Death Kiñg
Active Member
- 1,396
- 7,031
- 144
CHAPTER – 1
{PAST – RIGHT YA WRONG}
UPDATE – 10
FLASHBACK CONTINUES...
NIGHT TIME :-
PLACE :- SHUKLA SADAN ( DWARKA , DELHI )
JAHANVI uss Hotel se nikalne ke baad se hi lagaatar khayaalon mein khoyi huyi thi. Jab VIVAN ne uska haath pakada aur usse kaha ki wo kuchh kehna chahta hai tab JAHANVI ke andar huyi khushi ki utpatti usse pareshaan kar rahi thi. Uss pal JAHANVI ko yahi laga tha ke VIVAN usse propose karne waala hai par jab VIVAN ne kaha, “ Nahi Kuchh Nahi... Fir Kabhi”. Tab achanak hi JAHANVI ke chehre par maayusi chhaa gayi.
Wo khud bhi nahi samajh paa rahi thi ke wo chahati kya hai?? Tabhi uske andar ek sawaal utha jisne usse hilaakar rakh diya. Wo ye tha ke agar aaj nahi to kal VIVAN usse propose karegaa tab uska jawaab kya hoga, Haan Ya Naa. JAHANVI kahin naa kahin sure thi ke VIVAN usse dost se zyada maanta hai. Jiss Tarah VIVAN uski taraf dekhta tha, uski care karta tha, uske dumb jokes par bhi hasta tha aur har cheez mein help karne ko taiyaar rehta tha. Ye sab baatein kaafi thi JAHANVI ko samjhaane ke liye ki VIVAN uss se pyaar karta hai.
Par uska khud ka kya?? Kya wo khud VIVAN se Mohabbat karti thi? Ya wo sirf usse Dost hi maanti thi? Inn saare sawaalon se ladte huye JAHANVI apne ghar pahunchi. Hall mein jab poori family saath baithi thi uss waqt bhi JAHANVI apne hi khayalon mein khoyi huyi thi. Ab ye baatein koyi aur dekhe naa dekhe par Maa ki nazar se bacchon ki pareshaani chhipp jaaye, Asambhav.
DEVYANI JI ne bhi JAHANVI ke chehre ke bhaavon ko padh liya tha aur baad mein uss se baat karne ka faisla bhi kar liya. Kuchh der baad sabhi apne apne kamron mein chale gaye. JAHANVI ne apna Mobile nikaala aur Gallery mein pictures scroll karne lagi. Tabhi ek tasveer par jaakar uski aankhen thehar gayi. Ye photo kuchh din pehle ki thi. Ismein VIVAN ki shakal par 12 baje huye the.
TWO WEEKS AGO ( DO HAFTE PEHLE ) :-
Asal mein ye JAHANVI ka plan tha joki usne MEHUL ke saath milkar banaya tha. Haan aapko bata doon ke JAHANVI aur MEHUL ki bhi Dosti ho gayi thi iss beech. Kherr, hua yun tha ke Jaise hi VIVAN College Canteen mein ghusne ko hua tabhi uske saamne ek skull aa gaya. Skull bole to khopdi. Ye College ki lab mein se uthaayi thi MEHUL ne aur ye plastic fibre ki bani huyi thi. Kherr, isse yahaan Nylon wire se latkaya gaya tha joki transparent si hi lagti hai. Isiliye Filhaal aesa lag raha tha ke ye Skull Hawa mein tair raha hai.
To jiss second VIVAN ke saamne wo Skull prakat hua, agle hi pal uski nazar padi JAHANVI par joki wahin side mein chhippi huyi thi. VIVAN ko samajhte derr naa lagi ki maamla kya hai. Uske chehre par ek chhoti si muskaan aa gayi aur usne darr jaane ki bilkul hi natural acting ki. Idhar JAHANVI lagatar VIVAN ki pics kheenchne mein lagi thi. Jab uska kaam ho gaya to wo saamne aa gayi. Aur pet pakad kar hansne lagi. Uski muskurahat mein VIVAN bilkul hi kho gaya. Usse hosh tab aaya jab JAHANVI ne usse hilaya.
Kherr, kuchh der baad MEHUL VIVAN ke saath khada tha,
MEHUL – To tu wo khopdi dekh kar darr gaya tha.
VIVAN – Of Course. Koyi bhi darr hi jaayega na bewakoof.
MEHUL – Babu Moshay, main JAHANVI nahi hoon. Teri rag – rag se waaqif hoon main. Aur Tu to saale Dus sar waala Raavan hai. Tu khopdi se darr jaayega. Asambhav. Ab sahi sahi bata toone jaan ke acting ki naa.
VIVAN – Ae tu normal to hai naa. Itni information aam taur pe lounde ladkiyon ki nikaala karte hain. Teri choice to nahi badal gayi naa.
MEHUL – Baa Mat ghuma aur sach bata.
VIVAN – Haan acting hi ki thi maine.
Idhar JAHANVI joki inse thodi door khadi thi usne ye baat sun li aur hairaan bhi ho gayi.
MEHUL – Aur wo kyun??
Ek pal ko VIVAN ne aankhen band ki aur kuchh sochne laga tabhi uske chehre par muskaan aa gayi. Asal mein wo JAHANVI ka wo muskurata hua chehra yaad kar raha tha jo iss chhote se naatak ka result tha.
VIVAN – Kyonki Maine JAHANVI ko wahaan deewar ke peechhe dekh liya tha. Main samajh gaya tha ke ye uski hi planning hai. Aur isiliye...
MEHUL – Isiliye... aage bol...
VIVAN ( Smiles ) – OK. Tune dekha naa uski smile jab main darr gaya tha. Ussi Smile ke liye.
VIVAN ki baat sunkar MEHUL muskurane laga wahin peechhe khadi JAHANVI poori tarah se hairat mein doobi huyi thi. Aur jab VIVAN ne wo aakhiri line kahi – “ Tune dekha naa uski smile jab main darr gaya tha. Ussi Smile ke liye.” , Ye shabd sunkar apne aap hi JAHANVI ke chehre par laali aa gayi. Aur wo akele khadi hi sharmaane lagi.
BACK TO JAHANVI’S ROOM...
Ye vaakya yaad karke aur VIVAN ki uss tasveer ko apne mobile mein dekh kar JAHANVI ke honthon par swayam hi ek sharmeeli muskaan aa gayi. Aur saath hi ek sawaal bhi uske dil mein goonja – “ VIVAN ne ye meri ek Smile ke liye kiya? Kya wo mujhse pyaar...” Na jaane kyon ye baat JAHANVI ko roohaani sukoon se rubaroo karwa rahi thi. Sirf ye khayaal hi ke VIVAN uss se pyaar karta hai usse aseem khushi aur shaanti ki anubhuti karwa raha tha.
Par tabhi ek aur khayal uske mann mein ubhra jisne usse ek gehri soch mein duba diya. “Agar wo mujhse pyaar karta bhi ho aur agar usne mujhe propose kiya to main kya kahungi??? Kya main VIVAN se pyaar karti hoon??” Iss sawaal ka jawaab filhaal uske paas nahi tha.
Idhar JAHANVI apni sochon mein gum thi aur usse ye bhi pata naa chala ke DEVYANI kaafi derr se khadi uske chehre par badalate expressions ko note kar rahi tii aur jald hi unhone saare maamle ka laghbhag andaaza bhi laga liya. Issi beech JAHANVI ne apna mobile jab side rakha tab wo usse band karna bhool gayi aur DEVYANI Ji ne VIVAN ki wo tasveer bhi dekh li. Ab to unke mann mein koyi shakh ki gunjaayish bachi hi nahi thi.
DEVYANI Ji ne chehre par nakli gussa laate huye JAHANVI ko hilaaya, JAHANVI ne jab unhe apne paas khada paaya to wo chaunk gayi aur unke chehre ke bhaav dekh kar ghabra bhi gayi,
JAHANVI – M.. Maa Aap yahaan?
DEVYANI Ji ne sapaat lehze mein uska phone uthate huye poochha,
DEVYANI ( Angrily ) – Ye ladka kaun hai?
Aur iski photo tere phone mein kya kar rahi hai?
JAHANVI unke sawaal par aur mobile dekh kar ek dum ghabra gayi,
JAHANVI – Wo.. Maa.. Wo .. Mera Dost..
DEVYANI – Dost ki tasveer dekh kar to mere khayaal mein tu sharma nahi rahi hogi. Sach bata kaun hai yeh?
JAHANVI – Maa Wo sachmein mera d.. dost hi hai.
JAHANVI ki aawaz ek dum tharrayi huyi thi jaise kisi bhi pal wo ro hi degi. Ab DEVYANI Ji bhi Maa thi. Kab tak apni bachi ko pareshaan karti.
DEVYANI ( Smiles ) – Ab rona mat. Main mazaak kar rahi thi.
JAHANVI ko ye sunkar Kuchh raahat mili par wo jaanti thi ki abhi maamla nipta nahi hai. DEVYANI Ji uske paas baith gayi aur uski taraf ek tak dekhne lagi. Unki ye harkat JAHANVI ko bahut zyada nervous kar rahi thi. Par wo apne aap ko kaaboo karne ka har sambhav prayaas jaari rakhe huye thi. Kherr kuchh der ke maun ke baad,
DEVYANI – JAHANVI main teri Maa hoon aur ek Maa se uski Aulaad kuchh nahi chhipaa sakti. Aaj jabse tu aayi hai kuchh khoyi khoyi si lag rahi hai. Jab shaam ko baahar jaa rahi thi tab tere chehre par jo khushi thi wo maine aaj se pehle kabhi nahi dekhi. Aur main bhali bhaanti jaanti hoon ki in sab cheezon ka ek saath hone ka ek hi kaaran hai.
Aur ye kehkar DEVYANI Ji waapis mobile mein VIVAN ki photo ki taraf dekhne lagi. JAHANVI unse kehna to bahut kuchh chahti thi par wo bechaari to khud hi confused thi ke wo VIVAN ke liye kya feel karti hai aur kya nahi.
JAHANVI – Maa aesa kuchh nahi hai jaisa aap samajh rahe ho.
DEVYANI – Achha ek baar ye baat meri aankhon mein dekh kar bol de.
Ab JAHANVI ko laga ke usse sab kuchh bata dena chahiye unhe, shayad wo uski duvidha hi door kar den. To usne bolna shuru kiya aur pichhle ek saal mein jo jo hua wo sab apni Maa ke saamne khol kar rakh diya. Jaise jaise wo bolti jaa rahi thi DEVYANI Ji ke chehre ke bhaav badal rahe the. Jab JAHANVI ne apni poori baat bol di to wo apni nazren jhuka kar baith gayi. Uski himmat hi nahi ho rahi thi ke wo unki taraf dekhe.
Jab kaafi der tak unki taraf se koyi pratikriya nahi aayi tab JAHANVI ne apna sar uthakar unki oar dekha to paaya ke wo muskura rahi thi. Unki muskaan dekh kar apne aap hi JAHANVI ka mann bhi shaant hone laga.
DEVYANI – To Matlab tu confuse hai ki tu uss ladke...
JAHANVI ( Interrupts ) – VIVAN...
Apni Maa ke dwara VIVAN ko ladka kehkar sambodhit kiye jaane par tapaak se JAHANVI ne uska naam bol diya aur baad mein apni iss naadani par khud hi sharma bhi gayi.
DEVYANI ( Smiles ) – Haan Haan Tera VIVAN, Mudda ye hai ke to confuse hai ki tu uss se pyaar karti hai ya nahi.
JAHANVI ne jab “Tera VIVAN” shabd sune to usse aseem khushi ki anubhuti huyi aur uski muskaan iss baat ko uski Maa ke saamne ujaagar kar rahi thi. Kherr, unke sawaal par JAHANVI ne bas haan mein sar hila diya.
DEVYANI – Ab tu apni aankhen band kar aur jo bhi main poochhon uska sochkar jawaab de. Haan in jawaabon mein Main, tere Papa ya Aabha nahi hone chahiye.
JAHANVI ne bhi waise hi kiya,
DEVYANI – “ WO KAUN HAI JISKE KAREEB TUJHE SABSE ZYADA KHUSHI MILTI HAI ”?
JAHANVI – VIVAN...
DEVYANI – “ WO KAUN HAI JISKI EK PAL KI GAIR – MAUJOODGI BHI TUJHE PARESHAAN KAR DETI HAI ”?
JAHANVI – VIVAN...
DEVYANI – “ WO KAUN HAI JISKI MUSKURAHAT TERI SABHI PARESHAANIYAN DOOR KAR DETI HAI ”?
JAHANVI – VIVAN...
DEVYANI – “ WO KAUN HAI JISSE DEKH KAR TERI DHADKAN TEZZ HO JAATI HAI ”?
JAHANVI – VIVAN...
DEVYANI – “ TERI ZINDAGI MEIN PARIVAAR KE BAAD TERE SABSE NAZDEEK KAUN HAI ”?
JAHANVI – VIVAN...
Aur iske baad apne aap hi uski aankhen khul gayi. Practically bhi aur metaphorically bhi. Matlab abhi jo aankhen band thi wo bhi khul gayi aur jo Pyaar ke sawaal par usne apni aankhen moondi huyi thi wo bhi khul gayi.
Kherr, iske baad uske mann mein koyi shanka, koyi sawaal, kuchh nahi bacha tha. Usne apni Maa ki taraf dekha to wo usse hi muskurate huye dekh rahi thi. JAHANVI ke gaalon par laal parat chadhne lagi aur uski nazren bhi swayam hi jhuk gayi.
DEVYANI Ji ne usse gale laga liya aur fir baahar jaate huye bas itna hi kaha,
DEVYANI – Beta tu, tere Papa aur mere liye kya hai ye tu bhi jaanti hai. Teri khushi mein hi hamari khushi hai. Par ye Pyaar aur Shaadi, Zindagi ke do aise faisle hain jinmein ek galat kadam poori Zindagi aatma ko jalaata rehta hai. Baaki tu khud hi samajhdaar hai.
Apni Maa ki baat ko poore dhyaan se suna JAHANVI ne. Fir ek mook sehmati bhi jataayi uske prati. Jab wo baahar chali gayin to JAHANVI uthi aur darwaaza band karke naachne lagi. Uske honthon par masoom si muskaan, chehre par duniya bhar ki khushi aur saath hi alhadpan bhi jhalak raha tha.
Pehle pyaar ka ehsaas, yahi wo ehsaas hai jispar kitni hi kavitaayen likh lo par uss ehsaas ka bakhaan karna katayi sambhav nahi hai. Yahi to wo ehsaas tha jiss se JAHANVI pehli dafa rubaroo ho rahi thi. Wo kya kare, aur kya naa kare uski khud ki samajh mein hi nahi aa raha tha.
Fir wo bed par kood gayi aur wahaan bhi naachne lagi. Fir thak kar wahaan let gayi aur apne soft toy (teddy) ko zor se hug kar liya aur aankhen band karke bas ek hi chehra yaad kiya. Fir swataah hi uske honth dheeme se hile aur usne budbudaya –
“ Yess. I’m in Love. Mujhe nahi pata tum mere baare mein kya feel karte ho par I LOVE YOU VIVAN !!! I LOVE YOU from the bottom of my heart !!! ”
Uske Chehre ko aaj fir YAAD KIYA HAI,
Dil ko jaane kyon usne ye SUKOON DIYA HAI...
Nazren meri hongi ab tujhpar hi,
Pehli baar mujhe PYAAR KA EHSAAS HUA HAI...
Iss Update ke liye itna hi...
Milenge agle Update mein...
At last Jahanvi ko realise ho hi gaya ke wo vivan se pyaar karti hai... It's not a common thing ke ek maa apni beti ko uska pyaar samajhne mein madad kare par yahaan aesa hua... Aur iska kaaran bhi pata chal gaya... Kaafi changes aayen hain Jahanvi mein Vivan se milne ke baad and that's why uski Mom ko lagta hai ke Vivan unki beti ke liye sahi ladka hai...CHAPTER – 1
{PAST – RIGHT YA WRONG}
UPDATE – 11
FLASHBACK CONTINUES...
SAME NIGHT :-
PLACE :- SHUKLA SADAN (DWARKA , DELHI)
To jaise hi DEVYANI Ji JAHANVI ke kamre se nikli wo seedhe apne room mein gayi aur bed par baith kar kuchh sochne lagi,
“ Shayad hi koyi Maa ho jisne apni Beti ko uska pyaar samajhne mein aese madad ki ho. Par jo khushi aaj shaam ko maine JAHANVI ke chehre par dekhi thi waisi aaj se pehle kabhi nahi dekhi. Uss ladke ka naam lene se hi JAHANVI ka chehra khil jaata hai. Aur jitna usne mujhe uss ladke ke baare mein bataya hai uss se to yahi lagta hai ke wo bhi meri bachi se sache dil se pyaar karta hai. Bas bhagwaan kare meri bachi aese hi hamesha khush rahe aur uske jeevan mein koyi pareshaani naa aaye. ”
Asal baat ye thi ki JAHANVI ek saal pehle tak (jab usne College jaana start nahi kiya tha), kaafi gumsum raha karti thi. Wo kisi se zyada khulkar baat tak nahi karti thi. Ismein uski ya kisi aur ki koyi galti nahi thi. Keh sakte hain ke wo ek Introvert nature ki ladki thi. Ghar mein bhi apne Mata – Pita se zyada khuli huyi nahi thi wo. Sirf AABHA aur KANIKA se hi wo kaafi hadh tak apne mann ki baatein share kiya karti thi. Yahi ek badi wajah thi ke uske school time mein sirf KANIKA hi uski ek maatra saheli thi.
Par iss ek saal mein jaise jaadu hi ho gaya tha. JAHANVI ka swabhaav bilkul badal gaya tha. Ab wo apne Mata – Pita ke saath to behtar tareeke se baat cheet karti hi thi, saath hi uske aatma vishvaas mein bhi izaafa hua tha. Kahin naa kahin ab uska nature bhi kaafi Social ho gaya tha. Aur aaj jab DEVYANI Ji ko poore ghatnakram ki jaankari mili to unhe samajhne mein bilkul derr naa lagi ke iss badlaav ki wajah VIVAN hi hai. Yahi kaaran tha uska jo aaj dono Maa – Beti ke beech baatein huyi.
NEXT MORNING :-
PLACE :- ST. MARY COLLEGE OF MANAGEMENT (DELHI)
Iss waqt free lecture hai JAHANVI ka aur wo Canteen mein maujood hai. Aaj KANIKA kuchh kaam ki wajah se College nahi aa paayi thi. Isiliye wo yahaan akeli baithi bor ho rahi thi. Tabhi uske sar par halki si chapaat padi. Jab usne peechhe dekha to ek dum se uski dhadkan tezz ho gayi aur honthon par ek muskaan aa gayi.
JAHANVI – V..VIVAN..
Usse theek se bone mein bhi pareshaani mehsoos ho rahi thi. Uska rakt pravaah bhi bahut tezz ho chala tha. Aur ye sab hua tha VIVAN ki ek jhalak paa lene se. Jiss chehre ko wo aaj tak ek sache Dost ki nazar se dekhti aayi thi, aaj pehli baar uss chehre mein usse apna saara jeevan simta hua nazar aa raha tha. VIVAN uske saamne waali chair par baith gaya par abhi bhi JAHANVI uske chehre ko besudh si hokar taak rahi thi. VIVAN ne uski aankhon ke saamne haath lehraya tab wo hosh mein aayi,
VIVAN – Kya Madam, kahaan khoyi ho?
JAHANVI – N.. nahi kuchh nahi.
VIVAN – Waise yahaan akeli kyun baithi ho?
JAHANVI – Wo aaj KANIKA nahi aayi naa aur ye free lecture hai.
VIVAN – Acchha hua nahi aayi wo teekhi mirchi. Pata nahi kaise bardaasht karti ho tum usse.
JAHANVI – Tum dono hamesha ladte kyun rehte ho?
VIVAN – Main ladta hoon uss se? Wo ladti rehti hai. Teekhi Mirchi hai wo ek number ki.
JAHANVI ( Smiles ) – Aur tum kya ho?
VIVAN ( Smiles Back ) – Tum batao, kya hun main?
JAHNAVI – Tum!? Ummm... Tum ho Jhalle...
Inki baat cheet ke beech hi next lecture ki bell baj gayi thi. Isiliye JAHANVI uth gayi thi aur jaate huye hi usne wo aakhiri shabd bola jisse sunkar VIVAN ki muskurahat aur bhi gehri ho gayi. Chaliye ek nazar daal lete hain kuchh aur paatron par bhi…
ADYA...
ADYA, filhaal maujood hai CHANDIGARH mein apne ek relative ke marriage function ke chalte. Filhaal wo akeli baithi kuchh soch rahi hai.
“ Bas ab main aur intezaar nahi kar sakti. Haan, yahaan se waapis jaate hi main VIVAN se apne dil ki baat keh doongi. Waise hi maine bahut waqt zaaya kar diya hai. Aur wo JAHANVI se bhi bahut nazdeeki badh rahi hai VIVAN ki. Agar kahin wo dono.. Nahi nahi aesa nahi ho sakta. VIVAN ke bina main nahi jee sakti. Haan yahi sahi rahega, agle hafte sabse pehle yahi kaam karungi. Fir chaahe kuchh bhi ho par mere mann par ye baat to nahi rahegi ke maine usse nahi bataya. ”
ADYA ka pyaar VIVAN ke liye bilkul nischal tha. Wo dil – o – jaan se usse chaahne lagi thi. Par jab bhi wo decide karti ke wo VIVAN ko apne dil ki baat bataayegi. Uski himmat jawaab de jaati. Par shayad ab uska dhairya samaapt ho chuka tha. Par kya uska prem parwaan chadh paayega ya fir kismat uske saath koyi khel khelne waali thi? Sabhi jawaab chhipe the waqt ke garbh mein.
NAKUL...
NAKUL filhaal maujood hai DELHI ke hi ek club mein aur baitha sharaab pee raha hai. Aur saath hi kuchh soch raha hai,
“ Kuchh to karna padega uss JAHANVI ka. Seedhe munh baat tak nahi karti hai wo to mujhse. Aur wo Saala VIVAN hamesha chipakta rehta hai uss se. Lekin karun to kya karun. Arre haan uska Birthday aa raha hai agle hafte. Shaabash NAKUL shaabash. You’re a genius. Kuchh to faayeda hua uski information nikalwaane ka. Karta hun kuchh uske Birthday par hi. Bas ek baar wo mere jaal mein fans jaaye fir uske jism ka ras peeunga. Bahut tadpaya hai usne. ”
Bas issi tarah Ek hafta nikal gaya. Iss beech JAHANVI ka behaviour VIVAN ke liye kaafi badal gaya tha. Wo aksar VIVAN ke saamne sharmaati rehti thi aur bahut baar VIVAN ne usse apni aur lagataar taakte huye bhi notice kiya tha. VIVAN usmein aaye badlaav note kar raha tha aur uske mann mein kaafi hadh tak ye spasht ho chuka tha ke JAHANVI bhi usse chaahne lagi hai. Aur ye khayal usse bahut zyada aanandit kar raha tha. Kherr, ab waqt aa gaya tha uss mauke ka jiski wajah se VIVAN ne uss Dinner ki raat JAHNAVI ko propose nahi kiya tha.
JAHANVI’S BIRTHDAY...
PLACE :- ST. MARY COLLEGE OF MANAGEMENT (DELHI)
Aaj JAHANVI ka janam din tha. Aaj subah se hi usse kayi logon ke dwaara best wishes bheji jaa chuki thi. Har saal ki hi tarah AABHA ne hi usse sabse pehle wish kiya tha. Par jo baat usse chubh rahi thi wo ye thi ke VIVAN ne usse call karna to kya ek message karne tak ki bhi zehmat nahi uthaayi thi. Aur iss baat se wo gussa to thi hi par uss se zyada dukhi thi.
Aakhir subah se issi ka intezaar to tha usse.
Abhi bhi wo har jagah VIVAN ko hi dhoond rahi thi par wo usse kahin naa mila aur wo bhi bemann se apni classes ke liye chali gayi. Poora time wo VIVAN ka hi intezaar kar rahi thi par jab wo Canteen mein bhi nahi aaya to JAHANVI ka mood poori tarah se off ho gaya. Aur wo bujhe mann se ghar laut aayi. Shaam tak wo akeli takiye mein munh dabaaye apne kamre mein leti rahi. Jab AABHA shaam ko usse uthaane aayi tab jaakar wo taiyaar huyi aur jo har saal uske ghar mein chhota sa celebration hota tha wo hua. Par JAHANVI abhi bhi khush nahi thi.
Tabhi KANIKA wahaan aayi. Kuchh derr ki baat cheet ke baad,
KANIKA – Chal JAHANVI aaj Birthday hai tera, party nahi degi?
JAHANVI – Nahi yaar mera mann nahi hai. Aaj nahi fir kabhi.
KANIKA – Jab Birthday aaj hai to baad mein party ka kya karungi. Chal naa main kuchh College ke friends ko bhi bula leti hoon.
Kaafi force karne par JAHANVI maani. Aur KANIKA ke saath ghar se nikal gayi.
PLACE :- THE RIVERFRONT HOTEL (DELHI)
KANIKA JAHANVI ko lekar yahin aayi. Iss hotel ko dekh kar JAHNAVI ko uss Dinner ki yaad aa gayi jo usne VIVAN ke saath kiya tha. Par agle hi pal jo aaj subah se VIVAN ne usse wish karna to chhodo darshan tak nahi diye the uss wajah se uski palkein halki geeli ho gayi.
Jab ye dono andar party hall mein pahunchi to wo bahut hi badhiya tareeke se decorate kiya hua tha aur saamne hi Happy Birthday JAHNAVI bhi likha hua tha. Ye sab preparations dekh kar usne confused expressions ke saath KANIKA ki taraf dekha to usne kaha,
KANIKA – Surprise birthday girl...
Surprise sunkar JAHNAVI ko ek pal ko laga ke ye sab uske liye VIVAN ne hi kiya hoga par jab usne aas paas nazar ghumaayi to paaya ke wahaan unke College ke sabhi friends the par VIVAN yahaan bhi nahi tha. JAHANVI ka mann to kiya ke abhi yahaan se bhaagkar apne ghar chali jaaye par fir usne jazbaaton ko kaaboo kiya.
Fir sabhi logon ne baari baari se usse wish kiya. Yahaan ADYA kaafi khush dikhaayi de rahi thi ke VIVAN iss party mein maujood nahi tha. Yahi haal NAKUL ka bhi tha par uska kaaran alag tha aur wo ye ki wo JAHANVI ke liye ek mehenga tohfa laaya tha taaki usse impress kar sake par jo aage hone waala tha uski in sabmein se kisi ko bhi bhanak nahi thi.
Thodi derr baad Cake Cutting huyi aur sab logon ne JAHANVI ko gifts diye. Par ab bhi uska mann udaas tha. Tabhi wahaan lights off ho gayi. Aur dheemi aawaz mein romantic tunes bajne lagi. Sabhi surprised hokar ye sab dekh rahe the ke tabhi saamne ek screen par JAHANVI ki tasveeren chalne lagi. Ye sabhi photos khud JAHANVI ko bhi nahi pata tha ke kab kheenchi gayi thi. Par sabmein ek cheez common thi aur wo thi uski smile.
Agle hi pal JAHANVI ke saamne aakhir kaar VIVAN aa hi gaya. Usne ek black tuxedo pehen rakha tha joki JAHANVI ki black bodycon dress se mel khaata tha. Wo JAHANVI ke kareeb aaya aur uski taraf apna haath badha diya. JAHANVI ne bhi mantramugdh si hokar apna haath uske haath mein de diya. VIVAN uske haath ko thaame centre table par aaya,
VIVAN – Jab se maine hosh sambhaala tab se lekar aaj se ek saal pehle tak main sirf naam ke liye hi jee raha tha, sirf naam ke liye hi muskuraya karta tha. Par ek saal pehle jab tumhe pehli baar dekha tab mujhe ehsaas hua ke asli khushi kya hoti hai. Tumhaara College ka pehla din, parking mein khadi tum uss blue colour ki dress mein, muskurati huyi, ussi pal tumne mujhe mujhse hi chheen liya. Ek wo din tha aur ek aaj ka din hai. Maine tumhaare baare mein hi socha hai har pal. Har pal tumhaare saath zindagi bitaane ka khwaab dekha hai.
Fir VIVAN ne table par pada ek paper uthaya,
VIVAN – Yahi zindagi thi JAHNAVI meri ek saal pehle, ek kora kaagaz jispar naa to koyi rang tha naa hi koyi likhaawat. Fir tum meri Zindagi mein aayi...
Iske saath hi VIVAN ne uss kaagaz ko paas mein jalti huyi Candle ke saamne kar diya aur uss kaagaz par JAHANVI ka naam likha hua tha,
VIVAN – Aur ab meri Zindagi par, mujhpar sirf tumhara naam likha hai. Tumhara aks chhap chuka hai mujhpar, mere dil par, meri aatma par. Main koyi bade bade jhoothe waade nahi karunga tumse par...
WAADA HAI MERA AAJ, KAL, JEEVAN KE ANT TAK...
HOGI TUM HI SAANS MERI,
JAB TAK JEEUNGA TERA NAAM HOGA...
ZUBAAN PAR MERI,
NAA CHAAHA HAI TERE SIVA KISI AUR KO…
NAA CHAAHENGE FIR KABHI,
ZINDAGI THAM JAAYE CHAAHE LEKIN DIL MEIN MERE...
“ SIRF TUM ” HOGI...
Iske baad VIVAN apne ghutne par baith gaya aur apni pocket se ek ring nikaali aur JAHANVI ki taraf dekh kar kaha,
VIVAN – Tumhaara jawaab chaahe kuchh bhi ho, I promise iska hamari dosti par koyi asar nahi padega. Haan ye baat alag hai ke shayad main kabhi tumhe apna dost maan hi nahi paya. Par fir bhi main apne aap ko samjha lunga. To JAHNAVI, Will You be my heart for Rest Of my Life…
[ UPDATE – 1 { SCENE – 1 } ]
VIVAN – I LOVE YOU JAHANVI...
JAHANVI – I LOVE YOU TOO VIVAN...
Aur itna kehte hi dono gale lag gaye...
Woohooo... *Clap* .. *Clap*.. *Clap*.. Woohooo...
Yahi wo pal tha jiska zikr pehle update mein hua tha, dono gale lage huye the. Jahaan VIVAN ke chehre par aseem khushi thi, aur uss khushi ki seema dikha rahi thi uski aankhen jo iss pal ki anubhuti mein halki bheeg gayi thi. Wahin JAHANVI apne chehre par aseem khushi ke saath ek bahut hi pyaari sharm ko bhi odhe huyi thi.
Jab VIVAN ne apne dil ki baat kehni shuru ki tab se hi JAHANVI ki dhadkan bekaabu si thi. Wo chahti thi ke VIVAN jaldi se wo teen shabd kahe aur dono ek dooje mein sama jaayen. Fir wo kaagaz waali baat ho ya VIVAN ki uske liye kahi gayi shaayari, sab kuchh JAHANVI apne jeevan ki sabse haseen yaadon mein shaamil karne mein lagi thi.
Fir VIVAN jaise hi ghutne par aaya aur usne jab wo ring nikaali to JAHANVI ki hairaangi itni thi ke uske dono haath uske muh par chale gaye. Aur fir aakhir kaar wo ho hi gaya jiska intezaar JAHANVI ko tha. Wo shabd – “ I LOVE YOU JAHANVI ”... kaafi the JAHANVI ke kadmon ko zameen se aasmaan par laane ke liye. Uss se ek pal bhi naa ruka gaya aur usne bhi apne pyaar ka izhaar kar diya.
Aur wo baat sunkar VIVAN laghbhag paagal hi ho gaya. Ek saal intezaar kiya tha usne iss pal ka. Aur iss pal ki aseemit khushi mein uski aankhen nam ho gayi. Wo jhat se utha aur JAHANVI ko apne aap mein samet liya.
Kaafi derr tak dono gale lage rahe aur jab alag huye to JAHNAVI ko VIVAN ki bheegi huyi aankhen dikhi. Usne naa mein sar hilaate huye unhe poncha. VIVAN ne uski taraf haath badhaya aur JAHANVI ne bhi usse thaam liya. Fir VIVAN ne wo ring uski ungli mein pehna di. Ek baar fir dono gale lag gaye aur ye ghoshit kar diya ke aaj se JAHANVI aur VIVAN alag – alag nahi balki ek doosre ke the...
SIRF EK DOOSRE KE...
Aaj ke liye itna hi...
Milenge Agle Update Mein...
Adya ne decide to kiya hai ke wo Vivan se apne dil ki baat keh degi par ab kuchh aesa ghatit ho chuka hai ke uska pyaar shuru hone se pehle hi khatam hone ki taraf hai... Nakul bhi Jahanvi ko impress karne ki planning kar raha hai par usse kya pata ke uska plan dhara ka dhara reh jaane waala hai... poor guy...
Aakhirkaar Vivan ne Jahanvi ko propose kar hi diya... aur propose karne ka tareeka bhi kya khoob tha... Jahanvi to waise hi taiyaar baithi thi ke kab wo Vivan se apne dil ki baat bol de aur usse to yahaan pehel bhi naa karni padi... Ab dekhna ye hoga ke Adya & Nakul ka kya reaction hota hai iss ghatna par aur apni Kanika Madam ko kaise bhool sakte hain... Wo bhi kuchh naa kuchh bawaal zaroor karegi...
Dono Updates behadh hi shaandar the... and especially this propose... It was damn romantic... Kaafi kam Romance Stories padhi hain maine ab tak par jitni bhi padhi hain unmein se This Masterpiece from you has stood out for me... Har ek emotion ko jis baareeki se dikhaaya hai aapne wo mujhe sabse behatreeen cheez lagi... Hope you can continue in this way and this story turns out to be a blockbuster...
Outstanding Updates Brother & Waiting For Next...
.........
