"Ab ye kaunsa tohfa hai mukhiya ji?"
"Dekh lijiye pradhaan ji, ye aapka he hai aur waha kadam rakhe toh lagna chahiye na pradhaan ji apne paute ke sath aaye hai.", Usme Motilal ji ki pagdi thi aur unki he mala. Pandit ji toh bas usko niharte he reh gaye.
"Pehan lijiye bau ji, unhone he kaha tha ke ye aapke mastak par behtar lagti hai jaise bachpan me aap unke utarne ke baad pehan kar khud ko dekhte the. Wo aankhen moond kar anjaan hone ka dikhawa jarur karte the par unhe atcha lagta tha aapka waisa karna.", Ab hairaani se Pandit ji Arjun ko dekh rahe the ki ye ladka kaise jaanta hai unke bachpan ki baatein jo kisi ko bhi nahi pata.
"Tumhe ye kaise pata barkhurdar? Aur iska kya pramaan hai ki unhone aisa kaha tha ki ye main pehan sakta hu?"
"Pehan ke pehle feeling toh le lijiye bauji, pramaan bhi dunga par jara akhada aur kabaddi khatam hone dijiye. Likhit pramaan dunga aur isko pukhta kar deta hu sirf is naam se jinhone kaha tha aisa karne ke liye. Lakshmi Narayan tumhara bhala kare, Pandit Motilal Anuradha Sharma. 25/05/1960'. Ab sandeh matt kijiye meri baat par, aajkal meri unse gehri dosti ho gayi hai.", Arjun ne hanste hue jis tarah unke pita ka wo poora naam liya tha Pandit ji ne us mala aur pagdi ko choom kar mathe se laga liya. Bhavuk toh the par filhaal us se kahi jyada khush. Mala toh unhone pehan li par pagdi ko goad me aise liye baithe rahe jaise ye unki sabse anmol dharohar ho.
"Arre baap re baap. Bhai sahab hum mele me aaye hai ya chunavi rally me? Itne vaahano ka jamghat aur ye toh dur dur tak dikh rahe hai. Anumaan se kitne log honge idhar?", Col sahab ne jaise he parle gaanv ki sadak par kuch aage aane ke baad us vishaal maidaan ko dekha toh hairat se pooche bina na reh sake. Sachmuch drishya he aisa tha us vishaal maidaan ka jaha gine chune ghane vriksh the ek dusre se kaafi dur. Bade bade shamiyane, unse aage unche jhoole aur janta ka hujoom jo poori tarah vyavasthit tha sabhi gaanvo ke neeji suraksha aur pehredari se. Koyi vaahan maryadit rekha se bahar nahi khada tha chahe wo tractor trolly ho ya 3 khaane wali jeep. Arjun bhi bade gor se dekh raha tha aise mahol ko jaha speaker par ghoshnaye ho rahi thi.
"Jyada nahi toh 12-13 hajaar log toh honge Satish. 16 gaanv se khiladiyon ke sath waha ke panch, sarpanch aur pramukh log aate hai apne apne pariwaro ke sath. Lekin itni bheed toh humne bhi nahi sochi thi. Jyada he lagte hai anumaan se bhi. Arjun beta ye kaali jeep ke barabar laga do apni gaadi. SI Satwant Singh apna he bacha hai aur aaj toh ye bhi lagta hai chutti le kar aaya hai.", Arjun ne is khaas jagah par jeep rokne ke sath dada ji ki taraf kadam badhaye aur wo pagdi lete hue unke sar par sahi se pehnayi jaise Pandit ji yahi chahte the. Ab unka vyaktitva he poori tarah se badal chuka tha kurte-pajame ke upar pagdi pehan lene se. Jaggi bhi un sardarji ke he sath tha jinse parichaya hone par wo pehchaan gaya tha ke yahi wo policewale the jinhone uski report darj nahi ki thi Narinder chacah wale shehar me. Jaggi bhi bade josh se uske sath mila aur ye log aage badhe toh chaupal se sabhi gram-pramukh bhi Pandit ji se satkar ke sath mile.
"Oh vi jhutteya singh, louncement karwa de dargaah teh chote pandat ji baabe da naa likhan vaale hai.", Ab Vilayat Khan ji ne makhol me jisko Jhutha Singh bola tha ye is gaanv ka sarpanch tha aur iske bete ki buri gat banai thi Arjun ne jab wo log Aarti, Priyanka aur Gurdeep ke sath galat karne ki yojna bana rahe the unke shehar me. Wo khisiyata hua sarpanch pehle Pandit ji ka aashirwad lene laga aur fir Arjun se mila, jo filhaal pehalwan ki jagah koyi videshi jyada dikh raha tha.
"Jo hukum Khan sahab par ehda bacheya saamne toh makhol na udaya karo apne putt da.", Jitni bhi akad thi Sarpanch Suchha Singh me lekin inke saamne hath he jude rehte the uske bhi. Kewal Singh bhi idhar chale aaye the apne sath kuch aaspas ke panch sarpancho ko liye. Sabse mel mulakaat karte hue ye log us hare rang ki ruhaani imarat ki taraf badhne lage toh Arjun ne apne dada ji ko rok liya.
"Main ye kaam jeetne ke baad karna chahta hu dada ji. Aap keh dijiye in bade bujurgo se ki dargaah par tabhi kadam rakhunga jab khud ko saabit kar dunga.", Pandit ji ne uski baat par sehmati jatate hue yahi sandesh bhijwaya aur fir mike par thik yahi shabd dohraye gaye ki 'Unche Pind toh Pandat Arjun Sharma ne fainsla kitta hai ki oh vijeta bane baad he dargaah XXXXX teh ardaas karan wale hai. Lo vi chhote te bujurgo, chunoti pesh karan wale unche pind toh pehalwan Arjun Sharma mele di is pavitra mitti teh aun waale ne. Main gujarish karda ha maan niya Pandit Rameshwar ji toh ki oh manch teh apna sthaan grean karde hoye aapji di nigaah vich mela pratiyogita shuru karwaye.", ye sardaar ji toh jaise bane he bolne ke liye the aur unki awaaj 5-6 dur dur tak pipe se bandhe unche loudspeaker se har disha me sunaai di gayi. Safed-gulabi 20 feet unche shamiyane ne akhada, kabaddi ka maidaan aur takriban 19-20 ekad tak jagah chhaya ki hui thi. Dargaah ke bahar lambi kataar thi jaha log andar aane se pehle shish jhuka rahe the. Aur uski bagal me ye khaas manch bana tha jiski unchaai 6-7 feet thi. Takriban 40 logo ke liye waha araamdayak kursiyan lagi thi aur unke saamne utni he lambaai me 15-16 mej aapas me judi hui. Arjun toh Jagtaar ke sath ek taraf chal diya kapde badalne aur Rameshwar ji ko mele ke aayojako ne siropa, phulo ka guldasta aur mala pehna kar swagat kiya. Is waqt unke sath Kaushalya ji aur Purnima ji bhi thi Col sahab unhe laaye the idhar. Pyaarelal ji ki mandali is manch se alag udhar baithi thi thik saamne jaha takriban 50 kursiyan badhte kram me lagwai hui thi. Unke sath sabhi gaanvo ke panch sarpanch bhi the aur akhade ki mitti ki jaanch karne ke baad swayam Kewal Sarpanch Arjun ki taraf chale gaye.
"Saareya nu suchit kitta janda hai ke saadhe sammukh Maharani ji bhi aaj is mele vich padhare sann.. Eh pehli vaari ho reha hai ke saahde anndata ne itthe shirkat kitti hai aur sahda sabda maan vadhaya.", Yahi ekmatra gaadi thi jo thik manch se pehle ruki thi aur 2 surakshakrmiyon ne dono taraf ke darwaje khol kar Rani maa aur Kumari Amrita ko bahar aane me madad ki. Kya jawaan aur kya adhed, sabhi khush aur awaak the in hastiyon ka yaha dekh. Amrita ki khoobsurti aur saadgi ki charcha chupi dabi awaaj me bahut se yuvak karte lage jinki taraf dekhe bina wo shalinta se us laal kaleen par chalti hui apni maa aur bhai ke sath manch par chali aayi. Yaha wahi parasparik mel milaap hone ke baad Amrita ne Ritu ke bagal me baithna pasand kiya. Dangal wale akhaade ki taraf bhid badhne lagi thi aur logo ko ghere se bhi 20 feet dur vyavasthit tarike se baitha diya gaya tha. Unke peeche jarur bahut se log khade the. Kabaddi ka khel 10 baje shuru hone wala tha aur jaisi ummeed thi is bade gaanv ke 8 pehalwan ek kataar me apne coach aur sarpanch Sucha Singh ke sath yaha chale aaye. Har yuvak 25 se 30 baras tak ka uncha chuada aur bharpoor tagda.
"Lo vi apne unche pind di team akhaade vich pahuch chuki hai. Main Pandat Rameshwar ji toh darkhast karda ha ke oh Maharni ji de naal feeta kaat ke is pratiyogita di shuruaat karwaye. ek vaari jordaar taadiyaan maar deyo mitra pyaareon.", Sachmuch jordaar he taaliyan baji thi jaha akhad ke manch ke saamne wale hisse par 2 pole ke beech laal feeta bandha gaya tha. Pandit ji ne ye karya Rani Saundarya ji ko he karne diya aur khud mike le kar usko thapakne lage.
"Sabse pehle toh bas yahi kahunga ki main yaha pehli baar aa raha hu, apna vivaah hone ke baad. Haan beech me ek baar aur aaya tha. Tab mujhe apne he bacho se shikayat thi ki unhone ye chunoti kyun di. Aap logo se baatchit karne ki jagah maine apne pita ka he naam yaha se hata diya. 28 baras baad aaj main yaha par lauta hu toh sirf apne paute ki wajah se aur is pratha ko khatam karne ke vichaar se. Aap logo ne 27 baras tak intjaar kiya kyonki aap log sahi the. Khel ko khel ki tarah he lena chahiye, saaf bhaavna se. Mere bache thode jajbaati the aur wo ye aap logo ke khilaaf ladne ke liye nahi kar rahe the. Wajah jo bhi thi bas unhe pata thi. Aaj yaha se chahe mera pauta jeete ya us se behtar khiladi, wo vijeta rahega is chunoti dangal ka aur uske baad yaha sirf aur sirf paramparik khushti hua karegi. 27 baras ka harjana toh nahi chuka sakte lekin jisne chunoti di hai uska bhi sath nahi de rahe, chahe wo hamara khoon hai. Aur itne baras baad aaya hu toh main ek choti si darkhaast hamari Rani ji se aap logo ke saamne karta hu ki Sarpanch Sucha Singh ke gaanv ko ek stadium bhent kiya jaaye, bache honhaar aur mehnati hai lekin ye haqdaar hai badhiya prashikshan aur khel sansadhano ke. Swargiya Pandit Motilal ji ki taraf se baaki ghoshna unke waaris karenge, khel samapti par.", Yaha toh Pandit ji ne aisa tohfa de diya tha ki jo log bhare baithe the dangal me Arjun ko pachadne ke liye wo ab uske dada ke mureed ban chuke the. Sabhi pehalwano ne hath jodne ke baad unse aashirwad liya aur Rani maa ne bhi mike hath me lete hue is baat ki pushti ki.
"Maalik yahi hai is maidaan aur mele ke. Jab Pandit ji jameen dene ko tayaar hai toh thoda sa dil hamare paas stadium banane ka. Somwar ke din hum dargaah XXXXX ke naam se he stadium ki neev rakhne ka vaada karte hai. Sabhi prashikshak jinhone ye khiladi tayaar kiye hai, ye sabse pehle shikshak banenge is stadium ke jinki tankhwaah agle mahine se he shuru kar di jaayegi. Jaankari rakhte hai hum thodi bahot aur bacho par inhone apni jeb se paisa kharch kiya hai, wo wapis dena hamara farz hai. Ek taarikh tak 16 gaanv ke sabhi prashikshak apna naam likhwa dijiyega panchayat me. Aap sabhi ka dhanyawaad karte hai itne maan-sammaan ke liye.", Naukri milna aur wo bhi pasand ki toh har insaan chahta hai. taaliyaan fir goonji har taraf se aur is baar log khush the ki ye 2 vyakti aaye toh aaye par itni saugaat laaye ki mela safal ho gaya shuru hone se pehle. Fir bhi kuch logo ke kaleje is marham ki jagah dangal me thande hone wale the aur jab Arjun langot pehne Jagtaar aur Kewal Singh ke sath idhar aaya toh uske gaanv ki taraf se bharpoor taaliyan goonji.
'Munda tagda hai par thoda kacha lagda Kewal baai.', Ye coach the is unche pind ki team ke. Khud bhi kisi bhainse se tagde aur thik unke jaise baaki 8 pehalwan. Shankar aur Narinder ke sath is taraf Umed bhi chala aaya tha jo abhi abhi pahucha tha.
"Coach sahab, kacha hai toh koyi baat nahi. Aaj ke baad pakka ho jaayega. Kyun mere jigar ke tukde sahi kaha na maine.?", Arjun se yahi shaksh tha jo gale lagne par jyada uncha hota tha. Bolne wala toh Umed ki kadkaathi dekh kar he jhemp gaya. Nihaal ki bhi poori team idhar chali aayi thi Shahid bhai ke sath.
"Chacha, hum baat baad me karenge aur jana nahi keh deta hu. Waise coach sir, yahi ek team hai kya? Koyi aur gaanv se bhaag nahi le raha?", Arjun ne akhade ki mitti jhuk kar chhoyi aur us vyakti ke paanv bhi.
"Aavedan toh aaye hai par wo vyaktigat chunoti ke hai. Khelna chahoge unse? Wo niyam wale khiladi nahi hai isliye maine mana kiya par arji rakhi hai udhar."
"Jarur. Waise 10 ki jagah 8 hai yaha.", Arjun ne ghere me aate hue ye maskhari ki toh ye coach sahab bhi tanj karne se na chooke.
"Aur tumhe patakhni dene ke liye 2 he bahot hai beta. Chalo unhe bhi keh dete hai ki haarne ke bawjood tum unse bhidne ko tayaar ho.", Bhitar refree bhi koyi jawaan nahi tha. Takriban 55-60 ke aaspas ka ye vyakti dusri team ko bahar karte hue sirf 2 ko bhitar rakhta hua mike pe niyam batane laga. Vinod ghar se aane wale logo ko liye pahuch chuka tha jaha Komal manch ki jagah apne pita ke paas aa khadi hui aur Aanchal bhi. Arjun ne aarakshit hisse me pancho ke peeche Nihaal ki mata ji ke sath sar pe dupatta liye Dipa bhabhi ko bhi dekh liya tha.
"Ye sadharan kushti nahi hai aur iske niyam bhi alag hai. Sabhi jara gor se suno aur awaaj ko viraam do. Aisi chunoti aur akhada 50 baras pehle he hua karta tha lekin 28 baras pehle thik aaj ke he din chunoti pesh karke ye fir se vajood me aaya. Jaisa maan-niya pandit ji ne kaha hai toh ye khula chunoti akhada aaj ke baad fir nahi hone wala. Purane samay me jo chunoti deta tha usko ek waqt me 2 log 5 jodi se bhid kar poora karte the. Arjun ne jodi dar nahi liya par niyam wahi manga. Dileri hai ya bewkoofi ye toh waqt batayega par niyam ke hisaab se chunoti dene wale ko tabhi vijeta mana jaayega jab wo 5 jodi pratidwandiyon ki peeth mitti se bhida de. Kuch aur bhi niyam hai lekin unka yaha lena dena nahi kyonki shahi auhde se koyi saamne nahi aaya hai. Ab ye 2 khiladi is ek se bhidenge aur koyi bhi beyimaani hone par hukka paani band kar diya jaayega doshi vyakti ka. Hamare daar ji se aagrah hai ki wo ghanti baja kar wo khel prarambh kare.", Aur thik waisa he hua jab Arjun ek taraf aur baaki dono pehalwan dusri taraf kuch peeche hue. Pyaarelal ji ne he peetal ki moti chaadar par wo hathoda thokte hue khel prarambh kiya.
"Arjun, dhyaan se.", Narinder ji ne bas itna he kaha aur Arjun haami bharta hua dono ghutne thoda modd kar un dono ki taraf badha. Ek kuch jyada he tagda tha jo pehle uske saamne aaya. Dono ke he hath aapas me kas chuke the jabki uska sathi peeche se Arjun ko gherne ki firaak me tha.
"Gole, kamar pakad iski aur Sonu aise he daboche rakh. Ek minute ka kaam bhi nahi hai.", Ye pehalwan bahar se cheekh raha tha aur uski baat khatam hone tak Arjun ne pehle is saamne wale ke hath niche jhukaye aur fir furti se uski kamar ko ghere me lete hue apne peeche uchaal diya jaise Taaraknath ji ne kiya tha. Par ye bhainse jaisa pehalwan toh dhamm se mitti par he phail gaya. Dusra jodidar abhi apne sathi ko he dekh raha tha ki uski kaakh me giraft banata Arjun uske kadam jameen se ukhaad takiye ki tarah jameen par patak kar hath jhaadta seedha khada ho gaya. Ab ek pal ko toh aisi khamoshi chha gayi thi jaise kisi ki maut he ho gayi ho.
"Oh jiyo mere laal. 30 second me 2 dher.. Oh bhai aisa karo ke thoda WWF wala niyam jodd do.", Narinder ji ne khushi me kuch jyada he keh diya lekin refree ne iska bhi jawaab diya 2 naye pehalwano ke andar aate he.
"Hath ke sath paanv ka istemaal bhi kiya ja sakta hai. Kamar ke nichle khaas hisse, naak aur sar pe chot nahi di ja sakti.", Ab Narinder ji chup ho gaye the kyonki baat Arjun ke khilaaf ja sakti thi ab. Lekin wo toh apni taraf teji se badhte dono pehalwano ko he dekh raha tha. Ek ne uska hath dabocha aur dusre ne uski kamar. Bahot jordar the dono kyonki ab Arjun ka ek ghutna niche tik chuka tha.
'Ye ab pakad bana raha hai Satish, dekho jisne kamar pakdi thi uske hath Arjun ke seene par pahoch gaye hai. Dusra toh bewajah dum laga raha hai kyonki wahi pehle jameen pe girega.', Rameshwar ji ki baat rani maa bhi sunn rahi thi aur thik Arjun ne us hath pakadne wale ko he apne jism ke jor se aise patka jaise dhobi gila kapda diwar pe maarta hai. Is dauran wo khud bhi peeche ki taraf ludhka us dusre wale ke dabane se lekin peeth tikne se pehle he wo hath jameen par rakhta dusri aur ghoom gaya. Ab ek bahar tha aur dusra akela. Wo is baar saand ki tarah aakroshit tarike se Arjun ko takkar maarne ki koshish me tha lekin ye daav Arjun ko khud bahot pasand tha. Ritu ne toh mooh par hath rakh liya tha jaise usko pata ho ki ab is pehalwan ki kya haalat hone wali hai. Jis gati se wo Arjun ki taraf usko girane ke iraade se dauda tha, wahi gati Arjun ne uske khilaf he laga di. Takkar toh lagi par kandhe se kandhe ki jisme ye pehalwan cheekh he utha aur uske baad uska jisma kamar se pakad kar Arjun ne 6 feet ki unchaai se niche de mara. Wo dard se dohra ho utha chahe mitti jitni marji naram aur poli thi. Kandha kuch Arjun ka bhi dukha kyonki idhar he kal Vajranand ji ne mushti prahaar kiya tha.
'Badi jaan hai bhai tum me.. Kandha he dukha diya.', Arjun ne usko hath de kar khada karne me sahayata di toh wo dard me bhi muskurata hua bola.
"Saadn ehda he seenga fansande hai bhrava. Tu sacchi lohe da hai. Nai tah meri takkar saahde coach saab nu thalle tika dendi hai. Tere tah modda he dukheya, meri tah kamar vi gayi lagda.", Wo bahar jata hua prabhavit tha apne pratidwandi se lekin jo ab andar daakhil hue the unke iraade alag the. Dono jism se tagde hone ke sath dhero nishaan liye the jaise wo maar-peet ya badmashi me rahe ho.
"Ye Rangi hai aur uske sath wala Jinder. Dhyaan se Arjun.", Shahid bhai ne jis tarah se Arjun ko sandesh diya tha Narinder ji uske kandhe par hath rakhte jaankari jutane lage jaise unhe bhi in dono vyaktiyon se kuch lena dena ho. Rangi sachmuch khunkhaar bhainsa he tha jaisa Dipa bhabhi ne bataya tha. Arjun uski taraf badhta us se pehle Jinder ne he Arjun par chhallaang laga di. Ye humla do-tarfa tha jisko Arjun poori tarah nakaam na kar saka. Peit me takkar aur Ranga ke kandhe pakadne se pehle uske sar ka thik usi kandhe par vaar jaha 2 baar chot kha chuka tha wo. Ek paanv jameen se ukhadte he wo inse duri banane ke liye viprit disha me khud ko girata hua bas pal bhar ke liye sambhla. Uske uthne se pehle he Rangi ne fir se kandhe ka prahaar kiya lekin is baar uski gardan Arjun kaakh me daboch chuka tha. Jinder ne jarur uski peeth jordaar ghunsa jadd diya.
"Ye sab niyam hai kya?", Shankar ki tej awaaj se bas refree ne sar hila kar sehmat hone ka jawaab diya. Par Rangi toh kaampne he laga tha jo baar baar hath upar uthane ki koshish karta par Arjun ne gardan ke sath uska wo hath bhi jakad liya jo bahar ki taraf tha. Seedha hath. Jinder ke 3 mukke khaane ke bawjood uski giraft Rangi par jyada he badhti gayi jo Komal bade gor se dekh rahi thi.
"Wo marr jaayega Arjunnnnn", Komal ki awaaj se bahar khade kayi log chakit the aur Arjun ne bas uske khatam hone se pehle he Rangi ko patakte hue uske seedhe hath ka kandha utaar diya, chhatt aur katt ki mili juli awaaj ke baad wo tadapta hua apne hath ko dusre hath se uthatha peeche khisak ne laga. Jindar aur gusse se humla karne wala tha lekin is baar jaise uski baari thi. Mukke wale hath ke niche kohni ke jodd par Arjun ne jordar mukka jadte hue wo hath bhi latka diya tha. Tha toh wo bhi mukkebaaj he aur ye baaki sabko pata nahi tha. Dono akhaade se nikalna chahte the lekin peeth lagi nahi thi jis wajah se ab Rangi uthne lagta toh peeth par jordaar laat padti aur Jindar bhaagne ki koshish karta toh mooh ke bal jameen par ja girta. Antt me dono ne he refree ke paanv pakad liye.
"Ye khel nahi raha, maar raha hai. Aap dekh rahe ho ustaad ji."
"Peeth lagne tak ye kuch bhi kar sakta hai. Main mukabla nahi rok sakta aise.", Ab dono ek dusre ki taraf dekhte hue turant peeth ke bal letne lage the par Arjun Rangi ko aise karne kaha de raha tha. Karwat par he apne paanv se usne Rangi ko wahi daba diya.
"Meri bhabhi par hath dala tha tumne aur firauti rangdaari jaise kaam karne ke sath nasha bhi bechte ho. Kya socha tha ki yaha mera shikaar kar loge? Main Arjun Sharma aap sabhi ke saamne is apraadhi ko saja de raha hu jisne aap sabhi ko nuksaan pahuchaya hai. Pratyaksh ya peeche se. Akhade ki mitti me aise asamajik tatva jo behan betiyon ki ijjatt par manchaha hath daal dete hai unhe main is jameen par saja dene ka poora haq rakhta hu. Aur saja hai ki iska dusra hath bhi.. salamat nahi rahegaaaa..", Hath ka panja pakad kar jis tarah Arjun ne uski kaakh me laat mar kar jodd utara tha kayi naram dilo ne toh chehre par he hath rakh liya tha. Tatkaal coach ke ishaare par panchayat ke prehri in dono ko ghaseet kar bahar le gaye.
"Ye sach hai jo Arjun ne kaha. Mere 4 khiladi jakhmi karke Rangi aur Jinder ne mujh par bhi dabaav banaya tha ki main unhe team me lu. Pariwar ki hifajat aur inke darr se mujhe aisa karna pada. Main saja ka haqdaar hu."
"Aapne jo kiya wo uchit fainsla tha aur sabke saamne unhe laa kar aapne bhala he kiya hai coach sahab. Main Sarpanch Sucha Singh ji se darkhaast karta hu ki wo Rangi aur Jinder ke sath unke sathiyon par uchit karwaayi karwaye.", Sabhi pancho ne jordaar taaliyon ke sath iska swagat kiya aur is bade gaanv ke sarpanch ne bhi hath jodd kar ye jimmewari uthane ki pushti kar di. Abhi aage kuch aur khel hota us se pehle bheed ko titar-bittar karte hue ye 3 saadhu bheshdhari lambe chaude tantrik poore ghamand ke sath akhaade ke saamne aa ruke. Kayi logo ne toh jhuk kar hath tak jodd diye the inke saamne lekin inke baad jo aaya wo 7 feet uncha aur koyle sa kala daanav he tha. Jataayen lambi kaali-safed aur hath me lohe ka trishool.
"Tum hote kaun ho saja sunane wale moorkh.? Ye akhada aur aisi chunoti dene ka adhikaar tumhe kisne pradaan kiya, bulao us namuraad ko hamare saamne?", Rameshwar ji ke sath swayam Rani maa aur Col sahab bhi idhar lapke jaha ab kayi log peeche hatt chuke the aur kayi apni jagah par khade ho gaye. Arjun 2 kadam aage badha tha lekin uske dada ne wahi rok diya.
"Ye adhikar humne diya hai hamare waaris ko aur raaj-gharane ke sanrakshak hone ka adhikar swayam maharaja Balwinder ji ne saunpa tha hume. Arjun aisa adhikaar raaj-darbaar se bhi rakhta hai maharaaj.", Rameshwar ji aur Rani maa ko is tantrik ke saamne hath jodte dekh Arjun ne he unke hath niche kar diye jo baat is daanav ko pasand na aayi.
"Hahaha... tum adhikar dene laayak kaise ho gaye aur ye nirlajj stree jisko raaj-mehal ki char-diwari me band hona chahiye yaha bina parde ke hajaro ke beech khadi hai? Hum hai sanrakshak kyonki hamari padvi hai Raaj-purhoit ki jo Raja Bhupendra ke samay se hai. Aghor Siddeshwar hain yaha saja dene ke haqdaar. Ghutne tikwao is moorakh ke hamare saamne anyatha ..", Bas yahi naam sunn na tha Arjun ne jo apne dada ko hatne ka ishara aise kar raha tha jaise wo khud yahi kar dega agar wo peeche na hate.
"Tum ho hamare paanv ki jooti shaitaan taantrik Sreedhar. Is padvi ki baat kar rahe ho tum bhagode hatyaare dushkarmi? Main tumhe yahi akhaade me chunoti deta hu XXXX aashram ka shishya hone ki wajah se. Aswikaar karne par tumhe ghutne tekne honge aur fir raaj-droh ke jurm me fainsla Kumar Arjun karega.", Arjun ki ye dahaad aur uske hath me wo 2 sikke dekh kar sabhi hairat me padd gaye the. Ye sikke wo sirf isi wajah se yaha laaya tha jo Jagtaar ko saunpe the dangal karne se pehle. Ab toh Rameshwar ji he Arjun ko shaant kar rahe the lekin unhe ek taraf karta hua tantrik jitna bada aur jyada he shaant ye praani Arjun ke barabar aa khada hua.
"Sanrakshak se kaise baat ki jaati hai tumhe pata nahi hai Sreedhar? Chalo ye trishool hume do aur aao akhaade me. Dekhe kya tum wahi Shaitaan ho jiski thokar se kisi vyakti ki meru peeth se bahar nikal aayi thi ya koyi berupiya ho. Aur tum teeno me se koyi hila toh mera Amavas tumhe aaj raat ka chaand dekhne nahi dega.", Jis tarah Sambhav ne Rameshwar ji ko sanrakshak aur samman dene ke sath peeche kiya tha Shankar thoda uttejit ho gaya. Lekin uske bhi kandhe ko halka sa daba kar Sambahav inkaar me sar hila diya.
"Anuj, aap waaris nahi hai. Apne sthaan par laut jaaye. Aur aap sabhi apni apni jagah baithe rahe, jinka dil kamjor hai wo yaha se jaa sakte hai. Sreedhar, ab agar tumne hamari baat nahi maani toh ye rakshak tumhe jeene ka dusra mauka nahi dega. Arjun.. Tayaar?", Shankar ko toh aaj ehsaas hua tha ke taaqat aisi adhbhut bhi ho sakti hai lekin Rameshwar ji toh us taantrik ke roop me Arjun ka he bura soch rahe the. Hansta hua wo daanv trishul Sambhav ko deta hua ghere me aa khada hua. Rameshwar ji ne Sambhav se isko rukwane ki maang ki lekin unki taraf se fir inkaar me sar hila.
"Aap sanrakshak hai aur hum dono rakshak. Apna sthaan grehan kijiye Pandit ji aur in joshile chiktisak ko sath le jaaye. Arjun hamara shishya hai jiski kshmata hum bhali bhaanti jaante hai. Is chunoti me koyi niyam nahi hai, hum fir dohra rahe hai. Peeth tikna hath khada karna kaam nahi aayega.", Is naye khel ko log darr aur sadme me he dekh rahe the, josh toh kabka khatam ho gaya tha kyonki tantrik ke paas saboot tha aur idhar Arjun ne chonoti bhi de di thi uske barabar haq rakhte hue.
"Iski jagah main ladd leta hu sadhu maharaaj. Ya aap he ladd lijiye. Bacha hai wo mera.", Umed ki guhaar par bhi unhone bas usko peeche jaane ka ishara diya.
"Gajendra, aap abhibhavak hai isliye chintit. Jaaye darshak bane kuch samay, hum aapse baad me milte hai.", Ab bebasi me sabhi bahar ja chuke the aur akhaade me sirf 3 he log the.
"Is baalak ki saans rokne ke baad hum tumhe bhi chunoti denge Yogi. Koyi toh hai jo Siddeshwar ko kuch pratispardha de sakta hai. Hahaha. Ye mera intjaar kar raha tha aur mrityu aa gayi iske saamne.", Attahahas karta hua wo kala daitya dekhne me bhayankar tha. Aankhon me laali, kuch sade hue daant aur pahaad se sharir se aati ghanghor durgandh. Arjun apna jism kholta hua bhidne se pehle apne guru baba Sambhav ka aashirwad lene laga.
"Aaj tum ajaad ho Rudra, hum bhi tumhe nahi rokne wale. Jitna dard bhara hai, sab bahar aane do. Is ghere ke bahar jitne bhi log khade hai wo aur kisi ko idhar nahi aane de.", Is bulanad awaaj par turant he sabhi peeche khade logo ne abhed ghera bana liya. Akhade ke bhitar ek taraf wo masoom chehre lekin tagde jism ka yuvak tha aur dusri taraf idhar udhar tehalta wo pahaad sa daanav.
'Papa Aaru ko bacha lo. Police nahi aa sakti kya idhar?', Ritu toh apne pita ki baah se he lipat chuki thi jabki Umed aur Rameshwar ji chinta ke sath chintan me bhi lage the. Komal ki bagal me mooh dhanke Amrita bhi is drihsya ko dekh rahi thi jaha uski chahat apni jaan daanv par khud laga chuki thi.
"Beta yaha ab police toh kya ye log bhi kuch nahi kar sakte. Is bewkoof ne aaj sabki zidagi daav par laga di hai aur wo uska anjaan sa guru bhi paagal lagta hai mujhe. Khud nahi ladd sakta tha?", Shankar ka hath uske kandhe par he tha aur sabki tarah aaj wo bhi chintit ho utha.
"Koyi niyam nahi hai is yudh me baalak. Tum aashram ke shishya ho na, waha bhi mera qehar barsa tha aur aaj ye sabhi bebas kamjor log tumhari durgati ke gawaah honge. Humse jubaan ladane wale ko toh hum waise bhi jiwit nahi chhodte, tumne toh chunoti he pesh kar di."
"Dimaag ghoom raha hai mere tujhe dekh dekh kar. Aaj jism par 57 jakhm na diye toh mera naam bhi Arjun Rekha Sharma nahi...Shaitaaaannn.. Chal aa.. dikha tera tantra aur taagat. Wo laat jiske prahaar se tu reedh ki haddi bahar nikaal deta hai.. aaj teri reedh se jodd dungaaa.", Ye garjana thi Rudra ki jiske badalte chehre ko taantrik ne dekha aur Sambhav ne dono ke beech gada trishool utha kar jung shuru kar di.
"Abe Gajju ye kya maamla hai be.? Papa dekha aapne?", Inder in dono ko dekh pa raha tha aur yahi Umed aur Rameshwar ji khade the. Arjun ka jism aghor aashram wale samay sa ubhar chuka tha lekin is baar uske kadam apni jagah ruke hue na the. Taantrik bhi aage badhta hue apni laat utha kar Arjun ke seene ko nishana bana raha tha, garjana karta hua. Ek jordaar takkar dono ke jismo ki aapas me hui jab uski laat par bhishan mukka jadta Arjun Tantrik ke thik seene par kandha maarta hua bhida. 2 faulaad bhide the aapas me aur dono he mitti me gire toh dhamm ki jordaar awaaj hui jaise vriksh cut kar gira ho koyi. Arjun apne honth par aaya khoon chaat-ta hua muskura raha tha aur tantrik apni taang me uthe dard ke sath sath seene ko sehlata hua ek bar fir uske saamne khada tha.
"Meri samajh se bahar hai aur hum toh is baba ko bhi nahi jaante jo khud ko rakshak bata raha hai. Lekin uske gale me jo mala hai aisi 3 thi, 2 mujhe pata hai kyonki ek mere he paas hai lekin ye teesri pita ji ki thi. Maa ne 3 li thi aur teeno ke dhaage alag alag rang ke the. Arjun us tantrik ko jaise bula raha tha matlab wo gunehgaar hai par ye ladka usko kis aashram ke naam par chunoti de gaya?", Sawaal toh Rameshwar ji ke bhi bahot the aur aaj pehli baar wo Arjun se prabhavit dikhe jab usne ye jordaar takkar di thi. Bheed me kaise bhi karke sajal netro se Kaushalya ji bhi idhar aa khadi hui.
"Mere bache ko kuch nahi hona chahiye ji. Police bulwa lo.", Umed ne toh itna sunte he unhe apne seene se laga liya tha.
"Wo galat nahi hai chachi. Agar kuch laga toh main kood jaunga beech me mere bete ke liye. Aapko apni parwarish pe shak hai.?"
"Beta pariwarish insaano ka saamna karne ke liye ki thi.. Shaitaan jaisa hai wo dekh toh sahi.."
"Maate..shaant", Sambhav itna bol kar fir se saamne dekhne lage jaha Tantraik Arjun ke ird-gird gol gol ghoom raha tha. Wo taqatwar hone ke sath he mustaid aur tej bhi tha, umar se prabhaavheen. Is baar Arjun se pehle usne prahaar kiya tha pehle thokar se uski taraf mitti uchaal kar. Yahi uski sabse badi galti saabit hui. Arjun aankhe band kare apne dono mukke apne upar koodte pahaad par jadd chuka tha. Aur wo itne par na ruka jab haddi se haddi takrane ki jordar awaaj hui. Tantrik ke sambhalne se pehle he uski thuddi par aajtak ka sabse jordar mukka jada tha Arjun ne. Wo sade gale se saamne wale daant aadha darjan se jyada ukhad kar khoon ke sath bahar nikle jiske chhinte Arjun ke chehre par gira. Gussaye dard me bhare Tantrik ne bhi uski pasli me waisa he prahaar thok diya tha aur dono apne apne dard ki jagah hath rakhte peeche ho gaye.
"Hahaha.. Pret ki bhi dard hua? Hahaha.. Main jaan gaya hu ke tum upari taaqat rakhte ho lekin mere saamne wo bhi asar nahi karti.. Main he Sreedhar hu.. sabko saadhne wala Sreedhar..", Wo jameen par khoon thookta hua Arjun ki aur attahaas karta hua bhada jo abhi tak apni pasli me dard ki wajah se waha hath rakhe khada tha ya ye bhi uska chhall tha.
"Ye.. upari nahi .. Andruni taaqat hai.. dushkarmi darinde.. Yaahhhhhhh.", Badhte hath ko he dono hatho me faansta hua Arjun chhall he kar gaya tha aur is baar wo 7 foot ka daanav sooi ke kaante ki tarah apne sthaan se hawaa me ghoomta hua dusri aur gira, kahi jyada bhayankar tarike se, hath abhi tak Arjun ki pakad me tha aur dekhne wale logo ki toh saans he atak chuki thi. Beshak ye ghera 500-600 logo ka he tha par dil sabka dehal gaya. Arjun ki pasli par 3 neele nishaan ubhar aaye the par wo unse beparwaah us lambe majboot hath ko modta hua Tantrik ki peeth par paanv tika chuka tha. Poori taaqat lagane par bhi wo hath ko aur peeche na le ja saka toh apne guru ki taraf dekha. Baba Sambhav ne hath ke ishare se usko bataya ki kis disha me jodd ko aage karna hai aur fir paanv se kidhar prahaar karna hai. Aur thika waisa he Arjun ne karke dikhaya jiska saboot tha 3 haddiyan chatakhne ki awaaj. Kandha utarne ki jagah waha ki dono haddiyan aur kalaai bhi toot gayi thi. Tantrik tha bada he jiwat jisne itne atyadhik dard me apni poori taaqat laga kar peeth se he Arjun ko 5-6 feet peeche uchaal diya tha.
"Aaruuuuuuu..", Ritu ki cheekh ke sath uski aankhon se aansu bhi jhar jhar girne lage the apne bhai ko kisi rubber ki gend sa uchalta dekha. Wo bhimkaaye tantrik apna toota hath pakde khada ho chuka tha jabki Arjun apne mooh se mitti hatata hua Ritu ki bheegi aankhon ko dekh akhaad ki mitti apni mutthi me bharta hua ghutne tikaye sar jhukata hua naa me sar hilane laga. Rameshwar ji in dono ko dekh rahe the aur Tantrik us se ab ek kadam dur tha jiska upar uthta paanv dekh baba Sambhav ke jabde bhi bheench gaye. Arjun kya kar raha tha unhe bhi nahi pata. Lekin is prahaar se unhe bhi darr tha apne shishya ka.
"Dusht pret.. Tum kuchalne ke liye he bane...Aaaoooohhhhhh", Wo kisi alag he vedne me chingaad utha jab Arjun ne apne jism ki saari urja uski uthi hui taang me he bhar di. Wo uchla jarur lekin peeth dharti par takrate he uski jaangh ke jodd par jaise koyi truck aa takraya ho. Ye prahaar bahot tha us tantrik ko uske pratidwandi ki kshatma batane ke liye. Jo Arjun ne kaha tha thik waisa he kiya tha usne. Taang ki sabse majboot haddi uske ling tak khiska di thi jaha reedh, choole aapas me milte the. Aankhon me aansu bhare uske upar Ritu ka Rudra tha, wo Rudra jo sabkuch dekh sakta tha siwaye apni behan ke aansuon ke.
"Tumhe is duniya se vida karne ka waqt aa gaya kamine.. Meri behan meri jaan hai.. Uski aankh ka ek aansu mere jism ke lahu se badh kar hai.. Aaj wo teri wajah se ro rahi hai...ye le haivaan..", Arjun ne is baar laat uske dusre kandhe par jadte hue jaise waha ki haddiyan he kuchal di thi. Sambhav baba bijli ki tarah lapke the uski taraf lekin ab wo shishya peeche reh chuka tha. Ye Ritu ka Rudra tha jiske ek dhakke se wo swayam akhaade ki mitti me ja gire. Arjun aansu bahata hua tadapate hue is pahaad ko apni samast urja se upar uthata chala gaya. Nase ubhar kar fatne he wali thi ki Rameshwar ji ke hath judd gaye Ritu ki taraf.
"Aaru.. ruk ja bhai.. Please..", Bas uske kandhe wahi jhukk gaye aur ghutno ke bal girta hua wo apna sar jhuka gaya. Tantrik tadap raha tha aur Arjun ke sar pe hath ferte hue Sambhav ji ne bas itna he kaha.
"Shant Rudra. Behan saamne hai, bilkul swasth aur muskaan ke sath.", Arjun ne chehra uthaya toh kaale taantrik ke jism ke us taraf Ritu akhaade me khadi thi. Chehre par muskaan aur halke geelapan.
"Maaf karna baba, kya maine aap par bhi hath uthaya?"
"Wo tum nahi the aur waha hum bhi nahi the. Pyaar aisa he toh hota hai, har samay tum hamare shishya toh nahi? Gajendra, apne bhaiyon ke sath un teeno ko hamare peeche le chalo.", Sambhav ji ne jis tarah se tantrik ke sharir ko apne kandhe par laad liya tha, lagta tha jaise ab usme wajan bhi na raha tha. Umed ne bhi Shankar aur Inder ke sath aage badhte hue baaki teeno taantrik lapak liye the.
"Chunoti poori hui aur ab ye akhada kisi ko chunoti nahi dega. Anyatha agli baar hum lautenge aur is chunoti ki wajah bhi is shaitaan ko dabochna tha, kisi samanya naagrik ko thes pahuchana nahi. Hum Yogi Sambhav hai, Pandit Motilal ji ke Sambhav aur raaj-pariwar ke prehri. Mela jaari rakhiye, Arjun kuch samay me wapis laut raha hai. Chaliye sanrakshak ji, aapka sath chalna jaruri hai. Bas apni seema me rahiyega.", Sabhi ko waha hairat me chhod Sambhav apne sath Arjun aur Pandit jo ko liye aage chalta raha aur uske peeche bandook ki nok par Inder, Shankar aur Umed baaki teen tantriko ko liye aane lage, unhe khud nahi pata tha ki wo log is baba ki baat maan kyun rahe hai aur ye inhe jaanta kaise hai. Arjun chalte hue ladkhada raha tha aur Komal didi dwara pakdaye kapde pehanta hua wo thoda peeche reh gaya.
"Bhai tu thik hai na? Dekh main nahi jaanti ye sab kya hai aur kyun hua wo sab lekin teri jaan.."
"Ye aapki jaan hai didi, aur isko aap he bachaye hue ho. Mahol shaant karwao udhar thodi bahot ghoshna karwa ke. Jaanti toh aap bhi bahot kuch hai. Mukhiya ji, college ki ghoshna kar dijiye aur daadi ko saamne khada kar dena apne. Main aata hu aur Raani maa se kehna ke wo yahi rahe.", Arjun ne patloon pehan kar wo langot didi ko thama diya. Baaki log kuch aage ja chuke the jidhar sadak ki jagah raasta kacha aur fir jungle tha. Komal ne apne dupatte se he Arjun ka chehra saaf kiya aur usko tej kadmo se jaate hue dekhti rahi.
.
.
"Ae bade bhai, aakhir tum ho kaun?", Umed ne ye khamoshi bhang ki us tantrik chele ke sar par pistol ka batt maarte hue jo kuch hil dul raha tha. Rameshwar ji toh bas khamosh he the.
"Bada bhai bol rahe ho Anuj aur fir pooch bhi rahe ho? Hum Arjun ke teesre guru hai aur wahi hamari jimmewari hai is praant me. Ye saamne jo aa raha hai is se darna matt.", Sambhav ko ye log hairaani se dekh rahe the aur jyada hairaani tab hui jab wo bada sa kala bhediya un ghane vriksho ke beech se nikal kar inki taraf badhne laga.
"Arre bhai wo kutta nahi hai, bhediya hai. Goli nahi maarna chahta par nahi maari toh ye tumhe nuksaan pahucha sakta hai."
"Gajendra shwaan ka bahot shauk hai tumhe lekin hume yahi pasand hai. Ye Aamavas hai, haan hamare baba ke paas bhi ek amavas tha jisko ye namuraad Shankar aur Inder pareshaan karte rehte the. Tumhari bhi toh paanv ki haddi todi thi Inder aur us shaitaan Ajji ne? Bahot he prakarmi yuvak tha sabse chota bhai. Bura hua aur hume is baat ka aaj tak khed hai. Aao ab jungle ke bhitar jana padega.", Wo bhediya ab Rameshwar ji aur Sambhav ke beech chal raha tha. Aadatan Rameshwar ji ne uske sar par hath fira diya toh wo unki patloon par kaan ragadta hua shukriya kehta dikha. Arjun bhi apni pasli par hath rakhta Rameshwar ji ke bagal me chalne laga tha. Honth aur aankh ke kinare halka rakt abhi bhi ris raha tha uske. Wahi Narinder kaan pakadta hua Umed se maafi maang raha tha par teeno hairaan the ki ye vyakti pehli baar dikha hai lekin inki har khabar hai iske paas. Kamar par bas ek dhoti numa vastra, seene tak lambi daadhi aur hath me wo lakdi ka motta lath. Chalta firta ajooba he tha 7 foot ka Sambhav lekin awaj vinamra.
"Arjun se kaha mile the aur isne bhi humko kuch nahi bataya.? Papa ko bhi toh nahi pata tumhare baare me kuch.", Ye Shankar ka swar tha aur uske sawaal se Rameshwar ji bhi sehamt the.
"Vachanbadh tha hamara shishya. Aur hum is rakhsas ki pratiksha me the nahi toh ek aadh baar mil lete. Gajendra tum toh iske chaute guru ho na toh socho hum kaha mile honge Arjun se?", Sambhav ne pratiuttar me he sawaal kar diya tha aur ab in logo ko thoda pareshani hone lagi thi umas se bhare is jungle me chalte hue.
"Iske boarding school me? Matlab wo tumhi ho bhai jisne isko ye daav-pech sikhaye.? Mujhe lagta tha ke maine sikhaya hai."
"Humne sirf iske sath waqt bitaya hai Gajender aur Arjun ko jiwan ki disha di hai. Ye swayam seekhta hai aur tumne atcha kaam kiya hai guru ke roop me. Humne kabhi malyudh nahi kiya iske sath, bacha tha ye us waqt. Ab hum bujurg ho rahe hai. Jaante hai aap logo ko chalne me kasht ho raha hai lekin thoda kasht uthane se he aanand ki prapti hoti hai. Hum jaante hai ki ye sabhi sawaal Pandit ji pooch rahe hai, inhone is tarah he tum teeno ko apne sath jodd rakha hai. Wo saamne nadi ke us paar jana hai hume. Jaante ho us sthaan ko?"
"Ae bhai, tum toh yaar bahot jyada he tej ho. Hamare sath sath hamare pita ko bhi jaante ho lekin udhar nadi hai toh hume kyun laaye aur in tantriko ka kya karna hai?", Narinder ne jhijhakte hue sawaal kiya tha kyonki usko aaj pehli baar kisi vyakti se darr laga tha jo itna lamba chauda hone ke sath sath bhediye ko paaltu banaye hua tha, wo bhi bina rassi bandhe.
"Najre khuli rakho Inder, tumhe kahde vriksho ke beech he kuch gire hue vriksh bhi dikhene. Ye baandh paar karna hai bas aur Pandit ji aapko seema yaad hai na aapki?", Ab inhone dekha toh us shaant behti nadi ke upar ye sapaat pull jaisa bana tha jo lakdi ka tha aur uske upar bhi jhaad-jhakhaad uge the. Itni der me Rameshwar ji pehli baar bole.
"Hum jaante hai wo saamne wali jagah ko. Bahot samay bitaya hai humne us machaan par baith kar apne bhai ke sath. 19 baras jiwan ke idhar jaha 5 baras ki umar me aane lage the hum dono aur agle 14 varsh aate rahe. Tumhe sabkuch pata hai?"
"Nahi, sarvgyata toh aapki bagal me chal raha hai Pandit ji. Haan abhi gyaan adhura hai isliye sawaalo ke jawaab nahi de sakega. Jaante ho Shankar is shaitaan ka apraadh kya hai? Kyun tumhare putra ne apni jaan ki bhi parwaah na ki is se bhidne me?"
"Nahi bade bhai, na main is daanav ko jaanta hu na tumhe aur na apne bete ko atchi tarah."
"Ghar pe raha karo thoda bahut. Waise hum ye baat tumse isliye pooch rahe hai kyunki isko saja Arjun nahi de sakta. Aise karya hum ya tum behtar kar sakte hai. Tumhi batana ke hume iske sath kya karna chahiye. 57 nabaligo ke sath dushkarm aur unki bali dene ka karya kiya hai jisko bayaan karne ke liye hamare paas bhi shabd nahi hai. Sabhi xx se xx umar ke beech thi.", Pull ko paar karte hue jab Sambhav ji ne ye baat kahi toh baaki sabke chehre par avishwaas aur gussa ubhar aaya tha.
"Papa hai sath lekin mujhe atcha lagega waisa karna jaise tum jaan chuke ho bade bhai. Inhe sath kyun laaye ho jab saja he deni thi?", Shankar ka ishara Arjun aur Pandit ji se tha.
"Arjun us machaan par baith kar inse kuch baatein karna chahta hai aur tumhe mere sath thoda aage chalna hai. Bas 500 kadam aur us taraf. Pandit ji ki hadd bas yahi tak hai. Aage inke vachan ki sarhad koyi aur nahi dekh sakta.", Arjun bhi Rameshwar ji ka hath pakad kar us machaan ki taraf chal diya jo aaj bhi saaf suthri thi aur waha paani ka matka aur kaanse ka lauta rakha tha. Ye log Sambhav aur Amavas ke peeche chalne lage. Amavas jaise 2 aur bhediye bhi ab aage mil chuke the jo is jungle aur haweli ke prehri the.
"20 minute baad pahoch jana apni jagah par mukhiya ji.", Sambhav ka ye ishara sirf Arjun ke liye tha jisne utni he tej awaaj me haan kaha aur ab wo us machaan tale Rameshwar ji ke sath baith chuka tha. Patloon ke bhitar ki chor jeb se wo 8 baar muda patra usne Rameshwar ji ki taraf badha diya.
"Ye kya hai ab? Hum tumse vyathit hai aur baat karne ka dil nahi hai.", Rameshwar ji ne matke se paani us laute me bharte hue gale me udelne ke baad paseena saaf kiya. Wo sachmuch kuch pareshan the.
"Iske baad aapka gussa udar chhoo ho jayega Shrimaan Raame ji. Aapke liye he toh ye sab kiya hai, iske inaam me najaagi dikhayenge? Jo baat yaha hogi wo yahi rahegi. Padh lijiye fir aap khud kahenge ki kuch waqt akela chhod diya jaaye.", Arjun ke itna kehne par unhone wo patra pakad liya aur upar wali jeb tatol kar apna najar ka chasma bhi pehan liya. Pehle akshar se he wo Arjun se duri bana kar baith gaye the. Arjun kameej ke button khol kar apne dukhte jakhmo par wo dhaatu ka thanda lauta lagane laga. Har gujarte samay ke sath Pandit ji ke bhaav badal rahe the aur antim pankti me vajeer aur nalayak pita padhte he unki aankhen jawaab de gayi. Bahot ko kaant-chhant thi us patra me lekin wo jisne likha tha us insaan ke najar me unka Raame sachmuch Ram samaan tha aur jitna pyaar unhe apne bete se tha wo sab unhone isme udel diya tha. Patra par kayi boonde ashru ki Rameshwar ji ki aankhon se nikal kar tapki thi. Unhone bahre gale ke bawjood kaha.
"Dhanywaad. Main tumhara hrini hu bete aur jiwanbhar rahunga. Is se bahumulya mere liye aur kuch bhi nahi jiwan me, kuch bhi nahi. Tumne ek baap bete ko milwa kar mere seene se dard utaar diya. Main unke jaane ka khudko dosh deta tha jabki sach wo nahi hai. Main unhe bahot chahta tha lekin jaise wo na keh sake main bhi na keh paaya. Ye main mere pass rakh raha hu. Jaane isko itni dimak lagne ke bawjood ye surakshit kaise raha aur tumhe kaha mila. Par ye mere pita ne he likha hai aur main unki najro me ek atcha insaan tha, mere liye is se badh kar kuch nahi. Tumne aaj Raame ko khareed liya hai bete. Beta he kahu ya apne pita ka dost?", Unki bhigi aankho par se chasma utaar kar Arjun ne fir se unhe paani diya.
"Aajkal toh wo sath he rehte hai dada ji. Badi himmat wale insaan the, main toh unka ansh bhi nahi. Mere sar par toh aapki chhaya aur suraksha hai, lekin wo akele the. Waise ye toh bas ek kist hai us virasat ki jo unhone mujhe aapke liye di. Ghar chal kar baaki bhi deta hu. Thoda apna dard kam karke aata hu tab tak. Aap fir se padhiye isko kya pata aur kuch bhi mil jaaye hamare SSP sahab ko. Aata hu bau ji."
"Tumhe gehri chote aayi hai beta."
"Aapke jakham aaj tak hare hai bauji aur main thik hu. Ek jimmewari mili thi virasat me jiska dard mujhe aur Devi Anuradha ji ke suputra ko bhi antim samay tak raha. Aata hu, itne aap jara machaan ke upar se apni saheli utaar lo. Wo aaj bhi salamat hai.", Arjun aage badh chala tha jidhar wo kaali haweli thi. Ye ek seedha lekin khatarnaak rasta tha mehal aur kaali haweli aane ka lekin Sambhav ko yahi pasand tha kyonki ye uski jagah thi. Arjun chalta hua najro se aujhal ho gaya us jungle me toh Rameshwar ji ne us machaan ke upar taank-jhaank ki toh unhe unki 'Rajni' waha jald he mil gayi. Ek baar fir aankhon me paani aa chuka tha aur kisi bache se khush hote hue wo uske apne seene se lagaye jaise us waqt me laut gaye jab unke sath yaha Raghuvir hota tha. Aaj Arjun ne unhe unka dost aur pita, dono he lauta diye the us akhaade ki chunoti ki aad me Sreedhar jaise haiwaan ko dabochne ke sath. Udhar ek taraf Sambhav jiwit Sreedhar ko rassi se latkaaye hue apne aadha darjan bhediyon se nuchwa raha tha aur uska anusaran karte hue Inder, Shankar aur Umed uske chelo ko taang kar unhe jagah jagah se kaat rahe the. Wo jallaad-kasaai hone ke bawjood aaj seekh rahe the sahi dand ki uchit saja dena. Jaan lena toh bahot asaan kaam tha. Dusri jagah dargaah me kabaddi ka khel shuru hone se pehle Kaushalya ji ne Komal ke sath mil kar sabhi ko chaunka diya tha is bade gaanv aur apne gaanv ki sarhad wali jameen par kanya mahavidyalya ki neev is eitwaar ko rakhne ka bol kar. Sucha Singh ne toh bina shart apne gaanv ki chaupal bhi Pyarelal aur Arjun ke adhikar me kar di thi. Ab unke gaanv ka vikaas swayam Arjun aur rani maa ke adheen aa chuka tha. Ye akhada toh poora na ho kar bhi sabke jiwan ko poora kar raha tha. Yahi toh itcha tha Pandit Motilal Anuradha Sharma ki jisme unka poora pariwar udaharan bane aur sabko sah le kar chale. Arjun ne wo haivaan daboch liya tha khudko waaris saabit karke.
