" apne bataya tha guruji ki usne mujhe shaitani dunia mein nahi bheja tha agar nahi toh vo kaun si jagah thi? kaisa mayajaal tha vo ? " shreyas ke sawal mein uski hairani chupi thi jise guruji ne apna jawab dekar dur kar diya.
" vo mayajaal shaitani dunia nahi balki hamari dunia aur uski dunia ke bich ki jagah thi " guruji ki baat sun shreyas ek pal ke liye hairat mein aya " uske pas itni takat nahi thi ki vo tujhe apni dunia mein le ja sake aur vaise bhi uska maksad tujhe apni dunia mein bhejne ka tha hi nahi " guruji ke kehte sath hi shreyas sochne laga jo bhi us din uske sath hua tha aur jaise usne baat jodi tab use samajh aya ki us din usne kin baaton par dhayan nahi diya tha.
" yani vo us din mujhe darwaje par rokne wala koi nahi balki harshit papa the aur pankhe se latakti hui vo aurat shilpi maa thi jo mujhe mana kar rahi thi " shreyas ko apne par gussa ane laga, us waqt usne sirf apni manzil ki taraf dhayan diya aur kuch bhi socha hi nahi. " usne jo bhi kiya vo " shreyas ek pal ke liye tehra.
" jaruri tha taki tere jariye apni shakti vapis hassil kar sake " guruji ki batein aur hui ghatna ko dekhte hue samajh aa gaya ki us din kya ghata aur uske piche ka sach kya tha.
Shreyas ek pal chup raha " toh kya is baar bhi kuch aisa hi karna hoga mujhe uski dunia mein jane ke liye " shreyas ko laga ki use wahi dard sehna hoga.
" nahi, jo usne kiya us tarike se tu uski dunia mein nahi pahunch sakta "
" phir kaise? "
" jab bhi ek atma ek dunia se kisi aur dunia mein parvesh karti hai to use sabse jada takleef ka samna karna padta hai " guruji ek pal chup hue par shreyas ko samajh nahi aaya ki unke piche ka matlab kya hai " dard dil se juda hota hai, tujhe use rokna hoga " ek pal laga lekin shreyas ko jaise hi samajh aya uska halak sukh gaya.
" theek hai " vo agle hi pal sochte hue bola, guruji hairat bhari nighaon se use dekhne lage " tu tayar hai? "
" han guruji " uske baad guruji ne use bataya ki kaise vo us dunia mein jaa sakta hai basharte agar vo anguthi ke prakop se bach gaya to, use dard utna hi sehna tha jitna uske dil se juda ho. Guruji ne us pin par apne bholenath ki shakti ko jod diya tha aur jaise hi vo pin shreyas ke sine mein ghusi aur uske dil ko chuhi uska dil wahin ruk gaya aur sharir bejaan zameen par padh gaya.
" shreyasssss........... " uske girte hi anshika aisi chikkhi mano apni awaz ke sath apni zindagi bhi de di ho usne. Vo bina halchal hue sharir ko dekh rahi thi, sanson se ankhon tak umeed thi ki vo abhi jagega lekin harkat jaise uske sharir ko chhod kar jaa chuki thi. " naaahhhiiiiiiiiiii " anshika itni zor se cheekhi ki usne apna dard awaz ke roop mein kamre ko dubo diya.
" Aah--hh " achanak se ankh khuli to paya jaise mei kahin maujud hun par kahan ye samajh nahi aya. Andhera bahut tha aur sine mein thandi hawa lagti mehsus ho rahi thi. Ek pal samjhne ki kosish karta raha ki ankhon ke samne kya hai par jab agle pal samajh nahi aya to apni jagah se uth khada hua aur jaise hi nazar samne gayi to samjhne mein der nahi lagi ki mei kabristan mein khada hun.
Kabristan mein kaise aur kyun? Abhi bas ye samjhne ki kosish hi kar raha tha ki achanak ek shor ki aaur mera dhayan gaya aur samne dekhte hi hairat mein ruh kanp uthi. Mere theek samne ki kabar mein se ek hath uski parat todte hue bahar nikla aur apni ungliyun ko khol band karne laga, hath se mitti jhadti hui niche gir rahi thi jiske sath hi kabar ki puri parat mein darar padti gayi aur ' kaaad-aaaaaaak ' awaz hui aur kabar tut gayi jiske andar se ek bacha bahar nikla. Vo theek mere samne kuch hi duri par tha isliye uska chehra saaf dikh raha tha. Sharir par koi kapda nahi tha aur na hi sharir par maans bacha hua tha, jagah-jagah se haddi dikh rahi thi chote chote kide chal rahe the, sharir ko dekhte hue nazar chehre par gayi to wahin jami reh gayi. Chehra adha tha aur adha haddi ban chuka tha joki khokli thi aur us taraf ankhein tak nahi thi phir bhi dekh kar saaf nazar aa raha tha ki vo kitne gusse mein hai. Kano ke uppar ka mans nahi tha aur kide uspar chipke hue the. Use dekh mera halak sukh gaya, vo us waqt tak wahin khada jism se bachi kuchi mitti jhadne ke baad kabristan ke andar chal pada. Mei use jata dekh hi raha tha ki tabhi kuch aisa dekha ki hairat bhari nighaein aur badi ho gayi. Vo dahi foot ka bacha dhire-dhire bada hone laga aur dekhte hi dekhte hi uska kad che feet ke labhag ka ho gaya aur meri ankhon se ojhal ho gaya. Na jane kitne samay tak mei usi disha mein dekhta raha jabki wahan ab sirf andhkar tha. Dhayan mera tab tuta jab mere kano mein awaz padi.
" shreyas... shreyas... " awaz fusfusane wali thi aur mera hi naam le rahi thi. Mene nazar fauran awaz ki disha mein ghumai lekin na to koi dikha aur na samajh aya ki awaz kidhar se aa rahi hai " idhar.. idhar.. " abhi bhi usne usi taraf fufsuaya aur gehri gehri sansein lene laga. Awaz samne se aa rahi thi jahan se vo abhi bacha kabar tod kar nikla tha. Mene ek kadam uthaya aur us taraf bada " han.. shabashh.. siiiii " awaz kahin aur se nahi balki kabar ke andar se aa rahi thi. Mei uske nazdeek jaa khada hua aur wahin se andar jhankne laga. Kabar khali hi honi chahie thi lekin andar kuch theek se dikhai nahi de raha tha. Mene galle se thuk andar kiya aur vahin baith gaya kyun ki vo awaz abhi bhi fusfusati hui mujhe apni aaur khinch rahi thi. " shabash.. aur niche.. niche " na jane kya tha us bhari awaz mein jo kano ko achi lag rahi thi par dil ko zoron se dhadakne par majbur kar rahi thi. Mei niche ki aaur jhuk kar andar dekhne laga ki achanak se ek hath kabar se bahar nikla aur usne mera sar pakad kar andar khinch liya jiske sath hi kabar ke andar mitti bhar gayi aur uski tuti hui parat jud gayi.
Anshika ki sansein abhi bhi tez thi, vo us adrishye deewar se aise chipki baithi thi mano bas ek pal mil jaye to vo abhi us paar chali jaye. Eka-ek vo piche ki aaur mudi aur guruji ki aaur dekhte hue apni jagah se khadi hokar unke samne hath jodh kar ja baithi.
" ye kaisi maya hai jo mei apne shreyas ke pas tak nahi jaa paa rahi " vo rote hue boli isliye adhi baat uske gale mein hi ruk rahi thi. Guruji use dekhte rahe par kuch bole nahi " kyun kar rahe hain aap sab mere sath aisa ? " usne guruji ki taraf se nazar hata kar amb aur nidhi ki taraf dekha par dono mein se kisi ne kuch nahi kaha. Uski sansein bekabu hoti jaa rahi thi, vo itni gehri sansein lene lagi mano jaan kar le rahi ho.
" please mei hath jodti hun ek baar mujhe uske pass jane dijeye, usko meri jarurt hai " chalak aye ansu par anshika ne guruji se nazar hata kar piche ki taraf dekha to vo ansu zameen par gir pada. Madad na milti dekh vo vapis wahin jaa baithi. Anshika ki halat par sabhi dukhi thi lekin guruji kuch nahi kar sakte the kyun ki jo kuch ho raha tha vo shreyas ki marzi se hi ho raha tha.
Usi din Subah
" apki ek aur madad ki jarurat padegi "
" jo kehne jaa raha hai uska andaza hai tujhe "
" apne hi kaha hai na guruji ki rishta dil ke dard se juda hona chahie " abhi baat kahi nahi thi lekin uski ankhein bharne lagi " mei nahi chahta anshika mere kareeb pahunch sake apko mere aur uske bich wahi deewar khadi karni hai jaisi us shaitan aur uski dunia ke bich khadi hai " kehte hi ansu palkon se niche utar aya.
Ankh ek jhatke mein khuli to khud ko is baar kahin aur laita paya, is baar mitti par laita hua tha aur ek ajeeb sa ujala maujud tha. Asman nila tha par roshni nahi thi ek alag hi tarah ka asman sar par tha jisme se na to koi roshni atti pratit ho rahi thi aur na hi andhera tha. Mene asman ko bhanpte hue apni meri nazar dayein aaur modi to ek jhatka dimag mein laga dayein aaur bilkul andhera tha, itna ghor andhera ki sirf andhkar hi dikh raha tha mano roshni ka koi matlab hi na ho. Abhi mei us andhkar ko samjhne ki kosish hi kar raha tha ki mujhe kisi ke chalne ki ahat ne us taraf dekhne ke liye majbur kar diya.
Jaise hi nazar samne gayi, halak itna sukh gaya ki muh khula reh gaya. Vo wahi tha jo abhi thodi der pehle bache se apne bade roop mein aaya tha. Meri aur uski duri bahut kam thi isliye use saaf-saaf dekh paa raha tha. Sharir jitna badha tha utna hi jada kharab ho chuka tha, har jagah se sadha hua tha aur har badte kadam ke sath uske sharir se mans utar kar zameen par gir raha tha. Vo kuch kadam aur chala aur us andhere wali jagah ke samne jaa ruka. Meri nazar uske sharir par jada thi isliye jo vo kar raha tha uspar dhayan hi nahi diya. Pura sharir gal raha tha aur galne ki wajah se zameen par apni chaap chhod raha tha. Alag-alag jagah bade bade kide sharir ke andar bahar ho rahe the. Adhe chehre par mans nahi tha aur jo chipka hua tha vo fisal kar niche gir raha tha. Achanak vo chillaya jisne meri nazar uski harkat ki aaur modh di.
Usne apne hath uthaye jiski khal utar kar niche gir rahi thi aur samne rakh diye jaise koi adrishye deewar ho. Ye dekhte hi mei apni jagah se khada ho gaya aur vo chillaya ' haaaaaaaaaaaaaaaaaaaaaaaaaaaaaaaa ' Awaz usi ki thi ya kisi aur ki samjhna mushkil tha kyun ki vo shuru ek bache ki awaz se hui aur dhire-dhire badalte hue ek badi aur bhari awaz mein badal gayi jo mere kano ko chubne lagi jiski wajah se mujhe unhe apne hath se band karna pada. Uski cheekh mei mano koi kancha kanch se takra raha ho aisi chuban thi. Mene kaan to band kar liye the lekin awaz abhi bhi dab nahi rahi thi, nazar usi par thi aur usi wajah se uski ungliyu par padi to pehli dafa mene uski ungli mein anguthi dekhi jo bahut teevr matra mein chamak rahi thi aur uski chamak badhti hi jaa rahi thi. Uski cheekh badhti gayi to us anguthi ke sath uska sharir bhi chamakne laga. Uski takat ka ye nazara dekh mere hath khud ba khud kano se hat gaye jisme se khoon nikal aya tha par mera dhayan hi nahi gaya kyun ki agle hi pal uska hath us adrishye deewar ke andar ghusne laga aur andhere ke piche gayab hone laga.
Usi dauran uske chamkte sharir mein ek jhatka sa laga aur ek parchai roop kali parat uske sharir se alag hoti nazar ane lagi. Vo cheez uske sharir se alag hoti gayi aur phir ek aakaar mein badal kar use kuch dur jaa khadi hui. Usko dekh mujhe aisa jhatka laga jisne mere pure sharir mein kampan chhod di. Vo chehra mene pehle bhi dekh rakha tha kyun ki us chehre ki halat usi tarah bigdi hui thi jaisi mei pehle dekh chuka tha. Twacha kalla mans ban chuki thi, ek ankh mathe pe to ek niche honton ke pass, naak kaan kahan tha ye us chehre par khoj pana mushkil tha kyun ki maas utar kar niche ki taraf lataka hua tha.
" Ye to wahi deform chehra hai " usko samne khada dekh hi raha tha ki ek baar phir uske sharir mein se wahi parchai nikli aur ek aur deform shaks mere samne aa khada hua. Abhi ek aur baki tha, mene andaza lagaya jo ki theek hona tha aur hua bhi wahi. Ek aur deform shaks us sharir se alag hua aur teeno mere samne aa khade hue. Meri nazar teeno ke chehre se hote hue niche ayi to unke hath mein sirf ek hi ungli dikhi jisme vahi anguthi thi jo mene khoji thi. Anguthi pane ki lalsa mein mei aage badha par vo ring unke hath se gayab ho gayi aur phir vo teeno hawa mein mitti ki tarah mil kar wahan se ojhal ho gaye. Unke wahan se jatte hi mene dhayan diya ki ab vo shor bhi maujud nahi tha kyun ki mere samne vo bhi abhi us adrishye deewar ke andar sama kar us kalle andhere mein ja chuka tha.
Hairat aur khamoshi se mei vahan khada bas sab kuch soch kar jodne ki kosish karne laga aur tab mujhe samajh aya ki uski takat kaise tuti, vo adrishye deewar jiske bare mein guruji ne bataya tha jise vo lang nahi sakta tha lekin jo mene abhi dekha use yahi sabit hota hai ki usne apni anguthi ki takat se vo dehliz langne ki kosish ki aur usi dauran uski shakti ke teen tukde ho gaye jo mene abhi deform shaks ke roop mein dekhe par anguthi ki shakti is kadar thi ki vo un teeno ki ungli se gayab ho gayi aur vo bangle ke alag-alag hisson mein chip gayi taki uski takat use kabhi na mil sake. Par vo janta tha ki anguthi bangle ke andar hai lekin khud khoj nahi sakta tha isliye vo tab tak bangle ke bahar khade rahe jab tak mene unhe vo anguthi nahi dhund kar de di isliye vo har dum bangle ki hi aaur dekh rahe the.
" shreyas.s.. " soch mein dube hone ke karran bhool gaya ki kahan hun, ek thandi hawa kano ke piche padi aur mei ghabra kar mudh gaya jiske baad mujhe kuch bhi dikhai nahi diya kyun ki jahan mei khada tha wahan bilkul andhera tha. Samjhte der nahi lagi ki mei bhi us paar aa khada hua hun jahan thodi der pehle vo andar aya tha. Itna andhera shayad hi asli jeevan mein hota hoga. Dil zoron se dhadak raha tha aur halak sukne laga tha, itna andhera kabhi dekha nahi tha aur ab mehsus karke sharir mein kampan aa rahi thi, har pal lag raha tha jaise koi aage hai ya koi dayein taraf se mujhe dekh raha hai, koi mere najdeek aa raha hai to koi mere piche khada mujhe chunne ki kosish kar raha hai. Mene ek pal aage chalne ki sochi lekin tabhi mere per ruk gaye aur pasina mathe se fisal kar niche ane laga, jis baat ka dar sata raha tha vo shayad mujhse chipak gaya tha. Kisi ne mere per pakad liye the aur bahut zor se pakad rakhe the. Mene apni nazrein niche ki lekin dikh kuch nahi raha tha par mehsus ho raha tha ki kisi ne mere per pakad kar dabaye hue hai. Dhire-dhire hi sahi mene apne hath per ki aaur kiye aur jab wahan rakhe jahan se kisi ne pakad rakha tha tab mujhe kuch bhi nahi mila. Na jane kaun si maya thi ye par wahan koi maujud nahi tha.
Dil ko kisi tarah shant karte hue mene apni nazar uthai aur vo wahin uthi reh gayi aur dil shant ki jagah rukta hua mehsus hone laga. Nahi janta usne kaise kiya lekin itne ghup andhere mein bhi uska chehra saaf dikh raha tha mano vo andhere mein apne aap ko mujhe dikhane ke liye chamka rahi ho. Vo mere samne khadi choti ladki jiska adha chehra jala hua tha aur adha sahi tha mujhe ek tuk ghure jaa rahi thi. Kaun thi aur mujhse kya chahti thi sawal man mein ghuste hi jawab de gaya kyun ki usi dauran vo ladki muskurai aur vo parchai badal kar budhi aurat mein tabdeel ho gayi.
' amma ' muh se nikla ya dil ne kaha nahi janta lekin vo amma mere samne khadi thi jiski madad se anugthi aaj us shaitan ke pas thi. Abhi mene uski taraf hath badhaya use pakadne ke liye par phir vo badal kar usi ladki mein tabdeel ho gayi aur mujhe dekh muskurane lagi. Mene apne hath vapis khinche aur vo amma mein tabdeel ho gayi. Kya aur kyun is bade sawal ke sath uska jawab bhi shayad samne hi tha. Vo bar-bar apna roop badal rahi thi aur mei use samjhne ki kosish kar raha tha.
Abki baar jaise hi vo ladki bani to usne muskurana band kar diya aur mene use pehchan liya. Ye wahi ladki thi jise mene us din asalyum ki file mein dekha tha jo deceased person ki file thi lekin ye amma mein tabdeel kyun ho rahi hai, mei atka aur phir jo soch kar sach samne aya usne meri ruh ko kanpa diya. Asalyum mei koi amma thi hi nahi vo is ladki ki atma thi jo har ghadi har pal hamare sath thi aur usi ki atma ne humse vo sab karwaya jo vo shaitan chahta tha. Anshika ke samne bhi isi ladki ka sharir nasht hua hoga lekin hume dikha vo amma ka roop. Is ruh ne hamari ankhon ke samne amma ka roop badal kar hamari ankhon ko dhoka diya aur shayad iske piche usi ki shakti rahi hogi aur ye bhi samjh gaya ki agar ye ladki nahi marti to iska roop theek wesa hi hota jaisa roop humne amma ka dekha tha. Mei abhi ye samjhne ki kosish kar raha tha ki achanak mere samne ek behad khaufnak chehra aya shayad kisi ki ruh thi jo bahut gusse mein thi vo chillati hui mere najdeek aa pahunchi jiske chehre ki khal sadiyun purani ho chuki thi aur har hisse se katti hui thi, use apne najdeek ate dekh mene dar se apna chehra chupa liya.
Sansein tez thi, dar ne buri tarah se kabza kar liya tha phir bhi mene apne chehre se hath hataya aur ankhein kholte hi paya ki ab mei kahin aur hi khada tha, kuch samjhta use pehle paun jab dayein aur ghume to wahan dekh ankhein jam gayi.
mega.nz
???
thodi der mein ayega
