2019 ~ 02:36 AM
*Shk-Shk*
Kaali raat ke andhere me 2 log ek jangal ke beecho beech haatho me phawde pakde khudayi ker rahe the, Unki nazre lagatar aas-paas daikh rahi thi.
“Shankar! Yaar mujhe ye abhi bhi sahi nahi lag raha” Unme se ek Aadmi ne rukte huwe kaha “Aise kisi ki laash ke saath khilwad karna? Zara Hamari bachiyon ki tarha thi”
“Kaisa Khilwad?” Dusri taraf se shankar ne kaha “Mohan! Hum sirf kangan nikalne aye hai, Galat kya hai?”
“Lekin hum ne Maalik ka namak khaya hai! Aise me unki beti ki laash se sona nikalna?”
Mohan ne muh banate huwe kaha, Uske chehre per ghin thi, Lekin usne ab tak khud ko baahir bhi nahi nikala tha.
“Tujhe shehar gye 2 saal ho gye hai! Tujhe kuch nahi pata ke yanha kya huwa hai”
Shankar ne ek baar dobara aas-paas daikha aur Mohan ke kareeb ho gaya.
“Zara beti ko uske bade bhai ne he maara hai” Shekhar ne dheeme se kaha to Mohan ki aankhe khul gayi
“Vaibhav ne???”
“Haan! 2 Hafte pehle he hum ne gaon me aye ek doctor ke saath Zara beti ko akele uske kamre me pakad liya tha” Shankar ne sar hilate huwe kaha “Vaibhav Babu ka to tujhe pata he hai? Ek number ka lalchi insaan hai, Usne pehle to gaon walo ke saath doctor ko dandon se maarte huwe maar he diya, Uske baad usne Zara beti ko bhi maar diya”
Ye sun ker Mohan ka sharir kanpane laga aur uske maathe per pasina aa gaya.
“Kisi ko khabar nahi lage uske liye usne Zara beti ko yanha dafana diya tha! Lekin tabhi mujhe Zara ke haath me sone ka kangan dikh gaya, Kisi aur ki nazar nahi gayi” Shankar ne neeche phawda maarte huwe kaha
“Lekin phir bhi ye galat hai na?” Mohan ne khud ko sambhalte huwe kaha “Hum kisi mare huwe insaan ke sharir se paisa le gye kya?”
“Tch! Mohan ~ Tere bete ki abhi kuch din pehle he Shaadi huwi hai na? Abhi usse bhi paiso ki zaroorat ho gi? Shehar me ghar le bhi lo to kharche jaan le le gye, Ye ek baar dil ko mana le phir zindgi asan ho jaye gi”
Mohan ka dil abhi bhi nahi maan raha tha, Lekin shankar ki baat bhi sahi thi, Usse paiso ki zaroorat to thi, Usne ek baar khud ko manane ki soch li.
“Huh! Theek hai, Lekin ye baat kisi ko bhi pata nahi lagni chahiye!!!”
Mohan ne shankar ko kaha to wo bhi khush ho gaya, Dono dobara khudayi karne lage.
*Clang*
Shankar ka phawda kisi cheez se takraya to unhone khodna rok diya, Shankar ke chehre per muskurahat aa gayi, Usne haatho se mitti hatani shuru ker di.
“Mohan!”
Shankar ek dum se rukte huwe bola, Uski awaz sun ker Mohan aage aya to Shankar muh khole baitha huwa tha aur neeche daikh raha tha.
Mohan ne daikha to uski aankhe bhi khulni shuru ho gayi, Udhar Zara ki laash honi chahiye thi, Lekin udhar kisi aur ki he laash thi.
“V-Vaibhav B-Babu???”
****
2024 ~ 9:26 PM
“Saali Kismat he gaandu hai” Ayush call per baat karte huwe chidhte huwe bola
Ayush kandhe per travel bag latkaye kaan per phone lagaye khaali sadak per chal raha tha, Uske aas-paas sirf ped paudhe the aur saamne sunsan sadak thi.
“Ab kya ho gaya hai?” Dusri taraf se uske dost Nikhil ne sawal kiya.
“Saala raaste me ek ped gira huwa tha, Ye government ker kya rahi hai? Ek ped to un se sadak se utha nahi”
“Ayush, Ab to samajh ja! Ye ped girna tere liye ek sanket hai, Udhar jaane se tujhe rokne ke liye”
“Ab tu dobara sabhi bhoot pret ki baate shuru kare ga Kya?” Ayush ne kheejte huwe kaha
“Lekin ye sirf baate nahi hai” Nikhil ne kaha
“Huh! Ye sab baate karne se ab kuch nahi hone wala, Ye kuch din ki he baat hai, Uske baad hum property baich ker project ek baar dobara shuru ker sakte hai”
Nikhil aur Ayush dost hone ke saath ek dusre ke business partners bhi the, Unka real estate developing ka kaam tha, Lekin kuch mahine pehle he unhone ek bada project start ker liya tha.
Sun City unka ab tak ka sab se bada aur khas project tha, Lekin kuch karan se unke kaafi investors ne haath kheench liye the.
Lekin Ayush aur Nikhil ne sab kuch Sun City per laga diya tha, Ab unke liye waapis ane ka matlab bankrupt hona tha, Unhone loan bhi le rakha tha to uski bhi dikkat thi.
Ayush ko jab kuch raasta nahi dikhayi diya to usne uske Dada Ji ki zameen aur ghar baichne ka nirnay liya, Lekin unke gaon ki bohat si afvahen faili huwi thi ke udhar bhoot pret ka saya hai.
Ayush ke pita ne bhi usse kabhi bhi gaon jaane ke liye roka huwa tha, Lekin kuch he mahinon pehle uske pita ka bhi dehant ho gaya tha.
Ayush ko bhi dar lag raha tha, Lekin uska project barbad hone ka dar usse aur bhi dara raha tha.
“Ughhh! Ye sab kuch hota he na agar hum Karan ko-”
“Shhhh”
Nikhil abhi baat ker he raha tha ke Ayush ne usse chup karwa diya, Ayush ruk chuka tha aur khud ko shaant ker raha tha, Nikhil ko bhi ehsaas ho gaya ke wo kya bol raha tha.
“Hum ne kuch bhi nahi kiya! Ye baat yaad rakh aur aage se kuch bhi bolte huwe ek baar soch liya ker”
Ayush ki awaaz larkhara rahi thi aur sharir bhi kaanp raha tha, Dono ke beech ek pal ke liye shaanti cha gayi.
“Main ne car ko peeche ek pump per park ker di hai! Kal ek ladka bhej dena car lene ke liye”
“Car pump per hai to tu kidhar hai?” Nikhil ne pucha.
“Yahan se gaon kareeb he hai! Chal ker he pohanch sakta hu, tu yaad se subha car mangwa lena”
“Leki-”
*Disconnected*
Ayush ne bina uski koi aur baat sune call kaat di aur ek gehra saans bhara aur aage raasta daikhne laga, February ka mahina aur upar se kal baarish hone se mosam aur bhi thanda ho gaya tha.
Ayush ne daikha ab usse pakki sadak se utar ker kachhi per chalna tha, Ayush ne phone ki torch on ki aur kachhi per utar gaya.
“BC! Kuch dikhayi nahi de raha!”
Kacche raste per andhera chhaya huwa tha, Pedon ne chand ki roshni ko bhi roka huwa tha, Lekin Ayush phone ki roshni ke bharose aage badh raha tha.
*Ahhhh*
Kal huwi baarish se kacche per kichad ban gaya tha aur Ayush ne galti se kichad per he kadam rakh diya aur phisalte huwe gir gaya.
“Saali kya lund kismat hai?”
Ayush gusse se chillaya, Usne khud ko sambhala aur uth ker kichad se baahir aa gaya, Uske kapde kichad se bhar gye the, Usne phone daikha to uski bhi screen toot gayi thi, Usse ab aur bhi gussa ane laga tha.
Lekin ab wo waapis nahi jane wala tha, Ek baar dobara wo aage badhne laga lekin ab ki baad apne kadmon ka dhayan rakhne laga.
****
10:58 PM ~
*Sigh*
Ayush ne khare hote huwe ek gehra saans liya, Pedon ke beech se nikal ker ab wo gaon pohanch gaya tha, Ab usse chandni dikhayi dene lagi thi.
Gaon me sirf kuch he ghar the aur baaki sabhi farmland tha, Lekin gaon ki bhi sabhi battiyan gull thi, Ab gaon me koi bhi nahi rehta tha.
Ye gaon City se baahir aur jangal ke thoda andar ker ke tha, Ghar kacche the sirf kuch he ghar pakke bane the aur kuch ghadon ke darwaze tak toote huwe the.
*Fuuuu~*
Un sabhi kache makanon ke baad Ayush ko uski manzil dikh gayi, Uske saamne ek badi deewar thi aur usper ek bada gate laga huwa tha, Uske upar bade aksharon me likha huwa tha.
“Maya Mehal”
*Thump-Thump*
Ayush haath maar ker gate khatkhataya aur peeche ho ker khara ho gaya-
*Creak*
Bade gate me he laga ek chota gate khula aur andar se ek adhik umar ka vyakti haath me laaltain pakde baahir aa gaya, Baahir ate he usne Ayush ko apne saamne khare daikha.
Usne upar se le ker neeche tak Ayush ko daikha, Uske saamne ek ladka kichad me bheega huwa khara tha.
“Ayush hu Kaka! Ap ko bataya tha na ke main aa raha hu?”
Ye Mohan Lal tha, Kuch varshon se Mohan Lal he udhar ki rakhwali ker raha tha-
“Haan!”
Mohan Lal ne kaha aur andar ki taraf chala gaya, Ayush bhi uske saath andar aa gaya.
“Kaka, Ap ko dar nahi lagta kya? Log kehte hai yahan bhoot pret rehte hai?”
Uska saval sun ker Mohan Lal ek pal ke liye ruka aur usne peeche Ayush ki taraf daikha, Phir wo waapis aage chalne laga.
“Ye 90's ki movies wale scene karo gye to logo ko to ap he bhoot Lago gye”
Ayush ne aas-paas nazre daudaayi to ye andar se aur bhi bada tha, Ye sirf naam ka he Mehal nahi tha banaya bhi ek mehal ki tarha gaya tha.
Andar ane ke liye bade gate se lekar ghar tak he bohat doori thi, Baahir he naukaron ke liye kamre bhi banaye gye the.
*Tuck*
Mohan Lal ghar ka darwaza kholte huwe andar aa gaya, Andar battiyan bhi jal rahi thi, Ayush har mahine Mohan Lal ko paise bhejta rehta tha sabhi bill dene ke liye to udhar abhi bijli chal rahi thi.
Andar se ghar aur bhi khubsurat tha, Bohat samay se dhayan na rakhne se uska rang thoda feeka per gaya tha, Lekin phir bhi usne apna aakarshan nahi khoya tha.
“Upar!”
Mohan Lal ne upar ki taraf ishara kiya aur Sidhiyan chadhne lage, Ayush bhi upar jaane laga, Sidhiyan chadhate he unke saamne ek deevar per lagi ek badi tasveer aa gayi.
Tasveer ke andar ek Aadmi aur Aurat kisi singhasan per baithe huwe the, Ayush ye daikhte he ruk gaya.
“Ye ap ke Dada ji aur Dadi ji hai!”
Mohan Lal ne Ayush ko yun tasveer ko daikhte daikh kaha-
“Rajendra Singh!”
Ayush ne tasveer ko daikhte huwe kaha-
“Apne samay ke ek bade vyapari! Lekin Sab ko ghutnon per la dene wale Rajendra Singh ek kisan ki beti ki khubsurati ke upar dil haar gye”
*Chuckle*
“Lekin uss ladki ka bhi ek sapna tha! Kisi Queen ki tarha ek castle me rehne ka sapna, Rajendra Singh koi raja ke parivar se nahi tha, Lekin usne apne pyaar ke liye ek chota gaon banaya aur usme ek bada Mehal banaya khubsurat interior aur gupt raasto ke saath aur usse apne pyaar ka naam diya, Maya Mehal”
Ayush ne puri kahani ek baar me bata di, Mohan Lal usse daikhta reh gaya.
“Umar se kaafi zyada bade lagte ho! Lekin Maya Mehal ke aur bhi bohat se raaz hai, Unko sirf Maya Mehal me rehne wale he jaante the”
Mohan Lal ne muskurate huwe kaha aur bina kuch aur kahe usse uske kamre tak le gaya, Ayush ko Mohan Lal ajeeb laga lekin usne zyada dhayan nahi diya aur uske saath chala gaya
“Ye kamra saaf ker diya tha! Bathroom me paani aa raha ho ga, Ek baar naha lo to acha rahe ga”
Ayush ko sab kuch bata ker Mohan Lal khud baahir chala gaya, Ayush ne bag ke andar se apne kapre nikale aur nahane chala gaya.
*shwoosh*
Shower kholte huwe Ayush ne kichad ko dhote huwe utarna shuru ker diya.
*Thud*
Ayush abhi naha he raha tha ke baahir se kuch awaaz ayi, Ayush chaukanna ho ker khara ho gaya.
“Koyi hai kya?”
Ayush ne saval kiya, Lekin baahir se kuch bhi awaaz nahi ayi, Ayush ne usse sirf ek bhram samajh ker dobara nahana shuru ker diya.
*Click*
*Drip....Drip.....Drip*
Ayush ne shower band kiya aur bathroom me lage he ek seeshe ke saamne khara ho gaya aur khud ko daikhne laga, Uska sharir tandurust aur mazboot tha.
*Thud-Thud-Thud*
Ayush ko ek baar dobara baahir se awaaz ayi, Lekin ab ki baar awaaz unchi aur saaf thi.
“Kon hai?......B-Bahir Kon hai?.....Kaka?”
Ayush ke puchne per bhi baahir se dobara koi awaaz nahi ayi, Ayush kuch pal daikhta raha, Phir usne udhar rakha huwa apna trouser aur shirt uthaya aur pehan ker darwaze ke paas aa gaya.
*Click*
Ayush kudate huwe baahir aa gaya, Usne aas-paas nazre daudaayi, Lekin kamre me uske sivaye koi bhi nahi tha.
*Tuck-Tuck-Tuck*
Ayush ko ab ki baar kamre ke baahir se awaaz ayi, Usne apni muthi bheench ker punch bana liya, Uski nazre darwaze per tik gayi.
“Nah-?”
*Ahhhh*
Ayush punch banaye aage huwa, Lekin andar ane wala Vyakti Mohan Lal tha, apne saamne Ayush ko punch banaye khara daikh Mohan Lal chaunk gaya.
*Gasp*
“Huh! Kaka? Ek baar awaaz he de dete?”
Ayush ne lambi saanse lete huwe dil per haath rakhte huwe kaha-
“Kuch huwa kya? Main to tumhare liye ye adrak wali chai bana ker laya tha”
Mohan Lal ne usse cup dikhate huwe kaha to Ayush ko apni bewakoofi per hansi aa gayi-
“Thank You Kaka! Sorry, Misunderstanding ho gayi thi, Ap chinta nahi kare”
Ayush ne uske haath se cup pakad liya-
“Kuch aur chahiye kya?” Kaka ne pucha.
“Ye kaafi hai! Ap bhi rest ker lo”
“Badhiya! Lekin agar kuch chahiye ho to ghar ke baahir bane kamre me hu main”
Usse bata ker Mohan Lal ek baar dobara se baahir chala gaya, Ayush ne peeche daikha to udhar balcony thi, Ayush bhi uski taraf chala gaya.
*Click*
Balcony ka darwaza khol ker Ayush baahir aa gaya, Ghar ka ye sab se bada kamra tha to uski balcony bhi bohat badi thi.
*Woosh*
Baahir thandi hawayen chal rahi thi, Ayush khare ho ker unhe mehsoos karne laga.
*Slurp*
Usne chai ki chuski li aur baahir ki taraf daikhne laga, Yahan se pura gaon dikhayi deta tha, Lekin abhi wo gaon veerane aur andhere me dooba huwa tha.
*Hoot-Hoot*
Ayush ko raat ke pakshiyon ki awaaze sunayi de rahi thi, Ayush chaye peete huwe khamoshi ka anand le raha tha.
*Tip*
Ayush aankhe band kiye shaanti ka anand le he raha tha ke uske chehre per baarish ki bund ki tarha kuch gira, Ayush ne upar daikha to aasman bilkul saaf tha aur kanhi bhi badalon ka nishan bhi nahi tha.
*Huh?*
Ayush ne chehre per haath fairate huwe haath daikha to uske chehre per kuch laal rang ka laga huwa tha.
*Clang*
Ek ajeeb teekhi awaaz vatavaran me fail gayi, Ayush bhi chaunk gaya aur uska pura sharir kaanp gaya, Awaaz Ayush ko upar se ayi thi.
*Gulp*
Ayush thook nigalte huwe ghoomna shuru huwa, Usne peeche upar ki taraf daikha to usse terrace ke upar kisi ki parchhai dikhayi di.
“K-Kon hai wahan?”
Ayush ke shabd ladkhada rahe the, Chand ki chandani me usse ye ehsaas ho gaya tha ke ye parchhai kisi aurat ki hai, Ayush thoda side per huwa to usse kuch dikhayi dene laga.
Ek kaale rang ki saree pehne huwe ek aurat upar se seedhe Ayush ko daikh rahi thi, Lekin Ayush ko ye he pata tha ke yahan uske aur Mohan Lal ke sivaye aur koi bhi nahi hai.
*Gasp*
Ayush ki saanse thamne ko ho gayi jab uski nazar Aurat ke haath per gayi, Aurat ne haath me Koyata(Dhatee) Pakdi huwi thi, Uske ghoomavdar chaku per se khoon ki bunden tapak rahi thi.
“K-Kaka! K-Kaka!”
Ayush Mohan Lal ko pukarne laga, Lekin usse kanhi se javab nahi aya, Aurat bina kuch kiye sirf usse daikh rahi thi, Aurat ke hont hile aur uske chehre per ek katilana muskan aa gayi.
Ayush ke maathe per pasina aana shuru ho gaya, Uska haath kanpane lage, Usne ek haath se dusre ko pakad ker khud ko shaant kiya, Usse abhi bhi kanhi se Mohan Lal ke ane ki umeed nahi lag rahi thi.
*Fuuuu~*
Ayush ne ek gehra saans liya aur tezi ke saath balcony se andar ki taraf bhaag gaya, Balcony se kamre me aa ker usne apne bag ke andar se ek chaku nikala aur kamre se baahir nikal aya.
Uske kadam terrace ki taraf jaane wali sidhiyon ki taraf badh rahe the, Usse dar lag raha tha, Lekin wo ruk nahi raha tha.
*Ba-dump*
*Ba-dump*
*Ba-dump*
Sidhiyon ke paas ate he ek pal ruk ker Ayush ruka aur ek baar dobara sochne laga, Usne chaku per pakar mazboot ki aur sidhiya chadhne laga.
Har kadam wo dhayan se rakh raha tha aur uski nazre sidhiyon ke upar he tiki huwi thi, Ek chhote se bulb ki roshni me usse Sidhiyon se terrace per jaane ke liye ek darwaza dikhayi de raha tha.
Ayush ne door handle pakda aur ek jhatke se darwaza kholte huwe terrace per aa gaya, Usne chaku ko aage ker liya tha ke saamne se khud ko defend ker sake.
Lekin uske saamne koi bhi nahi tha, Usne har taraf daikha lekin puri terrace bilkul khaali thi, Ayush ko pura vishwas tha ke usne ek Aurat ko daikha hai, Lekin ab na to udhar koi Aurat thi aur na he koyata tha.
“B-Baahir n-nikal ke aoo! K-K-Kahan chup rahi hai ab?”
*Thud*
*Woooosh*
“Aghhhhh?”
Ayush ko kuch aahat sunayi di to usne bina kuch soche chaku ghooma diya, Uske saamne Mohan Lal tha, Chaku daikhte he Mohan Lal darte huwe peeche gir gaya to chaku uske lagne se bach gaya.
“Aye Ladke! Yahan mujhe maarne aya hai kya?”
Mohan Lal ne seene per haath rakhe khud ko sambhalte huwe kaha, Ayush aage badh ker usse uthne me madad karne laga.
“Sorry, Kaka! Lekin vishwas kariye ke abhi yahan ek A-Aurat thi, Usne haath me k-kuch hathiyar pakda huwa tha, Lekin ab pata nahi kahan cha-”
“Araam se! Shaant ho jao” Mohan Lal ne usko kandhe se pakadte huwe kaha.
Ayush chup ho gaya, Lekin Mohan Lal ke chehre per ek gambhirta aa chuki thi.
“To wo ek baar dobara waapis aa gayi hai? Huh! Ye he dar tha mujhe” Mohan Lal ne kaha.
Ayush usse savaliya nazron se daikhne laga, Mohan Lal ki baato se lag raha tha ke usse kuch to pata hai.
“Kon waapis aa gayi hai? Y-Yahan chal kya raha hai?” Ayush ne heraan hote huwe pucha.
“Yahan baat karna uchit nahi ho ga! Pehle neeche kamre me chalte hai, Udhar tumhe sab kuch batata hu”
Mohan Lal ki baat sun ker Ayush ne ek baar aur terrace per daikha, Lekin abhi bhi usse koi bhi dikhayi nahi diya, Mohan Lal ki baat maante huwe wo uske saath neeche chala gaya.
Dono waapis kamre ke andar aa gye aur Ayush bistar per baith gaya, Uske saamne Mohan Lal ek kursi per baith gaya, Ayush uske kuch kehna ka intezar karne laga.
“Aj tum ne jise daikha hai! Wo tumhari Bua thi” Mohan Lal ne Ayush ki aankho me daikhte huwe kaha.
“Bua?”
“Haan! Ye sab kya hai wo batane se pehle mujhe tumhe 5 saal pehle kya huwa tha wo batana ho ga”
*Gulp*
****
Ye sab shuru huwa Zara Singh ke janam ke aur Maya Singh ki maut ke saath, Maya aur Rajendra ke 2 bete pehle se the, Lekin ek baar dobara Maya Pregnant ho gayi.
Maya ki umar 50 ke kareeb thi aur ye pregnancy bilkul unexpected thi, Doctor aur Uske bacho ne usse bacha girane ke liye kaha.
Lekin Maya usko kabool nahi ker saki aur usne bache ko janam dene ka nirnay liya, Uske nirnay per Rajendra ne uska pura saath diya.
Unka bada beta Vikram aur chota beta Vaibhav dono he unke nirnay se bilkul bhi khush nahi the, Vikram khud parivar wala tha aur uska ek beta bhi tha.
Aise me ek naye bhai/behan ka ana uske liye sharamnak bhi tha, Lekin uske Mata aur Pita ne uski ek bhi nahi suni aur aage badhte rahe.
Lekin Maya ka sharir usse janam dena jhel nahi saka aur usne janam dete huwe he apni akhri saanse bhar li, Ye Rajendra Singh aur pure gaon ke liye dukh ki ghadi thi.
Vikram ne uska pura dosh Rajendra Singh ko diya aur apni family ko le ker Videsh chala gaya, Lekin Vaibhav ne aisa kuch nahi kiya aur shaant raha.
Uski ye he shaanti Rajendra Singh ko dara rahi thi, Usse pata tha ke uska chota beta kitna shatir hai,
Wanhi uski Maa ke liye uska pyaar bhi aisa nahi tha ke wo itna shaant rahe.
Maya agar Queen thi to Rajendra Singh ne Zara ko ek princess ki tarha rakh tha, Lekin uske saath he Zara ke liye ye ek abhishap bhi tha.
Rajendra ne uski raksha ke liye usse kabhi khud se dur nahi hone diya, Usko hamesha ghar he rakha aur uski padhayi bhi ghar se he karwayi.
Usse dar tha ke kanhi wo Maya ki tarha Zara ko bhi na kho de, Rajendra ke dar se Gaon wale bhi Zara se baat karne se bachte the.
Zara apne he ghar me ek kaidi ban ker reh gayi, Uske paas uske pita ke sivaye aur koi bhi nahi tha baat karne ke liye.
Lekin ye sab ek din badal gaya, Unke gaon me ek medical camp laga aur bohat se doctors udhar ruke sabhi ka check up karne ke liye.
Unhi me se ek Sushant naam ka doctor tha, Sushant ek javan aur handsome doctor tha, Lekin uske saath he naram dil aur sab ka khayal rakhe wala bhi tha.
Zara bhi 22 varsh ki ho gayi thi, Usse uski Maa ki khubsurati mili thi, Lekin gaon ke kisi ladke me himmat nahi thi ke usse kuch keh bhi de.
Hamesha se gao me reh rahi Zara le liye medical camp kuch naya tha, Ek naukrani ko saath liye Zara chupke se udhar daikhne aa gayi.
Uski pehli mulakat Sushant se udhar he huwi, Zara ki pehchan se anjan Sushant ne usse bhi ek sadharan ladki samjha aur usko check karne laga.
Zara shuru me to dar gayi, Lekin Sushant ek doctor tha aur usse patients ko calm karna ata tha, Uski baate sun ker Zara shaant ho gayi.
Uske chehre per pehli baar kisi aur ki baat sun ker muskurahat aa gayi aur ye daikh ker sabhi gaon wale chaunk gye, Zara bina kuch kahe check up ke baad chali gayi.
Gaon wali ne foran Sushant ko batana shuru ker diya ke Zara kon hai? Shuru me to Sushant bhi heraan ho gaya, Lekin usne kuch galat nahi kiya tha.
Aise he Zara aksar camp ane lagi aur aa ker Sushant se baate karne lagi, Gaon ke sabhi log shuru me to heraan huwe lekin unhone jald he unhe nazarandaz karna shuru ker diya.
Bachpan se apne Mata Pita ki prem kahaniyan sun ker badi huwi Zara ke liye ye romanchak tha, Sushant uska pehla dost tha, Unki baate ghanton tak chalti rehti thi.
Sushant usse shehar ki zindagi ke baare me batata aur Zara usse gaon ki kahaniyan sunati, Sabko unke beech janam le raha Pyaar ka ped dikhayi de raha tha.
Lekin kuch nazre aisi bhi thi jinhen ye sab kuch ek mauke ki tarha dikh raha tha, 14 February 2019 ki raat ko mehal se aye ek Aadmi ne sab ko mehal ane ke liye kaha.
Gaon ke bohat se log haatho me lathiyan uthaye mehal chale gye, Unhe bulane wala Vaibhav Singh tha.
Vaibhav un sabhi ko mehal ke andar le gaya, Kisi ko kuch bhi nahi pata tha, Lekin Rajendra Singh ke baad Vaibhav he sab ka maalik hone wala tha,
Aise me koi bhi kuch puch ker uska dushman nahi ban'nna chahta tha, Sabhi log ek kamre ke baahir ruk gye, Vaibhav ne chabhi se kamre la darwaza khola aur andar ghus gaya.
Sab ke saamne Zara aur Sushant kamre me khare huwe the, Bina kisi ki bhi baat sune Vaibhav ne Sushant ko pakad ker logo ke beech phenk diya.
Sabhi log usse lathiyon se peetne lage aur usko ghasitne lage, Zara sabke saamne usse chhodne ke liye bheek maangti rahi.
Lekin Vaibhav ki ye nafrat bohat purani thi, Usne nirnay le liya huwa tha, Ek koyta haath me pakde usne apni he behan ka gala kaat diya.
Ye sabhi ke liye ek khofnaak aur dhadkane rok dene wala drishya tha, Uske baad Vaibhav ne Sushant ki laash ko ek pathar se baandh ker kuen me phenk diya aur Zara ko jangal me dafana diya.
****
*Huh~*
Ayush aur Mohan Lal dono he khamosh ho gye, Ayush ke rongte khade ho gye the, Lekin ab usse aur bhi dar lag raha tha.
“Phir?....Phir kya huwa?” Ayush ne himmat ker ke pucha.
“Sabhi ko laga ke ye sab kuch khatam ho chuka hai! Lekin ek din Vaibhav Singh gayab ho gaya, Kisi karan se Zara Singh ki laash nikalni chahi to......*Gulp.....Udhar Zara ki laash nahi Vaibhav Singh ka kata huwa sar tha” Khete huwe Mohan Lal ka sharir bhi kaanp gaya.
“Y-Ya kaise huwa?” Ayush ne pucha.
“Ye kisi ko bhi nahi pata! Lekin uske baad se har raat Gaon walo ki laashe milne lagi, Kisi ki laash uske ghar me to kisi ki laash jangal ke andar hoti”
Mohan ne rukte huwe Ayush ko daikha jo khud ko shaant karne ka prayas ker raha tha.
“Police ko bhi kuch pata nahi laga! Sab ko pata tha ke ye sab Zara ki aatma ka kiya huwa hai, Gaon wale bachne ke liye gaon chhodne lage”
*Gulp*
“Aur Dada Ji?”
“Rajendra Singh andar se toot chuka tha sab ko khone ke baad! Usne mehal se baahir ana bhi band ker diya aur phir ek din wo bhi gayab ho gye”
Ayush ko kuch bhi samajh me nahi aa raha tha, Usne apne haath me chaku mazbooti se pakad liya.
“Huh ~ Ab ap ko araam karna chahiye! Ek salah deta hu, Ye mehal kisi ke kaam ka bhi nahi hai, Ho sake to ye aise he rehne do”
Mohan Lal kehte huwe utha aur baahir ki taraf chal diya, Darwaze ki chaukhat per Mohan Lal rukte huwe peeche ghoom gaya.
“Ek aur baat! Zara Singh ka kamra, Jahan usse maara gaya tha......Ye he hai”
Mohan Lal kehte huwe muskura ker baahir chala gaya, Peeche Ayush aur bhi dar se kaanpne laga.
“Kaka pehle he gaand fat rahi hai aur ap aur faar rahe ho?”
Ayush ne kaha lekin Mohan Lal tab tak nikal chuka tha, Ayush ne kamre ko ache se daikha aur ek gehra saans bhar ker lait gaya.
Usko dar lag raha tha, Lekin pure din ki thakan ne usse sula he diya, Ayush kuch he samay ke baad gehri neend me chala gaya.
*Fuuuu~*
Ayush ko soye kuch he samay huwa tha ke uske kaan ko hava lagi, Ayush ki neend to khul gayi, Lekin wo aankhe band kiye khud ko behlane laga ke ye uska bhram tha.
*Fuuuu~*
Ek baar dobara uske kaano per hava ka ehsaas huwa, Uske saath he Ayush ko kisi ke uske paas hone ka bhi ehsaas huwa.
Ayush ne bistar ke andar he chaku per apni pakad mazboot ki aur jhatke ke saath uthte huwe apne paas chaku se vaar ker diya.
*Huh?*
Lekin Ayush ke saath koi bhi nahi tha, Ye daikh ker Ayush chaunk gaya, Lekin ye sirf ek pal ke liye tha, Uske agle he lamhe Ayush ko uske peeche kisi ke hone ka ehsaas huwa.
*Turn*
Ayush peeche ghoom gaya, Saamne ka drishya daikh ker Ayush ki aankhe khul gayi, Uske saamne wohi Aurat haath me Koyata pakde huwe khari thi.
Aurat ka sharir khoon se latpat tha aur uske koyata ki nok se khoon ki bunden gir rahi thi, Uske itne kareeb hone se Ayush ki halat bigadne lagi.
Ayush bistar se neeche utar ker chaku ko Aurat ki taraf ker ke khara ho gaya, Lekin Aurat sirf Ayush ko daikh ker muskura rahi thi.
“K-Kon ho t-tum?” Ayush ne ladkhadati huwi awaaz ke saath pucha.
Aurat ne kuch bhi uttar nahi diya, Lekin uske chehre ki muskurahat khatam hone lagi, Ayush ke rongte khare hone lage aur usne kadam baahir ki taraf badhane shuru ker diye.
*Thud*
“Ughhhh!”
Ayush ke paon kisi se takaraya aur uska balance kharab ho gaya, Ayush dhadam se neeche gir gaya, Khud ko sambhalte huwe Ayush ne peeche daikha to uski aankhe phatne ko aa gayi.
Ayush ke saamne kisi vyakti ki laash thi aur wo bhi buri tarha se ghayal aur kati huwi laash, Ayush ka sharir sun padne laga, Uske saath he ek aur vyakti ki laash farsh per giri huwi thi.
*Tuck*
Ek halki awaaz se Ayush ko ehsaas ho gaya ke koi uske saath khada hai, Ayush ne himmat karte huwe upar daikha to Aurat uske saath he khadi thi.
Uske kareeb ane per Ayush ko uske gale per bana ghav dikhayi dene laga, Ayush ka chehra ronasa sa ho gaya.
*Scream*
“Ahhhhhhh!”
Chilate huwe Ayush utha aur baahir ki taraf bhaagne laga, Kamre ke darwaze ko kholte huwe Ayush baahir aa gaya.
*Gasping*
Ayush ki saanse ukhad rahi thi lekin wo bina kuch bhi soche bhaag raha tha, Usne peeche daikha to Aurat kamre ki chaukhat per khari huwi thi.
“Kaka!....K-Kaka kahan ho?”
Ayush chilate huwe sidhiyon ki taraf bhaaga, Uska pura sharir pasine se bheeg chuka tha, Abhi uska lakshya mehal se baahir nikalne ka tha.
*Slip*
“Huh?” Bhaagte huwe Ayush peeche ki taraf daikh raha tha, Uska ek kadam sidhi ke corner per rakha gaya aur agle he lamhe uska paon phisal gaya.
*Thud*
*Thud*
*Thud*
*Ughhhh*
Ayush sidhiyon per ghoomte huwe girne laga, Uske sar per gehra ghav ban gaya tha aur uska khoon behne laga tha.
*Groan*
Ayush neeche gira dard se karahane laga, Uski aankhe band hone lagi uski ek nazar upar gayi to sidhiyon per khari aurat usse he daikh rahi thi, Lekin ab uske chehre per khoon ki pyaas nahi balki chinta ke bhav the.
Agle he pal Ayush ki aankhe band huwi aur wo behosh ho gaya.
****
*Crack*
Mehal ke baahir Mohan Lal lakadiyon se aag jalaye baitha huwa tha, Uske haath me ek tasveer pakdi huwi thi, Tasveer me ek ladka khada huwa tha.
“Papa Ji!.....Papa Ji!!”
Mohan Lal abhi tasveer he daikh raha tha ke usse kisi ke pukarne ki awaaz ayi, Usne Mehal ki taraf daikha to Kaali saree wali Aurat bhaagte huwe uski taraf aa rahi thi.
“Huh, Kya ho gaya hai? Aise kyu bhaag rahi ho?”
Mohan Lal usse daikh ker bhi bilkul shaant tha, Aurat ka chehra dar se peela per gaya tha.
“Papa Ji, W-Wo Ladka! *Gulp* Ladka sidhiyon se gir gaya hai”
Aurat ne hanfati huwi kaha aur uski baat sun ker Mohan Lal bhi ghabra gaya.
“Gir Gaya? Ye kya anarth ho gaya? Umesh aur Aniket kidhar hai?”
“Un dono ko dar lag raha hai! Dono he neeche bhi nahi aye” Aurat ne kaha.
“Tch ~! Baaki sab abhi tak sadak se waapis nahi aye! Hamay he kuch karna ho ga”
Mohan Lal Aurat ke saath andar ki taraf chal diya, Mehal ke andar ate he dono sidhiyon ke paas gye, Lekin wanha Ayush tha he nahi.
“Kahan Gaya?”
Mohan ne Aurat se pucha to usne na me sar hila diya, Usse samajh nahi aa rahi thi ke Ayush kanha gaya?
“Ye sab kya chal raha hai?”
Ayush ki awaaz ne dono ko hila ker rakh diya, Ayush ek taraf sar per rumal rakhe huwe khara tha, Uske kapre khoon se bheeg gye the, Mohan aur Aurat dono he dar gye, Unki chori pakadi gayi thi.
“Ye sab kya ho raha hai? Kaka? Ye sab ap ne? Ab jhoot nahi kehna”
Ayush ko gussa aa raha tha, Mohan ke chehre per sharmindgi thi, Aurat bhi dar se kaanp rahi thi, Ayush ko samajh aa gayi thi ke ye sab ek natak tha.
“Huh! Sab kuch batata hu, Roshni Ayush ki patti ker do”
Mohan ne sab kuch sach batane ka nirnay le liya, Uski baat sun ker Aurat marham patti ke liye dibba le ayi, Sabhi udhar he rakhe sofe per baith gye.
“Ab batao gye kya?” Ayush ne sakhti se pucha.
“Ye ladki meri bahu Roshni hai! Ye sab hamara racha huwa natak tha, Ap ko yanha se dara ker bhagane ka”
Ayush ne Roshni ki taraf daikha to uski nazre bhi neechi thi, Usne Ayush ki patti karni shuru ker di.
“Lekin Kyu?” Ayush ne pucha.
“Kyu ke hum ye jagha bechane nahi dena chahate! Kuch maheene pehle mera beta aur bahu shehar me rehte the, Unki zindgi aisho aaram ki nahi thi per achhi thi”
Mohan ke haath me abhi bhi tasveer pakdi huwi thi.
“Ek din badi companiyon unke ghar ke Area ko badi colony banane ke liye chun liya! Unhone ghar kharidane shuru ker diye, Lekin wo unki keemat bohat kam de rahe the, Mere bete ne unke khilaf awaaz uthayi to U-Unhone”
Mohan ki awaaz bhaari ho gayi thi, Uski Aankhe bhar ayi thi, Roshni ke haath bhi kaanpne shuru ho gye.
“Unhone apne svarth ke liye mere bache Karan ki awaaz ko dabane ke liye usko maar diya! Unhone sabhi se zabardasti dastakhat karwa liye aur apni suncity banani shuru ker di”
Mohan ki awaaz me ek krodh aa gaya tha, Ayush khamoshi se uski baat sunta raha.
“Hamare jaise aur badkismati logo ke paas ab ghar nahi tha! Hum sab ne yanhi basera ker liya, Lekin agar ap ye jagha bhi baichte to hamare paas aur koi jagha nahi bachni thi, Sirf issi karan hum ne aisa anarth ker diya”
Mohan ne Ayush ke saamne haath jod diye, Wo maafi maang raha tha, Uski puri baat sun ker Ayush soch me doob gaya.
“Huh ~ Ye sab galat tha, Lekin ap logo ke saath bhi galat huwa hai, Main kisi ko bhi saza nahi dunga aur main koshish karunga ke ap logo ke rehne ke liye kuch ker saku”
Mohan ko apne kaano per vishwas nahi ho raha tha, Ye he halat Roshni ki bhi thi, Mohan seedhe Ayush ke kadmon me gir gaya.
“Ap ka dhanyavad! Hum ne ap ke saath ye sab kiya lekin ap ne phir bhi hamay maaf ker diya, Ap bohat mahan ho”
“Aisa kuch bhi nahi hai! Lekin yanha kitne log hai?” Ayush ne mohan ko uthate huwe kaha.
“Yanha hamare sivaye 2 log hai aur baaki log jangal me chhupe huwe hai! Unhe aj raat udhar rukne ke liye kaha hai, 6 parivar hai” Mohan ne kaha.
“Hmm ~ Un dono ko bhi bula laye, Uske baad he baat aage badhate hai”
Mohan Lal khush hote huwe khara ho gaya, Usne Roshni ko patti karte rehne ke liye kaha aur khud upar ki taraf chal diya.
Usse abhi bhi vishwas nahi ho raha tha, Mohan sidhiyon se upar chala gaya, Usse saamne he Umesh aur Aniket baithe huwe the.
“Suno! Ab darne ki zaroorat nahi hai, Sab kuch sahi ho gaya hai, Maali-”
*Ring-Ring*
Abhi Mohan unhe dur se bula he raha tha ke uska phone bajne laga, Mohan ne phone nikala aur screen daikhne laga.
[Nikhil Calling.....,]
Call Ayush ke partner ki thi, Mohan ne chalte huwe he call utha li.
“Haan Ji Nikhil Babu?”
“Kaka, Ap abhi mehal me he ho kya?” Dusri taraf se nikhil ne saval kiya.
“Haan...! Kuch huwa hai kya?” Nikhil ki ghabrayi awaaz sun ker Mohan ne pucha.
“Kaka hum paas he sadak per hai! Y-Yanha hamay Ayush ki L-Laash mili hai, Uska sar kata huwa hai, Ap yanha aa sakte ho kya?”
Nikhil ki baat sunte he Mohan ke kadam tham gye.
“Ye ap kya keh rahe ho? Ayush babu ko kanha kuch huwa hai?”
“Ye sach hai! Main abhi police ke saath khara huwa hu, Birth mark se body confirm bhi ho gayi hai”
Mohan ne side per daikha to uski aankhe aur bhi khul gayi, Aniket aur Umesh dono ke ne sharir per ghav bane huwe the aur ek chaku Umesh ke sharir per laga huwa tha.
Chaku pehchante Mohan ko samay nahi laga, Unke sharir ki halat daikh ker Mohan ki halat bigadne lagi, Agle he pal Roshni ki yaad ate he Mohan ka sharir kaanp gaya.
*Tuck-Tuck-Tuck*
Mohan ke peeche kadmon ki awaaz ayi to Mohan ghoom gaya, Lekin saamne ka drishya daikhte he uske pairon ne javab de diya aur wo neeche gir gaya.
Mohan ke saamne Ayush khara tha, Usne ek haath me Koyata aur dusre haath me Roshni ka kata sar baalo se pakda huwa tha, Mohan ke muh se shabd bhi nahi nikal rahe the.
“Kon ho tum?” Mohan ne mushkil se itne shabd kahe.
Uska saval sun ker Ayush ne Koyata uske gale per laga diya, Mohan bilkul haar maan chuka tha, Usne virodh bhi nahi kiya.
Ayush ne chehra Mohan ke kareeb kiya aur dheeme se bola.
“Sushant”
*Slash*
****
*Pee-oo-Pee-oo*
Police ki gadiyon ke siren chal rahe the aur ek team Ayush ki laash ke paas khari huwi thi, Inspector bhi aya huwa tha.
“Sahib!” Ek havaldar ne inspector ke paas ate huwe salute kiya, Usse daikhte he usse le ker inspector side per aa gaya.
“Haan! Mila kya?”
“Ji sahib! Yanhi side per rakha huwa tha”
Havaldar ne ek lifafa inspector ko pakda diya, Inspector ne usse pakad liya aur usse khol ker daikhne laga, Andar paise rakhe huwe the.
“Ye murder har din kyu nahi hote? Lekin moti kamayi ho gayi hai” Inspector ne khush hote huwe kaha “Yanha Ayush singh ko loota gaya hai, Ye open and shut case hai”
“Ji sahib”
Inspector aur Havaldar waapis sadak per aa gye, Unke saamne he Nikhil khara huwa tha, Inspector uske paas chala gaya.
“Mr.Nikhil Apke dost ki halat daikh ker dukh huwa! Lekin ham-”
“Sir! Ap ek madad karo gye kya?” Nikhil ne inspector ki baat beech me katate huwe kaha.
“Kaisi madad?”
Inspector ke saval per Nikhil ne pocket se ek cheque nikal ker inspector ke haath me rakh diya.
“Ye case yanhi band ker dena! Main Ayush ke parivar ko in sab me nahi daalna chahta”
Nikhil ki baat bilkul bhi sense nahi bana rahi thi, Lekin jab Inspector ki nazar Nikhil ki car me rakhi Insurance file per gayi to usse sab samajh aa gayi.
Uski to aj Eid ho gayi thi, Dono taraf se uski jeb bhari ho gayi thi aur ab usse kuch dikkat bhi nahi thi.
“Beshak! Ap jaise dost kismat walo ko he milte hai, Ap chinta nahi kariye sab kuch hum handle ker le gye”
Inspector ki baat sun ker Nikhil bhi khush ho gaya, Inspector khush ho ker chala gaya, Nikhil ne akhri Ayush ki laash ki taraf daikha to uski halat bohat buri thi.
Uske sharir se sar aur kapre dono gayab the, Uska khoon puri kacchi sadak per phela huwa tha.
“Sorry Ayush! Lekin marne walo ke saath hum mar nahi sakte, Zinda logo ko jeena hota hai”
****
*Dragggg ~*
Mehal ke neeche ek gupt raasta bana huwa tha, Sabhi ke kaate huwe sar ek bori me bhar ker Sushant usse ghasit ker le ja raha tha.
Bora khoon se bhara huwa tha, Sushant ne dusre haath me ek mishal pakdi huwi thi, Raaste ki diwaron ke upar shabd likhe huwe the.
“Sushant! Tumhe pata hai kya ke pyaar kya hota hai?”
“Tumhe lagta hai ke mujhe pata ho ga? Ye aankhe ladkiyon per nahi kitabo ko daikhti ayi hai”
“*Giggle* Pagal ho tum!”
“Ab pagal hu to hu!”
“Huh, Kabhi Kabhi sochti hu ke Baba ne aisa kya mehsus kiya tha jab unhe Maa se pyaar huwa tha? Unke liye unhone sab kuch khatam ker diya”
“Ye to unhe he pata ho ga! Lekin ye keh sakta hu ke wo ehsaas unka sab se khubsurat ehsaas ho ga”
“Lekin phir bhi, Kisi ke liye sab kuch chhod ker ek chote gaon me bas jana? Ye koi kaise ker sakta hai?”
“Uska uttar to Mirza sahib ne diya hai!”
“Ishq ne "ghalib" nikamma ker diya.
Warna hum bhi aadmi the kaam ke.”
“Ek to tumhare andar Mirza ji ki aatma aa jati hai! Kuch baat karna he bekar hai *Annoyed*”
“Hahahaha! Ye he gusse me laal chehra to daikhna hota hai, Bilkul Panda lagti ho aise gusse me”
“Ughhhh! Bure Insaan”
“Hahahaha!”
“Lekin mujhe Maa se jealousy hoti hai! Unhe ek aisa pyaar karne wala mila jis ne unhe ek farmer se Queen bana diya, Mujhe Mehal nahi chahiye, Lekin kaash mujhe bhi koi aisa mile jis ke liye main uski Queen ban saku”
*Thud*
Sushant ek jagha ruk gaya, Ye ek gupt hall ki tarha ka tha, Usne bore se Ayush ka sar nikala aur usse diwar per lagi ek keel per taang diya.
Diwar ke upar sabhi gaon walo ke sar tangen huwe the, Sushant ne baaki sab ka sar bhi udhar he taang diya, Usne jangal me chupe huwe logon ko bhi maar diya tha.
Sabhi ke saro ko taang ker Sushant ek taraf chalne laga, Ek taraf ek kabr bani huwi thi, Sushant uske paas aa ker baith gaya, Uski saanse phul gayi thi.
Sushant ne pocket ke andar se ek gulab ka phool nikala aur kabr ke upar rakh diya.
“Happy Valentine's day! My Queen”
