Jaari
"Idhar toh alag he mahol hai. Lagta hai jaise yaha koyi aaya hoga kuch samay pehle.", Arjun haweli ke pichle hisse me jab pahucha toh ek taraf kacha chulha bana hua tha jiski raakh ekdum thandi lekin poori tarah apni jagah. Kuch hisse me saaf safaai thi aur insaani kadmo ke sath sath kisi bade kutte ke bhi pad chinh kahi kahi dhundle se the jiska matlab jo bhi aaya tha wo kuch din pehle he aaya hoga. Haweli ki diwar ke peeche he jungle aur nadi thi jaha se nami wo saanson se he mehsoos kar pa raha tha. Ek badi khidki se lohe ki 2 salakhe gayab thi aur uske akaar ko dekh Arjun samajh gaya tha ki yahi ek rasta hai andar jaane ka. 4 feet chaudi aur utni he lambi khidki me bas ek salaakh aur thi jisko hatane ke liye Arjun ne jor lagaya toh wo tass se mass na hui.
'Bhaad me jaaye, itna rasta he bahot hai. Lekin aisa aadmi kaun hoga jisne sala ye salaakh ukhaad di? Paanv ka panja toh mujhse bhi bada hai toh hoga koyi..', Velcha us salaakh me adate hue uski sahare Arjun upar chadne ke baad diwar ke bahar dekhne ki koshish karne laga. Hariyali he thi bas har taraf. Lekin haweli ke bhitar bas halki si roshni aur jaise waha ki hawa bhi aaj tak barso purani ho kar ajeeb si. Bhitar chalaang lagate he dhapp ki awaaj kayi hisso me alag alag sunaai padi.
'Arre kahi sachmuch he pret na ho? Hahaha.. hoga toh khush he hoga ke chalo koyi toh baat karne aaya. Hello.. hello .. Pret ji.. Hahaha..bada sahi mahol hai idhar toh.. Ek awaaj lagao toh upar niche daaye baaye sabhi jagah sunaai padti hai.. Oh.. ye kya gaya paanv ke upar se.?', Arjun ko khud nahi pata tha ke wo haweli ke kiss hisse me pahuch chuka hai aur idhar andhera badh chuka tha. Battery ki roshni ek taraf daalne par wo dang reh gaya us najare ko dekh. Wo chooha kahi se bhi mamooli na tha aur uske mooh me jo cheej thi wo bhi. Arjun ne abhi yaha pravesh karte he jiwan ka sabse ajeeb drishya dekh liya tha jaha ek bada junglee chuha kisi saanp ya uske bache ko mooh me dabaye ek pal ruka aur fir ghane andhere me vileen ho gaya.
'Ab haweli itne barso tak band rahegi toh kuch toh ajeeb hoga he. Bas bhagwaan tu chahe pret dikha de lekin ye sab nahi. Ab awaaj bhi nahi goonj rahi. Ho kya raha hai idhar.? Ye seedhiya upar jaa rahi hai aur ye idhar kitne saare kamre hai?", Arjun thoda abhyast ho chuka tha is gehre andhkaar ka. Uski saansein bhi saaf sunn pa raha tha wo idhar udhar talashi leta. Diwaro par badi badi tasvire dhool se sann chuki thi jin tak hath pahuchna he namumkin tha lekin hairaani wali baat thi ki kisi bhi kamre ke bahar tala nahi tha. Saavdhani se wo jis bhi kamre ko kholta wo sirf andhere se bhara milta jaise waha koyi kabhi raha he na ho. Sar khanjar se khujata hua wo paseene me bhiga hua 5 kamre dekh chuka tha lekin siwaye dhool ya ek kamre me rakhi charpaayi ke baaki sabhi kore saaf the. Is manjil par bas ek he kamra bacha tha jidhar badhte hue wo apne kadmo ki aahat me aaye badlaav se thoda shankit hua. Lekin fir aakhiri kamre ko kholne par dekha waha rakha hua ek bada bister aur khidki ke samne parda. Idhar bhi haal waisa he tha lekin ye kamra saaf suthra aur dhool naam matra bhi nahi. Golakaar chote mej par tambe ka jug tha, khali aur parda hatane par wahi hariyali jo hall wali khidki se Arjun ne dekhi thi par wo ye dekh pa raha tha ke haweli ke pichle darwaje ke us or purana ghaat jaisa kuch tha aur nadi ki bas jhalak jo ghani jhaadiyon ke beech se he dikh rahi thi.
'Juglal ji aapki biwi nahi rehti thi kya yaha? 6 kamre, itna bada hall aur 2-2 rasoighar lekin kahi kuch nahi. Aapke bete ne lagta hai saaf karwa diya hoga aapke jaane ke baad.', Arjun kamre se nikalne he laga tha ki fir se diwar par roshni daalne par waha kuch ajeeb sa laga. Wo aankhon ke saamne aaya paseena saaf karta hua us jagah ke saamne aaya toh ye diwar ke rang ka he lakdi ka palla tha jaise choti almaari. Khanjar fansa kar usko kholte he wo hairat me padd gaya. Saamne kapde ki choti si gudiya, 2 choodiyan, ek ajeeb sa kapda jisko kholne par wo shayad koyi nikkar jaisa kuch tha lekin baniyan jaise kapde ka. Arjun ne kapde ki gudiya jeb me rakh li. Ab idhar aur kuch nahi tha lekin wo jaan gaya tha ke aise chor khajane diwaro me chhipe mil sakte hai. Ek ghanta toh usko idhar he lag gaya tha aur abhi toh upar bhi ek manzil thi lekin jo milna tha wo saamne nahi milne wala tha. Haweli khali ki ja chuki thi ya ye aisi eh thi bas samaan hata diya hoga.
'Sar dukhne laga is durgandh se toh. Ajeeb si hai mitti he jali hui ho aur thandi bhi..', Arjun jaise jaise un chaudi seedhiyon par chadhta hua upar ja raha tha ghutan badhne lagi thi. Idhar toh niche hall jitni bhi roshni nahi thi. Thik utne he kamre yaha the lekin yaha hall me diwaro par junglee janwaro ke sar latke the aur 2 purani bandook bhi. Arjun bandook ke kareeb gaya toh is diwar me bhi halka sa jala laga tha jaise nichle kamre me mili gupt daraaj ke pas tha. Wo sahi soch raha tha kyonki ek aale ko yaha bhi gupt rakha gaya tha.
'Arre Juglal ji aap aadmi the ya rehasya aur ye khajana hai koyi? Ye toh kisi ladki ki bra jaisa kuch hai par hukk nahi hai ispe. Ye shishi ajeeb hai aur ye kya hai? Drawing.. nangi ladki, ladki kehna toh galat he hoga isko ye toh.. behanchod.. ye kis harami ke kaam hai.. ? Koyi aur bhi rehta hoga Juglal ji ke sath aur jo bhi tha sanki insaan he hoga.', Arjun wo sabkuch wahi chhod kar bas us kapde ko jeb me daalne ke baad aakhir wale kamre me ghusa jo niche bister wale kamre ke upar tha. Idhar bura haal tha jaise koyi chota mota janwar hafte pehel mara ho. Baaki wo khali he tha jis se Arjun darwaja band karta hua turant bahar nikla. Baaki sabka bhi haal ummeed mutabik he nikla, kahi kuch nahi siway ek kamre me diwar par tange dhoti kurte ke. Wo sewadar ke he rahe honge jaisi unki haalat thi aur charpaai pe wahi sota hoga. Andhere me itni der se bhatakte hue ab toh uske paanv bhi thakne lage the. Lekin jism me ekdum se bijli bhar uthi jab usko kuch yaad aaya.
'Basement hogi waha.. Dekhta hu jarur koyi chor rasta hoga udhar jaane ka. Ye kamre bhi itni unchaai par bane hai toh wo awaaj veham nahi thi.", Arjun furti se neeche dauda jaise rasta yaad ho chuka ho. Ek baar girne se bacha lekin hanfta hua wo is kone me tha jaha ghupp andhere me chalte hue usne thak-thak mehsoos ki thi. Har taraf jameen par roshni maarta hua wo mukhya dwar tak aaya lekin farsh samtal. Rasoighar is kone se nikalte he ulte hath ki taraf tha jidhar Arjun jaise jana bhool gaya tha kamra na hone ki wajah se. Aur yahi wo mota kaleen jaise us raste ka pehredar bana hua tha.
'Badi mehnat karwa rahe ho Juglal ji. Dekhne se toh lagta hai ki yaha kuch bhi nahi par diware bahot kuch suna rahi hai. Hmmm.. Itne bade aadmi aur basement me jaane ki jagah par ye lakdi ka tukda lagwaya hua? Nahi yaha ye nishaan toh jaise seedhiyan idhar bhi jaati thi. Fir band kyun ki?', Arjun ne upar jaane wali seedkhiyon ko dekha aur fir un nishano ko jaha lakdi jameen me dhansi thi, farsh ke samaan ster pe. 6 feet se jyada lamba cut tha ye niche jaane wale raste ka. Seedhi par utarte he halki ghabrahat si hone lagi thi Arjun ko aur niche andhera bhi itna tha ki battery ki light bas kuch duri par he khatam.
'Maa, kuch sahi nahi lag raha. Maaf kar dena agar kuch galat ho jaaye.', Apni maa ko jaise usne yahi se sandesh diya ki kuch bada hone ja raha ho jaise. Savdhani se wo jaise jaise niche jata gaya waise waise us andhere me vileeen ho gaya. Yaha naam-matra bhi dhool nahi thi aur ek chauda hall thik upar jaisa jiske dono taraf kuch lakdi ki almariyan thi. Arjun bas seedha chalta raha jaise koyi usko us aur kheench raha ho. Yaha bas 2 he kamre the aur ek par mota tala. Arjun ne is ghangor andhere me jaise he wo darwaja dhakele, barso se jama thandi hawa ne uska paseena ek pal me sukah diya. Kuch boonde jameen par tapki toh inki awaaj spasht sunaai di. Aaj wo pehli baar jiwan me is tarah ghabraya tha jaise ye uska aakhiri samay ho aur uska jism yahi kho jaane wala tha. Andar ek bister tha jiski chaadar jagah jagah se ast vyast thi jaise koyi chahta tha ke wo khojne wale ko waisi haalat me he mile. Arjun mushkil se dekh pa raha tha lekin kareeb aane par waha kapde ke kuch tukde the jaise unhe fada gaya ho. Ab gala sachmuch sookh raha tha is jagah ki khamoshi aur haalat dekh.
'Hey bhagwaan..", Arjun ne mooh par he hath rakh liya jab bister ke dusri taraf tooti hui choodiyan, bister par bikhre un katrao ka samoocha vastra aur safed kapde par wo gehra daag dekha jo samay ke sath is waqt kala dikh raha tha. Yakinan yaha bahot bura hua tha jo is haweli ke naam ko aaj sach karta tha, Kaali haweli. Parde ko khanjar se hataya kyonki jisne poori haweli saaf kar di usne ye jagah aisi kyun chhodi? Jarur wo insaan chahta tha ki ye is haalat me he milne chahiye. Parde ke dusri aur anginat vastra the jo kam umar ladkiyon ke he the jyadatar. Arjun ki aankhon se aansu apne aap he behne lage the aur wo kapda khud ba khud usne utha liya jo kahi se bhi kisi kishori ka nahi tha. Jo bhi insaan yaha havaaniyat karta hoga wo insaan toh ho he nahi sakta. Nasamajh tak ko nahi baksha tha us vyakti ne. Arjun ko ghutan hone lagi thi jaise koyi uska gala daba raha ho. Lekin is dard ke sath jaise kuch rishta tha jo usko yaha roke hue tha. Almari ke upari bhaag par purane kaagaj se the jaise us waqt ke rupaye, wo kisi kaam ke nahi the. Lekin hath lagne se koyi dhatu ka sikka jarur niche gira. Arjun ne usko dekhe bagair utha kar jeb me daal liya. Kapde se bane fande aur waisi he vastue thi waha bas. Arjun kamre se bahar aate he roshni band karke diwar sahare baith gaya. Itna bhayank ghatnasthal is dharti par kya uske he naseeb me dekhna likha tha?
'Nahi.. Wo kuch aur bhi dikhana chahta hai mujhe.. Dard ke sath he dawa hoti hai.. Is kamre me kuch hai..',Arjun aansu ponchne ke baad fir se harkat me aaya aur is baar taale ko hath se khinchte he wo khul gaya jaise bas fasa kar chhod diya gaya. Is kamre ke bahar tala aur bhitar kuch bhi nahi.. Aisa nahi ho sakta tha.. Jo bhi tha wo itni asaani se ye saboot nahi saunpne wala tha matlab kabili insaan he ye kar sakta hai.
'Dada ji, aapne kaha tha ki ab main andhere se nahi darunga. Aap hamesha mere sath rahoge.. Dekho main darr nahi raha.. Lekin yaha roshni bhi nahi hai aur aage badhne ka rasta bhi nahi.. Koyi mara gaya hai idhar.. nahi bahot se masoom .. anginat masoom cheeeeekh rahe hai mere kaan me bau ji...", Is bar Arjun poori jaan laga kar cheekh utha tha jaise wo buri tarah jakhmi hua ho. Ghutno par girta wo pagalo ki tarah har taraf hath maarta raha jaise uska kuch kho gaya ho. Koyi uski aisi haalat dekh leta toh yakinan khud bhi darr jata. Badhawaas sa wo andhere me poore farsh par he reng raha tha aur jab himmat khatam hone lagi toh jameen par chehra tikaye sisakne laga. Upar wali jeb se sikka jameen par girta hua is khomish me kisi anya dhatu se takraya toh Arjun ko vishwaas he na hua. Ye ishara tha jaise ki wo yaha akela nahi hai. Battery jaane kaha giri thi lekin andher me farsh tatotle hue Arjun darwaje ke kareeb pahucha toh wo salamat mili. Turant usko chalu karta hua wo kamre ke is kone me aaya jaha se alag si awaaj sunaai padi thi. Wo chamakdar sikka jaha tha wahi diwar me ye ek feet ka dhaatu se bana darwaja tha. Kanpte hatho se Arjun ne usko tatola toh koyi kinara he nahi mila.
'Chaaku.. Chaaku kaha reh gaya? Bahar baithte samay hath me tha.. ', Budbudata hua wo bahar nikla toh khanjar thik usi jagah tha jaha wo idhar aane se pehle baith kar roya tha. Ab wo jaise bijli se chal raha tha oxygen ki jagah. Diwar aur us dhatu ke beech khanjar fasate he usne poori jaan laga di aur 2 awaaj lagatar hui. Khanjar toot chuka tha aur us tijori ka darwaja bhi. Andar bas kuch kaagaj the jinhe Arjun ne palak jhapakte he utha liya. Baaki tijori ko tatola toh kuch tabeej sa hath laga aur kuch nahi. Kaagaj band karke jeb me rakhta hua wo ek pal aur is jagah nahi ruka jaise usko sabkuch mil gaya ho. Bahar wali almariyon par bhi nigaah na ki kyonki wo sab toh waise bhi khuli thi, kapdo se bhari. Jeb me kaagaj aur wo tabeej rakh kar unhe hath se dabaye wo seedhiyon se girta bhidta bahot jagah chot kha chuka tha lekin aakhirkar wo halki roshni me bahar nikal he aaya tha us bhayanak manjar se. Us andhere ko peeche chhod aaya tha jaha ek pal toh uski saans he atak gayi thi. Lekin chain se saans le pata us se pehle he peeth ke peeche ye jordaar prahaar hua.. Arjun jhuka hua he farsh par gir chuka tha aur uske peeche khade the 5 pret.
.
.
"Ye toh ek vaar me he ludhak gaya Ganje. Lekin ye bhaag kyun raha tha? Neeche kuch hai kya?", Arjun ko farsh pe gira dekh inme sabse majboot vyakti ne pehle Arjun ko hilaya aur fir tehkhaane me roshni maari.
"Bhai udhar jaise koyi almaari hai. Khajana hoga jarur. Maine suna hai ki band haweliyon me aksar khajane bhi dabe hote hai. Isko tum teeno dekho, main aur Bhiru bhai jara idhar talashi le aaye. Saala baaki haweli toh aise khaali padi hai jaise sachmuch kabhi pret he raha ho jiski koyi jarurat he nahi hoti.", Arjun ko wo log murchit samajhne ki galti kar chuke the jo khamoshi se bas khud ko sanyamit kar raha tha. Dono vyakti tej battery aur rod liye jaise he seedhiyon se niche utre, peeche reh gaye teen me se ek ne Arjun ke jism par rod lagate hue uski jaanch li.
"Behosh hai ye Dinu. Saale ki kameej utaar, maalik ko de denge nishani.", Dinu ne bhi haan kehte hue jameen par jhuk kar Arjun ko palatne ki koshish ki toh jaise uski taqat he khatam ho gayi.
"Behanchod aadmi hai ya pahaad hai ye? Sala marr toh nahi gaya ek vaar me he?"
"Itni jaldi kaise marr sakta hu main? Sariye se kutte billi marte honge, Rudra bandook se bhi nahi marne wala. Galti kar baithe na yaha aa kar?", Arjun jis tarah se aankhen khole usko dekhte hue muskura raha tha wo aadmi darr ke maare piche he ludhak gaya.
"Pret.. Isme koyi upari aatma hai be Shantu.. Un dono ko bula re ....aahhh.", Baaki dono apne dost ko he dekh rahe the sehme hue aur jabtak wo harkat karte unka Dinu tehkhaane me ja gira. Niche bahot kuch girne aur tootne ke sath kayi cheekhe nikli lekin unhe yaha kaun sunta inke alawa. Sar pe hath rakh kar baal sanwarta hua Arjun itne dhime un dono ki taraf badh raha tha jaise sachmuch baagh ne shikar ka rasta band kar diya ho. Ek ke hath me sariya aur dusre ke khanjar tha lekin chehre par darr.. Saamne wale ke chehre par agar ek taraf lahu tha toh hontho par haivaniyat.
"Ae peeche raho.. Main maar dunga.. Aage matt aana ek kadam bhi.."
"Maar dega? Darpok apni haalat dekh.. tu toh khud marne wala hai..", Arjun ko kareeb aaya dekh sariye wale ne poori jaan laga kar vaar kiya tha jo Arjun se takraya bhi lekin aise jaise sariya khud uski hathli me jana chahta ho.
"Peeth pe hamla karte ho kaayaro.. Ye lo fir uski saja.. ", Aur khandhar me itni vidhwansak cheekh shayad he pehle sunaai di ho. Sariya majboot jaangh ke aar-par tha aur wo vyakti jameen par lot-pot hota tadapne laga. Chaku wale ne apna kaam kiya jaan bachane ke liye aur wo safal bhi ho jata agar vaar sahi hoga. Baah par chira he de saka tha aur ab uski gardan thi Arjun ke hatho me. Neeche tehkhane me bhi halchal hui jaise koyi uth kar aane laga ho upar lekin Arjun toh is aadmi ko jameen se 3 feet upar utha chuka tha. Aankhen ubal kar bahar aane wali thi aur wo awaaj nikalne me bhi bebas.
"Chhod de usko behanchod.. Teri maa..", Peeche se Ganja Arjun ki aur lapka tha lekin 5 kadam dur khade is haivaan aur apne aadmi ki haalat dekh dono hatho se samaan chhot kar jameen par ja gira. Battery aur wo mota sariya jis se usne Arjun par vaar kiya tha. Uske sathi ko Arjun ne kisi kapde ki tarah diwar me de mara tha jo cheekhne se pehle he murchhit ho gaya sar fatne ke sath. Ab ek baar fir yaha khamoshi thi jisme apni baah par behte khoon ko choosta hua Arjun is shaksh ko aise dekh raha tha jaise wo aisa he uske sath karne wala hai.
"Ae.. galti ho gayi bhai.. Wo Santosh .. Nalagarh wala Santosh hai na usne .. paise diye the.. dekh bahi mere baal bache hai.. unki khati jaane de.. naam bhi bata diya maine aur paise chahiye toh wo bhi lele.. Nehar paar hamara sath ..aaahhhhhhh bachhaaoooooo.", Jangh aur peit ke beech jordar prahaar se Ganja us majboot stambh se ja takraya.. Haddiyan tootne ki awaaj ne us rote hue aadmi ko bhi khamosh karwa diya jiski jaangh me 3 feet ka sariya ghusa hua tha.
"Sabka pariwar hota hai.. sabhi pariwar se pyaar karte hai lekin .. jab galat kaam karte hai toh fir unki duhaai de kar bachne ki bheekh kyun maangte ho..Kyunn..?", Cheekhte chillate hue Rudra ne saamne gire Ganje ko ek baar fir se utha kar tehkhaane se nikalte dono aadmiyon par de mara aur fir se wo teeno wahi pahuch gaye the jaha se nikal kar aaye the. Is baar waisa mumkin na tha jaise wo cheekhe.. Arjun us tadapte sariye se bindhe aadmi ke kareeb he pahucha tha ki peeche se ek bhari hath uske kandhe par aa tika. Kaun tha jiske kadmo tak ki aahat Arjun ke tej kaan na sunn sake. Jo bhi tha usne galat insaan ke kandhe par galat samay hath rakh diya. Wo aadmi kuch bolta us se pehle he Arjun ne ghoom kar poori taaqat se us par prahaar kiya.. Lekin wo toh us se beasar Arjun ke mukke ko he mutthi me daboche khada tha. Chehre pe shaant muskurahat, Arjun ki rudra hansi se viprit.
"Chalo ab yaha se chalte hai beta. Tum safal rahe aur hume khushi hai ki jis dard se insaan bimaar ho kar ghutne lagta hai ya pagal ho sakta hai, tumne usko saadh kar apna kawach bana liya. Dekho aasman saaf ho gaya hai, jaise koyi parat khul gayi ho. Aksar kayi taalo ki chabi nahi hoti, dil ka mantra unhe khol leta hai. Jo bahar se band prateet hota hai aksar usko kholne ke liye bhitar se pryaas karna padta hai. Ye raah tumhe sahi jagah pahucha degi Arjun. Ab idhar wapis matt aana.", Arjun toh kisi chhote bache ki tarah apne se kahi jyada vishaal in swami ji ki ungli pakde chal raha tha. Haweli ka darwaja unhone hath lagate he khol diya tha jo bahar se band tha aur fir se band kar diya gaya. Syaah kaale rang aur peeli aankhon wala ye kutta bhi ajeeb tha jo unhe dekhte he satarkta se khada ho kar barabar chalne laga.
"Wo log jo andar the baba?"
"Unhe uchit saja toh de he chuka hai tumhara dard. Jaan lene se musibat ka hal hota toh aaj tumhe dard kyun hua tha andhere me? Bade fainsle karne padte hai parantu unke sath jeena tum jaise masoom ke liye mumkin nahi. Jinho ne liye the wo bhi chale gaye aur jisne apraadh kiya wo bhi. Tumhe jitna uchit lage bas utna he gyaan dena us insaan ko. Vastra badal lena beta, ye dushit ho chuke hai.", Arjun nayi urja se bhara muskura raha tha unka hath pakde chalta hua. Jaha wo katili baad lagi thi, usko bhi asaani se khol kar unnhone Arjun ko uski jeep tak surakshit pahucha diya.
"Ab aap kaha jaayenge baba? Aur fir mulakaat toh hogi na?"
"Is baar toh tumne hume pratiksha karwayi hai deri se aa kar. Lekin sahi samay par hum swayam milne aayenge. Ye toh kisi anya ki pareshani hai, tumhara waqt aayega toh aana he padega. Prabhu tumhe aur tumhare pret ko salamat rakhe. Bahar duniya me toh pret rehte he nahi, insaan ke bhitar unka astitva hai. Saadh liya toh shakti, haar gaye toh mukti. Shiv ji, kripya barkaraar rakhe.", Arjun ko bhej kar wo wapis us taraf chal diye jaha se aaye the lekin is baar haweli ki jagah wo nadi ki aur gaye the apne us vichitra se shwaan ke sath. Arjun unhe tabtak dekhta raha jabtak wo aujhal na ho gaye. Ghadi me 4 baj chuke the aur sachmuch uski haalat buri thi. Kapdo ki toh kahi jyada he buri. Lekin ab lahu behna band ho chuka tha aur jaha khanjar se ghaav hua tha waha safed kapda jaane un baba ne kab lapet diya. Jeep ki daraaj me batua dekhne ke baad Arjun usko liye wapis mudd chala. Mehal ki chhatt se usko jata dekhti un aankhon me aansu aur chehre par muskurahat laut chuki thi.
Agle dedh ghante baad pehle jaise lekin jaye kapdo me Arjun aankhon par wahi gehra chasma lagaye apni raftaar se gaanv wale raste nikal chuka tha, Anamika chachi ka samaan lene ke sath. Uska Pret uski shakti tha jiski maarak shamta Santosh tak ja pahuchi thi. Wo bhi mehal se nikal chuka tha apne astitva ko banaye rakhne ke liye. Pret se pala jo padd chuka tha aur uski kshamta ummeed se kahi jyada he thi.
ab bacche class me question Nahi karenge to teacher kahenge students dhyan Nahi dete studies mein. Baaki Jawan dena na dena to teacher par
awesome update hai 
