Update 175
Kisse-Kahani (1)
"Tu itna dur dur kyu rahe the bhitar?", Arjun tayaar ho kar apni car nikaal raha tha aur wahi uske kareeb khadi Babita ne dhimi awaaj me uske aise vyavahaar ki wajah pooch li. Gate ke bahar Shankar ji ne us waiter ko pakda hua tha jo subah Asgar ko dhamki de kar gaya tha.
"Aap car me baitho, raste me bataunga. Ek bar ye dekh lu ke bahar kya ho raha hai.", Arjun ne Babita ki baat najar-andaaj karte hue kadam bahar badha diye. Babita abhi Muskaan ka he intjaar kar rahi thi jo Krishna ji aur Kaushalya ji se baatein kar rahi thi kuch duri par. Babita ke pas Vinni aur Richa chali aayi thi. Abhi Arjun apne pita ke kareeb he pahucha tha ki 'chattaak' ki awaaj sunaai padi. Ye thappad lagane wale Shankar ji nahi the, Sanjiv tha.
"Bhaiya, kya kar rahe ho aap?", Sanjiv ke kareeb he Vikaas aur Shankar ji bhi khade the. Arjun teji se waiter aur Sanjiv ke beech aa khada hua.
"Chote tu side me ho bhai jara. Ye paida hua nahi aur patloon me chaaku liye idhar aa khada hua. Hai kaun be tu? Aur jyada garmi hai tere khoon me?", Itne me Shankar ji bhi muskurate hue Sanjiv ko hatane lage. Waiter ke toh honth ke kinaare se khoon he nikal aaya tha ek thappad me.
"Jaane de Sanjiv, umar ka josh hai. Asgar se behas kar raha tha toh usne dhamka kar isko kaam se nikal diya. Bachpana hai jo aise aalu kaatne wale chaku le kar idhar aa gaya. Ja beta, jaha se aaya hai wahi chala ja. Ruk, ye 100 rupaye rakh aur malham lagwa liyo guthkha lene ke sath sath.", Wo ladka seham jarur gaya tha lekin abhi bhi Sanjiv ko nirantar ghoore ja raha tha. Shankar ji idhar se Asgar ki taraf chal diye jaha Inder aur Umed us se pakode banwa rahe the.
"Najar niche kar nahi toh 100 rupaye me teri patti nahi hone wali.", Arjun ne apne pita ke jaate he badi sard awaaj me aisa kaha tha.
"Apni gali me kutta bhi sher hota hai. Gareeb hu lekin tu jaanta nahi badmashi me bhi kam nahi.", Sanjiv, jo kuch peeche hua tha wo aage aane laga toh Vikas ne he rok liya.
"Dekh mujhe koyi farak nahi padta ki tu badmash hai ya bewkoof. Gali me tujhe maine toh bulaya nahi aur jyada garmi hai toh kahi aur ja kar diwar me takkar maar. Lekin is ghar ke saamne fir najar nahi aana chahiye.", Arjun ne halke se uske gaal ko dabate hue piche dhakela toh utne me he us ladke ke paanv ladkhada gaye. Arjun bhi car ki taraf badhne laga tha ki wo bewkoof fir se bol utha.
"Dum ho toh kabhi Camp me kadam rakhiyo. Abhi toh ja raha hu lekin tu najro me chadh gaya meri.", Jaur wo idhar aane se pehle nasha he karke aaya tha.
"Aap ruko bhaiya, main jara iske kaan me 2 shabd keh du. Haan toh ab sunn meri baat dhyaan se. Sonu ya Mangal se pooch liyo ki Arjun kaun hai? Aur tu camp me bhi mere saamne aaya toh tere ghar ke saamne patak ke maarunga aur jo beech me aaya usko bhi.", Ye sab Arjun bahot he dhimi awaaj me keh raha tha bilkul uske chehre ke kareeb se. Aur is beech us ladke ke chehre pe jaise kutil si muskaan aa gayi kuch dekh kar. Arjun ne mehsoos kiya tha ke wo kuch nasha jarur karke aaya hai lekin najro ka peecha kiya toh Sanjiv bhaiya ko bulane aayi Ritu ko wo ladka vaasna se dekh raha tha.
'Thadd' ki ye awaaj Sanjiv ke chaante se 8-10 guna jyada he tej hogi aur Arjun ke peeche khade 5 logo ka mooh khula he reh gaya jab wo yuvak us jordaar thappad se seedha jameen se takraya, jaise koyi khadi lakdi ja giri ho. Sanjiv ne turant lapak kar Arjun ko jakda jo shayad fir se prahaar karne wala tha. Vikas bhi uske saamne aa khada hua. Wo kabhi jameen par gire us yuvak ko dekhta toh kabhi Arjun ke surkh ho chuke chehre ko. Niche gira hua wo ladka ladkhadata hua khada hone laga lekin jaise taise wahi ghutno par baith gaya. Gaal cement ke ramp pe takrane se itni jaldi phool gaya tha aur andar ki taraf daant chubhne se lahu hontho pe aane laga. Sar chakrana laajmi tha aise bharpoor prahaar se.
"Pagal hai kya tu Arjun? Chal ja tu yaha se is se pehle ki chacha aur idhar aaye. Ritu leke ja isko, baaki main dekhta hu. Vikas, paani leke aa yar aur iske sar pe daal. Kaan ki taraf se dekh khoon aane laga hai.", Sanjiv thoda chintit ho gaya tha aur Vikas bhi turant nalke ki taraf badh gaya.
"Ritu didi ko dekh raha tha ye kamina. Aur isliye he subah mara hoga uncle ne isko. Saale tu mil mujhe fir kabhi.", Arjun ka rudra Ritu ke hath thaamne bhar se dur ho chuka tha lekin gussa abhi bhi tha. Aise he wo gusse me bhara car me ja baitha. Babita aur Muskaan bhi chupchap pichli seat par aa baithi thi kyonki Krishna ji aur Kaushalya ji toh tabhi ja chuki thi.
"Arjun, hosh na khoya karte choti moti baat pe. Chal ab gussa band kar aur nikal idhar se.", Babita ne uske sar pe hath ferte hue kaha toh Arjun bhi car liye chupchap chal diya. Vikas ne us yuvak ke chehre ko geela karne ke baad ek taraf baitha diya. Ladke ke hosh lautne lage toh wo hath bhi jodd raha tha.
"Bhaiya ji, galti ho gayi. Aainda na karta main aisa kuch bhi, bas mujhe jaane do yaha se. Gusse me sofia pee ke idhar aa gaya tha ustaad se ladne. Jaane do mujhe.", Paani me bhige chehre par bhi uske aansu saaf dikh rahe the. Kaan par ek tikha cut laga tha jaha Sanjiv ne apna rumaal daba diya.
"Samjha toh raha tha chutiye tujhe ki nikal ja. Daaru pee ke yahi haal hota tujh jaise ka jo andar ka sher toh jaga lete hai lekin dekhte nahi ki sharir sala billi wala bhi nahi hai. Dil toh mera bhi kar raha hai tujhe maar ke teri khaad is bagiche me bicha du. Ab tujhe bhijwau ya chala jaayega yaha se?", Sanjiv ne gor se dekha toh dusre gaal par chehre se bada panja poora chhapp chuka tha. Abhi wo ladka dard me jawaab dene he laga tha ki pakode ki plate liye Shankar, Inder aur Umed bhi is taraf chale aaye. Wo log baatein karte hue aise he pakode kha rahe the.
"Oye tu gaya nai abhi tak? Aur tu iski kya padtaal kar raha hai Sanjiv? Daaru pee ke yahi gir gaya tha kya ye? Pehle he keh raha tha ke chala ja beta, lachhan he thik nahi tere. Garmi ka time aur 5 baje he tu desi chadha ke Keshto Mukkerjee bana fir raha. Abe iska toh gaal he sooj chuka aur ye kaan pe bleeding bhi ho rahi.", Shankar ne pakode khaate hue he tray Inder ko de kar khud muayna kiya toh dusre gaal par panja dekh sab samajh gaye.
"Vikas tera kaam hai ye?"
"Chacha wo gudiya ko ghoor raha tha ye toh jadd diya. Savere bhi shayad is baat pe he likada tha isko kaam se, abhi pata laga bas.", Shankar ji ko taras aa chuka tha us ladke par nahi toh aisi harkat par wo jinda ko laash he bana dete.
"Ja beta chala ja aur dhyaan se jaaiyo. Sar ka maamla hai aur mere bete na thoda jyada he dhang se jadd diya tere. Dil laga ke mehnat kar aur jab thode faltu paise ho toh raat ko khaane se pehle quarter laga liya kar. Mukesh beta, jara isko chhod diyo ye agle chowk tak.", Shankar ji ne Col sahab ke naukar ki cycle rukwa kar usko pyar se gujarish ki toh wo bhi daant nikalta hua ek taraf ruk gaya. Ye ladka toh abhi bhi kaanp raha tha lekin jaise taise pichle carier par baith Mukesh ke sath nikal chala.
"Aap toh bade he thande hone lage ho chacha ji. Matlab main dekh raha hu ke aap badal rahe ho.", Sanjiv jhempta hua muskuraya aur waise he haal Vikaas ke the.
"Chacha hu be tumhara, chutiya nahi hu. Ye bagal wale plot me he tha, Delhi nahi. Arjun ne toh mujhe dekha bhi nahi jab tu us se ulajh raha tha. Mere jaate he usne jadd diya kyonki wo hatne toh wala tha nahi jab us ladke ne tujhse tu-tadaak ki. Aur ye dekh is Vikaas ko, apne upar le raha us bewkoof ka iljaam. Samjha diyo Arjun ko ki aise hath na dhila kara kare, thaanedar ji dekh lete toh Delhi ka ticket pakka tha uska. Chal Gajju, paneer thanda ho us se pehle ye khatam karne hai.", Inder aur Umed toh itne me he muskurate hue aadhe pakode chatt kar chuke the.
"Chacha ghana he cool aadmi hai yar Sanjiv. Matlab aap he hatt gaya jab bera tha ke Arjun uske dharega jarur? I really like it. Lekin ek baat na samajh aayi, Arjun ekdum thanda kis tariya ho gaya? Main jadd usne dekhu tha us time toh wo bhadak reha tha.", Vikas usi jug se paani peene laga tha aur Sanjiv abhi bhi apna sar khujate hue soch raha tha ke abhi jo hua wo tha kya aur kyun hua?
"Ritu ke liye wo bardasht nahi karta Vikas bhai, bachpan se aisa he hai. Lekin wahi usko rok bhi leti hai par chacha kabhi aisa nahi karte. Haan wo alag baat hai ki wo kabhi mere aur Arjun ke pyaar ke beech nahi aate. Arjun pehle sirf gussa tha aur baad me jaise wo bhool he gaya ki wo khada kaha hai. Sachmuch bachaav ho gaya jo dada ji idhar nahi the ya ghar ka koyi aur.", Sanjiv ne Malhotra ji ki beti ki shaadi me bhi Arjun ka ye roop dekha tha aur tab bhi waha Ritu ke he kehne Arjun ruka tha.
"Fer toh bhai Ritu ko iske sath he rakha kar. Stadium me toh main khud bhugat chuka hu iska pagalpan. Janwar maanas hai poora aur us din toh chacha bhi iske saamne fail tha. Shayad unhe bhi bera hai iska patandar ka hisaab.", Ab Sanjiv thoda khul ke muskuraya jab stadium ka jikar hua.
"Unhe toh kahi jyada pata hai Vikas iske baare me. Agar Arjun idhar se bina kuch kiye gusse me chala jata toh wo kahi na kahi bhid jata. Isliye chacha khud he alag ho liye. Pagal nahi hai Arjun, jajbaati hai aur bhaavuk bhi. Ek baar jab ye chhota tha na toh meri kisi se ladaai ho gayi thi. Main bhi school me tha us time aur ye hoga koyi 7-8 saal ka. Fir bhi isne apne se 8 saal bade ladke ke sar me pathhar maar diya tha kyunki wo 2 the aur main akela. Pehle ziddi tha lekin ab samajhdar ho gaya par jajbaati bahot hai.", Vikas bhi bade dhyaan se sunn raha tha ye sab aur wo mehsoos kar raha tha ki Sanjiv ke liye Arjun kitna khaas hai.
"Maine toh waise he chota bhai banaya tha anjaane he isko. Khaagad ne apne Bijender ko he thok diya tha jabki Bijender aaj bhi mere se 21 he hai. Lekin bina shiksha toh ladna bhi nahi aata chahe kitna majboot sharir ho."
"Wo Umed chacha iske dronacharya hai toh shiksha Arjun unse 6 saal se le raha hai bhai. Uske gusse ko kitabo aur kasrat ne he kaabu kiya. Tu pehalwani karta hai stadium me aur shayad 7-8 saal se kar raha hoga. Arjun seekh raha hai kachi umar se aur wo bhi itne bade sharir ke vyakti se jo koyi category nahi banti. Umed chacha ki bas hone ke baad he usko boxing aur kasrat me lagwaya gaya. Pata nahi jajbaat kab kaabu karega?", Sanjiv ki bhi wahi chinta thi jo Aacharya ji aur khud Shankar ji ki thi.
"Rehne chahiye jajbaat Sanjiv bhai. Bandook goli se bhari diwar pe tangi kisi kaam ki nahi kyonki wo sahi samay par chalni chahiye. Chal chhod bhai jo hua so hua. Ab Lucky bhai se bhi phone karke pooch le ke laal-pari lene gaya hai ya nahi.", Sanjiv bhi hanste hue Vikas ke sath ghar ke andar chal dia. Lucky Arora ko phone karke raat ka haal-chal bhi lena tha.
.
.
"Rekha, thoda is Munna ko samjha behan. Aaj maine uska alag he roop dekha 5 minute pehle. Wo jaise apne papa-chacha jaisa hai jo ghar me dekhne se pata nahi chalta.", Krishna ji ne shayad wo drishya dekh he liya tha, chahe dur se aur thoda he sahi. Abhi wo Rekha ke kamre me thi jaha Madhu aur Lalita ji bhi baithi thi Romela, Alisha ke sath.
"Hua kya hai didi? Ab usne aisa kya kar diya jo wo inke jaisa laga aapko?", Rekha ke kuch der pehle muskurate chehre par chinta saaf najar aayi. Madhu bhi bade dhyaan se sunn rahi thi Krishna ki baat.
"Haan bhabhi, abhi kuch aisa waisa hua kya?", Madhu ne bhi jaan na chaha tha aur Romela apni bhasha me Alisha ko wo sab baat samjhane lagi jo ye log keh rahi thi.
"Mujhe nahi pata ki bahar kya hua tha lekin ek ladke se Sanjiv kuch baat kar raha tha aur fir Arjun ne usko buri tarah mara. Ek he baar mara lekin itni jor se jaise jeth ji ya Inder kisi ko maarte hai. Wo bechara bahar chokhat par he gira, mooh ke bal. Ye galat tha lekin Arjun kabhi aisa nahi karta. Us se baat karna ya fir main puchungi jab wo aayega.", Rekha ko bhi ab ghabrahat hui kyonki ye baat unke ghar ke saamne he ghati thi. Lekin Madhu aur Lalita ji jaise unhe he aankhen dikhane lagi.
"Bhabhi ye kya baat hui? Agar Arjun ne aisa Sanjiv ke saamne kiya hai toh matlab wo ladka he galat hoga na? Arjun kabhi galat kaam nahi karta aur main yakeen se keh sakti hu ki baat he aisi hogi. Kya Sanjiv ne Arjun ko danta tha ya roka?", Madhu ke sawaal ke dauraan Romela bhi thodi hairan thi kyonki aisi umeed usko bhi katai ni thi. Lekin is dauraan jab yahi sab usne Alisha ko greek bhasha me samjhaya toh wo muskurati hui wo sab batane lagi jo Vicki ne apni maa ko bataya tha. Romela ki aankhen aur bhi badi ho gayi jo Lalita ji aur Krishna ji ne bhi dekha.
"Tum kuch kehna chahti ho Romela? Jaise tumhe kuch aur bhi pata ho?", Lalita ji ne poocha toh baat ka rukh ab Romela par chala aaya.
"Alisha bata rahi hai ki Arjun ne iski beti ki ijjatt bhi bachaai thi kuch gundo se. Matlab wo ye sab bhi handle kar sakta hai lekin mujhe nahi pata tha.", Ye baat Krishna ji aur Rekha ko bhi pata thi aur dono ne he gehri saans li.
"Romela, kisi ko bachana alag baat hai aur yaha ye baat ghar ke saamne hui. Ritu, idhar aa jara.", Bahar aangan me Ritu ko Komal didi se baat karte dekh Krishna ji ne awaaj laga kar idhar bulaya. Unhone Ritu ko bhi dekha tha Arjun ka hath pakad kar andar laate hue.
"Ji chachi.", Ritu ne andar aate he sabki taraf dekha aur Krishna ji se mukhatib hui. Peeche he uski badi behan Komal bhi dakhil hui, jo shayad khud bhi abhi poori baat jaan na chahti thi.
"Arjun ne abhi bahar kya kiya tha?", Ritu ek baar toh apni maa ki taraf dekhne lagi ye sawaal sunn kar lekin Madhu bua ne bhi aankhon se wahi sawaal kiya toh Ritu farsh pe ungli gadati hui batane lagi.
"Koyi waiter tha jo 2 din se yaha kaam kar raha tha. Subah usko halwai uncle ne kaam se nikaal diya tha aur ab wo sharaab pee kar ladne aaya tha. Sanjiv bhaiya ne usko samjha kar bhejna chaha tha aur tab papa aur dono chacha bhi udhar the. Usne knife nikaal liya tha tab bhaiya ne thappad maar ke wo knife le liya. Nashe me tha wo ladka isliye ulta seedha bolne laga aur baad me papa logo ke jaate he Aaru ne uske thappad maar diya kyonki wo pehle bhaiya aur fir mere baare me kuch ulta bola tha. Wo shayad aur bhi maarta lekin Vikas bhaiya beech me aa gaye aur main usko andar le aayi. Yahi hua tha chachi aur papa ko bhi pata hai lekin unhone kuch kaha nahi. Sanjiv bhaiya se itna he bola ke Aaru ke emotions control karwaye. Sach me Aaru ki galti nahi hai chachi, wo ladka subah mujhe bhi aise dekh raha tha jis wajah se halwayi uncle ne usko kaam se nikala tha.", Ritu ek saans me he sab kuch keh gayi aur sachhai sunn kar Krishna ji ne usko ishare se jaane ka kaha aur khud wahi kursi par baith gayi.
"Main bol rahi thi na bhabhi ki wo galat kaam nahi karta. Shankar bhai ko bhi pata hai aur jab unhone he is par koyi gussa nahi kiya toh matlab Arjun ne thik he kiya.", Madhu ko toh jaise ye sab bhi atcha lagta tha insaan ke vyaktitva me.
"Krishna ki chinta nahi samjhi tum Madhu. Pita ji ya koyi aur mehmaan ye sab dekhta toh baat bigad jaati. Maa ji ne kaha bhi tha ki unki devrani ke saamne koyi aisi waisi baat na ho jis se wo tana de. Chalo tum log kuch bhi na kehna usko, main he baat karti hu Lalla se jab aayega.", Lalita ji ne khud he fainsla liya tha Arjun se baat karne ka. Unhe bhi Arjun ki parwah thi, kahi na kahi Sanjiv se bhi jyada wo Arjun par sneh lutati thi. Chota beta jo tha wo.
"Alisha keh rahi hai ki usko Arjun pasand hai apni beti ke liye aur usko dikkat bhi nahi Preeti ki.", Romela ne mahol ki gambhirta is majaak se turant he hawa kar di. Sabke chehre par hansi aa gayi thi aur Alisha ko jaise kuch pata bhi nahi tha. Lekin andar he andar Rekha ji ko jarur chitna hone lagi thi is prakaran se. Arjun ki aisi he koyi galati bhaari padd sakti thi aur jo samajh nahi aa raha tha wo unke pati ka is baat ke liye sakratmak hona.
.
.
"Abhyaas jo hai ye agar niyamit na ho toh aap kisi bhi manchahe karya me paripakva nahi ho sakte. Hum toh ittefaaq rakhte hai ji Col sahab ki baat se aur yaha aapse vaicharik matbhed rahega Chandrakant ji, jiske liye kshama kijiyega.", Pichle ghar me ek taraf halwaai log vivaah ke liye mithaai bana rahe the toh dusri taraf shikanjivi ke sath yaha in bujurgo ki charcha jaari thi. Dr Sangwan, Kirshneshwar, Rameshwar ji, Aacharya ji, Malhotra ji, Nirmal Singh aur kuch 3-4 log kursiyon par viraajmaan the.
"Ab guru ji he hamare se sehmat nahi hai toh jarur kahi toh galti hui hogi humse. Hahaha.. Bhai sahab hamara toh kehne ka bas ye matlab tha ke jab aap vishesh na ho toh kam se kam avshesh bhi na bano. Humse kisaani hui nahi, vyapaar me fail hue aur phir naukri ki umar nikal chuki thi. Raajniti me humne jana ki aap kabhi kabhi kuch kiye bina bhi vishesh ban sakte hai. Maafi chahta hu Rameshwar bhai lekin aap khud jaante hai ki hamare me gunn toh koyi hain nahi. Isliye jo sacha hai aur hamari samajh se hai wahi kahenge.", Chandrakant urf Chandu aaj yaha sirf ek driver ke sath padhare the.
"Yaha toh vidhayaki chhod de yar Chandu. Matlab humko he bana rahe ho wo bhi hamari kursi pe baith ke.? Sangwan ji, ye bada he abhyast aadmi hai aur baatein aisi karta hai ke insaan ke madhumeh kar de. Rahi baat abhyaas ki toh Chandrakant shuru se he spasht aur sidhi gali chalne wala insaan hai. Toh aaj har samudaaye kis wajah se sath hai? Isko vyaktitva aur jan-maanas ka tabhi se pata hai jab ye school me tha. Hua na abhyaas Chandu? Waise is maamle me hum Kirshan ki bhi tareef karte hai jo jameen dekh kar paidawar bata deta hai khadi fasal ki.", Rameshwar ji ne Chandu ki khul kar prashansha ki thi jis se saaf jaahir tha ke ye dono ek dusre se barso se parichit hai. Krishneshwar apni tareef par bad dono hath jodd kar abhivadan karne lage.
"Ye hai insaan ki pehchan us se jyada karne wale. Hum toh sochte hai ki Pandit ji ne police ki naukari karke sahi kiya, hamare peit par laat lag jaati jo agar ye aacharya bann jaate. Hahaha.. Waise Col bhai sahab aapki baat se kuch yaad aa gaya. Badi he purani ghatna hai agar aap logo ne suni ho toh. Aap shayad ittefaaq rakhte ho doctor sahab. 1970 ke aas-pas ek sub-inspector ne rajya stariya nishanebaaji me final pahuchne ke baad naam wapis le liya tha. Sabka kehna hai ki wo achook the aur nischit vijeta bhi.", Aacharya ji ki is baat par Sangwan ji toh bas muskuraye lekin Col sahab aur Krishneswar bol uthe.
"Bhai sahab he toh the.", Dono ne ek sath kaha tha aur is majedar jawaab par sabhi hansne lage the siwaye Pandit ji ke, jo apne sar pe hath rakhe jhemp gaye.
"Kaha gade murde ukhaad rahe ho Shastri ji? Waqt ka takaja kuch aur tha or haar-jeet ke liye toh khelna bhi sahi nahi lagta. Haan itna bhi khaas nishanchi nahi tha main jo pratham he aata.", Rameshwar ji baat ko taal-matol karte dikhe lekin unke chhote bhai sahab aur sale sahab ne naa me sar hila diya.
"Hum batate hai aap sabhi ko kyonki bhai sahab ko toh 14 baras ki umar me he chandi chadhi bandook inaam me mili thi. Cycle ke teep (tube) se gulel bana kar ye 20 gaj dur latki kairi (aam) ek baar me gira dete the aur wo bhi jab hum the 7-8 ke aur ye rahe honge 12 ke. Bade pita ji ne inhe eknali laa kar di the ji jab unhone inke nishane dekhe. Eekh (ganna) ke agar teesre pore par 10-12 gaj se nishana lagane bolo toh wahi se kaat dete the. Phir jab Ram bhaiya aur Raghu bhaiya ban (jungle) me apna alag he abhyaas kar rahe the toh udhar sath lagte upvan me tendua ghus gaya. Jo halla machaya daasiyon ne aur rajkumariyon ne. Lekin jahi ek kala kutta lapka us tendue pe aur wahi bheje me aa dhansi goli us tendue ke. Ek-naal se 40-45 gaj ka nishana bhaiya he lagaye the aur kaalu ko chhoda tha Raghu bhaiya ne. Raja ji toh aap inaam me chandi ki videshi bandook di inhe aur Raghu bhaiya ko shahi khanjar. Nishane me kam wo bhi na the lekin Ram bhaiya abhyaas karte peid-diwar ya lattu (bulb) pe toh Raghu bhaiya bater-siyaar ya jo cheej udti bhaagti dikhe gira dete. Inke jaise nishanebaj humne toh na dekhe 60 baras me. Baaki kuch galat kaha ho toh maafi.", Krishneshwar ki baatein sunn kar jahan sabhi bhochakke the, aankhon me aseem prashansha ke sath wahi Rameshwar ji kisi ateet ke us dhundle panne me kho gaye jaha unke swarnim din the.
"Bhai sahab ye toh matlab swaad he laa diya aapne toh. Chotu jara shikanji aur leke aa ek ek gilaas. Kirshan bhai aur bhi kuch batao yar hume inke is anjaane se jiwan ke baare me. Humko toh pata he nahi tha ke hamare Pandit ji gulel wale shararti ladke bhi the kabhi aur matlab jungle me itni kam umar me kaisa abhyaas karte the aap log?", Sangwan ji toh jooti utaar kar atche se kursi par paanv rakh kar baith gaye ye kisse sunn kar. Col sahab ko bhi jaise itna kuch pata nahi tha aur unhone fir se sabke liye shikanji banane ka keh diya waha kaam karte ladke ko.
"Ab toh baat hum Pandit ji se he sunenge kyonki yaha ek aur naam suna hai humne. Raghu matlab Swargiya Raghubir ji se hai na?", Aacharya ji ne bhi utsukta dikhai thi aur Malhotra ji ne toh table par padi tractor chhaap taash ko ekatha karke dibbi me rakh diya. Rameshwar ji ko bhi jaise aaj bhavnaye dikhane ka uchit avsar mila tha jo wo kisi ke saamne nahi karte the.
"Yar doctor sahab ab hum bhi kabhi chhote the, seedhe toh hawaldar lage nahi the. Jaise aap diwar faand ke raat ko ghar se nikal jaate the logo ke baade kholne hume bhi kuch aise kaam karne me maja aata tha.", Rameshwar ji ne shuruaat Sangwan ji se he ki.
"Hahaha.. Matlab hamari dharampatni ji ne ye bhi bata diya jo unhe hamari mata ji sunati thi. Lekin aaj toh hum aapke aur Raghuvir Singh ji ke baare me jaan ne ke itchhuk hai bhai sahab. Jab bhi hum Umed ko dekhte hai toh hume bhi wo chehra yaad aata hai jo mushkil se 2-3 bar dekha tha lekin barso pehle."
"Aapne toh dekha tha, humne toh sahi se suna bhi nahi bhai. Lekin agar Umed ko dekh kar unke pita ki yaad aati hai toh matlab wo vyakti kahi vishesh he the.", Ye the apne Chandu ji.
"Ab wo bachpan tha aur hamare pita ji ke bade dharam bhai the Raghubir ke pita ji, jinhe Kirshan bade pita ji bulata tha. Yaad bhi nahi ki hamari mulakaat kis umar me hui hogi kyonki 5 baras me toh dono school bhi sath jaate the. Ek cycle par sewak hume chhod kar aata tha aur leke bhi. Umed ka vyaktitva Raghuvir ke saamne shayad aadha he ho. Hamari taraf ke badi nehar nikalti thi jiske kinare bhi kache the aur bahaav nadi sa. Tairna dono ko nahi aata tha lekin mujhe leke wo kood gaya andar, jab 9-10 baras ke honge. Mujhe toh yamraaj najar aane lage lekin Raghubir hath paanv chala raha. Kismat se raahgir ne dekh liya aur dono ko bahar nikaal lia. Main toh wahi baith ke rone laga lekin wo kambakht fir kood gaya. Aur ye uski jidd thi ya nishchaya lekin wo bahav ke sath kushalta se aage nikal gaya. Mere jiwan ka sabse pehla path mere us bhai ne he sikhaya tha ke darr ke rona hai ya fir samajh kar seekhna. Ek hafte usne mujhe pyaau me hath paanv chalane sikhaye aur fir wapis nehar me. Uske baad dil me wo darr he na raha.", Rameshwar ji ne jiwan ka apna pehla kissa sunaya aur fir ek ghoont paani pee kar jaise Raghubir ko yaad karne lage.
"Wo shikaar wala ha kiss le lijiye Shastri ji. Log kehte hai ki main kutto ko padhaane me daksh hu, falane inaam mile ya jo bhi. Vyavaharik gyaan Raghubir ko tha aur jis samay ka kissa Kirshan ne bataya hai tab wo ek desi shwaan tendue par bekhof jhapat pada kyonki Raghubir ne uska darr he nikaal diya tha. Jab kabhi main kisi fauji ko dekhta ya koyi daroga toh dil karta tha ke aisa banunga kyonki hum sabhi bache unhe hath jodd te the. Wo samay tha jab har insaan unhe dil se sammaan deta tha. Toh Raghubir ne mujhe laga liya nishane me jiski shuruaat gulel se he hui. Hahaha.. Wo mujhe wo har cheej sikhata tha jo saral lagti thi lekin abhyaas karne par badi asadharan. Jiwan me ek wahi shaksh tha jisko humne darte nahi dekha aur us se jyada dridh-nischya wala bhi. Baaki ye khelna koodna toh us waqt 15-16 ki umar me he khatam ho jata tha. Riyasat me naukar the pita ji toh jimmewari jald he mil gayi. Baaki wahi aap logo ne jiya aur wahi humne.", Rameshwar ji ki yaadon se bhari muskaan dekh sabhi ke chehre gadgad ho gaye. Unhe toh yakeen he na tha ke aise maryadit aur pratishtith vyakti ka jiwan aisa tha aur unse bhi badhkar unka wo bhai kaho ya dost, Raghuvir Singh tha.
"Phir toh jiwan ke path par aapko alag hona pada hoga Raghvir se? Bachpan ke aise dost toh naseeb se he milte hai Pandit ji.", Aacharya ji ko toh jaise abhi aur bhi jaan na tha us vyakti ke baare me.
"Nahi nahi Shastri ji, Raghuvir ne mere liye sabkuch chhod diya tha. Vivaah ek din, punjab se is taraf ek din aaye aur fir hamare bache tak avkaash samay ek dusre se alag nahi rahe. Bas kuch baras pehle usne khud he keh diya ke ab main toh chala is duniya se, tu akele dekh ye sab. Aaj main jivit hu, aise bhare poore pariwar aur 6 bacho ka pita aur dharam pita hu toh ye sab Raghuvir ki wajah se ho paya.", Rameshwar ji apni row me kehte kehte chup ho gaye.
"Udhar koyi dakait tha ji Mahendergarh se aage pahadi wali taraf, jab jija ji ki duty lagi thi waha. Ek bar aamna saamna ho gaya tha aur inke sath ka sipahi aur ye jakhmi ho gaye. Banna (Banwari), hamara chota bhai samachar leke pahucha Raghuvir jija ke pas ke aise aise ho gaya aur jiji us bakht peit se thi. Aisa shikaar kiya na uska Raghuvir jija ne bas ek na jinda chhoda 13 me se. Aur wo daaku Nihal Singh, jisne humla kiya tha usko toh jonga jeep ke aage bandh ke thaane he utha laaye. Jija toh fer bhi kisi ko goli na maarte the aur majboori bhi ho toh paanv me. Lekin wo toh agar tadpaane ki soch lete toh paanv pe cheera maar ke us aadmi ko bhaga dete aur fer peeche laga dete apne shikari kutte. Par nirdayi na the wo, bahot hansi majaak karne wale aur zindagi jeene wale vyakti the. Shankar unka ladla tha aur Arjun inka. Baaki bache apni apni kaaki ke.", Ye Hasmukh tha jo apni yaad-dasht se purane kisse nikal kar jaahir karne laga.
"Waah bhai.. Bade he anokhe vyakti thi. Matlab apne Pandit ji kanoon ke hiteshi aur wo kanoon jab kaam na kare toh fir sab apne hisaab se karne wale. Wo baithak me jinki tasvir lagi hai, wahi hai na Raghuvir Singh ji?", Malhotra ji ke shabdo me vyang, prashansa aur aadar bhara tha.
"Aur wo 1970 me jo kissa hum yaad dila rahe the ki inhone antim mukable me bhaag nahi liya tha uski wajah bhi Swargiya Raghuvir Singh ji he the. Pandit ji, aap shayad humko pehchane nahi. Bhai, hum bhi us party me the jahan Raghuvir Singh ne aapko nachaya tha apne sath. Aur aapne unke kehne bhar pe mukabla chhod kar unke sath party me aana manjoor kiya tha.", Aacharya ji ke aise yaad dilate he Rameshwar ji apni jagah se khade ho kar unke samne aa gaye. Aacharya ji bhi uth chuke the aur dono kas kar gale mile.
"Maaf karna Shastri ji, uske sath hota tha toh dhyaan kabhi kahi aur jata he nahi tha. Mujhe toh bas passport wali ghatna he yaad hai. Oh... matlab wo jaruri vyakti bhi aap he the us samay?", Rameshwar ji ki baat sunn kar Aacharya ji ne unka hath pakad ke bas sar jhuka diya.
"Hume aap hamesha he yaad the Pandit ji, hamesha. Wo Arjun humse jyada na mila lekin aapke dusre Arjun ne aaj hume is kaabil toh banaya ki aap hume yaad rakh sake. PJB 2 number impala humne aapko bhi chalate dekha aur Raghuvir ji ko bhi. America se sab chhod-chhad ke lauta tha toh maine wahi plot liya jaha aaj mera ghar hai, aapke ek aur param mitra SP Kulwant Singh Gill ki jagah. Samay dekhiye ki hum Sangwan ji se bhi milte the kyonki inke college me lecture dene jaate the, Chandrakant ji se bhi milte rahe hai jab ye state congress ke seceratory the lekin jo sabse puraane jaankar hai unse kuch samay pehle he dhang se mile hai.", Aacharya ji ke rehasyodghatan se jaha Chandu aur bade Sangwan ji muskura rahe the wahi ab Rameshwar ji jhemp rahe the.
"Aur ek hum hai Shastri ji, jo aapko saamne dekh ke soch rahe hai ki photo he karwa le aapke sath. Pata nahi aap sakshat saamne kaise baithe hai.", Malhotra ji ki baat par Col Sahab taali bajate hue hansne lage.
"Apne bhai sahab ko police ne ajaad kar diya lekin system ne inhe aaj bhi sewa me rakha hua hai Shastri ji. Galti inki nahi hai agar aap dhyaan de toh. Ghar me 2-2 bacho ka vivaah hai lekin aaj bhi lage hue the kuch case ki chhan-bin me. Apne jiwan me ekmatra vyakti dekha hai dosto jinohne sharaab, mansahar to dur ki baat lahsun tak ko hath nahi lagaya. Hukka bhi gudgudaya hai lekin pehle Raghuvir bhai saha ke sath aur agar ab kabhi mauka lagta hai toh apne samdhi ke sath, jo khud kisi aur ke sath ya akele nahi peete."
"Aur meri aulaad ye sabhi kaam dhadalle se karti hai. Aaj raat mujhe chhod ke toh aap sabhi log ja he rahe ho waha?", Rameshwar ji ke aisa kehte he sirf Aacharya ji ne he mana kiya lekin baaki sabhi aise dikhane lage jaise chori pakdi gayi ho.
"Atchi baat hai Pandit ji, bacho ke sath ye sab bhi bache bane. Waise main nahi maan sakta ki aapne kabhi bhi sharaab ke hath na lagaya ho. Haan niyam ke aap sachmuch sakht hai.", Aacharya ji ne tagda lapeta tha Rameshwar ji ko. Shaam gehrane lagi thi lekin inki charcha nirantar jaari thi.
"Atcha toh phir sabhi se shuru karte hai aur main aakhiri me jawaab dunga Shastri ji. Batao bhai Kirshan tumne pehli baar sharaab kab pee thi aur kya tum aaj bhi peete ho? Aur tumhare baad aise he agla vyakti batayega."
"Bhaiya, wo .. wo hum us bakhat 15 ke the aur Santu ne somras keh ke pila di thi. Kabhi kabhi khet me jyada mehnat ho jaati hai toh pavva laga lete hai. Aapko bataya bhi tha ke ghar pe nahi peete.", Krishneshwar ki toh jaise g#### he fatt gayi thi lekin darte darte wo bol gaya baaki sab muskura rahe the.
"Main toh jab Army me gaya tabhi pata chala tha ke sharaab bhi hoti hai. Aur wo quarter wala niyam aajtak hai ji apna.", Col sahab ne bhi spasht kar diya tha.
"Doctor ki padhaai ke dauraan kisi ne kaha tha ke ek ghoont laga lo aur wo ek ghoont toh aajtak khatam he nahi ho rahi. Kayi baar toh badhti umar ki wajah se opertion karne se pehle bhi 2 gilaas lagane padte hai. Maaf karna Pandit ji, jo hai so hai. Matlab 19 ki umar se aaj tak jaari hai karyakram."
"Apne Malhotra ji ka toh hume pata hai bhai. Ye toh sirf ravivar ko peete hai aur wo bhi 2 peg. Hahaha.", Col sahab ne he Malhotra ji ka jawaab de diya jis par wo khisiyani hansi hansne lage.
"Maine sharaab toh Pandit ji bahot jaldi shuru kar di thi jab dehat me tha aur pita ji khet me he bhatti laga lete the. Lekin aaj 20 baras lagbhag ho gaye hath tak nahi lagaya. Jis din pauta hoga, bottle khaali kar dunga.", ye the apne Kashyap sahab, Saroj bhabhi ke sasur aur thode antarmukhi.
"Haan bhi Hasmukh. Tu kyu chup hai?"
"Jija ji, main toh hukka bhi na peeta ab. Sharaab toh kabhi jami he nahi mere. ek gilaas me dher ho jata tha, wo toh Banna tha jo jee laga ke peeta tha.", Hasmukh ki sachmuch gaand fatt chuki thi jo mimiyata hua bolne laga.
"Haan toh Pandit ji, ab jawaab dijiye. Hum kehte hai ki aapne jiwan me iska swaad jarur chakha hoga. Raghuvir jaisa dost raha ho aur ek baar bhi chakh kar nahi dekha? Aapse pehle main bata deta hu chaliye. 50 ki umar tak maine kabhi bhi madira-sevan nahi kiya tha lekin jis din hamari ardhangini rukhsat hui, us raat humne tab tak pee jabtak murchit na ho gaye. Duniya hum dono ne sath me ghoomi lekin kabhi unke prem ke saamne kisi nashe ki jarurat he nahi padi. Phir jiwan agli subah he badal gaya aur agar barso baad fir dil kiya hai ki kabhi jaam uthaye toh wo aap sabhi ke sath jo yaha maujood hai.", Aacharya ji ne toh anjaane he sabko nyota de diya tha. Lekin unki wajah sunn kar jaise Pandit ji ko bhi kuch yaad aa gaya.
"Humne sirf ek baar is bala ko hath lagaya hai bhai aur uski wajah batana bahot mushkil hai. Lekin jis bhai ne barso mujhe kaha ke ek baar toh pee le, us din wo mujhe rokta raha aur maine tabtak pee jabtak sehan ho sakti thi. Humne us din hamari maa ki di hui ye tulsi-mala utaar kar rakh di thi. Aur ek baar fir aaj raat utar rahe hai, apne Shastri ji ke liye. Aap sabhi ke liye aur hamare paute ke liye.", Rameshwar ji ne ye baat dukh ki jagah muskurate hue kahi thi. Jis par Col sahab toh aise taaliyan bajane lage jaise kisi ko paramveer chakra mila ho. Matlab saaf tha ki aaj wo hone wala tha jiski kalpana na Sanjiv ne ki thi aur na he Shankar ne. Raat hone chali thi aur ye mandali ab bas ghar jaane lagi thi tayar hone ke liye.
"Satish bhai, hume lene aa jana Pandit ji ke sath. Aaj hum bhi dusri baar ki pratiksha me hain. Kisse abhi aur honge aur aap sabhi log tayaar he rehna ji, jo soya wo mor aur jo bhaga wo chor.", Aacharya ji ne ek baar fir mahol manoranjak kar diya tha is jumle se.
