Thriller RAAZ..... (Completed)

[Casinar]

Chapter 6 : Start Of An Affair

Main aur Renuka ek hi class mein tha. Hamari class mein seating intezaam aisa nahi tha jaisa ke aksar schools aur colleges mein dekha jata hai, yaani ke ladkiyan saari class ke ek taraf aur ladke ek saath doosri taraf. School mein toh mere bhi aisa hi tha par college mein nahi. Yahan kisi ki koi decided seat nahi thi, jo jahan chahe beth jaaye. Aisa kuchh nahi tha ke ladke ek taraf aur ladkiyan ek taraf.
Renuka ko apni khoobsurati ka poora andaza tha aur vo iska poora fayda bhi uthati thi. Jahan ladkiyan use dekh dekh jalti kudhti rehti thi vahin Ladke uspar jaan chhidakte the aur uske ek ishara par kuchh bhi karne ko taiyyar the. Nateeja ye ke use kisi maharani ki tarah treat kiya jata tha. Ghar se koi na koi car leke pick karne jata aur phir izzat ke saath ghar chhoda bhi jata. Kisi se bhi vo sidhe munh baat nahi karti thi aur ladkiyon se toh bilkul bhi nahi. Uski har farmaish ko fauran poora kiya jata aur mujhe nai lagta ke college canteen mein kabhi usne paise khud diye honge. Use aur uske aas paas chakkar lagate ladkon ko dekh ek vo sher yaad aata tha,
Kuchh is tarah se aaj vo pehlu nasheen rahe,
Jab tak hamare saath rahe, ham nahi rahe,
Allah re chashm-e-yaar ki mojiz bayaniyan,
Har ek ko hai ghumaan ke mukhatib ham hi rahe ....
Jis din vo kisi se pyaar se do alfaaz bol leti us din toh jaise us ladke ke chaandi ho jaati. Poore college mein vo dhindhora peet-ta phirta ke Renuka ne aaj usse kya baat ki aur kis tarah se baat ki. Jo use ghar se lene jata ya use ghar chhod kar aata, uski kismet par college ka har ladka rashq kiya karta. Halat ye ho gayi thi ke agar vo chahti toh bina exam diye pass ho sakti thi, karna sirf ye tha ke uspar lattoo professors ko dekh kar bas muskura dena tha.
Is sabe bilkul vipreet main apne college mein bahut hi serious students mein aata tha. Main un logon mein se tha jo apne career ko bahut seriously lete the aur college sirf padhne jaya karte the. Main kabhi apni academic life mein top student nahi raha par koshish poori karta tha top students mein aane ki. Mujhe lagan thi kuchh karne ki, zindagi mein aage badhne ki aur yahi vajah thi ke main kabhi pyaar mohabbat ke chakkar mein Kamini ke saath bhi nahi pada jo ke ek bahut hi achhi ladki thi. Renuka jaisi ladki ke aage pichhe chakkar katna toh kahin mere khwaab aur khyaal mein bhi nahi tha.
Ek din main thoda upset tha aur college mein kaafi gumsum ek kone mein betha tha. Professor class mein aaya nahi isliye sab bethe ek doosre se baatein kar rahe the. Ladkiyan saari saath bethi jaane kya baat kar rahi thi par ek bas Renuka hi thi jo unse hatkar bethi thi, ladko ke beech. Class ke saare ladke use ghere bethe the aur use vahi maharani wala treatment diya ja raha tha. Yakeen toh mujhe poora tha ke ladkiyon mein bhi us waqt discussion ka topic Renuka hi thi.
Mere saamne table par ek pani ki bottle rakhi thi jo main aksar saath rakhta tha.
College mein hamari class 4th floor par thi aur peene ke pani ka intezaam sirf ground floor par tha yani ke agar pyaas lage toh 3 floors utar kar neeche aao aur phir chadh kar uper jao. Aksar ye hota tha ke neeche aakar pani peene ke baad 3 floor chadhne mein uper pahunchne tak phir pyaas lagne lagti thi jis vajah se kaafi students apne bag mein ek pani ki bottle laaya karte the. Kayi baar hamne college administration ke saamne is baat ko lekar halla machaya par pani ka intezaam kabhi nahi kiya gaya.
Us din sabse bekhabar main akela betha ek book mein uljha hua tha ke achanak Renuka ne meri taraf palat kar mujhse kaha.
"Hey You, whatever your name is"
Na toh maine kabhi usse baat ki thi aur na hi kabhi usne mujhse isliye mujhe laga ke kisi aur ko keh rahi hai. Main ansuna kar diya toh usne phir kaha.
"Hey You" Aur is baar thoda zor se kaha.
Maine palat kar uski taraf dekha.
"Ye pani ki bottle idhar lakar dena" Usne aisa kaha jaise main koi bandhua mazdoor hoon, uske baap ka ghulam. Main chid gaya aur use ignore karke phir apni book ki taraf dekhne laga.
"Pani ki bottle" Is baar usne aur zor se kaha toh fauran ek ladka uthkar meri taraf aane laga. Usne vaapis us ladke ko bethne ka ishara kiya toh vo aise betha jaise koi achha bachcha apni maan ka hukum maan raha ho.
"Pani ki bottle Dena" Usne phir kaha.
"Pani ki bottle chahiye?" Main bottle ka dhakkan kholta hua bola "Toh aakar khud lo"
Maine bhi jawab kaafi bad-tameezi se diya tha par jaane use kya soojha ke vo uthi aur chalti hui meri taraf aane lagi. Jab maine dekha ke vo aa rahi hai toh maine bottle apne munh se lagayi aur jab tak ke vo mere paas aati, tab tak main poori bottle khaali kar chuka tha.
"Bottle chahiye thi na?" Maine khaali bottle uski taraf badhayi "Ye lo aur jao pani bharke lao ground floor se"
Uski shakal aisi ho gayi jaise kisi ne abhi abhi use thappad maar diya ho. Ladko ke munh hairat se khule reh gaye aur saari ladkiyon ke chehre par aisi muskurahat pheli jaise un sabki shaadiyan tay ho gayi hon.
Us din main college ka hot topic ban gaya. Har koi yahi baat kar raha tha ke maine kaise Renuka ke saath bad-tameezi se baat ki. Saari ladkiyan aur kuchh ladke jinki taraf Renuka kabhi palat kar bhi nahi dekhti thi unke liye main hero ho gaya tha aur vo ladke jinke saath vo uthti bethti thi vo sab mujhe college ke bahar pakadne ki taiyyari kar rahe the taaki mujhe maza chakha saken.
Usi din main college ki canteen mein betha ek Red-Bull pi raha tha ke tabhi Renuka kuchh ladkon ke saath aayi. Mujhe akela Red-Bull pita dekh kar vo mujhe sunane ke liye zor se boli,
"Chhote bachche aisi cheeze nahi peete, doodh piyo doodh"
Main janta tha ke vo mujhe suna rahi hai. Ladkiyon ke saath main hamesha kaafi izzat se pesh aata tha aur takreeban college ki har vo ladki jo mujhe jaanti thi, mujhe pasand karti thi. Par Renuka ke akkhad mijaaz ki vajah se jaane mujhe kya soojha ke maine usse vo keh diya jo ke maine kabhi zindagi mein nahi socha tha ke main ek ladki se kahunga.
Main uski taraf palta aur uski aankhon mein dekha.
"Doodh?" Phir maine nazar jaan boojh kar is tarah se ke use bhi pata chal jaaye uske chehre se hata kar uski seene par laga di aur kaha "Aao pila do"
Us din toh jaise college mein hungama sa ho gaya tha. Jungle mein shayad aag bhi itni tezi se nahi phelti jitni tezi se mere Renika se is tarah pesh aane ki baat pheli.
Mujhe college ke baad kuchh aur kaam bhi the isliye main sidha ghar nahi aaya. Vo kaam niptaye, phir ek dost ke ghar gaya aur dinner bhi uske saathi hi kiya. Phir vahan se ek movie dekhne chale gaye aur uske baad maine apne dost ko ghar drop kar diya. Jab tak main apne ghar ki taraf rawana hua tab tak raat ka 1 baj chuka tha. Sadkon par gaadiyan kaafi kam ho gayi thi aur mere ghar ke aas paas toh jaise bilkul marghat sannata hi chhaya hua tha. Mere ghar se kuchh door hi achanak 3 gaadiyan meri bike ke aas paas aayi aur mujhe rukne par majboor kar diya.
Mere rukte hi gaadiyon se 9-10 ladke nikle. Unmein se main kisi ko bhi na toh janta tha aur na pehchanta tha. Par haan ek ladka tha jisne apne sar par jacket ka hood dala hua tha aur mujhe laga ke maine use apne college mein dekha hai. Main samajh gaya ke mujhe kyun roka gaya hai. Pata nahi vo kabse mera pichha kar rahe the aur mujhe kahin akele mein pakadne ka mauka dhoondh rahe the.
"Kyun be? Bada hero ban raha hai tu?" Ek ne kaha. Vo sab mujhe gher kar khade ho gaye the.
"Haan toh?" Maine rookhe se andaaz mein jawab diya.
"Toh ye ke kal tu Renuka se maafi maangega, samjha?"
"Kis baat ki?"
"Jo aaj kiya us baat ki"
"Aur na maangi toh?"
Usne meri baat ka jawab diye bina muskurate hue baaki saare ladkon ki taraf dekha aur phir pichhe khadi cars ki taraf. Maine uski nazar ka pichha kiya toh mujhe andaza hua ke main us waqt apni soch se zyada serious situation mein tha.
Jahan ham khade the vo jagah sunsaan si thi. Koi ikki dukki hi gaadi udhar se guzarti thi. Pichhe gaadiyon ke darwaze khule hue the aur andar rakhi hui hockey sticks mujhe nazar aa rahi thi.
Main janta tha ke samajhdari isi baat mein thi ke is waqt unki haan mein haan milata aur vahan se nikal leta. In sab maamlon mein kam main bhi koi kam nahi tha aur yahi vajah thi ke college ke ladkon mein se khud koi nahi aaya tha. Kyunki vo jaante the ke mujhe is tarah se yun akele mein pakadne ka matlab tha ke phir main un sabko baad mein ek ek karke akela pakadta. Jo vo yahan mere saath karte, baad mein main unke saath karta.
Par jaane kyun mujhe us waqt khud pichhe hatna bilkul bhi ganwara nahi hua.
"Chal abhi side ho" Maine bike ke aage khade ladke se kaha, "Na toh mere paas us bekaar cheez ke liye time hai jise tum Renuka Sinha kehte ho aur na hi tum jaise chalte phirte koode kachre ke liye time hai"
"To matlab tu maafi nahi maangega?"
"Sawal hi nahi uthta. Main apne ghar mein uske naam ki kutti tak na paalun"
Mera itna kehna hi tha ke usne achanak mera collar pakad liya. Uski is achanak harkat se main ekdam baukhla sa gaya aur isse pehle ke main khud hi kuchh soch pata, maine haath chhod diya aur uske chehre par ek zordar thappad maar diya.
Uske baad kya hua mujhe kuchh theek se yaad nahi. Bas itna pata tha ke meri motorcycle ek taraf giri padi aur main doosri taraf. Un saare ladkon ne mujhe gher rakha tha aur mujh par chaaro taraf se laatein pad rahi thi. Koi 10 - 15 minute tak jamkar meri kutaai ki gayi. Phir usi ladke ne jo ke mujhse baat kar raha tha mere baal pakad kar mujhe sidha khada kiya.
"Khada ho saale. Tujhe teri aukaat dikhata hoon" Vo mere baal pakde hue bola.
"Dikha le, aaj main akela hoon toh kar le apne dil ki. Par yaad rakhna, baari meri bhi aayegi. Tum mein se ek ek ka maine pocha na banaya toh kehna" Maine badi mushkil se kaha. Meri shirt phat chuki thi, munh se khoon beh raha tha aur shareer kayi jagahon par buri tarah se dard kar raha tha.
"Teri toh ... "Meri baat sunkar us ladke ne kaha aur vo ek baar phir mujh par chaalu ho gaya. Har taraf se mujh par vaar kiye ja rahe the aur main apne haathon se apna chehra bachane ki koshish kar raha tha.
"Munh kya chhupa raha hai saale ... "Us ladke ne kehte hue mere dono haath pakde aur mere chehre se hatane ki koshish ki. Maine thodi himmat jutaayi aur apne haath jhatak kar ek haath se uska collar pakda aur doosra haath uski gardan par jakad diya.
Mujhe yaad nahi kitni der tak par usne mujhse chhutne ki kaafi koshish ki thi. Vo jitni koshish karta main apni haath ki giraft uski gardan par utni hi kas deta. Uske gale ka agla hissa jise adams apple aur hindi mein tentua kehte hain meri mutthi mein tha aur main poora zor laga kar daba raha tha. Uski haalat kharab ho chali thi aur uske saath ke ladke bhi use meri pakad se chhutane ki nakam koshish kar rahe the.
Main khud bhi janta tha ke vo ladka us waqt mar sakta tha par main uska gala chhodne ko taiyyyar nahi tha. Jab aur kuchh bas nahi chala toh vo ladke car se hockey sticks utha laaye aur vo mujh par barsani shuru kar di, khaas taur se meri kalaiyon par taaki main us ladke ko chhod doon. Par hua iska ulta hi, vo jitna mujhe hockeys maarte main utni hi zor se us ladke ka gala dabane ki koshish karta. Ab sochta hoon toh aisa lagta hai jaise main us waqt use jaan se maarne ki koshsih hi kar raha tha.
Aur shayad khud use bhi ehsaas ho gaya tha ke main use jaan se maar doonga. Uski dono aankhen palat gayi thi aur vo jaise meri giraft mein jhoolne sa lag gaya tha. Badi koshish karke usne apne dono haath uthaye aur mere aage jod diye, jaise vinti kar raha ho ke main uska gala chhod doon.
Uske saathiyon ne jab dekha ke main uski jaan lene par utar aaya hoon aur lakh koshish ke baad bhi 8-9 ladke milkar use nahi chhuda paaye toh vo samajh gaye ke mamla murder ka banne wala tha. Tab tak us ladke ki aankhen poori tarah palat chuki thi aur munh se laar behne lagi thi. Ab aalam ye tha ke uske saathi mujhe marna chhod khade chup chap dekh rahe the aur vo mere aage haath jode bejaan se meri giraft mein jhool sa gaya tha. Us waqt ek tarah se maine uska gala pakad kar use khada kar rakha tha varna vo toh kabka gir chuka hota.
"Mar gaya ye, nikal yahan se" Kisi ek ladke ne kaha aur vo fauran apni gaadiyan lekar vahan se bhaag gaye.
Unke jaane ke baad maine uska gala chhoda aur vo fauran sadak par gir gaya. Ek pal ke liye toh mujhe bhi laga ke vo mar gaya hai par jab kuchh seconds baad vo khaansne laga toh main samajh gaya ke abhi zinda tha. Mujh par hockeys se kaafi vaar kiye gaye the. Khoon ab mere sar se bhi beh raha tha par gussa thanda nahi hua tha. Main abhi bhi use aur marna chahta tha par jaise hi aage ko badha chakkar khakar khud neeche gir pada aur behosh ho gaya.

Superb. Yeh mere mein bhi hua hai eisa

 

[Rahul]

wonderful update ghamandi ka ghamand tuta zindgi galatfahmiyon ne tod di waiting new update bhai

 

[Mr. Perfect]

Waaah immo bhai superr duperrr story. Sach me maja aa gaya padh ke. Ye story bhi pahli story jaisi hai. I mean isme bhi khojne ka kaam hai bas kirdaar badal gaye hain_____

Kafi suspence hai ki aakhir itne bade pariwaar ka beta kis vajah se itni daulat aur itna bada samraajya chhod kar chala gaya tha. Present me wo jinda bhi hai ya wo fir mar chuka hai iska kuch bhi pata nahi hai. Sare kirdaar kamaal ke hain. Ab dekhna ye hai ki is RAAZ ka RAAZ kya hai_____

So waiting for the next updates____

 

[Rahul]

Immortal bhai mai abhi kewal aapki story ke liye login karta hun aur yakin mano yahan update nahi dekhkar niraas ho jata hun

 

[The Immortal]

Mujhe hosh aaya toh main hospital mein tha aur mere bed ke paas hi meri maan bethi thi. Mujhe aankh kholta dekh vo fauran mere paas aayi.
"Shukr hai uperwale ka" Unhone mere sar par haath pherte hue kaha "Thehar main Doctor ko bula kar laati hoon"
Mere kuchh kehne se pehle hi vo kamre se bahar nikal gayi.
Maine lete lete hi apni halat ka jaayza liya. Shareer par kayi jagah pattiya chadhi hui thi aur dono arms kohni tak plaster mein thi. Ek haath mein drip lagi hui thi jisse hota glucose ya shayad kuchh aur mere shareer mein ja raha tha. Maine uthkar bethne ki koshish ki par fauran aisa laga jaise mere pattiyon mein bandhe sar mein hathode baj rahe hon aur maine sar phir takiya par rakh diya.
Apne shareer se nazar hata kar maine apne aas paas dekha. Us waqt main ek khaase bade kamre mein tha jo kisi 5 star hotel se kam nahi tha. Kamre ke beecho beech bichhe bed par main leta hua tha, dono taraf do tables thi jin par phool rakhe hue the. Thodi hi door khidki ke paas kisi living room ki tarah ek table aur uske 3 taraf sofas rakhe hue the aur deewar ke saath ek bada sa TV rakha hua tha. Kamre mein hi attached bathroom bhi tha.
Matlab saaf tha. Main ek kaafi mehenge kism ki hospital mein tha par kaise? Mere maan baap ki maali halat koi itni zabardast nahi thi ke vo is tarah ke hospital mein mera ilaaj afford kar sakte. Yahan ek kamre ke charges kisi 5 star hotel se zyada hi honge aur uper se Doctors ki fees aur dawaiyon ke kharche.
Apne parents ki jeb ke hisaab se toh mujhe AIIMS jaise kisi hospital ke General ward mein hona chahiye tha.
Main abhi soch hi raha tha ke kamre ka darwaza khula aur ek policewala andar daakhil hua.
"Abhi bahar aapki maan ko batate hue suna ke aapko hosh aa gaya hai, baaat kar sakte hain 2 min?" Vo mere bed ke nazdeek aata hua bola. Ek haath mein uske ek notebook thi aur doosre mein pen.
Main janta tha ke vo kya puchhne wala tha isliye haan mein sar hila diya.
"Bayaan lena tha aapka"
Maine phir haan mein sar hilaya.
"Aap jaante hain ke vo kaun the jinhone aapko us raat mara?"
Main nahi mein sar hila diya.
"Koi jana pehchana chehra?"
Maine phir inkaar mein sar hilaya.
"Kisi ke saath aapki dushmani jo aisa karna chahta ho? Haal filhal mein kisi se koi jhagda hua ho?"
Mere dimaag mein fauran Renuka ka naam aaya par gardan meri inkaar mein hi hili.
Vo policewala aage puchhna hi chah raha tha ke kamre ka darwaza phir khula aur meri maan ek nurse ke saath andar daakhil hui.
"Ye kya hai? Abhi use hosh aaya hi hai aur aap shuru ho gaye? 2 min chain ki saans toh lene do use, abhi Dr. ne dekha bhi nahi hai" Vo fauran policewale par phat padi.
"Maanji bayaan lena hai" Policewale ne kaha.
"Haan toh baad mein le lena, kahin bhaga thode hi ja raha hai vo. Kam se kam Dr. log ko dekh toh lene do ke uski halat kaisi hai"
"Aap abhi please bahar jaaiye. patient abhi coma se bahar aaya hi hai, its not the right time to question" Nurse ne kaha.
"COMA ????" Mere dimaag mein fauran ghantiyan baj uthi.
Policewale ke jaane be baad us Nurse ne mera muayna kiya. Ek torch jala kar meri aankhon mein jhanka toh kabhi mere munh mein, ek anguli utha kar mujhe uski taraf dekhne ka ishara kiya, kamre mein rakhi cheezon ke baare mein puchha ke kaun si cheez kya hai aur phir apne notepad mein kuchh likh kar bahar jaate hue mujhse boli,
"Aap abhi aaram kijiye, zyada stress nahi lena. Thodi der mein Doctor Khurana aapko dekhne aayenge"
"Kitna mara mere bachche ko" Nurse ke jaane ke baad meri maan mere sar par haath pherte hue boli "kaisa lag raha hai abhi?"
"Ye Nurse kya bol rahi thi?" Maine dheemi aawaz mein bola "Coma?"
"Haan, 4 din baad hosh aaya hai tujhe aaj" Kehte hue vo lagbhag ro hi padi "Kisne kiya ye, kaun the?"
"4 Din?" Main hairani se bola "Aur ye hospital?"
"Haan, bhala ho tere doston ka jo yahan itne achhe hospital mein leke aaye tujhe"
"Mere dost?" Meri samajh mein kuchh nahi aa raha tha. Mera koi dost itna ameer nahi tha jo is jagah ko afford kar sakta, actually toh mera dost koi tha hi nahi. Sirf jaan pehchan ke log the "Kaun dost?"
"Arrey tere college ke ladke, sabne paise milkar jama kiye aur tujhe yahan leke aaye. Aur ek ladki bhi thi"
"Ladki?"
"Haan idhar bahar hi bethi hai abhi bhi, thehar main bula kar laati hoon"
Maan ek baar phir bahar gayi aur is baar jab darwaza khula toh main hairani se dekhta reh gaya. Darwaze par maan ke saath Renuka khadi thi.
"Kaise ho tum?" Vo andar aate hue boli. Main jawab mein kuchh keh na saka. Bas gusse aur hairani se use dekhta raha. Is ladki ki himmat dekho, meri ye halat bana kar khud hi yahan khadi hai. Mujhe aisa laga jaise vo mera mazak sa uda rahi thi, apni superiority ka ehsaas dila rahi thi.
"Tum dono baat karo, main kuchh khaane ka puchhke aati hoon tere liye" Kehte hue Maan hamein akela chhod kar chali gayi.
"Yahan kya kar rahi ho tum?" Unke jaate hi main fauran Renuka se bola.
"Tumhare bills pay kar rahi hoon" Vo mere bed ke paas rakhe chair par bethte hue boli "How are you feeling now?"
"Tumhari himmat kaise hui yahan aane ki?"
"Tum sabke saath hi aise pesh aate ho ya main special hoon?"
"Special? Mere liye tum koi nahi ho"
"I know, toh matlab ke tum sabke saath hi aise ladte rehte ho jaise mere saath, kisi se dhang se baat nahi karte"
"Dhang se baat? Tumse 2 bol bole the maine aur nateeja ye nikla ke 4 din se yahan behosh pada hoon. Vaise jaan sakta hoon ke mujhpar itni meharbaani kisliye"
"Meharbaani?"
"Haan, khud meri ye halat banva kar yahan itni achhi jagah ilaaj karana? Kya jata rahi ho? Chhota dikha rahi ho mujhe?"
"Tumhein lagta hai maine karvaya ye sab?" Use meri baat ka bura laga aur mere kareeb aate hue vo boli.
Lagta nahi hai" Maine munh banate hue kaha "Pata hai mujhe ke tumhari hi kartoot hai ye"
"Mera ismein koi haath nahi hai, samjhe" Vo bhi thoda chidte hue boli.
"Toh vo ladke kya yun us raat mujhe maarte hue tumhare naam ki mala jap rahe the? Itna bevakoof hoon nahi main jitna tum samajh rahi ho. Vo na bhi lete tumhara naam toh apne aap hi samajh aane wali baat ki meri us din ki harkat ka badla le rahi thi tum"
"Wah, ek toh bhalai karo aur uper se taane bhi suno" Vo mere bed ke paas ek kursi khinchte hue beth gayi.
"Exactly, agar tumne nahi karvaya ye sab toh bhalai kyun kar rahi ho? Is meharbani ki 2 hi vajah hi sakti hain, ya toh tum is baat se dar rahi ho ke main police ke aage kya munh kholunga ya phir tumhara guilt tumhein is baat ke liye force kar raha hai. Jahan tak mera khyaal hai tum shayad police ke dar se yahan maujood ho, guilt ki vajah se nahi"
"Sar pe chot lagi hai na tumhare isliye dimaag kuchh zyada hi chal raha hai tumhara. Jahan tak police ki baat hai toh tum chahe jo gala phado, mujhe koi farak nahi padta. Main ye keh rahi hoon ke maine ye sab nahi karvaya par maine ye nahi kaha ke ye meri vajah se nahi hua"
"Kya matlab?"
"Matlab ye ke tum sahi ho, ye sab us din meri tumhari kaha suni ki vajah se hua tha, yaani meri vajah se hua tha par maine nahi karvaya. Maine unmein se kisi bhi ladke se nahi kaha tha ke jakar tumhare saath maar peet karein, main aisa kuchh nahi chahti thi"
"Oh, par ...." Maine kehna chaha toh usne haath ke ishare se rok diya.
"Baat khatam karne do mujhe. Tum pehle ladke nahi ho jo mere saath aise pesh aaya hai. Aadat hai mujhe aur aisi baaton ko ignore karna maine bahut pehle seekh liya tha. Jis kisi ko bhi main ghaas nahi daalti vo khij kar aise hi baat karta hai mujhse, mujhe neecha dikhane ki koshish mein"
"Toh tumhein lagta hai ke ...." Main phir bola toh usne phir chup kara diya.
"Us din ke incident ke baad main toh ghar jaake lambi taanke so gayi thi. Tumhare pichhe ladke bhejna toh door ki baat hai maine toh socha tak nahi tha us baare mein par vo ladke khud hi bero banne chal diye. Unhein laga ke yun tumhare saath maar peet karke unhein shayad meri taango ke beech aane ka mauka mil jaayega"
Usne jis bebaaki se ye baat kahi thi vo dekhkar mera munh khula ka khula reh gaya. Zyada ladkiyon ko main janta nahi tha aur jinko jaanta tha vo bechari badi shareef sidhi saadi type ladkiyan thi. Kisi ladki se is tarah ki baat sunne ka mere ye pehla mauka tha.
"But anyways ... "Usne apni baat jaari rakhi "Maine jo kiya, i mean tumhara ilaaj vagerah yahan par karvana, vo kisi darr ki vajah se nahi tha, mujhe bura lag raha tha isliye"
"Oh" Main itna hi keh saka.
Vo koi aur aadha pauna ghanta mere saath rahi aur ham idhar udhar ki baatein karte rahe. Tab mujhe pehli baar ehsaas hua ke vo utni buri thi nahi jitni ke main samajh raha tha. Andar se vo bhi bas ek aam si ladki thi, bas showbaazi karne ki aadat zara zyada thi.
"Theek hai na yaar ...." Vo haste hue boli thi "I am good looking and i know that. Mujhe pata hai ke main shakal soorat se achhi hoon toh koi paap thode hi hai. Agar dikkat hai meri khoobsurati se toh jao kar do Bhagwan pe case, unhone banaya hai mujhe aisa. I know how to carry myself and i do that. Duniya ki kaun si aurat aisi hai jo make up nahi lagati chehre par, ya achhi nahi dikhna chahti, sab chahti hai toh maine kiya toh kaun sa paap kiya. College aati hoon toh saali saari ladkiyan aise kilasti hain mujhse jaise maine unke khasam bhaga rakhe hon"
Uski is baat par main zor se has pada.
"Haan yaar, kehti hain ke main ladkon mein hi ghusi rehti hoon. Ladki koi baat karti hi nahi mujhse toh main kya karun"
"I am sorry for being rude that day" Baaton baaton mein maine kaha.
"And i am sorry ke meri vajah se tumhare saath aisa hua ..." Usne muskura kar jawab diya.
Tabhi kamre mein meri maan aa gayi aur unke pichhe pichhe Kamini thi. Meri maan ke haath mein ek tray thi jismein kuchh ande aur ek glass doodh tha.
"Le kuchh kha le ...." Vo meri table par tray rakhti hui boli.
"Ise abhi 4 din baad hosh aaya hai, kuchh khilane se pehle ek baar Dr. se check kar lijiye aap" Renuka meri maan se boli.
"Arrey 4 din se bhookha pada tha, khilane par kaisi rok tok. Khaayega nahi toh achha kaise hoga?"
"Aunty Phir bhi aap ek baar Dr. se check kar leti toh theek rehta"
Usne kaha toh meri maan soch mein pad gayi.
"Thehar main puchhke aati hoon us nurse se" Aur vo phir kamre se bahar nikal gayi. Ab kamre mein main Renuka aur Kamini reh gaye.
"Kaisi ho?" Maine Kamini se puchha.
"Meri chhodo, how are you feeling now?"
"As if i have just been hit by a train ..." Maine muskura kar jawab diya.
"Chhi, aisa nahi kehte" Vo mere bed ke paas aakar khadi ho gayi.
"Achha chalo main chalti hoon" Kehkar Renuka uth khadi hui "Tum aaram karo, main kal dekhne aaoongi"
"Thanks for everything" Maine usse kaha.
"You are very welcome. Take care" Kehkar vo apna purse utha kar chal di.
"Kuchh kha nahi sakte, magar doodh toh pi hi sakte ho?" Kamini ne kaha.
"Nahi inhein Glass se doodh pina pasand nahi hai" Renuka jaate jaate palti aur kehkar hasti hui darwaze se nikal gayi. Main janta tha ke uska ishara meri kis baat ki taraf tha aur muskura utha.
"Kya matlab tha iska?" Uske jaane ke baad Kamini boli.
"Kuchh nahi, never mind her. pagal hai" Maine haskar kaha.
"Ye kyun itni meharbaan ho rahi hai tum par?"
"Kyun tumhein jalan ho rahi hai?" Main uske chehre ko gaur se dekhta hua bola.
"Haan bilkul ho rahi hai. Zabardasti chipak kyun rahi hai itna ye, ye ehsaan jatane ka matlab kya hai"
"Ab chhodo bhi use, achhe khaase hospital mein ilaaj ho raha hai mera, kya problem hai. Hone do jaise ho raha hai"
"Bachkar rehna isse, iske jaisi ghar basati nahi, sirf ghar ujaadti hain"
Us din bhale hi Kamini ne ye baat jalan mein laparwahi se kahi thi par ab sochta hoon ke kya mujhe us din uski baat sun leni chahiye thi? Kya usne jo kaha vo sach tha? Aaj Renuka ke marne ke itne waqt baad bhi Jab bhi maun uske baare mein sochta hoon toh vo din yaad aa jata jab mere paas vo phone call aaya tha, har baar mere kaano mein us phone par kahe gaye vo shabd goonjne lagte hain.

"Aapki biwi ne suicide kar liya hai"

 

[Rahul]

Are waah renuka kamaal ki ladki hai ye jarur iski biwi banegi par fir kamni kya karegi wo bhi pyar karti hai..wonderful update bhaiya ji

 

[Rahul]

waiting dusra aur tishra update

 

[The Immortal]

waiting dusra aur tishra update

Karta Hu Bhai thodi der Mai.

 

[The Immortal]

Waaah immo bhai superr duperrr story. Sach me maja aa gaya padh ke. Ye story bhi pahli story jaisi hai. I mean isme bhi khojne ka kaam hai bas kirdaar badal gaye hain_____

Kafi suspence hai ki aakhir itne bade pariwaar ka beta kis vajah se itni daulat aur itna bada samraajya chhod kar chala gaya tha. Present me wo jinda bhi hai ya wo fir mar chuka hai iska kuch bhi pata nahi hai. Sare kirdaar kamaal ke hain. Ab dekhna ye hai ki is RAAZ ka RAAZ kya hai_____

So waiting for the next updates____

Is story mai sirf 1 Raaz Nahi hai .

 

[The Immortal]

wonderful update ghamandi ka ghamand tuta zindgi galatfahmiyon ne tod di waiting new update bhai

Wah wah kya tuk-bandi ki hai Rahul Bhai.