Thriller Dead Never Lie ~ A Love Story

[Ashux3]

Update - 7


ab nitin ke paas bhee koee chaara nahee bacha.. rohan ko yoon chhchodakar bhaagata kaise? nahee to haalat ab tak usakee bhee patalee ho chukee thee.... vo bhee pichhe pichhe ho liya....

"aao baitho! yahaan aa jao..arre bhaee sharma kyoon rahe ho? aao baitho na!" buddhe ne unako kamare mein le jaate hue pooree sharaafat ke saath unn par haq jataate hue baat kahee.. par sharaafat aur maasoomiyat ke pichhe chhipi bhayaavahata ko unhone ghanta bhar pahale hee mahasoos kiya tha.. iseelie dono ke man mein uthalaputhal jaaree thee.. dono ne ek doosare kee aankhon mein dekha aur pooree satarkata baratte hue deevaar ke saath bichhe palang par ja baithe.. unakee kamar ke pichhe sirf ek sapaat deevaar thee.. vo vahaan iseelie baithe taaki kamare mein hone vaalee har gatividhi par nazar rakh saken...


" shruti beta.. zara kuchchh paanee vaanee le aao.. itanee der kyoon laga rahee ho..?" buddhe ne unn dono ke saamane baithate hue baahar munh karake aavaaz lagaee...

"laee baapoo..!" baahar se vahee sureelee aavaaz dono ke kaano mein padee...

"to.. vahaan kya karane gaye the tum log? shaharee maaloom hote ho..!" buddhe ne badee hee aatmeeyata se dono se poochachha..

"jjee.. ham raasta bhatak gaye the..!" nitin ne baat ko golamol karate hue javaab diya.. ye kahana unako katayi munaasib nahee laga kee vo kisee ladakee kee talaash mein vahaan apanee aisee taisee karane gaye the...

"humm.. tum do hee gaye the ya koee vaheen rah gaya...?" buddhe ne sahajata se baat kahee...

"jee.. kya matalab?.. ham do hee the bas..!" is baar bhee nitin ne hee javaab diya.. rohan to chupachaap hee unakee baaten sun raha tha.. vo isee udhedabun mein tha kee yahaan se nikalenge kab...

"shukr hai.. dono theek taak vaapas aa gaye..!" buddhe ne gaharee lambee saans lete hue beedee sulaga lee," peete ho kya?" kahakar buddhe ne beedeeyon ka bandl unakee aur badhaaya..

"jee nahee.. shukriya...!" nitin ne vinamrata se mana kar diya..

tabhee rohan palang se lagabhag uchchhal kar khada ho gaya," nee...?"

nitin ne chaunkate hue pahale rohan kee aur dekha aur phir usakee nazaron ka anusaran karate hue nigaahen daravaaje par jama dee..

"kya hua beta? tum khade kyoon ho gaye...?" buddhe ne bhee rohan se baat kahakar daravaaje kee aur dekha," ye meree betee hai.. shruti.. aa jao betee.. "

rohan kee saansen usake halak mein hee atakee huee thee abhee tak.. daravaaje se andar aane vaalee ladakee neeroo hee to thee.. vahee neeroo jisake lie rohan paagal hua ja raha tha.. sundarata kee adbhut mishaal thee vo.. sir se lekar paanv tak.. chharhara lamba badan, halkee see lambaee lie hue lagabhag golaakaar gore chehare par adbhut kashish lie hue lambee kajaraaree aankhen.. halka gulabeepan lie hue raseele honth, surahidaar lumbee gardan.. aur..

khair yoon kahen kee saundarya ras usake badan mein sirf dikh hee nahee raha tha.. maano tapak raha ho.. usakee maasoomiyat se, usake sharmeele pan se, usake yauvan se.. usakee har ada se..

bina ek baar bhee palaken uthae usane unake saamane tebal par paanee rakha aur vaapas chalane lagee..

 

[Ashux3]

Update - 8


"betee.. khaana bana dena.. jaane kab se bhookhe honge bechaare..!"

"jee baapoo.. maine sabjee rakh dee hai.." nazaren jhukae hue hee usane mudakar apane larajate honto se baat kahee aur baahar nikal gayee..

"jee nahee.. hamen bhookh nahee hai.. ham ab bas nikalenge.. aap bas kisee taiyar pankchar vaale ka ghar bata den" nitin ne khada hote hue kaha.. darasal rohan ko is tarah chaunkate dekh nitin ke man mein anek savaal khade ho gaye the.. aur vah jald se jald baahar nikal kar sab kliyar karana chaahata tha...

"nahee bhaee.. aise kaise jaane doonga tumhe? ye bhee koee jaane ka taim hai.. aur is gaanv mein koee pankchar lagaane vaala bhee nahee hai.. abhee aaraam se khaana khaakar so jao.. subah dekh lena.." buddhe ne nitin ka haath pakad kar usako vaapas chaarapaee par baitha diya...

nitin ne rohan kee aur dekha.. usakee aankhon kee chamak bata rahee thee kee usako apanee manzil mil gayee hai..

" theek hai ankal jee.. jab aap itana dabaav daal rahe hain to yahee sahee.. aapaka bada ahasaan hoga.." rohan ko maano munh maanga mil gaya...

"isamen ahasaan kee kya baat hai beta..! aadamee hee aadamee ke kaam aata hai.. aur phir mehamaan to bhagavaan hota hai apane desh mein.. kisee baat kee chinta mat karo.. ise apana hee ghar samajho!" buddhe ne badee aatmeeyata se muskuraate hue kaha...

buddhe kee baaton ne dono ko tasallee see dee.. kam se kam yahaan ab tak kuchchh vaisa nahee hua tha, jisasse unhe yahaan bhee kuchchh ajeebogareeb hone ka dar rahe..

"ankal jee.. ye khoonee taalaab ka kya chakkar hai?" nitin ne hichakichaate hue baat chala hee dee...

nitin ke zikr karate hee buddhe kee aankhen ateet ka kuchchh yaad sa karane ke andaaj mein sikud see gayee," usake baare mein ham gaanv ke log kisee ko bataate nahee beta.. bas itana khayaal rakhana kee dobaara kabhee us taraph bhool kar bhee mat jaana.. aur na hee kisee se isaka jikar karana.. tum sahee salaamat vaapas aa gaye, isake lie bhagavaan ka dhanyavaad karo..!"

" ham kisee se nahee kahenge.. par bataane mein harz kya hai? kuchchh to bataie..!" nitin aur rohan dono utsukata se kuchchh bataane ka mood bana rahe buddhe kee aur dekh rahe the...

"hoommm.. kisee se bhool kar bhee jikar mat karana.. hamaare bade kahate the ki puraane teele kee aatmaayen baahar ke logon se nafarat karatee hain.. ek baar koee angrej tumhaaree hee tarah bhatak kar vahaan chala gaya tha.. subah usakee laash taalaab ke kinaare par milee thee.. itane bade bade keede chal rahe the usakee aadhee khaee huee laash mein.." buddhe ne keedon ka saiz bataane ke lie apanee ungalee ko lamba kar diya.. laash ka sir to bilkul hee gaayab tha.. usake pet ko cheer sa diya gaya tha.. aur dil chhaatee se baahar latak raha tha.. bas phir kya tha.. usakee maut ka kaaran jaanne ke lie angrezon ne vahaan dera daal liya... bahut koshish kee par kisee ko kuchchh haasil na hua.. par usake baad maut bahut huee.. par saaree baahar ke logon kee.. iseelie ab ham kisee ko kuchchh nahee bataate.. padhe likhe log inn baaton mein visvaash nahee karate na.. phir koee vahaan ka raaj jaanne jaega aur khamkha maara jaega.. kya phaayada..?" kahakar buddha apane chehare par peeda ke bhaav lie chup ho gaya..

 

[Ashux3]

Update - 9

"ham aisee galatee nahee karenge ankal jee.. kisee se kuchchh kahenge bhee nahee.. bataie na.. aur.. aisa kya hai vahaan? aur vo khoonee taalaab..?" nitin kee utsukata badhatee hee ja rahee thee...

"tum ab maanoge nahee poochchhe bina.. darasal vo taalaab bahut puraana hai.. hazaaron saal puraana.. usaka paanee kabhee nahee sookhata.. par jo vahaan se tumhaaree tarah bachakar vaapas aa jaate hain.. vo bataate hain ki raat ko taalaab ka paanee laal ho jaata hai.. khoon ke jaisa.. iseelie ham usako khoonee taalaab kahate hain... aatma ke prakop se bachane ke lie gaanv vaale vahaan khade peepal ke ped kee pooja karate hain.. dekhane vaale bataate hain kee raat bhar ped par roshanee rahatee hai.. par raat mein aaj tak koee usake paas pahunch nahee paaya.. ya jo pahuncha hoga.. mara gaya hoga.. suna hai vahaan ek chhhote bachche kee aatma bhee bhatakatee rahatee hai.."

"haan.." rohan bachche ke baare mein bolane hee vaala tha kee nitin ne usaka haath daba diya aur usane apanee baat palat dee," haan.. aatma hotee hain.. maine bhee suna hai!"

"suna kya hai beta.. gaanv vaalon ne to us bachche ko dekha bhee hai.. bataate hain kee vo bachcha vahaan jaane vaale logon ko usake ghar chhchod aane ko kahata hai.. peepal ke ped par....

" par vo aatmaayen aakhir hain kaun? aur baahar vaale logon se hee nafarat kyoon karatee hain vo?" buddhe ke har khulaase ke saath nitin kee utsukata badhatee ja rahee thee.. sab kuchchh jaan lene ke lie.. haalaanki vo aatma ke chakkar ko nahee maanata tha.. par aaj raat ka anubhav usako unake baare mein aur sunne ko vivash kar raha tha...

"ab sachchaee to bhagavaan hee jaanata hai beta.. humaare paas to sunee sunaee baate hain.. kahate hain ki us peepal ke ped kee jagah pahale kisee raaja ka mahal hua karata tha.. teen raaniyaan thee usakee.. teeno ek se ek sundar.. phir kisee mughal smraat ne us raaja ko hara kar raaniyon ke saamane hee us par chakala (rolar) chalava kar marava diya aur us mahal ko apana haram bana liya.. teeno raaniyon samet mahal kee sabhee auraton ko apana bandee banaakar rakha... jo kuchchh vo unn raaniyon aur auraton ke saath karata tha vo bataane laayak hai nahee.. tum mere beton ke jaise ho.. par haan.. har subah ek arthee uthatee thee mahal se.. ye silasila tab tak jaaree raha jab tak kee mahal mein ek bhee aurat bachee... kahate hain kee ye aatmaayen usee raaja aur unhee raaniyon kee hain..."

"osh..!" nitin ne pratikriya vyakt karate hue kaha...

tabhee shruti khaana le aaee aur usako tebal par sajaane lagee.. rohan lagaataar usakee aankhon kee aur dekh raha tha.. is taak mein kee shruti usakee aur dekhe aur vo usakee aankhon mein apane lie apanaapan dhoondh sake.. par badaqismatee se aisa hua nahee.. shruti ne nazaren upar hee nahee uthaee aur khaana lagaakar bolee," aapake lie bhee le aau baapoo?" aavaaz mein itanee mithaas thee kee rohan usake munh se apana naam sunne ko taras gaya.. agar baapoo na hota to vo kab ka usako tok chuka hota...

"nahee betee.. thodee der pahale hee to khaaya tha.. tum jao.. jaakar so jao.. main aata hoon thodee der mein..."

"achchchha baapoo.. main kundee nahee lagaungee.. aap aakar band kar lena.." shruti ne apane pita kee aur dekhate hue kaha aur phir vaapas mood gayee...

"aapake ghar mein aur kaun kaun hain ankal jee?" rohan ka interest sirf neeroo ke baare mein jaanne ko hee tha..

"bas ham do jaan hee hain beta.. beevee isako janam dete hee gujar gayee thee.. so aur koee aulaad nahee hai.. kuchchh din baad to main akela hee rah jaunga.." buddhe ne javaab diya..

"vo kyoon?" khaana khaate hue hee rohan ne usakee aur dekha...

" shaadee nahee karoonga kya beta.. ladakee to paraaya dhan hotee hai.."

rotee ka tukada rohan ke halak mein hee atak gaya," kab.. kab kar rahe hain shaadee..?"

"abhee to ye maan hee nahee rahee.. kahatee hai padhaee pooree karane ke baad sochoongee... naadaan aur bholee hai par jiddee bhee bahut hai.. jo soch liya vo soch liya.. phir kisee kee nahee sunatee ye.."

"sh.. " rohan kee jaan mein jaan aaee.. pahale usako laga tha ki kaheen shaadee pakkee na ho gayee ho isakee..

khaana khaane ke baad buddhe ne bartan uthae aur unako subah milane ko kahakar chala gaya..

 

[Ashux3]

Sorry today no update

 

[Ashux3]

Update - 10

usake jaate hee rohan ne aankhen matakaate hue nitin kee aur dekha," kyoon..? kaisee lagee..?"

"yahee hai vo?" nitin ko shak to tha.. par taajjub usse kaheen zyaada...

"humm.." rohan khushee se phoola nahee sama raha tha.. ajeeb see khumaaree mein usane takiye ko apanee chhaatee ke neeche dabaaya aur pet ke bal let gaya..

"par isaka naam to shruti hai.. too to neeroo kah raha tha..?" nitin ne doosare palang par lette hue doosara savaal kiya...

"naam mein kya rakha hai yaar.. bas.. itana jaan le, jisake lie main aaya tha.. mujhe mil gaya hai.. main tere is ahasaan ka badala kabhee nahee chuka paunga.. main na kahata tha.. meree neeroo mujhe zaroor milegee.." rohan par pyaar ka bhoot savaar tha..

"aabe saale.. isane tere ko dekha tak nahee aur too aise uchchhal raha hai.. kaheen tujhe bhool na gayee ho... kitane taim pahale milee thee..?" nitin uthakar baith gaya..

"vo sab main tere ko baad mein bataunga.. par too ye to bata kee lagee kaisee tujhe..?"

"bahut pyaaree hai.. sach boloon to.. isake jaisee koee ladakee maine aaj tak nahee dekhee.. agar ye neeroo na hotee to main isake baare mein apane lie soch raha tha.. aur ab bhee kya pata.. ye shruti hee ho.. teree neeroo kee hamashakaal.. teree neeroo to tujhe vaheen milegee.. puraane teele par... he he he" nitin ne sharaaratee muskaan apane chehare par laate hue kaha...

" aisee baat mat kar yaar.. mujhe achchchha nahee lagata.." rohan ne munh banaakar kaha..

"mazaak kar raha hoon be.. par ek baat meree samajh mein nahee aaee...!" nitin ne ko jaise kuchchh achaanak yaad aa gaya ho..

"vo kya?" rohan bhee uthakar baith gaya..

"isane tere ko vahaan kyoon bulaaya..? aur bulaaya bhee to vahaan milana chaahie tha.. ab kisako pata tha ki humaaree gaadee mein pankchar ho jaega aur ham vaapas aakar isee ghar ka daravaaja khatakhataenge.. agar ham seedhe nikal jaate to shaayad hee kabhee dobaara aate.. yahaan par.." nitin kee baat mein dam tha...

"haan yaar.. vo to hai.. jab baat karegee to zaroor poochhonga ye baat..." rohan ne javaab diya...

" par ab to bata de ye tujhe kahaan milee? kaise milee.. aur kaise paatee?" nitin jaanne ke lie utsuk tha...

"ek baar baat ho jaane de.. phir sab kuchchh bataunga.. hamaara milana ankal jee kee bhooto vaalee kahaanee se kam dilachasp nahee hai.. mujhe khud visvaas nahee tha ki main isse mil paunga..."

"abhee bata de na.. abhee kya dikkat hai..?" nitin ne is baar zor dekar kaha tha..

"na.. abhee nahee.. bahut dilachasp baat hai.. par abhee kuchchh nahee kah sakata.. pahale isse baat kar loon...!" rohan ne kaha aur vaapas let gaya," chal ab so jaate hain.. subah jaldee uthana hai.."

"theek hai beta.. log matalab nikal jaane ke baad kis kadar rang badalate hain.. ye main dekh raha hoon.. chal achchchha hai.. main intajaar karoonga, teree isse baat hone kee.. gud nait!"

"gud nait bhaee gud nait!" rohan ne kaha aur sir ke neeche se takiya nikaal kar seene par rakh liya.. dono haathon mein daboch kar.....

 

[Ashux3]

 

[Ashux3]

Update - 11


raat kareeb 2 bajakar 17 minit...... rohan daravaaje par pairon kee aahat sunakar chaunk gaya.. usakee ummeed ko pooree tarah pankh lage bhee na the kee kamare mein roshanee chchha gayee.. halkee see naaraazagee jataatee huee neeroo usakee aankhon mein aankhen daale usako ghoor rahee thee.. haule haule chalatee huee vo usake pairon ke paas aakar usake palang par baith gayee..

"ye kaun hai?" neeroo ne jhukate hue dheere se nitin kee aur ishaara karate hue poochachha..

"mera dost hai.. mere bhaee jaisa hai.. kyoon?" rohan ne bhee usee ke andaaj mein javaab diya..

"isako kyoon lekar aae..? maine akele aane ko bola tha na..?" naaraazagee ab bhee neeroo kee naak par baithee thee..

"kamaal karatee ho? aisee khataranaak jagah par akele.. jaan lene ka iraada tha kya?" rohan ne lete lete hee javaab diya...

"jaan to main tumhaaree loongee hee.. ek baar samay aane do" kahakar neeroo kaatil ada se muskuraane lagee.. usakee isee ada ka to rohan deevaana tha," chalo theek hai.. tumhaaree ye baat maan letee hoon.. isako lekar aa jao.. par isako door hee khada kar dena.. mujhe tumase zarooree baaten karanee hain.. jaane kab se tumhaare lie tadap rahee hoon.. tumhe to ahasaas bhee nahee hoga, meree mohabbat ka.."

"tumhaaree yahee baat meree samajh mein nahee aa rahee.. kahatee ho mujhase pyaar karatee ho.. par aaj tak kabhee chhoone kee ijaazat nahee dee.. main bhee tumhaare lie paagal ho chala hoon.. pleez ek baar.. ek baar mujhe tumhe chhoo kar mahasoos kar lene do.. kitanee pyaaree ho tum.. tumhaare lie main yahaan tak bhee aa gaya.. ek baar mere aagosh mein aa jao na.. pleez!" rohan usake shareer se utsarjit ho rahee yauvan bayaar ko apane andar tak mahasoos karane ko tadap utha...

"main bhee to utanee hee tadap rahee hoon dev! tumhe kya pata, mera ek ek pal kaise beetta hai.. us pal ke lie jab main aur tum ham honge.. ye faasale kitana tadapate hain, mujhase zyaada kaun samajhega.. bas intazaar karo... " neeroo kee aankhon se usake lie be-intaha zajbaat jhalak rahe the...

"kitanee baar batau ki main rohan hoon.. agar tum kisee dev ke dhokhe mein mere pichhe padee ho to maaphee chaahata hoon.. par phir bhee yahee kahoonga ki ab main tumhaare bina rah nahee paunga.. tumhaare pyaar mein jaane.... tumane mujhe paagal sa kar diya hai.."

"duniya ke lie tum chaahe kuchchh bhee ho.. par mere lie to mere dev hee ho.. mujhe tumhaara yahee naam achchchha lagata hai.. main to yahee kahoongee.." aankhon mein gaharee pyaas aur maadak ahasaas lie neeroo usakee aur takatakee lagaakar dekhatee rahee...

"tum mujhe pooree tarah paagal bana kar hee chhchodogee.. mujh rohan ko tum dev kahatee ho aur apana naam neeroo bata rahee ho jabaki tumhaare pitaajee tumhe shruti kahate hain.. main kya samajhoo aur kya nahee.." rohan naam ke chakkar se abhee tak bhee nikal nahee paaya tha..

"vahaan aaoge to sab samajh aa jaega.. ab yahaan main tumhe kya batau?" neeroo ne bebas nazaron se usako dekhate hue kaha..

 

[Ashux3]

 

[Ashux3]

Update - 12


"ajeeb ladakee ho.. yahaan mere saamane baithee ho.. us vaqt nazar utha kar bhee tumane nahee dekha.. aur ab ye chhhotee see baat bataane ke lie mujhe vahaan bula rahee ho.. itanee khataranaak aur daraavanee jagah maine aaj tak nahee dekhee.. pata hai.. ?" rohan ke chehare par us ajeebogareeb jagah kee daraavanee yaadon kee tees chha gayee..

"kya? tum vahaan gaye the? par maine tumhe 12 baje ke baad aane ko kaha tha na.. ruke kyoon nahee vahaan par..." neeroo adheer hote hue bolee...

" kaise rukate..ham vahaan gaye to hamen vahaan ek bachcha mila.. itana khauphanaak manzar tha ki meree to jaan hee nikal gayee hotee.. aur tumhe pata bhee hai.. vahaan bhoot rahate hain.. tumhaare pitaajee ne hee bataaya tha.." rohan ne spasht kiya...

"asamay gujar chuke logon ko bhoot kahakar unaka mazaak na banao dev.. tumhe ham... unakee peedaon ka ahasaas nahee hai.. har pal kis vedana aur dard kee bhatti mein tapate rahana padata hai.. ye tumhe kya maaloom.. tum to aazaad ho.. kaheen bhee aa ja sakate ho.. par vo har tarah se ek daayare mein bandhe hain.. harapal usee dardanaak manzar ko aankhon mein lie tadapte rahate hain.. jis ghadee jindagee ne badee kroorata se unake sir se apana haath hata liya.. vo har pal isee intazaar mein rahate hain ki kab koee rahanuma aaega aur unako vahaan se, us jahannum se mukti dilaega.. aa jao na dev.. sirf ek baar aa jao.. main har pal tumhaara intajaar karatee hoon.. ek baar vahaan aa jao meree jaan.. mujhe jahannum se nikal kar jannat mein le chalo.." neeroo bolate bolate bhaavuk hokar gidagidaane see lagee..

"aise kyoon kar rahee ho.. mujhase tumhaaree ye bechainee dekhee nahee jaatee.. par aisa kya hai jo yahaan nahee bata sakatee.. vaheen jaana kyoon zarooree hai neeroo..?"

"vahaan jaana zarooree nahee hai dev.. par mujhe dar hai.. maine yahaan bata diya to tum vahaan shaayad kabhee nahee aaoge.." maayoos neeroo kee aankhon se aansoo chhalak uthe..

"isaka matalab tumhe mere pyaar par bharosa nahee hai.. isaka matalab kuchchh aisa zaroor hai jo tum mujhase chhipa rahee ho.. jab tum mujh par vishvaas nahee karatee to main tum par kyoon karoon..?" rohan baat jaanne ko laalaayit lag raha tha..

"tumhaare andar ke dev par mujhe poora visvaas hai.. par baahar ke rohan par nahee.. vaqt jaane kitanee karavaten badalata hai.. is daramiyaan jaane tum kitanee baar badale hoge.. main iseelie dar rahee hoon.." neeroo apana haath badhakar usake chehare ko chhoone ko huee par kuchchh yaad aate hee turant vaapas kheech liya...

"dekho neeroo ya shruti, tum jo bhee ho.. tumane apane pyaar mein to mujhe paagal kar hee diya hai.. ab asaliyat mein paagal hona nahee chaahata.. paheliyaan mat bujhao.. par itana jaan lo ki jab tak tum mujhe sab kuchchh sach sach nahee bataatee, main vahaan vaapas nahee jaunga.. haragiz nahee.." rohan ne do tuk javaab diya..

"aisa kyoon kah rahe ho dev.. kya main yoonhee tadapati rahoongee..? tum meree baat samajhate kyoon nahee ho.. aa jao na pleez..." neeroo kee haalat dayaneey ho chalee thee..

 

[Ashux3]

Update - 13


"main to sab samajh raha hoon.. agar samajhata nahee to yahaan tak aata hee kyoon.. achchchha chalo.. main vaada karata hoon ki agar tum abhee sab kuchchh bata doge to tum jahaan kahogee, vahaan aane ke lie taiyaar hoon.."

kuchchh der sochate rahane ke baad neeroo bolee," ye rohan ka vaada hai ya phir dev ka.."

rohan jhalla utha..," kya hai yaar.. dev.. rohan.. dono ka vaada raha.. dev ka bhee.. aur rohan ka bhee.. ab to bata do..."

"soch lo.. dev ke vaade soolee par jaakar bhee nahee tootte.." neeroo ko kuchchh ummeed see bandhee..

"humm.. soch liya... vaada raha.. dev ka!" rohan ne kahate hue apana haath badhaaya par neeroo kee taraph se koee pratikriya na milee....

neeroo ne lambee saans chhchodate hue chhat kee aur dekha.. aur achaanak hee bolana shuroo kar diya..," vo bachcha.. jisakee tum baat kar rahe ho.. mera chhhota bhaee hai..

"kyaa?" rohan neeroo kee is baat ko pacha nahee paaya aur neend mein hee andar tak kaanp gaya.. hadabada kar lagabhag cheekhate hue vah uth baitha.. cheekh ke saath hee nitin ek pal mein hee uth kar palang se khada ho gaya..," kya hua?"

"ye.. ye lait kyoon band kar dee.. neeroo kahaan gayee.." rohan ka sir chakara raha tha.. band aankhon mein jahaan usako ujaala hee ujaala dikh raha tha.. aankhen kholate hee.. andhere ke siva usako kuchchh nazar na aaya.. vahaan to pahale se hee andhera tha.. ujaala to sapane mein neeroo saath lekar aaee thee...

"neeroo, yahaan? saale too paagal ho gaya hai kya? sapana dekh raha tha ya?" nitin ne rohan ko kandhe se pakad kar hila diya...

rohan ne jaise taise khud ko sambhaala," haan bhaee.. sapana hee tha.. soree.. so ja.."

"ab thodee bahut raat bachee hai.. usamen to chain se so lene de too.. kya ho gaya hai tujhe.. bata na.. too khulakar kyoon nahee bataata..?" nitin ne usake kandhe par haath rakh kar pyaar se poochachha...

"kuchchh nahee yaar, so ja.. subah baat karenge..!" kahate hue rohan munh dhak kar let gaya..

"dekh.. koee baat man mein nahee rakhanee chaahie.. gaanth ban jaatee hai.. aur phir mujhase chhipa kar tujhe milega kya? baakee teree marzee hai.. subah ka intajaar karoonga.." nitin ne kaha aur doosaree aur karavat lekar so gaya...

rohan kee samajh mein kuchchh nahee aa raha tha.. pichchhale kareeb 2 maheene se usakee raaton kee neend aur din ka chain haraam tha.. kaaran neeroo hee thee.. har raat ko vo usake sapano mein aatee aur din bhar vo usake sapano mein khoya rahata.. jindagee achaanak kitanee badal gayee thee usakee.. hamesha mast kalandar kee tarah jeene vaala rohan shuroo shuroo mein to inn sapano ka aanand leta aur raat ko usake paas aakar usako pukaar rahee is haseena ke baare mein din bhar soch kar aanandit hota rahata.. nitin kee baat sach hee thee.. neeroo ke jitanee pyaaree ladakee usane bhee aaj tak nahee dekhee thee.. par jald hee ye aanand bechainee mein aur phir vo bechainee ek anjaane se lagaav mein badal gayee.. aakhir yahee ladakee roj usake sapano mein kyoon aatee hai.. kya rishta hai is ladakee ka usake saath.. ladakee ka sirf sapane mein aana bhar hee hota to baat alag thee.. par vo to usako dono ke pyaar kee duhaee detee thee.. apane paas bulaatee thee.. sapane mein usakee aavaaz yoon lagatee thee jaise kisee gaharee khaee se bol rahee ho.. ruk ruk kar kahee gayee usakee baaten pratidhvanit hokar baar baar usake kaanon mein goonjatee rahatee thee.. raat bhar.. din bhar...