Ko To Rok Lo {Update - 067}
____________________________
Mai bola “yadi wo aise hi darta raha to, aise me us se tumhari shadi bhi ho jayegi.”
Keerti boli “chup karo, aisa kuch nahi hoga. Sourav ki baat sun ne ke bad maine us se saaf kah diya tha ki, wo chahe jaise bhi ho, is sagai ko roke. Tab us ne apne mummy papa se baat ki thi. Jis vajah se kal roy uncle aunty sourav ke sath ghar aaye the. Kal jab mummy se tumhari baat huyi thi. Tab hum logon me isi baat ko lekar charcha chal rahi thi.”
“Der raat tak sab sourav ko samjhane ki koshish karte rahe ki, sagai karne me kuch nahi jata. Lekin wo kisi bhi haalat me sagai ke liye taiyar nahi tha. Usne saaf kah diya ki, wo apne job par lagne ke pahle aur mere balig hone tak is baare me soch bhi nahi sakta. Bad me sourav ki baat se sabhi sahmat ho gaye aur fir sagai tal gayi.”
Keerti ki ye baat sun kar mujhe aisa laga. Jaise mera sab kuch mujhe wapas mil gaya ho. Meri khoyi huyi khushi mujhe wapas mil chuki thi. Lekin fir bhi mere man me bahut se sawal uth rahe the. Jiski vajah se mai is khushi ko na to mehsus kar pa raha tha aur na hi khush ho pa raha tha.
Keerti ne jab dekha ki mai uski baat ko sun kar bhi khush najar nahi aa raha hu. Tab usne badi masumiyat ke sath mujhse kaha.
Keerti boli “jaan kya hua. Tum meri baat sun kar bhi khush najar nahi aa rahe.”
Mai bola “aisi koi baat nahi hai. Mai ye baat sun kar sach me bahut khush hu.”
Keerti boli “nahi jaan, tum jhuth bol rahe ho. Yadi tum sach me meri baat sun kar khush hote to, is tarah chup nahi rahte.”
Mai bola “are mai sach me khush hu. Chup to mai isliye hu. Kyoki mai bekar me hi tum par itna naraj raha.”
Magar keerti janti thi ki, mai us se kuch chhupa raha hu. Shayad use mere dil ki haalat ka andaja lag chuka tha. Usne apni galti manne wale andaj me kaha.
Keerti boli “jaan, tum kuch na bhi kaho, tab bhi mai tumhare dil ka haal samajh sakti hu. Tum yahi soch rahe hoge ki, itni sab baten ho gayi aur maine tumhe kuch bhi nahi bataya. Lekin mera yakin karo jaan. Mai tum se koi bhi baat chhupana nahi chahti thi. Jitna bura tumhe ye sab baten jankar laga hai. Utna hi bura mujhe bhi laga hai ki, mai tumhe ye baten pahle kyo nahi bata payi.”
Mai bola “tum bekar ki baat mat socho. Mujhe kisi baat ka koi bura nahi laga hai.”
Keerti boli “yadi aisa hai to, tum meri kasam khakar bolo ki, tumhe kisi baat ka koi bura nahi laga.”
Magar mai keerti ki jhuthi kasam kaise kha sakta tha. Bura to mujhe laga tha aur usi baat ka bura laga tha. Jo keerti bol rahi thi. Lekin ab mai use pareshan karna nahi chahta tha. Isliye maine keerti se hanste huye kaha.
Mai bola “tu to bilkul pagal hai. Kya koi asi jara jara si baton me apni jaan ki kasam khata hai. Kya tujhe mujh par viswas nahi hai. Jo mujhe apni kasam khane ko bol rahi hai.”
Keerti boli “jaan viswas to ab tumko mujh par nahi hai. Jo apne dil ki baat mujhe nahi bata rahe ho. Mujhe to apni saanso se jyada tum par viswas hai. Jis din ye viswas toot gaya. Us din meri sans bhi toot jayegi. Tum apne dil ki baat kaho ya na kaho. Lekin mai achi tarah se janti hu ki, maine tumhare dil ko bahut chot pahuchayi hai. Tumhe andar hi andar ye baat khayi ja rahi hai ki, itna sab kuch ho gaya aur maine tum se kuch bhi nahi bataya.”
Mai bola “chhod na, ab jab sab kuch thik ho gaya hai to, tu kyo is baat ko bada rahi hai.”
Keerti boli “jaan, kya tumhare thik kah dene se meri galti thik nahi ho jayegi. Tum nahi jante kal raat se ab tak, mai kitna tadpi hu aur subah tumhari haalat dekh kar kitna royi hu. Yadi mujhe tumhara khayal na hota to, mai sach me apne aapko is galti ke liye khatam kar chuki hoti.”
Mai bola “khabardar, dobara kabhi marne ki baat mat karna. Mai tere bina ji nahi sakta. Tu nahi janti ki, ye aaj ka din mere liye maut se bhi badtar gujra hai. Is ek din me maine apni jindgi ke sabse bure samay ka samna kiya hai. Na to mai ji pa raha tha aur na hi mai mar pa raha tha. Lekin ab tujhe apne pas pakar mai is sab ko bhool jana chahta hu.”
Keerti boli “mai sab janti hu jaan. Mujhe tumhare har dard ka aehsas hai. Magar yakin maano maine ye sab jaan bujh kar nahi kiya. Mai tumhe har baat sach sach bata dena chahti thi. Magar ek ke bad ek, haalat kuch aise ho gaye ki, mai chah kar bhi tumhe kuch bata nahi payi.”
“Sabse pahle tum mausa ji wali baat ko lekar, itne gusse me aa gaye the ki, mai tumse ye baat kahne ki himmat hi na kar saki. Fir nimi ki tabiyat ko lekar, tum itne pareshan ho gaye the ki, mai tumse ye baat na kah saki. Ye sab itne achanak ho gaya ki, mujhe tumse kuch kahne ka samay hi nahi mil saka.”
Mai bola “ab jo ho gaya hai, use bhool ja. Mujhe tujh se koi shikayat nahi hai.”
Keerti boli “jaan tumhare man me mere liye koi shikayat ho ya na ho. Magar mere man me is baat ko lekar bojh hai ki, mai tumse itni jaruri baat nahi kah saki. Jiski vajah se tumhe itni taklif uthana padi.”
Mai bola “jane de na. Jo hona tha, wo ho chuka hai. Ab us baat ko khichne se kya fayda hai.”
Keerti boli “jaan, baat fayde ya nuksan ki nahi hai. Kuch der ke liye hi sahi, lekin tumhara mere upar se pyar aur viswas to uth gaya tha. Ye baat mujhe sahan nahi ho rahi hai.”
Mai bola “koi pyar aur viswas nahi utha tha. Mujhe bas thoda sa gussa tha. Jo saari sachchai sunkar door ho gaya hai. Ab tu bhi apne man par koi bojh mat rakh.”
Keerti boli “jaan, mere man par kaise koi bojh nahi rahega. Kya ye baat sach nahi hai ki, meri vajah se tumhe sharab pina padi.”
Keerti ko dilasa dene ki niyat se maine kaha.
Mai bola “pagal, sharab to maine sirf isliye pi thi. Kyoki us baat ko lekar mujhe nind nahi aa rahi thi. Yadi mai sota nahi to, fir raat ko hospital me kaise ruk pata. Lekin mai vada karta hu ki, ab mujhse ye galti dobara nahi hogi. Ab tu is baat ko apne man se nikal de.”
Keerti boli “jaan, mai is baat ko bhool bhi jau ki, tumne meri vajah se sharab pi thi. Lekin mai is baat ko kaise bhool sakti hu ki, tumne meri vajah se khud ko khatam karne ke ki koshish ki thi. Kya tum is baat ko bhi jhuthla sakte ho. Kya tumhare is msg ka tumhare pas koi jabab hai.”
Ye kahte huye keerti ne mujhe mera hi msg send kar diya.
“Jaan ye tumhre liye mera aakhiri msg hai. Maafi chahta hu ki, tumhari khushiyon se bhari jindgi ko dekh kar, mai apne aapko khush nahi rakh saka. Magar kya karu. Mere liye mera sab kuch tum hi thi.”
“Jab tumhe hi mera sath pasand nahi hai. Tab bhala mai jeekar kya karuga. Mere dil me aakhiri baar tumse baat karne ki hasrat thi. Lekin meri hasrat mere dil me hi dab kar rah gayi.”
“Tum apni khushiyon me itni khoyi rahi ki, tumhe mai yaad hi na raha. Lekin ab mai tumhe yaad aana bhi nahi chahta hu. Mai tumhari jindagi se hamesha hamesha ke liye ja raha hu. Mai apni is jindagi ko aaj abhi khatam kar raha hu. I Love you jaan.”
Maine msg dekha to, mujhe keerti ki baat ka koi jabab nahi sujha. Maine bas itna kaha.
Mai bola “is baat ko yahi khatam kar de. Dekh mai to tere samne acha bhala khada hu aur in sab baton ko bhool chuka hu. Tu bhi inhe bhool ja.”
Meri baat sun kar keerti ne jo kaha, wo mai jindgi bhar nahi bhool sakta. Uski har baat me bepanah pyar aur dard jhalak raha tha. Uske pyar ke samne mera pyar aur mera dard mujhe bahut chhota najar aaya. Keerti ne meri baat ke jabab me mujhse kaha.
Keerti boli “jaan, tumhare liye ye bhool jaane wali baat hogi. Magar mere liye nahi hai. Mere liye to ye mar jaane wali baat hai. Kal yadi ami ne ye msg milte hi, tumhe call nahi kiya hota to, pata nahi kya anarth ho jata. Mere liye to ami bhagwan ka roop sabit huyi.”
“Jisne sahi samay par tumhe call karke ye sab karne se rok diya. Wo to bachchi hai. Isliye tumhare bahlave me aa gayi aur usne maan liya ki, ye msg tumse dhokhe se send ho gaya tha. Lekin mai bachchi nahi hu. Mai is msg ki sachchai aur isme chhupe dard ko samajh sakti hu. Mai apne aapko kya muh dikhau.”
Mai bola “pls yaar, mujhse galti ho gayi. Mai dobara aisa nahi karuga. Ab tu is baat ko khatam kar de. Waise bhi tune subah mujhse baat hone ke bad hi to, is msg ko dekha hoga. Fir tu is msg ko itni gambhirta se kyo le rahi hai.”
Keerti boli “jaan, tumne bahut sahi baat ki hai. Tum aisi baat kar sakte ho. Kyoki tumhare pas jeene ke liye, mere alawa ami nimi aur chhoti maa ka bhi sahara hai. Magar mere liye to meri saari duniya sirf tum hi ho.”
“Yadi kal tumhe kuch ho gaya hota to, mai kya karti. Mai kiske liye jeeti. Tumne to mujhe jeete ji hi maar diya tha. Mai aaj din bhar tumhare isi msg ko dekh dekh kar, hajaron maut mari hu. Subah se ek nivala tak mere gale se nahi utra aur tum kahte ho ki, mai is msg ko gambhirta se na lu.”
Keerti ki baton me uski bebasi, uska dard aur uske pyar ko kho dene ki tadap sabhi kuch tha. Mai uski har dard ko mehsus kar sakta tha. Uska kuch bhi kahna galat nahi tha. Maine uske dard ko halka karne ki niyat se kaha.
Mai bola “sorry jaan, mujhse galti huyi. Lekin yadi mujhe ye sab baat pata hoti to, mai aisi galti kabhi nahi karta. Ise tu meri nadani samajh kar hi bhula de aur kuch kha le.”
Maine ye baat keerti ko manane aur samjhane ki garaj se kahi thi. Lekin mai nahi janta tha ki, meri ye baat keerti ke man me dabi huyi chingari ko jwalamukhi ka roop de degi. Usne meri baat ke badle me kaha.
Keerti boli “sorry tum kyo bologe jaan. Sorry to mujhe bolna chahiye. Jo mai tumhe ye sab baat nahi bata saki aur tum ye nadani kar baithe. Lekin aaj mai tumse sirf itna puchhna chahti hu ki, kya tumhe mujh par itna bhi bharosa nahi tha ki, tum khud is baat ko jhuthla dete ki, mai tumhare siwa kisi dusre ka hone ki soch bhi nahi sakti.”
“Kya tumhe mere pyar par itna bhi yakin nahi tha ki, tum apne aap se ye kah sako ki, meri keerti kabhi mere sath aisa nahi kar sakti. Kyo jaan, aisa kyo nahi hua. Mera pyar kyo kam pad gaya. Mera pyar kyo haar gaya jaan. Mera pyar kyo haar gaya.”
Ye kah kar wo foot foot kar rone lagi. Uski har baat me sachchai thi. Mere pas uske kisi bhi sawal ka koi jabab nahi tha. Wo roye ja rahi thi. Lekin ab mujh me itni himmat bhi nahi thi ki, mai use chup hone ke liye bol saku.
Uska har aansu mere dil par gir raha tha aur mere seene ko chhalni kar raha tha. Mai uska gunahgar tha aur shayad ye mere gunah ki saja thi. Uska ye dard mujhse sahan nahi ho raha tha aur meri aankhon se bhi aansu bah rahe the.
Lekin meri khamoshi ki vajah se keerti ko mere bahne wale aansuon ka aehsas nahi tha. Hum dono hi ro rahe the. Fark sirf itna tha ki, mai janta tha ki keerti ro rahi hai. Lekin keerti nahi janti thi ki, mai ro raha hu.
Magar keerti meri tarah nahi thi. Uska pyar meri tarah khudgarj nahi tha. Use khud se jyada meri parwah thi. Shayad use mere dard ka aehsas ho gaya tha. Isliye usne khud hi apne aansuon ko rokne ki nakam koshish karte huye kaha.
Keerti boli “sorry jaan, meri jaisi pagal ladki ki baat ko dil par mat lena. Waise bhi meri vajah se tumhara aaj ka din kharab hua aur ab mai raat bhi kharab kar rahi hu. Tum din bhar ke thake huye ho. Ab tum aaram karo. Hum kal baat kar lege.”
Mera man abhi phone rakhne ka nahi tha. Mai us se baat karna chahta tha. Isliye maine apne aansuon ko piya aur ladkhadti huyi aawaj me kaha.
Mai bola “thodi der baat aur kar na.”
Magar meri itni si baat se hi keerti ne meri aankhon ki nami ko mehsus kar liya tha. Mere aankhon ki nami mahsus hote hi, uska dil tadap utha. Use laga jaise us se koi gunah ho gaya ho. Uski aankhon me fir wo aansuon ka sailab umad pada. Jise wo rokne ki koshish kar rahi thi. Usne apne aapko koste huye kaha.
Keerti boli “jaan tum ro rahe ho. Maine tumhe fir rula diya. Mai sach me bahut buri hu. Har baar tumhe rula deti hu. Mere jaisi ladki ko mar hi jana chahiye.”
Mai bola “tu kyo baar baar marne ki baat karti hai. Tu is baat ko kyo nahi samajhti ki, mai teri aankhon me aansu nahi dekh sakta. Teri aankhon me aansu ho to, mai kaise khush rah sakta hu. Haan mai tera gunahgar hu. Jo mai tujhse itna pyar nahi karta, jitna tu mujhse pyar karti hai.”
“Magar fir bhi mai tujhe apni jaan se jyada pyar karta hu. Isliye jab maine wo baat suni to, mai apne sochne samjhne ki takat hi kho baitha aur ek ke bad ek galti karta gaya. Lekin mai karta bhi kya. Tu meri saari duniya hai.”
“Tujhe mai kisi dusre ka hote kaise dekh sakta tha. Maine galtiyan jarur ki hai. Magar un galtiyon ki vajah bhi mere dil me tere liye besumar pyar hi tha. Jisne mujhe kamjor bana diya tha.”
Iske aage mai kuch aur kah na saka. Lekin keerti meri itni hi baat se mere dil ki saari baat samajh gayi thi. Usne apne aansuon ko pochha aur kaha.
Keerti boli “nahi jaan, tumhara pyar kahi bhi mere pyar se kam nahi hai. Tumne koi galti bhi galti nahi ki hai. Mai hi pagal thi, jo tumhare pyar ko samajh na saki aur na jaane tumhe kya kya bol gayi. Pls jaan rona band karo. Tumhe meri kasam hai. Meri jaan ki aankhon me mai ek bhi aansu nahi dekhna chahti.”
Mai bola “meri jaan ko bhukha rakhegi to, tujhe bhi teri jaan ki aankhon me aansu dekhna padege. Tu kya samajhti hai. Tu meri jaan ko rulayegi to, mai teri jaan ko khush rahne duga.”
Keerti boli “sorry jaan, ab aisa nahi hoga. Kya ab bhi tum apni jaan ki kasam nahi manoge.”
Keerti ki ye baat sunkar maine apne aanuon ko ponchha aur khud ko shant karne laga. Kuch der bad jab maine apne aapko shant mehsus kiya to, fir keerti se kaha.
Mai bola “dekh, maine teri kasam puri kar di. Ab tu bhi meri bat puri kar aur jaldi se kuch khakar aa.”
Keerti boli “ok jaan, tum wait karo. Mai abhi khana khakar aati hu. Muuuhhhh.”
Itna bol kar keerti ne phone rakh diya aur mai uske wapas aane ka intejar karne laga. Ab mai bahut khush tha. Mere upar chhaye gam ke badal chhat chuke the aur ab mere dil par kahi koi bojh nahi tha.
Maine socha ki, abhi keerti ko khana khakar aane me kuch samay lagega. Ye sochte huye mai bathroom jaane ke liye utha. Lekin tabhi keerti ka call aane laga. Maine call uthate huye kaha.
Mai bola “kya hua, tu bina khana khaye hi kyo chali aayi.”
Keerti boli “mai khana yahi lekar aa gayi hu. Ab tum se baat bhi karti jaugi aur khana bhi khati jaugi.”
Mai bola “ok tu khana khana suru kar, tab tak mai bathroom se hokar aata hu.”
Keerti boli “nahi, ab tum kahi nahi jaoge. Mai baat karne ke liye hi khana yaha lekar aayi hu.”
Mai bola “samjha kar, bas 2 min ki baat hai.”
Keerti boli “nahi, ab mai ek pal ke liye bhi tumara pichha nahi chhodugi.”
Mai bola “dekh, jid mat kar, mujhe bahut jor se aayi hai.”
Keerti boli “ok to fir mujhe bhi lekar chalo.”
Mai bola “tujhe kuch sharam nahi hai kya.”
Keerti boli “jisne ki sharam, uske foote karam. Mujhe chalna hai, matlab chalna hai.”
Mai bola “mujhe kahi nahi jana. Tu khana kha, mai tujhse baat karta hu.”
Ye kah kar mai wapas baith gaya. Mujhe baithte dekh kar, usne kaha.
Keerti boli “ok aaj tum ja sakte ho. Lekin yaad rakhna. Agli baar mai sath jaye bina nahi manugi.”
Uske muh se ye sunte hi, mai uth kar bathroom chala gaya. Kuch der bad jab mai bathroom se wapas lauta to, maine keerti se kaha.
Mai bola “haan, ab bol, kya bolna hai.”
Keerti abhi khana kha rahi thi aur nivala uske muh me hi tha. Use shararat sujhi aur usne khana chabate chabate hi kaha.
Keerti boli “tumhe sach me bahut jor se lagi thi. Ab mujhe pura yakin ho gaya.”
Mai bola “kyo aisa kya hua.”
Keerti boli “kyoki aawaj mujhe yaha tak sunayi de rahi thi.”
Ye kah kar wo jor se hansne lagi. Lekin khana khaate khate hansne ki vajah se use jor ka thaska lag gaya. Jiski vajah se vo khansne lagi. Maine use jaldi se pani peene ko kaha aur fir uske pani peene ke kuch der bad wo sahi ho gayi. Maine us par gussa karte huye kaha.
Mai bola “tujhe har samay majak hi sujhta hai. Hajar baar kaha ki, khana khate samay majak mat kiya kar, lekin tu hai ki, meri baat sunti hi nahi hai.”
Magar keerti ke upar mere is gusse ka koi asar nahi pada. Usne masum banne ka natak karte huye kaha.
Keerti boli “ab aawaj yaha tak aa rahi thi to, mai kya karti. Yadi meri baat mankar mujhe lekar gaye hote. Tab bhi to mai aawaj hi sunti. Kuch dekh thode hi leti. Ab bina jaye hi maine aawaj sun li to, kya mai hans bhi nahi sakti.”
Mai bola “tu kabhi nahi sudhar sakti.”
Keerti boli “sudhar to tum bhi nahi rahe ho.”
Mai bola “ab maine kya kiya.”
Keerti boli “tum jante ho ki mai kabhi nahi sudhar sakti. Iske bad bhi jab dekho tab kahte rahte ho, tu kabhi nahi sudhar sakti.”
Ye kah kar wo fir hansne lagi. Lekin ab maine uski is baat ka koi jabab nahi diya to, usne mujhe chhedte huye kaha.
Keerti boli “ok ab mera khana khana ho gaya hai. Ab to mujhe bahut jor ki nind aa rahi hai. Mai to soti hu.”
Mai bola “itni jaldi. Abhi to 1 bhi nahi baja hai. Thodi der aur baat kar na.”
Keerti boli “nahi, ab mujhe sona hai. Waise bhi tumhe meri koi baat pasand nahi aati.”
Mai bola “maine aisa kab kaha ki, mujhe teri baat pasand nahi aati. Tujhe jo baat karna hai, tu kar magar abhi mat so.”
Meri baat sun kar keerti fir hansne lagi. Mujhe uske hansne ka karan samajh me nahi aaya to, maine puchha.
Mai bola “ab kyo hans rahi hai.”
Keerti boli “mujhe koi nind nahi aa rahi. Mai to sirf tumhe pareshan kar rahi thi.”
Mai kuch bolne ko hua to usne meri baat ko kat kar khud hi meri baat puri karte huye kaha.
Keerti boli “tu kabhi nahi sudhregi.”
Ye kah kar wo fir khilkhilakar hansne lagi. Magar is baar uski hansi me meri hansi bhi shamil ho gayi thi. Iske bad wo mujhe aise hi pareshan karti rahi aur hansti rahi.
Mujhe uski in harkaton aur uski hansi me bahut sukh mil raha tha. Hansi aur khushi ka ye daur kafi der tak chalta raha. Jab keerti ke majak karne ka ye daur thama. Tab us ne mujhse kaha.
Keerti boli “jaan 1:30 baj gaya hai. Tumhe subah jaldi uthna hai. Ab so jao.”
Mai bola “lekin mujhe abhi tujhse bahut si baat karna hai. Abhi to meri tujhse koi baat hi nahi huyi hai.”
Keerti boli “jaan mai koi bhagi thodi ja rahi hu. Tum kal din me mujhse baat kar lena. Ab tum din me hospital me rahoge to, hum raat ke sath sath din me bhi baat kar sakege.”
Mai bola “haan, teri baat sahi hai. Thik hai to, fir ab soya jaye.”
Keerti boli “ok to ab meri good night kissy do.”
Mai bola “good night muuuhhhh.”
Keerti boli “good night jaan muuuhhhhh.”
Iske bad keerti ne call rakh diya. Abhi uska call rakhna hua hi tha ki, tabhi mujhe aisa laga ki, jaise kisi ne mere kamre ke darwaje bade hi dhime se ek dastak di ho.
Magar uske bad mujhe darwaje par koi halchal samajh me nahi aayi. Jisse mujhe laga ki, ye mera vaham hoga. Lekin fir thodi der bad, mujhe ek halki si dastak sunayi di.
Ab ye baat saf ho chuki thi ki, koi darwaje par dastak de raha hai. Lekin shayad sabke jag jane ki vajah se wo bahut dhime se dastak de raha hai. Jab teesri baar fir darwaje par dastak huyi to, mai darwaja kholne ke liye uth khada hua.
____________________________
