Ankitarani
Param satyagyani...
- 2,959
- 12,558
- 144
Thriller ~ Locket....
"Main ab ye kaam aur nahi karunga , bahut paap
kar liya maine, lekin ab aur nahi...." main apni
puri taqat ke sath uspar jor se chillaya,
lekin uspar iska koyi asar nahi hua, wo mere
karib aayi aur mere seene ko sahlate hue boli...
"tum wo baat kahte hee kyun ho, jise tum kar
nahi sakte..."
"Roshni, ab band karo ye sab...in sabme kuch
nahi rakkha hai...tumhe kami kis baat ki hai..."
"mujhe samjhane ki koshish mat karna, aur
tumne mujhe kya kah kar pukara
abhi....Roshni..." kuch der pahle ki uski
muskurahat ab gusse me badal gayi thi, wo boli "teen raat bistar par kya so liya mere sath , tu
mera name hee lene laga...."
"galti ho gayi Roshni mam, maine socha ki...."
"kya socha...haan "wo beech me hee bol padi"
tumne socha ki teen raat hum-bistar hone par
main tumse pyar karne lagungi aur ye sab
chhod dungi, apni aukat mat bhool ki tu ek taxi
driver hai....."
Main chup khada sirf use dekhta raha , chup rahne ke aalawa main aur kar bhi kya sakta tha, kyunki is waqt main jaha khada tha wo us jagah ki malkin thi...
"raat ke thik 11 baje pahuch kar ,lash ko thikane laga dena..."wo apna farmaan jari karte hue boli" aur chinta mat karo, aaj ke baad tumhe tumhara mehantana mil jayega...."
Main waha khade use dekhta raha , is ummid me ki kahi wo badal jaye aur ye sab karna chhod de...lekin uski aankho me is waqt ek khoonkhar jaanwar dikh raha tha...
"ji mam, main aa jaunga..."bolkar main bhari kadmo ke sath waha se bahar aaya, taxi chalu ki aur nikal pada sadko par....
.
main is waqt kaha ja raha tha, kis taraf ja raha tha, iska mujhe zara sa bhi andaza nahi tha, aankho ke samne is waqt kayi khayalat ubhar rahe the, kabhi mujhe Roshni dikhayi deti ,to kabhi uska wo qutlkhana , jaha wo masoom logo ki bali deti thi, to kabhi mujhe wo waqt nazar aata jab maine apne mahine bhar ki kamayi ko ikattha kar ek achchhe se doctor ke pass gaya aur usne mujhe khabar di ki "mujhe cancer hai aur ye bimari mere pure sharir ko dheere-dheere maut ki taraf ghaseet rahi hai...."
"iska ilaaz to ho jata hai na..."ghabrate hue maine doctor se puchha....
"ho to jata hai, lekin ab tumhara nahi ho sakta..."
"kyun..."maine ye lagbhag rote hue kaha tha...
"ab bahut samay ho gaya hai aur yadi tum apna ilaaz bhi karwaoge to iske liye bahut kharch hoga...."
Dil bhar aaya, aankhe rone ke liye taiyar thi, gala sookh chuka tha..lekin maine waha khud ko kaise bhi karke sambhale rakkha aur waha se bahar aaya....us din main apne kiraye ke makan me nahi gaya, dinbhar sadko par yun hee khali taxi chalate hue bas apne anjaam ke baare me sochata raha , aisa anjaam jise ab koyi nahi badal sakta tha, main pal-pal mar raha tha, ghadi ka aage badhta hua har ek kaanta mujhe nazdik aa rahi maut ka abhaas kara raha tha...
.
us din sala pahli baar khud ke gareeb hone par itna dukhi hua main...wo raat maine yun hee sadko par taxi chalate hue guzari, maut to abhi door thi lekin us raat main har waqt tadap-tadap kar mara....mujhe sabse jyada chinta khud ke maut se nahi thi balki is baat se thi ki mere jane ke baad meri behan Gudiya ka kya hoga...wo to abhi chhoti hai, uska to mere siwa is duniya me koyi aur hai bhi nahi....mere marne ke baad kya karegi wo..? kaha jayegi...? kiske sahare apni zindagi jiyegi aur sabse badi fikar is baat ki ho rahi thi ki meri chanchal bahan mere marne ka sadma kaise bardasht karegi....use to is saal bade school me bhi bhejna hai, ab yadi main nahi raha to kaun ye sab karega uske liye....
"Santosh..." mere ek dost ka naam mujhe yaad aaya, Meri zindagi me shayad main sirf teen ko hee achchhi tarah se janta tha , ek to meri bahan Gudiya, dusara santosh aur teesara tha mere taxi ka number.....is waqt mujhe Santosh hee ek matra sahara dikhayi de raha tha, lekin agle hee pal mujhe uske ,uski biwi se maar-peet ki ghatna yaad aayi ,jiske baad uski biwi ne khudkhushi kar li thi....
"nahi, wo to sala bahut bada kameena hai,...uska koyi bharosha nahi ,wo kuch paiso ke liye Gudiya ko bech....."aage ka main soch nahi paya,kyunki mere samne is waqt ek ladki khadi thi aur uske achanak is tarah se samne aane ke karan maine jordar break mara....
"Agrasen nagar chaloge...."usne aakar mujhse puchha...
"maaf kijiye, "
"soch lo..."
"ab sochane ke liye waqt hee nahi hai, kisi dusare ko pakdo..."kahte hue maine taxi phhir se start ki....
"yadi tum mujhe agrasen chauk tak chhodoge to, ye Do hazar ka note tumhara..."apne purse se Do hazar ka ek note nikalkar mujhe dikhate hue wo boli" jyada socho mat, ye mauka baar-baar nahi aata..."
usne mujhe na sochane ke liye kaha tha,lekin uske ulat ab main sochane laga tha, ek taxi driver ke liye do hazar ka note bahut jyada hota hai aur abhi jo halat meri thi uske hisab se to ye behad hee jaroori tha ki
main use uske manzil tak chhodu aur do hazar ka kadak note, jo abhi bhi uske hath me tha, use apne hath me le loon...abhi main soch hee raha tha ki wo boli...
"2500....ab kya bolte ho" aisa bolte hue usne 500 rupaye ka note aur nikala.....
abhi is waqt jaha maine taxi roki thi, wo shahar se ekdum door ek jungali area tha, jaha raat ke 7-8 baje ke baad cycle wala tak dikhayi nahi deta, aur jo ladki is waqt bahar khadi thi wo zaroor bahut hee rahis hogi....aisa maine andaza lagaya aur uski taraf ek nazar dekha....gora rang, achchhi-khasi height, mathepar ek kala lamba bindi, kano me bade-bade jhumke, gale me ajeebo-garib latakta hua Locket aur hontho par rahasyamayi muskan....meri nazar ab bhi us ladki par tiki hui thi jo is waqt 2500 rupiye liye hue taxi ke bahar khadi thi.....
"ok,fine...jab tumhe nahi jaana to main tumhe force nahi karungi..."jab bahut der tak main use dekhta raha tab wo boli aur waha se samne ki taraf sadak par chalne lagi...
"main taiyar hoon, chaliye.."khidki se apna sar nikalkar maine use aawaz di...
Wo muskurate hue palti aur aakar seedhe taxi me baith gayi...Agrasen chauk ,waha se lagbhag aadhe ghante ki doori par tha aur waha personal booking par kisi ko le jaane par adhik se adhik 500 ya 600 rupaye hee lagte the, lekin mujhe to 2500 rupaye mil rahe the, isliye main us ladki ko mana nahi kar paya....
.
Aaj man ukhda -ukhda sa tha isliye sunsan sadak hone ke bawzood main taxi bahut dheere chala raha tha,..tabhi wo boli...
"new driver ho kya...."
Itni der baad achanak se uske bolne par main thoda sa chauka aur peechhe mudkar uski taraf dekha...
"maine puchha, abhi-abhi taxi chalana seekhe ho kya..."
"5 saal ho gaye..."
"to phhir speed se chalao, jis speed se hum ja rahe hai, usme to agrasen chauk tak pahuchne me kal subah ho jayegi...."
Uske kahne par maine ek nazar meter par dali, wo sach kah rahi thi...taxi abhi 40 ki speed se bhi neeche chal rahi thi, maine taxi ki speed badhayi aur tezi se agrasen chauk ki tak taraf badhne laga....us waqt maine ek chiz gaur ki aur wo ye ki jo ladki is waqt peechhe baithi hai, wo lagatar mujhe hee ghoor rahi hai, jabki bahar ka nazara mujhse lakh guna achchha tha, dekhne ke liye...
"kisi problem me fanse ho kya..."
subah se main ek dard seene me liye hue tha, aur andar hee andar ghut raha tha....main apna dard kisi ko batana chahta tha, kisi ke sath apna dard kam karna chahta tha, lekin meri is zindagi me is waqt aisa ek bhi shaks nahi tha, jise main ye bata pata...isliye jab usne mujhse puchha to bina ek pal ki deri ke turant bol pada....
"mujhe cancer hai..."
"oh !" wo sirf itna hee boli "dikkat isse bhi badi hai, memsaheb, mujhe cancer hai ya main kuch dino me mar jaunga, iski mujhe jyada parvah nahi hai, parvah hai to sirf apni bahan ki...jiska mere baad is caroro ke population wale desh me koyi nahi hai...."
"oh !" wo phhir itna bolkar chup ho gayi....
us waqt mujhe khud nahi pata ki main use ye sab kyun bata raha hoon, main aage bola...
"aajkal khabar bhi aisi aati hai ki kaleja fat padta hai, kuch kamine log anath ladkiyo se jismfaroshi ka dhandha karwate hai....kahi mere marne ke baad meri behan ka bhi yahi haal....."bolte hue maine taxi wahi rok di, aur taxi se bahar nikal kar khud ko rone se rokne ki koshish karne laga.....is dauran wo ladki car me hee baithi rahi, jab maine khud ko sambhal liya to wapas taxi me baitha aur taxi aage badha di....
"cancer ka ilaaz mumkin hai, doctor ne kya bola..."
"shayad aapne meri halat nahi dekhi, main ek taxi driver hoon..."
"to kya taxi driver cancer ka ilaaz nahi karwa sakta aisa koyi rule hai kya..."
"aap samjhi nahi, mera kahne ka matlab tha ki ek taxi driver ke pass itne paise nahi hote ke ,wo cancer jaise beemari ka ilaaz karwaye...." bolte hue main muskura utha.... Dard se hee sahi par muskura utha..
.
uske baad uske aur mere beech koyi baat nahi hui...maine agrasen chauk par taxi roki, usne utar kar mujhe 2500 rupyee diye aur aage badh gayi...main ab bhi wahi apni taxi me baithkar use waha se jate hue dekh raha tha...
"kash ki main bhi itna ameer hota..."
"suno..."usi waqt peechhe palat kar wo boli "kisi jhad-phhok karne wale baba ke pass nahi gaye..."
"haaaiiinn...."
"itna chauko mat, unke pass bahut hee ajeeb -ajeeb shaktiya hoti hai, yadi kisi ko jante hoge to chale jana...kya pata kismat tumhare hatho ki lakeero ko badal de..." itna bolkar wo phhir jaane lagi
"dil ko bhatkane ka achchha tareeka bataya hai aapne..." maine aawaz unchi karke use kaha...
"kya..." wo ek baar phhir palti "i am not jocking...it's real and serious..."
"kya..."
Mere kya kahne par jaise use samajh aaya ki wo is waqt kisi english coaching class ke teacher se nahi balki ek taxi driver se baat kar rahi hai, usne apna hath apne sar pe mara aur boli...
"main mazak nahi kar rahi, aisa sach me hota hai..."
"taxi driver hoon, iska matlab ye nahi ki mujhe koyi bhi topi pahna kar chala jayega..."
"as your wish, if you don't believe on this kind of magic, then go...i don't care "
Uske is lambe chaude english bhari lines ko sunkar main uski taraf ektak dekhta raha aur kuch der baad use phhir samajh aaya ki wo is waqt ek taxi driver se baat kar rahi hai....
"sorry again ! Mere kahne ka matlab tha ki......"wo meri taraf aayi, usne apna chehra meri taraf kiya aurphhir ekdum achanak se cheekh kar boli
"bhad me jao...."
"oye teri maa ki...." pura kaan jab jhalla utha to main andar hee andar bola...uske is tarah ke bartaav ke karan mere andar ek ummid ki kiran jal uthi thi, main turant taxi se utra aur lagbhag bhagte hue uski taraf pahucha....
"suniye..."
"what...?"
Maine ek lambi saans bhari aur phhir hadbadate hue bola "main kisi bhi jadugar ko nahi janta...yadi aap kisi ko janti ho to , mujhe uska pata de dijiye..."
"jo ye kaam karte hai ,unhe jaadugar nahi kahte unhe tantrik kahte hai..."
"jo bhi ho...yadi aap kisi achchhe tantrik ka pata de deti to...."
"main khud hoon" wo boli aur apna ek hath aage badhate hue kaha "mera naam Roshni hai..."
"kya EekEekEek" uske aisa bolne par maine use ek baar upar se lekar neeche tak dekha, yadi us waqt meri jagah koyi aur bhi us waqt hota to wo us ladki ko koyi aameer bigdi hui ladki kahta, jo apne baap ke paiso ko bade jor-shor se udati hai...
"mazak karne lagi aap bhi..."
"listen and always remember one thing ..."english bolte-bolte wo rooki aur phhir hindi me boli "ek baat hamesha yaad rakhna ki ,main kabhi jhooth nahi bolti..."
"sach..." us pal mujhe kuch thik lagne laga tha, jo udasi seene me subah se thi , wo ab thodi nikal gayi thi,
maine aage kaha "chalo phhir mere cancer ka ilaaz kar do..badi meharbaani hogi..."
"taiyar ho, kyunki is kaam ke badle me main tumhe jo kahungi...wo tumhe karna padega..."
"main karunga, siway ek kaam ke..." haste hue maine kaha "main kisi ki jaan nahi lunga..." Mere aisa kahne par wo bhi mere sath hans padi, lekin mujhe maloom nahi tha uski is masoom hansi ke peechhe ek khoonkhar jaanwar dahad maar raha tha...mujhe zara sa bhi andaza nahi tha ki main apni zindagi ki sabse badi galti karne ja raha hoon...mujhe uske sath uske ghar nahi jana chahiye tha, bilkul bhi nahi jana chahiye tha...lekin main gaya, haste-muskurate hue gaya.....
"ab bolo , mante ho na ki ,main bahar mazak nahi kar rahi thi..." main ek room ke andar aaya , Jaha ka nazara dekh kar jehan me ek bhayankar dar bhar gaya,
jab main Agrasen chauk se neeche utar kar uske sath yaha aa raha tha to maine socha tha ki wo ek bigdail ladki hogi, aur is bahane se wo shayad mere sath raat guzarna chahti ho....main uske sath gaya , kyunki aisa pahli baar nahi ho raha tha, aksar raat bhar party me ghumne wali ladkiya sharab peekar aisi hee harkate karti hai...aur mere sath to do-teen baar pura khel ho chuka tha, isliye main yahi sochkar Roshni ke sath aaya tha...lekin is waqt jis room me main khada tha, waha ek taraf ek ladki ki lash padi thi, chehra par ek ajeeb tarah se nishan banaya gaya tha aur sar ke baal gayab the....uski halat dekhkar maine apne aankhe band kar li aur turant waha se bhaga,...
"Apni zindagi chahte ho to wapas aao..."ek aawaz us pure ghar me gunji...lekin maine us aawaz ko puri tarah nazar andaz kiya aur waha se bhag kar waha pahucha jaha maine taxi khadi ki thi aur waha se seedhe apne kiraye ke room ki taraf full speed me nikla.....
us ladki ki laash jise maine Roshni ke ghar me dekha tha, wo ab bhi mere aankho ke samne se nahi hat rahi thi, rah rah kar us pure kamre ka drishya meri aankho ke saamne chhane lagta... jab bahut koshisho ke bawzood main pareshaan hee raha to apne bistar se uthkar bahar nikla aur wahi room ke aas-pass tahalne laga aur kuch der ke baad apne room me wapas aaya aur Gudiya par ek nazar dali... Gudiya aaram se so rahi thi aur use aaram se sota dekh ek sukoon sa mila...lekin na jaane wo kaun si manhoos ghadi thi...jab mere man me ek baar wo shabd gunje jo Roshni ne mujhse kahe the....
"tumhare cancer ke ilaaz ke badle me main tumhe jo kahungi karna padega..."
kya karwana chahti thi wo mujhse, aur wo ladki..jiski lash maine uske ghar me dekhi wo kaun thi aur kya use Roshni ne mara tha...? achchha hua jo main waha se bhag nikla warna na jaane wo mere sath kya-kya karti...main khud ullu tha jo ki uske sath uske ghar tak kuch aur samajh kar gaya....
.
ab mujhe wo kisi chudail ki tarah lag rahi thi aur mujhe is waqt yahi lag raha tha ki kahi wo mere peechhe na pad jaye...main dil hee dil me uparwale se yahi dua maang raha tha ki wo ladki mujhse kabhi sapne me bhi na mile......
.
"Avadhesh ,bhaiya...Avadhesh bhaiya...."
"kya hua gudiya...."
"wo neeche wali aunty na khana nahi de rahi hai, bol rahi hai ki..."
"tu yahi baith , main aata hoon..."bistar se uthkar maine shirt pahni aur neeche ki taraf seedhiyo se jane laga, is waqt main gali khane ja raha tha ,kyunki Gudiya jise aunty bol rahi thi,wo koyi aur nahi balki humare kiraye ke room ki malkin thi aur unhi ke mess me hum khana bhi khate the....Gudiya chhoti thi, isliye har kahi fudakti rahti thi, kabhi-kabhi to wo room malkin ke pass bhi chali jati aur unki beti ke sath khelti rahti....jiska fayda seedhe mujhe hota tha, kyunki yadi main taxi chala raha hota hu to Gudiya unhi ke ghar ke park me khelti rahti hai aur yadi raat ho jaye to wo unhi ke ghar me so jati thi.....humari room malkin dil ki bahut achchhi thi, unhone Gudiya ko lekar kabhi shikayat nahi ki, balki wo bhi usse pyar karti thi....
.
Par zindagi sirf pyar ke sahare nahi chalti, uske liye bahut sara paisa chahiye hota hai...Humari room malkin meri mazboori samajhti thi ,isliye unhone meri latelateef ke liye kabhi jyada ladayi nahi ki,lekin room ka kiraya diye hue is waqt 3 mahine se jyada ho chuka tha...aur Gudiya ko mess se khali pet bhejne ka uska yahi maksad tha ki, mujhe thoda akal aaye aur main use paise jaldi doon....main khud bhi ye baat badi achchhi tarah se samajhta tha , lekin pichhale ek mahine ki kamayi doctor ke pass jo fek di thi, isliye abhi mushkil tha.....
.
us din makan malkin se baat karne par ye maloom chala ki yadi maine unke paise jaldi nahi chukaya to mujhe room khali karna padega....ek to ye jaanlewa beemari aur upar se paiso ki kami ne meri pareshanime char-chand laga diye the....maine unse minnat ki...ki wo aaj Gudiya ko khana de de, kal main unke aadhe paise chuka dunga....
.
Uske baad maine seedhe taxi nikali aur kuch kamane nikal gaya, kyunki yadi thode bahut paise bhi main unhe de deta to kuch dino ki mohlat mil jati....main nikla to kisi aur kaam se tha lekin is waqt bhi mere aankho ke samne kal raat wala drishya chal raha tha, mujhe wo ladki dikh rahi thi, uski wo muskan dikh rahi thi aur uske baad maine dekha ek ghar aur us ghar ke bheetar ek lash.....jiske pure sharir se kapda gayab tha aur khoon se sana hua...
.
"Agrasen chauk tak chaloge bhaiya..."do ladko ne khidki ke andar jhak kar mujhe aawaz di...
Agrasen chauk...ye sunkar hee maine turant unhe mana kar diya ,
"please bhaiya chalo na, double paise le lena....bahut raat ho gayi hai..."
"achchha baitho..." double kiraya sunkar maine unhe baithane ke liye kaha , kyunki kaise bhi karke mujhe apne makan malkin ka bill chukta karna tha...lekin pareshani ab bhi thi ki mere jaane ke baad ye sab kaun karega....
un dono ko agrasen chauk tak chhodne ke baad maine us ladki ke ghar ki taraf dekha, jaha se kal raat main bhaga tha, na jaane kyun ab wo ghar mujhe ek bhootiya ghar dikh raha tha, ek baar maine socha ki jakar police ko iski suchna de doon, lekin agle hee pal khayal aaya ki kahi wo jaadu-tone se kuch kar na de aur waise bhi mera koyi pachda nahi tha us ladki se...isliye maine waha se jaane me hee bhalayi samjhi....maine taxi wapas ghar ki taraf mod di, lekin chinta is baat ki sata rahi thi ki main apne makan malkin se kya bahana marunga, aaj ki puri kamayi to 500 hee hai, itne me to wo manne se rahi, upar se aaj Gudiya bol rahi thi ki use bukhar hai, uske liye dawai bhi leni hai....
.
aur us manhoos waqt me maine apni taxi darte hue wapas agrasen chauk ke taraf modi aur waha se us ghar ki taraf jaha mujhe hargiz nahi jana chahiye tha...kuch der tak main Roshni ke ghar ke bahar hee taxi me baitha raha, ek ajeeb sa dar is waqt mujhe ghere hue tha, na jaane andar kya hoga, na jaane wo mujhe dekhkar kya karegi...kahi wo mujhe bhi na maar de...lekin usne kal raat kaha tha ki meri beemari ka ilaaz wo kar sakti hai,...
.
khud ko mazboot karke main kanpte hue kadmo ke sath taxi se nikal kar darwaze ki taraf badha aur darwaze ke nazdik pahuch kar bhi main bahut der tak waha khada ye sochta raha ki andar jaun ya na jaun....sahsa maine darwaza ke bahar lagi ghanti bajayi aur agle hee pal darwaza khula aur uska muskurata hua chehra mere samne tha....Roshni ko dekhkar mera gala sookh gaya , wo is waqt apne jism me sirf ek kapda lapete hue thi ,aur uska pura jism is tarah se bheega hua tha, jaise ki wo abhi kuch der pahle naha rahi thi,...yadi wo naha rahi thi to phhir itni jaldi usne darwaza kaise khola ? Kya use pahle se maloom tha ki main yaha aane wala hoon ?
.
"main janti thi, tum zaroor aaoge..." samne se hat kar usne mujhe andar aane ka ishara kiya aur seedhiyo se thik usi room ki taraf jaane lagi, jaha maine kal raat ek ladki ki khoon se sani lash dekhi thi....
"are aao, ghabrao mat...kuch nahi hai ab" room ke bahar jab main khada ho gaya to wo boli, aur phhir apne hath se mera hath pakad kar andar kheench li...
andar sachmuch me kal jaisa kuch bhi nahi tha, maine pure room par ek nazar mari aur bola...
"meri beemari ka ilaaz ho sakta hai kya..."
"bilkul ho sakta hai, lekin uske liye main tumhe jo kahungi karna padega..."
"na to main kisi dusare ki jaan dunga aur na hee apni" uske aage bolne se pahle hee main bola...
waise to us waqt main kuch bhi bolne ki halat me nahi tha, kyunki mujhe uski zaroorat thi aur main khud yaha aaya tha, isliye jo bhi bolna tha use hee bolna tha....lekin main phhir bhi bola, kanpte hue bola....jiske jawab me usne mujhe ek baar phhir apni qutl bhari muskan dikhayi...
"don't worry, main tumse aisa nahi karwaungi...lekin jo kaam hai wo bahut hee khatarnaak hai..."
"kya karna padega mujhe..."
"tum kal, isi waqt par aana , wo main tumhe bata dungi...ab tum ja sakte ho ya phhir raat bhar yahi ruk kar main kya karti hu ye dekh sakte ho..."
main pagal nahi tha, isliye main turant waha se nikalne ke liye peechhe muda...lekin tabhi usne mujhe aawaz di..
"suno...ye lo "
"kya..." bolte hue main peechhe muda to mera muh khula ka khula rah gaya, is waqt mere samne 100-100 ke note ki ek gaddi thi,
"le lo, this is your advance..."
Uske hath se maine wo rupaye liye aur lagbhag daudte hue waha se bahar nikla.....
.
dusare din main thik usi samay par waha pahucha, aaj uske ghar ka darwaza pahle se hee khula tha, dar to aaj bhi lag raha tha, lekin kal se thoda kam.....wo bahar wale room me hee baithi t.v. dekh rahi thi aur aaj uske pure jism me kapde the...mujhe dekhte hee usne mujhe apne sath upar chalne ke liye kaha aur jaise us room me main dakhil hua, maine apni aankhe band kar li....is waqt waha zameen par ek lash padi hui thi, us waqt lash par meri sirf ek nazar gayi thi...lekin phhir bhi maine bahut kuch dekh liya tha,
jo lash is waqt zameen par padi thi , uski dono aankho ko badi berahami se nikala gaya tha....
"tumhara kaam ye hai ki, tum iske sharir ko thikane lagaoge..."
"kya Eek"
"yahi kaam hai...."
Mujhe usi waqt uske kaam ke liye mana kar dena chahiye thi aur us din ki tarah aaj bhi ulte paanv waha se bhag lena chahiye tha, lekin maine aisa kuch bhi nahi kiya...main wahi khada hokar apni aankhe band kiye hue tha, shayad main us waqt is kaam ke liye himmat juta raha tha....
.
uske baad maine waisa hee kiya, jaise usne kaha tha, maine us lash ko taxi me rakkha aur phhir ek khayi se neeche fek diya, jiske badle me mujhe usne phhir 100-100 ki ek gaddi thama di....sath me usne mera mobile number liya aur mujhe apna number diya aur boli ki jab use meri zaroorat hogi to wo mujhe bula legi....
.
uske baad ek hafte tak uska koyi phone nahi aaya, uske diye hue paiso se meri us waqt ki lagbhag saari problem door ho gayi thi lekin mujhe andaza hone laga tha ki mere is kaam ka nateeza bahut bura hoga...main jo ye paap kar raha hu , iska bura parinaam Gudiya ko na bhugatna pade isliye maine kali nazar se bachane wala ek locket lakar uske gale me pahna diya....ek hafte baad jab main taxi chala raha tha to Roshni ka phone aaya, usne mujhe Raat ko thik usi waqt aane ke liye kaha...kyunki mujhe andaza ho gaya tha ki mujhe kya karna hai, isliye main thoda taiyari se waha gaya aur mera andaza sahi bhi nikla, us din ki tarah aaj bhi mujhe ek lash ko thikane lagana tha....
.
Waise to mujhe cancer ki beemari ne jakad rakkha tha, lekin is waqt mere pure sharir me paap bhara hua tha, main janta tha ki jo main kar raha hoon wo galat hee nahi balki ek paap bhi hai, lekin mere is paap se do zindagiya sanwar rahi thi, ek meri aur dusari meri bahan ki...isliye main is kaam ko karta gaya....
.
uske baad usne mujhe do baar aur bulaya , is beech hum dono ke beech yaun-sambandh bhi jud gaya, kyunki usne mujhse kaha tha ki yadi mujhe cancer ki beemari se chhutkara pana hai to mujhe uske sath sona hee padega.... wo har baar mere kaam ke paise mujhe deti jati aur bolti ki jald hee meri beemari door ho jayegi aur phhir mujhe wo chhod degi....
.
Mera phone jo itni der se shant pada tha wo bajne laga , call Roshni ki thi....
"aaj bas aakhiri baar, mera kaam kar do, then yo may go...main tumhe nahi rokungi...."
"meri beemari ka kya hua..."
"wo to kab ki thik ho chuki hai...doctor se test karwa ke dekh sakte ho...."
"thik hai, main aa jaunga...."
Uske baad maine phone wapas apni jeb me thusa aur sabse pahle usi doctor ke pass gaya , jisne mujhe meri maut ki khabar sunayi thi...aur is waqt wo apni aankhe phhad-phhad kar kabhi mujhe dekhta to kabhi apni reports ko...
"i can't believe...how is it possible...tum thik kaise hue,..."
"dhanyavaad doctor..."
"tumhari reports dekhkar aisa lagta hai ki jaise tumhe kabhi kuch hua hee nahi tha..."
Uske baad maine taxi Roshni ke ghar ki taraf modi aur har baar ki tarah aaj bhi uske ghar ka darwaza khula hua tha....jab bahar wale room me wo mujhe nahi dikhi to main seedhe us room ki taraf badha , jaha wo apna cheera-fadi ke kaam ko anjaam deti thi...mujhe abhi tak iski koyi jaankari nahi thi ki wo jinhe marti hai wo kaun hai ,aur wo aisa kyun karti hai....
.
har baar ki tarah waha aaj bhi ek lash thi , jiske pure jism ko ek chadar se lapet diya gaya tha, mere hath hamesha ki tarah aaj bhi lash ko uthate hue kanp rahe the, usne mujhse aaj kuch bhi nahi kaha,...jabki har baar wo mujhe next date bata deti jisme mujhe aana hota tha...lekin wo aaj mujhe kuch nahi boli....maine lash ko taxi me rakkha aur us khayi ki taraf badh chala jaha se maine kayi lasho ko neeche phheka tha....
"bhagwan mujhe maaf karna, main ye sab bilkul bhi nahi karna chahta tha...lekin meri bahan ke khayal ne mujhe ye sab karne par mazboor kar diya...." kahte hue maine lash ko khayi se neeche phhenka aur jaise hee wapas muda to mera pair kisi chiz se takraya...maine us chiz par tourch ki Roshni mari aur jaise hee us roshani me maine wo chiz dekha mera pura khoon sookh gaya, kaleza jaise fat pdaa ho...main sirf itna hee bol paya...
" Ye to wahi locket hai, jo maine Gudiya ko diya tha...."
Omg...it was compeletly shocking story....specially in last scene...
Avdhesh ji....ek taxi driver hai...jo apni chhoti bahan gudiya ke sath rahte hai...
Doctor unhe cancer btata hai...jo ki last stage pr hai...(m i right)...ab avdhesh ji ko chinta hone lgi ki unke bad unki bahan ka kya hoga...sach hi hai...khud ki jaan se jada hme hmesha apno ki fikar hoti hai...
Mene kahi pdha tha ki...jeena to kabka chhod chuke hote...agr kuch rishto ka karj na chukana hota ...ek or...dunai me aaye ho to jeena hi pdega...jeevan hai agr jahar to peena hi pdega...(wese bad wale ka koi talmel is story se nhi hai) mtlb...hme jeena hi hota kabhi apne lie to kabhi apno ke lie...islie hm jeena chahte hai....sansar me shayad ye rishto ki dor bhi sahi hai....wrna na jaane aajke time me dipression ke chalte kitne log sucide kr lete wo ruke hai to apno ke lie..ye sahi bhi hai...apno ke lie hi insan mahnat krta hai...din raat lga deta hai...
Avdhesh ji ki ye tension bhi sahi thi...apne khyalo me khoye hue....chale jaa rhe the...unhe ek sawari milti hai...roshni naam ki...roshi unse unki tension puchhti hai....avdhesh ji bta dete hai....kabhi kabhi apno se apni mn ki baat krne ka mn nhi krta...gairo se krta hai...kyuki gair hmari preshaniyo ko kisi ko bta nhi skte...or kuch solution ya kmsekm dilaasa to dete hi hai...jisse positivity aati hai....lekin kabhi kabhi ye hanikarak bhi ho jaata hai...
Us ldki ne avdhesh ji ko unke cancer ki bimari ka ilaaj btaya...or khud ko btaya ki wohi tantrik hai...
Mjburi insan ko kucu bhi krne ko majbur kr deti hai...whi inke sath hua...drte hue hi sahi...pr andar gye...lekin ek lhash dekhkar hi bhaag aaye..
Ek jimmedar nagrik hone ke naate inhe pilice ko btana chahiye tha...jimmedar nagrik...ye shabd kitaabo me...ya kahaniyo me ya akhbaaro me ya bhashan me bahut achha lgta hai...lekin mjburioyo ke aage ye shabd nhi chalte...mjburi...ek esi janjir hai...jusme insan uljhta hai...to use achha bura....pravachan,kahavte....kuch yaad nhi rhta...use bs apni musibt ko hal krna hota hai...yhi avdhesh ji ke sath hua...pahuch gye wapas whi...jaha unhe nhi jaana chahiye...unki mjburi le gyi....makan ka kaafi time se kiraya na dena...malkan malkin ka khana na dena...isse bdi kya mjburi hogi...
Maakan maalik...bahut log behcare kiraye pr rahte hai...makan maliko ko unki mjburi smjhni chahiye...kiraye ke lie late kya hue...ki kamra khali krdo...are bhai...tumhare revenue bs kiraye se nhi aata...or bhi saurces hote hai(mostly)..khair...mjburiya wapas avdhesh ji ko le gyi whi...roshni ke ghar...wha ek ajib or grib khofnak manjar...ek lhash ki ankhe nikli hui....or use thikane lgane ko kaha jaata hai...or btaya jaata hai ki ye aakhri kaam hai iske bad aajad....
Yha ek baat sochne ki hai...ki avdhesh ji kitne khush honge ki unka cancer bhi thk ho gya...or ab is illigal kaam se bhi free ho jayege...lekin unhe kya pta tha ki cnacer ka ilaaj me pese beshak na lge ho...lekin unki bahan ki jindagi jrur lg gyi...
Anjane me unki bahan ne apni life abdhesh ji ko dedi...jb last me lhash thikane lgate hai to...chaunk jaate hai...kyuki ye akhri lhash unki bahan ki hi thi...
Achhi kahani thi swati ji...bahut hi achhe se narration kiya aapne...writting skill awesome...
Last me thodi si clearity or hoti to mja aajata hai...wese hm sb kuch smjh chuke hai...lekin fir bhi padhkr or achha lgta hai...cancer kaise thik hua....ispr last me roshni ke muh se thoda sa khulasa hota...or last me avdhesh ji ki manodasha or kmsekm ek baar roshni se or milna dikhaya hota to or jaada mja aajata...
Overall a great thinking...kaahi bhi bor nhi hue...awesome...just brilliant...and all the best...
Or haa...agr is review me koi galti hui ho to maf kijiyega...mene aaj dusri baar review diya hai life me...pahla leon ji ki kahani pr tha...to shayad ye sb mujhe jada nhi aata...
Last edited:
majburi thi...
bech rahata jisme mere parivar ka gujara chal raha tha or jub me Anish ke gher apna rishta lekar bhejta to kya wo muje unki ladki ka rishta acept karte uska dar lagraha tha koi
kharid li me ne bajar wo bi 30rs ki hub meri hesiyat ke hisab se or chal pada waps Anisha ke piche.
..
