Update:-23…
Kasak bina ruke ek sans me apni baat kah gayi….. Shocked, shocked, shocked…. Sab ke sab shocked ho gaye…. Jaise abhi-abhi kisi ne pure khanḍan ko “statue” kah diya ho… jo jis mudra me the, muh khole ussi mudra me khaḍe, bas apne-apne gardan ghuma kar ek dusre ko dekh rahe the….
Himanshu….. Itna baḍa fareb, itna baḍa dhokha. Ye kya film chal rahi hai, aur hum sab kya nautanki wale haiṅ, jo bhaḍe ka pati uṭha layi. Humne tumhe support kiya, aur tumne uss ka ye sila diya. Bharosa thoḍa hai Jivisha tumne humara, bharos….
Itne me Priya, Jivisha ko ek thappaḍ lagati…. “Tumhe sharm nahi aayi aisa karte”.
Himanshu…. Koi kuch nahi bolega, sab log apne-apne kamre me jao. Tumne humara viswas toḍa hai Jivisha. Aur tum mr fraud, kitne paise ki deal hui thi Jivisha se, wo paise uṭhao aur chalte bano yahaṅ se.
Nischal…. Ram, ram uncle ji. Main bikau nahi huṅ. Chalta huṅ main…
Nischal uss ghar se nikal gaya. Uss ghar ka mahol kafi shant-shant ho gaya. Ek khamosh si raat ho jaise, jise sab aakhon me kaṭ rahe the. Jivisha ke natak se aaj tak sab hase he the, lekin pahli baar sab dil se roye the aur unka bhadosa toota tha.
Har toofan kuch der ke liye aata hai aur fir un kuch he paloṅ me bahut kuch tabah kar ke chala jata hai. Jivisha ke sath bhi aisa he kuch hua. Uss ne palaṭ kar ek baar bhi Kasak se ye nahi pucha ki uss ne sab ko sachai kyoṅ bata di. Wo sayad samjh chuki thi ki aaj na kal… kabhi na kabhi iss jhuṭh se parda uṭh jata, aur jab kabhi bhi ye parda uth’ta, aalam yahi hona tha.
Idhar Nischal uss ghar se to nikal raha tha lekin jaise-jaise wo Jivisha se dur ja raha tha, usse kuch adhurapan aur akelapan sa mehsus hone laga tha. Thik ussi prakar ka anubhaw jis prakar ke anubhaw ke sath wo prithvi par aaya tha…
"Are suno to Nischal, kahan ja rahe ho, ruko to"… Nandni usse piche se awaz lagakar rokne ki kosis karne lagi, lekin Nischal apni dhun me chala ja raha tha. Tabhi Nandni ne apni car start ki aur teji se uske aage khadi ki… car ka darwaja kholti.. "Baitho"..
Nischal:- Koi baat nahi hai Nandni, tum jao main chal jaunga.
Nandni apni ghurti najron se usse dekhti hui… "Ek baar se samjh me nahi aata kya? Chupchap baith jao"
Nischal uski baat sunkar muskurate huye baitha… "Tum kya pagal ho Nandni, yahan log alian ke bare me sunege to daurne aur bhagne lagenge, aur ek tum ho"..
Nandni:- Wo sab chhodo aur pahle mujhe ye batao tumhare hathon ka zakhm kaisa hai. Tumhari to dayen ore ki haddi, pasliyan aur na jane kya-kya damage ho gaya hoga… fir bhi tum uss din hopital se aane ke baad, sab ke sath aise khade the jaise kuch hua hi nahi.
Nischal:- Isme kaun si badi baat hai. Abhi fir waise hi kat do, 1 ghante me thik ho jaunga aur kuch dino mein pura recover. Jaise yahan bimari hai aur ilaz ke liye treatment hai, thik waise hi humare yahan bhi hai. Bahut jyada se jyada mujhe Jaal Mahal me 2 din ke liye rukna para tha, jab main gambhir rup se ghayal hua gha…
Nandni aaschrya se apni aakhen phade… "1 ghante mein hi tumhare yahan aise chot thik ho jate hain?"
Nischal:- Haan, emergency ke liye main dawa lekar chalta hun. Kyon tumhare yahan kitna waqt lagta hai?"
Nandni:- Luckey raha to jinda bach jayega warna ram nam satya hai, aur tum puch rahe ho kitna waqt lagta hai.
Nischal:- kya baat kar rahi ho. Itne ke liye mar jayega. Humare yahan kisi ko marna ho to use bus Jaal Mahal tak nahi pahunchne do, warna uski shwans bachi hai to bachna to tay hai uska…
"Utro hum pahunch gaye".. Nandni car park karti hui kahne lagi aur Nischal samne ke apartment ko dekhne laga… "Hum se kya matlab Nandu"..
Nandni, Nischal ko aage dhakelti hui kahne lagi… "Tum yahan rahoge mere sath… ab chalo"..
Nischal:- Suno to chhodo bhi. Ek anjan rahon me kahin mil gaye.. raste me milne wale ko ghar nahi laya karte.
Nandni:- Sandal nikal kar marna shuru karungi to ye sari hoshyari bhul jaoge.. ab chalo chupchap.
Dekha jaye to Nischal aur Nandni ki ye dusri hi mulakat kahi ja sakti thi, lekin Nandni ko khud bhi pata nahi tha ki wo Nichal ke liye ye sab kyon kar rahi, bus dil ne kaha aur usne dil ki suni.
Waqt bit’ta gaya, log normal huye par uss toofan ka asar sab ki zindagiyoṅ me aa chuka tha. Jivisha se sabhi log lagbhag kate-kate se rahne lage. Aur fir Himanshu ne ye tay kiya ki Jivisha ki shadi ussi ladkey se dobara karwayi jaye. Issi silsile me Himanshu ne apne dost Punaya aur uss ke bete Shresh ko kal apne ghar bulaya.
Raat ka waqt, Jivisha aur Kasak apne kamre me leti hui thi, tabhi wahan Abhinash aaya. Usne darwaza knock kiya, Jivisha darwaze par aayi aur Abhinash ko dekhti puchne lagi….. “kya hua bhaiya”
Abhinash ek tak Jivisha ko dekhta raha, aur dekhte he dekhte uss ke aanshu chhalak aaye. Apne bhai ko achanak rote dekh Jivisha ko kuch samjh me nahi aaya, wo uss ke aanshu pochhte puchne lagi… “kya hua bhai”
Abhinash….. Tu khamosh bilkul achhi nahi lagti. Jo ho gaya usse bhul ja na…
Jivisha….. Achhi he huṅ main bhaiya, aap itna senty kyoṅ ho rahe haiṅ. Maine jo kiya uss ke liye main yahi deserve karti huṅ. Jaeye aap so jaeye.
Abhinash, Jivisha ke sir par hath ferte…. “chahe kuch bhi ho jaye main tumhari haṅsi wapas lauṅga.…. Filhaal to ye shadi nahi ho sakti, aur tab tak nahi, jabtak ki tum wahi khili hui Jivisha na ho jao jaisa pahle thi. Chalta huṅ main ab.
Avinash ki bateṅ sun kar usse bhi rona aa gaya. Jivisha apne aanshu chhipati chupchap apne bistar me chali gayi. Bistar par Kasak bhi leti thi jo khamoshi se dono bhai-bahan ki bateṅ sun rahi thi. Kasak raat ko aur gahra aur andhere hone ka intzar karne lagi.
Lagbhag 2 hafte ho gaye the Nischal ko ghar chhore. Nischal aur Nandni tab se sath me he the. Nandni ko ab bhi samjh me nahi aa raha tha ki aakhir uss din ye sab hua kaise… wo baar-baar Nischal se kahti ki usse Jivisha se ek baar baat kar leni chahiye. Aur Nischal har baar ek he jawab deta…. “Main he jabardasti uss ki life me ghusa tha, ab sari bateṅ khatam hai… main bas ab wapas jana chahta huṅ”
Iss ghaṭna ke baad se Nischal ab sirf apne grah par wapas lauṭne ka soch raha tha. Raat ke takriban 2 baje honge, jab wo Puṇe ke kisi gali me bhaṭak raha tha, aur ye soch raha tha ki kaise apne device ko fir se active kar le. Jab se Jivisha uss ke life se gayi thi, jitna karib wo uss device ko active karne liye pahuncha tha, ab uss se kahin jyada dur ho chuka tha…
Nischal saḍak par chalte huye ek cane ko laaṭ marta…. “Sali apni zindgi bhi aisi he ṭhokaroṅ me hai… kabhi udhar se usne laaṭ maar kar idhar mujhe fek diya, to kabhi idhar se kisi ne laaṭ mar kar udhar fek diya”.
Nischal apne upar he hasta bas chala ja raha tha…. Na to koi khyal tha aur na he koi soch, bas raat ke andhere me chala ja raha tha… tabhi achanak unhi saḍkoṅ par usse laga ki Kasak ja rahi hai. Nischal, wo to bilkul shocked ho gaya….
Kasak bari teji se aage baḍh rahi thi sath me idhar-udhar najar bhi daura rahi thi, kahin usse koi dekh to nahi raha. Andheri galiyoṅ se hoti hui wo Shresh ke ghar pahunch gayi. Ghar me pahuṅchte he usne apne sir se hood haṭaya…..
Nischal baḍe he atihat se Kasak ka picha karte uss ghar tak pahunch chuka tha. Kisi ko bhi aabhash nahi tha ki Nischal, Kasak ka pichha karte yahaṅ tak pahunch gaya hai…. Kasak jaise he wahan pahuṅchi, usse kuch logoṅ ne gher liya.
Aapas me sab logoṅ ki kya bateṅ ho rahi thi kuch pata nahi chal raha tha. Kasak thodi der wahan ruki, sab se kuch bateṅ ki aur wapas laut gayi. Nischal ne iss baar Kasak ka picha na karte huye uss ghar ko achhe se dekhne laga…..
Jald he wo pure ghar ki janch-paṛtal karne ke baad wahan se bahar nikla aur sidha Nandni ke pass pahunch gaya. Raat ke takriban 3 baje, Nandni aaram se apne bistar me leti thi. Nischal uss ke kandhe ko hila kar jagane laga…. Nandni chaunki…. “Bhut, bhut, bhut” chillati wo uṭh kar baiṭh gayi.
Nischal…. Arre main huṅ Nischal shant ho jao….
Nandni pahle to butt ban kar Nischal ko ghuri, fir khud ki haalat ka gyan hua…. Wo apne sine ko hathoṅ se cover karti… “Gadhe, bhago yahaṅ se… tamij nahi tumhe ki raat ko kisi laḍki ke kamre aise chori se nahi aate”
Nischal….. Haaṅ ṭhik hai, waise bhi jo tum chhipa rahi ho, net par bahut khula dekha hai… aur haaṅ mujhe tum me waise bhi koi interest nahi. Lekin tum kyoṅ ye bhul jati ho ki yahaṅ koi laḍka bhi rahta hai. Aise ardh-nang ho kar to soya na karo.
Nandni…. Nischal ab chup ho jao, warna main tumhara sir phod duṅgi.
Nischal…. Achha khud ko ṭhik karo, mujhe tum se kuch jaroori baat karni hai…
Nandni…. Haaṅ bolo main sun rahi huṅ….
Nischal…. Kewal kuch kahna hota to main subah tak ruk sakta tha, kuch dikhna bhi hai…
Nandni, ghaṛi me waqt dekhti….. “Abhi, iss waqt… tumhe mujhe kuch dikhana hai. Pagal ho gaye ho, jao mujhe sone do, subah baat karenge”.
Nischal…. Haaṅ, abhi aur iss waqt tumhe chalna hai… ab chalo bhi, subah tak nahi ruk sakta.
Nandni…. Main kahin nahi jane wali, mujhe abhi sona hai, good night. Tum bhi jao.
Itna bol kar Nandni ne apne upar chadar ḍala aur aakhen band kar ke so gayi. Nischal usse teen char bar joṛ-joṛ se hilaya, par wo jarra bhi ṭas se mas nahi hui. Mahol shant ho gaya tha. Thoḍa waqt intzar karne ke Nandni chain ki sans leti chadar se muh bahar nikal kar dekhne lagi….
Dekhte he usse rone jaisa man karne laga….. Nischal ṭhik uss ke aakhon ke samne khadey ho kar balti me pani liye tha…. “Nandu aakhri baar kah raha huṅ uṭh jao warna main pani dal duṅga”
Nandni, ṭhunakti hui…. “Unnhhhhhh, hunnnnnn, hunnnnnn…. Mammiiiii”
Nischal….. Chacha, mama, fufa tau… sab raste me kar lena, ab chalo…
“Chhapaak” aur apni baat bol kar Nischal ne uss ke upar pani dal diya….”Kamina kahin ka, uth to rahi thi main, fir pani kyoṅ ḍale. Ab bahar jaoge, to na main taiyar ho kar hall me aauṅgi”
Nischal….. Party me nahi jana hai jo taiyar ho kar aaogi… jaldi se kapdey dalo aur bahar aao… 5 min se jyada waqt laga to main ander aa jauṅga….
“Ajib musibat hai” … kahti hui Nandni washroom me gayi aur Nischal bahar hall me chala aaya… 10 min ke baad Nandni bhi hall me aayi aur kafi ġussa dikhati…. “Chalo, kahaṅ marne chalna hai”
Nischal, Nandni ko le kar ussi gali me chal diya jis gali se Kasak gujri thi. Colony ke aakhri me ek baḍa sa makan tha. Nischal, Nandni ko le kar uss makan me pichhe se dakhil hone wala tha…
Nandni, fusfusati…. “Hum yahaṅ kya chori karne aaye haiṅ”
Nischal….. Shiiiiiiiiiii ! Jarra bhi awaz mat karna… yahiṅ tumhe kuch dikhana hai…
Nandni…. Ṭhik hai ander chalte haiṅ… lekin main itni uṅchi diwar kaise kuduṅgi, iss ke upar to bar bhi laga hai.
Nandni bol kar Nischal ko dekhne lagi… Nischal muskurate huye Nandni se kaha…”Tumhare urrne ka samay aa gaya hai” …. Nandni jab tak Nischal ke batoṅ ko samjh pati tab tak uss ke muh par tight rumal bandh gaya tha aur Nischal ne usse kisi ball ki tarah hawa me uchhal kar uss paar fenk diya.
Ander se Nandni chinkh aur chilla rahi thi. Khud ko jamin par girte dekh uss ki aakhen band ho gayi… aur jab aakhen khuli to wo Nischal ke gode me safely land kar chuki thi…
Nandni ki shwans chadh aayi thi, kaleja jor-jor se dharak raha tha… bina kuch soche wo Nischal ko marne lagi. Nandni chikhna to chahti thi, par Nischal ne usse apne muh ka kapḍa haṭane nahi diya. Kuch der baad jab wo normal hui to Nischal ne uss ka muh khola…
Nandni, fusfusati….. “Kaminey mera heart-aatack ho jata, tum ek masoom si laḍki ke sath aisa kaise kar sakte ho”,
Nischal…. Itihas gawah hai ki aaj tak kabhi kisi ko ladki ko heart-attack nahi hua, chaho to net par check kar lena. Chaleṅ ab concentrate kare apne kaam par…
Dono aage baḍhne lage.. Nandni…. “Bahut jyada gyan lene lage ho tum aaj kal enternet se”
Nischal, apne hathoṅ se ishara karte…. “Ab hume uss 2 manzil upar, wahan ki chhat par jana hai”…
Nandni, apna sir upar karti…. “No, no, no, Nischal tum fir se wahi karne ki sochna bhi mat. Main koi ball nahi… iss baar heart attack pakka hai”….
Nischal ne iss baar bhi kuch na suna, Nandni ke aaṅkh, muh sab bandhe.. aur jab iss baar Nischal ne Nandni ko uchhala to uṅchai 4 manzil ki thi. Upar se niche girte waqt Nandni ko aisa lag raha tha jaise wo niche ja rahi hai aur uss ke praṇ upar, lekin iss baar bhi Nandni safely land hui thi.
Bhar pet galiyaṅ, laaṭ aur baat kahne ke baad Nandni shant ho gayi aur Nischal usse siḍhiyoṅ ke raste se niche utar kar ek kabaḍ room me le gaya…. Saran si badbu, dhul miṭṭi….. “Nischal tum mujhe itna risk me dal kar yahaṅ kyoṅ laye ho.. ye kabaḍ dikhane”
Nischal, Nandni ke hotoṅ se apni ungli laga kar… “shiiiiiiii” karne laga aur hathoṅ se ishara karte kaha…. “Udhar dekho” Nischal jis ore ishara kar raha tha, uss ore dekh kar to Nandni ke hosh urr gaye… “Nischal, ye yahaṅ kya kar rahi hai”
“Nandni, yahaṅ bahut sare sawal tumhe milenge. Mujhe kuch-kuch bateṅ samjh me to aa rahi hai, lekin kuch-kuch bateṅ nahi. Kuch log aur bhi haiṅ yahaṅ par, sayad unhe tum pahchan sako. Chalo tumhe dikhata huṅ”
thanks a lot .. nischal ne bola hai.. jald hi wo milne aayega ;?
