Update - 1
rana pratab singh aur thakur vikram singh dono bachpan ke dost the. dono ne ek hi parivar me shadi ki..thakur harmit singh ki do betiyan.. badi beti devika pratab singh ki patni bani.. chhoti lavanya vikram singh ki patni bani.. youn do jano ki jodi 4 jano me convert ho gai. pariravik business bohut badhiya tha. isi business ko badhane ke liye charon london sattle ho gaye. charon khub maze ki zindagi jeene lage. jahan charon ki dosti aur mohabbat misaal bani... wahin business ne bhi khub tarakki ki.
aaj 15 saal baad sab ek sath by sea india laut rahe the hamesha hamesha ke liye. apnu se bohut door rah liya.. ab baki ki zindagi sab ke sath jiyenge. aisa irada karke sab nikal pade the.
par kismat me kuch aur hi likha tha. insan jo sochta hai. wo hota nahi. jo nahi sochta wo ho jata hai.
raat ke akhri pahar bhayankar samandri toofan ne ship ko apni lapet me le liya.. jahaz tinke ki tarah samandr ki biphri lahron par hichkole khane laga. toofan ki bhayankar awaz me musafiron ke cheekhne chillane ki awazen mix hone lagi.
apne apne cabino me band pratab singh aur vikram singh apne parivar ke liye chintit ho gaye. aise bhayankar toofan me koi kisi ke liye kya kar sakta tha. 2 kadam chalna tak mahaal tha. fir bhi dono yaar milkar sath wale cabino me ja kar apne bachhu ko lekar apne cabino me ja ghuse..
maut ki dahshat ke wo kuch ghante bohut hi bhayankar beete.. subah hoi to tufan bhi tham gaya.
agli subah toofan ki asli tabahkari ka pata chala. jahaz ke arshe par, corrider me ja baja lashon ke dher dikhai de rahe the.
rat bhayankar toofan me jahan sab apni sudh budh kho bethe the. wahin ek vikram aur lavanya bhi the. jo apne hisab se apne bachu ke sath apne cabin me safe the. jaise hi subah hui aur sab ke hosh thikane aaye to lavanya idhar udhar dekhti cheekh padi..
lavanya -- jaidev.. mera dev.. vikram mera dev nahi hai yahan par..
lavanya phoot phoot kar roti hui boli. to vikram aur sabko pata chala.. jaidev sach me nahi hai..
sab ghabra gaye.
vikram -- pratab tum sab ko lekar arshe chalo. main dev ka pata karke aata hon.
vikram fir se dusre sath wale cabin me gaya. wahan gaya to pata chala jaidev to toote bed ke niche phasa pada hai. kai zakham aa chuke the usay.
jaidev ki aisi sthiti dekh vikram cheekh pada.. dev.. meri jaan.. vikram cheekhta hua bed ko utha kar jaidev ko bahar nikalne laga. jald hi vikram sfal bhi ho gaya. jaidev ke sharir ko bazuon me uthaye jaidev cabin se daudta hua bahar nikla..
vikram ki cheekh sunkar sab bhi bahar nikal pade the. sab jo arshe par jane ke liye nikal rahe the. vikram ki bahun me jaidev ko dekh kar cheekh pade. jaidev se badi teen bahne apne iklote bhai ko zakhmo se choor dekh kar phoot phoot kar rone lagi. lavanya to dhadam se gir padi thi. apni iklote bete ki aisi halat dekh kar uska dil dhadakna bhul gaya tha.. vikram ne jaidev ko pratab ko thamaya aur lavanya ko bahun me utha kar tezi se sab ko liye arshe par jane laga. raste me kai lashen padi dikhai de rahi thi. arshe par pohnche to wahan mela laga hua tha. har dusra person rota hua dikhai de raha tha.
captian ki awaz goonji-- sab khamosh ho jaayen. zakhmiyon ko, lashon ko alag karne me hamari madad karne. pure jahaz ko search karen. jahan bhi koi zakhmi ya lash mile. usay yahan laayen. dekhiye! is waqt hum sab ek jaisi pareshani ka shikar han. to kindly ye rona dhona kuch der ke liye stop kar den. kahin aisa na ho. ye rona dhona aur bhi badh jaye. jinko bachaya ja sakta hai. unko bachane me hamari madad karen.
baat sabki samjh me aa gai. bachho ko aurton ko chhod sab bhag khade hue aur apni madad aap ke sath kam par lag gaye. vikram aur bhanu pratab singh captain se mile usay lavanya aur jaidev baare bataya.
captain -- dekhiye main aap ki pareshani samjhta hon. main akela kuch nahi kar sakta hon. aap in dono ko wahan line me lita den. doctors ki quantity kam hai.. bari aane par wo inko bhi dekh lenge. kindly uparwale par bharosa rakhte hue hamara sath den. aur andar maujud zakhmiyon ko yahan laane me hamari madad karen.
pratab aur vikram ne pure privar ko ek jut kiya.. aur sambha kar dusro ki madad ke liye nikal pade.
agle adhe ghante me lavanya ko hosh aa chuka tha. jaidev ke sar par zakham aaya tha. uski halat bohut nazuk thi. doctor ne pray ke liye bol dia tha.
sabki ankhon ka tara jaidev ginti ki saanse le raha tha. sab ka ro ro kar bura haal tha.
safar firse shuru hua. ek hafte baad captain ne ship ke passengers me se khas logo ko apne pass bulwaya. jinme pratab aur vikram bhi the.
captain -- main ek afsosnak khabar hai. compas toot chuke han aur hum disha kho bethe han. isliye gentlemen mujhe mashwara do main kya karoon. hamare paas 110 din ka fuel ha. itne hi dino ki khurak hai. agar to do mahino me disha humen mil hati hai. to sab theek ha. dusri surat me hum in samandron me bhatakte rahenge aur fuel ke sath sath khurak ka stock bhi khatam ho jayega. fuel khatak ho jaye to hum ek jaga ruk kar kisi madad ka intezar kar sakte han. khurak ka stock khatam hua to fir hum nahi bach payenge. isliye mujhe mashwaro do. mujhe kya karna chahiye.
sab captain ki baat sunkar ghani chinta me aa gaye the. ab tak wo is baat se anjan the. samjhte the ek samandri tufan ke baad ab koi aur khatra nahi banega. par captain ki suni baat badi hi dahshatnak thi. pratab singh aur vikram singh ko apni backbone me sansanahat hi daudti mahsus hui. wo abhi jaidev ke liye chintit the. jahaz bhatak chuka tha. gahre aur anjan samandron me the. apni patniyon aur bachhu ke sath..
sab chinte me doobe sochon me gum ho gaye.. sab bade aur samjhadr the.. salah mashwara hone laga. aur ek team bana di gayi. ek team khurak ke liye to dusri team jo samandri safar ka tajurba rakhte the, unki banai gai. dusri team captain ke sath masroof ho gai. safar firse shuru hua. aur is baar ka safar kuch logo ke liye ronghte khade kar dene wala safar tha. agle ek mahine tak koi bhi ship nahi dikha to sab aur bhi ghabra gaye. captain ne jaan liya wo samandar ke un raston se guzar rahe han. jahan se kabhi koi ship guzarta hi nahi hai. ab to bass uparwala hi sabko bacha sakta tha.
27 dino tak neem behoshi me rahne ke baad jaidev ki saanse band ho gayee. in 27 days me kai zakhmi mare the. un sab ko samandar me phenk dia gaya tha.
jaidev ki saanse thami to lavanya aur sab dahaden maar maar rone lage. ship crew ne jaan liya ek aur maut ho chuki hai..
kuch minto me jaidev ke marit sharir ko bhi samandar ke lahron ke hawale kiya jane laga.
lavanya vikram ke pairon me gir padi-- nahi.. nahi mere dev ko machliyon ki khurak mat banao. vikram mere dev ko machhliyan nahi khayengi.. mera dev.. mere dil ka tukda..
wahi khada captain bola -- sorry madam hum kuch nahi kar sakte.. aapki hi nazron ke saamne humne kai lashon ko samandr ki nazar kiya hai.
lavanya captain ke pairon me pad gai -- kya iske sharir ko safe nahi kiya ja sakta.. main. main ise apne desh le jaaungi. wahan iska antim---
captain nirdai bante hue -- nahi... aisa nahi ho sakta.. aise to sabne kaha tha. sabki maanta to pure ship par lashon ka dher laga hota. aur epidemic ki waja se sab maare ja chuke hote.. sorry madam! ise phenke bina koi chara nahi hai.
sabki ankhon me darya bah rahe the.
lavanya -- ek ahsan kar sakte han kya aap is lachar maa par
captain- kahiye
lavanya-- mere bete ko bhari saman ke sath baandh kar phenk den. ho sakta hai niche narm mitti ho, ret ho. mere bete ka sharir usme dafan ho jayea. aise me wo machhliyon ke pet me jane se bach jayega.
lavanya ki baat vikram aur pratab ke dil ko lagi..
vikram singh ne hath jod diye -- sir! agar aisa ho sakta hai. ye dekhen hamare hath bandhe han aapke saamne.
captian ne kuch der socha aur haan me sar hila dia. kuch der me jaidev ke sharir ke sath uske wazan se kuch badhkar loha bandh kar usay samandar me phenk dia gaya.
lavanya apne jaidev ko samandar me girte dekh ek bar firse dhadam se gir padi thi. uspar qayamat toot padi thi. uske jigad ka tukda usse hamesha hamesha ke liye door ho chuka tha...
vikram aur pratab ko jaidev ki chinta thi. par ab baki sabki chinta badhkar thi. kyunki wo sab zinda the.. aur zindagi band muthi me ret ke mafik ghatti ja rahi thi..
safar jari raha aur 2 mahine beet gaye. par kahin manzil nahi mili.. lavanya uski betiyan, devika aur uske bachhe abhi tak jaidev ke gham me the. apni ghat rahi saanso se anjan the. maut ki aahat nahi sun pa rahe the.
par kismat me bakiyon ki zindagi likhi ja chuki thi. teesre mahine ke end hone se pahle hi ek ship dikhai de gaya. sab ke andar zindagi ki lahar daud gai. ship ko singal dekar rukne ko kaha gaya.
uske bad sari pareshaniyan khatam ho gai. compass, zaroorat ke mutabik fuel aur khurak us ship se lekar wo ship karib ki bandargah ke liye nikal pada. agle do mahino me jahaz mumbai port par tha. london se nikalne ke 6 mahino baad jahaz apni manzil par pohncha tha..
media aur sarkar ke sath sath aam logo se pura mumbai port khacha khach bhara hua tha.. wahan vikram aur pratab ke parivar wale bhi the.. lavanya apni maa ko dekh usse lipat kar dahaden maarti hui firse behosh ho gai..
sabne jaan liya.. lautne walun me jaidev nahi ha...
...............................................................................................
wahin jaidev ke bhagy me bhi kuch hatke likha ja chuka tha. uski saanse ruk zaroor gai thi. par wo mara nahi tha. jaidev ke sath 4 saal pahle bhi aisa hua tha. jaidev ki saans ekdum se ruk si gai thi. usay hospital lejaya gaya tha. jahan uski ruki saans theek ho gai. pata chala tha. jaidev ko ek ajib bimari ha. jiske chalte uski saans ruk gai hai.
agle ek saal me jaidev ke sath kai bar ye ghatna ghati. kabhi adhe ghante ke liye to kabhi 40 minutes ke liye jaidev ki saans atki rahti thi. baad me jaidev normal ho gaya tha.
ship me uski saans ruki to koi soch bhi nahi saka tha. jaidev ki bimari firse laut aai hai. jaidev mara nahi hai. usi bimari ka shikar hua hai. aise me sabne usay mara hua samjh kar samandar me phenk dia tha....
...............................................................................................
das varshy jaidev ki ankh khuli to usne khud ko neele rang ke narm lekin lachkeele patto par paya. jo pathar ke bane ek ek palang par biche the.. jaidev "maa" pukarta uth betha. tabhi ek ladki uske samne aai. jaidev usay dekh kar hairan hua.. ladki usse do saal badi dikhai de rahi thi. aur pure sharir alag alag rangon se rango hua tha. seena aur tangon ke beech ka area neele patto se dhaka hua tha. jo uske badan ke sath chipke hue the..neele patto ke jaise us ladki ki ankhen bhi neeli thi..
jaidev-- main kahan hon. tum kon ho..
wo jaidev ki bat nahi samjh paai. aur ankhen patpata kar hairat bhari nazron se jaidev ko dekhne lagi. wo jaise kho si gai thi jaidev ko dekh kar.. jaidev firse bola to uchhal padi.. aur cheekhti hui ajib se shabd moh se nikalti hui wahan se bhaag nikli..
jaidev bhi ghabraya hua tha. anjan jaga anjan ladki ke saamne tha. ladki bhagi to wo bhi uth kar usi raste se bahar nikal pada.. jaise hi jaidev bahar nikla.. wo ladkhada sa gaya. uski nazron ke saamne ki dunya sapno ki dunya thi. jahan tak nazar padti thi. wahan ka sab kuch neela tha. neeche zameen se lekar upar aakash tak sab kuch neela tha. door samandar nazar aa raha tha. wo bhi gahra neela tha. itna gahra neela ki jitna hamari dunya ke samandar ka rang bhi nahi tha.
niche zameen kahin dikhai de rahi thi. kuch fasle par neele rang ke pathar dikhai de rahe the... jaga jaga ped pode belen jo neele rang ke alag alag shades me the. kuch halke neele to kuch gahre neele.
jaidev-- hey bhagwan ye kya majra hai..
jaidev apne mathe ko masalte hue bola.. wo aur bhi zayada ghabra gaya tha.
jaidev -- maaa.. papa.. aunty.. uncle.. didi.. bhai tum sab kahan ho..
jaidev rota hua wahan pade ek halke neele rang ke pathar par ja betha.. aur sabko yaad karte hue rone laga.. jane kitni der guzri.. fir jaidev ne apne kandhe par ek hath mahsus kiya to geeli ankhon se sar utha kar dekha.. uske saamne kai chahre maujud the. sab ke sab doodh se bhi gore chitte.. sab ke sab rangon se range hue shariron ke sath the. sabke sharir ke gupt ang ajib neeele rang ke lachkeele patto se dhake hue the.
jaidev sabko dekh kar aur bhi ghabra gaya aur uth khada hua
jaidev-- mujhe meri maa ke paas jana hai. mujhe mere papa ke paas jana hai.
jaidev ki ankhon se bah rahe ansu uski chin par aa kar ikathe hue aur boondon ki surat niche tapakne lage.
pahle wali ladki tukar tukar jaidev ko dekh rahi thi. uski sath uski maa thi.. jiske chahre par bohut hi narm aur payar bhare bhav the. ankhon me mamta ka bharpur ahsas tha. usne jaidev ko apne seene se laga liya. ajib anjan bhasha me jaidev ko pachkarne laga.
jaidev aur bhi dara. par jald hi usay us mahila ke sharir se mamta ka sa skun milne laga. jaidev kuch der me shant ho gaya..
mahila ne jaidev ko khud se alag kiya aur usi pathar par beth kar jaidev ko apne sath bitha kar apni bhasha me baaten karne lagi. sab khamosh khade sun rahe the.
kuch ankhon me jaidev ke liye pyar bhare bhav the to kuch ankhon me hairat bhare..
jaidev ko mahila ki koi bhi baat samjh me nahi aa rahi thi. par bhavanaon ki bhi ek bhasha hoti hai. jise jaidev achhe se samjhne laga. jaane kaisa sukun tha mahila ke sparsh me. jo dhire dhire jaidev ke sharir me utarta chala gaya. kuch der me jaidev firse so gaya..
agli bar jaidev ki ankh khuli to usi kamre me tha. ab tak jaidev ne samjh lia tha. yahan koi bhi ghar zameen se upar nahi hai.. yahan ke sabhi ghar unchai par the. par the sabke sab zameen ke andar gufa ki surat me.. jaidev utha to usne sath ek dusre pathar par sabse pahle milne wali ladki ko sote dekha jo usse kuch hi badi thi. jaidev samjh gaya.. raat ka samay hai. kam roshni se bhi usne andaza laga liya tha. jaidev ko dar mahsus hua. wo utha aur ladki ke sath ja let gaya.
ek ajib sa skun tha is jaga. kuch der me jaidev ki firse ankh lag gai.. dusri subah uski ankh ek hasi se khuli.. jaidev ne dekha to wahi ladki ek kohni niche pathar wale bistar par tikaye hatheli par sar rakhe usay dekh has rahi thi.
kaise khanakti hui awaz theee.. jaidev uski hasi ke sahar me jaise jakadne laga. ladki firse hasi aur jaidev ke chahre par phoonk maar kar khilkhilati hui wahan se bahar jane lagi. jaidev jaise sammohit ho chuka tha uske masum chahre aur khanakti hasi ke karan. wo bhi utha aur uske piche jaane laga.
pahli bar jaidev ne suraj ko dekha tha. kal wo dhayan nahi de paya tha. ab dhayan diya to wo hairan rah gaya. yahan ajib chakkar tha. suraj tak usay neela dikhai de raha tha. dhup jo chhan chhan karti niche aa rahi thi. uski kirnen tak neele mahsus ho rahi thi. na yahan thand ka ahsas tha aur na hi garmi ka..
jaidev mantramugdh hua firse kudrat ke is haseen nazare ke sahar me madhosh hone laga..
yahan koi jaidev ki bhasha nahi samjhta tha. na jaidev kisi ko apni baat samjha sakta tha, sivaye isharon ke.. na hi dusro ki bhasha samjh sakta tha. apne parivar se door hone par usay bohut dukh tha. par yahan ka ajib aur surur bakhsh mahaul usay zayada der sad nahi rahne deta tha. jaidev sabko jald hi bhool kar mahaul ke sahar me kho jata tha. wo jald normal ho jata tha.
agle 6 mahino me jaidev ne yahan ki bhasha seekh li. har koi usay anjan bhasha bolte dikhai deta tha. mahaul ka aadi bana to mahino me hi wo bhasha seekh gaya.
tab usne jana, usay yahan aaye 7 mahine beet chuke han. matlab wo 1 mahina behosh raha tha. uski saans aur sar ke zakham ke chalte usay ek mahine tak behosh rahna pada tha. usay ye bhi pata chala ki usay koi aisi bimari thi, jiske chalte uski saans bohut der tak ruki jaya karti thi. jaiden ne apni bachpan ki bat bata di. fir to jaise jaidev ki bimari ko jad se khatam karne ke liye sab masruf ho gaye. sab jaidev ko apne parivar ka ek sadasy samjhne lage the.
jaidev ko is neeli rang wali dharti ki jo chiz sabse ajib lagi. wo thi yahan ke rahne walun ka pani bhi saans lena. jaise pani ke kuch jeeb pani aur khushki dono par rah lete han. aise hi ye insan bhi the. jaidev jan gaya tha. usay pathar se bandh kar samandar me phenka gaya tha. wo log lohe ke bare me nahi jante the. wahan jaidev ne lohe se bani koi chiz nahi dekhi thi. loha unke liye ek pathar hi tha.. jab jaidev niche gir raha tha. tab is basti ka ek couple samandar ke is area me maujud tha. unhi ne jaidev ko dekh jaidev ki madad ki thi. warna to kai machhliyan jaidev ko niche gahrai me girte dekh uske piche lapak padi thee..
waqt guzarta gaya aur jaidev jawan ho gaya.. wahan ke atmosphere ka ye kamal tha. wahan ke rahne walun ke sharir me naturally taur par bohut zayada changes aane lagte the. unke andar samandri jeevo ki si khasiyat paida hone lagti thi. wahan ki khurak, wahan ki oxygen, sab kuch change tha dusri dunya ki nisbat..
jaidev 18 saal ka hua to wo wahan ke rahne walun ke jaisa ban chuka tha. matlab insan hone ke sath sath samandri jeev bhi ban chuka tha. samandron me saans lena khana peena tak wo jaan gaya tha. kisi bhi samandri jeeb se tez wo swing kar sakta tha. bahar ki nisbat paani me uski shakti kahin badh jati thi. kisi aam insan ke liye uske khushki par ladna asan nahi raha tha. pani ke andar to wo bala tha. jaise wahan ke rahne wale. kisi vishal machhli ko maat de sakte the.. jaidev ki ankhen bhi unki jaise neeli ho chuki thee.
jaidev aaj kuch udas tha. usay rah rah kar apne parivar ki yaad aa rahi thi. wo ab apne ghar laut jana chahta tha. bohut saal beet gaye the. ab aur wo apne parivar se door nahi rahna chahta tha. ye bhi uska parivar tha. aur in sab ke liye bitaye kuch saalon ne uske dil me sabke liye beinteha mohabbat aur chahat bhar di thi. wo in sab ko bhi nahi chhodna chahta tha. par chhodna mukaddar tha...
shaam se kuch pahle wo laut aaya. jisse jaidev ko mamta mili thi. jaidev ja kar uski god me sar rakh kar let gaya gaya. mahila jaidev ke sar ke balon me ungliyan ferne lagi.
mahila - kya hua dev beta. tum aaj kuch udas ho.
jaidev bina uski ankhon me dekhe -- haan maa. mai udas hon. mujhe sab yaad aa rahe han. maa mujhe batao main kya karun. aap sab ko chhodne ka bhi mann nahi hai. par mujhe jana to hai na.
mahila bhi sisak padi -- haan beta. tujhe jana to hai. tu yahan ka nahi hai. chahe to yahan rah sakta hai. par yahan tera dil hamesha nahi lagega. tera dil apnu ke liye hamesha tadapta rahega..
jaidev -- yahi to dard hai mere dil ka maa. yahan se gaya to aapke liye tadapta rahunga..
mahila -- tu ab humme se hai dev beta. jab dil kare milne aa jaya karna.
mahila ka pati bola -- nahi poni dev beta ek baar gaya to laut kar nahi aa payega..
mahila -- sabura! aisa to na kaho. dev ke liye mera dil tadapta rahega. ise firse dekhne ko machalta rahega.
sabura - hamari is dunya ki suraksha ke liye zaroori hai. jab dev beta jaye to iski ankhon par patti bandh di jaaye. kabhi ye apni dunya me jaaye to hamari disha se anjan rahe. na ye kabhi aa sakega. aur na hi koi isse jaan sakega. bhool gai ho.. barson pahle kuch ajnabi hamari dunya me aaye the. aur hamare liye kitne khatarnak sabat hone wale the. hum milkar sab ko khatam na karte to hum kabke mar chuke hote ya unke ghulam bane ji rahe hote.
mahila hont bhinche khamosh ho gai. ye baat jaidev ne bhi sun rakhi thi.
jaidev sochne laga...sahi kaha tha baba ne. aisi swarg jaisi dharti par kisi anjan ka saaya bhi nahi padna chahiye..
kuch dino bad jaidev jane ke liye tayar tha. sab ankhen nam thi. sabse adhik maa aur shoni(wahi ladki jo sabse pahle jaidev ko mili thi) ki ankhen nam thi. wo dil hi dil me jaidev se pyar karne lagi thi. par na jaidev wahan ruk sakta tha. aur na hi wo jaidev ke sath ja sakti thi. ek jaidev ke liye wo sabko nahi chhod sakti thi. aur fir dunya us masum ke liye thi bhi nahi..
aahun siskiyon me jaidev ki ankhen ek khas kisam ke patte lapet kar band kr di gai. aur jaidev sabke sath milkar wahan se nikal pada.. kuch chahro par chinta bhare bhav the. kuch chahre jo jaidev ko wahan rakhne ke khilaf the. par insaniyat unke andar sahi maano me zinda thi. jaidev bacha na hota. sabko usse pyar na ho gaya hota to wo kabhi jaidev ko jaane na dete. jaidev ki ankhon par bandhi patti ke chalte unki chinta ghati bhi thi. fir bhi dilon me ek dar sa tha.
aur unka dar banta bhi tha.. dunya wale to khoj ke chalte dharti ka kona kona chhaanne ke liye tabahi barpa kar dia karte the. wo dharti ab jaidev ki dharti bhi thi. usne bhi soch lia tha. jaan de dega. par us dharti ke baare me ek shabd bhi apne moh se nahi nikalega.. jhooti mooti kahani ghad kar suna dega..
bohut door tak jaane ke bad jaidev ki ankhon par bandhe patte ki patti ko jab khola jane laga to jaidev bol pada..
jaidev -- nahi abhi patti mat utaaro.. mujhe malum hai yahan se wapis kaise jaya ja sakta hai.. aisa karo mujhe aur aage le jaao.. ghumate hue le jaao. mujhe kai chakkar do. taki mai main andaza na laga paaun.. main kis disha se aaya tha. sabko jaidev ki baat bohut pasand aai. wo jaidev se bohut khush hue. kitni fikr kar raha tha jaidev sabki.. vaisa hi kiya gaya. jaisa jaidev ne kaha tha..
jab jaidev ne kaha-- haan ab main koi bhi andaza nahi laga paunga. agar mere dunya me koi mujhe jaan bhi le lega na to bhi wo mere andar se sahi disha nahi jaan paayega..
patti utri... jaidev sabse bari bari milne laga. samandar ki gharai me bhavanaon bhara milan bada hi ajib tha.
kuch minto me jaidev fast speed ke sath tairta hua apni dunya ki orr badh raha tha. jaidev soch raha tha.. uske parivar wale jo usay mara hua samjh kar samandar ki nazar kar chuke the. usay firse apne beech jaan kar khushi se pagal ho jayenge. uski maa, uska papa uski bahne aur sab uske liye kitna tadpe honge.. jaidev apni tadap ke sath sath sabki tadap mitane ke liye jald se jald apne desh pohnch jana chahta tha.
...........................................................................................................................................................
mumbai sahil se 10km door ek 25 manzila imarat.. jiske top floor ek kamre ki khidki ke pass rakhe ek table par 25-46x150 size ki ek badi aur latest binoculars rakhi thi. us binoculars ke piche bethi lavanya singh samandar ka nazara kar rahi thi. jab se uska beta jaidev usse bichhda tha. lavanya jaise sabse door ho gai thi. milti thi sabse. par uske honto ki hasi hamesha ke liye rukhsat ho gai thi.
hona to ye chahiye tha. bete ko samandar me phenk dene ke baad usay samanadr se nafrat ho jaati. samandar ne uske iklote bete ko nigal liya tha. par lavanya ko jaise puri dharti ke samandar me apne jaidev ki jhalak dikhai dene lagi thi. samandar ka nazara karna uske liye aisa tha. jaise wo samandar ko nahi apne bete dev ko dekh rahi ho. saalon se yahi uski routine thi. daily wo yahi aati aur shaam tak samandar par nazren gaadhe bethi rahti. shaam hote hi wo chali jaya karti.. jaane ko mann nahi hota tha. par raat me wo kuch dekh nahi sakti thi. teen betiyan thee. unhe bhi samay dena tha.
yahan usay bohut sukun milta tha. par aaj usse ye sukun aur suvidha bhi chhin rahi thi. 25 manzila imarat ka maalik jo saalon se vikram singh tha. ab iska maalik koi aur ban chuka tha.
bade logo ki dushmaniyan bhi badi hoti han. jo dhire dhire parwan chadti chali jati han aur tabahi phelati jati hai.
rana pratab singh ke sath bhi aisa hi hua. uske bhai ki ladai se shuru hui dushmani itni aage badhi.. kai jaano ke sath sath business ka bhi dher sara loss hua.. vikram singh ne uski madad kari. par wo jaidev ke gham ko apne andar se nikaal nahi saka tha. pure hosh aur jsoh se ladai nahi kar saka. aur pratab singh ke sath hui ladai me wo bhi lapet me aa gaya..
jaidev wali ghatna ke 3 saal baad vikram singh london gaya. par kabhi laut kar nahi aa saka. pratab singh ke dushmano ne vikram singh ko bhari drugs ke case me aisa uljhaya. vikram singh umar bhar ke liye salakhon ke piche kaid kar dia gaya..
jaidev ka gham kam nahi tha. vikram singh ke gham ne sabki jaise kamar hi tod kar rakh di. din prati din halaat bigadte chale gaye. aur aaj nobat yahan tak aa pohnchi thi. jaidev aur vikram ke gham ke baad lavanya ke paas ek zariye bacha tha sukun paane pane ka.. building ke top floor par binoculars ki madad se samandar ka door tak nazara karne ki suvidha bhi usse chhin rahi thi. dushmani ka asar chhote bade sabhi par hone laga. bachhu ke bahtar future ke liye paisa tezi se kam hone laga..
fir bhi sab itne strong zaroor the. dushman ki ankhon me ankhen daal kar ji rahe the. wo alag baat thi ki paise ki power ke sath sath political power aur manpower badi tezi se ghatti ja rahi thi.. ye ek bohut hi serious matter tha. jispar aksar bade mil beth kar charcha karte dikhai dete the..
asha hai yaro ye update aapko pasand aai hogi!
asha hai aap sab ki bharpur support rahegi!
Thanks!
