Ko To Rok Lo {Update - 075}
____________________________
Abhi humari baat chal hi rahi thi ki, tabhi mera mobile baj utha. Jise sun kar mere sath sath ajay bhi chauk gaya. Kyoki itni samay kisi ka phone aane ki mujhe koi ummid nahi thi. Ajay ke bhi chaukne ki vajah shayad yahi thi. Mai call nahi utha raha tha to, ajay ne kaha.
Ajay bola “are dekh to lo kiska phone hai. Ab koi itni samay call kar raha hai to, koi jaruri call hi hogi.”
Maine apna mobile nikal kar dekha to, keerti ka call aa raha tha. Maine socha ki shayad dusra mobile band ho gaya hoga. Isliye wo isme call kar rahi hai. Maine jab apne jeb me mobile dekha to, wo abhi bhi chalu tha.
Ab mai ajay ke samne wo mobile nikal kar use ye jatana nahi chahta tha ki, itni der se jo sab baten chal rahi thi. Unhe dusre mobile par keerti sun rahi thi. Isliye maine wo mobile nahi nikala. Magar ab mujhe keerti ke call karne ka matlab samajh me nahi aa raha tha.
Maine use mana bhi kiya tha ki, mai ajay ke samne us se baat nahi karuga. Fir bhi wo call laga rahi thi. Uska aisa karna mujhe acha nahi laga aur maine uska mobile aise hi bajne diya.
Bajte bajte mobile apne aap band ho gaya. Lekin uske band hote hi usne dobara call lagana suru kar diya. Uski is harkat se mujhe aur bhi jyada chid chhutne lagi aur maine uske call ko bajne diya.
Keerti ka call aa raha tha aur mai ajay ke mere sath hone ki vajah se, uske call ko dekh kar bhi andekha kar raha tha. Fir achanak se keerti ka call aana band ho gaya. Mai samajh gaya ki, ab wo mujhe msg karegi.
Mai keerti ke msg aane ka intejar karne laga. Lekin jab ajay ne dekha ki, itne call aane ke bad bhi maine call nahi uthaya. Tab us ne mujhse kaha.
Ajay bola “yaar itna to mai samajh sakta hu ki, ye kiski call aa rahi thi. Tumhe us se ek baar, baat kar lena chaiye tha. Yadi tumko mere samne baat karne me pareshani hai to, mai gaadi rok deta hu. Tum kinare jakar, us se baat kar lo.”
Mai bola “aisi koi baat nahi hai. Mai sirf isliye baat nahi kar raha tha ki, mai ab us se aamne samne baat karna chahta hu. Waise bhi ab mujhe, uske pas pahuchne me, jyada samay to lagna nahi hai.”
Ajay bola “tumhari flight to 6 baje ki hai aur abhi to sirf 4 baje hai. Aise me yadi tum us se baat karke use bata doge ki, tum aa rahe ho. Tab use bhi shanti mil jayegi. Mai gaadi rokta hu. Tum us se baat kar lo.”
Mai keerti se ajay ke samne baat karna nahi chahta tha. Lekin ajay ki is baat ke bad, mere pas ajay ke samne, keerti se baat karne ke siwa, koi rasta nahi bacha tha. Maine ajay se kaha.
Mai bola “tumhe gaadi rokne ki koi jarurat nahi hai. Yadi ab uska call aayega to, mai us se jarur baat kar luga.”
Ajay bola “good, ye huyi na koi baat. Hum log pahle mere ghar chal rahe hai. Waha chal kar mai apne kapde aur ye gaadi badal luga. Fir hum airport chalege.”
Mai bola “ok, jaisa tumhe thik lage.”
Meri ajay se itni baat huyi. Humari saari baten to, keerti sun hi rahi thi. Shayad yahi vajah thi ki, usne msg na karke fir se call laga diya. Is baar maine uska call uthaya aur anjan bante huye, us se kaha.
Mai bola “kya hua. Tum abhi tak jag kyo rahi ho. Maine tumse kaha to tha ki, mai subah tak waha pahuch jauga. Fir tumhe so jana chahiye tha.”
Keerti boli “jhuthe, apne dost ke samne kitne bhole ban rahe ho. Use nahi pata hai ki, mai bahut der se tum logon ki saari baten sun rahi hu. Yadi tumhari ye pol khul jaye to, wo bhi kahega ki ye ladka to bikul jalebi ki tarah sidha nikla. Ha ha ha...”
Ye bol kar wo khilkhila kar hasne lagi. Use is tarah se hanste dekh kar mujhe bahut shanti mili. Mere chehre par bhi ab muskurahat aa gayi thi. Maine thodi der pahle us ke, call aane se chid jaane ki baat ko bhool kar, us se bade pyar se kaha.
Mai bola “ye faltu ki baat chhod aur ye bata ki, tu abhi tak soyi kyo nahi. Kya tujhe subah mujhse milna nahi hai.”
Keerti boli “isiliye to nahi so rahi hu. Mai ab tumse milne ke bad hi sougi.”
Mai bola “ye thik baat nahi hai. Tujhe mere waha aane tak, thoda aaram kar lena chahiye. Mujhe abhi waha pahuchne me bahut samay lagega. Aise me tu kyo apni nind kharab kar rahi hai.”
Magar ab keerti mujhe waha aata dekh kar bahut khush lag rahi thi. Ab uska mood bahut acha tha aur wo masti karte huye meri baat ke jabab me gaana gaane lagi.
Keerti boli “Hooo Nind Churayi Meri,
Kisne O Sanam,
Tu Ne, Tu Ne.
Haan Chain Churaya Mera
Kisne O Sanam,
Tu Ne, Tu Ne.
Hooo Dil Me Mere,
Rahne Wala, Kaun Hai,
Tu Hai, Tu Hai.”
Mujhe uska gaana gane ka andaj aisa lag raha tha. Jaise wo nach nach kar gaana gaa rahi ho. Uski is harkat par mai hanse bina na rah saka. Maine use bich me hi rokte huye kaha.
Mai bola “chal ab apna muh band kar aur ye bata ki, tune abhi call kyo kiya hai.”
Keerti boli “oye jaan, tum pagal ho gaye ho kya. Mai yadi apna muh band rakhugi to, fir bataugi kaise.”
Mai bola “tu fir suru ho gayi. Tujhe yadi aise hi bakwas karna hai to, mai call rakhta hu.”
Keerti boli “are sorry sorry jaan. Pls call mat rakhna. Mujhe tumse sach me bahut jaruri baat karna hai.”
Mai bola “nahi rakh raha hu. Ab tu bol tujhe kya baat karni hai.”
Keerti boli “batati hu, magar pahle tum bolo ki, tum meri bat sun kar, mujh par gussa nahi karoge.”
Mai bola “ok mai gussa nahi karuga. Ab bol, tujhe kya bolna hai.”
Keerti boli “jaan mai tumse 2 baat kahna chahti hu. Pahli to ye ki, tum yaha se wapas lautne ki ticket, 4 baje ki jagah 5 baje ke bad ki karwa lo.”
Mai bola “aisa kyo.”
Keerti boli “aisa karne se mujhe, tumhare sath thoda jyada rahne ko mil jayega.”
Mai bola “lekin tu janti hai. Mujhe yaha jaldi wapas lautna hai.”
Keerti boli “aisa karne se bhi tumhare waha lautne me koi jyada fark nahi padega. Lekin mere liye, ye ek ghanta bahut mayne rakhta hai. Pls jaan meri khatir aisa kar lo na.”
Mai bola “thik hai, kar leta hu. Ab tu apni dusri baat bol.”
Keerti boli “dusri baat ye hai ki, tum apne yaha aane ki baat kisi ko mat batao. Yadi tum sabko bata kar yaha aaoge to, sab ke man me bahut se sawal paida ho jayege. Mai chahti hu ki, tum yaha sirf mujhse milkar wapas chale jao.”
Mai bola “tu itni swarthi kab se ho gayi hai. Tujhe bas apni hi padi hai. Kya baki sabka mujhse milne ka man nahi kar raha hoga.”
Keerti boli “sorry jaan. Mere kahne ka ye matlab hargij nahi tha. Mai to ye baat sirf isliye bol rahi thi ki, aise samay me tumhara waha se, bina kisi vajah ke yaha wapas aana. Sabke man me shaq paida kar dega.”
Mai bola “tera kahna thik hai. Lekin mujhe yaha se din bhar gayab rahne ki vajah bhi to, kuch batana padegi. Mai bina kuch bole to, yaha se gayab nahi ho sakta.”
Keerti boli “isme koi badi baat nahi hai. Jaise tum apne janam din wale din, din bhar gayab rahe the aur apne dost ke sath mumbai ghumne ka bahana banaye the. Waisa hi kuch bahana, aaj ke liye bhi bana dena.”
Mai bola “lekin tab ye baat mere aur ajay ke siwa kisi ko nahi malum thi. Magar aaj to mai nikki se bol kar aaya hu ki, mai kaha ja raha hu. Kya aise me koi bahana banana thik rahega.”
Keerti boli “tum pahle apne dost ke sath milkar, ye soch lo ki, sab se kya bolna hai. Fir phone karke ye baat nikki ko bata dena. Mujhe nahi lagta ki, nikki ye baat kisi ko batayegi.”
Mai bola “thik hai, mai dekhta hu ki, mai kya kar sakta hu. Ab tu phone rakh aur so ja.”
Keerti boli “nahi jaan, jab tak tum plane me nahi baith jate. Tab tak mai tumhare sath rahna chahti hu. Tumhare plane me baithte hi, mai 2 ghante so lugi.”
Mai bola “jaisi teri marji. Tujhe yadi isi me khushi mil rahi hai to, ab mai tujhe nahi rokuga. Lekin ab tu phone rakh aur mujhe jara sochne de.”
Keerti boli “ok jaan, mai ye phone rakhti hu. Lekin dusre phone par, mai tumhare sath bani huyi hu.”
Mai bola “ok.”
Iske bad keerti ne phone rakh diya. Uske phone rakhne ke bad hi, ajay ka ghar aa gaya. Jis vajah se, is baat ko lekar humare bich koi baat na ho saki. Ajay ke ghar pahuchne par, ajay ne kapde aur gaadi badli. Fir hum airport ke liye nikal pade. Mujhe khamosh dekh kar ajay ne kaha.
Ajay bola “kis baat ko lekar itna soch me dube huye ho. Mujhe batao, shayad mai tumhari kuch madad kar saku.”
Mai bola “yaar, wo bol rahi hai ki, mai apne ghar wapas jaane ki baat kisi ko na batau. Is se sab ke man me kayi sawal paida ho jayege. Isliye mai din bhar gayab rahne ke liye, koi dusra bahana bana du.”
Ajay bola “baat to uski bilkul sahi hai. Achanak tumhare is tarah ghar wapas lautne ko lekar, sach me bahut si baten paida ho jayegi. Is sabse bachne ka rasta to yahi hai ki, tum koi aisa bahana bana do. Jis se sabko yahi lage ki, tum mumbai me hi kahi ho.”
Mai bola “aisa koi bahana bana pana mumkin sa nahi lag raha hai. Kyoki yaha mai kisi ko janta nahi hu. Aise me mera subah se lekar raat tak gayab rahna aur bhi sabko pareshani me daal dega.”
Ajay bola “mujhe ek rasta samajh me aa raha hai. Lekin pata nahi ki, wo kaam bhi karega ya nahi.”
Mai bola “kaun sa rasta.”
Ajay bola “tum Dr. aman ko jante ho.”
Mai bola “haan, nikki ne mera un se parichay karwaya tha.”
Ajay bola “kahi tum usi nikki ki baat to nahi kar rahe. Jo us samay tumhare sath thi. Jab tum pahli baar meri taxi me baithe the.”
Mai bola “haan, mai usi nikki ki baat kar raha hu.”
Ajay bola “tab to tum bilkul befikar ho jao. Nikki se meri baat karwao.”
Mai bola “tum nikki ko jante ho.”
Ajay bola “kya nikki ne kabhi tumhe bataya nahi ki, wo mujhe janti hai.”
Mai bola “usne mujhse aaj hi kaha ki, wo tumhe bahut ache se janti hai.”
Ajay bola “jaise wo mujhe janti hai. Waise hi mai bhi use janta hu. Lekin abhi in sab baton ka samay nahi hai. Tum meri us se baat karwao. Mai sab kuch thik kar deta hu.”
Mai bola “lekin itne samay us se baat karna thik nahi hoga. Maine use ek baar pahle hi, gahri nind se jaga diya tha. Yadi hum kuch der ruk kar baat kare to, acha rahega.”
Ajay bola “tum is baat ki chinta mat karo. Tum bas use phone laga kar mujhe de do.”
Maine aakhir me nikki ko call lagakar mobile ajay ko de diya. Kuch der bad ajay ki nikki se baat hone lagi. Ajay ko nikki bahut achi tarah se janti thi. Ye baat to wo pahle hi mujhse kah chuki thi.
Ab dono ko baat karte dekh kar, mujhe bhi is baat par pura yakin ho gaya. Dono me bahut ache se baat chal rahi thi. Ajay nikki se kah raha tha.
Ajay bola “dekho, baki sab mai sambhal luga. Tum bas utna karo, jitna mai tumse kah raha hu. Aaj jab koi tumse punnu ke baare me puchhe, tab tumhe sab se bas yahi kahna hai ki, punnu ko subah subah doctor aman ka phone aaya tha aur unki punnu se koi baat huyi thi.”
“Jiske bad punnu ko lene doctor aman ki gaadi aayi thi aur punnu subah subah hi doctor aman se milne nikal gaya tha. Yahi baat tum hospital me punnu ke dost se bhi kah dena.”
Nikki boli “....................” (lekin dopahar ko to waha raj aur baki ke log aa jayege. Wo nahi puchhege ki, punnu abhi tak kyo nahi aaya.)
Ajay bola “uske pahle punnu ka dost khud tumko bata dega ki, doctor aman ne punnu ko kuch jaruri dawaiyan lekar apne kisi dost ke pas bheja hai. Punnu der raat tak wapas laut payega.”
Nikki boli “...................” (lekin ye baat usko kaun batayega.)
Ajay bola “punnu khud abhi apne dost se phone karke ye baat bata dega ki, doctor aman ko humare shahar me apne kisi dost ke pas kuch jaruri dawaiyan bhejana hai. Isliye wo mujhe flight se waha bhej rahe hai. Mai sham ki flight se yaha wapas aa jauga.”
“Maine nikki ko bata diya hai ki, mai doctor aman ke pas ja raha hu aur wo hospital mere samay par tumhare pas aa jaye. Us samay mujhe nahi malum tha ki, doctor aman mujhe kis liye bula rahe hai. Lekin jab un ne mujhe ye kaam bataya to, mai unhe mana bhi nahi kar paya.”
“Meri abhi 6 baje ki flight hai aur waha se sham ki wapsi ki flight hai. Ab nikki shayad fir se so gayi hogi. Jis vajah se maine usko phone laga kar ye sab batana thik nahi samjha. Isliye jab wo tere pas aaye. Tab tu use ye sab kuch bata dena. Waise maine nikki ko ye bol diya tha ki, pata nahi doctor aman ke pas se mujhe wapas aane me kitna samay lage. Isliye tum hospital me ruke rahna.”
Nikki boli “....................” (ye to bahut kamal ka tarika hai. Sirf thoda sa jhuth aur puri sachchai hai. Aapka dimag to kamal ka hai.)
Ajay bola “dimag ka chhodo aur bas jaisa maine kaha hai, tum waisa kar lena. Mai aman ko bhi saari baat bata duga.”
Iske bad ajay ne call rakh diya aur mujhse mehul ko call karne ko kaha. Maine mehul ko call lagaya to, wo pahle itne samay mera call aaya dekh kar chauk gaya. Fir maine ajay ke kahe anusar us ko saari baat batata chala gaya. Jisko sunne ke bad mehul ne kaha.
Mehul bola “ye tune bilkul thik kiya. Doctor aman ne humari bahut madad ki hai. Nikki aayegi to, mai use saari baat bata duga. Din me to yaha sabhi log aate jate rahte hai. Dopahar tak raj bhi yaha aa jayega. Ab papa ki tabiyat bhi bilkul thik hai. Aise me tu yaha ki chinta mat kar aur befikar hokar ja.”
Mai bola “thik hai. Tu aaj din ka bas waha ka dekhe rahna. Mai aaj raat hospital me ruk jauga.”
Mehul bola “tujhe raat ko hospital me rukne ki koi jarurat nahi hai. Jaisa chal raha hai, waisa hi chalne de. Waise bhi tu din bhar ke safar se thaka hua rahega. Aise me tujhe aaram ki bhi jarurat hai.”
Mai bola “abe mujhe kisi aaram ki jarurat nahi hai. Mai sab sambhal luga.”
Mehul bola “mujhe malum hai ki, tu sab sambhal lega. Lekin tu mujhe bevakuf samajhna band kar de. Mai janta hu ki, tu ye baat kyo kah raha hai. Tujhe ye lag raha hai ki, kahi tere na rahne par mai papa ko hospital me chhod kar aaram se sota na rahu. Isliye tu chahta hai ki, mai din me thoda bahut aaram kar ke papa ke pas rahu aur tu raat ko aakar rah lega. Magar is sab ki koi jarurat hi nahi hai.”
Mai bola “tu sach me bahut samajhdar ho gaya hai. Lekin is sab ki jarurat kyo nahi hai.”
Mehul bola “kyoki papa ab bilkul thik hai aur tune khud din me yaha rah kar dekha hai. Kya tujhe aisa kabhi laga hai ki, raj ya nikki hum logon se kam papa ka khayal rakhte hai. Fir bhi mai teri baat nahi katuga.
“Jab raj dopahar ko khana khane ghar aayega. Tab 2 baje se 5 baje tak mai hospital me ruk jauga. Uske bad 2-3 ghante ghar aakar aaram kar luga. Isse mujhe raat ko rukne me koi pareshani nahi hogi.”
Mai bola “thik hai, jaisi teri marji.”
Iske bad maine call rakh diya. Fir ajay ne doctor aman ko call karke saari baat batayi aur use kuch samajhaya. Jisko karne ko doctor aman bhi taiyar ho gaya. Uske bad meri thodi bahut isi baare me ajay se baat hoti rahi.
Baton baton me hum log airport pahuch gaye. Waha pahuch kar ajay ne meri ticket ka bhi intejam karwa diya. Maine wapsi ki ticket sham ko 4 baje ki jagah 6 baje wali karwa li thi.
Is sab ke chalte keerti mobile par mere sath barabar bani rahi. Ajay ne mujhe ticket pakdaye aur fir hum log coffee peene chale gaye. Maine coffee pite huye ajay se puchha.
Mai bola “ajji yadi bura na mano to, ek baat puchhu.”
Ajay bola “doston ki baat ka mai kabhi bura nahi manta. Tum jo chahe wo puchh sakte ho.”
Mai bola “ajji rah rah kar ek baat mere man me aa rahi hai ki, humari dosti ko abhi jyada samay bhi nahi hua. Tum mere baare me jyada kuch jante bhi nahi ho. Fir bhi tumne mere liye itna sab kuch kiya hai. Kya ye sab karne ki koi khas vajah hai ya fir ye sab aise hi kiya hai.”
Ajay bola “dosti nayi ya purani nahi hoti. Maine tumko dost mana hai to, tumhare liye kuch bhi karna mera farj banta hai. Haan lekin tumse dosti karne ke pichhe jarur khas vajah hai.”
Mai bola “kya.”
Ajay bola “maine pahli baar tumhe tab dekha tha. Jab tum nikki ke samne apni friend ke sath meri taxi me baithe the. Waise to meri taxi me ladke ladkiyan baithe kya kar rahe hai. Mai kabhi is baat par dhayan hi nahi deta.”
“Lekin nikki ko mai janta tha. Is vajah se meri tum dono me khas dilchaspi thi aur mai na chahte huye bhi apna dhyan tum logon par se na hata saka. Tumhare sath jab riya masti kar rahi thi.”
“Tab mujhe ye dekh kar bahut tajjub ho raha tha ki, ye ladka kis mitti ka bana hua hai. Jo ek ladki isko khula aamantran de rahi hai aur ye ponga pandit bana baitha hua. Fir meri tumse baat huyi to, pata chala ki, tum kisi se pyar karte ho.”
“Mujhe ye dekh kar acha laga tha ki, tum apne pyar ke prati puri tarah se imandar ho. Mai bhi tumhari tarah is shahar me naya hi hu. Mere yaha sirf 2 hi dost hai aur gine chune log hi mujhe jante hai. Jiski vajah se maine tumhari taraf dosti ka hath badaya tha.”
“Isi vajah se mai us din tumhe sharab pine ke liye apne ghar le gaya tha. Kyoki mai nahi chahta tha ki, tumhare sath kuch galat ho. Lekin mujhe us samay ye baat bahut pareshan kar rahi thi ki, tumhare jaise sache ladke ke sath, koi ladki dhokha kaise kar sakti.”
“Magar aaj jab achanak tumhare muh se, us ladki se milne jaane ki baat suni to, mujhe behad khushi huyi. Mai bhi chahta tha ki, tum har haal me apne pyar se jakar milo. Isliye mujhse tumhare liye, jo kuch bhi karte bana, maine wo kiya.”
Mai bola “ajji, lekin mera sawal wahi ka wahi hai. Tumhare ye sab karne ki vajah kya hai.”
Ajay bola “is sab ki vajah ye hai ki, mai bhi tumhari tarah, kisi se behad pyar karta hu. Magar mujhe mera pyar nahi mil raha hai. Ab jis pyar karne wale ke nashib me kisi ka pyar na ho. Use sirf do baton se hi shanti milti hai.”
“Ya to wo do pyar karne walon ko juda kar de. Ya fir do pyar karne walon ko mila de. Lekin mai pyar ke dard ko bahut achi tarah se janta hu. Isliye maine do pyar karne walon ko milane ki koshish ki hai.”
Mai bola “mujhe tumhare baare me janne ki bahut ichha ho rahi hai. Samajh me nahi aa raha hai ki, tum is tarah ki dohri jindagi kyo ji rahe ho.”
Ajay bola “kisi din tumhe fursat me sab kuch batauga. Abhi to tum khushi khushi apne pyar se mil kar aao.”
Hum log aise hi bahut der tak baat karte rahe. Fir meri flight ki ghoshna ho gayi aur mai ajay se gale mil kar flight ki taraf chal pada. Maine apna mobile nikal kar keerti se kaha.
Mai bola “jaan, lo ab mai flight me baithne ja raha hu. Ab to tum so jao.”
Keerti boli “lekin yadi mai so gayi to, fir mai school nahi ja paugi aur fir mai tumse din bhar kis bahane se milne nikal sakugi.”
Mai bola “tum iski chinta mat karo. Ajay ne jo bahana banaya hai. Wahi humare kaam aayega. Hum doctor aman ke dost ko sath sath dawaiyan dene chalege. Tum befikar hokar so jao. Mai sidhe hi ghar hi aa jauga.”
Keeri boli “ok ab mai tumhari baat nahi katugi. Mai so jati hu. Muuuuhhhh.”
Mai bola “muuuhhhh.”
Iske bad keerti ne call kaat diya aur mai flight me baith gaya. Aaj mujhe ek ajib hi khushi ka anubhav ho raha tha. Yu lag raha tha, jaise ki mai saalon bad keerti se milne ja raha hu.
Is baat ko lekar mere man me hajaron vicharon ne udan bharna suru kar diya tha to, udhar plane bhi ab upar aasaman me udan bhar chuka tha. Dono ki udane tab tak chalna thi. Jab tak ki unki manjil na aa jaye.
Mai keerti ke khayalon me khoya hua. Bas us pal ka intejar kar raha tha. Jab plane mere shahar ki dharti par apni ye udan ko khatam kare. Jaise jaise samay bitta ja raha tha. Meri keerti ko dekhne ki besabri badti ja rahi thi.
Mujhe to ye plane ka safar bhi bahut lamba lag raha tha. Mai baar baar samay dekh raha tha ki, ab mujhe phuchne me kitna samay baki hai. Aise hi karte karte mera safar khatam ho gaya aur 8:35 baje plane ne apni udan rok di.
Wo mere shahar ki dharti par utar chuka tha. Kuch der bad mai bhi plane se bahar aa gaya. Apne shahar ki dharti par mere kadam padte hi meri khushi ka thikana na raha.
Sabse mil sakne ki khushi mere chehre par jhalakne lagi thi. Mai isi khushi ke sath jaldi jaldi airport se bahar aane laga. Bahar aate samay mai yahi soch raha tha ki, mujhe ghar me achanak dekh kar, sab kis tarah se chauk jayege.
Ye sab soch soch kar mai man hi man muskurate huye, bahar aa raha tha. Lekin mai nahi janta tha ki, ab chaukne ki baari meri hai. Mai abhi bahar nikalne hi wala tha ki, tabhi mujhe apne kaano me, ek aawaj sunayi di.
Jise sunkar mai chauke bina na rah saka. Mujhe apne kaano par viswas nahi ho raha tha. Maine palat kar us taraf dekha, jaha se aawaj aayi thi. Magar ab jo najara meri aankhon ke samne tha. Use dekh kar mujhe apni aankhon par bhi viswas nahi ho raha tha.
____________________________
