UPDATE – 1
“Sun raha hai naa tu.. kyun ro raha hun main...
Sun raha hai naa tu.. kyun ro raha hun main...”
Ek bade se concert hall mein is gaane ko perform kar raha tha ek ladka. Jaise hi gaana khatam hua poora hall taaliyon ki gadgadahat se goonj utha. Ek ek karke kayi saare log uska autograph lene aur uske saath photo khinchvane ke liye dhakka mukki karne lage. Iss beech ek ladki, joki uski shayad kuchh zyada hi badi fan thi, usne apne honthon se uske gaal par chhaap bhi chhod thi. Lekin tabhi,
“Ae uth re Rahul.. Ae ab uth bhi jaa. Kitna soyega?”
“Haan… haan kya hua?”
Ek ladka hadbadata hua bistar se uth khada hua. Uske saamne hi khada ek doosra ladka use muskurakar dekh raha tha.
Rahul : Arre kya yaar, kitna achha sapna dekh raha tha. Kya problem hai aapko mujhse!
Ladka : Haan haan sab pata hai mujhe, autograph, selfies aur ladki, yahi sab dikha hoga sapne mein.. haina!
Rahul : Arre aap to antaryaami nikle. Aapka ye talent aaj tak chhupa kaise hua tha.
Ladka : Chal ab naatak matt kar aur jaake ready ho jaa. Nahi to firse subah subah drama chaalu ho jaayega ghar mein.
Rahul : Jo drama karta hai jaakar unhe samjhao naa fir, mujhe kyon bol rahe ho.
Ladka : Ab bakwas band kar aur khada ho jaa. Mujhe bhi fir office jaana hai.
Rahul : Tum aaj se office jaa rahe ho?
Ladka : Haan, Dad ne kaha ki aajse hi join kar loon…
Rahul : Chhee.. chhee.. chhee.. Mujhe pata hi tha wo aapko do din bhi chain se nahi baithne denge. Abhi abhi College khatam hua aur abhi se kaam par laga diya. Main to kehta hoon tum bhi revolt kar hi do!
Ladka : Abbe do din nahi do maheene ho gaye hain College khatam huye. Main bhi pata nahi kyon tujhse behes kar raha hoon aur haan apni laadli ko bhi jaga de jaakar.
Aakhiri baat kamre se baahar nikalte huye boli usne jise sunkar Rahul ke chehre par ek smile tair gayi. Wo utha aur apne kamre se baahar nikalkar saath waale room ki aur badh gaya. Darwaze ko kholte hi usne paaya ke ek ladki bed par teddy ko jakde so rahi thi. Rahul bina aawaz kiye bed ke nazdeek hi baith gaya aur uske chehre ko ek tak dekhne laga. Sote huye wo bohot hi pyaari lag rahi thi.
Rahul : Kitni masoom lag rahi hai sote huye, aur jab jaag jayegi to ek dum se aatankwadi ban jaayegi.
Apne aap se hi ye sab budbudate huye Rahul uss ladki ke gaalon ko thapthapane laga.
Rahul : Mahi.. Chal uth jaa.. Warna late ho jaayegi College ke liye.
Usne kasmaste huye aankhen kholi aur kuchh pal ke liye Rahul ko dekhne ke baad dobara se karwat badalkar let gayi. Tabhi Rahul uski kamar par gudgudi karne laga aur wo hanste huye uthkar baith gayi.
Rahul : Good Morning Aalsi ladki.
Rahul itna kehkar kamre se nikalne hi waala tha ke tabhi Mahi ne use bed par dhakka de diya aur uske pet mein mukke barsaane lagi. Halanki, Rahul ko uske halke fulke haathon se kya hi chot lagni thi par usne bhi dard ka naatak karte huye kaha.
Rahul : Aahh.. Mahi kya kar rahi hai, aahh, chhod naa...
Mahi : Main aalsi hun, haan kya bola aapne? Abhi batati hoon aapko.
Tabhi achanak se Rahul ne Mahi ko pakadkar palta diya aur uske oopar aakar uske pet mein gudgudi karne laga.
Mahi : Haha.. bhai chhodo.. hahaha, chhodo Bhai.
Lekin Rahul uski baat ko nazar andaz karte huye apne kaam mein laga raha. Tabhi Mahi ruansa saa chehra banate huye boli,
Mahi : Bhai chhodo.. haha.. bhai pet dukh raha hai.
Uske chehre ko dekh kar Rahul ek dum se pichhe hatt gaya.
Rahul : Sorry, zyada dukh raha hai kya?
Tabhi Mahi khilkhilaati huyi washroom ki taraf bhaag gayi aur darwaze par se mudkar boli,
Mahi : Aap kitne darpok ho.. Buddhu Bhaiya.
Kuchh pal Rahul wahin khada raha aur reh reh kar uske chehre par muskaan ubhar aati. Fir kuchh sochta hua wo bhi apne kamre ki taraf nikal gaya.
Rahul (Mann Mein) : Teri issi hansi ke liye to main buddhu ban jaata hun. Bas tu hamesha aise hi muskurati rahe.
Kuchh hi der baad Rahul apne kamre se baahar nikla. Black jeans aur white jacket pehne wo bohot hi handsome dikh raha tha. Theek tabhi, Mahi bhi apne kamre se nikli, usne bhi ek White colour ki hi dress pehni huyi thi. Dono ne ek doosre ki taraf dekha aur ek hi saath muskura pade.
Rahul : Aaj tu...
Mahi : Bohot sundar lag rahi hai Mahi, pata hai mujhe!
Rahul ki baat ko kaat te huye beech mein hi wo bol padi jispar Rahul bas muskura kar reh gaya. Dono seedhiyon se utarkar neeche pahunche to paaya ke ek madhyam umra ke vyakti dining table par baithe the aur ek file check kar rahe the. Unhi ke paas Kartik bhi baitah hua tha. Rahul ne ek nazar unhe dekha aur fir kitchen ki taraf badh gaya. Wahin par breakfast ready karti huyi ek mahila ko usne pichhe se gale laga liya aur unke gaal par kiss karke bola,
Rahul : Good Morning Maa.
R/Mom : Good Morning beta. Aaj to bohot handsome laga raha hai, kya baat hai?
Rahul ki taraf ghoom, ek pal ke liye use prashansa bhari nigaahon se dekh kar kaha unhone jispar halka sa sahi par wo sharma gaya.
Rahul : Kuchh nahi Maa, bas aise hi.
R/Mom : Aise matlab. Dekhle kahin mere liye bahu naa dhoond laaiyo. Pehle tere bhai ki shaadi honi hai, keh deti hoon.
Rahul : Maaaa...
Halka sa chidhte huye kaha usne jispar uski Mom ki smile gehri hoti chali gayi.
R/Mom : Chal baith jaa jaakar, aaj teri pasand ke aaloo parathe banaye hain.
Kuchh hi palon baad sabhi dining table par baithe naashta kar rahe the par ek awkward si khamoshi wahaan bani huyi thi. Waise bhi khaate waqt bolna nahi hi chahiye par Rahul aur uske Dad ke beech kahin firse kisi baat par behes naa ho jaaye isliye sabhi chup rehna hi behtar samajh rahe the. Breakfast kar jab sabhi apne apne kaam par jaane ko huye tabhi Rahul ne Kartik ke kandhe par haath rakhte huye kaha,
Rahul : Best Of Luck. Zyada tang karen naa agar ye office mein aapko, to revolt kar dena, subah bhi kaha tha maine.
Aakhiri baat halke se mazakiya lehze mein uske kaan mein kahi Rahul ne jispar wo bhi hansne laga.
Kartik : Tujhe bhi. Pehla din hai tera bhi ek tarah se aaj.
Iske baad Kartik aur unke Mom - Dad ek hi car mein office ki taraf nikal gaye wahin Rahul aur Mahi uski bike par. Rahul ne pehle Mahi ko uske College ke baahar drop kiya aur use bola,
Rahul : Apna dhyaan rakhiyo aur koyi problem ho to call kar diyo.
Mahi : Aap ek hi baat roz kehkar bor nahi hote?
Rahul : Nahi, chal ab jaa.
Jab tak wo Gate se andar nahi chali gayi, Rahul wahin khada hua usse dekhta raha aur fir bike chaalu kar apne College ki taraf nikal pada.
[Waise to ka College alag - alag tha par dono roz saath mein hi jaate the. Rahul ki graduation kuchh samay pehle poori ho gayi thi aur aaj uska aage ki studies ka pehla din hone waala tha. Halanki, ye kewal ek degree lene ke liye kar raha tha wo, warna uska lakshya Singer ban na hi tha. Yahi ek badi wajah thi uss khinchaav ki jo Rahul aur uske Pita ke beech mein bana rehta tha. Wahin Mahi, Fashion Designing mein Graduation kar rahi thi. Uska school time se yahi ek goal tha].
“Kya haal chaal, aaj late kaise ho gaya tu."
College canteen mein baithe Rahul ne saamne se aate ek ladke (Arush) ko dekh kar kaha tha ye, jispar,
Arush : Kuchh nahi, wo Maa ki tabiyat firse kharab ho gayi thi...
Rahul : To aaya hi kyun hai aaj tu? Ghar par rehna chahiye tha naa.
Arush : Arre yaar Didi ne zabardasti bhej diya. Unhone kaha ki wo hain ghar par to mujhe chhuti karne ki zarurat nahi.
Rahul : Main kya kehta hoon, ek baar doctor badal kar dekhna chahiye. Itna time ho gaya ilaaj chalte huye, ek paise ki improvement nahi huyi abhi tak Aunty ki health mein.
Arush : Nahi yaar Sharma Uncle achhe doctor hain aur oopar se wo paise bhi to kam lete hain.
Rahul kuchh derr tak Arush ko ghoorta raha aur fir,
Rahul : To ye fix raha ke kal hi Aunty ko hum kisi achhe se hospital mein check up ke liye le jayenge.
Arush : Par yaar...
Rahul : Keh diya naa maine, bas ho gaya ab!
Arush bhi uski baat chup reh gaya, wo achhi tarah se jaanta tha ke Rahul ke aage uski ek nahi chalne waali. Abhi ye dono kuchh baat karte tabhi inki nazar Canteen ki aur aa rahi ek ladki par padi. Jise dekh kar Rahul muskurane laga.
Rahul : Yaar main soch raha tha, ab bohot din ho gaye single rehte huye, mujhe bhi ab girlfriend bana hi leni chahiye.
Arush : To mujhe kya bata raha hai, tujhe to waise bhi koyi ladki nahi mana karne waali.
Arush abhi bhi kankhiyon ussi ladki ki taraf dekhe jaa raha tha.
Rahul : Hmm, sahi bola tune. Main aaj hi Divya ko propose kar deta hoon.
Ye sunkar Arush ki to jaise jaan hi sookh gayi. Wo Rahul ko kuchh kehta uss se pehle hi wo ladki inke nazdeek pahunch gayi,
Ladki : Hey guyzz..
Rahul : Hi Divya! Divya wo main tumhe kuchh batana chahta tha.
Priya : Haan, bolo.
Idhar Rahul apni hansi ko dabate huye baat kar raha tha wahin Arush ka chehra bilkul rone jaisa ho gaya tha. Lag raha tha ke kisi bhi waqt wo ro hi dega.
Rahul : Nahi kuchh nahi. Tum dono baat akro main abhi aata hoon.
Muskurata hua wo apna bag uthakar wahaan se chal diya par jaate huye Arush ki peeth par ek mukka bhi tika gaya. Naa Divya ko kuchh samajh aaya aur Arush bas abhi huyi poori ghatna ko process karne ki koshish mein laga tha ke tabhi, *Beep*,
Uske mobile ki message tone baji, check karne par usne paaya ke wo Rahul ka hi message tha, “Jaldi se usse apne dil ki baat bol de kameene, nahi to agli baar sahi mein main usse propose kar dunga!”
Message padhkar Arush apni smile ko rok naa paaya aur saath hi thoda emotional bhi ho gaya. Aakhir wo kya sochta tha, ye Rahul bina kahe hi samajh jaaya karta tha.
[Arush, Divya aur Rahul Graduation ke waqt se hi classmates the aur Arush shuru se hi use pasand karta tha. Dheere dheere uska attraction pyaar mein badal gaya par jaisa ke maine pehle bhi bataya ke Arush financially utni stable family se nahi tha wahin Divya Mumbai ke ek naami businessman ki beti thi. Yahi kaaran tha ke ab tak usne iss baare mein Divya ya Rahul ko kuchh nahi bataya tha. Par Rahul ki nazron se ye baat chhip nahi paayi].
Idhar Rahul apne College mein tha to wahin Kartik apne Office ke cabin mein baitha tha. Uske haath mein uska mobile tha jismein wo lagatar photos ko scroll kar raha tha. Par har ek tasveer kewal ek hi shakhs ki thi. Ya kahun ke ye poora folder hi usne isi ki tasveeron ke liye banaya tha. Tabhi ek tasveer par uski nigaahen aur ungliyan dono hi tham si gayi. Ye photo Kartik ne College Farewell ke din kheenchi thi aur uss ladki ki khubsurti shayad uss din alag hi thi. Uss photo ko dekhte huye Kartik uss din ki yaadon mein kho gaya.
[Flashback : Kartik's Farewell Party]...
College ki padhayi poori hona, shayad sabhi ke liye ek khaas din hota hai. Itne saalon se School aur fir College, finally students apne padhayi ke safar ko poora kar paate hain. Iss din ki Khushi shayad hi shabdon mein kahi jaa sakti hai. Par haan kuchh dukh bhi apni jagah bana hi leta hai students ke dil mein, apne friends se alag hone ka, unn memories ka jo unhone College life mein banayi thi. Kartik bhi inhi feelings se ghira hua College auditorium pahuncha. Par uske dil mein aaj ek alag si khushi thi.
Aaj wo faisla karke aaya tha ke Shanaya se apne pyaar ka izhaar kar hi dega.Pichhle 4 saal se wo Shanaya ko jaanta tha. Ek common friend ki party mein mile the dono, fir kismat se dono ne Masters bhi ek hi College se ki. Dheere - dheere Shanaya ki surat aur sirat dono ke hi aage apna dil haar baitha tha Kartik. Par har baar, “Wo kahin Naa keh de to”, issi dar se apne pyaar ka izhaar naa kar paaya tha wo.
Par aaj wo yahi sochkar aaya tha, ke ye shayad uske paas aakhiri mauka hai. Fir pata nahi zindagi mein kya ho jaaye. Par kitni hi derr tak wo Shanaya ka intezaar karta raha lekin wo aayi hi nahi. Udaas sa hokar wo College ke garden ki taraf chal diya jahaan wo aksar khaali time mein baitha karta tha ke tabhi uski nazron ko ek alag hi sukoon mil gaya. Saamne hi Shanaya khadi apne Mobile mein kuchh kar rahi thi.
Yahi mauka tha jab Kartik ne uski chupke se wo tasveer nikaali thi. Lekin tabhi, uski bauhen sikud gayi. Ek ladka muskurate huye Shanaya ke kareeb pahuncha aur usse gale laga liya. Lekin agle hi pal jo hua wo Kartik ke liye uske jeevan ka sabse dardnaak pal tha. Uski nazron ke saamne hi uski Mohabbat, kisi aur ke gale mein baahen daale use choom rahi thi. Apne aap hi uski aankhon mein paani ke katre panap gaye aur wo bina derr kiye muda aur wahaan se nikal gaya.
Par jaate - jaate kuchh shabd uske kaan mein padd gaye the...
“I love you Shanaya!”
“I love you too Baby!”
[Present Time]...
Achanak hi Kartik apni yaadon se baahar aaya aur jaakar khidki ke saamne khada hokar baahar dekhne laga aur apne aap hi dheere se uske honthon se ye shabd nikal gaye, “I still love you Shanaya, I just can't forget you!”
To Be Continued...
