"bhook lagi hai??" ranvijay ko pata tha ki payal ne lunch nahi kiya hoga
Is engagement ke aanan fanan me lunch to kya, ek glass Paani tak nahi piya tha payal ne
Ranvijay ne to breakfast aur lunch dono skip kiya tha
"bhook nahi hai" payal boli.itna sab kuch ho gaya usme kya khana ab
"lekin kuch to khana padega hi, driver koi aas Paas star hotel me Gaadi ghumao" ranvijay bola
"sir hum lucknow se kareeb 50 km door hai, fir wapas Jaana fir aana matlab 2-3 ghante aur pakad lijiye kyunki traffic jam ab dabakar hoga"driver bola
Itna time nahi tha ranvijay ke Paas waise bhi is engagement me uska poora din barbaad ho chuka tha
" fir koi restaurant me ghumao" ranvijay bola
"sir highway me kaha apko restaurant milega, dhaba hi milega" driver bola
"dhaba...... Lekin....." ranvijay thoda ruka aur payal ki aur dekhne laga
"dhaba hi le chaliye, waise bhi aapke staff ne kuch nahi khaya Mr ranvijay" payal boli
"OK dhaba ki aur le chalo" ranvijay bola aur Gaadi ek dhaba ke Saamne ruki aur kuch staff dhaba ke Ander gaye
"car me mini fridge bhi hai, agar softdrink ya chocolates chahiye to le sakti ho" ranvijay bola
"no thanks" payal boli aur car se bahar nikal kar dhabe ki aur gayi
Khana kha rahe staff payal ko dekh khana chod khade ho gaye
"are are aap log khade kyun ho gaye. Baith jaiye" payal muskurakar boli
Ranvijay jaisa bhi hai in staff ki koi galti nahi hai ye sirf ranvijay ki galti hai
"chacha ek plate parathe mere liye lagwa dijiye" payal boli
"madam ye aap logo ke khane ki jagah nahi hai yahan" ashwin hairan hokar bola
"khana khane ki koi jagah hoti hai ashwin bhaiyya??" bol payal ne aage badh kar parathe wali thali le liya aur khane lagi
Mr ranvijay ki wife uske staff ke saath aise jagah par kha rahi thi
Staff chupchap khane lage
"wow khana bohut tasty tha, hai na ashwin bhaiyya" payal boli
"j ji madam" ashwin bola
"to chalein aapka khadus boss wait kar raha hai" payal boli
Saath hi saath payal wapas a gayi
"itna time khana khane me lag gaya??" ranvijay ne poocha
"time dekhkar khana khaya nahi Jaata Mr ranvijay enjoy karke khaya Jaata Hai" payal boli
Aur ranvijay gusse se wapas apni jagah baith gaya
Gaadi wapas anandpur ki aur chalne lagi
"a aap hotel jakar k khana kha lijiye, aapne kuch nahi khaya" payal khidki se nazare dekhte hue boli
Ranvijay hairan hokar payal ki aur dekhne laga. Payal utarkar apne ghar chali gayi aur ranvijay ki Gaadi aage badh gayi
"sir" ashwin bola
"bolo" ranvijay apni aankhen band kar bola
"ab aap apni nayi zindagi shuru karne wale hai, kya ab aapko is badle ki aag se nikalna thik nahi lagta??" ashwin bola
Ranvijay ne kuch nahi bola. Bas sochne laga
Aur uska chehra sakht hota gaya aur sharir gusse se kaampne laga
"sir please dawai le lijiye please" bol ashwin ne dawai aur Paani ranvijay ki aur badhaya
Ranvijay ne dawai li aur shant hokar so gaya
"he bhagwan aur kitni pariksha lega is insan ki" ashwin ranvijay ke sote hue chehre ko dekhkar bola
Gaadi apni speed ke saath hotel pohunch rahi thi
----------------------------------------------------------------------
Ashmita aaj late ho gayi ghar pohunchne me
Har din apne bete ke sawalo ka jawab dete nahi banta tha
Kahan se layegi uske papa ko??? Jo Insaan uski kokh bhar gaya aur use chorkar chala gaya use to thik se pehchanti bhi nahi
"maa pata hai sushil aur kaveri ke papa unko ghumane le gaye" rishi bol pada
"to thik hai beta hum bhi jayenge Saath me sarita dadi ko bhi le lenge, kya Kehte ho??" ashmita apne bete se boli
Rishi ko ye sunkar zyada khushi nahi hui shayad, bas wahi feeki si muskurahat ke saath sofe par baith gaya
"kya hua beta" ashmita be apne bete ke sar par haath ferkar bola
"kuch nahi maa, sone ja raha hoon" rishi bol apne bed ki aur chala haya
Ashmita use rokna chahti thi, lekin rok nahi paayi
Kuch to use rok raha tha, khud ko achanak guilty feel karne lagi wo
Lekin isme uski kya galti?? Kya dosh???
Har din wo bas yahi chahti hai ki sab kuch thik ho lekin kahi na kahi rishi ghuma firakar papa ki zid par ada rehta hai. Kya kare wo??
Apne khayalon me itni khoi hui thi ki use pata hi nahi chala ki uska mobile baj raha tha
Usne screen dekha, India ka number to tha nahi
Koun phone karega use???
"hello??" ashmita ne thoda sankoch karte hue phone uthaya
"hello ashmita ji kaisi hai??" ek Awaaz doosri aur se sunai di use
"sorry lekin mai aapko..."
"pehchanti nahi hai, hai na?? Mai shivraj. Ek chota sa business man hoon madam. Lekin aapke liye bade kaam ka banda ban sakta hoon" shivraj bola
"matlab??" ashmita ne poocha
"50 crore poora white money, account me ho sakta hai. Aapko USA ka green card mil sakta hai. Bachhe ko acha education mil sakta hai" shivraj bola
"itni Meherbani kyun sir??" ashmita
"Meherbani isliye kyunki aap hame wo factory mrs sarita se dilwane me madad karengi, board members aapke bina koi decision lenge nahi aur aap... He he he" shivraj hasne laga
"sorry Mr shivraj factory ka future already decide ho gaya hai,please ainda phone mat kijiye" Ashmita boli
"abhi time hai madam, soch kar phone kar dijiyega ya sms, rakhta hoon" call cut gaya
50 crore?? Ashmita ne ekbar apne bete ki aur dekha jo doosre kamre me tha
Itne paise se uska future ban sakta hai, usko papa ki zaroorat hi nahi padegi
Ashmita ne shayad kuch thaan liya tha.