Surmai Shaam, dhalte hue suraj ki antim kirne komal sharir ko sehla rahi hai, panchi ud chale hai apne basero me, unki chahchahaahat ke saath khayalon ka panchi bhi laut aaya hai mere dil mein… Dur-Dur tak manmohak lehlahati rang-biraangi hari-bhari kyaariyaa, chehre se takrati halki sard hawa ke jhoke….
Khamoshi se behta hua nadi ka paani jaise ki lehron ne pyaar ka izhaar kiya ho aur wo apne premi se milne jaa rahi ho. Hawao mein bhikhari phoolon ki khushboo jaise ki dard phoolon ki tarah mehake agar tu laut aaye aur aasama ko dekhte hue dil ne kaha, "Dekh le tu ye bebasi, ye meri aarzu, jo hosh mein rahta nahiin, tere hone se hi main abhi tak thahra yahiin, Na jaane kyuun.."
Dhuaa-Dhuaa shaam, Udaas-Udaas dil, jab bhi yaadon mein khoo jaata hoon sab kuch bhulakar accha lagta hai jaise main dur hokar bhi teri baahon mein soo jaata hoon….
“Sir... Sir... humein ab chalna chahiye” Ek awaaz ne mujhe behoshi se jaga diya. “Aap bahut der se yahaan hain flight ka samay nikal raha hai agar hum abhi nahi chalte hain to flight miss ho jaayegi.” Main chup raha... Kahin dur tak dekhne ki koshish ki...
"Mujhe ab laut kar aana nahi hai, Aao tum bhi laut chalo ki main fir se naa laut aaun, koi baat adhuri na rahe, raat pyaasi na rahe, dil khandhar na rahe, aakh samandar na ho isiliye laut chalo. Kuch adhura sa lagta hai yaha, jahan humne apne pyaar ko jeeya tha, jahan humne apne sapne dekhe the.. bemann se luti hui duniya liye laut kar jaana bhi mushkil hota hai..”
Kitne saal bit gaye... aaj bhi wo bhayanak drishya mere mann mein ghar karta hai. Apne pyaar ko apne hi haathon se alvida karna... yeh aasan nahi tha. Kaash us din meri saanse bhi tham jaati to kabhi na bharne waale jhakm ko aaram aa jaata..
Beep-Beep-Beep .... Beep-Beep:Beep....
Riya : (loudly) Hello, sirrrr where are you?? Aapko pata hai na aaj meeting hai aur aap abhi tak office nahi aaye hai, aapko pata hai na aapke bina ye meeting nahin ho sakti..
■ (nind mein) Aah… haa kya hai?
Riya : (gusse me) Kya hai? Sir, maine jo kaha wo aapko sunai diya? Aaj ek important meeting hai aur aap abhi tak office nahin aaye hain.
■ Haan, mein aa raha hu Riya tum meeting ko kuch der ke liye manage kar lo. (call drop)
Riya : (irritated) ufff ab sab mujhe hi handle karna honga..
Kal raat main nashe mein dooba tha, uske aagosh mein, mujhe khud par control rakhna hoga bed se uthne ki koshish ki lekin mere sar mein dard aur aankhein bhaari lag rahi thi aisa lag raha tha ki main abhi bhi nashe mein hoon. shower se girti paani ki boondon ne mujhe thanda kiya aur meri aakhein bhi kuch had tak khul gayi.
***
"Kaha reh gaye, thak gaye?" Hahaha... pakdo mujhe pakdo hahaha baate to badi badi karte ho ab kya hua..”
“Accha to ye baat hai ruko abhi tumhe batata hu” or agle hi pal wo meri baaho me thi..
“cheating hai ye tum ruk gaye the na” uski shikayato ka silsila jaari tha or main uski aankho me kho gaya tha.. sawal karti un aakho mein kya kashish thi jheel jaisi gehrai thi, armaan jagaati hai jab bhi wah kajal lagati hai.
Uske chehre ki chamak hi aisi thi ki sab kuch pheeka-pheeka sa lagta hai. Uska naazuk phoolon jaisa chehra, khilti kaliyo si labo ki muskaan aur jab wo hasti hai to jaan le leti hai. Hawa jab uske gulabi gaalo ko sehlaati hai to beparwaah si jhulfe chehre par jhool jaati hai, mera un jhulfo ko salike se kaan ke piche le jaana, samay ko rok deta hai aur hum kho jaate hai ek dusre ki aakho mein… bekhabar is jahan se..
Faasle kam hone ke saath dil ki dhadkanein badhne lagi, saansein uljhti hui si mehsoos hone lagi, ankahe jasbaat, Uski jhukti hui palko ne jaise is pyaar ko ijazat de di, mil hi gaye the uske jo mere lab se lab ki wo palatkar khilkhilakar hasne lagi.
“Hahaha.. you are so funny Hahaha..” “kya hai ye yaar..” Usko aise bebaak haste khilkhilata dekhkar mujhe bhi hasi aa jaati hai, usko aise khilkhilata dekhkar lagta hai ki dekhne ko kaynat padi hai lekin sukun sirf use dekhne se milta hai, uska saath, uski baatein mere dil ko khush kar deti hain.
***
Aaina ye batata hai ki main kya hoon magar is par khamosh hai ki main kya tha, main aaine ke saamne khada apne aap ko nahin pehchaan sakta, yeh shaks mere saamne khada hai lekin main usmein nahin hoon. Ek gahri saans chhodte hue maine apne aap se kaha - It's time to go I'm already late..
■ Arjun, car taiyaar hai. Humein jaana hai.
Driver (Arjun): Ji sir, kaha jaana hai?
■ Office.
Driver (Arjun): (shock mein) Office, sir?
■ Haan, Arjun. Aaj mujhe office jaana hai.
Driver (Arjun): (shant hokar) Ji sir..
Singhania Group: India ke top Recyclers mein se ek leading recycling company hai jo India mein apne best recycling solutions ke liye jaani jaati hai.
Rohan Singhania CEO : Hello I'm Rohan Singhania...
(Sabhi introduction dete hain)
Rohan Singhania : Main is critical topic par baat shuru karne mein khushi mahsoos kar raha hoon. Hamari analysis se pata chalta hai ki aapki company se nikalne wala waste hamaare specialized capabilities ke through profitable recycling ke liye ek significant opportunity hai. Hamari waste management aur recycling expertise ka use karke aap company ke environmental impact ko kam kar sakte hai aur waste disposal se bada revenue generate kar sakte hai.
Hamari research se pata chalta hai ki aapki company se nikalne wala waste valuable resource hai. Hamari advanced technologies ke through hum is waste ko high quality products mein change kar sakte hain. Hamare saath partner banke aapki company waste recycling ke benefit utha sakti hai aur apne environmental commitment ko display kar sakti hai.
Hamne apne logistics infrastructure mein badi matra mein invest kiya hai, jisse aapki company ke facilities se waste ka efficient collection aur transportation kiya ja sake. Hamari specialized fleet aur trained personnel waste ka collection jimmedar tarike se karenge. Hamare recycling facility mein waste ko advanced technologies ka use karke processed kiya jayega, jisse high quality products banenge.
Rajesh Kumar CFO : Kya aap hamein is partnership se hamari company ko milne wale financial benefit ke baare me bata sakte hain?
Rohan Singhania : Indeed, hamari financial analysis se pata chalta hai ki aapki company is waste management partnership se lagbhag 20% ka revenue anticipate kar sakti hai.
Rajesh Kumar : 20%? Yeh toh bahut hi kam hai.
Rohan Singhania : (Smiling) Ji, yeh ek achhi shuruaat hai. Hum aapke saath samjhauta karne ki koshish karenge aur aapki company ko is waste se adhik fayda dilane ki koshish karenge.
Udhar office me meeting chal rahi thi aur yaha main raaste me tha...
Aarav (college friend) : Hello, kahaan hai yaar tu?
■ Dehli
Aarav : Sun, next month Shruti ki shaadi hai. Chal raha hai na tu yaar? Bahut din ho gaye college ke baad se mile nahi hain. Isi bahane kuch yaadein taza kar lein.
■ Arre, Aarav, ye shaadiyaan, family functions, sab mujhe boring lagte hain aur waise bhi mujhe yahaan kaam hai, mera aana possible nahi ho paayega. Tu attend kar le.
Aarav : Abe pagal hai kya? Bhul gaya kaise college bunk karke hum saath mein puri city ghoomte the? Aur mere se zyada to teri banti thi usse. Hum dono to aapas mein hamesha ladte-jhagadte rahte the. Aise mana mat kar, use kaisa lagega? Aur mujhe bhi company mil jaayegi waha akela bore nahi honga
■ Arre, Aarav, but...
Aarav : Nahi, koi nautanki nahi. Tu aa raha hai, baat khatam. Yahaan se Delhi airport tak main aa jaata hoon, wahaan se saath chalege.
■ Sun to, Aarav... tu... tu... (call drop) Sigh...
***
The Grand Bliss
“Chal, apna mood thik kar! Aise muh phoolakar jaayega to lagega ki Shruti ki nahi teri bidai hone waali hai! Hahaha...”
main Aarav ki taraf dekhkar (jabardasti muskurakar) Saale, “jabardasti muskurata rahu!!!”
“Bhai, main kya kehta hoon ab tu bhi apne liye koi dekh le. Bol to Shruti se baat karun, uski koi friend se...”
Ho gaya tera ab chal!”
Hotel ke andar aur aas-paas ka nazaara bahut hi khoobsurat tha. Charo taraf lites aur phoolon se decoration kiya gaya tha, jo raat ke samay mein aur bhi jaada khubsurat lag raha tha. Shaadi ka mandap hotel ke beech tha, jahaan dulha-dulhan ek saath khade the. Hotel ke garden mein bhi decoration kiya gaya tha jahaan guests baithkar shaadi ki rasmon ko enjoy kar rahe the.
"Congratulations both of you..”
kaha reh gaye tum dono pichle 2 ghante se wait kar rahi thi mai..”
“isme meri koi galti nahi hai is mahashay ka sajna sawarna hi khatam nahi hota hai” aur dono hasne lag jaate hai,
Aarav shruti se bolta hai “btw shruti you looking so beautiful...”
“thank you tum dono bhi kisi se kam nahi lag rahe ho aur tum kuch bologe ya sirf dekhte hi rahoge..”
“ah ha congratulations ye Humari taraf se special gift ise baad me dekhna...” Aarav aur Shruti ne ek dusre ko dekha aur hasne lage...
Shaadi ki rasmon ke saath-saath, parivaar ke sadasyon aur doston ke saath milna-julna chalta raha lekin mere liye sabse adhik khushi ki baat yeh thi ki Shruti kitni khush hai uske chehra aur uske aankhon ki chamak sab bayaan kar raha tha.. Ishq rago mein khoon se tez daudta hai. Maine kabhi nahin samjha tha ki pyaar kaisa hota hai. Kon Aashiq Kya Mashuq Main apne hi vicharon mein khoya hua tha ki pyaar kya hai aur kaise koi do log ek dusre se itna pyaar kar sakte hain aur tabhi maine use pahli baar dekha..
Koi kya mehsoos kar sakta hai… kuch mehsoos karne ke liye hosh kaha rahta hai, main bas use hi dekhe jaa raha tha hakikat me kalpanao ka jaal boon raha tha, jab pahli baar uski aankho mein dekha to dil ne kaha, "Ye mil gayi to jaise pura jahan mera ho gaya." Khuli jhulfe, gaalo ko chumte jhumke, koi itna pyaara kaise ho sakta hai? Mujhe apni feelings express karna nahi aata kuch to alag sa mehsoos kiya tha maine shayad usne bhi ye notice kar liya tha lekin wo is baat se anjaan bani rahi. Ajib si bechaini wo jaise jaise aage bad rahi thi, meri dhadkane tez ho rahi thi. Uff...!! Jab wo mere karib se gujri...
Aarav: Acchi hai na...
■ Haaa...
Aarav: (hanskar) Abe, gayi wo kab tak waha dekhte rahega
■ (muskurakar) kuch bhi mat bol. Mai kuch soch raha tha.
Aarav: Oh, kiske baare me
■ Muskarate hue Chup kar...
***
Knock - knock ...
■ Sorry for the delay. I'm ready to proceed now.
Rohan Singhania : (muskurakar) Koi baat nahin, hum samajhte hain.
■ (Apni seat par baithte hue shantipurna andaz mein) Toh hum shuru karte hain. Mr. Singhania, humne aapke group ki financial report dekhi hai aur humein lagta hai ki aap actual profit ko chupa rahe hain.
Rohan Singhania : (chaukte hue dekhne lage thoda asamanjhas mein) Kya... kya? aap kya keh rahe hain?
■ Hum sirf yeh keh rahe hain ki humein lagta hai ki aapke group ki financial report mein kuch discrepancies hain. Hum aapke saath ek new deal karna chahte hain, jismein hum aapke group ko financial support denge aur aap humein apne business mein partnership denge.
Rohan Singhania : Hum is deal ko consider karenge lekin humein kuchh samay chahiye.
■ Muskurakar Theek hai, Mr. Singhania, hum aapko samay denge. Humein ummeed hai ki aap humari baat ko seriously consider karenge.
Handshake ke saath meeting khatam ho jaati hai.
Rajesh Kumar : Sir, main aapse iss meeting ke bare mein baat karna chahta hoon kya aapko lagta hai ki Singhania Group yeh deal accept karenge?
■ Bilkul, Rajesh ji. Main yakin ke sath aapko bata sakta hoon ki Singhania Group ke paas ab koi option nahi hai. Humne unhein ek aisi deal di hai jo unke liye bahut profitable aur zaroori hai. Pahle Singhania Group ne 20% profit bataya tha jo ki bahot kam tha. humne unhein ek aisi deal di hai jismein hum unhein 10% profit denge aur humein bhi 30% profit milega.
Rajesh Kumar: OK sir.
■ Ab humein bas Haa ka intzaar karna hai.
***
Ghani sard khubsurat raat, Nadi ke kinare chamakte sitare halki si dhundh, uski aankhen sitaro ko dekh rahi thi aur uski god me sir rakhe mai use dekh raha tha.
Usne meri taraf dekha aur muskurayi dono ek dusre ki aankhon mein chahto ke samundar ka manzar dekh rahe the, chand ki roshni mein khila hua chehra bahut pyaara lag raha tha, uski aankhon mein apne liye pyaar, kasam se aisa laga ki duniya kahi hai to yahi hai.. kaha usne fir..
Wo : Tum baar baar humare ghar ke paas na aaya karo, Ghar me kisi ne bhi dekh liya to problem ho jaayegi..
Main : Pata nahi jab tak tumhe na dekhu, dil ko karaar nahi aata..
Wo : Dil to pagal hai uski kyu sunte ho..
Main : Ek baat kahu
Tabhi baadlo me tez gadgadahat hone lagi ek pal ke liya aasma bijliyo se chamkne laga
Wo : Lagta hai baarish hone waali hai mujhe ab chalna chahiye..
Main : Tumhe bhigna pasand nahi
Wo : Pasand to bahot hai lekin phir kabhi
Main : mere bas me hota to tumhe jaane hi nahi deta, ab Kab milogi
Wo : Jab tum kahoge
Main : To fir jaao hi nahi
Wo : Jaana to honga na
Main : Chalo chhod deta hu ghar..
Wo : Rahne do chali jaaungi..
***
After One Month
Rohan Singhania : Hum aapke saath deal ko accept karne ke liye taiyaar hain. Lekin humari kuchh terms aur conditions hai.
■ Very well, please go ahead.
Rohan Singhania : Aap humare deadline ke according material supply karenge. Iske alawa contract duration tak aap humare alawa kisi aur ko supply nahi karenge.
■ Alright, we agree...
Meeting ends after paperwork.
Riya : Sir.. Coffee!!
■ (coffee cup ko pakadte hue) riya, tum apni zindagi mein kya chahti ho?
Riya : (muskurati hue) Sir, maine apni zindagi ke baare mein bahut socha hai. Main apne sapno ko poora karna chahti hoon aur apne parivaar ke saath khushal zindagi jeena chahti hoon.
■ (Riya ki aankhon mein dekhte hue) Is duniya mein kabhi bhi kuch bhi humare mutabik nahin hota. Waqt ke saath tumhe ehsaas honga ki sapno ki duniya ke bahar hakikat mein sirf dard aur nirasha hai. Pyaar ko jaan lene ke baad nafrat ka bojh bhi hume hi dhona hai.
Maine apne paas rakhi diary ko hath me lete huye kaha
Riya : Sir, maine aksar aapko iss diary ke saath dekha hai. Aap kya likhte rahte hai isme?
"Vah meri mann pasand kitaab ka mann pasand kissa hai,
Vah meri na pasand jindagi ka manpasand hissa hai.."
■ (Diary ko kholte hue) Meri zindagi ka safar adhure khwabo ko poora karne ki koshish hai yeh, Niyati ki lakiren bhavishya ka nirmaan karti hain jo hona hai hoke rahega. Tanhai ki gehraiyon mein khwaabon ke siwa kuch nahi..
***
“Hello..”
“Hmm to mil gayi janab ko fursat”
“Kuch kaam me uljha hua tha yaar tumhe to pata hai na”
“Itni bhi time nahi ki apni hone waali biwi ke call ka reply de sakho aur keh aise rahe ho jaise tumhe khud karna hai baithe baithe order to karna hai bas”
“Itna easy nahi hai jitna lagta hai”
“Accha chodo suno hum sabhi Rishikesh se nikal rahe hai dehli ke liye”
“Video call karo na”
“Ab itni bhi kya bekraari 4 dino baad shaadi hai dekh lena”
***
Atit ki yaadein dard bhari gehraiyon mein doobi hui hain. Jo hua so hua lekin uske nishan abhi tak mere dil par hain. Main apne dimaag mein un yaadon ko fir se jagane ki koshish nahin karta kyunki yeh jaanta hoon ki vah mere liye ek jhoothi tasalli hai lekin phir bhi vah yaadein mere dimaag mein ghumti rehti hain mere kaleje ko chirti rehti hain. Yeh yaadein mere liye ek dushman ki tarah hain aur mujhe inhi se pyaar bhi hai..
“Arjun, car ko Sunset lounge ki or le chalo,”
“Ji, sir...” Arjun ne jhijhakte hue kaha, “Lekin sir, aapko apni health ka dhyan rakhna chahiye.”
“Haan. Main jaanta hoon,” Muskurate hue maine kaha, “Main bas ek drink lena chahta hoon.”
“Lekin sir, abhi aapka treatment chaalu hai,” Arjun ne parwaah se kaha. “Medicines ke saath drink karna galat hai.”
“Arjun, tum chalo bas...”
Mai bhoolu, phir tu yaad aaye ye din katte hi nahi…. uske jaane ke baad sharab bhi mujhe mithi-mithi lagti hai sochta hoon jahar pina kaisa lagta hoga…. Log aksar kehte hain gum mein sharab sahaara banti hai lekin yeh kya sach mein gum ko bhulane ka sahara hai ya sirf ek bahana? Mere vichar mein, sharab pina sirf ek tarika hai apne dimaag ko trance state mein le jane ka jahan hum sirf woh dekh paate hain jo hum dekhna chahte hain aur bhool jaate hain jo hua tha isse humein bhale thodi der ke liye ho sukun milta hai..
***
Shadi sirf do logon ke beech ka rishta nahin hota balki yeh do parivaaron ka milan hota hai. Yeh ek aisa pal hota hai jo har insaan ke liye khaas hota hai aur jise wah pahli baar anubhav karta hai. Is din ko aur bhi khaas banane ke liye tarah-tarah ke intzaam kiye jaate hain. Rishtedaaron aur doston ka aana-jaana laga rehta hai aur masti-majak ka mahaul bana rehta hai. Is din ko sajane aur celebrate karne ke liye har koi apna yogdaan deta hai aur aisa hi kuch mere sath ho raha tha ki tabhi
Aarav : Drrring - Drrring Drrring - Drrring Drrring - Drrring
The person you are trying to call is not answering. Please try again later... “dammm ye call receive kyu nahi kar raha...”
Drrring - Drrring Drrring - Drrring
■ Ha bol, Aarav. Kab tak pahoch raha hai ghar? Shruti ka call aaya tha morning me, aaj shaam tak wo aa jaayegi.
Aarav (gusse main) : Wo sab chhod, kab se call kar raha tha? Kaha mar gaya tha? Jaldi se news dekh.
■ Kuch arrangement dekh raha tha, tu itna hyper kyu hai? Kya hua?
Aarav : Dekh to bhai, ek baar pahle...
"India Today News 24/7 ke saath, main aapko breaking news de raha hoon.
Aaj Shaam 5:00 baje Meeruth ke paas ek badi Sadak Durghatna mein ek bus ka accident ho gaya hai. Bus mein 25 yaatri sawaar the jo Rishikesh se Delhi ki aur jaa rahe the. Report ke mutabik bus ka driver nashe mein tha jiski wajah se yeh waardaat hui hai. Mauke-e-vaardaat par kuch log gambhir roop se ghayal huye hain aur 20 logon ki on the spot death ho gayi hai. Police aur rescue team ne mauke par pahunch kar relief operations shuru kar diye hain. Hum aapko is haadse ke baare mein aur bhi jaankari dete rahenge stay tuned for more updates."
Main TV ke saamne khade jam sa gaya… haath se mobile chhuth kar floor par gir gaya aakhe ek tak TV ki or thi… haath pair thande pad gaye the mere sharir mein takat hi nahi bachi thi floor par ladkhada kar gir gaya jaise ki mere pairon ke neeche se zameen khisak gayi ho.
Dimaag mein sunnata thi jaise ki maine abhi kya suna samajh nahi aa raha tha aakho se ek ek karke aasu girne lage the main nahi chahta tha ki yeh sach ho maine mann hi mann khudse kaha, Nahi, aisa nahi ho sakta, ye sach nahi hai lekin TV se aati awaze aur bhayanak drishya, police cars aur ambulance ki sirens mere kanon mein gunj rahi thi.
Zindagi ki sabse buri khabar sunne ke baad mere andar ki sabhi bhavnaein aur ummeeden ekdum se khatam ho gayi aisa lag raha tha ki main kyu nahi mar gaya, ab mera jeene ka kya faayda hai?
Mere andar bebasii ka ehsaas tha jaise ki main sab kuch karne ke layak tha lekin kuch bhi nahi kar sakta tha. Meri duniya tabaah ho gayi thi, pal-pal badti bechaini mere mann ko khaa rahi thi.
Aakho se behte aasuo ki wajah se road dhundhla dikh raha tha, meri car full raftaar se sadak par daudh rahi thi. Jab aap kisi jaldi me ho to pata nahi kyu saari duniya aapko slow lagti hai. Main tamamm signals todte hue chalta jaa raha tha baar-baar uska masoom chehra aakho ke saamne aa raha tha.
Mann mera maanne ko tayaar nahi tha, ek jhoothi ummid liye main badta jaa raha tha ki sab thik honga. Achanak tez roshni meri aakho me padti hai maine jaldi staring ko left ghumakar car ko rokhne ki koshish ki lekin mai sambhal nahi paaya car road se niche utar gayi..
"Abe andha hai kya" kaano me hai ye awaj padi…. Mere dil ki dhadkan itni tez thi aisa laga jaise ki dil chaati se bahar nikal aayega. Mera pura sharir pasine se bhig chuka tha, Khud ko sambhalne ka waqt abhi nahi tha aur ek baar fir sadak par meri car apni puri raftaar se daudh rahi thi, jaise mere zindagi ki antim yatra shuru ho gayi thi.
Sir, samay ho gaya hai," waiter ne kaha, apni awaaz ko namra rakhte hue. "Bar close karne ka samay ho gaya hai. Aapko ghar jaana chahiye."
Maine waiter ki taraf dekha phir apne glass ki taraf aur fir ek lambi saans lete hue bola "Theek hai"
"Sir!! Bachi hui drink parcel karwa deta hoon, jisse aap ise ghar mein araam se enjoy kar paayenge.” Waiter ne kaha
“Hmm...” Apne kapde theek karte hue, maine ek nazr apni ghadi par daali aur samay dekha. Phir maine apne qadam badhaaye aur bahar nikal gaya.
Kabhi-kabhi mujhe lagta hai ki main apni zindagi se bhaag raha hoon. Main jo kho gaya hoon use dhundh raha hoon. Har pal, meri talash jari ha uske liye jisko main hamesha apne saath rakhna chahta tha. Mere dil mein ek khali pan hai jise main kabhi bhi bhar nahi paaya. Mere qadam badh rahe hain lekin mere dil ki dhadkan thami hui hai jaise main jinda laash hoon.
Ghar mein pravesh karte hi mere dil par ajeeb sa bhari pan mehsoos ho raha hai. Diwaar par lagi meri aur uski photos, jismein hum dono bahut pyaare lag rahe hain mere dil ko chhoo jaati hai. Main apne bed ki taraf dekhta hoon jispar humne ghanton tak baatein ki, hanste-hasaaye. Apne room ko ghoomkar dekhta Main mehsoos karta hoon ki woh abhi bhi mere saath hai, mere dil mein, mere dimaag mein, meri har saans mein. har cheez, har vastu, har photo, mere dil ko chhoo rahi hai. Woh abhi bhi mere saath hai aur main uske bina adhoora mehsoos kar raha hoon.
"Shaam-E-Gum mere ghar se kaha jaayegi,
Meri qismat mein hai jo tumhari kami,
Woh kami mere ghar se kahan jaayegi.."
Tez alarm ki awaaz ne mujhe waastiwikta mein wapas laaya. Maine ghadi ki taraf dekha aur mehsoos kiya ki medicines ka samay ho gaya hai. Doctor ki baatein mere dimaag mein taaza ho gayi jo unhone mujhe CBT (Cognitive Behavioral Therapy) ke liye di thi. "Mujhe ek bhi dose ko miss nahi karna hai," doctor ne kaha tha. "Nahi to meri dimaagi haalat par sudhaar laa paana bahot mushkil hai." Maine apne medicines ki bottle ki taraf dekha aur kaha ki kya hi faayda in sab ka?
Raat ka tisra pahar aur mere aankhon se nind koso dur… ajeeb si bechaini… mere sir mein dard hone laga tha. Kahi mai pagal to nahi ho gaya hoon? Yeh sawal mere dimaag mein ghoomne lage. zyada sochna humari khushiyo ko chhin leta hai aur isko rokhne ke liye maine sharab ka sahara liya tabtak jabtak main nind mein nahi chala gaya main sharab peeta raha. Yeh mere liye ek aadat ban gayi hai aur yeh mujhe khaai ki taraf dhakel rahi hai.
"Jinhe need nahi aati, unhi ko maalum hai,
Subah hone mein kitne zamane lagte hain.."
***
Jaise-jaise main karib pahunch raha tha mere kanon mein police car, ambulance, news reporter ki awaaz siren ki shrill awaaz ke saath milkar ek bhayankar sanket bana rahi thi. Mere dil ki dhadkan or bhi jaada bad gayi mere mann mein ek ajeeb si anishchitata paida ho gayi thi. Mere qadam or bhi tez ho gaye the, main jaldi se us jagah par pahunchne ki koshish kar raha tha, jaise-jaise main karib pahunch raha tha mere man mein bhayanak dar paida ho raha tha. Kya yeh koi bahot bada haadsa tha?
Chaaro taraf logo ki afraatfari hai, logon ka samuh ikattha hua hai jo is haadse ko dekhkar santapit hain. Kuch log apne parivaar ke sadasyaon ko khoj rahe hain, jabki kuch log ambulance ke bahar khade hain jo ghayal logon ko aspatal pahunchaane ki koshish kar rahe hain. Police ke jawan logon me shaanti banaaye rakhne ki koshish kar rahe hain lekin logon ka gussa aur santap badhta ja raha hai.
Mere saamne ek vikraal drishya tha, jisne mere dimaag ko ek pal ke liye blank kar diya. Logon ki aankhon se behte aansu, unki chehron par dard ki rekhaen aur unki aawazon mein dar - yeh sab bahot dardnaak hai. Is drishya ko samjhna aur samjhana bahut mushkil hai. Main pahli baar aisa drishya dekh raha tha isiliye mere man mein aise bhav utpann ho rahe the jo mere jeevan ko badalne wala the.
Maine ek police officer se bus mein sawaar logon ki jaankari lene ki koshish ki.
“Kya aap mujhe bus mein sawaar logon ki jaankari de sakte hain?” Maine pucha.
Officer ne mujhe bataaya, Jitne bhi jakhmi log hain unhein hospital le jaaya ja raha hai unki list waha laga di gayi hai aur jo log maare gaye hain unki laashe highway ke paas ek line mein rakhi hui hain.
Mujhe apne pariwaar waalon ko dhudhne ki zaroorat thi, Maine officer se sahayata maangi.
Officer ne mujhe bataaya, “Staff kam hone ki wajh se aapko khud unhein dhudhna hoga hum apni puri koshish kar rahe hain lekin abhi humein apni priority set karni hai. Hum aapki madad karne ki koshish kar rahe hain.”
Jiske baad main highway par rakhi un laasho ki or badha… Thartharte hue haathon se main ek ke baad ek laashon ke upar se kapde hatata raha. Har laash ke upar se kapda hatate samay mujhe lagta tha ki main apni hi galti ki saza bhugat raha hoon aur jab main uski laash ke upar se kapda hataya toh uska chehra mere saamne aa gaya.
Uska masoom chehra, bhikhre baal aur shant Aankhen…. main ek pal ke liye jam sa gaya. Uske chehre ko dekhte hue sabhi khayalon ko bhool gaya, kuch pal tak main usko dekhte raha aur mere aankhon se aansuon ki barsaat hone lagi. Main khud ko rok nahi paaya aur wahi ladkhada gaya.
Uske haathon ko apne haathon mein lete hue mere mann mein sirf ek hi sawal tha - "Kyu? Aakhir kyu?" Main use gale lagakar rota raha, chilla raha tha, awaaz de raha tha lekin koi sunne waala nahi tha. Na jaane kab tak main uski laash ko gale lagakar rota raha mere aansu uske chehre par girte rahe..
Mere paas ab jaada kehne ko nahi hai thode hi shabdon mein samjhna. Maine socha tha ki main use apni dulhan ke roop mein dekhoonga, dekhoonga ki kaise laal rang uska gore rang par phabta hai lekin aaj jab main use dekh raha hoon toh wo safed rang mein bahut hi khubsurat lag rahi hai. Pahle uske chehre par raunk thi, aaj sirf shanti hai. Maine socha tha ki main uske gale mein haar daalunga, aaj main uski laash par phool daal raha hoon. Main jiska haath thaam kar tamaam jo sapne sajaye the humne use pura karna wala tha aaj wo khud maut ka haath thaame na jaane kaha chali gayi hai. Aisa lagta hai ki pal bhar mein hi meri duniya tabaah ho gayi hai. Mann mein ek ajeeb si shanti hai jise main samajh nahi pa raha hoon main khada sochta hi reh gaya tabhi pandit Ji ne lakdi dete hue kaha, "Beta, lo cheeta ko aag do."
Aansuon ko rokne ki bahot koshish ki lekin rokna mushkil tha, kanpte hue haathon ne uski laash ko agni di aur kanpte hue labon ne antim "Alvida" kaha.
"Alvida, mere pyaar," maine phir se kaha...
***
Achanak se meri nind khulti hai lekin main soya hua hoon, aankhen band hain, kisi bhi tarah ki pratikriya nahin de raha hoon, saansen dheemi aur aniyamit hai. Mere shareer mein koi bhi gatividhi nahin hai jaise ki main ek patthar ki tarah soya hua hoon. Mere aas-paas ka mahaul shant hai, mere shareer par pasina hai puri body tap rahi hai jaise ki main ek tawe par rakha hua hoon.
ekaek meri saansen rukne lagti hai aur meri aankhen jhatke se khul jaati hai. Main muh kholkar jor jor se saans lene ki koshish karta hoon aur mujhe mehsoos hota hai ki mera gala puri tarah se sukha hai jaise ki maine bahot dino se paani nahi piya hai. Meri heartbeat bahot tez ho jaati hai main apne aap ko samjhane ki koshish karta hoon.
Mai ghabra jaata hu ki mere saath ho kya raha hai. Bed se uthakar window ko kholne ki koshish kar raha tha lekin mere haathon mein koi bhi shakti nahin thi. Aisa lag raha tha jaise bed se window ki duri bahut dur hai ya mai bahut slow move kar raha hoon. Mere chaati mein dard hone laga, mai window ke lock ko haath lagaya kholne ke liye lekin mai khol nahi paaya. Wahi floor par gir gaya aur mere aankhen band hone lagi. Mai apne aap ko sambhal nahi pa raha tha, mere saase dheemi hone lagi. Mai jaanta hoon ki mai khatre mein hoon lekin mai kuch bhi nahin kar paa raha tha..
Aakhe band hone ke baad saasao ka chalna bhi ruk gaya aur uska chehra meri aankho ke saamne aaya. Ek madhur muskaan ke saath, vah keh rahi hai, "Aa bhi jaao ab bahot intzaar karwaaya tumne."
Mere chehre par ek khushi ki lehar daud jaati hai aur main muskuraata hoon. Usse kehta hoon "Khuli aakho se sara zamana dikhta hai lekin tumhe dekhne ke liye aakhe band karni padti hai, Yeh pata hota to itni der nahi lagti...”
Naye afsane ki shuruaat abhi baaki hai,
Mere mahboob se mera milna abhi baaki hai..!!
To Be Continued...
