- 32
- 49
- 19
Update 6
खेलकुद प्रतियोगिता - 2
Sports Tournament - II
Aaj Wednesday hai. Aditya aur Rajeev apne team ke saath jaakar ready ho gaye.
Commentator: Hello, everyone. Is saal se kabaddi competition mein system change ho gaya hai, isliye main aapko tournament ka format samjha raha hoon. Total 8 teams participate kar rahi hain, aur koi group stage nahi hai. Har match knockout hai – matlab ek baar haar gaye, toh competition se bahar, koi second chance nahi. Aasani ke liye aap aise samajh lijiye – sabse pehle quarter-finals, phir semi-finals, aur last mein Final – yahi is tournament ka format hai. Aur ek important rule – agar koi team all-out ho jaati hai, toh match wahi khatam. Aaj sirf quarter aur semi-finals honge. Final kal yaani ki Thursday ko hoga. Toh bas ek rule yaad rakhiye – jeeto to aage badho aur haaro to ghar jao. I hope aap sab ko system bilkul clear hai, ab bas apni pasandida team ko support kijiye. Let us begin.
Jo bhi audience members tournament ka format nahi samjhe the, wo apne-apne dost se puchh rahe the. General baat yahi ho rahi thi ki har game knockout game hone ki wajah se har team par bahut pressure hai, ek bhi match nahi haar sakte.
Pehle 2 matches hone ke baad Aditya ki team ka match tha. Dono teams playing area par aa chuki thi. Apni team ko dekhkar Aditya ke college ke students cheer karne lage.
Dono teams ab game ke liye ready the.
Dusre team ka raider aaya. “Kabaddi-kabaddi” bolte hue pehle kuch second wo mauke ki talash me idhar-udhar jaata raha, aur last me ek player to touch karke apne court me waapas aa gaya. 0-1
Aditya ne apne team ke ek raider ko bheja. Wo pehle to sambhalke raid kar raha tha, lekin 1 second ke liye uski nazar bhatak gayi aur wo pakda gaya. 0-2
Dusre team ka raider aaya. Ab idhar Aditya ke team me sirf 5 players bache the. Aditya corner me khada tha. Jab raider ka dusre corner par focus tha, Aditya ne jhat se uska pair pakad liya aur phir puri team hi uspar chadh gayi. 1-2
Ab Aditya ne Rajeev ko raid ke liye bheja. Rajeev ne pehle apna dimaag lagate hue ek bonus point liya, lekin kisi ko touch kiye bina hi waapas aa gaya. 2-2
Ab dusre team ka wo raider waapas aaya jisne 1st raid me point liya tha. Is baar uska focus Aditya par zyaada tha jis wajah se usne dusri taraf dhyaan nahi diya aur pakda gaya. 3-2
Aditya ne Rajeev ko waapas bheja. Rajeev sambhalkar raid kar raha tha, lekin tabhi uska pair thoda slip kar gaya aur wo pakda gaya. 3-3
Dusre raider ne jhat se aakar ek player to touch karke out kar diya. 3-4
Ye raid hote hi half-time ka whistle baja. Aditya ne apne teammates ka ek ghera banaya aur sab ko kuch instructions diye. Sab log Aditya ki baat ko dhyaan se sun rahe the.
Game restart hua. Ab Aditya khud raid karne gaya. Pehle 10 second “Kabaddi-kabaddi” bolte hue Aditya sab par apni nazar rakhte hue idhar-udhar ho raha tha. Pehle bonus point lekar, phir Aditya ne ek defender ko chhu liya. Waapas aate waqt Aditya ne thoda pair slip hone ka natak kiya jis wajah se 3 defenders use pakadne ke liye aaye. Jaise hi wo najdik aaye, Aditya ne jhat se teeno ko touch kiya aur waapas aa gaya. Aditya ne khud hi 4 points score kar liye. 7-4
Dusre team ka raider aaya. Usne jhat se ek paas khade player ko touch kar liya, lekin wo Aditya ki strategy me fas chuka tha aur dusri taraf se aate hue defenders ki chain me fas gaya. 8-4
Ab dusra raider raid karne gaya. Dusre taraf abhi sirf 3 defenders bache the. Raider sirf 3 ko dekhkar thoda sa over-confident ho gaya aur carelessly ek banda ko touch karne gaya. Lekin aisa karne ke chakkar me wo box ke zyaada andar chala gaya tha jis wajah se dusri taraf se aate hue dono defenders ne use pakad liya. Super Tackle. 8-6
Dusre team ka raider aaya. Is baar wo carefully raid kar raha tha, lekin bina kisi point ke waapas chala gaya. 8-6
Aditya pichhle raider ki galti se khush nahi tha. Is baar wo khud raid karne gaya. 4 defenders the. Aditya ne “Kabaddi-kabaddi” bolte hue ek hi corner ke 2 players ko jaldi se touch kiya. Ye hote hi baaki dono defenders use pakadne aaye. Aditya ne jhat se apni body ko turn kiya aur unke niche se nikal gaya aur dono ko touch kar gaya. All-out. GAME OVER.
Aise hi ye match Aditya ki team jeet gayi. Sab ne Aditya ki team ke liye cheer kiya.
Shaam ko lagbhag 4 baje semi-final ka match tha. Aditya ki motivation ki wajah se uski team ka morale itna high tha ki Aditya ki team aasani se match jeet gayi. 4 raids and Game Over. Bahut hi zyaada boring aur one-sided semi-final hua tha.
Aditya ki family ghar ke liye nikal rahi thi lekin Aditya ka man dusra semi-final dekhkar jaane ka tha. Ye 2nd semi-final ek bahut hi close match hua tha. Winner team 10-9 se jeeti thi.
Aditya ne khud se jaakar pehle haari hui team ko motivate kiya, aur phir winning team ke players ko badhai di aur kal ke liye “All the Best” bola.
Winning captain: Aditya, humara Final kal tumhare hi saath hoga. Phir tum humein hi “All the Best” bol rahe ho? Ye baat kuch hazam nahi hui.
Aditya: Vijay, “All the Best” ka ye matlab nahi hota ki main apni haar aur tumhari jeet ke liye bol raha hoon. Mere “All the Best” kehne ka matlab tha ki jaise tumhari team ne aaj apne puri jee-jaan lagakar khela hai, waise hi kal bhi khelna, tabhi to dono teams ko maza aayega. Warna 1st semi-final to tumne bhi dekha hi tha. Main khud jeeta hoon, phir bhi bol raha hoon itna boring match nahi hona chahiye. Aise hi match me maza aata hai jisme end tak thrill and curiosity bani rahe aur maza bhi aata rahe. Tumhara ye match kitna close ja raha tha, aur last me tumne hi raid karke 2 points lekar apni team ko match jeetaya. Kal bhi aise hi brilliant match ki ummid hai mujhe, isiliye All the Best.
Vijay: Bhai yaar, is baat pe to gale milo tum.
Dono gale mil gaye. Alag hone ke baad:
Vijay: Lekin bhai, kal hum jeet gaye to bhi aise hi chehra rakhna. Haar ki wajah se ye chehra mat bigaad lena.
Aditya: (thoda haskar) Tension mat lo, Vijay. Aditya jeet me zyaada khush hone wala aur haar me dukhi hone wala insaan nahi hai. Chalo, ab mujhe jaana padega. All the best for tomorrow. May the best team win.
Ye bolkar Aditya waha se nikalne laga. Vijay ki team ke sabhi players ne Aditya se haath milaya. Phir Aditya waha se chala gaya.
Aaj Thursday hai. Kabaddi Final Match ka day.
Commentator: Hello, everyone. Welcome all to the Final match of the men’s Kabaddi tournament. Humne abhi thodi der pehle hi women’s Kabaddi tournament ka Final match bhi dekha jisme humare hi college, Amar Jyoti College ne trophy uthayi hai, ek one-sided match me. So now get ready for the men’s final which promises to be a thrilling match. The two teams are well-prepared for the match. Dono hi teams is tournament ki pre-favourites rahi hain. Dono ne apne skills se apna aap ko prove bhi kiya hai. And now they are ready to face each other. Get ready for Aditya v/s Vijay. Here come the two teams.
Dono teams playing area par ready ho gayi.
Match start hone ka whistle baja. Aditya ki team ki pehli raid thi.
Aditya ki team ka raider raid karne ke liye gaya. Wo aaram se raid kar raha tha. Lekin phir bonus point lene ki jaldbaazi me uska dhyaan bhatak gaya jis wajah se wo pakda gaya. 0-1
Dusre team ka raider aaya. Usne apna dimaag lagate hue pehle bonus point liya aur ek defender ko bhi chhuta hua nikal gaya. 0-3
Ab Rajeev raid karne gaya. Usne pehle bonus point le liya, lekin ek player ko touch karne ke chakkar mein pakda gaya. 1-4
Ab Vijay raid karne aaya. Vijay ek bahut ki skilled aur talented raider tha. Wo jaanta tha ki Aditya ki corner ke taraf jaana risky ho sakta hai, isiliye usne apna dimaag lagate hue pehle ek dusre corner wala defender ko touch kiya aur waapas aate hue uske side wale ko bhi touch kar liya. 1-6
Ab Aditya ki team me sirf 2 players bache the. Aditya khud raid karne gaya. Usne bonus point to le liya, lekin kisi ko touch nahi kar paya aur waapas aa gaya. 2-6
Tabhi half-time ki whistle baji. Amar Jyoti College ke sabhi supporters is waqt dukhi baithe hue the. Aditya ne apni team ke sabhi ko apne paas bulaya aur bolne laga.
Aditya: Isiliye maine kal sabko kaha tha ki 2nd semi-final dekhte hue jao. Lekin nahi, sabko bhaagna tha. Maine kal akele inka match dekha tha. Subah tum sabko strategy bhi batayi thi. Lekin tum sab kal ki aasan jeet ke over-confidence me chur hue pade the. Jo-jo us team ki strengths hain, tum sabne wahi galtiyaan ki hai. Ab hum koi galti nahi kar sakte. Team me sirf hum dono bache hain. Ab jaisa maine subah bola tha, waisa hi karna hai. We can still come back in the game and win the match. Do not lose hope. Come on, guys.
Match restart hua.
Vijay dobara raid karne aaya. Usne Aditya ko ignore kiya aur dusre par focus kiya. Aditya ne ye dekh liya tha. Aditya is waqt Vijay ke right-side par tha, usne apne team-mate ko thoda chillakar bola “Left”. Vijay ko laga ki defender uska left pair pakadne aayega isiliye usne jaldi se apna left pair pichhe khich liya. Isi jaldbaazi ki chakkar me wo apna balance thoda kho gaya jise dekhkar Aditya ne jhat se use pakad liya. Aditya ki shakti ke aage Vijay ki chali nahi aur wo out ho gaya. Super Tackle. 4-6
Vijay ko out hua dekhkar Amar Jyoti College team ke sabhi supporters jor se “Aditya-Aditya” kehkar cheer karne lage. Lekin Aditya ne haath uthakar sab ko shaant karaya aur scoreboard ki taraf point kiya. Matlab saaf tha – The Game is not Over yet.
Aditya raid karne gaya. Pehle aaram se bonus point lekar Aditya ne usi corner me khade ek player ko touch kiya aur thoda pichhe mid-line ke paas aa gaya. Defenders ko laga ki Aditya waapas ja raha hai, isiliye wo thoda normal ho gaye. Ye dekhte hi Aditya jhat se dauda aur ek aur player to touch karke waapas aa gaya. 3 points. 7-6
Dusre team ka raider aaya. Ye ek furtila raider tha jiski speed achhi thi. Wo pehle bhi ek point le chuka tha apni speed ka use karke. Dobara usi speed ke sahare usne ek player ko touch karke out kar diya. 7-7
Aditya ne dusre raider ko bheja. Wo bina kisi ko touch kar paaye hi waapas aa gaya. 7-7
Wo furtila raider waapas aaya. Aditya ab uski speed samajh chuka tha. Jab raider idhar-udhar hote hue Aditya ki taraf aaya, to Aditya thoda pichhe ho gaya. Jaise hi wo dusri taraf daudne ke liye jaane wala tha, Aditya ne jhat se raider par ek jump lagaya. Raider turn karne wala tha, jis wajah se uska balance ban nahi paaya aur wo gir gaya aur pakda gaya. 8-7
Aditya raid karne gaya. “Kabaddi-kabaddi” bolte hue chaaro defenders par apni barabar nazar rakhta hua Aditya idhar-udhar daudne laga. Is baar chaaro bahut hi alert the. Aditya ek corner ki taraf gaya aur mud gaya. Lekin wo pura nahi muda aur waapas usi corner par gaya jis wajah se us corner par khade defender ko usne touch kar liya. Ye dekhkar dusre corner ke defenders Aditya ko pakadne ke liye daude. Aditya jaanta tha ki aisa hi hoga, isiliye usne ek jump lagayi mid-line ki taraf. Lekin pichhe se ek bande ne uska pair pakad liya, jis wajah se uski jump complete nahi hui aur wo thoda pichhe reh gaya. Sab ki nazar abhi Aditya par thi.
Aditya ne apna pair chhudane ke liye pair chalana start kiya. Ye dekhkar dusre defenders bhi Aditya ko pakadne aa gaye. Wo jaante the ki agar Aditya pakda gaya to dusre players ka manobal tut jaayega aur unki jeet pakki hai. Un logo ke Aditya ki peeth par jump lagayi. Ab chaaro defenders Aditya ke upar the. Aditya isi ka intezaar kar raha tha; uska haath mid-line se zyaada dur nahi tha. Usne apne ek knee se apne body ko thoda jhatka diya jis se wo thoda aage push ho gaya aur usne mid-line ko touch kar liya. All-out. Game Over.
Aditya ki team match jeet gayi. Sab audience members khade hokar “Aditya-Aditya” ke naare lagane lage.
Awards ceremony ke time par Aditya ne jaakar apni team ki jeeti hui trophy utha li. Aditya apni team ke paas aaya aur usne Rajeev ke haath me trophy de di. Rajeev ne khushi se trophy ko upar uthaya. Sab log celebrate karne lage.
Celebrations ke baad Vijay Aditya ke paas aaya.
Vijay: Congratulations, Aditya. Kal tumne kaha tha ki “May the best team win.” Aaj wahi hua hai. Tum jis bhi team me hoge, best team wahi hogi. Tumne single-handedly apni team ko match jeetaya hai.
Aditya: Thanks, Vijay. Lekin itni taarif karne ki jarurat nahi hai. Aaj humara din tha, to hum jeet gaye. Tumhari team bhi bahut hi badhiya kheli hai. Brilliant captaincy and brilliant skills in your players.
Vijay: Thank you. Tumse haarne me na mujhe koi dukh hai, na hi mere players ko. You are the deserved winner. Waise tumhari “Left” chillane wali strategy kamaal ki thi. Lekin tumne uska use ek hi baar kyu kiya? Ye mujhe samajh nahi aaya.
Aditya: Strategy chahe kitni bhi achhi kyu na ho, baar-baar repeat karne par wo duniya ke zyaada focus me aa jaati hai. Every strategy should be unique to the situation. Mujhe pata tha ki wo raid karne tum hi aaoge, isiliye maine apne teammate ko pehle hi bol rakha tha ki wo bus apne-aap ko tumse touch hone se bacha le. Usne wahi kiya, tum isi wajah se thoda zyaada tez daudne lage. Maine jaise hi “Left” chillaya, tum confuse ho gaye. Us teammate ko to Left ka matlab bhi pata nahi tha. Wo to bus tumhe confuse karne ke liye tha. Wahi tumhara balance bigda aur tum out ho gaye.
Vijay: Nice! Ab main samajh gaya. Jaise-jaise tum bata rahe the, mere dimaag me visuals aa rahe the. Brilliantly done. Chalo, ab mujhe jaana padega. See you later.
Aditya: Goodbye!
Aditya apne family aur dosto ke paas aa gaya. Sabne use badhai di.
Kamini: Aditya, tum thik to ho na? Kahi chot to nahi aayi na?
Aditya: Come on, maa. Games me ye sab hota rehta hai. And I am absolutely fine. Aur is mitti ke maidaan ki to baat hi nirali hai. Isme chot nahi lagti, isme bus khelne wale ki veerta aur shakti dikhti hai aur nikharti hai.
Ye sunkar Kamini ne ek nazar Arvind ko dekha, jo bhi use hi dekh raha tha. Lekin dono kuch nahi bole aur jhat se nazar hata li.
Nisha: Ye hui na mere hero bhai wali baat. Aditya, you were just incredible there. Ek baar ke liye to main dar gayi thi ki kahi tum haar na jao, lekin kya zabardast khela hai tumne. You were superb.
Aditya: Thanks, didi.
Nisha: Rajeev, tumne bhi badhiya khela. Pehle kabhi khele nahi the, lekin phir bhi kal aur aaj tumne achha khel dikhaya hai.
Rajeev: Thanks, didi.
Aise hi baate karne ke baad sab apne-apne ghar ki taraf chal diye.
