna hai toh khaali haath hi nikalna padega.”
---
7 September – Asli Shuruaat
7 September ki shaam maine mummy se bola: “Main pass ke restaurant me burger khane ja raha hoon.” Mere paas sirf 100 rupaye the, chappal pehni thi. Restaurant jane ke bajaye maine seedha bus pakad li aur Delhi nikal gaya. Ticket ka paisa bhi nahi diya, kisi tarah conductor se bach gaya.
Dopahar tak Delhi pahuch gaya. Tabhi zor ki baarish ho rahi thi. Main bheegta hua footpath pe chalta ja raha tha, aur mere mann me bas ek hi soch chal rahi thi: “Ab chahe baarish aur tez ho jaaye, mujhe koi fark nahi padta, main chalta rahunga.”
Thoda aage gaya toh dekha ek aadmi apni bike leke mere peeche-peeche aa raha tha. Pehle thoda dar laga, par fir maine khud hi puchh liya: “Uncle, aapko kuch puchhna tha kya?”
Woh bola: “Kahan ja rahe ho?”
Maine jhoot bol diya: “Bas nearby hi rehta hoon, papa se jagda ho gaya toh gusse me nikal aaya.”
Fir usne bola: “Job dhundh rahe ho toh mall me try karo.” Aur mujhe mall ke bahar chhod diya, number bhi de diya.
Main mall me gaya but job nahi mili. Reason tha ki main underage tha (16–17). Us din raat ko mujhe road ke side wali bench pe sona pada.
---
Next Din – Truck Waale & Watchman Uncle
Agli subah main ek dhabe pe pahucha jahan bohot saare truck wale khana kha rahe the. Ek driver ne pucha: “Beta, tum kabse yahin baithe ho?” Maine bola: “Job dhundh raha hoon.” Usne suggest kiya ki peeche factory line hai, wahan try kar lo.
Main gaya, but job nahi mili. Haan, ek watchman se baat hui. Usne kaha: “Meri duty shaam 6 baje khatam hoti hai, tab mere saath chalna. Mere ghar me ek room khali hai, rehne ki jagah mil jaayegi.”
Us din main aur aage chalta gaya aur ek fertilizer factory pahucha. Lekin woh Sunday tha, toh watchman ne bola: “Sunday ko factory band rehti hai, kal aana.” Tab main wapas un watchman uncle ke paas gaya jinse room wali baat hui thi, par tab tak wo ghar ja chuke the. Aur mujhe phir se roadside bench pe sona pada.
---
Pehli Job & Pehli Salary
Agle din mujhe luck se ek fertilizer factory me kaam mil gaya — bori dhona aur shift karna. Us din 400 rupaye kamaye. 2 din se main bhooka tha, toh pehle pet bhar ke khana khaya. Thoda bukhar bhi tha, lekin uski izzat maine bilkul nahi ki.
Shaam ko main fir us watchman uncle ke sath gaya. Unhone mujhe apne ghar le gaye. Unki wife bhi thi, main unhe “dadi” bulata tha. Dono ne mujhe apne potey ki tarah treat kiya. Mujhe apna gadda tak de diya sone ke liye.
Kuch din factory me kaam karne ke baad jab meri pehli salary aayi, tab maine khud ke liye naye kapde kharide — 2 T-shirts aur 2 pants. Kyunki pichhle 3–4 din se mere kapde itne gande ho gaye the ki pehne nahi jaa rahe the.
---
Startup ka Sapna
Thoda settle hone ke baad maine socha ki sirf mazdoori se life nahi banegi. Mujhe kuch bada karna hai. Tab idea aaya ek labour startup ka.
Maine dekha tha ki factories me workers organized nahi hote. Kabhi aate hain, kabhi chhod dete hain. Jab kam log hote toh zyada kaam baaki workers pe pad jata, paise zyada milte but sharir toot jata. Maine socha ek aisi company banu jahan labours ek group me organized ho, aur factories ko contract basis pe provide kiye jaye. Matlab factory owner hume paisa dega, aur hum unko proper labour group bhejenge.
Mujhe lagta tha yeh idea successful hoga.
---
Papa Ki Aankhon Me Aansu
Lekin ek din sab khatam ho gaya. Papa mujhe dhoondte-dhoondte Delhi pahunch gaye. Jab maine unhe pehli baar rote hue dekha, toh sab kuch chhod kar unke sath wapas chal diya.
Unse maine yeh baat chhupai ki main mazdoori karta tha, kyunki mujhe pata tha unhe dukh hoga. Aaj bhi unhe yeh baat nahi pata.
Ek saal ho gaya us incident ko. Kabhi sochta hoon agar papa na aate toh shayad main apna startup lead kar raha hota. Lekin ab regret nahi hai. Ab main khush hoon, chill hoon. Mujhe samajh aa gaya hai ki mujhe apni life me kya chahiye.