Update 13 The Work Accelerated
Do hafte baad bus ki base ki frame work ho gaya aur Manoj ne photo liya to aisa tha:
Ab iss frame se lekar upar tak baaki ke lohe ko weld karna tha bus ki complete frame banana ke liye…..
Ek mahine tak kuch aisa hi chala Abhi aur Ruhi ke beech. Abhi Ruhi ko paagalon ki had tak pyar karne laga tha. Usske bina jina naamumkin ho gaya tha Abhi ke liye ab. Subha shaam, raat din Abhi ke khayaalon mein ab sirf Ruhi rehti thi. Jaise Ruhi Abhi ki saans lene ki zarya thi, Abhi ki oxygen thi wo. Ghar mein apni behen se sirf Ruhi ki baatein karta, diary mein 100 pages likh chuka tha “The Days I Spent At Ruhi’s Place” wale diary mein. Aur Naina, Abhi ki chhoti behen sab padhti thi uss diary mein. Jitna kuch guzra tha Ruhi ke saath uss ek mahine mein sab likha hua tha uss diary mein, aur Naina ko sab pata tha.
Naina ne Abhi se Ruhi ki ek photo laane ke liye kaha. Abhi khud kayi dinon se Ruhi se usski ek photo mang raha tha magar Ruhi dene se inkaar kar rahi thi. Aaj ke zamaane mein yeh sab hua hota to seikhron pics le liya hota Abhi ne Ruhi ki hai nah dosto?
Iss ek mahine mein Abhi kuch aur bhi close ho gaya tha Ruhi se. Aksar usski maa saath hoti jab Abhi Ruhi se baat karta. Wo shayad iss liye usski maa weisa karti thi, taake Mehboob ko kehne ka mauka nah mile ke Abhi aur Ruhi akele mein baatein kar rahe the. Aisa Abhi soch raha tha. Magar kabhi kabhi Abhi akele bhi baat karta tha Ruhi se chhup chhupa kar. Kabhi Ruhi normal rehti, Abhi ki har baat ko maanti, shaam ko present rehti Abhi ke jaane ke waqt to kabhi bilkool nahin aati jaise jaan bujh kar Abhi ko tarpaane ke liye. Kissi din Abhi behad khush dikhta to kissi din udaas kaam karta kyun ke Ruhi saamne nahin aati.
Har Saturdays ko kaam 2 se 2.30 ko end hote aur sabhi Saturdays ko Ruhi apni course ke liye jaati aur Abhi ussko bus ke jagah se main road tak ya kabhi bus stop tak chorrne jaata aur usski maa donon ko dekh kar hanssti. Magar jiss Saturday ko Mehboob hota aangan mein tab to Abhi nahin jaa paata Ruhi ke saath, magar ek trick karta abhi, cigarrte kharidne ke bahane jaldi se jata Ruhi se bus stop par milne aur baat karne.
Har Saturdays ko Ruhi ek alag dress pehenti jiss mein wo behad khubsurat dikhti aur Abhi machal jata, aur bhi paagal hota usski khubsurti ko dekh kar. Hona bhi tha har roz Ruhi ghar par apne gharelu kapdon mein Abhi ke samne hoti thi, to jab saj sanwar kar acchhi kapdon mein nikalti to 100 gunah ziada khubsurat to lagni hi thi….
Abhi ko apne dil ki baat kehne ko mann kiya Ruhi se… thoda ghabra bhi raha tha Abhi ke sahi waqt hai kahein ya nahin, ya thode din aur wait karen…. Phir khud se kehta ke nahin aur kuch din intezaar karte hein….. kaam jaldi aage badh raha tha aur ab lagne laga tha ke 4 mahine se pehle hi kaam pura ho jaega, iss liye Abhi ko ab jaldi tha Ruhi se baat karne ke liye….
Uss aagan mein takriban sab ko pata lag chuka tha ke Abhi aur Ruhi ke bich kuch chal raha hai…. Saeed team ke charon ko pata chal gaya tha ke Abhi Ruhi se behad pyar karta hai. Saeed ko bhi pata tha aur Mehboob ko bhi pata tha magar wo anjaan banne ka naatak karta tha. Usski biwi Rahima ko pura yakeen tha ke Abhi Ruhi se pyar karta hai kyunke ussne kayi baar Abhi ko Ruhi se isharon mein baat karte hue dekh liya tha washroom se, aur Rahima ne Ruhi ko isharon se jawaab dete hue bhi dekha tha.
Ab itna pata nahin chala tha ke kia Rahima ne wo sab Mehboob ko bataya tha ya nahin isske baare mein waqt aane par pata chalega.
Shweta weekends mein aati thi aur kabhi 3 ya 4 din baad jaati thi. Mehboob ki beti jo Primary school jaati thi, wo bhi Abhi se hamesha baatein karti thi, chhoti thi, aur jiss din Shweta aur Farzina(Mehboob ki beti) saath khelte to kaafi shor hote the aangan mein…. Donn ladkiyan khelte waqt kayi baar Abhi ke paas aate uss se baatein karte, ussko cherrte, chhute etc…. Aur Ruhi kadhi donon ko dekhti. Kabhi kabhi to koyi baat kehna hota to Ruhi Farzina ko kehti jaakar Abhi se kehne ke liye.
Phir aaye school ki chhutiyon ke din. Der mahina school, college sab bandh, aur saare bache at home. Ruhi ka bhai Mahesh bhi ab har roz at home. Abhi ko ab fikar hone laga ke ussko kitne ache mauke mile the Ruhi se apne dil ki baat kehne ko magar ussne nahin kaha aur ab der mahina aur wait karna padega, aur bus ke upar wale frames bhi weld ho chuke the aur ab bus aisa dikhne laga tha takriban:
Ye photo ek example hai aur yeh ek garage ke andar hai, magar wahan Abhi wala chasis par tha aur aangan mein tha peyr ke niche tha.
Abhi aise hi weld karta tha, aur itna ooncha bus ki body ban gaye the ek mahine mein, sab ho gaya tha….
Aur Abhi ko ab lagne laga ke agle der mahinon mein bus ko complete kar diya jaega. To ussko bada fikar hua ke ab der mahina bacha hai usske paas Ruhi se apne dil ki baat kehne ke liye, ya ussko propose karne ke liye… agar der mahine mein kaam end hua to matlab schools resume hone tak bus road par chalne lagega. Abhi ko ab waqt kum dikhne laga…. Ussko fikar hua aur socha ab to Ruhi se kehna padega sab kuch….. magar ussko pata nahin kyun darr sa lag raha tha, ussko darr tha ke Ruhi naah nah karde. Aur yeh bhi soch raha tha Abhi ke yeh bhi ho sakta hai ke Ruhi intezaar kar rahi ho ke kab Abhi ussko propose karega. Abhi ki saansein phul rahe the yeh sab sochte hue. Ussko himmat nahin ho rahi thi Ruhi se yeh kehne ke liye ke wo uss se pyar karta hai.
***********************************************************************
Sab mamool par chal rahe the aur ek din kaam karte waqt har roz ki tarah Abhi ne Ruhi ko kapde dhote hue dekha. Takriban har subha ke 10 baje Ruhi uss pathar par kapde dhote hue nazar aati hi thi aur Abhi uss se isharon mein baat karta tha aur Ruhi bhi thodi chanchal adaa se Abhi ko dekhti aur baat karti. Kabhi kabhi usski maa bhi karib hoti thi Ruhi ke aur wo bhi dekhti un donon ko ishaare se baat karrte hue aur wo buss hanssti aur Ruhi se puchti ke kia keh raha hai Abhi. Abhi ko achchi tarah se pata tha ke Ruhi ki maa ko sab pata hai aur wo encourage karti thi jaise apni beti ko Abhi se weise baat karne ko. Ussko koyi problem nahin thi ke usski beti Abhi ke close jaaye, baat kare ya kuch bhi.
Phir kuch der baad Ruhi dhoe hue kapdon ko sukhne ke liye daal rahi thi taar par aur usski maa andar chali gayi thi to Abhi ka mann kiya ke wo Ruhi se jaakar baat kare…. Aur gaya bhi.
Mehboob bus ke paas hi tha, baaki sab log the. Jab Abhi Ruhi ke paas gaya to Mehboob dekh raha tha. Abhi ne Ruhi ke paas hote hue kaha,
“Ek baat kehni hai tumse Ruhi.”
Ruhi ne bus ke taraf dekhte hue kaha,
“Aap kyun Mehboob chacha ke presence mein yahan aaye ho? mujhko problems hogi jaao nah please!”
Abhi ne kaha,
“Ari mere khayal se to ab sabko pata hai hamaare baare mein nah? Aur tumhari mummy bhi yahin hai nah?”
Ruhi muskuraayi aur kaha,
“kia pata hai sabko hamaare baare mein?”
Abhi: “yeh bhi kehna padega Ruhi?!”
Ruhi: “haan kehna to padega hi nah?
Abhi: “main ne kaha tha nah ke ishara kaafi hota hai to ek mahina ho gaya aur tumko pata nahin kia ab tak?”
Ruhi ne bus ke taraf dekha kapde taar par taangte hue aur weise hi muskuraate hue kaha,
“Ek mahine mein kia hota hai ek saal bhi aisa hi chal sakta hai kyun? Aap ko nahin passand jaisa chal raha hai”
Abhi: “phir usske baad kia hoga?”
Ruhi: “kuch bhi nahin kyun kia hona chahiye?”
Abhi: “Ruhi shaayad der mahinon mein bus complete ho jaega, kaam khatam ho jaega, yahan se main chala jaunga!”
Ruhi ne kuch aisa jawaab diya jiss se Abhi ke dil ko choat pahuncha.
Ruhi ne hansste hue kaha,
“Oh! chale jaoge aap? Uff matlab bala tal jaegi phir”
Ye jawaab sunkar Abhi ka dil baith gaya aur usske paas koyi bhi jawaab nahin tha Ruhi ko dene ke liye. Thoda ghussa bhi aya aur turant wahan se laut gaya bus ke paas.
Ab pata nahin Ruhi ne mazaak kiya tha ya serious thi. Ussne muskuraate, hansste hue kaha tha wo baat, shaayad Ruhi ne hi nahin socha tha ke Abhi wahan se laut jaega. Aur Shayad Abhi ko bina kuch bole wapas lautte hue dekh kar Ruhi ko apni ghalati ka ehsaas hua ke ussne kuch ghalat keh diya aur usski muskurahat udaas chehre mein badal gayi jiss waqt Abhi ke kadam wahan se bus ke taraf badhne lage the.
Abhi bus ki frame ke andar kaam kar raha tha to andar chala gaya, chehra utra hua tha to Mehboob ne pucha,
“kia hua Abhi? Chehra kyun achanak utra hua hai kissi ne kuch kaha kia tujhe?!”
Abhi ne nah kaha aur apne kaam karne laga to Mehboob ne mudhkar Ruhi ko dekha, to iss liye ke Abhi ko pata tha ke wo Ruhi ko dekh raha hoga kyun ke ussne donon ko baat karte hue dekha tha to Abhi ne bhi Ruhi ko dekha aur paaya ke Ruhi ka bhi chehra utra hua tha aur bahot hi sad face se Abhi ke taraf dekh rahi thi kapde tangte hue.
Abhi kaam karte hue badbadaata gaya ghusse mein,
“Main bala hoon? Bala tal jaegi mere chale jaane se? To kyun mere saath hanss hanss kar baat karti hai? Kyun mera intezar karti hi, kyun mujhse baat karti hai?! Achah matlab ussko Khushi hogi mere chale jaane se yeh baat hai!!”
Tony ne pucha,
“are kia ho gaya? Kaun khush hoga tere jaane se?”
Abhi ne Tony se kaha,
“Mere jaane se bala tal jaegi yaar main yahan ziada hoon, kissi ko Khushi hogi jab mera yahan aana band ho jaega!”
Tony ne pucha,
“What? Kia Ruhi ne tujhe aisa kaha kia?!”
Abhi ne Ruhi ke taraf dekhte hue haan kaha Tony ko. To Tony ne bhi Ruhi ke taraf dekha aur kaha,
“are dil pe mat le yaar ussne zaroor mazaak kiya hoga tere se!”
Abhi: “mazaak mein bhi koyi aisa kehta hai kia Tony? Mere dil ke andar ghussi wo baat, bahot takliff hua mujhe usski yeh baat sunkar. Laga ke ek khajar bhonk diye seene mein mere”
Tony ne kaha:
“are bhai dekh wo kitni udaas dikh rahi hai, usska chehra to dekh….”
Abhi ne Ruhi ke taraf dekha, usski aankhon mein dekha ke sach mein bahot udaasi thi, jaise Abhi se sorry keh rahe the usski nazrein,
Tony ne kaha,
“Sun mujhe exactly bata kia hua baat kaise shuru hui aur end kaise hui tab main tujhe bataunga ke ussne mazaak kiya ke nahin bata mujhe!”
Jab Abhi ne puri wakiya sunaya Tony ko to Tony ne kaha,
“Are paagal wo 100% mazaak kar rahi thi, aur tumne ussko koyi jawaab bhi nahin diya bina kuch kahe laut aaye to issi liye wo itni udaas hai dekh to, lagta hai rone wali hai… kia yaar jhagra bhi shuru ho gaye tum donon ke?!”
Abhi ne phir Ruhi ke chehre mein dekha to iss baar shaayad Ruhi bhi khafa hui aur andar chali gayi Abhi ko teerchi nazar se dekh kar!”
Lunch time tak Ruhi nahin dikhi, aur nah Abhi ne ussko dhunda. Ab pata nahin ke ghar ke andar se Ruhi Abhi ko kahin se jhank rahi thi ke nahin yeh sirf Ruhi ko pata hai.
Thik lunch lene jaane se pehle bus ke andar se ek baar Abhi ne Ruhi ke uss khidki ke taraf dekha, to Ruhi khidki par apne donon elbow teke hue nazar aaye bus mein dekhte hue. Abhi ne seedha usske chehre mein dekha, Ruhi ne gaalon ko phulaate hue jaise Abhi ko mock kiya, phir turant apne jeeb nikaal kar Abhi ko mock kiya Ruhi ne…. yeh Abhi ko bahot hi achcha laga, aur kayi baar Abhi ko weise mock karti gayi apne jeeb se… lag raha tha jaise wo Abhi ko manaane ki koshish kar rahi thi….
Lunch ke liye Abhi washroom ke taraf gaya aur Ruhi wahin rahi apne khidki par teke hue. Abhi ko pata tha ke Ruhi wahan usska wait karegi kyunke har roz lunch ke baat Abhi wahan uss se baat karne jaata hai. Magar aaj Abhi nahin gaya usske paas! Ruhi wait karti rahi aur ek baar Abhi aur Tony donon nikle, bus ke paas se guzre, Ruhi khush hui ke Abhi usske paas araha hai magar Abhi aur Tony seedhe chale gaye main road ke taraf, Ruhi wait karti rahi magar Abhi nahin aya lunch time ki break khatam hone tak. Jab 12.45 ho gaye Ruhi ne time dekha to ussko pata tha ke ab work resume karega Abhi to uss se baat nahin karega….. ussne Abhi ko main road se wapas aate dekha, Abhi ne usske taraf sirf ek baar dekha, Ruhi wahi rahi apne kamre ke andar se khidki par lean hote hue, aur Abhi bus ke andar chala gaya aur kaam start kar diya, Ruhi dekhti rahi….. ab jitna ghussa Abhi ko aya tha kuch der pehle uss se ziada ghussa Ruhi ko aayi to ussne khidki bandh kar liya, parde khinch liye, wahan se lounge mein aayi aur saare parde khinch diye aur sone chali gayi….. Abhi ne sab dekha aur chup chap kaam karta gaya kyunke ussko pata tha ke ab Ruhi sone chali gayi hai….
Magar shaam ko kaam khatam karne ke baad jab Abhi washroom gaya to Ruhi nahin dikhi, ghar wapas jaane bhi laga to Ruhi saamne nahin aayi, Abhi wait karta raha magar Ruhi nahin nikli stairs par aur Abhi ko bina Ruhi ko dekhe wapas jaana pada. Ussko ek bhaaripan mehsoos hone laga tha, saans lene mein takliff hone lagi thi, ussne socha lunch time mein ussko Ruhi se baat karne jana chahiye tha tab sab clear kar leta usske saath… Abhi ne kaha ke Ruhi grudge rakhti hai…..
Abhi uss raat ko der tak beer peeta raha Tony se Ruhi ke baare mein baat karte hue, ghar bilkool nashe mein pahuncha tha uss raat ko.
To be continued…. (2610 words)
Very very beautiful update.
Kaam teji se badh rahe hein.
Aur donon k romance bhi.
Lo! Ladaayi bhi ho gayi donon me. Ruhi ne majak kiya aur Abhi ne dil p le liya k wo bala hai usske jane se Ruhi ki bala tal jaegi.
Chote mote ladaayi chalta hai aise romance mein.
Bahut acha laga update bhai
