Update:-30
Sawalker…. Main bhi na kitna baḍa duffer huṅ. Asal mudde se bhaṭak kar bas apne temper me aa gaya. Nischal tum wahan gaye kyoṅ the aur ye kidnapping ka kya chakkar hai. Wo ladka aise behosh kyon para tha?
Nischal… Mujhe pata nahi sir uske sath kya hua tha. Main jab pahuncha tab wo kafi ghabraya hua tha. Aisa laga jaise kisi ne usse daraya ho.
Sawalker:- Maf kar de yar main thoda temper mein aa gaya tha, lekin bhai tera temper to bahut jyada hi ho jata hai. Chal ghar chhod dun. Dekhte hain subah wo kya bayan deta hai, fir dekhenge…
Nischal:- it's okey bade bhaiya, hum colony se thoda pichhe utar dijiyega, ek walk lenge…
Sawalker dono ko pichhe chhodkar wahan se nikal gaya.… "Kya hua kuch jaroori baat karni thi kya"..
Nischal:- Haan, Chirag ka dar dekhkar ek baat to samjh me aa gayi hai ki usne kuch bhayanak manjar dekha hai wo bhi kafi karib se…
Nandni:- Kis tarah ka manjar Nischal aur ye kitna bhayank ho sakta hai.
Nischal:- Main jyada thik se to nahi bata sakta lekin yun samjh lo ki koi tunhare aankh se samne kisi jinda insan ya janwar ko chir kar kha raha ho… jaise koi sher apne shikar ko jhapat raha ho aur ye sab tum apne aakhon se dekhte ho. Paun kapne lage ho aur ander se bhay satane laga ho ki ab uske sath bhi yahi hoga…
Nandni:- Bus bhi karo Nischal sunkar hi ajib lag raha hai, pata nahi uss bache ne kaise dekha hoga.. aur kitna dara hoga..
Nischal:- Haan wo bahut dara tha. Yadi usse behosh nahi karta to dimag ki nason me itna jod parta ki wo apna mansik santulan kho sakta tha.. Haan lekin ek baat aur, Chirag mansik roop se bahut majboot hai, tabhi tumhe phone laga paya.. .
Nandni:- lekin uske sath ye sab kiya kisne hoga…
Nischal:- jahan tak mujhe lag raha hai ye Kasak ke bahrupiye ka kaam hoga. Lagta hai yah alian koi narbhakchhiyon ka samuh hai, jinhe jinda mans aur garam khun pine me jyada maza aata hai.
Nandni, chaunkte huyi…. "Kya baat kar rahe ho, matlab film me sahi dikhaya gaya tha sabhi alian ke bare me".
Nischal:- Haan kuch kuch aisa kah sakti ho… filhaal doctor sahab ka socho.. mujhe lagta hai humra itna close hona, aur unhe chhod kar bahar nikal jana, unhe acha nahi lagta hoga…
Nandni:- Nahi acha lagega to wapas jayega.. jise jo sochna hai sochne de.. mujhe fark nahi parta... Bhagwan ne mujhe 2 best gift diye hain ek tu aur dusri Jivisha…
Nischal:- wahi dost jisne tujh se aaj muh mod liya..
Nandni:- Bura to mujhe bhi laga tha, lekin uski bhi apni majbooriya hogi. Chehra dekha uska, hansi chali gayi Jisa ki. Mujhe uski khamoshi achi nahi lag rahi..
Nischal:- Jyada filmy hoge na to yahi sab hona hai. Acha hua uske sath.. isi bahane kam se kam akal to aayegi.
Nandni:- Mere Jisa ke case me itna he kahungi ki kuch logon ko bhagwan ek jaisa hi banaye rakhe.. Ab chalo jara main apne doctor se mil lun.. tum kaminey, main bahut dino baad .. I feel love .. lekin tum kutte ki dum rang me bhang dal hi diya uspar se uska sir bhi tudwa diya..
Nandni ki baat sunkar Nischal hanste huye chal diya. Doctor sahab pattiyan laga chuke the aur Nandni uske pass pahunchte hi Chirag ki ghatna ko bata di. Uske baad kaise kaise kahani faste chali gayi sab kuch.
Nandni ki baat sunkar doctor sahab thode khush dikhe, lekin unhe bhi ab wapas lab jana tha… lab mein janwar ke humle ka ek aur case aaya tha, jiski janch aur salah ke liye Ansh ko bhi bulaya ja raha tha… Ansh dono ko wahin se bye bolkar nikal gaya…
Idhar Jivisha ka gahr….
Priya ke tane aur apne dost ke liye unke dwara kahe gaye shabd, Jivisha ko rah-rah kar rula raha tha, lekin kuch hi pal baad usse khyal aaya ki Chirag behosh para tha. Wo jabtak apne dard ko darkinar kar Chirag ka khyal layi tabtak sab log usse hospital le ja chuke the.
Jivisha se raha nahi gaya aur wo bhi hospital ke liye nikal gayi. Idhar Jivisha ke nikalte hi Kasak bhi uthi aur sidha Shresh ke ghar nikal gayi… jahan unki puri team baith kar kuch baten kar rahi thi.…
Tanisha (Bahrupiye Kasak ka naam).... Kya baten ho rahi thi, Apini..
Apini:- Bahut si baten hai jo tumhe janni hai, lekin abhi ye batao ki wahan ki kya khabar hai…
Tanisha:- Malkia (Jivisha) ki ikchha shakti bahut majboot hai. Main jyada uke pass rahi to mai pakdi ja sakti hun. Aaj jab tum unhe ghumane le gaye the, wahan kuch baat bani..
Apini:- Baat to ban jati lekin wo ladka bich mein aa gaya.
Tanisha:- Kaun wo Nischal..
Apini:- Tumhe uske bare me kya pata hai…
Kasak:- Aaj ek gadbad ho gayi. Main sher ka roop lekar, ek kutte ka bhakshan kar rahi thi aur uska bhakshan karne ke baad main Kasak bani, lekin ye sari ghatna us chhote ladke Chirag ne dekh liya.. main uska kuch kar pati usse pahle hi wo Nischal palak jhapkte hi wahan aa gaya aur fir wo ladka Chirag mere hath se nikal gaya.
Apini:- Hmmmm !!!! Matlab wo tumhare bich bhi aaya tha... Aur aaj din me mere aur Jivisha ke bich wo aaya tha... Wo koi insan nahi hai balki ek alian hai…
Tanisha, thoda chaunkti hui… "tumhe kaise pata"..
Apini:- Jis din Adirishi janwar ne usse chira aur wo humle ke baad jis tarah se uthkar baitha tha. Uske baad jitni jaldi wo recover hua tha, mujhe shak hua.. maine yeh baat Rijo ko batayi aur Rijo uska pata lagakar uske grah par gaye the…
Tanisha:- kaun se grah ka hai wo…
Apini:- Aizem grah ka prani hai wo..
Tanisha:- wahi jabajon ka grah jinki sharirik kshmata aur urja kamal ki hoti hai aur wo kisi bhi jakhm se jald hi ubar aate hain.
Apini:- Haan ussi ghrah se hai wo..
Tanisha:- Fir to humare Malkia ke bich me wo khada hai. Pahle usse khatam karo fir Malkia ke bare me sochenge, kyonki wo raha to pakka kaam kharab karega. Upar se Malkia bhi uss se kafi aakarshit hai. Abhi to khair unke dil me kuch nahi hai, lekin jis tarah ka judaw dikhta hai.. koi bhadosa nahi..
Josefer jo ab tak shant baitha tha…. "Hume Rijo ne bataya ki uspar abhi hath nahi dalne.. usse marne me madad karne ke liye Aizem grah ke 2 sabse shatir marak aa rahe hain… ha ha ha ha ha..
Uski baat sunkar sab log aatahas laga kar hasne lage…. "Kuch jyada nahi in Aizem walon ko khud par bhadosa hai".... Apini hanste huye kahne laga..
Josefer:- Kal raat ko hi dekh lenge ki wo apne Adirishi janwar ke aage kitne der tak tikta hai. Lekin uss se pahle Kasak ke dimag me sari yaden dalo, taki 1-2 din mein hum usse chhod sake.
Tanisha:- Haan main bhi yahi kahne aayi thi.. main jyada dino tak Malkia sath rah gayi to, ho sakta hai Malkia ki ikchha shakti kuch jagrit ho jaye…
Apini:- thik hai tum jakar Kasak ke dimag me wo sab yaden dalo, jo uske na hone par tumne kiya hai. Idhar main aur Josefer Adirishi ko kal ke liye taiyar karte hain.. taki Aizem se pahunchnewale logon ko kal hi hum unhe tohfe me uss Nischal ki lash gift kar sake…
Idhar Chirag hospital me admit ho chuka tha aur ghar ka ye chhota sadasya itna pyara tha ki har kisi ne apni raat aakhon me kat liya… raat bhar Priya aur Hismanshu Jivisha ke sath-sath Nischal aur Nandni ki buraiyan karte rahe.
Jivisha ki bhabhi Nandita abhi iss haalat me nahi thi ki apne saas-sasur se koi bahas kar sake, lekin lagatar diye tano ko sunkar uska bhi dimag kharab ho raha tha. Jab Nandita se bardast nahi hua tab wo Jivisha ko hospital ke dusre hisse me le aayi. Wahin uske sath baithkar intzar bhi karti rahi aur sath me Jivisha ko bhi shant rakhe hui thi.
Sab log jahan baithe the, wahin pade-pade kab unki aankh lagi kisi ko pata bhi nahi chala, lekin Jivisha lagatar jaag kar bus apne betu ke jagne ka intzar kar rahi thi.
Subah ke 8 baje ke karib Chirag ko hosh aa gaya tha... Uske hosh mein aate hi doctor ne sabse pahle thane me suchna di aur baad me aakar unke pariwar jano ko iktala kiya..
Chirag ke jagte hi pura pariwar ander gaya. Chirag shant hokar bus sabko dekh raha tha... Jaise hi uski najar Jivisha par gayi wo didi kahte huye jor se chillaya..
Jivisha uske pass pahunch kar uske sar ko apne gode me leli aur uske baal par hath ferne lagi… "mera bahadur beta itna ghabraya kyon hai. Shant.. bilkul shant aur ghabrane ki koi jaroorat nahi.. thik hai betu"..
Chirag thoda shant hokar kuch der tak sabko dekhta raha… issi bich sawalker bhi wahan pahuncha… "kuch bataya kya, kaise behosh hua tha"..
Ravi:- aap kaisi baat kar rahe hain sir, abhi to hosh aaya hai usse…
Sawalker:- Oh sorry, kya abhi baat karne ke layak hai ya nahi…
Ravi:- Nahi ab bhi sadme mein hai.. pata nahi us Nichal ne mere bache ke sath kya kiya.. sab iski (Jivisha) bewakoofyon ki wajah se hua hai..
Sawalker:- Aap ka family matter hai ji, main kuch nahi kah sakta. Waise kya jab wo (Nischal) ghar par tha tab koi chori ki thi kya. Kimti saman ya gahne waigrah ki chori..
Ravi:- Nahi, kyon kya hua so..
Sawalker:- Bus yun hi pucha... Kal uss ladke aur ladki se meri baat hui… Nandni ye aap ki bahan ki kafi achi dost hai aur Nischal, Nandni ka kafi close friend hai.. ab bina chori kiye aap usse froud kah rahe to socha koi bahut badi wajah rahi hogi…
Sawalker ki baat sunkar sabhi kamosh ho gaye tabhi uski baat sunkar Chirag kahne laga… "Fufa ji ne kuch nahi kiya. Wo to maine ajib chij dekha to dar ke mare chhip gaya tha. Maine hi Nandni di ko phone kiya, fir fufa ji mere pass aaye the… main .. sans nahi le pa raha tha... Unhone apne muh se sans diya mujhe.. fir yun gale ke niche kuch kiya aur main so gaya"..
Piche se doctor bhi wahan pahunchte… "Aap logon ko thanks kahna chahiye usse, jisne bhi yah kiya hai… ye wakai me baut deep shock me tha. Itna bada shock iska chhota dimag jhel nahi pata".
