UPDATE – 10
“Mahi kahaan hai Maa, College ke liye late ho raha hai”!
Rahul jisne abhi - abhi breakfast khatam kiya tha, apne kandhe par bag taangte huye ye sawaal kiya usne Disha se. Aaj subah se hi usne Mahi ko nahi dekha tha, Uthne ke baad wo running aur exercise ke liye nikal gaya tha kyonki kuchh din se uska schedule bhi poora bigad chuka tha. Wo bhoola nahi tha ke Mahi ke behaviour mein achanak se hi itna change aa gaya tha, par filhaal wo is baare mein baat karke Mahi ko aur pareshaan nahi karna chahta tha. Idhar uske sawaal par,
R/Mom : Wo to chali gayi College.. tujhe nahi bataya usne?
Ek pal ko Rahul shaant sa ho gaya uski baat sunkar aur fir,
Rahul : Ch.. chali gayi? Kab?
R/Mom : Kartik ke saath hi chali gayi thi. Bol rahi thi aaj jaldi jaana hai use College. Kuchh baat huyi hai kya?
Rahul : N.. nahi Maa. M.. main bhi nikalta hoon. Bye.
Ab Rahul kaafi pareshaan ho gaya tha. Waise to wo kal se hi chintit tha par aaj ki ye ghatna kahin naa kahin Rahul ko ye sochne par majboor kar rahi thi ke Mahi us se kisi kaaran bohot naaraz hai. Par Rahul samajh nahi paa raha tha ke wo kaaran aakhir tha kya. Kyonki aaj se pehle agar Rahul use College lekar naa jaaye to wo chhuti kar liya karti thi. Yaani, wo zid karke Rahul ke saath hi College jaati thi par aaj...
Rahul inhi sab baaton ko sochta hua apne College pahunch gaya. Tabhi uski nazar canteen mein baithi huyi Divya par padi. Wo apne mobile mein ghusi huyi thi aur use dekhte hi Rahul ko kuchh din pehla ka wo scene yaad aa gaya jab usne Arush ke saath wo prank kiya tha. Jaisa ke us din dono mein Arush ki Maa ki tabiyat ko lekar baat huyi thi, usi ke mutaabik Rahul ne apni Bua, Suhana se kehkar Arush ki Mom ke sabhi Tests dobara se karwa liye the, jiski report kuchh din mein aane waali thi.
Arush filhaal, apne ghar par hi tha, kyonki uski Maa ko abhi dekh bhaal ki zyada zarurat thi. Bas yahi sochta hua wo Divya ke saamne waali kursi par baith gaya.
Rahul : Divya..
Divya : H.. Huhh! Rahul.. dara diya tumne.
Uski aawaz se ek dum jaise phone se nikal asliyat mein lauti thi Divya. Par isi mein uske haath mein phone halka sa ghoom gaya tha aur uski screen Rahul ki taraf mud gayi. Ye hua to kewal kuchh hi pal ke liye par itne mein hi Rahul uske phone screen ka wallpaper dekh chuka tha. Shayad usi mein khoyi huyi thi wo. Rahul ke chehre par ek halki si muskaan aa chuki thi jise chhipate huye,
Rahul : Itna kya ghusi huyi thi tum Mobile mein jo aas – paas ka bhi kuchh pata nahi chala?
Divya : Arre nahi – nahi.. kuchh nahi! Wo to bas aaj ke exam ke notes dekh rahi thi.
Rahul : Hamara College abhi start hua hai Divya madam. To abhi kaunse exam?
Divya ne hadbadi mein kuchh bhi bahana kar diya tha. Par use khud bhi maaloom nahi chala ke kyon wo itna hadbada si gayi thi. Jab us se kuchh kehte nahi bana to,
Divya : Main aati hun thodi der mein..
Itna kehkar wo uth gayi, par jaise hi wahaan se jaane ko huyi tab,
Rahul : Kabhi – kabhi hume hi pehel karni padti hai Divya.
Kahin aisa na ho ke tum intezaar karti reh jaao aur bohot derr ho jaaye.
Abhi tak wo Rahul ke kursi se thoda aage nikal gayi thi par jaise hi usne bolna shuru kiya to Divya ke kadam wahin ruk gaye. Wo pichhe mudi to uske chehre par hairaani aur sawaal dono ke hi bhaav dikh rahe the.
Divya : Matlab?
Rahul : Kuchh nahi. Jab tumhe pata chal jaaye to mujhe bhi batana.
Rahul apni jagah se utha aur apni class ki taraf nikal gaya. Idhar Divya kuchh derr khadi Rahul ki baaton ke baare mein sochti rahi aur fir apne dimaag se sabhi vichaaron ko jhatak kar apni Class ki taraf chali gayi.
“Kya hua hai tujhe? Subah se hi chup chaap baithi hai”!
Mahi joki College ke garden mein ek bench par baithi thi uske paas aakar Priya ne ye sawaal kiya tha. Jispar usne ek nazar Priya ko dekhne ke baad dobara se apna sar doosri taraf ghuma liya.
Priya : Tu paagal hai kya Mahi jo is baat ke liye kal se dukhi ho rahi hai. Tujhe to balki khush hona chahiye...
Priya samajh rahi thi ki kal jo baatein in dono ke beech huyi thi, usi kaaran se Mahi dukhi thi. Par wo ye nahi samajh paa rahi thi ki aakhir aisi kya baat hai jo Mahi apne andar panap raha pyaar sweekar nahi karna chahti. Khair, uski baat ke beech mein hi jab usne Mahi ke gaalon se hokar neeche girte us aansun ko dekha to ek dum se Priya shaant ho gayi. Kuchh derr tak wo Mahi ko dekhti rahi aur fir uske haath ko pakad kar boli,
Priya : Tujhe pata hai naa Mahi ke tere aise udaas rehne se kisi cheez ka solution nahi niklega.
Mahi : Tu jaa Priya..
Uski aawaz bhi halki bharrayi huyi thi jiske kaaran Priya bhi ab pareshaan hone lagi.
Priya : Tujhe ghar jaana chahiye, waise bhi yahaan mann nahi lagega tera. Chal main drop kar deti hoon tujhe.
Mahi : Maine bola naa tu jaa.. mujhe nahi jaana ghar.
Priya : Ae.. ab ro kyun rahi hai? Mahi...
Mahi ki bheegi huyi aankhon ko dekh kar Priya ne ek dum se ye sawaal kiya par wo bina kuchh bole wahaan se uthkar chali gayi. Idhar Priya use jaate huye dekhne lagi aur ek gehri soch mein doob gayi, “Pakka kal ki hi baat ko lekar ye aise behave kar rahi hai. Par ismein rone jaisi kya baat hai. Pyaar hi to hai, ye to aise react kar rahi hai jaise kisi ka murder kar diya ho. Ho naa ho kuchh na kuchh hai jo ye chhupa rahi hai. Kaise pata lagaaun”??
Rahul kuchh derr tak Class mein hi baitha raha, par aaj uska mann bohot bechain sa tha. Mahi ka behaviour reh reh kar uske zehen mein aa raha tha, isiliye padhayi mein concentrate karna bhi uske liye mushkil tha. Ek class lagane ke baad wo utha aur College se baahar nikal gaya. Kaafi der tak wo aise hi bike par yahaan - wahaan ghoomta raha, tabhi uski nazar ek shop par padi aur kuchh sochkar usne bike rok di. Ye ek gift shop thi.
Wo shop ke andar pahuncha aur idhar - udhar apni nazar ghumane laga. Shelves par kayi tarah ke alag - alag gifts rakhe huye the. Tabhi, “Welcome Sir, Bataiye kya lenge”?
Ye shopkeeper tha, aksar hi customers par ek achha impression chhodne ke liye Milansaar tareeke se hi baat karni padti hai inhe.
Rahul ne ek nazar unhe dekha aur fir, “Umm.. Main ek minute dekh lun”! Ye kehkar wo waapis se wahaan rakhe gifts ko dekhne laga.
Shopkeeper : Bilkul sir, sab tarah ke gifts hain hamare paas. Aap bas bataiye ki kiske liye chahiye, usi hisaab se main dikha dunga.
Rahul kuchh pal sochne laga par use samajh nahi aa raha tha ke wo kya le. Tabhi uski nazar ek taraf rakhe huye soft toys par padi aur....
[Flashback : 2 Years Ago]...
“Bhai, aap mujhe kya gift doge”!?
Raat ka waqt tha aur aasman mein maujood chaand aur wo sitaare apni ek alag hi chamak bikher rahe the. Mahi aur Rahul apne ghar ke terrace ki boundary ke paas khade the. Us waqt Rahul Graduation ke 2nd year mein tha wahin Mahi 11th Class mein. Mahi uski ek baazoo thaame us se chipak kar khadi thi. Halki - halki hawa bhi beh rahi thi jiske chalte Mahi ke baal haule - haule se lehra rahe the. Jahaan Rahul ki nazrein saamne ki taraf thi, wahin Mahi lagatar Rahul ko hi dekhe jaa rahi thi. Tabhi, usne ye sawaal kiya tha Rahul se...
Rahul : Gift dena zaroori thodi hota hai... Aauchh..
Apni baat kehte huye hi wo halka sa hadbada kar uchhal gaya. Kaaran, Mahi ne uski baat sunte hi uski baazoo par zor se pinch kar diya tha.
Mahi : Aap kuchh keh rahe the Bhai..
Uski aawaz mein ek shararat aur chehre par behad masoomiyat jhalak rahi thi.
Rahul : Haan.. wo Main keh raha tha jo tu kahegi wahi laa dunga.
Mahi ki wo halki si muskaan gehri ho gayi aur wo Rahul ke gaal ko kheenchte huye boli,
Mahi : Jab aapko pata hai aap meri baat taal nahi sakte to Koshish bhi kyun karte ho.
Rahul ne ek pal use dekha aur fir use kandhe se kheenchkar apne saath laga liya.
Rahul : Bata kya gift chahiye?
Mahi : Umm.. Main kyun bataun,aap khud socho. Aur agar mujhe pasand nahi aaya fir dekhna aap.
Itna kehkar wo khilkhilati huyi terrace se neeche ki taraf chal di. Par stairs ke paas ruk kar bina pichhe mude hi boli, “Waise mujhe ek pyara sa soft toy bohot pasand aayega”! Mahi neeche chali gayi par Rahul wahin khada uski naadani ko yaad kar muskurata raha. Aur apne aap hi uske munh se nikal gaya.. “Jhalli”. Tab Mahi apne birthday ke liye Rahul se gifts maang rahi thi par achanak hi agle din Harshad ki tabiyat kaafi kharaab ho jaane ki wajah se uski birthday party cancel ho gayi thi.
[Back To Present]...
Ye scene yaad karke Rahul halke se muskura diya aur unhi shelves ki taraf badh gaya. Wahaan kayi saare, chhote - bade size aur shapes ke soft toys rakhe huye the par Rahul ki nazren ek par jaakar ruk gayi. Ye ek Panda ka soft toy tha, joki kaafi bade size ka tha. Par khaas baat ye thi ke uspar ek heart bhi bana hua tha jismein “I Love You”, ye teen shabd likhe huye the. Rahul ne shopkeeper ki taraf dekha aur,
Rahul : Ise pack kar dijiye. Aur saath mein ek sorry card bhi de dijiyega.
Shopkeeper : Good Choice Sir. Abhi pack kar deta hoon.
Itna kehkar wo apne kaam mein jut gaya aur idhar Rahul sochne laga, “Main bhi dekhta hoon kitni derr tak naaraz rahegi ab”!
“I'm sorry for what has hurt you. Mujhe nahi pata ke tu kis baat par mujhse naaraz hai but fir bhi meri jis bhi baat se tujhe bura laga uske liye, bohot saara sorry.”
Mahi ne dheeme se budbudate the ye shabd. Aaj wo College off hone se thoda pehle hi ghar aa gayi thi. Wo jaanti thi ke Rahul use pick karne aayega aur filhaal wo use aur uske sawaalon dono ko hi face nahi karna chahati thi. Par jaise hi wo apne room mein pahunchi to uski aankhen hairaani se bhar gayi. Kaaran, uske bed par wahi Panda rakha hua tha jo Rahul uske liye laya tha par saath hi us Panda ke haathon mein ek sorry card bhi rakha hua tha. Aur usi card par likhe ye shabd Mahi ne halke se khudse hi budbudaye the. Wo kuchh pal yunhi jadh si hokar khadi rahi aur fir dheere - dheere apne bed ki taraf badhi. Usne apne kandhe par latka hua bag wahin rakh diya aur us card ko apne haathon mein lekar gaur se dekhne lagi, tabhi uski nazar card ke neeche ki taraf padi jahaan likha hua tha, “Tera – Rahul”!
Ek anjaani se Khushi ka ehsaas to hua uske dil mein ek pal ko par agle hi pal waapis se uski mann mein wo Priya ke saath huyi baatein kaundh gayi aur wo card uske haath se chhitak gaya. Agle hi pal, usne us Panda ko halke haath se touch kiya aur fir naa jaane kyon use zor se apni baahon mein jakad liya. Kaafi derr tak wo usi position mein baithi rahi aur fir, use jakde huye hi so gayi.
To Be Continued...
