Milan2010
Well-Known Member
- 4,854
- 3,649
- 159
AMULYA TOHFA
Year : 5020, DOME CITY
Jab garmi ka mausam aata hai toh kya haalat hoti hai yeh hum sab jaante hai, lekin agar garmi me hum peene ke liye paani naa mile toh socha hai hum insaano ka kya haa hoga..?? ab agar mai yeh kahu ki thand ke mausam me bhi sehar ka garmi ke jesa tapmaan ho toh kya hoga..?? yeh toh sochkar hi hume dar lagta hai..lekin dome city me aaj bhi temperature 65 degrees ki paar chala gaya hai..aur tapte suraj ki gamri se bachne ke liye koi paid dur dur tak Dome City ke sadako par nahi dikhayi de raha tha
Sehar ki tuti futi sadako par ekdum sannata pasra hua tha, insaan toh dur ki baat thi..koi parinda tak najar nahi aa raha tha..aur yeh tuti hui sadke garmi me ubal rahi thi..suraj apna prakoop pura taraf se dharti par faila chukka tha
“aaahhhhh, aaaahhhhhh, aaahhhhhhhhhhhhhhhhh ahhhhhhhhhhhh” gehri gehri saanse lete hue ek ladki jameen par rengte hue aage badh rahi thi..uske haath bahut hi joro se kaamp rahe the..aur apni ardh khuli hui aankhe sahare hi voh aage badhne ka prayatna kar rahi thi
Apne niche rahi garam se bhi garam sadak aur upar asmaan se aa rahi suraj ki voh bhayanak kirno se uss ladki ka bura haal tha, garam tapmaan ki se uss ladki ka bura badan pasine se bheeg gaya tha, aur pasine ki vajah se zameen par padi dhul uske sharir se jaa mili thi..lekin fir bhi voh bina haar maane aage badhti rehti hai
Gale me sukhpan aur tapti garmi se ab uski aankhe uska saath chod rahi thi..lekin voh apni manjil se pehle aankhe band nahi karna chahti thi..himmat naa harkar aakhir kaar badi muskil se voh apne mukaam par pahuch gayi thi..ek building ke aad me rahe paani ke naal ke pass voh ese hi rengte hue pahuch jaati hai
Usne bina apni najre upar uthaye apne haath ko uss nal par rakha aur nal ko ghumate hue usne apna chehra thik nal ke niche rakh diya…jab insaan ko pyaas lagne par paani ka nal dikhta hai toh uske hoth paani pee ne ke liye apne aap hi khul jaate hai..yaha bhi iss ladki ke saath yahi hua..uske hoth iss aas me khul jaate hai ki ab use paani peene milega..lekin Dome city ke haalat toh kuch alag hi hai..lekin itni mehnat ke baad bhi uss ladki ko sirf nisraha hi haath lagti hai
Naal ke pura khulne ke baad bhi usme se paani naa aata mehsoos kar voh apni aankhe kholti hai..lekin asmaan me suraj ki garam roshni ki vajah se uski aankhe khulne se pehle hi band ho jaati hai..jiske baad ek choti si paani ki bund uske chehre par tapak ti hai jiske saath hi voh ladki vahi par behosh hokar gir padti hai
2 Years Ago
“abe saaale tu kar kya raha hai..??” ek ladka apne dost ke sar par maarte hue kehta hai jo iss waqt computer ke samne baithe hue kuch dekh raha tha
“bas yahi soch raha hu ki hum apne ghar ko kabhi pehle jesa bana bhi payenge yaa nahi..??” usne kursi par piche tek lagakar angdayi lete hue kaha
“kya matlab hai tera..??” voh dusra ladka bolta hai
“deval, tuje pata hai hamari earth ek waqt par aag ka gola hua karti thi..??”
Deval “haaa janta hu, jab hamare solar system ka janam hua tab pruthvi ek aag ka gola hi thi, par tu yeh kyu puch raha hai..??” ne apne kandhe upar karte hue kaha
“aisa lag raha hai jese hamara atit firse laut aaya hai” usne apne kamre me lage AC ki aur najar daalte hue kaha
Deval “sarthak..tu hamesa yahi sab sochte rehta hai..??”
Sarthak ne apne haath me pehni ek device se AC ki tarah ishara kiya, jiske baad AC ke panel par 25 degree likha hua aagaya, “kuch toh karna hi hoga..agar aisa hi chalta raha toh insano ka vajood hi meet jayega”
Deval “haa mere bhai, mai janta hu..par filhaal toh hum iss waqt kuch nahi kar sakte..atleast agle ek saaal tak toh kuch bhi nahi”
Sarthak chalte hue kamre ki khidhke ke pass jaata hai, aur khidke par lage parde ko apne haatho se hatate hue bahar ki aur dekhne laga
“aur yeh ek saal hi toh nikalna muskil hone vaala hai” voh apne chehre se ishara karte hue kehta hai “yeh dekh raha hai, suna hai ek waqt aisa bhi tha jab humari pruthvi ke mbar ka rang nila hua karta tha..lekin waqt ke saath asmaan ne apna rang badalkar pila kar diya” karib 150th floor ki unchayi se voh upar asmaan ki aur dekh raha tha jo halke peele rang ka dikhayi de raha tha
Deval bhi uske pass aata hai aur bahar dekhte hue “aur yeh sab hamare purvajo ki vajah se hua hai..yeh asmaan hume yeh yaad dilate hai ki insaan ne kabhi kudrat ki kadar nahi ki…hamare ancestors ki laparwahi ka anjam hume bhugatna pad raha hai”
Sarthkar uss parde ko band karte hue vapas uss kursi par aakar baith jaata hai, aur samne screen par chal rahi news ko dekhne laga
News channel par ek AI robot aaj ki khabar suna raha tha, AI “aaj ka temperature 75 degree ke karib pahuch gaya hai, badhti garmi aur paani ki tablets naa hone ke karan aaj 6 logo ne aapni jaan gaayi hai” jiske baad sarthak apni ungli ke ishare se uss screen ko band kar deta hai aur vahi kursi ke headrest par apna sar rakhte hue aankhe band kar deta hai
Deval bhi uss khabar ko sunkar bina kuch bole dusre kamre me chala jaata hai, jaha par ek rectangle shape ki device rakhi hui thi, uss device par rahe kuch buttons ko dabata hai..jiske baad uss machine se kuch tablets bahar nikalkar aati hai jise deval lekar khaa leta hai, aur fir vahi se chillakar kehta hai “sarthak, paani ki tablets khatam ho rahi hai..we need to get some more”
Sarthak vese hi apni aankhe band kiye hue kehta hai “fir toh bura hua..suna hai aaj market me bhi paani ki tablets nahi aayi, aur shayad aane vale agle 2 dino tak yeh tablets nahi mil sakti”
Deval apni aankhe band karte hue gehri saans leta hai apne aap se kehta hai “kaash ke aaj paani hota..kaash aaj bhi baarish ho rahi hoti toh shayad yeh din hume kabhi nahi dekhna padta”
Fir voh chalte hue bahar vale kamre aata hai aur bed par baithte hue kehta hai “tuje kya lagta hai yaar, kya hum kabhi paani ko dekh payenge..??”
Sarthak “haa kyu nahi, humare pass paani ki bahut si tasveere hai”
Deval thoda sa chidte hue bola “mera matlab asal paani se tha, jab se janam liya hai sirf inhi tablet par jinda hu..paani ke baare me sirf kahaniya suni hai”
Sarthak “yaar kitna acha hota na agar aaj baarish ho rahi hoti..hum bhi apne bachpan me kagaj ki naav banav kar paani se khelte, hume bhi naahne milta”
Deval “haa yaar, yeh saala spray daal-daalkar dimaag kharab ho jaata hai, jabse tune yeh bataya hai ki log pehle paani se naahte bhi the”
Tabhi unke room ke bahar kisike aane ki notification aati hai, deval uss notification ko dekhkar apne haath se darwaaze ki taraf ishara karta hai, jiske baad voh darwaaza gayab ho gaya aur bahar se do ladkiya kamre me aati hai
Pehli ladki “yeh kya haalat bana rakhi hai tum dono ne” unn dono ko dekhte hue kehti hai
Deval “kuch nahi aashi, bas paani ke baare me soch rahe the”
Dusri ladki “maine kaha tha Rupal, inn dono ke pass paani ki tablets nahi hogi”
Rupal “yeh dono hai hi nikamme..isiliye humne tablets ko pehle se lekar rakha hai”
Deval “yeh na bhulna ki hum vahi nikaamme hai jo uss sapne ko hakikt me badal ne vaale hai jo aaj har ek insaan dekhta hai”
Aashi “matlab..??”
Deval “humne ek tarika socha hai..agar voh kamiyab hua toh hum bhi paani ka luft utha payenge..paani ko apni aankho se dekh paayenge, use apne chehre par mehsoos kar payenge”
Aashi “impossible, paani ko hum insaan kabhi nahi dekh paayenge”
Rupal “agar maan liya ki hum paani ko dekh payenge, jo ki impossible hai..toh yeh kaam tum dono kese karne vaale ho…??”
Deval “baith jao, sarthak sabkuch bata dega” jiske baad voh dono ladkiya bhi vahi bed par baith jaati hai
Sarthkar apni round chair me ghumte hue aashi ko ek pal ke liye dekhta hai, fir “paani kese aayega yeh jaan ne se pehle hume yeh jaana jaruri hai ki paani ka janam kese hua tha”
Paani..jise hum JAL bhi kehte hai ya kehte the naam toh kahi saare hai..lekin uska udasya sirf ek..JEEVAN, jeevan ki shuruwaat hi paani se hui thi..aur yeh irony hai ki jeevan ka ant bhi paani se hi hoga…Jab paani dharti par aaya..uske baad hi jeevan ki shuruwat hui…aur aaj jab paani khatam ho raha hai toh saath me jeevan ka bhi ant ho raha hai
Kehte hai ki shuruwat me brahmand me pehle kuch nahi tha, sirf ek single point jiske bikharne par hamara universe ka janam hua, jise insaano ne BIGBANG ka naam diya, uske baad jab hamare solar system ka janam hua uss waqt dharti ek aag ka gola hua karti thi
Uss waqt dharti jeene ke laayak nahi thi..yeh bhi kehte hai ki shuruwat me jab brahmand ka nirmaan ho raha tha tab haroj ke kitne hi ulka dharti se takraate the, kitne hi iss aag ke gole me bhasm ho jaate the..kuch waqt ke baad ek mangal grah ke jitna bada asteroid hamari pruthvi se aa takrata hai jis vajah se dharti ka ek bada hissa alag ho gaya..jise insaano ne chand ka naam diya
Uss asteroid ke takrane ki vajah se dharti apne hi axis (aksh) par 23 and half degree juk gayi..lekin iss ghatna ke baad hamri pruthvi ko ek naya janam mila..voh apne hi aksh par ghumna shuru kar deti hai jiske baad pruthvi par din aur raat hone lage
Lekin shuru me din 24 hours ke nahi hue karte the, uss waqt dharti ke apne axis par ghumne ki raftar bahut tej thi jiss vajah se din mehaj 4 ghante ka hua karte the…jese jese waqt badhta gaya vese vese pruthvi ke ghumne ki raftar kam hoti chale gayi..aur din ki avdhidhi hoti gayi, aaj hamara ek din 24 hours ka hota hai..aur aane vaalo 200 million saalo me yeh badhkar 25 hours ka ho jayega..lekin yeh sab jaanna utna jaruri nahi hai
Jab srishti ki rachna ho rahi thi uss waqt space me dust clouds hua karte the..jisme hydrogen aur oxygen ke atoms (kan) maujud rehte the..aur itna toh hum jaante hai ki paani inhi do vastuo se bana hua hai, inn dono particles aapas me judakar paani bante hai..lekin space ke extreme cold temperature ki vajah se voh paani dust particles ke saath judkar ice crystals ban gaye jo ulka ke roop me dharti par aa baraste
Jiske baad dheere dheere karte hue pruthvi thandi ho gayi aur ek naye yug ki shuruwat hue, dharti par sabse pehla jeev paani me bacteria ke roop me janma tha jo waqt saath khud ko vikshit karte rahe aur dheere dheere karte hue duniya me alag alag jeevo ka nirmaan hone laga
Kuch bacterias paani me reh gaye aur kuch paani se baahar jamin par aagaye aur fir shuruwat hui hamare purvajo ki jo waqt ke saath vikshit hokar insaano ke roop me samne aaye..lekin hamesa se yeh haalat nahi the jo aaj hai, insaano ne paani ko dekha bhi tha aur unke saath voh rahe bhi the
Khud ko viksit karte karte insaan ne bahut si chize banayi..gaadiya buses, trains, jets aur bhi bahut kuch banaya jo kabhi indhan se chala karte the, lekin waqt ke saath saath indhan bhi khatam hone laga, tab insaan ne paani ka sahara liya..apne haroj ki jindagi me istemaal me hone vaale upkarno me indhan ke roop me paani ka istemaal hone laga, khud ko khush rakhne ke liye insaan ne jungle ke jungle tabah kar diye..jiske chalte prithvi par baarish kam hoti chali gayi..aur ek waqt aisa aaya ki dharti ne baarish ko dekhna hi band kar diya
baarish hone ke liye bhi toh paid podhe hone chahiye, aur paid podho ke liye paani hona chahiye..lekin aaj toh hamare pass dono mese kuch bhi nahi hai..dharti par keval 7% paid podhe reh gaye hai, duniya ki har ek nadi..har ek taalab sukh chuke hai, saara ice glaciers bhi pighal gaya hai..yaanha tak ki samundar me keval 11% paani bacha hai..aur use laane ke liye haroj hajaro kilometers dur jaana padta hai
Jab insaan ko yeh samaj me aaya ke paani hi jeene ka ek matra tarika hai toh apni technology ka prayog karke yeh water tablets banayi, isme paani ke kuch avsesh toh jarur hai…lekin real paani nahi hai, jinda rehne ke liye paani ki jagah insaano ne inn tablets ka shaara liya
Insaan Aaj ke jitna bebas kabhi nahi hua, jine ke liye hume paani ki tablets leni padti hai..saans lene ke liye yeh machino ke dwara banaya gaya oxygen lena padta hai, aaj pruthvi par iss 10 km diameter ke chote se DOME CITY me kuch gine chune log reh gaye hai
paani ki tablets banane ke liye bhi paani ki jarurat toh padti hi hai..aur insaan aaj itna taqatwar nahi raha ki voh khud chalkar paani le aaye..agar insaan DOME city ke bahar ek kadam bhi rakhta hai toh bahar ki garmi aur pradushit vatavaran se hi mar jayega, isliye hum inn robots ka istemaal karke paani laate hai aur technology ki madad se iss water tablets ko banate hai
250 saal..dharti par aakhri baarish ke hue aaj 250 saal pure ho gaye hai, lekin pehle bhi haalat ache nahi thi..akhri baarish jo keval kuch bundi ki hui thi aur voh bhi mahej 2 minutes ke liye, uss din ke baad hum mese kisine bhi paani ke asli roop ko nahi dekha..atleast apni aankho se toh humne kabhi nahi dekha
Deval “yeh toh paani aur hamari pruthvi ka itihaas tha..lekin isi itihaas me bhi ek sawaal hai..aur vahi sawaal hamara jawab bhi hai”
Rupal “aisa toh kya hai jo sawal bhi hai aur jawab bhi” usne sawaliya bhari najro se dekhte hue pucha
Deval “yahi ki agar dharti aag ka gola thi toh voh paani kese bacha..?? use toh jhal kar bhasm ho jaana chahiye”
Rupal “haa par isska jawab se kya relation” voh dono ladkiya abhi bhi nahi samaj rahi thi
Dharti par paani aane ke liye Ice-crystals sirf ek jariya nahi tha, space me maujud asteroids ek prakaar se minerals hai, jiske andar bhi paani ke avshesh rehte hai, jab yeh asteroids lakho crores ki taadat me dharti par gir rahe the, tab unnme mujud paani bhaamp bankar upar asmaan me jama hone lage jo aage chalkar paani ke baadalo me tabdil hone lage
suraj se naa jyada dur aur naa hi jyada kam duri par hone ki vajah se yeh baadal hamare hi vatavaran me milkar reh gaye jo aage chalkar baarish ke roop me asmaan se vapas dharti par girne lage..lakho saal tak lagatar ho rahi baarish, ulka pind ke roop me aa rahe ice-crystals aur lagatar asteroids ki madad se dharti dheere dheere karte hue thandi padne lag gayi
Aashi “par deval, hamare pass laakho crores saal nahi hai..hum utne saal jinda nahi reh sakte..hume paani ki jarurat aaj hai, insaano ke khatam hone ka baad toh vese bhi paani ki jarurat nahi rahegi”
Sarthak “haa hamare pass itne saal nahi hai, hum sab marne vaale hai..lekin atleast hum iss dharti ko itna toh lauta hi sakte hai jo humne dharti se chhina hai”
Aashi “ab tu yeh naa bolna ki hume dharti par asteroids girane hai”
Sarthak “nahi aashi, hume aisa kuch nahi karna hai, tuje pata hai..itna sab kuch hone ke baad bhi, hamare iss khubsurat dharti ko ek banjar jameen banane ke baad bhi yahi dharti hamari madad karegi”
Aashi “kese sarthak..??”
Deval “itna temperature hone ke bawjood bhi hum jinda reh paa rahe kyu..??”
Aashi “kyunki humne ek dome ke andar khud ko band kar diya hai..taaki yaha jo kuch paid hai unhe hum jinda rakhkar unke oxygen ka istemaal kar sake”
Deval “bilkul sahi kaha, ab sirf yahi koi 300-400 log aaj iss darti par bache hai..hamare pass rahe resources khatam honi ki kagar par hai..lekin hamara atmosphere aaj bhi dharti ke asmaan se bandha hua hai..aaj bhi asmaan me hydrogen atoms helium ke roop me maujud hai, oxygen carbon-dioxide ke roop me maujud hai, hume bas unn hi ki madad se paani ko firse banana hoga”
Aashi “haa jaanti hu..lekin mere kuch samaj me nahi aaraha..??”
Sarthak “hum pure earth par ek saath paani nahi laa sakte..hamari dharti ab puri tarah se ek registan ban chuki hai..temperature 100 degree se bhi paar ho gaya hai..lekin aaj bhi ek jagah esi hai jaha par temperature 35 degree hai..lekin vaha jeene ke liye kuch nahi hai”
Rupal “Antarctica, hamari earth par jo paid bache hai usme se 80% paid sirf vaha maujud hai”
Sarthak “exactly rupal, itne saaalo se jama hua dust..carbon dioxide hi hamari ek aakhri ummid bacha hai, hum antarctica par ek aisa DOME banana jaa rahe hai jaha par paani ke baadalo ko jama kiya jaa sakte hai, yeh dome antarctica ko dharti ke pradusan se bahaye rakhega aur dust particles ki madad se baarish karwaenge…fir ek baar iss dharti ka naya janam hoga..jindagi ki fir ek baar nayi shuruwat hogi”
Aashi chalte hue sarthak ke pass aati hai aur uska haath pakadte hue “yeh tu kese hoga..??”
Sarthak ne aashi ki aankho me dekhte hue kaha “hum ek aisi jung lad rahe hai jisme ab tera mera, tu mai nahi raha..ab waqt aagaya hai hum bankar jeene ka, aur hum bankar hi iss ladayi se ladne hoga”
Aashi fir ek pyaari si smile dete hue sarthak ke gale lag gayi “hum yeh ladayi jarur jeetenge”
Lekin vahi Sarthak ke aankho me kuch chupa hua tha..aur yeh baat uski behen Rupal dekh leti hai “bhai, tu kuch chupa raha hai, haina..??”
Iss sawal ka jawab sarthak nahi de paata, isliye Deval ne rupal ke sawal ka jawab diya “problem yeh hai ki ab hum log yanha par nahi reh sakte, aur pure antartica me dome banne me ek saal ka waqt lag jayega”
Rupal “ise tension lene vaali kya baat hai..i mean hum 1 saal ke baad toh vaha jaa sakte hai”
Sarthak “rupal..yeh itna aasan nahi hai, dome ke banne ke baad usme hum log ek low atmosphere pressure create karenge jiss vajah se bahar ke saare dust particles dome me aa sake”
Aashi “par sarthak, agar dust particles andar trap ho gaye toh hum toh ese hi mar jayenge”
Sarthak “nahi aashi, dome ke saath ek filter laga hoga.jo keval unhi atoms ko andar aane dega jiski hume jarurat hogi, dome banne me ek saal ka samay lagega, aur uske ek saal ke baad hume intezaar karna hoga andar ka vatavarn ke stable hone ka, ek baar vaha baarish shuru ho jaati hai uske baad hi hum vaha par rehne ke liye jaa sakte hai..lekin” voh bolte hue ruk jaata hai
“Lekin kya..??” rupal ne sawaal kiya
Deval “lekin hum sab log ko vanha nahi le jaa sakte, hum sirf 100 log hi vaha jaayenge..aur uske baad hume pehle ke jese ek normal ek saada jeeven bitana hoga..jaha koi AI nahi hoga, koi robot nahi hoga..kuch hoga toh sirf hamara saath aur kuch bhi nahi”
Yeh sunne ke baad vaha kuch der ke liye shanti chaa gayi thi, Aashi “tum dono yeh kab se kar rahe ho..??”
Deval “mai aur sarthak iss par 5 saalo se kaam kar rahe hai..humne tumhe pehle isliye nahi bataya kyunki hum khud sure nahi the ki yeh kese hoga…lekin ab waqt aagaya hai hamare plan ko execute karne ka...sarthak ne already dome banane ka kaam shuru kar diya hai..bas hume do saal ka wait karna hai, uske baad hum yaha se hamesa hamesa ke liye chale jayenge”
Present
Aaj iss sehar me rehna ka Sarthak aur uske dosto ka aakhri din tha, Sarthak ne Antarctica ka dome bana diya tha..aur ab waqt aagaya hai ki insaan hamesa hamesa ke liye iss technology ki duniya ko alwida keh de..sarthak ne seher ke command center me jaakar duniya me maujud har ek AI, har ek robots ko self destruct kar diya..dharti ke chakkar laga rahi har ek artificial satellite aaj tabah hokar duniya ke alag alag hisso me tutkar bikhar gayi
Apna kama khatam karne ke baad Sarthak ne apni aankhe band kari aur khud se baat karne laga “alwida, agar mera experiment kamiyab hota hai toh insaan ka vajood jinda rahega..varna iss duniya se insaan ka aaj ant ho jayega”
Itna kehne ke baad sarthak uss command center se apna jet lekar nikal jaata hai, ki tabhi uski najar raste me ek ladki par padti hai jo uss command center me maujud ek paani ke nal ke pass leti hui hai
Voh apni jet rokkar uss ladki ke pass aata hai aur jab uski nabz dekhi toh sarthak ko samaj ne me der nahi lagi ki yeh ladki paani naa milne ki vajah se behosh hui hai…voh fauran apni jeb se paani ki tablet nikalkar uss ladki ke mooh me rakh deta hai..jiske kuch der ke baad voh ladki ko hosh aajata hai
Sarthak “tum yaha kya kar rahi thi..?? yaha insaano ka aana mana hai”
Voh ladki “jaanti hu sir, lekin aaj yaha par hamara aakhri din hai..aaj ke baad paani milna band ho jayega..kahi log apni marjee se marna pasand kiye the..lekin mai darasal apne bache ke liye paani lene aayi thi..meri saari tablets khatam ho gayi..aur mai apne bache ko khoona nahi chahta..muje laga shayad muje thoda sa paani mil jaayega..kyunki koi bhi muje paani ki tablets dene ko taiyaar nahi hai”
Yeh sunkar sarthak ko bahut hi tejj gussa aata hai, Sarthak uss ladki ki aur dekhkar kehta hai “tum fauran apne bache ko lekar ship par aajao, mai tumhe tablet de dunga” uske baad sarthak teji se apni jet udate hue vaha se nikal jaata hai
Voh apne ghar pahuchkar chalti hui jet se kud jaata hai, aur voh jet aage jaakar ek building se jaa takraya aur ek blast ke sath voh jhal gaya..sarthak gusse se chalte hue apni banayi hui ship ke andar chala jaata hai, aur yeh dekhkar Aashi bhi uske piche piche aajati hai
Aashi ne dekhka ki Sarthak gusse me apne haath ko ship par maar raha hai, voh daudte hue sarthak ke pass jaati hai aur use shant karate hue kehti hai “sarthak, kya kar raha hai tu”
Sarthak “mai galat tha aashi..mai hamesa se galat tha”
Aashi “kis baare me..??” voh thoda dar rahi thi
Sarthak “insaano ko bachane ka koi fayda nahi hai..hume mar hi jaana chahiye”
Aashi “par hua kya hai..kuch toh bata”
Sarthak “chahe maut bhi samne kyu naa aajaye..insaan apna swarth kabhi nahi chodega..uske andar laalach hamesa basti rahegi..sach kahu toh aisa lag raha hai jese insaano ko jinda rehna hi nahi chahiye..yeh duniya sachchi me insaano ke bina hi khubsurat hai”
Aashi “tu aisa kyu bol raha hai..??”
Sarthak ne fir uss ladki ki kahani batayi, jise sunne ke baad aashi kehti hai “sarthak..marna kise pasand hota hai..jab tak hum jinda hai tab tak insaan ke mann me laalach hamesa basti rahegi..pehle paiso ki laalach thi..lekin ab jeene ki laalach hai..aaj paiso ka koi mol nahi reh gaya..lekin khaane peene ki tablelts ka mol unn paiso se bhi jyada ho gaya hai”
Sarthak udas hote hue kehta hai “toh kya kisi ko marne ke liye chod dena chahiye..?? yeh jaante hue bhi ki agar mera plan fail hota hai toh hum sab vese bhi marne vaale hai…toh kyu bas apne aakhri din me bhi ek dusre ke madad karna gunah hai..?? uss choti si nanhi jaan ki parwaah karna galat hai..?? kyu insaan hamesa sirf apne fayde dekhta hai”
Aashi “kyunki hum insaan hai..bhagwan nahi, hum insaano ki soch ko ab badal sakte hai..hum Antarctica jaakar ek nayi soch ko janam de sakte hai…tune hi kaha tha yeh ladayi kisi ek ki nahi hai..hume saath milkar rahenge tabhi iss jung ko jeet paayenge”
Iske baad sarthak kuch nahi bolta, aur kuch der baad antartica jaane ke liye aakhri bache 100 log aajate hai…Sarthak ne sabhi ko ek saath le jaane ke liye ek ship banayi thi..jisme sab baithkar teji se hawa me udte hue nikal jaate hai
City ki dome shields deactivate hote hi voh ship dakshin ki aur jaane ke liye nikal jaati hai, jese jese voh log aage badh rahe the..dharti ka ek bhayank swaroop sabhi logo ke samne aa raha tha..pichle 140 varso se ek bhi insan uss shield se bahar nahi nikla tha..yeh kehna galat nahi hoga ki abhi ship me maujd har ek insaan ka janam issi dome city ke andar hua tha
Dharti puri tarah se sukhkar ek kabristan ban chuki thi…charo taraf sirf aur sirf tuti hui imarate thi..paid podho ko toh jese naamonishan hi iss dharti par se mit gaya tha…jese jese yeh log aage badhte jaa rahe the vese vese unn sabhi ko bhayanak se bhayanak drushya dikhayi dene lagte hai..kahi par uss tuti hui imarat me bhishan aag lagi hui thi toh kahi jagah par logo ki sukhi hui laashe padi thi
Jameen par giri hui badi bai darare iss baat ki gawahi de rahe the ki insaan ne hamari khubsurat se bhi khubsurat duniya ko tabah kar diya hai..paiso aur technology ke moh me insaan iss had tak andha ho gaya tha ki use khud ke astitiva ka bhi khayal naa raha..agar insaan itna lalchi naa hota toh shayad samgra insaan aur hamari dharti ka iss prakar naash nahi hota
Voh jahaj triv gati se badhte hue hind mahasagar me aa pahuchta hai..3000 saal pehla jaha par ek vishalmay sagar hua karta tha voh ab ek sukhi banjar jamin bankar reh gaya hai…kahi jagah par choti toh kahi jagah par badi daaraare dharti ke vinash ki chavi dikha rahi thi…iss viran pade sagar me har ek jeev jantu ke kaankal uss baat ki gawahi de rahe the jo insaano ne unke saath kiya tha
Bahar ke haalat keval news me kabhi kabar dekhe the..lekin aaj voh har ek insaan jo iss jaahaj me the unn sabhi ki yeh drishya dekhkar hi rooh kaamp uthi thi..chahe voh koi bhi insaan ho..aaj sabhi ke aankho me ek samaan aansu aaye the
Karib 4 hours ki jorney ke baad inhe halka halka peele aur neele rang ka kuch dikhayi dene lagta hai, Sarthak thik uss jagah ke upar laakar ship ki speed dheemi kar deta hai, kyunki uss ship me baithe har ek insaan ke liye yeh pehla avsar tha jab voh apni hi aankho se pehli baar paani ko dekh raha tha
Tabhi ek chota bacha apni maa se puchta hai “mumma mumma, yeh kya chiz hai..??”
Iss choti si nanhi jaan ne ek aisa sawal kar diya tha jise sunkar har koi apna chehra niche juka deta tha, tabhi uski maa ne pyaar se uske mathe par haath firate hue kaha “beta, yeh Jal hai”
Bacha “yeh jal kya hota hai mumma”
Itne me hi aashi uss bache ke pass chalte hue aati hai, aur bache ke nanhe nanhe haatho ko apne haatho me lete hue kehti hai “jhal, neer, paani iske kayi saare naam hai, jab aap bade ho jaoge na tab aap khud hi samaj jaoge ki yeh sadharan si chiz nahi hai..yeh toh iss kudrat ka diya hua ek AMULYA TOFHA hai”
Jiske baad uss ship me koi kuch nahi bolta, aur voh chota sa bacha khidki ke seshe mese uss paani ko dekhte rehta hai jo antartica dweep ke charo aur ghera hua tha….karib 10 minutes ke baad voh ship ek jagah par land hoti hai..aur uske land hote hi Sarthak apni samne rahi ek transparent screen par touch karta hai jisse Antarctica ke charo aur dome shield activate ho jaate hai
Ek ek karke sab log ship se baahar aa jate hai, aaj tak insaano ne sirf imarate dekhi thi..lekin aaj yeh sabhi log pehli baar iss jungle ka luft utha rahe the..charo tarah hariyali hi hariyali thi, ek manmohak si khusbu vaha ke vatavaran ko aur bhi madhur bana rahi thi
Tabhi uss chote se bache ko ek ful ka podha dikhta hai, jiske ful par ek choti sa lekin bahut hi pyaari sa titli baithi hui thi..voh uss ful par baithe baithe dheere dheere apne paankhe hawa me lehra rahi thi, aur thik usi waqt vaha par bhi ek thandi se shital lehar sabhi logo ko apne chehre par mehsoos hoti hai..aisa lag raha tha maano voh choti si titli hi iss thandi sudh hawa ko janam de rahi hai
Vaha aaye hue logo me bahut si baate hone lagi, “maine itna khubsurat najara aaje se pehle kabhi nahi dekha” toh koyi keh raha tha “hamare ancestors kitne lucky rahe honge na, jinhone itne khubsurat jungle ko apni aankho se dekha hoga”
Tabhi sarthak ship se sabse akhir me bahaar aata hai aur uss chote se bache ke samne jaakar apne ghutno ke bal baith jaata hai, “aap jante ho yeh kya hai” use bolne me kaafi takleef hone lagti hai
Voh chota bacha naa mein apna sar hilata hai, jise dekhkar sarthak ne uske gaal par pyaar se haath firate hue kehta hai “voh titli hai..ise butterfly bhi kehti hai”
Voh bacha kabhi sarthak ki aur dekhta toh kabhi uss titli ki aur, sirf yahi nahi..vaha maujud har ek vyakti iss jagah ko dekhkar apne andar ek anokhi tagji mehsus kar raha tha
Vahi rupal ne deval ke gale lagte hue kaha “sach me, aisa lag raha hai maano hum swarg me aagaye ho”
Deval “kisi time par log dharti ko hi swarg maana karte the, aaj uss baat par yaakeen ho gaya hai sach me dharti swarg se kam nahi thi”
Aashi ne aankhe band karke upar asmaan ki aur apna chehra kiya, aur apni baanhein khole iss anokhe vatavaran ko apne rom rom me mehsus karne lagti hai, tabhi achanak se uske chehre par kuch thanda sa girta hai, jiske baad voh apni aankhe khol upar ka najara dekhkar uske chehre par khushi ki lehar fail jaati hai
Itne varso tak jisne peele rang ka asmaan dekha tha voh aaj pehli baar halke safed aur halke kaale rang ke badal ko dekh rahi thi, tabhi fir ek baar uske chehre par paani ki ek bund girti hai jisse voh apni aankhe band kar deti hai, uss paani ke ek boond ki thandak uske dil se lekar uske roonh tak pahuch jaati hai
Voh fauran sarthak ko yeh batane ke liye mudti hai ki use sarthak girte hue dikhta hai, voh daudti hui sarthak ke pass jaati hai lekin tab tak bahut hi jyada der ho chuki thi
Aashi ki dhadkan iss waqt bahut teji se daud rahi thi, usne himmat karke sarthak ki nabj dekhi, uski nabj naa chalte hui mehsoos kar voh sarthak ke seene par apna sar rakh deti hai aur uski aankho se aansu beh jaate hai
Deval aur Rupal bhi sarthak ke pass aate hai, rupal ne jab aashi ka chehra uthaya toh aashi apne aansu se bheege hue chehre se naa mein ishara karti hai jise rupal aur deval samaj jaate hai ki aakhir me kya hua hai
Dheere dheere karte yeh baate unn saare logo ko pata chal jaati hai, jisne unhe ek naya jivan diya toh voh ab hamesa ke liye unsab se dur jaa chukka hai, voh chota bacha apne nanhe nanhe haatho se aashi ke chehre par aaye hue aansuo ko hata deta hai, jise dekhkar aashi use kaskar apne seenese laga deti hai aur uski aankho se naa rukne vale aansuo ki dhaara behne lagti hai
Vaha maujud har ek shaks ki aankho me aaj aansu the..sirf insaan hi nahi aaj toh kudrat bhi uss vyakti ke khone par apna dard vyakt kar rahi thi, dheere dheere karte hue uss jungle me tezz baarish shuru ho jaati hai
Sabhi log apni aankhe band kar unke life ki pehli barsaat ko mehsoos karne lagte hai..tezz baarish aur thandi thandi hawa chalne ke baad bhi koi vaha se jaana nahi chahta tha..aur aakhir jaaye hi kyu..??
Jinhone paani ke naam par keval tablets khayi thi, oxygen ke naam par artifical oxygen liya tha..voh kese iss kudrat ke tofho ko chod sakte the…chote se lekar bada, har koi iss paheli baarish ka aanand uthane lagta hai
Deval bhi upar asmaan ki aur dekhte hue kehta hai “sarthak..you did it, tune kar dikhaya mere bhai” itna kehti hi uski aankho se bhi aansu behne lagta hai..lekin baarish ke iss paani me voh aansu kahi ghum ho jaate hai
Rupal bhi apne jeevan sathi Deval ke gale lagkar unki pehli baarsaat ko mehsoos kar rahi thi…aur vahi aashi chehre par ek pyaari si muskaan aur aankho me aansu liye ek tak sarthak ke uss chehre ko dekh rahi thi jispar baarish ki bunde apna jaadu bekhair rahi thi
Jisne paani laane ke liye bina swarth ke kaam kiya voh iss baarish ko dekhe bina hi iss duniya se jaa chukka tha, tabhi voh chota bacha aashi se kehta hai “didi..didi, sarthak bhaiya ne haina, unhone muje….apne haatho se unki…..aakhli paani ki tttablet….muje thilayi thi” uss bachne ne bahut hi masumiyat se apni baat kahi thi..jiska matlab toh voh khud bhi nahi jaanta tha
Aashi ne uss bache ke sar par pyaar se haath firaya aur uski maa ki aur dekhne lagi jo uske samne haath jode khadi hui thi..yeh vahi ladki thi jise Sarthkar ne bachaya tha, aur ship me jaane se pehle apni bachi hui aakhri tablet bhi sarthak ne uss nanhe se bache ko de di thi
Tabhi uss ship mese ek chota sa robot aata hai aur usme se Sarthak ka ek hologram bahar aata hai “agar aap yeh dekh rahe hai toh shayad mai iss duniya se jaa chukka hu, agar mera plan successful hota hai toh maine ek algorithm already set karke rakha hai, bas yeh ek button dabana hai jisse yaha ke jesa same dome dharti ke north pole par acitivate ho jayega…ab insaan ka baaki jagah par naa rehne ke karan dharti firse pehle jese banne ki koshish karegi..aur agar mera plan fail hota hai toh shayad ab insaan ka iss duniya se hamesa hamesa ke liye vajood mit jayega” iske baad voh hologram message band ho jaata hai aur deval ko uss chote se robot me voh button dikh jaata hai
Deval apni nam aankho se uss button ko daba deta hai aur uske baad voh robot apne aap hi band ho jaata hai
Jab garmi ka mausam aata hai toh kya haalat hoti hai yeh hum sab jaante hai, lekin agar garmi me hum peene ke liye paani naa mile toh socha hai hum insaano ka kya haa hoga..?? ab agar mai yeh kahu ki thand ke mausam me bhi sehar ka garmi ke jesa tapmaan ho toh kya hoga..?? yeh toh sochkar hi hume dar lagta hai..lekin dome city me aaj bhi temperature 65 degrees ki paar chala gaya hai..aur tapte suraj ki gamri se bachne ke liye koi paid dur dur tak Dome City ke sadako par nahi dikhayi de raha tha
Sehar ki tuti futi sadako par ekdum sannata pasra hua tha, insaan toh dur ki baat thi..koi parinda tak najar nahi aa raha tha..aur yeh tuti hui sadke garmi me ubal rahi thi..suraj apna prakoop pura taraf se dharti par faila chukka tha
“aaahhhhh, aaaahhhhhh, aaahhhhhhhhhhhhhhhhh ahhhhhhhhhhhh” gehri gehri saanse lete hue ek ladki jameen par rengte hue aage badh rahi thi..uske haath bahut hi joro se kaamp rahe the..aur apni ardh khuli hui aankhe sahare hi voh aage badhne ka prayatna kar rahi thi
Apne niche rahi garam se bhi garam sadak aur upar asmaan se aa rahi suraj ki voh bhayanak kirno se uss ladki ka bura haal tha, garam tapmaan ki se uss ladki ka bura badan pasine se bheeg gaya tha, aur pasine ki vajah se zameen par padi dhul uske sharir se jaa mili thi..lekin fir bhi voh bina haar maane aage badhti rehti hai
Gale me sukhpan aur tapti garmi se ab uski aankhe uska saath chod rahi thi..lekin voh apni manjil se pehle aankhe band nahi karna chahti thi..himmat naa harkar aakhir kaar badi muskil se voh apne mukaam par pahuch gayi thi..ek building ke aad me rahe paani ke naal ke pass voh ese hi rengte hue pahuch jaati hai
Usne bina apni najre upar uthaye apne haath ko uss nal par rakha aur nal ko ghumate hue usne apna chehra thik nal ke niche rakh diya…jab insaan ko pyaas lagne par paani ka nal dikhta hai toh uske hoth paani pee ne ke liye apne aap hi khul jaate hai..yaha bhi iss ladki ke saath yahi hua..uske hoth iss aas me khul jaate hai ki ab use paani peene milega..lekin Dome city ke haalat toh kuch alag hi hai..lekin itni mehnat ke baad bhi uss ladki ko sirf nisraha hi haath lagti hai
Naal ke pura khulne ke baad bhi usme se paani naa aata mehsoos kar voh apni aankhe kholti hai..lekin asmaan me suraj ki garam roshni ki vajah se uski aankhe khulne se pehle hi band ho jaati hai..jiske baad ek choti si paani ki bund uske chehre par tapak ti hai jiske saath hi voh ladki vahi par behosh hokar gir padti hai
2 Years Ago
“abe saaale tu kar kya raha hai..??” ek ladka apne dost ke sar par maarte hue kehta hai jo iss waqt computer ke samne baithe hue kuch dekh raha tha
“bas yahi soch raha hu ki hum apne ghar ko kabhi pehle jesa bana bhi payenge yaa nahi..??” usne kursi par piche tek lagakar angdayi lete hue kaha
“kya matlab hai tera..??” voh dusra ladka bolta hai
“deval, tuje pata hai hamari earth ek waqt par aag ka gola hua karti thi..??”
Deval “haaa janta hu, jab hamare solar system ka janam hua tab pruthvi ek aag ka gola hi thi, par tu yeh kyu puch raha hai..??” ne apne kandhe upar karte hue kaha
“aisa lag raha hai jese hamara atit firse laut aaya hai” usne apne kamre me lage AC ki aur najar daalte hue kaha
Deval “sarthak..tu hamesa yahi sab sochte rehta hai..??”
Sarthak ne apne haath me pehni ek device se AC ki tarah ishara kiya, jiske baad AC ke panel par 25 degree likha hua aagaya, “kuch toh karna hi hoga..agar aisa hi chalta raha toh insano ka vajood hi meet jayega”
Deval “haa mere bhai, mai janta hu..par filhaal toh hum iss waqt kuch nahi kar sakte..atleast agle ek saaal tak toh kuch bhi nahi”
Sarthak chalte hue kamre ki khidhke ke pass jaata hai, aur khidke par lage parde ko apne haatho se hatate hue bahar ki aur dekhne laga
“aur yeh ek saal hi toh nikalna muskil hone vaala hai” voh apne chehre se ishara karte hue kehta hai “yeh dekh raha hai, suna hai ek waqt aisa bhi tha jab humari pruthvi ke mbar ka rang nila hua karta tha..lekin waqt ke saath asmaan ne apna rang badalkar pila kar diya” karib 150th floor ki unchayi se voh upar asmaan ki aur dekh raha tha jo halke peele rang ka dikhayi de raha tha
Deval bhi uske pass aata hai aur bahar dekhte hue “aur yeh sab hamare purvajo ki vajah se hua hai..yeh asmaan hume yeh yaad dilate hai ki insaan ne kabhi kudrat ki kadar nahi ki…hamare ancestors ki laparwahi ka anjam hume bhugatna pad raha hai”
Sarthkar uss parde ko band karte hue vapas uss kursi par aakar baith jaata hai, aur samne screen par chal rahi news ko dekhne laga
News channel par ek AI robot aaj ki khabar suna raha tha, AI “aaj ka temperature 75 degree ke karib pahuch gaya hai, badhti garmi aur paani ki tablets naa hone ke karan aaj 6 logo ne aapni jaan gaayi hai” jiske baad sarthak apni ungli ke ishare se uss screen ko band kar deta hai aur vahi kursi ke headrest par apna sar rakhte hue aankhe band kar deta hai
Deval bhi uss khabar ko sunkar bina kuch bole dusre kamre me chala jaata hai, jaha par ek rectangle shape ki device rakhi hui thi, uss device par rahe kuch buttons ko dabata hai..jiske baad uss machine se kuch tablets bahar nikalkar aati hai jise deval lekar khaa leta hai, aur fir vahi se chillakar kehta hai “sarthak, paani ki tablets khatam ho rahi hai..we need to get some more”
Sarthak vese hi apni aankhe band kiye hue kehta hai “fir toh bura hua..suna hai aaj market me bhi paani ki tablets nahi aayi, aur shayad aane vale agle 2 dino tak yeh tablets nahi mil sakti”
Deval apni aankhe band karte hue gehri saans leta hai apne aap se kehta hai “kaash ke aaj paani hota..kaash aaj bhi baarish ho rahi hoti toh shayad yeh din hume kabhi nahi dekhna padta”
Fir voh chalte hue bahar vale kamre aata hai aur bed par baithte hue kehta hai “tuje kya lagta hai yaar, kya hum kabhi paani ko dekh payenge..??”
Sarthak “haa kyu nahi, humare pass paani ki bahut si tasveere hai”
Deval thoda sa chidte hue bola “mera matlab asal paani se tha, jab se janam liya hai sirf inhi tablet par jinda hu..paani ke baare me sirf kahaniya suni hai”
Sarthak “yaar kitna acha hota na agar aaj baarish ho rahi hoti..hum bhi apne bachpan me kagaj ki naav banav kar paani se khelte, hume bhi naahne milta”
Deval “haa yaar, yeh saala spray daal-daalkar dimaag kharab ho jaata hai, jabse tune yeh bataya hai ki log pehle paani se naahte bhi the”
Tabhi unke room ke bahar kisike aane ki notification aati hai, deval uss notification ko dekhkar apne haath se darwaaze ki taraf ishara karta hai, jiske baad voh darwaaza gayab ho gaya aur bahar se do ladkiya kamre me aati hai
Pehli ladki “yeh kya haalat bana rakhi hai tum dono ne” unn dono ko dekhte hue kehti hai
Deval “kuch nahi aashi, bas paani ke baare me soch rahe the”
Dusri ladki “maine kaha tha Rupal, inn dono ke pass paani ki tablets nahi hogi”
Rupal “yeh dono hai hi nikamme..isiliye humne tablets ko pehle se lekar rakha hai”
Deval “yeh na bhulna ki hum vahi nikaamme hai jo uss sapne ko hakikt me badal ne vaale hai jo aaj har ek insaan dekhta hai”
Aashi “matlab..??”
Deval “humne ek tarika socha hai..agar voh kamiyab hua toh hum bhi paani ka luft utha payenge..paani ko apni aankho se dekh paayenge, use apne chehre par mehsoos kar payenge”
Aashi “impossible, paani ko hum insaan kabhi nahi dekh paayenge”
Rupal “agar maan liya ki hum paani ko dekh payenge, jo ki impossible hai..toh yeh kaam tum dono kese karne vaale ho…??”
Deval “baith jao, sarthak sabkuch bata dega” jiske baad voh dono ladkiya bhi vahi bed par baith jaati hai
Sarthkar apni round chair me ghumte hue aashi ko ek pal ke liye dekhta hai, fir “paani kese aayega yeh jaan ne se pehle hume yeh jaana jaruri hai ki paani ka janam kese hua tha”
Paani..jise hum JAL bhi kehte hai ya kehte the naam toh kahi saare hai..lekin uska udasya sirf ek..JEEVAN, jeevan ki shuruwaat hi paani se hui thi..aur yeh irony hai ki jeevan ka ant bhi paani se hi hoga…Jab paani dharti par aaya..uske baad hi jeevan ki shuruwat hui…aur aaj jab paani khatam ho raha hai toh saath me jeevan ka bhi ant ho raha hai
Kehte hai ki shuruwat me brahmand me pehle kuch nahi tha, sirf ek single point jiske bikharne par hamara universe ka janam hua, jise insaano ne BIGBANG ka naam diya, uske baad jab hamare solar system ka janam hua uss waqt dharti ek aag ka gola hua karti thi
Uss waqt dharti jeene ke laayak nahi thi..yeh bhi kehte hai ki shuruwat me jab brahmand ka nirmaan ho raha tha tab haroj ke kitne hi ulka dharti se takraate the, kitne hi iss aag ke gole me bhasm ho jaate the..kuch waqt ke baad ek mangal grah ke jitna bada asteroid hamari pruthvi se aa takrata hai jis vajah se dharti ka ek bada hissa alag ho gaya..jise insaano ne chand ka naam diya
Uss asteroid ke takrane ki vajah se dharti apne hi axis (aksh) par 23 and half degree juk gayi..lekin iss ghatna ke baad hamri pruthvi ko ek naya janam mila..voh apne hi aksh par ghumna shuru kar deti hai jiske baad pruthvi par din aur raat hone lage
Lekin shuru me din 24 hours ke nahi hue karte the, uss waqt dharti ke apne axis par ghumne ki raftar bahut tej thi jiss vajah se din mehaj 4 ghante ka hua karte the…jese jese waqt badhta gaya vese vese pruthvi ke ghumne ki raftar kam hoti chale gayi..aur din ki avdhidhi hoti gayi, aaj hamara ek din 24 hours ka hota hai..aur aane vaalo 200 million saalo me yeh badhkar 25 hours ka ho jayega..lekin yeh sab jaanna utna jaruri nahi hai
Jab srishti ki rachna ho rahi thi uss waqt space me dust clouds hua karte the..jisme hydrogen aur oxygen ke atoms (kan) maujud rehte the..aur itna toh hum jaante hai ki paani inhi do vastuo se bana hua hai, inn dono particles aapas me judakar paani bante hai..lekin space ke extreme cold temperature ki vajah se voh paani dust particles ke saath judkar ice crystals ban gaye jo ulka ke roop me dharti par aa baraste
Jiske baad dheere dheere karte hue pruthvi thandi ho gayi aur ek naye yug ki shuruwat hue, dharti par sabse pehla jeev paani me bacteria ke roop me janma tha jo waqt saath khud ko vikshit karte rahe aur dheere dheere karte hue duniya me alag alag jeevo ka nirmaan hone laga
Kuch bacterias paani me reh gaye aur kuch paani se baahar jamin par aagaye aur fir shuruwat hui hamare purvajo ki jo waqt ke saath vikshit hokar insaano ke roop me samne aaye..lekin hamesa se yeh haalat nahi the jo aaj hai, insaano ne paani ko dekha bhi tha aur unke saath voh rahe bhi the
Khud ko viksit karte karte insaan ne bahut si chize banayi..gaadiya buses, trains, jets aur bhi bahut kuch banaya jo kabhi indhan se chala karte the, lekin waqt ke saath saath indhan bhi khatam hone laga, tab insaan ne paani ka sahara liya..apne haroj ki jindagi me istemaal me hone vaale upkarno me indhan ke roop me paani ka istemaal hone laga, khud ko khush rakhne ke liye insaan ne jungle ke jungle tabah kar diye..jiske chalte prithvi par baarish kam hoti chali gayi..aur ek waqt aisa aaya ki dharti ne baarish ko dekhna hi band kar diya
baarish hone ke liye bhi toh paid podhe hone chahiye, aur paid podho ke liye paani hona chahiye..lekin aaj toh hamare pass dono mese kuch bhi nahi hai..dharti par keval 7% paid podhe reh gaye hai, duniya ki har ek nadi..har ek taalab sukh chuke hai, saara ice glaciers bhi pighal gaya hai..yaanha tak ki samundar me keval 11% paani bacha hai..aur use laane ke liye haroj hajaro kilometers dur jaana padta hai
Jab insaan ko yeh samaj me aaya ke paani hi jeene ka ek matra tarika hai toh apni technology ka prayog karke yeh water tablets banayi, isme paani ke kuch avsesh toh jarur hai…lekin real paani nahi hai, jinda rehne ke liye paani ki jagah insaano ne inn tablets ka shaara liya
Insaan Aaj ke jitna bebas kabhi nahi hua, jine ke liye hume paani ki tablets leni padti hai..saans lene ke liye yeh machino ke dwara banaya gaya oxygen lena padta hai, aaj pruthvi par iss 10 km diameter ke chote se DOME CITY me kuch gine chune log reh gaye hai
paani ki tablets banane ke liye bhi paani ki jarurat toh padti hi hai..aur insaan aaj itna taqatwar nahi raha ki voh khud chalkar paani le aaye..agar insaan DOME city ke bahar ek kadam bhi rakhta hai toh bahar ki garmi aur pradushit vatavaran se hi mar jayega, isliye hum inn robots ka istemaal karke paani laate hai aur technology ki madad se iss water tablets ko banate hai
250 saal..dharti par aakhri baarish ke hue aaj 250 saal pure ho gaye hai, lekin pehle bhi haalat ache nahi thi..akhri baarish jo keval kuch bundi ki hui thi aur voh bhi mahej 2 minutes ke liye, uss din ke baad hum mese kisine bhi paani ke asli roop ko nahi dekha..atleast apni aankho se toh humne kabhi nahi dekha
Deval “yeh toh paani aur hamari pruthvi ka itihaas tha..lekin isi itihaas me bhi ek sawaal hai..aur vahi sawaal hamara jawab bhi hai”
Rupal “aisa toh kya hai jo sawal bhi hai aur jawab bhi” usne sawaliya bhari najro se dekhte hue pucha
Deval “yahi ki agar dharti aag ka gola thi toh voh paani kese bacha..?? use toh jhal kar bhasm ho jaana chahiye”
Rupal “haa par isska jawab se kya relation” voh dono ladkiya abhi bhi nahi samaj rahi thi
Dharti par paani aane ke liye Ice-crystals sirf ek jariya nahi tha, space me maujud asteroids ek prakaar se minerals hai, jiske andar bhi paani ke avshesh rehte hai, jab yeh asteroids lakho crores ki taadat me dharti par gir rahe the, tab unnme mujud paani bhaamp bankar upar asmaan me jama hone lage jo aage chalkar paani ke baadalo me tabdil hone lage
suraj se naa jyada dur aur naa hi jyada kam duri par hone ki vajah se yeh baadal hamare hi vatavaran me milkar reh gaye jo aage chalkar baarish ke roop me asmaan se vapas dharti par girne lage..lakho saal tak lagatar ho rahi baarish, ulka pind ke roop me aa rahe ice-crystals aur lagatar asteroids ki madad se dharti dheere dheere karte hue thandi padne lag gayi
Aashi “par deval, hamare pass laakho crores saal nahi hai..hum utne saal jinda nahi reh sakte..hume paani ki jarurat aaj hai, insaano ke khatam hone ka baad toh vese bhi paani ki jarurat nahi rahegi”
Sarthak “haa hamare pass itne saal nahi hai, hum sab marne vaale hai..lekin atleast hum iss dharti ko itna toh lauta hi sakte hai jo humne dharti se chhina hai”
Aashi “ab tu yeh naa bolna ki hume dharti par asteroids girane hai”
Sarthak “nahi aashi, hume aisa kuch nahi karna hai, tuje pata hai..itna sab kuch hone ke baad bhi, hamare iss khubsurat dharti ko ek banjar jameen banane ke baad bhi yahi dharti hamari madad karegi”
Aashi “kese sarthak..??”
Deval “itna temperature hone ke bawjood bhi hum jinda reh paa rahe kyu..??”
Aashi “kyunki humne ek dome ke andar khud ko band kar diya hai..taaki yaha jo kuch paid hai unhe hum jinda rakhkar unke oxygen ka istemaal kar sake”
Deval “bilkul sahi kaha, ab sirf yahi koi 300-400 log aaj iss darti par bache hai..hamare pass rahe resources khatam honi ki kagar par hai..lekin hamara atmosphere aaj bhi dharti ke asmaan se bandha hua hai..aaj bhi asmaan me hydrogen atoms helium ke roop me maujud hai, oxygen carbon-dioxide ke roop me maujud hai, hume bas unn hi ki madad se paani ko firse banana hoga”
Aashi “haa jaanti hu..lekin mere kuch samaj me nahi aaraha..??”
Sarthak “hum pure earth par ek saath paani nahi laa sakte..hamari dharti ab puri tarah se ek registan ban chuki hai..temperature 100 degree se bhi paar ho gaya hai..lekin aaj bhi ek jagah esi hai jaha par temperature 35 degree hai..lekin vaha jeene ke liye kuch nahi hai”
Rupal “Antarctica, hamari earth par jo paid bache hai usme se 80% paid sirf vaha maujud hai”
Sarthak “exactly rupal, itne saaalo se jama hua dust..carbon dioxide hi hamari ek aakhri ummid bacha hai, hum antarctica par ek aisa DOME banana jaa rahe hai jaha par paani ke baadalo ko jama kiya jaa sakte hai, yeh dome antarctica ko dharti ke pradusan se bahaye rakhega aur dust particles ki madad se baarish karwaenge…fir ek baar iss dharti ka naya janam hoga..jindagi ki fir ek baar nayi shuruwat hogi”
Aashi chalte hue sarthak ke pass aati hai aur uska haath pakadte hue “yeh tu kese hoga..??”
Sarthak ne aashi ki aankho me dekhte hue kaha “hum ek aisi jung lad rahe hai jisme ab tera mera, tu mai nahi raha..ab waqt aagaya hai hum bankar jeene ka, aur hum bankar hi iss ladayi se ladne hoga”
Aashi fir ek pyaari si smile dete hue sarthak ke gale lag gayi “hum yeh ladayi jarur jeetenge”
Lekin vahi Sarthak ke aankho me kuch chupa hua tha..aur yeh baat uski behen Rupal dekh leti hai “bhai, tu kuch chupa raha hai, haina..??”
Iss sawal ka jawab sarthak nahi de paata, isliye Deval ne rupal ke sawal ka jawab diya “problem yeh hai ki ab hum log yanha par nahi reh sakte, aur pure antartica me dome banne me ek saal ka waqt lag jayega”
Rupal “ise tension lene vaali kya baat hai..i mean hum 1 saal ke baad toh vaha jaa sakte hai”
Sarthak “rupal..yeh itna aasan nahi hai, dome ke banne ke baad usme hum log ek low atmosphere pressure create karenge jiss vajah se bahar ke saare dust particles dome me aa sake”
Aashi “par sarthak, agar dust particles andar trap ho gaye toh hum toh ese hi mar jayenge”
Sarthak “nahi aashi, dome ke saath ek filter laga hoga.jo keval unhi atoms ko andar aane dega jiski hume jarurat hogi, dome banne me ek saal ka samay lagega, aur uske ek saal ke baad hume intezaar karna hoga andar ka vatavarn ke stable hone ka, ek baar vaha baarish shuru ho jaati hai uske baad hi hum vaha par rehne ke liye jaa sakte hai..lekin” voh bolte hue ruk jaata hai
“Lekin kya..??” rupal ne sawaal kiya
Deval “lekin hum sab log ko vanha nahi le jaa sakte, hum sirf 100 log hi vaha jaayenge..aur uske baad hume pehle ke jese ek normal ek saada jeeven bitana hoga..jaha koi AI nahi hoga, koi robot nahi hoga..kuch hoga toh sirf hamara saath aur kuch bhi nahi”
Yeh sunne ke baad vaha kuch der ke liye shanti chaa gayi thi, Aashi “tum dono yeh kab se kar rahe ho..??”
Deval “mai aur sarthak iss par 5 saalo se kaam kar rahe hai..humne tumhe pehle isliye nahi bataya kyunki hum khud sure nahi the ki yeh kese hoga…lekin ab waqt aagaya hai hamare plan ko execute karne ka...sarthak ne already dome banane ka kaam shuru kar diya hai..bas hume do saal ka wait karna hai, uske baad hum yaha se hamesa hamesa ke liye chale jayenge”
Present
Aaj iss sehar me rehna ka Sarthak aur uske dosto ka aakhri din tha, Sarthak ne Antarctica ka dome bana diya tha..aur ab waqt aagaya hai ki insaan hamesa hamesa ke liye iss technology ki duniya ko alwida keh de..sarthak ne seher ke command center me jaakar duniya me maujud har ek AI, har ek robots ko self destruct kar diya..dharti ke chakkar laga rahi har ek artificial satellite aaj tabah hokar duniya ke alag alag hisso me tutkar bikhar gayi
Apna kama khatam karne ke baad Sarthak ne apni aankhe band kari aur khud se baat karne laga “alwida, agar mera experiment kamiyab hota hai toh insaan ka vajood jinda rahega..varna iss duniya se insaan ka aaj ant ho jayega”
Itna kehne ke baad sarthak uss command center se apna jet lekar nikal jaata hai, ki tabhi uski najar raste me ek ladki par padti hai jo uss command center me maujud ek paani ke nal ke pass leti hui hai
Voh apni jet rokkar uss ladki ke pass aata hai aur jab uski nabz dekhi toh sarthak ko samaj ne me der nahi lagi ki yeh ladki paani naa milne ki vajah se behosh hui hai…voh fauran apni jeb se paani ki tablet nikalkar uss ladki ke mooh me rakh deta hai..jiske kuch der ke baad voh ladki ko hosh aajata hai
Sarthak “tum yaha kya kar rahi thi..?? yaha insaano ka aana mana hai”
Voh ladki “jaanti hu sir, lekin aaj yaha par hamara aakhri din hai..aaj ke baad paani milna band ho jayega..kahi log apni marjee se marna pasand kiye the..lekin mai darasal apne bache ke liye paani lene aayi thi..meri saari tablets khatam ho gayi..aur mai apne bache ko khoona nahi chahta..muje laga shayad muje thoda sa paani mil jaayega..kyunki koi bhi muje paani ki tablets dene ko taiyaar nahi hai”
Yeh sunkar sarthak ko bahut hi tejj gussa aata hai, Sarthak uss ladki ki aur dekhkar kehta hai “tum fauran apne bache ko lekar ship par aajao, mai tumhe tablet de dunga” uske baad sarthak teji se apni jet udate hue vaha se nikal jaata hai
Voh apne ghar pahuchkar chalti hui jet se kud jaata hai, aur voh jet aage jaakar ek building se jaa takraya aur ek blast ke sath voh jhal gaya..sarthak gusse se chalte hue apni banayi hui ship ke andar chala jaata hai, aur yeh dekhkar Aashi bhi uske piche piche aajati hai
Aashi ne dekhka ki Sarthak gusse me apne haath ko ship par maar raha hai, voh daudte hue sarthak ke pass jaati hai aur use shant karate hue kehti hai “sarthak, kya kar raha hai tu”
Sarthak “mai galat tha aashi..mai hamesa se galat tha”
Aashi “kis baare me..??” voh thoda dar rahi thi
Sarthak “insaano ko bachane ka koi fayda nahi hai..hume mar hi jaana chahiye”
Aashi “par hua kya hai..kuch toh bata”
Sarthak “chahe maut bhi samne kyu naa aajaye..insaan apna swarth kabhi nahi chodega..uske andar laalach hamesa basti rahegi..sach kahu toh aisa lag raha hai jese insaano ko jinda rehna hi nahi chahiye..yeh duniya sachchi me insaano ke bina hi khubsurat hai”
Aashi “tu aisa kyu bol raha hai..??”
Sarthak ne fir uss ladki ki kahani batayi, jise sunne ke baad aashi kehti hai “sarthak..marna kise pasand hota hai..jab tak hum jinda hai tab tak insaan ke mann me laalach hamesa basti rahegi..pehle paiso ki laalach thi..lekin ab jeene ki laalach hai..aaj paiso ka koi mol nahi reh gaya..lekin khaane peene ki tablelts ka mol unn paiso se bhi jyada ho gaya hai”
Sarthak udas hote hue kehta hai “toh kya kisi ko marne ke liye chod dena chahiye..?? yeh jaante hue bhi ki agar mera plan fail hota hai toh hum sab vese bhi marne vaale hai…toh kyu bas apne aakhri din me bhi ek dusre ke madad karna gunah hai..?? uss choti si nanhi jaan ki parwaah karna galat hai..?? kyu insaan hamesa sirf apne fayde dekhta hai”
Aashi “kyunki hum insaan hai..bhagwan nahi, hum insaano ki soch ko ab badal sakte hai..hum Antarctica jaakar ek nayi soch ko janam de sakte hai…tune hi kaha tha yeh ladayi kisi ek ki nahi hai..hume saath milkar rahenge tabhi iss jung ko jeet paayenge”
Iske baad sarthak kuch nahi bolta, aur kuch der baad antartica jaane ke liye aakhri bache 100 log aajate hai…Sarthak ne sabhi ko ek saath le jaane ke liye ek ship banayi thi..jisme sab baithkar teji se hawa me udte hue nikal jaate hai
City ki dome shields deactivate hote hi voh ship dakshin ki aur jaane ke liye nikal jaati hai, jese jese voh log aage badh rahe the..dharti ka ek bhayank swaroop sabhi logo ke samne aa raha tha..pichle 140 varso se ek bhi insan uss shield se bahar nahi nikla tha..yeh kehna galat nahi hoga ki abhi ship me maujd har ek insaan ka janam issi dome city ke andar hua tha
Dharti puri tarah se sukhkar ek kabristan ban chuki thi…charo taraf sirf aur sirf tuti hui imarate thi..paid podho ko toh jese naamonishan hi iss dharti par se mit gaya tha…jese jese yeh log aage badhte jaa rahe the vese vese unn sabhi ko bhayanak se bhayanak drushya dikhayi dene lagte hai..kahi par uss tuti hui imarat me bhishan aag lagi hui thi toh kahi jagah par logo ki sukhi hui laashe padi thi
Jameen par giri hui badi bai darare iss baat ki gawahi de rahe the ki insaan ne hamari khubsurat se bhi khubsurat duniya ko tabah kar diya hai..paiso aur technology ke moh me insaan iss had tak andha ho gaya tha ki use khud ke astitiva ka bhi khayal naa raha..agar insaan itna lalchi naa hota toh shayad samgra insaan aur hamari dharti ka iss prakar naash nahi hota
Voh jahaj triv gati se badhte hue hind mahasagar me aa pahuchta hai..3000 saal pehla jaha par ek vishalmay sagar hua karta tha voh ab ek sukhi banjar jamin bankar reh gaya hai…kahi jagah par choti toh kahi jagah par badi daaraare dharti ke vinash ki chavi dikha rahi thi…iss viran pade sagar me har ek jeev jantu ke kaankal uss baat ki gawahi de rahe the jo insaano ne unke saath kiya tha
Bahar ke haalat keval news me kabhi kabar dekhe the..lekin aaj voh har ek insaan jo iss jaahaj me the unn sabhi ki yeh drishya dekhkar hi rooh kaamp uthi thi..chahe voh koi bhi insaan ho..aaj sabhi ke aankho me ek samaan aansu aaye the
Karib 4 hours ki jorney ke baad inhe halka halka peele aur neele rang ka kuch dikhayi dene lagta hai, Sarthak thik uss jagah ke upar laakar ship ki speed dheemi kar deta hai, kyunki uss ship me baithe har ek insaan ke liye yeh pehla avsar tha jab voh apni hi aankho se pehli baar paani ko dekh raha tha
Tabhi ek chota bacha apni maa se puchta hai “mumma mumma, yeh kya chiz hai..??”
Iss choti si nanhi jaan ne ek aisa sawal kar diya tha jise sunkar har koi apna chehra niche juka deta tha, tabhi uski maa ne pyaar se uske mathe par haath firate hue kaha “beta, yeh Jal hai”
Bacha “yeh jal kya hota hai mumma”
Itne me hi aashi uss bache ke pass chalte hue aati hai, aur bache ke nanhe nanhe haatho ko apne haatho me lete hue kehti hai “jhal, neer, paani iske kayi saare naam hai, jab aap bade ho jaoge na tab aap khud hi samaj jaoge ki yeh sadharan si chiz nahi hai..yeh toh iss kudrat ka diya hua ek AMULYA TOFHA hai”
Jiske baad uss ship me koi kuch nahi bolta, aur voh chota sa bacha khidki ke seshe mese uss paani ko dekhte rehta hai jo antartica dweep ke charo aur ghera hua tha….karib 10 minutes ke baad voh ship ek jagah par land hoti hai..aur uske land hote hi Sarthak apni samne rahi ek transparent screen par touch karta hai jisse Antarctica ke charo aur dome shield activate ho jaate hai
Ek ek karke sab log ship se baahar aa jate hai, aaj tak insaano ne sirf imarate dekhi thi..lekin aaj yeh sabhi log pehli baar iss jungle ka luft utha rahe the..charo tarah hariyali hi hariyali thi, ek manmohak si khusbu vaha ke vatavaran ko aur bhi madhur bana rahi thi
Tabhi uss chote se bache ko ek ful ka podha dikhta hai, jiske ful par ek choti sa lekin bahut hi pyaari sa titli baithi hui thi..voh uss ful par baithe baithe dheere dheere apne paankhe hawa me lehra rahi thi, aur thik usi waqt vaha par bhi ek thandi se shital lehar sabhi logo ko apne chehre par mehsoos hoti hai..aisa lag raha tha maano voh choti si titli hi iss thandi sudh hawa ko janam de rahi hai
Vaha aaye hue logo me bahut si baate hone lagi, “maine itna khubsurat najara aaje se pehle kabhi nahi dekha” toh koyi keh raha tha “hamare ancestors kitne lucky rahe honge na, jinhone itne khubsurat jungle ko apni aankho se dekha hoga”
Tabhi sarthak ship se sabse akhir me bahaar aata hai aur uss chote se bache ke samne jaakar apne ghutno ke bal baith jaata hai, “aap jante ho yeh kya hai” use bolne me kaafi takleef hone lagti hai
Voh chota bacha naa mein apna sar hilata hai, jise dekhkar sarthak ne uske gaal par pyaar se haath firate hue kehta hai “voh titli hai..ise butterfly bhi kehti hai”
Voh bacha kabhi sarthak ki aur dekhta toh kabhi uss titli ki aur, sirf yahi nahi..vaha maujud har ek vyakti iss jagah ko dekhkar apne andar ek anokhi tagji mehsus kar raha tha
Vahi rupal ne deval ke gale lagte hue kaha “sach me, aisa lag raha hai maano hum swarg me aagaye ho”
Deval “kisi time par log dharti ko hi swarg maana karte the, aaj uss baat par yaakeen ho gaya hai sach me dharti swarg se kam nahi thi”
Aashi ne aankhe band karke upar asmaan ki aur apna chehra kiya, aur apni baanhein khole iss anokhe vatavaran ko apne rom rom me mehsus karne lagti hai, tabhi achanak se uske chehre par kuch thanda sa girta hai, jiske baad voh apni aankhe khol upar ka najara dekhkar uske chehre par khushi ki lehar fail jaati hai
Itne varso tak jisne peele rang ka asmaan dekha tha voh aaj pehli baar halke safed aur halke kaale rang ke badal ko dekh rahi thi, tabhi fir ek baar uske chehre par paani ki ek bund girti hai jisse voh apni aankhe band kar deti hai, uss paani ke ek boond ki thandak uske dil se lekar uske roonh tak pahuch jaati hai
Voh fauran sarthak ko yeh batane ke liye mudti hai ki use sarthak girte hue dikhta hai, voh daudti hui sarthak ke pass jaati hai lekin tab tak bahut hi jyada der ho chuki thi
Aashi ki dhadkan iss waqt bahut teji se daud rahi thi, usne himmat karke sarthak ki nabj dekhi, uski nabj naa chalte hui mehsoos kar voh sarthak ke seene par apna sar rakh deti hai aur uski aankho se aansu beh jaate hai
Deval aur Rupal bhi sarthak ke pass aate hai, rupal ne jab aashi ka chehra uthaya toh aashi apne aansu se bheege hue chehre se naa mein ishara karti hai jise rupal aur deval samaj jaate hai ki aakhir me kya hua hai
Dheere dheere karte yeh baate unn saare logo ko pata chal jaati hai, jisne unhe ek naya jivan diya toh voh ab hamesa ke liye unsab se dur jaa chukka hai, voh chota bacha apne nanhe nanhe haatho se aashi ke chehre par aaye hue aansuo ko hata deta hai, jise dekhkar aashi use kaskar apne seenese laga deti hai aur uski aankho se naa rukne vale aansuo ki dhaara behne lagti hai
Vaha maujud har ek shaks ki aankho me aaj aansu the..sirf insaan hi nahi aaj toh kudrat bhi uss vyakti ke khone par apna dard vyakt kar rahi thi, dheere dheere karte hue uss jungle me tezz baarish shuru ho jaati hai
Sabhi log apni aankhe band kar unke life ki pehli barsaat ko mehsoos karne lagte hai..tezz baarish aur thandi thandi hawa chalne ke baad bhi koi vaha se jaana nahi chahta tha..aur aakhir jaaye hi kyu..??
Jinhone paani ke naam par keval tablets khayi thi, oxygen ke naam par artifical oxygen liya tha..voh kese iss kudrat ke tofho ko chod sakte the…chote se lekar bada, har koi iss paheli baarish ka aanand uthane lagta hai
Deval bhi upar asmaan ki aur dekhte hue kehta hai “sarthak..you did it, tune kar dikhaya mere bhai” itna kehti hi uski aankho se bhi aansu behne lagta hai..lekin baarish ke iss paani me voh aansu kahi ghum ho jaate hai
Rupal bhi apne jeevan sathi Deval ke gale lagkar unki pehli baarsaat ko mehsoos kar rahi thi…aur vahi aashi chehre par ek pyaari si muskaan aur aankho me aansu liye ek tak sarthak ke uss chehre ko dekh rahi thi jispar baarish ki bunde apna jaadu bekhair rahi thi
Jisne paani laane ke liye bina swarth ke kaam kiya voh iss baarish ko dekhe bina hi iss duniya se jaa chukka tha, tabhi voh chota bacha aashi se kehta hai “didi..didi, sarthak bhaiya ne haina, unhone muje….apne haatho se unki…..aakhli paani ki tttablet….muje thilayi thi” uss bachne ne bahut hi masumiyat se apni baat kahi thi..jiska matlab toh voh khud bhi nahi jaanta tha
Aashi ne uss bache ke sar par pyaar se haath firaya aur uski maa ki aur dekhne lagi jo uske samne haath jode khadi hui thi..yeh vahi ladki thi jise Sarthkar ne bachaya tha, aur ship me jaane se pehle apni bachi hui aakhri tablet bhi sarthak ne uss nanhe se bache ko de di thi
Tabhi uss ship mese ek chota sa robot aata hai aur usme se Sarthak ka ek hologram bahar aata hai “agar aap yeh dekh rahe hai toh shayad mai iss duniya se jaa chukka hu, agar mera plan successful hota hai toh maine ek algorithm already set karke rakha hai, bas yeh ek button dabana hai jisse yaha ke jesa same dome dharti ke north pole par acitivate ho jayega…ab insaan ka baaki jagah par naa rehne ke karan dharti firse pehle jese banne ki koshish karegi..aur agar mera plan fail hota hai toh shayad ab insaan ka iss duniya se hamesa hamesa ke liye vajood mit jayega” iske baad voh hologram message band ho jaata hai aur deval ko uss chote se robot me voh button dikh jaata hai
Deval apni nam aankho se uss button ko daba deta hai aur uske baad voh robot apne aap hi band ho jaata hai
THE END
