Update 291
Dopahar ko Aishwarya aur Prakruti ghar jaa aaye the, Aishwarya ke maan me kayi sawal the, wo apane pati ke sath bhi baat karna chahti thi par usko pata tha ki abhi waha raat hongi aur wo soya hoga to usne disturb nahi kiya. Wo jab tak waha ruki usne ye bhi dekha tha ki wo ladka Chandrika aur Yogendra ki kitni parwah kar raha tha, Krupali bhi un dono ki bahot parwah kar rahi thi, usko dekh ke lag hi nahi raha tha ki wo Udesinh ki beti hai, kyu ki jaha tak usko pata tha Udesinh wo vyakti tha jisne Yogendra aur uske parivar ko itna nuksan kiya tha. Sabse badi baat ye thi ki Chandrika un dono se bahot achhi thi, Shiv se aur Krupali se bhi. Wo ye sab samajna chahti thi, dusara usko apani beti ke bhavisya ki bhi chinta thi, agar wo ladka vahi hai jo wo samaj rahi hai to uski beti ke liye ye bahot achchha hai, par uski beti keh rahi thi ki wo Shiv hai aur wo us se pyar nahi karta hai, usne ye bhi dekha tha ki Shiv uski beti se samanya hi baat karta hai, uski najaro me aisa kuchh bhi nahi dekh rahi thi jis se ye lage ki wo Prakruti ko chahta hai, usko yakin nahi ho raha tha ki ye kaise ho sakta hai, kyu ki uski beti ek bade ghar ki beti thi, duniya ka koi bhi ladka apane aap ko bhavyashali samjega jo usko aisi ladki mil jaye aur sath me itna sara paisa bhi, par Shiv aisa nahi tha. Ye sab dekh kar uski uljhane aur badhti ja rahi thi, usko intejar tha to bas raat ka. Raat ko wo aur uski beti fir hospital pahuch gaye, aupcharik baate hone ke baad Shiv, Prakruti aur Krupali waha se nikal gaye, Krupali taxi se aayi thi to Prakruti dono ko chhodne ke liye unke ghar chali gayi.
Vashisth bhi ghar aa gaya tha, Krupali ne sab ko bata diya tha ki wo apane chacha chachi se milne ke liye hospital gayi thi, sab ko pata chal chuka tha ki wo Shiv ke hi mata pita hai to unhone koi aitraj karna hi nahi tha. Unhone bas unki khabar puchhi.
Raat ko sab nipta kar Chandrika aur Aishwarya ab akele sofe par bethe the, Yogendra so chuka tha.
Chandrika : Puchh kya puchh na chahti hai? (Uski itni sidhi baat se Aishwrya hairani se usko dekhne lagi, Chandrika bas muskurayi)
Aishwarya : tumhe kaise pata ki me tumse kuchh puchhna chahti hu.
Chandrika : Me samaj sakti hu ek beti ki maa ke dil ki baat.
Aishwarya : To batao na, kya wo Shivans hi hai?
Chandrika : Tumhe kya lagta hai?
Aishwarya : Muje uljao maat, muje sidhe sidhe batao ki wo kon hai?
Chandrika : Mera fir bhi yahi sawal rahega ki tumhe kya lagta hai?
Aishwarya : Sach kahu to muje lagta hai ki wo Shivans hi hai.
Chandrika : Agar lagta hai to fir khud par bharosa nahi hai?
Aishwarya : Tum nahi janti ki yaha kya chal raha hai, humne chhanbin karwayi thi to pata chala ki is ladke ko Udesinh paise le kar laye hai.(Aishwarya uske chehre ko dekhne lagi jaise jan na chahti ho ki is baat se usko kya fark pad raha hai, par wo shant hi thi) Kuchh to bolo.
Chandrika : Kya bolu?
Aishwarya : Tumhe kya lagta hai ki me juth bol rahi hu, sach me Sukhdev ne janch karwayi thi to pata chala ki wo kiraye par rakkha gaya hai aur usne bhi ye baat kabul ki hai.
Chandrika : Agar aisa hai to fir tum maan lo ki wo, wo nahi hai, samasya kya hai?
Aishwarya : Tum aisa kyu kar rahi ho, kyu muje ulja rahi ho?
Chandrika : Me ulja nahi rahi hu, jo tum janti ho wo me bhi janti hu, bas sawal ye hai ki kya jo tum janti ho wo tumhe sahi lagta hai ki nahi. Tumhari khud ki ankhe hai aur tumhari samaj bhi, aur sach kahu to abhi mere pass bhi is baat ki pusti karne ka koi praman nahi hai, aur na tumhari pass koi praman hai ki wo sahi hai ya galat, par kya tumhara dil ye baat man ne ko taiyar hai ki wo galat hai? (Wo usko dekhne lagi)Chalo chhodo us baat ko, chalo ek baar maan lete hai ki wo galat hai aur Udesinh ne hi usko yaha bheja hai, par kya karne ke liye? Agar uske aane se hamari sthiti me itna sudhar aaya hai to ye to achchhi baat hai na. Kya kehti ho?
Aishwarya : Sach to ye hai ki jo hua achchha hi hua hai, tum thik ho gayi, bhaisahab bhi coma se bahar aa gaye hai par fir bhi maan me shanka to ho hi rahi hai, socho agar wo Udesinh ka aadmi hi hai aur ye uski koi chal hai to?
Chandrika : Agar aisa bhi hai to bhi muje koi chinta nahi hai, agar bura hona hota to tabhi ho gaya hota, na me bachti na ye. Agar uparwale ne dono ko jinda rakkha hai aur aaj thik bhi kar raha hai to uska koi na koi maksad jarur hoga.
Aishwarya : Me unhe (Sukhdev) jald hi wapas aane ko keh dungi, wo hi wapas aa kar sab dekh lenge. Meri to sach me samaj kaam karna band ho gayi hai. Shiv dikhne me tum dono jaisa hi lagta hai, shayad isi baat ka fayeda Udesinh ne uthaya hai, me unse kahungi ki is baat ki aur chhanbin kare.
Chandrika : Tumhe jaisa thik lage.
Aishwarya : Me to uparwale se prarthna karti hu ki ye wahi ho, meri beti ne bahot saha hai, me nahi chahti ki wo aur sahe.
Chandrika : Ye sab to uparwale ke hath me hai, waise bhi humne jo unke bachpan me kiya tha shayad wo bade ho kar us baat ko na mane, bachche bade ho gaye hai, unhe apane jivan ka faisala khud hi karne dena chahiye.
Aishwarya : Ye kya keh rahi ho tum, agar wo tumhara beta ho to kya tum nahi chahti ki wo dono mile?
Chandrika : Mene aisa kab kaha, mene bas itna kaha ki wo un dono par chhod dena chahiye, tum apani beti ke bare me achchhe se janti hongi, wo kya sochti hai, kya karna chahti hai wo tumhe achchhe se pata hoga. (Uski baat sun kar Aishwarya apani beti ke bare me sochne lagi, usko bhi lag raha tha ki usko Shivans se koi lagav nahi hai, wo shayad Shiv ko pasand karti hai, wo maan hi maan uparwale se prathna karne lagi ki Shiv hi Shivans ho) Kya soch rahi ho?
Aishwarya : Nahi, kuchh nahi.
Chandrika : THik hai thoda aaram kar lo. Me unke pass beth rahi hu.
Aishwarya : Kya tum nahi sonewali?
Chandrika : Itne salo se so hi to rahi thi, so jaungi par abhi thodi der baad. (Aishwarya bhi samaj rahi thi ki wo itne salo baad apane pati se mili hai to wo let sofe par let gayi aur Chandrika apane pati ke pass chali gayi, Aishwarya ke dimag me abhi bhi Shiv chal raha tha, uske maan me ye baat bhi chal rahi thi ki Chandrika chahti hai ki bachche apana faisala le, wo soch rahi thi ki agar Shiv hi Shivans hua to achchha hai par agar na hua to? Aage kya karna chahiye wahi sab sochte hue wo so gayi)
Subah Krupali ki aankh jaldi khul gayi, uska pati side me so raha tha, wo bathrom gayi aur brush aur subah ke kaam nipta kar wo Shiv ke kamare ki aur gayi, usko pata tha ki Shiv jaldi uth jata hai, usne darwaja khola to wo khul gaya, wo ander gayi to bathroom se awaj aa rahi thi, wo samaj gayi aur wo bed ko sahi karne lagi, thodi der baad Shiv bahar aaya.
Shiv : Aap???
Krupali : (Muskurate hue usko dekha aur bed sahi karti rahi)Jaldi aankh khul gayi to aa gayi. Tum niche aao me dudh banati hu.
Shiv : Abhi nahi, me pehle kasarat kar ke aata hu baad me.
Krupali : Achchha thik hai.
Shiv : Abhi kisi ko papa ke aur maa ki halat ke bare me maat batana.
Krupali : Me janti hu, kitni baar yaad karaoge? (Shiv bas muskuraya)Wise tum aisa kyu keh rahe ho, kya tum mere pariwar par bharosa nahi karte?
Shiv : (Unke najdik aa kar)Aisi baat nahi hai, par kuchh bate aisi hai jo aap nahi janti, aur abhi is waqt wo sab aapko batana bhi sahi nahi hai, kyu ki us baat ka aap galat matlab bhi nikal sakti hai, aur sach me muje bhi nahi pata ki kitna sach hai ru kitna juth, to fil hal ke liye ye sab aap kisi ko nahi batana.
Krupali : Tumhara matlab hai ki maa ko bhi na batau, Swarnadidi ko bhi na batau.....kya tumhe un par bhi bharosa nahi hai? Agar me yaha na hoti to shayad tum muje bhi nahi batate, waise bhi itne dino se chhupa hi rahe the. (Wo thodi dukhi ho gayi thi, me bhi smaj sakta tha ki unhe is baat ka dukh ho raha hai par me bhi kya kar sakta tha, muje bhi sambhal kar hi sab chalna tha)
Shiv : Aisi baat nahi hai, agar aisa hota to me maa ko yaha le kar na aata. Muje bharosa hai par aap kisi ko batao aur kon us baat ko sun le aur kon kya kare kuchh bhi pata nahi hai.
Krupali : Tum fikar maat karo, me kisi ko kuchh nahi bataungi. (wo muskurate hue boli)
Shiv : THik hai, me aata hu. (Uske baad me waha se nikal gaya, me nasta kar raha tha tabhi muje Prakruti ka phone aaya)
Prakruti : Maa ghar wapas aa gayi hai, unhone kaha hai ki wahi dopahar ka khana le kar hospital aayengi, tum Krupali didi ko bol dena.
Shiv : Wo yahi hai, lo tum hi baat kar lo. (Shiv ne phone krupali ko diya aur wo dono baat karne lage, uske baad Shiv apana kaam nipta kar Hospital ke taiyar ho gaya aur niche aaya, wo jab waha aaya to Krupali aur uski saas bate kar rahe the jo Shiv ke kaano par padi)
Krupali : Muje kuchh nahi hoga, aur kaisa lagega jo me waha na jau to. (Muje dekh kar dono ki baat ruk gayi)
Shiv : Kya hua?
Saas : Me isko keh rahi thi ki hospital na jaye. (Wo thodi berukhi se boli)
Krupali : Maaji.
Saas : (Shiv ko)Tum hi batao, me kya galat keh rahi hu, wo hospital hai, waha na jane kaise kaise log aate hai, bahu abhi garbhvati hai kya aise me uska waha jana thik hai.
Krupali : Me checkup ke liye bhi jati hu na.
Saas : Wo baat alag hai, wo jana padta hai, par jitna bacha ja sake hume bachna chahiyena, kya me galat bol rahi hu.
Shiv : Aunty sahi keh rahi hai, aur waise bhi waha koi kaam nahi hota, aap ko agar baat karni hai to me phone par aapki baat karwa dunga. (Krupali ko achchha nahi lag raha tha par wo bahesh karna nahi chahti thi)
Krupali : Thik hai.
Shiv : Me nikalta hu. (Me waha se hospital ke liye nikal gaya, us din aur kuchh khas nahi hua, dusare din dopahar ko me aur maa akele the, hum apani baate kar rahe the, papa ki tabiyat me bhi ab kafi sudhar tha, wo ab ha, na, do, nahi jaise chhote chhote sabd bolne lage the, par wo jaldi thak jate the to jyadatar wo sote rehte the. Hum bate kar rahe the ki darwaja khula, mene dekha ki Prakruti, uski maa the, tabhi pichhe ek aadmi dakhil hua, muje yaad aa gaya ki ye Prakruti ke pita hai, me apani jagah par khada ho gaya, wo sab hamare pass aaye, unke pass kuchh saman bhi tha )
Sukhdev : Bhabhiiiii.
Chandrika : Bhai sahab. (Wo muskurate hue boli aur wo bhi khadi ho gayi)
Sukhdev : (Dono hath jod kar)Namaste bhabhi, kaisi hai aap?
Chandrika : Achchhi hu, aap kaise aa gaye?
Sukhdev : Me khud ko rok nahi paya bhabhi.
Chandrika : Koi baat nahi. (wo muskurate hue boli)
Sukhdev : Yogendra kaisa hai?
Chandrika : Achchhe hai, pehle se kafi behtar hai.
Sukhdev : (Yogendra ke pass jakar)Yogendraaaa Yogendraaa. (Wo khud ko rok nahi pa raha tha aur usko hila kar jagane ki koshis karne laga, Yogendra ne bhi ankhe kholi, dono ek dusare ko dekhne lage, usko jagta dekh Sukhdev ki ankhe num ho gayi)Yogendraaaa. (Usne garm joshi se uska hath pakad liya, Yogendra bhi muskuraya)Kaise ho? (Yogendra ne shir hila kar haa kaha) Maaf karna dost, me us waqt kuchh nahi kar paya. (Wo us purani baat ko yaad kar ke pachhtava karne laga)
Chandrika : Biti bato ko bhul jaiye bhai sahab, ab jab sab thik ho raha hai to biti bato ko yaad kar ke pachhtane se kya fayeda.
Sukhdev : Tu fikar maat kar, me abhi doctor se baat karta hu, tu jald se jald khada ho jayega. (Yogendra ne muskura ke hami bhari)
Chandrika : Shivu, ja to doctor ko bula la.
Shiv : Ji. (Sukhdev ne Shiv ko dekha, dono ki najare mili par Sukhdev kuchh nahi bola, uski patni aur beti ne usko jo baat batayi thi us hisab se abhi kuchh na bolna hi behtar tha, Shiv doctor ko bula laya, Sukhdev ne sari jankari li, Sukhdev specialist ko bulane ki baat karne laga par doctor ne usko samjaya ki uski koi jarurat nahi hai par Sukhdev nahi mana aur usne specialist ko bulwane ko keh diya, doctor bhi maan gaya, waha kafi der tak ye sab charcha hoti rahi, Chandrika, Aishwarya aur Prakruti sath me khade the aur Doctor, Sukhdev aur Shiv sath me khade the, jaise hi doctor gaya)
Sukhdev : (Shiv ki aur dekh kar) Muje tumse baat karni hai. (Wo thodi dhimi aawaj me bola tha taki dusare na sun sake)
Shiv : Ji. (Sukhdev darwaje se bahar nikala aur me bhi unke pichhe gaya, bahar galiyare me aa kar wo khade ho gaye me bhi unke samne khada ho gaya, wo muje upar se niche tak dekhne lage)
Sukhdev : Tum kon ho aur tumhara kya maksad hai?
Shiv : Me samja nahi.
Sukhdev : Mujse sidhe baat kar sakte ho tum. Muje pata hai ki tumhe Udesinh ne laya hai, to mujse chhupane ki koi jarurat nahi hai.
Shiv : Ye muje bhi pata hai ki aap jante hai, ye jante hue ki aapko pata hai ki aap mere bare me jante hai fir bhi me yaha hu, aapne socha hai kyu?
Sukhdev : Yahi me jan na chahta hu, kyu?
Shiv : Abhi na samay sahi hai na jagah, hum aram se baat kar sakate hai.
Sukhdev : (Sukhdev usko gaur se dekhne laga)Muje itna to samaj me aa raha hai ki tum un dono ko koi nuksan nahi pahuchanewale, kyu ki agar nuksan pahuchana hota to bahot pehle kar chuke hote, Udesinh ne bahot soch samaj kar tumhe chuna hai, tumhe dekh kar hi lagta hai ki usne tumhe kyu chuna hai, par kya wo tumhare bare me sab janta hai, tum yaha ho kya usko ye pata hai? Shayad nahi pata hoga, mene janch karwayi hai, wo nahi janta ki tum yaha ho. Tum uske hath ka khilona kyu bane? Ya to tum kuchh nahi jante ya fir bahot kuchh jante ho.
Shiv : Mene kaha na ki hum shanti se baat kar sakte hai.(Tabhi Prakruti bahar aayi)
Prakruti : Papa, mummy bula rahi hai.
Sukhdev : Aata hu. (Shiv ki aur dekh kar)Thik hai, muje tumhara intejar rahega. (Keh kar wo darwaje ki aur badh gaye, Prakruti Shiv ko dekh rahi thi aur soch rahi thi ki ye dono kya baat kar rahe the, Shiv bhi us aur badha, to Prakruti ne usko roka)
Prakruti : Papa se kya baat ho rahi thi?
Shiv : Kuchh nahi wo bas uncle ki tabiyat ke bare me puchh rahe the.
Prakruti : Me tumhe kya bevakuf lagti hu, agar unhe kuchh jan na hota to wo doctor se puchh te tumse thodi na puchh te.
Shiv : Thi hamari kuchh baat, baad me bataunga, chalo abhi ander. (Kehte hue Shiv ander chala gaya, Prakruti usko rokna chahti thi par der ho chuki thi, wo ander ja chuka tha, wo bhi ander dakhil ho gayi)
Sukhdev : Me doctor se baat kar leta hu, agar Yogendra thik hai aur sirf dekhbhal ki jarurat hai to wo ghar par bhi ho sakti hai, agar jaruri hua to nurse bhi rakh lenge. (Chandrika ne Shiv ki aur dekha, Sukhdev ko bhi ascharya hua ki wo usko kyu dekh rahi hai)
Shiv : Mere khayal se abhi kuchh din yahi rahe to behtar hai. (Sukhdev ne usko gaur se dekha, fir kuchh sochte hue)
Sukhdev : Thik hai. Achchha bhabhi me chalta hu, kuchh bhi ho to aap muje phone kar lena.
Prakruti : Me yahi hu papa. (Usne jaise kaha ki me abhi yahi rukna chahti hu)
Sukhdev : Thik hai, me gadi bhijvadunga. (Fir wo aur Aishwarya waha se chale gaye)
Hum tino waha the, Prakruti ne kayi baar muje puchha par mene usko taal diya. Me bhi ab aage kya karna hai wahi soch raha tha. Muje is bat ka bhi ascharya tha ki waha se nikalne ke baad abhi tak Udesinhji ne muje phone kyu nahi kiya, kya wo ye dikhana chahte hai ki unhe meri jarurat nahi hai, me wahi sab soch raha tha. Sham ko Prakruti bhi ghar chali gayi.
Dusari aur Udesinh bhi yahi sab soch raha tha ki kaise is gutthi ko suljaya jaye. Wo janta tha ki aagar Shiv ko jyada mahetva diya to wo shir par chadh sakta hai, wo yahi chata tha ki Shiv ko kaise bhi kar ke yahi samajna chahiye ki wo sirf ek kiraye ka tattu hai, usko wahi karna padega jo wo kahega. Usko ye bhi pata chala tha ki Sukhdev wapas aa gaya hai, uski office me usne apana aadmi laga rakkha tha. Usne Sukhdev ko phone kiya.
Sukhdev : Aaj kaise phone kiya apne? (Sukhdev ke maan me jitni bhi kadwahat ho par wo apani maryada nahi todna chahta tha is liye wo maan se hi bola)
Udesinh : Suna hai ki wapas aa gaye tum?
Sukhdev : Aap to bahot jankari rakhte hai, kahiye kya kaam tha?
Udesinh : To sidhe mudde ki baat karte hai. (Thoda ruk kar) Tumhe pata hai ki Shivans wapas aa gaya hai, ab tumhare pass koi haq nahi hai ki tum Yogendra ka hissa apane pass rakkho.
Sukhdev : (Taunt me)Achchha to sach me Shivans wapas aa gaya hai?
Udesinh : Ha bil kul, kya mene tumse milwaya nahi usko?
Sukhdev : Aap kisi bhi ladke ko le aaoge aur muje kahoge ki ye Shivans hai to kya me maan lunga?
Udesinh : Tum jante ho ki wo aa gaya hai, aur fir bhi aisa sawal karte ho, muje lagta hai ki tum Yogendra ki sampatti hadapna chahte ho, mana ki Shivansh abhi chhota hai aur usko in sab bato ki samaj nahi hai par me abhi jinda hu, Yogendra ka bada bhai hone ke nate muje haq hai ki me uski jagah tumse baat karu, meri yahi salah hai ki jitni jald ho sake usko uska hissa de do warna...
Sukhdev : Warna kya?
Udesinh : Warna me media ke samne usko le aaunga aur sari duniya ko ye bataunga aur court case karunga wo alag, tum jante ho ki agar mene aisa kiya to tumhari company ke share ki value down ho jayegi, tum itne samajdar to ho hi ki aisa nuksan uthana nahi chahoge.
Sukhdev : Agar aako itna hi yakin hai to usko mere samne lao aur hum vakilo ki mojudgi me ye baat karenge.
Udesinh : (Sochte hue)Thik hai, me jald hi tumse baat karta hu. (Keh kar usne phone rakh diya, Sukhdev kisi gehri soch me dub gaya, wo soch raha tha ki Udesinh jarur usko dhamka raha hai par ye baat itni bhi galat nahi hai, kyu ki wo Shiv se mil chuka hai, bhale hi usko pata hai ki Shiv ko Udesinh ne paise de kar rakkha hai par wo Yogendra ka beta hai uski sambhavna bahot jyada hai, aise me agar Udesinh usko apani aur karta hai to uska hi nuksan hoga, is se pehle ki udesinh us se koi deal kare usko Shiv se baat karni hogi.
Sukhdev : (apani patni ko bulaya)Aishwarya aaj raat tum bhabhi ke pass ruko, muje Shiv se baat karni hai, usko yaha apane ghar bulata hu.
Aishwarya : Thik hai, me Prakruti se kehti hu wo Shiv se baat kar legi.
Sukhdev : Tum usko bich me kyu la rahi ho?
Aishwarya : Aap us se baat karna chahte hai iska ek hi matlab ho sakta hai ki aap ka dil bhi kahi na kahi manta hai ki wo Shivans hai, sahi keh rahi hu na me? (Sukhdev ne koi jawab nahi diya) Agar wo Shivans hai to fir wo Prakruti ka pati hoga, mene Chandrika se baat ki thi, uski bato se bhi lag raha tha ki wo Shivans hi hai par pata nahi kyu wo abhi is baat ki pushti nahi karna chahti.
Sukhdev : Aisa kya kaha tha bhabhi ne?
Aishwarya : Sidhe to kuchh bhi nahi kaha, par muje unki baat samaj me aa rahi thi, muje lagta hai ki Shiv nahi chahta ki abhi is baat ka koi khulasa ho, shayad Prakruti ki wajah se?
Sukhdev : Me samja nahi.
Aishwarya : Meri Prakruti se baat hui thi, wo Shiv ko pasand karti hai aisa usne kaha tha, par fir dono me kisi baat se anter aa gaya, mene jyada nahi puchha par shayad Shiv Prakruti ko pasand nahi karta ya fir koi aur wajah hai.
Sukhdev : Wo kon hota hai meri beti ko na pasand karnewala, agar usne aisa kuchh bhi kiya to uska hi nuksan hai.
Aishwarya : Ye baat hum jabardasti se nahi sulja sakte, aapne dekha tha ki Udesinhbhaisahab ne sab ke samne kya kiya tha, aap aur me is baat se inkar nahi kar sakte ki Prakruti ki kundali me dosh hai, bhale hi hum is baat ko kitna bhi na mante ho par jo kuchh hua hai wo hamare samne hai, humne aur Yogendrabhaisahab aur chandrika ne us waqt is baat ko halke me liya tha, parinam hamare samne hai, ho sakta hai ki abhi bhi wo soch rahi ho ki fir se Shivans ko nuksan ho sakta hai, ek maa ki najaro se dekhu to wo kuchh bhi galat nahi kar rahi hai, agar Shivans mera beta hota to kya hum uske sath aisa hone dete?
Sukhdev : Me nahi manta in sab bato ko.
Aishwarya : Hamare maan ne ya na maan ne se kya hoga? Waise bhi abhi Yogendra bhai sahab abhi puri tarha se thik nahi hue hai, aise me hume koi jaldbaji nahi karni chahiye.
Sukhdev : Sahi keh rahi ho tum. Me bhi soch raha tha ki pehle Yogendra thik ho jaye fir is baat ko karenge par Udesinh isi baat ka fayeda uthana chahta hai, halaki abhi usko nahi pata hai ki Yogendra aur bhabhi thik ho gaye hai, par wo Shivans ke jariye kuchh galat kar sakta hai, wo abhi chhota hai aur usko abhi in sab ke bare me nahi pata.
Aishwarya : Jitna mene usko samja hai wo itna to na samaj nahi hai, halaki wo jyada bolta nahi hai par wo sab kuchh soch samaj kar kar raha hai, jab meri us se baat hui thi tab bhi wo jara bhi vichalit nahi hua tha, uski bate bhi puri tarha se sochi samji thi, muje to lagta hai ki hum jitna soch rahe hai us se bhi jyada wo sab janta hai.
Sukhdev : Agar aisa hai to achchha hai, muje bhi baat karne me aasani hogi. Thik hai tum Prakruti ko hi bolo ki us se baat kare.
Aishwarya : Thik hai. (wo khadi ho gayi aur Prakruti ke kamare me gayi, wo kuchh likh rahi thi, muskurate hue)Kya kar rahi ho?
Prakruti : College ka kuchh kaam tha wahi kar rahi hu.
Aishwarya : Ek kaam kar, Shiv ko phone kar ke usko keh ki raat ko yaha aaye, tumhare papa ko us se koi baat karni hai.
Prakruti : Kya baat karni hai papa ko?
Aishwarya : Wo muje nahi pata, aur tuje kya hai, tuje jitna keh rahi hu utna kar na.
Prakruti : Kya papa usko dant ne wale hai? (Prakruti thodi gabhra rahi thi)
Aishwarya : Mene kaha na muje nahi pata hai, aur tuje aisa kyu lag raha hai ki wo dant ne ke liye bula rahe hai?
Prakruti : Mene hi to bataya tha ki wo Shivans hone ka natak kar raha hai. Mumma aap baat karo na, wo waisa nahi hai, usne kaha tha ki wo bas uncle aunty ke thik hone ka intejar kar raha hai, wo chala jayega, wo koi nuksan nahi pahuchayega.
Aishwarya : Tu abhi chhoti hai, tuje kuchh samaj me nahi aayega, tu bas usko keh de, waise bhi me isme kuchh nahi kar sakti, par muje nahi lagta ki tumhare papa usko dant ne ke liye bula rahe hai.
Prakruti : Aap sach keh rahi hai?
Aishwarya : Muje jo lag raha hai mene kaha.
Prakruti : Thik hai me baat karti hu. (Wo thoda paresan thi, usne phone liya aur Shiv ko phone lagaya)hello.
Shiv : Hello.
Prakruti : Raat ko tum mere ghar aa sakte ho, papa ko tumse kuchh baat karni hai.
Shiv : Thik hai. (Prakruti ko thoda ascharya hua ki wo bina kuchh puchhe maan gaya)
Prakruti : Mummy raat ko waha rukne ke liye aa jayegi.
Shiv : uski jarurat nahi hai, me baat kar ke wapas aa jaunga.
Prakruti : (Jhunjhlate hue)Wo sab muje nahi pata, maa jab waha aayengi to tum baat kar lena, kisi ko muje kuchh batana nahi hai aur mujse hi sab kaam karwana hai, tum jano aur papa jane, mene bas keh diya jo kehna tha, me rakhti hu. (Keh kar usne phone kaat diya)
Aishwarya : Aise kaise baat kar rahi hai, kya yahi sikhaya hai mene tumhe?
Prakruti : To aur kaise baat karu, naa aap kuchh bata rahe ho na wo kuchh batata hai, me kya itni chhoti hu jo kuchh samjungi nahi. (Wo nakhra karte hue boli)
Aishwarya : Tuje to samjana hi bekar hai, thik hai me ja rahi hu, raat ke liye khana banwa deti hu, tu bhi mere sath chalna, usko apane sath le aana.
Prakruti : (Muh tedha karte hue)Thik hai. (Uddhar Shiv ne phone rakkha aur kisi soch me dub gaya to Chandrika ne puchha)
Chandrika : Kya soch raha hai, kis ka phone tha?
Shiv : Prakruti ka phone tha, usne kaha ki Sukhdevuncle ko mujse koi baat karni hai to muje unke ghar bulaya hai.
Chandrika : To itna soch kya raha hai?
Shiv : Abhi hamari dopahar me baat hui thi, par muje nahi pata tha ki wo itna jaldi muje bula lenge.
Chandrika : To kya hua, ja aaur baat kar le.
Shiv : Thik hai, waise raat ko aunty yaha aanewali hai.
Chandrika : Dekh Shivu, tu kya soch raha hai muje nahi pata, par hum sab ne mil kar tumhara rista Prakruti ke sath kiya tha, itne salo unhone mera aur inka dhyan rakkha hai, hum aise unse kinara nahi kar sakte.
Shiv : Me janta hu maa. Aap fikar maat kijiye me unse achchhe se baat kar lunga.
Chandrika : Thik hai.
Raat ko Prakruti aur uski maa khana le kar aaye.
Aishwarya : Me bhaisahab aur hum dono ka khana layi hu, Ye (Shiv) ghar ja ke kha lega. (Wo uska naa lene se katara rahi thi kyu ki Shiv kahe ki Shivans kahe wo abhi tay nahi kar payi thi). Tumhe bhukh to nahi lagi hai na? (Shiv se puchha)
Shiv : Nahi aunty, me baad me kha lunga. (Mere sath wo bahot pyar se baat kar rahi thi, us waqt wo muje nakali aur behrupiya keh rahi thi par abhi unke vyavhar me bahot anter tha, pehle humne papa ko khana khilaya,uske baad wo dono khana khane bethi, hum log tab tak ruke kyu ki bartan bhi wapas le jane the,wo kha rahe the, me aur Prakruti papa ke pass bethe the, Prakruti papa ke sath idhar udhar ki baate kar rahi thi, me sab dekh raha tha, aur kabhi kabhi kuchh bol bhi raha tha, un dono ne khana kha liya uske baad hum dono bartan le kar bahar aa gaye.
Prakruti : Papa ko tumse kya baat karni hongi?
Shiv : (Mene dekha ki uske chehre par thoda tention tha) Muje kaise pata, unhone bulaya hai to wahi ja kar hi pata chalega. Waise unhone tumhe kuchh nahi bataya?
Prakruti : Nahi bataya na, papa aur mummy dono hi baat kar rahe the, mere sath koi bhi baat nahi ki, mene unhe bata diya tha ki tum Shivans nahi ho aur ye bhi bata diya tha ki tumne Chandrika aunty ko bhi bata diya hai, pata nahi fir bhi wo tumse kya baat karna chahte hai?
Shiv : Wo to wahi ja ke pata chalega, par tum kyu itna tention le rahi ho?
Prakruti : Tention na lu to kya karu? Agar unhone tumhe doshi samaj liya aur tumhe koi nuksan pahuchaya to?
Shiv : Agar mene galat kiya hoga to saja bhi bhugatni chahiye.
Prakruti : Muje pata hai tum galat nahi ho. (Wo pure viswas ke sath boli)
Shiv : Lagta hai tumne muj par kuchh jyada hi bharosa hai.
Prakruti : Ha, hai to?
Shiv : Jyada tention maat lo, unse baat kar ke hi pata chalega.
Prakruti : Hmmm. (Me aur wo dono car me waha se nikal gaye, par me dekh raha tha ki wo lagatar soch hi rahi thi)(Prakruti maan me: Pata nahi papa ne kyu bulaya hai, par me kyu itna tention le rahi hu, muje pata hai ki hamare bich kuchh bhi nahi hai, usne pehle hi sab saaf saaf keh diya hai, muje bhi pata hai ki wo aur Lata ek dusare se pyar karte hai, fir bhi me kyu uski itni fikar kar rahi hu.)(Wo lagatar sab soche ja rahi thi, jitna wo soch rahi thi utna hi uska dimag ulajta hi ja raha tha, dono ghar pahuch gaye)Me papa ko batati hu. (Keh kar wo ek aur chali gayi, uske papa study room me the, wo kuchh files dekh rahe the)Papa. (Unhone upar dekha)Shiv aa gaya hai.
Sukhdev : Thik hai, pehle tum dono kha lo, mene kha liya hai.
Prakruti : THik hai papa. (wo wapas chali gayi) Papa ne kaha hai pehle kha lo. (Shiv ne ha me shir hilaya) Aao pehle hath muh dho lo. (Mene hath muh dho liya aur fir hum dono dinning table par beth gaye, khana naukar garam kar ke rakh gaye, me khane ko dekh raha tha) Itna kya dekh rahe ho.
Shiv : Kuchh nahi bas dekh raha tha ki kaha se suru karu.
Prakruti : Isme itna kya sochne ka, lo me tumhe deti hu. (Keh kar wo meri thali me parosne lagi, hum dono ne khana kha liya, khane ke dauran hum dono chup hi the, hum dono ne khana kha liya) Me papa ko bata deti hu, tum betho. (Me sofe par beth gaya, thodi der baad wo wapas aayi) Papa tumhe wahi bula rahe hai.
Shiv : THik hai chalo. (Me uske sath wo ja rahi thi us aur chal diya, ek room me hum dono dakhil hue, wo room office jaisa lag raha tha, unhone hum dono ki aur dekha)
Sukhdev : Me us se akele me baat karna chahta hu. (Prakruti ki aur dekhte hue wo bole)
Prakruti : Thik hai papa. (Prakruti ko ye achchha nahi lag raha tha, wo sab sun na chahti thi par wo apane papa ko kuchh nahi keh sakti thi to wo bahar nikal gayi, par uska dil wahi tha, wo bahar beth gayi, par jaise uska dimag wahi tha aur soch rahi thi ki kya baat kar rahe honge?)
update
bro