Thriller Khatarnaak Ungliyan (completed)

[syed arshad]

Imran Ko Deck Par Chaar Aadmi Behosh Padhe Mile....
Lekin
Paanchva Kahan Tha....!


Imran Engine Room Ki Taraf Badha....Paanchva Ba-Hosh-O-Hawaas Launch Chala Raha Tha....Uski Peet Imran Ki Taraf Thi....
Lehaaza
Wo Chup-Chaap Cabin Ki Taraf Palat Gaya....
Aur
Clara Ko Iski Ittela Di....!


Tum Fikr Na Karo....Main Use Dekh Lungi....Clara Ne Writing Pad Par Likha....
Aur
Cabin Ka Darwaaza Khol Kar Bahar Nikal Gayi....!


Imran Ki Aankhon Mein Ajeeb Se Tasuraat (Pratikriya) The....Wo Aaram Kursi Par Neem Daraaz Ho Kar Taange Hilane Laga....Aisa Maalum Hota Jaise Wo Khud Bhi Unhi Mein Se Ho....Aankhon Mein Zara Barabar Hi Tashveesh (Chinta) Ke Asaar Nahi Paye Jate The....!


Thodi Der Baad Microphone Par Silvas Ki Awaaz Ayi....Mr John Engine Room Mein Aa Jao....!


Imran Lambi Saans Le Kar Uth Baitha....Engine Room Mein Pahunch Kar Usne Dekha Ke Paanchva Aadmi Bhi Farsh Par Aundha Padha Hua Hai....!


Clara Ne Ishaara Kiya Ke Wo Paanchon Behosh Aadmiyon Ko Cabin Mein Pahuncha Kar Uska Darwaaza Locked Kar De....!


Is Begaar Ko Bhi Bhugatna Padha....
Fir
Wo Engine Room Mein Clara Ke Khareeb Hi Aa Khada Hua....
Aur
Clara Usse Silvas Ki Awaaz Hi Mein Guftgu Karti Rahi....!


Mr Silvas Is Safar Ki Ikhtetaam (Anth) Ki Bhi Koi Surat Hogi Ya Nahi....!


Ehkamaat (Nirdesh) Par Munehsar (Depend) Hai Mr John....Hume Us Waqt Tak Chalte Rehna Hai....Jab Tak Ke Boss Ki Taraf Se Koi Naya Hukm Na Mile....!


Imran Ahista-Ahista Sar Sahelane Laga....!


Thodi Der Baad Mike Se Awaazein Aane Lagi....Jaise Makhsoos (Special) Ishaaron Mein Koi Paighaam Ho....!


Clara Use Ghaur Se Sunne Lagi....
Aur
Jab Un Ishaaron Ka Silsila Khatm Ho Gaya To Silvas Ki Awaaz Mein Boli....Baat Ban Gayi Hai Mr John....Ab Mujhe Manzil Ka iLm Ho Gaya Hai....!


Lekin....Mera Kya Hashr Hoga Mr Silvas....!


Iska Faisla Boss Karega....!


Tumhara Boss Mujhe Koi Deewana Aadmi Maalum Hota Hai....Tumhe Bhi Dooboyega....Ise Yaad Rakhna....!


Mr John....Ghussele Lahje Mein Kaha Gaya....Apni Zubaan Ko Laghaam Do....Hum Boss Ke Khilaaf Ek Lafz Bhi Nahi Sun Sakhte....!


Imran Clara Ko Aankh Maar Kar Muskurane Laga....!


Wo Bhi Muskurayi....Kuch Dur Seedhe Hi Chalte Rahne Ke Baad Usne Launch Ka Rooq Baayi (Left) Janib Modh Kar Nasaf (Half) Daira Banaya....
Aur
Fir....Use Seedhe Le Ayi....Raftaar Mein Bhi Kisi Qadr Tezi Ayi Thi....!


Imran Khamoshi Se Sab Kuch Dekhta Raha....Uski Aankhon Se Be-Itminaani Nahi Jhalki Thi....!

 

[syed arshad]

Achanak....Clara Ne Fir Kagaz Par Likhna Shuru Kiya....Maine Ba-Zariya Signal Headquarters Ko Khabar Di Hai Ke Launch Hidayath Ke Mutabeeq Batayi Hui Jagaah Par Pahunch Jayegi....
Lekin
Haqeeqatan Main Ab Ise Apni Kameengah Ki Taraf Le Jaa Rahi Hu....Mere Aur Tumhare Alawa Aur Koi Na Hoga....!


Imran Ne Is Tarah Sar Hilaya Jaise Yeh Ittela Uske Liye Behadh Masrath (Khushi) Ka Baees Sabeet Hui Ho....!


Launch Tezi Se Duri Tai Karti Rahi....Suraj Ghuroob (Suryaasth) Ho Raha Tha....!


Mr Silvas....Kya Hum Coffee Nahi Piyenge....Imran Ne Kaha


Zaroor....Zaroor....
Lekin
Mere Aadmi Is Silsile Bohath Badh-Saleekha Hai....
Agar
Tum Khud Takleef Karo Mr John To Behtar Hoga....Kitchen Mein Chale Jao....!


Acha....Acha....Main Khud Hi Dekhta Hu....!


Imran Kitchen Mein Chala Aya....Coffee Tayyaar Karne Ke Dauraan Mein Uski Aankhon Mein Gahri Tashveesh (Chinta) Ke Asaar Nazar Aye....Jaldi Wo Fir Coffee Pot....
Aur
Cups Samet Engine Room Mein Wapas Aa Gaya....!


Oh Mr John....Bohath Bohath Shukriya....Clara Ne Silvas Ki Awaaz Mein Kaha....
Lekin
Tum Kisi Qadr Pareshaan Nazar Aa Rahe Ho....Kya Baat Hai....?


Sirf Ek Uljhan Hai Mr Silvas....Aakhir Tumhara Boss Mujh Se Kya Chahta Hai....!


Mera Boss Dushmano Ko Dost Banane Ka Maaher Hai Mr John....Shayad Wo Tumhe Dost Banana Chahta Hai....
Varna
Tum Kabhi Ke Gharq (Doob) Ho Chuke Hote....!


Meri Dosti Se Use Koi Faida Nahi Pahunch Sakhega....!


In Masaayel (Problems) Ko To Wahi Jane Mr John....Main Bhi Kabhi Uska Dushman Hi Tha....
Lekin
Ab Uski Khidmat Karne Mein Faqr Mehsoos Kar Raha Hu....!


Imran Ne Khamoshi Ikhtiyaar Kar Li....!


Idhar Launch Ki Raftaar Kam Hone Gayi Thi....
Aur
Fir....Chaaron Taraf Mukammal Tareeki (Andhera) Chaa Gayi....!


Engine Room Mein Sirf Ek Bulb Roshan Tha....!


Clara Imran Ki Taraf Dekh Kar Muskurayi....
Lekin
Kuch Boli Nahi....!


Fir Usne Launch Ka Engine Bandh Kar Diya....
Aur
Kagaz Par Likhne Lagi....Main Kameengah Mein Pahunch Gayi Hu....Tum Deck Par Pahunch Kar Torch Se Roshni Dikhao....Taake Main Langar Daal Sakhu....!


Imran Uth Gaya....Ek Taaqatwar Barqi (Electric) Torch Uske Haath Mein Thamaadi Gayi....
Fir
Ek Mokhtasar (Short) Se Tareek Dock Se Launch Jaa Lagi....Uske Baad Wo Dono Dock Par Utar Gaye....!


Aur Clara Ne Torch Imran Ke Haath Se Le Li....Dock Se Guzar Kar Wo Ek Tang Se Daire Mein Daakhil Hue....!


Clara Roshni Dikha Rahi Thi....
Achanak
Ek Jagaah Bade-Bade Pattharon Ke Dher Se Raasta Blocked Ho Gaya....!

 

[syed arshad]

Oh....Shayad Yahan Is Dauraan Mein Zalzala Aya Tha....Clara Apni Asal Awaaz Mein Boli
Aur
Imran Ke Haath Mein Torch Thamaate Hue Kaha....Tum Roshni Dikhao....Main Raasta Banati Hu....!


Tum Raasta Banaogi....Imran Ne Hairath Se Kaha....
Aur
Torch Ka Rooq Pattharon Ke Dher Ki Taraf Kar Diya....!


Yeh Patthar Kayi-Kayi Mann Vazni Rahe Honge....!


Haa....Dekho....Kiss Tarah Raasta Banati Hu....Clara Ne Kaha....
Aur
Pattharon Ke Dher Ki Taraf Apni Wahi Dono Behangam Ungliyan Badhayi....Jin Ki Badnumayi Ki Bina Par Har Waqt Dastane Pahene Rahti Thi....
Aur
In Dono Ungliyon Ke Harkath Mein Aate Hi Vazni Patthar Uchal-Uchal Kar Ek Taraf Girne Lage....Jaise Wo Rui (Cotton) Ke Gole Ho....!


Dekhte Hi Dekhte Raasta Saaf Ho Gaya....
Aur
Clara Aage Badhti Hui Boli....Dekha Tum Ne....Bas Isi Tarah Roshni Dikhate Hue Mere Piche Chale Aao....!


Haa....Mujhe Is Par Hairath Na Honi Chahiye....
Kyun Ke
Tum Bhi Sangzaad Ho....Imran Ne Kaha


Nahi....Is Salaahiyath Ka Talookh Crystal Se Nahi Hai....Main Aisi Surat Mein Us Markazi (Central) Machine Se Raabta Khayam Nahi Kar Sakhti Jo Meri Khaal Ko Salaabat Baqshti Hai....
Aur
Main Faulaad Se Bhi Takra Sakhti Hu....!


Kaisi Surat Mein....Imran Ne Pucha


Aisi Surat Mein Jab Ke Main Jaguar Se Chupte Phir Rahi Hu....
Agar
Maine Us Markazi Machine Se Raabta Khayam Karne Ki Koshish Ki To Meri Nishaandehi Ho Jayegi....
Aur
Jaguar Kisi Buri Rooh Ki Tarah Mujh Par Savaar Ho Jayega....!


Tab Fir Tum Waqai Hairath Angez Ho....Imran Ne Kaha


Meri Yeh Dono Badnuma Ungliyan Khudrati Taur Par Aisi Hi Hai....Main In Se Moti-Moti Lohe Ki Salaakhein Modh Sakhti Hu....!


Khatarnaak Ungliyan....!


Haa....Tum Inhe Khatarnaak Bhi Kahe Sakhte Ho....
Kyun Ke
Main In Se Qatl Bhi Kar Sakhti Hu....!


Imran Kuch Na Bola....!

 

[syed arshad]

Daire Ka Ikhtetaam (Anth) Ek Ghaar Ke Dahaane Par Hua Tha....!


Clara Dahaane Mein Daakhil Ho Gayi....!


Imran Ab Bhi Piche Roshni Dikha Raha Tha....!


Thodi Der Baad Wo Us Jagaah Pahunch Gaye....Jahan Unhe Rukna Tha....!


Clara Ne Do Kerosene Lamp Roshan Kar Diye....!


Yahan Patthar Hi Mein Nashistgah (Seating-Area) Taraashi Gayi Thi....
Aur
Un Par Gaddhe Padhe Hue The....!


To Yeh Hai Tumhari Kameengah....Imran Ne Chaaron Taraf Dekhte Hue Kaha


Baith Jao....Clara Ne Ek Nashistgah Ki Taraf Ishaara Kiya....!


Imran Use Baghaur Dekhta Hua Baith Gaya....!


Jagaur Agar Wahan Tak Pahunch Gaya To Use Tabaah Kar Dega....Wo Ahista Se Boli


Kahan Tak Pahunch Gaya To Kise Tabaah Kar Dega....?


Tumhare Atomic Reprocessing Plant Ko....
Halaanke
Hum Se Sirf Itna Kaha Gaya Tha Ke Hum Uske Nasab (Fit) Kiye Jane Ki Jagaah Ka Pata Laga Kar Apni Report Pesh Kar De....
Lekin
Wo Use Tabaah Kar Dega....
Kyun Ke
Wo Tumhare Ek Hareef (Rival) Mulk Se Rishvat Le Li Hai....!


Oh....To Wo Green File-13 Ka Qissa....Imran Ne Apne Lahje Mein Bohath Zyada Hairath Paida Kar Ke Sawaal Kiya


Wo Mahez Ek Uljhane Wali Cheez Thi....Hume Tumhare Kisi Bhi Secrete Se Koi Sarokaar Nahi....Sivaye Atomic Reprocessing Plant Ke....!


Jiss Ka Koi Wajood Nahi Hai....Imran Hans Kar Bola


Tum Jhoot Bol Rahe Ho....Wo Uski Aankhon Mein Dekhti Hui Boli....Tum Jaante Ho Ke Use Kahan Nasab Kiya Gaya Hai....!


Isi Ghalathfehmi Ki Bina Par Tum Log Mujhe Daudate Phir Rahe Ho....Imran Ne Kaha
Aur
Mazaaq Udhane Wale Andaaz Mein Hans Padha....!


Jaguar Ko Mahez Isi Liye Meri Talaash Hai Ke Kahin Main Tum Logon Ko Asal Maamle Se Aagha Na Kar Du....Yaqeen Karo....
Agar
Wo Wahan Tak Pahunch Gaya To Use Tabaah Kar Dega....!


Aur Agar Tum Pahle Pahunch Gayi To....?


Main Sirf Apni Report Dungi....Jiss Mein Jagaah Ki Nishaandehi Ki Gayi Hogi....!


Sawaal To Yeh Hai Ke Itne Dino Ki Chakkar Baaziyon Ke Baad Ab Tum Atomic Plant Ka Qissa Suna Rahi Ho....Asliyath Kya Hai Clara Dickson....Ab Main Sirf Sachchi Baat Sunna Pasand Karunga....!

 

[syed arshad]

Oohhoo....Tum To Is Andaaz Mein Guftgu Kar Rahe Ho Jaise Mujhe Giraftaar Kar Liya Ho....!


Yahi Samajh Lo....!


Clara Dickson Ne Zordar Khahekhaha Lagaya....
Aur
Imran Ne Kaha....Tum Logon Ne Bohath Lamba Kadhaak Phailaya Hai....
Agar
Kisi Atomic Plant Ki Talaash Thi To Yeh Kaam Badi Khamoshi Se Ho Sakhta Tha....Sangzaad Wale Hungame Khattai Ghair Zaroori The....!


Acha....To Fir....Tum Kya Samajhte Ho....!


Yeh Baad Mein Bataunga....Pahle Dr Forial Ki Baat Ho Jaye....!


Uski Kya Baat Karoge....Clara Ne Kaha


Wo Mahez Us Makazi Machine Ki Nigraan Hai....Jo Sangzaadon Ko Control Karti Hai....Chunke....Machine Ka Dairekar Mehdood (Simit) Hai....
Lehaaza
Jahan Kahin Bhi Tum Logon Ko Sangzaad Ka Shaabdah (Trick) Dikhana Hota Hai....Wahan Se Makhsoos Faasle Par Us Machine Ki Zaroorat Pesh Aati Hai....Sangzaad Ka Hungama Shaher Mein Bharpa Karna Tha....Isliye Yahin Dr Forial Wala Drama Bhi Khela Gaya....!


Saamne Ki Baat Hai....Clara Fir Hans Padhi....
Aur
Sanjheedgi Ikhtiyaar Kar Ke Boli....Tum Waqt Zaya Kar Rahe Ho Imran....Main To Tumhe Bohath Aqlmand Samajhti Thi....Mujhe Batao Wo Plant Kahan Hai....Taake Main Uski Hifaazath Kar Sakhu....!


Agar Wo Kahin Hai Bhi To Mujhe Khattai iLm Nahi Ke Kahan Hai....Haa....To Main Yeh Kahe Raha Tha Ke Un Hungama Khaiziyon Ka Iske Alawa Aur Koi Maqsad Nahi Tha Ke Hume Maroob (Prabhavit) Kiya Jaye....!


Yeh To Koi Baat Na Hui....Humare Dost Mulk Hum Se Baherhaal Maroob Hi Rahte Hai....Tumhara Mulk Bhi Unme Shaamil Hai....!


Main Us Aam Maroobiyath Ki Baat Nahi Kar Raha....Jiss Mein Kharzdar Mubtela Hote Hai....Imran Ne Pur Tafikr Lahje Mein Kaha....Yahan Baat Dusri Hai....Is iLaaqe Ki Siyaasath (Raajneeti) Ka Takhaza Yeh Hai Ke Hum Ghair Janibdar Rahe....
Lekin
Tum In Halaath Mein Bhi Hume Apna Hashiyah Bardar Banaye Rakhna Chahte Ho....
Isliye
Tum Ne Sangzaadon Ka Chakkar Chalaya Tha....Khususiyath Se Musalaah Fauj Ko Unka Namuna Dikhane Ki Koshish Ki Thi....Mahez Yeh Baavar Karne Ke Liye Ke Tum Hume Har Tarah Majboor Kar Sakhte Ho....Ek Sangzaad Bade-Bade Morchon Ko Tabaah Kar Ke Rakh Dega....
Lekin
Kya Hua....Ek Sangzaad Ka Hashr To Tum Dekh Hi Chuki Ho....Suno Clara....Hum Mann Hais Ehsaanmand To Ho Sakhte Hai....
Lekin
Hume Kisi Tarah Ki Bhi Ghulaami Qabool Nahi....!


Khuda Ke Liye Khamosh Raho....Clara Haath Utha Kar Boli....Tum Khwaamkha Siyaasath Ke Maidaan Mein Daud Laga Rahe Ho....Waqt Zaya Ho Raha Hai....
Aur
Jaguar Ko Zyada Se Zyada Mauqa Mil Raha Hai....Paanch Aadmiyon Ko Iska iLm Hai Ke Atomic Reprocessing Plant Kahan Nasab (Fit) Kiya Gaya Hai....Chaar Tak Humari Rasaayi Mumkeen Nahi....Paanchve Tum Ho....!


Tumhari Fraham (Pradan) Kar Da Ittela Ghalath Hai....Mujhe Aise Kisi Plant Ka iLm Nahi....Jo Dusron Se Poshida Ho....!


Kya Tum Hi X-2 Nahi Ho....Wo Aankhein Nikaal Kar Boli


Is Par Imran Ne Ek Zordar Khahekhaha Lagaya....
Aur
Us Waqt Tak Hansta Raha Jab Tak Ke Wo Jhunjhula Kar Cheekhi Nahi....Khamosh Raho....!


Tum Baatein Hi Aisi Kar Rahi Ho Ke Aadmi Hansta-Hansta Behosh Ho Jaye....!

 

[syed arshad]

Main Tum Par Tashadood (Torcher) Bhi Kar Sakhti Hu....Clara Aape Se Bahar Ho Kar Boli


Lekin Tum Us Markazi Machine Ke Aahaate (Area) Amal Se Bahar Ho....Jo Tumhari Khaal Ko Crystalised Kar Deti Hai....!


Meri Yeh Do Ungliyan....!


Humare Yahan Ek Bada Romaani (Romantic) Geet Gaaya Jata Hai....Jiss Ka Mauzoo (Topic) Hi Ungliyan Hai....Mashlasiyan Ungli Marode Rahe....Ram Kasam Sharma Gaye Hai....Tumhe Itni Urdu To Aati Hai Ke Tum Is Mukhde Ka Matlab Samajh Sakho....!


Imran Sanjheedgi Ikhtiyaar Karo....Varna....


Tum Baatein Hi Aisi Kar Rahi Ho Ke....


Achanak Imran Chaunk Padha....Usne Motadaad Khadmon Ki Awaazein Suni....
Lekin
Clara Laparwaahi Se Baithi Rahi....Uski Aankhon Mein Tashveesh (Chinta) Ki Jhalak Bhi Nahi Thi....!


Aur Fir....Silvas Apne Chaaron Aadmiyon Ke Saath Us Kamre Mein Daakhil Hua....Wo Sab Musalaah The....Unke Haathon Mein Stun-Guns Thi....Wo Paancho Position Le Kar Khade Ho Gaye....!


Ab Kya Khayal Hai Mr Imran....Clara Pur Sukoon Lahje Mein Boli


Ab Mera Khayal Yeh Hai Ke Tum Apne Aadmiyon Ko Bhi Dhoka Deti Rahi Ho....!


Kya Matlab....?


Jaguar Bhi Tum Khud Hi Ho....Imran Ne Uski Aankhon Mein Dekhte Hue Kaha....Silvas Ki Awaaz Ki Hairath Angez Taur Naql Utaarti Rahi Ho....
Aur
Mere Saamne Aa Jane Ke Baad Se Fir Jaguar Ki Awaaz Nahi Ayi Thi....!


Ab To Tumhe Marna Hi Padhega Mr Imran....Clara Jaguar Ki Awaaz Mein Boli
Aur
Wo Paanchon Baukhla Kar Uski Taraf Dekhne Lage....!


Imran Ke Liye Bas Itna Hi Kaafi Tha....Usne Khareebi Musalaah Aadmi Par Chalaang Lagayi....Stun-Gun Cheenta Hua Ek Aisi Nashistgah Ki Oth Mein Ho Gaya....Jo Silvas Aur Uske Aadmiyon Ki Zad Se Bahar Thi....!


Yeh Sab Itni Tezi Se Hua Ke Kisi Ko Kuch Sonchne-Samajhne Ka Mauqa Hi Na Mil Sakha....!


Yeh Nikal Kar Jane Na Paye....Clara Cheekhi


Jayega Kahan Madamme....Silvas Ki Awaaz Ayi


Hoshiyaari Se Khatarnaak Aadmi Hai....Clara Ne Kaha


Imran Ki Aankhein Har Qism Ke Tasuraat (Pratikriya) Se Aari Thi....Uske Muqabil 4 Stun-Gun Thi....
Aur
Fir....Wo Khatarnaak Aurat....Jo Khud Hi Tanzeem (Sanstha) Ke Is Daste Ki Sarbaraah Bhi Thi....Aisa Maalum Hota Tha Jaise Jo Kuch Bhi Ho Raha Hai Roz Marra Ke Maamuliyath Ke Mutabeeq Ho Raha Tha....!

 

[syed arshad]

Achanak....Clara Ki Awaaz Fir Ayi....Tum Muft Mein Maare Gaye Imran....Hum Tumhara Atomic Reprocessing Plant Talaash Kar Hi Lenge....
Aur
Haa....Yeh Bhi Durust Hai Ke Sangzaad Mahez Tumhari Askari Khuvat (Military-Force) Maroob (Prabhavit) Karne Ke Liye Banaye Gaye Hai....
Aur
Tum Dekhna Ke Hum Kiss Tarah Kaamyaab Hote Hai....Is iLaaqe Ke Siyaasi Halaath Khwaah Kuch Ho....Tumhari Khaum Ko Humara Hashiya Bardari Bana Rehna Padhega....Tum Humare Ek Mokhtasar Se Daste Ke Saamne Bhi Bebas Ho....Mattu Ke Jazeere Par Humla Isliye Kiya Gaya Tha....Taake Tum Log Is Haqeeqat Ko Achi Tarah Zahen Nasheen Kar Lo....!


Uski Awaaz Imran Ke Kaano Mein Zaroor Padh Rahi Thi....
Lekin
Wo Apni Dono Taraf Se Ghafil Nahi Tha....Itni Phurti Se Usne Apne Dono Taraf Brust Maare Ke Unki Bhi Cheekhein Nikal Gayi....Jo Zad Par Nahi The....Silvas Ke Do Aadmi Chalni Ho Kar Rahe Gaye....!


Hoshiyaari Se....Clara Dahaadi
Aur
Imran Ne Uski Awaaz Ke Thik Upar Chath Par Brust Maara....
Aur
Dusre Hi Lamhe Mein Clara Ki Cheekh Sunayi Di....!


Goliyan Chath Se Takra Kar Waapsi Mein Clara Ke Sar Par Padhi Thi....
Aur
Wo Apni Kursi Se Ludhak Gayi....
Fir
Wo Farsh Par Tadapti Aur Cheekhti Rahi....Chath Se Palti Hui Goliyan Itni Asardar Bhi Nahi Thi Ke Fauri Mar Jati....
Fir
Achanak....Kisi Aur Ne Bhi Apni Gun Se Brust Maara....
Aur
Wo Bilkul Khamosh Ho Gayi....!


Fir Silvas Ki Awaaz Ayi....Maine Ise Khatm Kar Diya Mr John....
Aur
Hum Teeno Khud Ko Tumhare Hawaale Karte Hai....!


Apni Guns Baayi (Left) Janib Isi Tarah Daal Ke Main Unhe Dekh Sakhu....Imran Kehta Hua Phurti Se Piche Hata....Aakhir Uske Liye Bhi To Wahi Tadbeer Ki Jaa Sakhti Thi....Jiss Ke Tahat Usne Clara Ko Zakhmi Kiya Tha....
Lekin
Wo Andesha Hi Sabeet Hua....
Kyun Ke
Teen Stun-Guns Uske Saamne Aa Giri Thi....!


Insaaniyath Ke Naam Par Mr John....Silvas Ki Awaaz Ayi....
Aur
Wo Teeno Haath Uthaye Hue Saamne Aa Gaye....!


Bilaakhir Insaaniyath Hi Ki Fateh Hoti Hai....Imran Ne Uthte Hue Kaha


Clara Mar Chuki Thi....!


Imran Ne Silvas Se Kaha....Filhaal Iski Laash Yahin Padhi Rahne Do....
Aur
Tum Mujhe Mattu Ke Jazeere Ki Taraf Le Chalo....Tum Teeno Ko Main Har Haal Mein Bacha Lunga....
Ya Agar
Tum Kahin Jana Chahoge To Mattu Ke Jazeere Hi Se Ruqsath Kar Dunga....!


Shukriya Mr John....Hum Saare Siyaah Faam Log Zabardasti Ghulaam Banaye Gaye The....
Aur
Yaqeen Karo Ke Hum Se Koi Bhi Nahi Jaanta Tha Ke Yahi Aurat Jaguar Hai....!


Thodi Der Baad Wo Chaaro Fir Wahi Launch Par The....
Aur
Launch Khule Samundar Mein Safar Kar Rahi Thi....!


Aadhi Raat Ke Baad Launch Mattu Ke Jazeere Ke Sahil Par Langar Andaaz Hui....!


Fauji Dock Par Aa Gaye....
Lekin
Launch Par Navy Ka Nishaan Dekh Kar Unka Jaarkhana Andaaz Maddham Ho Gaya....!


Captain Shameem Par Nazar Padhte Hi Imran Sab Se Pahle Us Jazeere Ke Baare Mein Sawaal Kiya....Jahan Se Wo Khud Ghayab Hua Tha....!


Captain Shameem Ne Use Bataya Ke Jazeere Ki Talaashi Li Gayi Thi....
Lekin
Jazeere Par Bomb-Baari Karne Ka Sawaal Hi Nahi Paida Hota Tha....Kiss Par Bomb-Baari Ki Jati....Wahan To Koi Bhi Nahi Tha....!


Khareeb 2 Baje Imran Ne Karnel Faizi Se Transmeter Se Raabta Khayam Kar Ke Kaha....Maine Tanzeem (Sanstha) Ke Sarbaraah Ko Thikaane Laga Diya Hai....Dr Forial Ko Fauri Hirasath Mein Le Liya Jaye....Jiss Imaarath Mein Uska Khiyaam (Nivaas) Hai Usi Mein Sangzaado Ko Crystalised Karne Ki Machine Bhi Maujood Hai....Iska Bhi Khayal Rakha Jaye....Over....!


Lekin Aap Ghayab Kahan Ho Gaye The Mr Imran....Over....Karnel Faizi Ki Awaaz Ayi


Aap Mutmayeen (Santusht) Rahiye....Kal Kisi Waqt Mukammal Report Samet Aap Se Mulaakhaat Karunga....Over....!


Aap Ne Bohath Bada Kaam Kiya Hai Mr Imran....Over....!


Is Meetti Ka Haq Namak Aada Kiya Hai Jiss Ne Mujhe Imran Banaya Hai....Acha....Khuda Hafiz....Over And All....!

The End​

 

[syed arshad]

Agli Series Start Karna Ya Na Karna Aap Sab Ke Saath Par Depend Hai Agar Aap Saath Rahne Ka Vaada Kare To Main Bhi Regular Updates Ke Saath Agli Series Start Karne Ka Vaada Karta Hu

 

[Reyaan mallick]

Agli Series Start Karna Ya Na Karna Aap Sab Ke Saath Par Depend Hai Agar Aap Saath Rahne Ka Vaada Kare To Main Bhi Regular Updates Ke Saath Agli Series Start Karne Ka Vaada Karta Hu

Aap regular update na v de rahe the tb v sb saath the..... Ab to aap regular update dene wale ho to saath kaun chorega apka.

 

[Baba_musafir]

Agli Series Start Karna Ya Na Karna Aap Sab Ke Saath Par Depend Hai Agar Aap Saath Rahne Ka Vaada Kare To Main Bhi Regular Updates Ke Saath Agli Series Start Karne Ka Vaada Karta Hu

syed arshad bhai aap nai series start kijiye i think sabhi readers aapke sath honge
-baba-