Shreyas ne ek pal anshika ke hath se nikali anguthi pakde rakhi aur phir uski ankhon mein dekhte hue apni ungli mein dal li.
" shreyas ye kya... k...k..iya " anshika ne behad dhimi awaz mein ruk-ruk kar kaha par shreyas bina kuch bole use alag hua aur thoda piche ho gaya. Hairani mein anshika ki nazre shreyas ke uppar se utar hi nahi rahi thi. Nidhi aur amb bhi thode pareshan the ki kya chal raha hai, kisi ko nahi pata tha ki akhir hua kya hai lekin bahut jaldi hi unki pareshani hairani mein badal gayi kyun ki uske baad jo samne hua use ankhein aisi khuli reh gayi jaise palke jhapkana hi bhool gayi ho.
Anshika kuch kehti use pehle shreyas ke chehre par muskan ayi lekin jaldi hi vo muskan chhoti hoti chali gayi, use aisa lagne laga jaise pet andar se khinch raha ho, sans chhodni ki jagah vo gehr-gehri sans lene laga jiski awaz saaf sunai de rahi thi ' siuhh siuhh siuhh ' naak se sans andar khichte hue uski naak sikudti aur pet ki nas khinch jatti jiske sath hi vo achanak se ghunte ke bal baith gaya. " shreyas... " usko girta dekh anshika bhi niche baithi aur shreyas ke kandhe par hath rakh kar use uppar dekhne ke liye chillane lagi lekin shreyas ne sar jhukaye rakha, uska hath farsh par tha jise uska sharir zameen par girne se bacha hua tha, reh-reh kar uska sharir jhatke khane laga.
" shreyass.... " anshika chillai aur uske baad shreyas ne apna sar uppar uthaya jise dekhte hi anshika jis tarah baithi thi usi tarah baithi reh gayi. Shreyas ka chehra is waqt pura lal ho chuka tha mano sara khoon uske chehre par utar aya ho, muh khula hua tha aur dant samne ki taraf khil kar aa rahe the mano vo kitni takat laga raha ho, dekhte hi dekhte chehre par nason ki lakeer banni shuru ho gayi aur pura chehra un lakreeno ke piche chup gaya. Uska chehra anshika ke chehre se behad kareeb tha isliye anshika uski thandi sanson ko apne chehre par mehsus kar paa rahi thi. Vo chillana chahta tha lekin awaz jaise khoon mein mil gayi thi aur andar hi dab rahi thi tabhi vo chehra aisa ho gaya tha par agle hi pal vo chillaya ' aaaaaaaaaaaaaaaaaahhh aaaaaaaaaaaaaaahhh ' jo chekh usne daba rakhi thi vo nikal gayi aur anshika uski shakti ki wajah se piche ki taraf gir gayi aur gole se bahar aa gayi. Shreyas ke chillane ki awaz ke sath kamre mein anchayi hawa maujud ho gayi aur sabhi ke chehre par padne lagi. Shreyas ko dard mein chillata dekh, anshika furti se aage badhne ko hui aur usi pal guruji ne amb ko ishara kiya jise samajh amb ne anshika ko pakad liya aur use aage jane se rok diya.
" shreyas.. shreyas.. " dari sehmi anshika chillaye jaa rahi thi usne is baat par dhayan nahi diya ki use pakad liya gaya hai. Achanak se kamre mein maujud hawa band hui aur shreyas ne chillana band karte hue apna sar vapis jhuka liya. Kamre mein ek pal ke liye khamoshi cha gayi jaise sab kuch sahi ho gaya hai lekin ankhein kuch aur hi dikha rahi thi, shreyas ka sharir abhi bhi jhatke kha raha tha jaise uske sharir ke andar koi hal-chal chal rahi ho. " shreyas tum theek ho " anshika ka man sehma hua tha uska kya wahan maujud har kisi ki yahi halat thi. Vo aage jana chahti thi lekin amb ne use pakad rakha tha, ek pal anshika ne uski aaur dekha aur kaha ki usse chhode lekin usne na mein sar hila diya. Nazre phir shreyas ki aaur muddi jahan Shreyas mein Koi halchal na pakar sabhi ke man ko jaise tassali mili aur khas kar ki anshika ko, uski sansein is waqt sabse jada tez thi. Usne wahin baithe-baithe jhuk kar shreyas ke chehre ki taraf dekhne ki sochi aur sochne sath hi vo niche jhukne lagi aur abhi usne jhuk kar dekhne ki kosish kari hi thi ki usi pal
Shreyas ne chillate hue apna sar uthaya aur is baar uske chehre ke piche ek badlav nazar ane laga ' aaaaaaaaaaaaaaaaaahhhh aaaaaaaaahhhhhhhhhhhh ' awaz shreyas ki nahi thi aur na hi samajh aa rahi thi ki kiski hai kyun ki kabhi vo ek dum bhari ho jati to kabhi ek dum patli jaise hazaron awazein uske andar se bahar aa rahi ho. Chehre ke badlav mein aisa laga mano uske chehre se kuch bahar aa raha ho aur wahi takleef uske muh se nikal rahi ho aur phir hua bhi kuch aisa hi. Shreyas ke chehre ki khaal halki halki fatne lagi aur usi dauran hawa mein ek chehra bahar nikla jo juda usi ke chehre se hua tha. Hawa mein bahar atte hue us chehre ka akar bar-bar badal raha tha aur dekhne par saaf nazar aa raha tha ki vo chilla raha hai dahad raha hai bas awaz shreyas ke galle se aa rahi hai. Kuch ek do pal vo chehra hawa mein raha aur phir shreyas ke chehre se ja chipka jise dekhne ke baad sabhi apni jagah par seham uthe. Uske chehre ka haal badalne laga aisa laga jaise ek chehre ke piche kayi chehre ho kyun ki kabhi koi ek ankh niche ki taraf ati dikhti to kabhi ek ankh uppar, naak kabhi dayein aur jati to kabhi bayein aaur, honton ka jaise namo nishan mitt raha tha. ' guuuuuu guuuuu guuuu aaaahhahhhhhhhhhh ' chatt ki taraf dekhte hue shreyas itni zor se dahda ki uska sina kafi badh gaya aur uske kapdon mein chirne ki awaz ayi jiske baad vo samne se fatte gaye. Awaz ka shor itna jada thi ki hairani mein sabhi ghbaraye hue ek sath aa khade hue, kewal guruji apni jagah baithe shaitan ki shakti ko ghurte hue gehri sansein le rahe the. Shreyas ka yun cheekhna sabhi ke dil ko pathar bana chuka tha, ankhon ke samne manjar hi kuch aisa tha. Aur tabhi Kamre mein rakhi har chiz hilne lagi, farsh par pada rudraksh, jal rahe diye jo bhujte aur phir jal uthte, kamre mein roshni hoti aur phir andhera cha jata aur phir roshni vapis aa jati. Us shakti ka andaza guruji ko tab hua jab unki baithak jo ek bada pathar tha vo bhi hilne laga ye mehsus karte hi guruji ne mantr padne shuru kiye lekin uska koi asar nahi ho raha tha.
Shreyas chillate sath apni jagah se khada hua par ek jagah khada na reh saka, uske sharir mein chal rahi halchal ek pal ke liye use aage le ati aur phir agle hi pal use piche dhakel deti. Uska hath apne chehre par tha aur vo apna hath aise mal raha tha jaise chehre se kuch hatana chahta ho. ' baaaaaahahhhaaaaaaaaaaaaaaa ' chehra jhuka kar sabhi ki aaur dekhte hue vo dahhda aur usi pal uska sharir fisalte hue bayein aur badha mano use kisi ne wahan khinch diya ho. Bayein aur jatte hi vo deewar se takraya.
" shreyasss.. " amb se azad hone ki kosish karte hue anshika chillai, uski ankh se ansu gir raha tha. Nidhi ne bhi use majbuti se pakad liya tha. Abhi shreyas bayein taraf takraya aur phir fisalta hua dayein taraf itni tezi se aya mano kisi ne furti se use khinch liya ho. Dayein aur atte hi vo deewar se zor se takraya aur takrate hi niche girne laga lekin vo zameen ko chutta use pehle vo fisalta hue phir bich mein aya aur uppar chat se jaa chipka. Sabhi ki nazre chatt par thi jahan par shreyas chipka hua tha aur abhi abhi apne chehre se ladh raha tha. Ek pal ke liye vo wahin raha aur phir tezzi se zameen ki aaur aya use itni tezi se niche ata dekh ek cheekh anshika aur nidhi ke muh se fauran nikal gayi kyun ki vo agar itni tezi se zameen se takrata to uska sar fatt jata. Guruji ka bhi dil ek pal ke liye tezzi se dhadak utha aur jaise hi shreyas zameen ke najdeek aya vo ruk gaya, zameen se kuch hi inch uppar uska sharir hawa mein lehrane laga. Par jaise abhi kuch aur baki tha jab sabko laga ki ab shreyas ke sath kuch theek hoga usi dauran uska sharir hawa mein ghumta hua piche darwaje se zoron se takraya aur phir zameen par gir kar fisalte hue vapis usi gehre mein aa pahuncha aur sharir bejaan padh gaya.
" shreyasss.... " is baar anshika ne pakad chhuda li aur vo uske nazdeek pahunchi par jab usne gehre mein ghusne ki kosish ki to vo ghus na payi. Usne kosish ki par jaise koi cheez use rok rahi thi. Shreyas mehaz ek foot ki duri par hi hoga lekin vo uske najdeek nahi pahunch paa rahi thi. Usne ek pal piche guruji ki aaur dekha, ankh se nikla ansu abhi puri tarah nahi gira tha, shayad use umeed thi ki vo kuch karenge par unhone chehre ke bhav na badle jise dekh anshika samajh gayi aur ansu utar hi gaya. Usne apni nazre samne ki, shreyas karwat ke bal uske samne pith kiye laita hua tha, besudh, bejaan. Sans bhi chal rahi hai ya nahi kisi ko nahi pata. Anshika ne vapis aage janne ki kosish ki lekin vo adrishye deewar ne use wahin rok rakha tha " shreyas... ankhein kholo please, dekho meri taraf please aisa kabhi nahi hua jab tumne meri baat ka jawab nahi diya please please.. " anshika subakte hue boli, vo chah kar bhi uske pas nahi jaa paa rahi thi. " shreyas " is baar awaz itni dhimi nikli ki shayad us tak pahunchi hi nahi hogi. Bolte hue uski nazrein jhuk gayi aur bina awaz kiye ankhein band kare rone lagi. Nidhi ne apna muh hath se chupa rakha tha, shreyas ke sharir zinda nahi tha, sabke liye yahi satya tha " anarth ho gaya " guruji ko bhi yahi laga par agle pal shreyas ne gehri sans li aur pith ke bal laiite hue khasne laga ' ukhhunn-ukhunnnn '
" shreyas.. " chai mayusi achanak se raunak mein badal gayi aur anshika use awaz deni lagi. Shreyas sambhalte hue apni jagah se uth baitha aur phir usne anshika ki aaur dekha.
" ans..hik..a " behad dhire-dhire usne naam liya.
" shreyas.. shreyas.. " anshika ne hawa mein hi apne hath rakh rakhe the jaise deewar par rakhe ho. Uski ankhein band khul rahi thi isliye vo dhang se anshika ka chehra nahi dekh paa raha tha. Vo ek pal baad vapis pith ke bal lait gaya aur usne ankhein band kar li, ye dekh anshika ke chehre par ayi muskan hatt gayi.
" shreyas.. utho " gunjti awaz kano mein padi to uski ankhein khul gayi. Ankhein khulte sath hi awaz bhi saaf hui aur dhundla pan hatt gaya. Thodi mehnat lagi par shreyas apne pairon par aa khada hua.
" adhbhut " guruji ko jaise vishwas nahi ho raha tha aur na hi unhone umeed kari thi ki vo kahda hoga. Shreyas ko khada dekh anshika ke sharir mein khushi aur bekifiri ki lehar daud gayi. Yun to halat shreyas ki itni achi nahi thi, kapde fatte hue the, sharir halka jhuka hua tha mano kitna kamjor ho chuka ho, chehre par jagah jagah maas fatta hua tha, ankhein itni jada suji hui thi ki niche se ful chuki thi aur andar putliyun ke piche khoon utar aya tha. Ankhon ke theek samne anshika ko dekhte hue uski nazar amb se hote hue nidhi par gayi aur phir guruji par jaa ruki.
Usi din Subah
Guruji ankhein band kare dhyan mein baithe the aur phir unhone apni ankhein kholi aur samne shreyas ko khada paya jo na jane kab se wahan khada tha. Uski ankhon mein dekhte hue guruji bol hi uthe. " jo tu soch raha hai vo mei janta hun "
" achi baat hai guruji phir to jada samay nahi lagega "
" tu jo karna chahta hai vo niyati ke khilaf hai "
" niyati hamare khilaf ja sakti hai to kya hum use chunauti nahi de sakte guruji "
" mumkin nahi hai "
" mumkin hai guruji " guruji use aise dekhne lage mano har sawal ka jawab vo samajh kar aya tha " mei anshika ko nahi bhej sakta "
" iske alawa koi aur tarika nahi hai beta, uski dunia mein jakar sirf wahi us shaitan ko rok sakti hai "
" vo rok sakti hai guruji par mei use khatam kar sakta hun " shreyas ki baat sun guruji ki ankhein badi ho gayi " anshika ki anguthi par shaitan ne kabza kiya hai taki vo use paa sake lekin agar vahi anguthi uske pas nahi rahegi to ? "
" kehna kya chahta hai "
" vo anguthi mei pehnunga " ek pal ruk kar shreyas ne jab kaha to guruji unchi awaz mein bole.
" asambhav " vo ek pal shant rahe " tujhe malum hai ki tu kya keh raha hai "
" janta hun " shreyas ne guruji ko bich mein roka " janta hun ki mei kaun hun aur ye bhi janta hun ki agar us anguthi ko mene pehna to kya hoga lekin jaise bakiyun par usne kabza kiya usi tarah mei bhi unhi pret dunia mein kadam rakh chuka hun isliye majburan use mujh par kabza karna hoga "
" tere mein aur bakiyun mein farak hai tuje vo khud laya hai aur agar tu uske aur ladki ke bich aya to vo anguthi tujhe "
" kha jayegi guruji " shreyas ne phir baat puri ki aur bol kar vo muskura pada " samajh to usi din gaya tha jab anshika ke piche use mehsus kiya tha " vo bol kar ek pal shant hua, nazrein kahin aur thi jaise man kahin aur hota hai " aur ab agar mene use bhej diya to jo vo chahta hai vo use mil jayega guruji "
" kudrat ki bhi apni leela hai usne kuch aur soch rakha tha par tu usko chunauti dena chahta hai "
" pyar se badhi to kudrat bhi nahi guruji, anshika ki jagah mei jaunga aur apko meri madad karni hogi "
" tu maut ko dastak de raha hai agar tune us bachi ki anguthi pehen li to na jane kya hashr karega vo shaitan tera "
" anguthi se vo logon ko kabza karke unhe mar kar apni dunia mein le jata hai lekin aap jante hain ki ek marre hue ko marra nahi jaa sakta " shreyas ne guruji ki ankhon mein dekhte hue kaha to guruji kuch keh na sake shayad jo vo samjhana chahta tha vo samajh chuke the. " apko bas mera sath dena hoga taki mei uski dunia mein jaa sakun "
" aisa tumne kyun kiya, shreyas " [ Abhi ka samay ]
Anshika ki awaz sun shreyas ki soch tuti aur vo anshika ki aaur dekhte hue ek kadam aage badha bas itna hi to fasla tha dono ke bich " kyun kiya tumne aisa " dono bilkul kareeb aa khade hue the, uska hath dekh shreyas ne bhi usi tarah apna hath badhaya aur uske uppar rakh diya lekin bich mein bani adrishye deewar ke chalte ek dusre ko chu na sake. " bolo kyun kiya tumne " anshika ki bhari ankhein dekh shreyas muskura diya lekin uski ankhon ke dard ko dekh nahi balki use is kahani se azad karne ki khushi mein. Uske honth sukh chuke the aur mans fatt kar safed padh chuke the.
" mei tumse bahut pyar karta hun anshika isliye " pehli dafa aaj shreyas ne apni dil ki baat jaban par rakhi thi jo mauka vo pichle panch salon se khoj raha tha use nahi pata tha ki use vo aaj is roop mein milega. Shreyas ke muh se sun anshika tut gayi aur bhar-bharti hui rone lagi. Kuch kehna chahti thi lekin jazbat ne jaise jakad rakha tha, vo khud shreyas ki awaz vapis ane ke baad uske muh se yahi sunna chahti thi, zindagi mein bhale hi ek dusre se pyar tha par vo bedardi jaise lafzon ke khone ki wajah se kahin dil mein bas chuki thi. Aur kudrat ka khel dekho jab lafz aye to dono ko kareeb lakar bhi dur kar rakha tha.
" mei bhi apse bahut pyar karti hun shreyas " kisi tarah shreyas ko usne apne dil ki baat jawab ke roop mein kahi aur bechain ho gayi ek baar chunne ke liye. Ek baar usko apni bahon mein lene ke liye " please nahi.. pleasee nahi.. " vo rote hue bolti gayi " tum mujhe chhod kar nahi jaa sakte shreyas... " usne ek pal ke liye sans khinchi " hume chhod kar nahi jaa sakte " anshika ki ye baat sunte hi shreyas jaise ek pal use dekhta raha aur phir samjhte hi muskurate hue rone laga mano gum aur khushi dono ek sath havi ho gaye ho. Usne apni nazar jhukai aur hath ko khisakta hua vo anshika ke pet tak le aya par chu na saka.
" hume mat chhodo shreyas " anshika ne phir wahi lafz kahe to khushi ke sath dukh ke ansu uski ankhon se behta hua bahar aa nikla. Vo janta tha ki anshika maa banne wali hai aur use ye baat tab malum hua jab usne subah kamre mein vo test kit dekhi jiske bare mein anshika shayad batana chahti thi lekin itna sab hone ke baad usne jaan kar nahi bataya kyun ki vo janti thi ki shreyas use kabhi jane ke liye han nahi karega. Apne pyar ko aur uske vajud ko kaise chhod sakta tha isliye shreyas ne soch liya tha ki use kya karna hai aur tabhi usne anshika ko ye nahi dikhaya ki use malum hai. Baton ko joda to use ye tak samajh aa gaya ki us din anguthi nikalne par vo behosh kyun hui thi.
Shreyas ne apni nazrein uthai aur anshika ko dekh muskura diya " thank you anshika, thank you "
" nahi shreyas.. " anshika itna bol kar hi chup ho gayi kyun ki shreyas ek kadam piche ho gaya aur piche hota gaya. " shreyas.. kahan jaa rahe ho tum " vo rote hue chillai, dard uske zehan mein is kadar badh gaya ki sharir kanpne laga. Vo nidhi ki aaur mudi " nidhi ise pucho ki ye kahan jaa raha hai, roko ise " par nidhi kuch na boli vo apne aye ansu ko pochti itne mein dusra aa jata " shreyas... " nidhi ne jab kuch nahi kiya to vo phir shreyas ki aaur dekhne lagi. Shreyas use ab kafi dur ho chuka tha, use dur jata dekh anshika adrishye deewar par hath marte hue use todne ki kosish karne lagi " shreyasss... shreyas... aaannnnnn " uske pairon ne jawab de diya aur vo wahin bikhar kar niche gir padi aur zor-zor se rone lagi. Sab majbur the, sabke samne ye ho raha tha lekin koi kuch nahi bola koi bhi us ladki ke liye aage nahi aya bas bhoot ban uske dard ko sunte rahe. Par shreyas janta tha ki is dard ke piche vo apna vajud chhod kar jaa raha hai apna pyar aur zine ki wajah chhod kar jaa raha tha. Usne anshika se nazar hata kar guruji ki aaur dekha jise dekh vo samajh gaye ki kya karna hai. Unhone apni ankhein band ki aur shreyas ne wahan rakhi ek pin utha li jaisi asyalum mein thi par ise 'om' shabd se piroya gaya tha.
Guruji apne mantr padte gaye aur shreyas ne use apne sine ke bich mein rakh liya. " shreyas naaahi... nahi shreyas.. " anshika dekhte hi chillai aur guruji ne ankhein khol di aur theek usi waqt shreyas ne us pin ko apne sine mein ghusana shuru kar diya. Pin ke ghuste sath hi uski ankhon ke samne ka mahol badlne laga jahan vo ek kamra tha ab ek khuli jagah mein badal gaya tha bilkul wahin jahan se kahani ki shuruwat hui thi usi bangle ke bahar. Shreyas ki nazar anshika par thi jo use kuch dur baithi thi aur uske alawa koi aur nahi tha, use dekhte hue usne pin ko apne andar aur ghusaya aur vo uske dil ko chu gaya jiske baad uski pakad pin se chhut gayi aur vo niche gir pada.
" shreyasssss........... " uske girte hi anshika aisi chikkhi mano apni awaz ke sath apni zindagi bhi de di ho usne. Shreyas ki ankhein band thi, sine se khoon nikalta hua farsh par failta gaya aur phir vo bejaan ho gaya.
" Aah--hh " achanak se ankh khuli to paya jaise mei kahin maujud hun par kahan ye samajh nahi aa raha tha. Andhera bahut tha aur sine mein thandi hawa lagti mehsus ho rahi thi. Ek pal samjhne ki kosish karta raha ki ankhon ke samne kya hai par jab agle pal samajh nahi aya to apni jagah se uth khada hua aur jaise hi nazar samne gayi to samjhne mein der nahi lagi ki mei kabristan mein khada hun.
mega.nz
....apun ne H1 ke 1st update par bhi rebu diya tha 
