UPDATE – 1
G.D. Schools & Colleges...
Pune shehar ka sabse bada educational institution Jahan padhne waale vidyarthi apne aap mein hi kaamyabi ki nayi bulandiyon ko chhoo lete hain. Chaahe wo Academics ho ya fir sports, chaahe Arts ho ya Discipline yahaan ke students har cheez mein awwal hain. Iss waqt yahaan iss College ke gate ke baahar khadi hai ek ladki. Paaon mein casual shoes, oopar safed rang ki leggings aur saath mein light green kurti... Gale mein ek pendant jiske neeche chhote se size ka “M” juda hua tha... Honthon par ek prakritik gulaabi rangat, kaanon mein earrings joki morpankh ke resemblance ke the aur ant mein uski aankhein... Patli dandi ka wo chashma shayad uski aankhon ko kuchh alag hi darsha raha tha.
Par jo cheez usmein sabse khaas thi wo thi uski aankhon mein jhalakti ek anjaani si masoomiyat. Wo masoomiyat jo bata rahi thi ke ye ladki shayad prakriti ki sabse khubsurat kalakriti hai. Shayad yahi chehra hai wo thikaana jahaan saare jahaan ki khubsurti dera daal sakti thi. Khair, wo ladki jo gate ke paas khadi uss college ko nihaar rahi thi, uski aankhon mein thoda sa bhay aur bahut saari jigyaasa spasht dekhi jaa sakti thi. Usne ek baar apne chashme ko thoda set kiya aur College mein enter kar gayi. Wo sab taraf nazren ghumaati huyi chal rahi thi ke tabhi usne dekha ke ek jagah par kaafi students ghera banaye khade hain aur wahan se aa rahi music ki dhun wo ladki saaf sun sakti thi.
Ab insaani pravriti ka ek bada hissa hai jigyasa matlab excitement aur ussi ks chalte wo ladki bhi uss bheed ki taraf badhne lagi. Jaise – jaise wo nazdeek jaa rahi thi music ki dhun usse clearly sunaayi de rahi thi joki usse mantramugdh bhi karne lagi thi. Jab wo uss sthaan par pahunchi to usne paaya ke ek ladka parking mein ek bike par baitha harmonica par ek dhun baja raha tha...
HMMM.. HMMHM... HMM... HMHMM.. HM HMM HM...
HM HMM HM.. HM...HMMMHM HMM HM..
Wo apni hi duniya mein mashgool aankhen band kiye hua tha par uske aas paas kitne hi students ki bheed lagi huyi thi aur ho bhi kyon naa, jab bhi talent ka pradarshan hota hai appreciation milta hi hai. Wahi yahaan ho raha tha. Par wo ladki un sab students se kuchh alag thi, wo ek tak uss ladke ko hi dekhe jaa rahi thi... Uska wo chehra jispar halki beard bhi maujood thi, uska hairstyle jo kuchh alag hi tha, uska bike par baithne ka wo posture... Sab kuchh uss ladki ko apni taraf kheench raha tha. Aaj se pehle usne kabhi aesa feel nahi kiya tha jaisa abhi kar rahi thi. Asal mein wo iss waqt kuchh feel hi nahi kar rahi thi!! Uske dil mein kuchh ajeeb sa ho raha tha jisse wo filhaal samajhne ke kaabil nahi thi.
Khair, kuchh derr baad uss ladke ne apne mobile ke bajne par aankhen kholi to wahaan lagi bheed ko dekha. Usne sabhi par ek nazar daali aur apne mobile ko kaan se lagaane laga ke tabhi... Tabhi uske dimaag ne kuchh seconds pehle dekhi ek tasveer uske zehen mein dobara chala di. Ye chehra, ye kuchh adhik hi haseen tha. Usne Mobile ko nazarandaz kiya aur waapis se uss bheed par nazar daali par wahaan wo nahi thi. Wo ladka ek dum se bike se utha aur idhar udhar dekhne laga. Tabhi uski nazar wahaan se jati ek ladki par padi. “Haan ye wahi hai... Par aaj se pehle isse kabhi nahi dekha!!” Yahi vichaar kaundhe uss ladke ke dil mein.
Par tabhi uske kandhe par ek haath aaya, wo palta to swayam hi uske honthon par ek muskaan ubhar aayi. Usne saamne waale ladke se haath milaya aur dono gale lag gaye.
[L 1 – Musician ... L 2 – New Guy]
L 1 – Aaj to bade bade log aaye hain College mein!!
L 2 – Haina! Dekh le fir tameez se baat kariyo hamse.
L 1 – Haan haan kyon nahi bilkul, aapse tameez se hi baat karenge hum ARMAAN Saahab!!
Armaan – Chal chal drama band kar aur bata kya chal raha hai aaj kal?
L 1 – Kya chalna hai bas wahi boring zindagi. Saala ab to College bhi aane ki ichha nahi hoti.
Armaan – Maine bola tha ke ek chhokri pata le, apne aap life mast ho jaayegi. Par nahi tumko to Turu Luvv chahiye. Bhaisahab aaj ke time mein naa milta hai sacha pyaar!
L 1 – Abbe jaa na! Koyi naa koyi to hogi hamare liye bhi. Jisse usne banaya hoga sirf aur sirf mera ho jaane ke liye.
Ye baat usne aankhen band karke ek khoye huye lehze mein boli par uski aankhen tab ek jhatke mein khul gayi jab abhi kuchh pal pehle dekha wo dhundhla sa chehra uske dimaag mein dobara aa gaya.
Armaan – Chal achha tu dhoondh apni soulmate. Apan chala.
L 1 – Chala... Kidhar!? Aaj bhi College tafri karne hi aaya hai kya?
Armaan – Haan aesa ich samajh le. Waise Bade Bhaiya ne bulaaya tha. Bole kuchh kaam hai unhe.
L 1 – Chal theek hai main bhi chala class mein.
Dono ne haath milaaya aur wo ladka palat gaya. Par wo kuchh hi kadam chala hoga ke ek chit parichit si aawaz uske kaanon mein padi aur wo aawaz thi – “HEYYY... VISHWAS”...
Wo palta to apne aap hi uske chehre par ek badi si muskurahat aa gayi. Uss aawaz ki maalkin joki ek behadh hi haseen ladki thi, chalti huyi iske nazdeek aayi aur dono ne ek doosre ko hug kiya.
Vishwas – Aaj late kaise ho gayi?
Ladki – Arre yaar raaste mein Scooty puncture ho gayi thi. Ussi sab mein time lag gaya.
Vishwas – Chal aa to gayi na. Ab jaldi chal class ka time ho raha hai.
Ladki – Oh ho! Class ka time? Shreeman Vishwas Mhatre kabse classes ke liye tensed hone lage!?
Vishwas (Muskurakar) – Jabse Miss Shravani Classes ko bunk karne lagi hain.
Shravani – Ae kya bol raha hai! Main classes miss nahi kiya karti.
Vishwas – Achha aesa kya... To kal uss Aditya ke saath bike par chipak ke kidhar jaa rahi thi?
Shravani iss baat par thoda sa hadbada gayi aur ye dekh kar Vishwas ki muskaan gehri ho gayi.
Vishwas – Hmm.. Hmm.. Boliye naa Madam kaahe chup ho gayi?
Shravani – Tu kitna kameena hai re. Koyi aese poochhta hai kisi ladki ko?
Vishwas – Nahi. Par tu ladki kidhar hai!!
Ye bolkar wo wahaan se bhaag gaya aur idhar Shravani usse jaate dekh kar muskurane lagi. Aur fir halke se “Bandar” badbada kar aage ki taraf chal padi.
College Auditorium...
Kuchh classes ke baad sabhi students ko yahaan iss auditorium mein bula liya gaya tha. Kaaran, aaiye jaante hain. Saamne stage par khade hain College ke Director saahab aur kuchh bol rahe hain.
Director – Students, I feel very proud to announce a new feather in our College's Cap. Iss baar bhi hamare hi College ne National Music Fest mein first prize jeeta hai. Aur pichhle teen saalon ki tarah hi iss baar bhi the winner iss Vishwas Mhatre... Vishwas come on the stage my boy!!
Apna naam sunkar Vishwas stage par pahunch gaya aur usse wahaan dekh kar Jahan Shravani ka chehra khila hua tha wahin un students mein maujood ek ladki ka chehra bhi dekhne yogya tha. Ye wahi ladki thi jo subah parking mein bhi maujood thi. Wo bas saamne stage par khade uss ladke ke chehre ko dekhe jaa rahi thi aur tabhi uske munh se halke se aawaz nikli – Vishwaaasss...
Aur agle hi pal wo khud hi hadbada gayi. Khair, idhar Vishwas ko Director Saahab ne puraskrit kiya aur jab wo Stage se neeche aaya to Shravani bhaagkar uske nazdeek aayi aur uski peeth par ek jama diya...
Vishwas – Aahh... Kya karti hai Chuhiya!!
Shravani – Kya bola tune?
Vishwas – Kya bola... Tera naam bola Chuhiya, aur tu ye haath zyada mat chalaya kar. Din ba din hinsak praani banti jaa rahi hai.
Shravani – Tu kya bolta rehta hai re... Main to tujhe shaabashi de rahi thi. Mera sar ooncha kar diya tune!
Vishwas – Jeeta main to tera sar ooncha kaise hua?
Shravani – Arre hum dono alag thode hi naa hai. Tu jeeta to matlab main jeeti. Laa idhar de meri trophy.
Vishwas – Aeee... Halwa hai kya! Dost hai to dost ki tarah reh, girlfriend kyon banti hai!
Shravani – Teri girlfriend!! (Laughs) Teri girlfriend. Kya joke maara hai!!
Vishwas – Hass kyon rahi hai. Maana ke tu thodi ajeeb dikhti hai par main chehron ki beizzati nahi karta.
Shravani – Lekin main to karti hoon naa, teri girlfriend. Dekhiyo tu single hi marega, tere jeevan mein nahi aa sakti koyi ladki.
Vishwas – Aese kaise... Dekh liyo iss raanjhe ke liye bhi koyi naa koyi Heer zaroor aayegi.
Shravani – Aaye haaye... Chal nikal idhar se warna ladki aaye naa aaye lekin Professor zaroor aa jaayega.
Vishwas bas munh banaakar udhar se kuchh badabadate huye nikal gaya wahin Shravani bhi hanste huye uske peechhe hi chal di. Wahin wo ladki bechari in dono ko yun ek doosre se baat karte dekh ek anjaane se bhaav ke dayare mein ghir gayi thi lekin jaldi hi is sab ko apne dimaag se jhatak kar wo bhi apne raste chal di.
Shaam ke samay ek ladki ek room mein baithi apni kitaabon mein ghusi huyi thi ke tabhi uske room mein ek mahila aati hai.
Mahila – Bas kar MAANVI kitna padhegi. Chal band kar ab books ko.
Maanvi : Kya Aai... Sab log apne bachon ko zabardasti padhaate hain aur aap mujhe padhne se rok rahi ho.
Mahila (Uske sar par haath firakar) – Kyonki meri laado hai hi itni samajhdar. Usse kuchh bhi samjhane ki zaroorat hi nahi padti.
Maanvi (Smiles) – Haan wo to main hun. Achha Aai main zara market jaakar aati hoon. Kuchh books leni hain mujhe.
Mahila – Thik hai. Jaldi aana lekin!!
Maanvi bas muskurakar haan mein sar hila deti hai. Khair, wo apni Scooty uthaakar market ki taraf nikal jaati hai par abhi wo road se baahar ki taraf mudd hi rahi thi ke uska Scooty par se Control chhoot gaya aur usne seedhe saamne se aa rahi ek bike mein Scooty thok di. Dono hi vaahan gir chuke the aur vaahan ke oopar baithe shakhs bhi. Tabhi jo ladka Bike par tha...
Ladka – Andha hai kya Mada...
Aage ki baat uske halak se baahar hi nahi nikli jab usne saamne dekha. Shayad aap samajh hi gaye honge ke ye ladka koyi aur nahi balki Vishwas hi tha. Wo bas saamne road par giri uss ladki ko dekhe jaa raha tha jiski nazar bhi Vishwas par hi tiki huyi thi.
Wo lehraati huyi zulfein... Wo sehmi si aankhen... Wo lazraate honth aur wo masoom sa chehra. Vishwas ke dimaag ne uske kadmon aur haathon ko aage kya karna hai bataya aur Vishwas bhi uski baat maan gaya. Wo utha aur Maanvi ki taraf badha. Maanvi ko laga ke wo museebat mein fans chuki hai aur aakhir accident bhi to uski hi galti se hua tha. Par tabhi Vishwas ne uski taraf haath badhakar usse hairaan kar diya. Maanvi ne uska haath thaama aur uth gayi. Fir Vishwas ne uski Scooty aur apni bike bhi uthaayi aur bola,
Vishwas – Aap theek to hai naa?
Maanvi – J..Ji.. main theek hoon... Wo Sorry maine... Ye galti se hua!!
Vishwas to bas kisi aur hi duniya mein pahunch gaya tha uss madhur aawaz ko sunkar. Kuchh pal ke viraam ke baad wo bola,
Vishwas – Koyi baat nahi par aage se dhyaan se chalaiyega!
Maanvi bechaari to hairaan reh gayi ke usne bina koyi hungama kiye aese hi baat taal di. Par abhi usse ghar jaane ki jaldi thi isiliye wo Vishwas ko ek baar fir Sorry kehkar apne ghar ki taraf nikal gayi. Idhar Vishwas putla bana bass usse jaate dekhta raha aur bass dekhta hi raha...
Stay Tuned...