UPDATE-57
Mike ke netr aatank se phate ke phate rah gaye ।
sab kuchh second ke saunve hisse main ho gayaa ।
“tum shaayad apne chhal-prapanch se bhare hua is khel main ek baat bhul gaye Mike ।” commander use behad nafaratabhri nigaahon se dekhtaa huaa bolaa- “jo aadmi jaan bachaanaa chaahtaa hai, vo jaan lenaa bhi jaantaa hai । good bye ।”
commander ne us anti tank gun ‘bazooka’ kaa livar pakadakar khinchaa ।
Mike ke munh se aisi vibhats chikh nikli, jaise kisi ne uskaa galaa kaat daalaa ho ।
bazooka ke andar se niklaa tin inch vyaas kaa badaa golaa ghumtaa huaa sidhaa Mike ke sine main jaa ghusaa aur vahaan kaafi badaa jharokhaa-saa bantaa chalaa gayaa ।
Mike vaapas patthron par jaa giraa ।
uske sine main itnaa chaudaa chhed ho gayaa thaa, jaise kisi ne top ki puri naal usmain ghusaa di ho ।
palak jhapakte hi uske praan-pakheru ud gaye ।
uske baad khud commander bhi apni taangon par khadaa n rah sakaa ।
pahle uske haath se bazooka chhutakar niche giri ।
phir vo khud bhi jamin par dher ho gayaa ।
commander Karan Saxena ke saans ab bahut jyaadaa ulte-sidhe chalne lage the ।
‘assault group’ ke un yoddhaaon ko maarne main use jarurat se jyaadaa mehanat karni pad gayi thi । sharir se khun kaafi maatraa main nikal gayaa thaa aur ab uske upar badi teji se behoshi chhaane lagi । sir ghumne lagaa । pith main lagi goli bhi bhayankar dard kar rahi thi । commander ko lagaa, ab behosh hone se duniyaa ki koi taakat use nahin bachaa sakegi aur phir pataa nahin vo kabhi hosh main bhi aa paayegaa yaa nahin ?
commander ne kampakampaate hua haathon se apne overcoat ki gupt jeb se transmitter set nikaalaa, phir vo mumbai ke RAW headquater se sampark sthaapit karne ki koshish karne lagaa ।
jald hi sampark sthaapit ho gayaa ।
“hello-hello, commander Karan Saxena speaking ।”
“commander Karan Saxena speaking ।”
vah us samay usi code bhaashaa main bol rahaa thaa, jo code bhaashaa mission par ravaanaa hone se pahle Gangadhar Mahant aur uske bich ejaad ki gayi thi ।
“hello Karan, main Gangadhar Mahant bol rahaa hun ।” fauran dusri taraf se badi garmjoshi se bhari aavaaj sunaayi di- “kyaa baat hai, tum thik to ho n Karan ?”
“p... please help me !” commander ki aavaaj buri tarah kampakampaayi- “p... please help me ! !”
Gangadhar Mahant sannaate main dub gaye ।
“tum jungle main is vakt kahaan ho ?” Gangadhar chilllaaye ।
“m... monkey hill par !”
“yauddhaaon kaa kyaa huaa ?”
“m... mainne lagabhag sabhi yoddhaaon ko maar daalaa hai ।” commander ki aavaaj har pal maddhim pedti jaa rahi thi- “u... unkaa headquater bhi tabaah kar diyaa hai ।”
“lekin tumhen huaa kyaa hai ? tumhaari haalat kaisi hai ?”
usi pal transmitter set commander ke haath se chhut gayaa ।
uski gardan daayin taraf jaa giri ।
“tum kuchh bol kyon nahin rahe Karan ?” Gangadhar Mahant paaglon ki tarah chilllaa uthen- “tum khaamosh kyon ho ?”
commander Karan Saxena behosh ho chukaa thaa ।
☐☐☐
mumbai ke RAW headquater main hadakamp mach gayaa ।
n sirf Gangadhar Mahant balki tamaam RAW agenton ke lia yah baat hairaan kar dene vaali thi ki commander Karan Saxena jaise aadmi ne madad maangi hai ।
“jrur Karan ki haalat bahut gambhir hai ।” Gangadhar Mahant parishaan ho uthe- “varnaa aisaa pahle kabhi nahin huaa ki Karan ne kisi mission ke dauraan madad maangi ho । aisaa lagtaa hai, Karan un yoddhaaon se ladtaa huaa bahut jakhmi ho gayaa hai ।”
“phir to hamain commander ki fauran madad karni chaahiye chief !” RAW agent rachnaa mukharji boli !
“bilkul !”
“lekin ham etni jaldi commander ki madad ke lia Burma ke khaufnaak jungle lo main kaise pahunch sakte hain ?” vah ek dusre agent ki aavaaj thi ।
“iskaa bas ek hi tarikaa hai ।”
“kyaa ?”
“mujhe Burma ke rakshaa mantri se baat karni hogi । Burma ki fauj hi Karan ki madad ke lia sabse pahle vahaan pahunch sakti hai ।”
phir Gangadhar Mahant telephone ki taraf jhapat pade ।
☐☐☐
jaise hi Burma ke rakshaa mantraalay main yah khabar pahunchi ki commander Karan Saxena ne lagabhag sabhi yoddhaaon ko maar daalaa hai aur ab vo khud monkey hill par bahut gambhir haalat main pedaa hai, to vahaan bhi sanasni daud gayi ।
“fauran jungle main ghusne ki taiyaari karo ।” turant rakshaa mantri chilllaaye- “hamne kisi bhi haalat main commander Karan Saxena ko bachaanaa hai । vah jaambaaj aadmi marnaa nahin chaahiye, jisne hamaare desh ki hifaajat ke lia apni jaan khatre main daal di ।”
“lekin ab commander Karan Saxena ko bachaane ke lia ham kyaa karen ?” rakshaa mantri kaa secretary bolaa ।
“jungle main yoddhaaon kaa ab pahle jaisaa dar nahin hai, fauj ko hukum do ki vah turant jungle main ghuse ।”
“oke sir !”
☐☐☐
thodaa hi samay gujraa hogaa ki fauran Burma ke fauji helicopter badi taadaad main jungle ke upar mandraane lage ।
fauji gaadiyaan danadnaati hui jungle ke andar ghusin ।
dekhte hi dekhte Burma ki fauj ne us jungle ko chaaron taraf se gher liyaa ।
“sab ‘monkey hill’ ki taraf baaden ।” fauj ke company commander ne loudspeaker par aadesh danadnaayaa- “aur raaste main yauddhaaon ke jitne bhi sainik najar aayen, sabko maar daalo । koi nahin bachnaa chaahiye ।”
ekaaak jungle main chaaron taraf fauj-hi-fauj najar aane lagi ।
signal bajne lage ।
jungle kaa maahaul khaufnaak ho gayaa ।
fauj ab yauddhaaon ke bache-kuche sainikon ko goliyon se bhunti hui aage baad rahi thi ।
jungle main aadivaasiyon ke upar fauj ko goliyaan chalaane ki jarurat nahin pedi, usse pahle hi aadivaasiyon ne fauj ke saamne hathiyaar daale diye ।
thodi hi der main pure jungle par Burma ki fauj kaa kabjaa ho chukaa thaa ।
yahi vo pal thaa, jab fauj ke chaar helicopter bhayaanak garjnaa karte hua ‘monkey hill’ par utre ।
“commander Karan Saxena yahin kahin honaa chaahiye ।” vaayusenaa kaa ek badaa officer helicopter se niche kudtaa huaa chilllaayaa- “use chaaron taraf dhundhon, monkey hill kaa chappaa-chappaa chhaan maaron ।”
dekhte hi dekhte Burma ke fauji madhumakkhi ke chhatte ki bhaanti puri ‘monkey hill’ par failte chale gaye ।
“is baat ki kyaa gaaranti hai ।” ek fauji bolaa- “ki commander Karan saksnaa yahin hogaa ।”
“kyonki usne yahin se apnaa aakhiri message circulate kiyaa thaa ।”
“oh !”
fauji daudte hua aage baade ।
“lagtaa hai, vahaan koi hai ।” tabhi ek fauji ne dur jhaadiyon ki taraf ungli uthaai ।
“commander Karan Saxena maalum hotaa hai ।”
“jrur vahi hai ।”
fauji daudte hua us vyakti ki taraf baadte chale gaye, jo khun se lathapath haalat main jhaadiyon main pedaa thaa ।
vah sachamuch commander Karan Saxena thaa ।
“ise jaldi se uthaakar helicopter main laao । hamne commander Karan Saxena ko lekar fauran hospital pahunchnaa hai ।”
officer ke aadesh ki der thi, turant do faujiyon ne commander Karan Saxena ko uthaa liyaa aur vah use lekar vahin khade ek helicopter ki taraf daude ।
☐☐☐
dard ki vajah se commander kaa sir fataa jaa rahaa thaa । use aisaa lag rahaa thaa, maano vah kisi bahut gahri nind se jaagaa ho । aankhen kholte hi usne badi achambhit nigaahon se idhar-udhar dekhaa । vah bilkul nayi jagah thi aur is samay vah ek bahut saaf-suthre kamre main thaa ।
tabhi commander ki nigaah apne bed ke najdik hi rakhi ek takhti par pedi, vah Burma ki raajdhaani rangoon kaa koi hospital thaa ।
commander ne dekhaa, uske sharir par jagah-jagah pattiyaan bandhi hui thi ।
kapede badle jaa chuke the ।
iske alaavaa Haversack bag kaa saamaan bhi vahin kamre main failaa huaa thaa । usi kshan commander ki nigaah apni cloroform ki bottel par paadi । n jaane kis bevkuf ne cloroform ki shishi kaa dhakkan khol diyaa thaa aur ab usmain se aadhi se jyaadaa cloroform ud chuki thi ।
khidki main se chhanakar aati dhup is samay sidhe us cloroform ki shishi par pad rahi thi ।
commander ne thodi himmat jutaai । usne bistar par lete-lete aage ko jhukakar cloroform ki shishi uthaai aur uskaa dhakkan vaapas band kar diyaa ।
phir use lete-lete kab nind aa gayi, pataa n chalaa ।
kaafi der baad commander ki aankhen khuli thi ।
usne dekhaa, bilkul usi kshan ek bilkul safed baalon vaalaa docter kamre main daakhill huaa । usne safed overcoat pahnaa huaa thaa aur aankhon main khunkhaar bhaav the ।
“hello commander !” vah commander ke najdik aakar khadaa ho gayaa aur muskraayaa ।
commander chaunkaa ।
us aadmi ki surat n jaane kyon use jaani pahchaani si lagi ।
vah use pahle kahin dekh chukaa thaa ।
kahaan ?
yah commander ko ekadam se yaad n aayaa ।
“shaayad tum mujhe pahchaanne ki koshish kar rahe ho commander ।” vah rahasyamyi docter injection ki sirinj bhartaa huaa bolaa- “meraa naam Jack Kramer hai, ‘assault group’ kaa aakhiri yoddhaa ।”
commander ke dimaag main dhamaakaa ho gayaa ।
fauran vah use pahchaan gayaa ।
vah vaastav main hi Jack Kramer thaa ।
“tumne mere sabhi gyaarah yoddhaaon ko maar daalaa hai commander !” Jack Kramer gusse main phumphkaaraa- “tumne Burma par kabjaa karne ke mere sapne ko chaknaachur kar daalaa । lekin ab tumhaari maut kaa samay aa chukaa hai । tum shaayad jaante ho, narcotics kaa kaarobaar karne ke saath-saath main vish kaa bhi vishishajy hun । yah jo injection mere haath main dekh rahe ho, iske andar potassium cyanide se bhi jyaadaa khatarnaak ‘kurri’ naam kaa jahar bharaa hai । jaise hi yah jahar tumhaare sharir main pahunchegaa, fauran second ke saunve hisse main tumhaari maut ho jaayegi ।”
phir Jack Kramer , commander ke vah injection lagaane ke lia jaise hi aage bada, turant commander bed se ekdum jump lekar khadaa ho gayaa aur uski taaekvaandon kick badi speed ke saath ghumakar Jack Kramer ke chehre par pedi ।
Jack Kramer chikh uthaa ।
injection uske haath se chhutakar niche gir pedaa aur girte hi tut gayaa ।
commander ki nigaah punah cloroform ki bottel par jaakar thahar gayi ।
vo jaantaa thaa, kyonki cloroform ki vah botal kisi ne dhup main khuli chhod di thi aur thodi der pahle commander use band kar chukaa thaa, to ab uske andar khaali jagah main jarur ‘phosgene gas’ ban gayi hogi ।
phosgene - jo bahut jahrili gas hoti hai aur ensaan ke upar sidhe nervous system par attack karti hai ।
commander ne jhapatakar botal uthaa li aur use lekar bijli jaisi phurti ke saath darvaaje ki taraf daudaa ।
“tum aaj bachakar nahin jaa sakoge commander !” Jack Kramer ne bhi uske pichhe jump lagaayi ।
uske haath main ‘kurri’ jahar se bharaa dusraa injection aa chukaa thaa ।
rukaa commander !
ghumaa !
phir bhadaak se uski ek aur taaekvaandon kick ghumakar Jack Kramer ke chehre par pedi ।
usi kshan commander ne ‘phosgene gas’ se bhari vo botal saamne divaar par de maari ।
dhadaam !
bottel phatne ki aisi aavaaj hui, jaise bam phataa ho ।
commander daudakar kamre se baahar nikal gayaa aur baahar nikalte hi usne darvaajaa band kar diyaa ।
andar se ab Jack Kramer ki vibhats chikhen gunjne lagin aur phir vo chikhen bhi shaant ho gayin ।
commander Karan Saxena is samay hospital ke hi galiyaare vaali table par pedaa jor-jor se haamph rahaa thaa ।
uske kayi taanke tut chuke the ।
jakhmon main-se phir khun risne lagaa thaa ।
lekin commander Karan Saxena yaa phir kisi ko bhi us baat ki parvaah n thi । pure hospital main aphraa-taphri machi thi ।
yah baat ab vahaan fail chuki thi ki commander Karan Saxena ne aakhiri yoddhaa Jack Kramer ko bhi ‘phosgene gas’ se maar daalaa hai । us kamre main se ‘phosgene gas’ baahar n nikalne paaye, iske lia darvaaje ki jhiri main jagah jagah gilaa kapedaa lagaa diyaa gayaa thaa । phir turant hi vahaan ‘vishaili gas nirodhak dastaa’ bulaayaa gayaa ।
us daste ne vahaan aate hi sabse pahle aise yantr lagaaye, jo us band kamre ke andar se hi saari gas sokh le gayi । uske baad kamre kaa darvaajaa kholaa gayaa ।
saamne hi Jack Kramer ki laash pedi thi ।
Jack Kramer ।
vah Master mind aadmi, jo khud ko vish kaa vishishajy kahtaa thaa, lekin apne aakhiri samay main usi vish ke kaaran vo mriatyu ko praapt huaa ।
agle din commander Karan Saxena apne jivan ke us sabse khatarnaak mission ko puraa karke vaapas bharat laut aayaa । bharat lautte hi uske paas badhaeyon kaa taantaa lag gayaa ।
bharat ke tamaam akhbaaron main use ‘bharat ratn’ milne ki khabar surkhiyon ke saath chhapi ।
sachamuch vo bharat kaa ratn thaa ।
bharat ratn, commander Karan Saxena !
jis par koi bhi sachchaa bhartiy garv kar saktaa hai ।
samaapt
