Update - 94
Tumhare jawab sawal ban jaye to kaisa lagea tumhe ? kya tumhare pas uska jawab hoga ? agar ha to do nahi to kya doge ? Mene kahani ki tarah jawab to die par abi usi jawab ke aage sawal aye to mein chup tha.. kya ye meri galti thi ki mene usko aise jawab die ? shayad nahi.. ye galti na mere jawab ki thi na hi akansha ke sawal ki... ye galti hum insan ki hai.. jo na hi kahani samajh pate hain na hi zindagi ke us rishte ko jise nibhane ke liye hum shuruwat mein puri kosish karte hain aur baad mein ate-ate uspar apni pakad dhili kar dete hain... vaise bhi ye koi patang nahi jahan dhil dene par bhi jeet mil jaye.. ye zindagi ka vo part hain jahan dheel dete hi sab kuch khatam ho jata hai.. mene yahan yahi galti nahi ki... mene na to zindagi ko dheel samjha nahi hi dil mein panap rahe is rishte ko...
" kya pyar mein pyar ki bhi umeed nahi karni chahie ankit ? " akansha sawal karke chup rhi, uski ankh se abhi abhi ansu utra tha aur vo mere jawab ka intezar kar rahi thi.
" jis pyar mein pyar ki bhi umeed karni pade vo pyar hota hi nahi akansha " mene akhir apna jawab de hi dia.
" to phir i love you bol kar kya dikhate hain hum ? " aaj usne kasam kha rakhi thi mujhe fasane ki...
" keh nahi sakta.. par vo hum tabh kehte hain jab kisi se dur na hona chahte ho " mene aaj tak kisi se ye baat kahi nahi thi kyun ki meri life mein aj tak koi aisa aya nahi tha.. aaj se pehle...
" sab juth.. tum bhi juth bol rahe ho.. " mein ? par kaise.. puch nahi paya bas chup raha. " pyar kya sirf kehne ke liye hota hai ? ab jab mein us pyar ka waqt mang rahi hun.. use aage badana chahti hun to kyun vo piche hat raha hai ? "
" mein kuch samjha nahi akansha.. dekho tum mujhse sawal karogi to mein shayad uska jawab to de dunga par tumhari is takleef ko dur nahi kar paunga.. " mein use janna chahta tha ki akhir hua kya hai .... vo shayad meri baat ka matlab samajh gayi thi.. usne apni ansu poche aur ek gehri sans lekar usne mujhe bataya ki, Akash jiske sath akansha ka relation tha, jiski vo fiance banne wali thi vo pyar to karta hai par is rishte ko aage badane ki jab bhi baat ati vo use talta jata, ab akansha ki bato mein ye samajh nahi aya ki vo kaam ki vajah se tha ya phir koi aur par akansha ko ye chiz bardasht nahi ho rahi thi, vaise bhi mein kafi time se sun raha tha ki uski kabhi bhi engagement ho sakti hai lekin kabhi uske muh se aisa nahi suna tha, isliye lagta hi nahi tha ki vo kisi relation mein hai na hi kabhi akash ke sath uski itni baat hote dekha tha. Samajh to mere itna aa raha tha ki akansha use behad pyar karti hai par akash ka response bahut low tha, jaise use fikar na ho.. isliye akansha pareshan rehti thi .. aur is waqt bhi isliye jada thi kyun ki akash ki hui baat cheet mein uska jhagda isi baat par hua tha.. short mein kahun to ye wahi love story thi jo aksar hoti hai....par isme farak itna tha ki samne wale ko pyar to hai bas uske pas samay nahi kyun ki vo apni zindagi ke bare mein pehle soch raha tha aur akansha ke bare mein baad mein.. kya akash apni jagah sahi tha ? agar ha to kya akansha galat thi ? aur agar akash sahi nahi tha to akansha ka kehna galat nahi ? ya phir dono apni jagah sahi the ya dono galat... ? shayad nahi... shayad ye pyar hi galat tha... kyun ki jahan tak pyar ki baat hai.. chinta hume apni nahi hamesha uski hoti hai jisne hamari zindagi ko ek naya mod dia.. khud ki chinta to hum bachpan se karte aye hain.. to agar abhi bhi khud hi karenge to vo badlav ka faiyda kya ? ye to samne wale ke waqt aur uski chinta ki tauheen hai ... jo hum sirf apne matlab ke liye istemal kar rahe hain.. jab jab mauka mila humne use apnaya aur apni zindagi durust ki aur phir aage badh gaye use bhul kar... yani baat to wahi hui.. na mera jawab galat tha na hi akansha ka sawal... galat to insan hai..
" kya tumhe mauka nahi dena chahie kuch aur ... " mein dhire dhire bolte hue chup hua... " thoda aur... " ye baat bolne ka man to nahi tha par kehna pada.
" mazak hi karna hai mere sath to mein road par khadi ho jati hun... let everyone have a mauka.... " mein sunn.. uski sansein tez thi.. ankh se phir ansu aa nikle.. uski nazar itni paini thi mere uppar ki meri nazre hi niche jhuk gayi.. baat ke andar aisa tamacha mara usne ki mere andar ki sari samjhdari ghus gayi.
" mein sundar hun.. par kya farak padta hai.. shayad mera pyar sundar nahi hai" itna keh kar vo phir rone lagi... yakeen karna shayad meri baat ka har kisi ko mushkil hoga lekin mujhe aisa lag raha tha jaise vo mujhse shikayat kar rahi hai.. Uska rona mere kano mein chub raha tha, kya usne mujhe isliye apne sath rehne ke liya kaha tha ki vo mujhe apna dard suna sake ? nahi.. balki vo is dard se alag hona chahti thi isliye usne mujhe apne pas rukne ko kaha tha.. lekin mein kaun hun ? ek ajnabi.. ya had se jada ek naya dost.. aaj ke waqt mein insan kya hai kuch samajh nhi ata, ajnabi...dost... pyar.... kuch nahi samajh ata.. kyun ki hum jo dil se hain vo juban par bilkul nahi hai... phir bhi mujhe to kuch karna hi tha..
Mein shayad uska dard khatam to nahi kar sakta tha jabki karna to bahut chahta tha kyun ki mere dil mein ye pyar hi tha jo ki ab mein 'shayad' keh kar apne dil ko bevkuf nahi banana chahta tha... mene apna hath uthaya aur akansha ke hath par rakh dia jo vahin sofe par rakha tha .. jaise hi mera hath uske hath par gaya usne rona to band nah kia.. mera dil bahut zor se dhadak raha tha jbki ye uske sath hona chahie tha.. vo abhi shant nahi hui thi.. to mene is bar uske hath ko apne hath mein tham lia, use halka sa kas lia.. mujhe umeed thi ki vo bura manegi mujhe bahar bhej degi... kyun ki itna hak mere pas nahi tha ... hai na ?
Par mein yahan galat tha... usne bura nahi mana balki apne hath ko mere hath se kas lia, aur usi pal mene uski taraf dekha, vo chup ho gayi thi par abhi bhi ansu nikal rahe the.. par mein kuch nahi bola, aisa hi baitha raha.. kabhi kabhi hamare actions shabdon se jada dil ko rahat dete hain... Kuch der akansha aise hi baithi rahi phir dhire dhire vo sarakte hue mere kareeb ayi aur mere kandhe par sar rakh kar baith gayi... hathon ki ungiya apas mein mil chuki thi, jaise ye mera hi pyar tha jo mere liye hi bana tha... Jab insan itna jada kareeb ho jata hai to kuch chizein bhul jata hai aur is waqt mein.. ya yun kahun hum.. zindagi ke sabhi rishte bhulte jaa rahe the .... yahi vo pal tha jo naye rishte ka janam data ban gaya ..
______________________________
Kya khona, kya pana waqt se pehle na to keh sakte hai aur na hi waqt ane par use bhul sakte hain, jo bhi hota hai uske piche ane wali zindagi ki tasveer ban jati hai bas farak itna hota hai ki us tasveer ko dekhne ke liye hamare pas ankhein nahi hoti. Samajh nahi aa raha tha kya karu, kya kahun.. kya isi tarah akansha ke sath baitha rahun yun hi is rishte ko aage bada dun ? Agar zindagi mein koi mujhse puchega ki zindagi ki sachai uski takleef kya hai.. to mein uska purra dosh pyar ko dunga.
Mera hath usi tarah usi majbuti se uske hathon ke sath juda hua tha, time kitna guzra par akansha jaise abhi bhi waisi hi thi.. hamare liye kisi ke pyar ki takleef ek filmi kahani lagti hai aur usi mein hum sahabunti bhare dialog chap kar apni samjhdari dikha dete hain par asliyat mein uski takleef vahi samajh pata hai, hona bhi chahie, ek insan apna bhrosa, apna waqt sab deta hai aur badle mein shayad mangta bhi wahi hai ... mein akansha ki shayad hi madad kar sakta hun kyun ki mein to us dard se guzra nahi jo use samjha sake lekin phir bhi uske dard ko ache se samajh raha tha.
" akansha.. " usne suna par kuch kaha nahi, " pyar karne par takleef hoti hai ye to suna hai par dekh pehli baar raha hun.. " mein bahut soch soch kar bol raha tha jisme kai bar bich mein rukna padh raha tha mujhe, kano mein cartoon ke shor ki awaz, uske sath akansha ki .. jisme uski sansein.. uska dhadkta dil aur khamoshi..
" please... roo mat... sab theek hoga.. " mene kaha tha na hum sirf sahanbuti de pate hain wahi mene bhi kia. Vo kuch bol nahi rahi thi aur mere dimag mein khud se kabhi kuch ata nahi .. bina uske jawab ke kya bolu ? ye samajhta raha par kuch der baad vo boli, jisne meri uljhane bada di.
" keh do mein bevkuf hun jo ro rahi hun, vo bhi kisliye ? bahut mil jayenge jo mere sharir se pyar kar lenge.. " na jane kyun emotions mein hum khud ko ek bikau chiz bana dete hain jise ab har koi kharid sakta hai.. kya aaj ke waqt mein insan itna bikau ho gaya hai ?
" mere kehne ka vo matlab nahi tha akansha... mein... " ise aage ka mauka usne chin liya, usne apna sar utha kar mere chehre ke samne apna chehra kar dia.
" sab yahi kehte hain ankit... chehra dekho mera.. khubsurat hai na.. kisi ka bhi dil behla sakti hai... hai na ? to kyun mein us insan ko lekar roo rahi hun jab mujhe hazaron mil sakte hain ? " kehte hue uski ankh se ansu aa nikla, " pyar ko bechna hi hai to use kharid kar kyun nahi kar lete.. kitna asan hai na ? " is bar uski ankh se ansu nikle to mein dekh nahi paya aur mene uske chehre ko hath mein tham kar unhe ankh ke niche ate hi hata dia. Ye kya ajeeb waqt hai, kitna acha tha aaj se pehle par abhi ye sab kyun badal gaya, mujhe na akansha ke relation se matlab na tha aur na hi apni khushi se... matlab tha ki kisi tarah iska dukh hat jaye, mein sirf aise hi nahi keh raha yakeen karo mera, chehra akansha ka ... kehlwa raha tha mujhse...pyar ho gaya tha mujhe aur ab mujhe afsos ho raha tha ki kyun hua? Kuch rishte aise ban jate hain jiske khali panne bhi hume bharne padte hain aur mitane bhi hume hi padte hain... na to mein cha kar use apna paa raha tha na hi chhod paa raha tha.... kash chhod deta.. kash... akansha ko is waqt chhod deta agar pyar na hua hota to.. par is pyar ki majburi ne aise fansa dia ki na to ab alag ho sakta tha aur na hi is rishte mein aage badh sakta tha... ab mein kya bataun apna haal... samajh nahi paa raha tha ki is naam ko alag kaise karun khud se... na to juban se kuch nikal raha tha na hi dil se ise nikaal paa raha tha... bura fans gaya tha..
" bharosa rakho.. khud par ... jo tumhara hai use koi chin nahi sakta tumse " mene uski dono ankhein saaf karte hue kaha.
" aur jo kabhi ho hi na use kaise paun ? "
" tab ... bhul jao use "
" kya tum bhul jate agar tumhe is tarah mujhse pyar hua hota to ? " rulayegi kya pagli... kya bol dia isne... pakka ro dunga agar muh se kuch bhi nikal gaya to, aur bezati hogi alag... mene bas naa mein mana kiya vo bhi kisi tarah khud par kabu rakhte hue, varna ankhon se nikalte jarur, ansu ya phir us pal ki soch ka dukh...
" dekhaa.... tum to bina kare nahi soch sakte aur mujhse keh rahe ho ? " baat uski itni theek thi ki man kia abhi keh dun ki tum shayad nahi jaan paogi ki mein pyar kar chuka hun isliye mana kar raha hun...
" pyar doobara bhi hota hai akansha.. " mere muh se nikal gaya, shayad uski baton ne majbur kia tha.
" bajaru ban chuka hai pyar.. kharid lo... bech lo.. isliye to har bar ho jata hai " ye baat mujhe uski bahut galat lagi , aisa mehsus hua jaise mujhe hi boli gayi ho.
" guzara karte hain vo log zindagi ko, jo tumhare jaise pyar ko samjhte nahi ... par iska maltab ye nahi ki tum apni sachai chhod do.. " mein use samjha raha tha ya use rula raha tha kyun ki vo meri baat sun kar roo padi, mene use apna hath alag kiya aur uske chehre ko dono hath se tham lia, " pyar mein nafrat karna bahut asan hota hai akansha par use karke nibhana sabse jada mushkil.. aaj agar tumne pyar se nafrat kar li to tum zindagi bhar dosh pyar ko jabki isme uski koi galti nahi.. " usne apni nazre jhuka rakhi thi, mene apna chehra jhukaya aur uske kareeb le aya, " pyar bikau nahi hai akansha... vo bas mushkil hai... bas use pakde rakho... har nahi manni... nahi manni na ? " meri nazar uspar thi, vo mere sawal par han mein sar hilane lagi, banane vale ne aurton ko dimag kyun nahi dia iska jeeta jagta jawab mere samne the... kaise deta dimag ? kyun ki vo sirf umar se badi hoti hai asal mein to bachpana unka sath kabhi chhodta hi nahi.. ye mein isliye nahi keh raha kyun ki mujhe uppar wale ne bataya balki isliye keh raha hun kyun ki vo masumiyat is waqt akansha ke chehre par thi aur yahi vo ghadi thi jisme har ladka ek ladki se aise pyar kar baithta hai jo vo dilo dimag se nahi nikal pata aur mujhe bilkul wahi pyar ho chuka tha....