Erotica Xossip to Xforum

[The Immortal]

PAAP

1 . SAFED LIBAAS

UPDATE 5

Agli subah jab meri aankh khuli toh vo ja chuki thi. Main khamoshi se utha toh man ajeeb tarah se bhaari thi.
Samajh nahi aa raha tha ke ye isliye tha ke maine apni biwi ko dhokha dete hue ek ajnabi ladki ke saath soya tha jo ek paap tha ya isliye ke vo ladki ab mere saath nahi thi aur main usko phir se dekhna chahta tha. Phir vahi paap karna chahta tha.
Sirf ye ehsaas ke vo ab mere paas nahi hai jaise meri jaan nikal raha tha. Pahadon mein ab bhi ajeeb sa sannata tha.
Bahar sooraj ab bhi nahi nikla tha. Chaaro taraf badal phele hue the. Maine uthkar apne kapde pehne aur bahar aakar phir andaze se us jagah ki taraf chal diya jahan maine usko pehli baar dekha tha. Na kuchh khaya, na munh dhoya, bas deewano ki tarah utha aur uski talash mein chal pada.
Vo ghar jahan ki usne bataya tha ke vo rehti thi ab bhi vahin tha. Meri jaan mein jaan aayi. Ghar ke bahar pahunch kar maine kunda khatkhataya.
Ek buddhi aurat ne darwaza khola. Haath mein ek danda jiske sahare vo jhuk kar chal rahi thi. Doosre haath mein ek mala jiska vo jaap kar rahi thi.
"Kahiye" Usne mujhse puchha
Maine usko bataya ke main ek ladki ko dhoondh raha tha. Huliya bataya aur tab mujhe ehsaas hua ke maine kal raat uska naam tak nahi puchha tha.
"Meri beti Aashiya?" Buddhi aurat ne boli
Maine bataya ke main naam nahi jaanta par phir se ladki ka huliya bataya.
"Haan meri beti Aashiya. Ek saal pehle aate toh shayad mil lete"
Main matlab nahi samjha.
"Usko mare toh ek saal ho gaya"
Main phir bhi matlab nahi samjha aur hairani se us aurat ko dekhne laga. Usne mujhe vahin ek ped ki taraf ishara kiya aur darwaza mere munh par band kar diya. Main kisi bevakoof ki taraf chalta us ped tak pahuncha.
Ped ke neeche ek kabar bani hui thi. Ek paththar par hindi aur urdu mein likha tha,
"Ashiya"
Aur naam ke neece likhi thi vo shayri jo usne kal raat mujhe sunai thi.
Faqat ek teri yaad mein sanam,
Na safar ke rahe, na watan ke rahe,
Bikhri laash ke is qadar tukde hain,
Na qafan ke rahe, na dafan ke rahe .
Maut ki tareeh aaj se theek ek saal pehle ki likhi hui thi.
Jab main vaapis guest house pahuncha toh bahar mujhe caretaker mila. Maine usko us ladki ke baare mein bataya jo kal mere saath aayi thi.
"Kaun si ladki sahab" Vo hairat se meri taraf dekhta bola "Aap toh akele aaye the"
Maine usko bataya ke vo ladki jisse main baat kar raha tha.
"Main toh samjha tha ke aap vo hanuman ji se baat kar rahe hain" Usne mere cottage ke thoda aage bani ek hanuman ji ki moorti ki taraf ishara kiya.
"Aap kal akele aaye the Sahab" Vo phir bola
Hawa mein ek ajeeb si khamoshi thi jaise kahin koi mar gaya ho aur saare ped, saari vaadiyan, saare pahad uska matam kar rahe hon. Meri aankhen bhar gayi aur kaleja munh ko aa gaya.
Main rona chahta tha. Dahade maar maar kar rona chahta tha.
Main usko haasil karna chahta tha. Phir usko pyaar karna chahta tha. Main uske saath hona chahta tha. Phir vahi Paap karna chahta tha.
"Usko toh mare ek saal ho gaya" Budhiya ki aawaz mere kaanon mein goonjh rahi thi.
"Aap kal akele aaye the sahab" Caretaker ki aawaz dimag mein ghantiyan baja rahi thi.
Mera dil aise udaas tha jaise mera jaane kya kho gaya ho, dil kiya ke chhati peetkar, dahade maarkar ro padun, apne kapde phaad doon, is pahad se kood kar apni jaan de doon.
Apni jaan de doon.
Aur madhoshi ke se aalam mein mere kadam pahad ke kone ki taraf chal pade, khaayi ki taraf....

THE END .

 

[The Immortal]

PAAP

2. A FACE IN THE CROWD

UPDATE 1.

Ye baat sach hai ke gareeb aadmi kabhi achha ya bura nahi hota, vo sirf bhookha hota hai, apni zaroorat ka mara hota hai. Zindagi use itna waqt aur mauka hi nahi deti ke vo achhai ya burai ke baare mein soch sake.
Vo bechara to saari zindagi 2 waqt ki roti jodne mein laga rehta hai aur ek din yahi koshish karte karte duniya se faarigh ho jata hai.
Uske liye achhe ya bure ka matlab sirf itna hota hai ke jis din vo aur uske bachche 2 raat ko khana khakar soye, vo din achha tha aur jis din vo bhookhe soye, vo din bura tha. Jis din usne haskar apne bachche ki farmaish poori kar di vo achha tha aur jis din use apne bachche ka mayoos chehra dekhna pada vo din bura tha.
Jis din vo pyaar se apni biwi ke liye kuchh le aaya vo din achha tha aur jis din paise ki tangi ke chalte use apni biwi ko jhidakna pada, vo din bura tha.
Paas table par rakhi purani alarm clock ki ghanti ne use subah ke aane ka ishara kiya. Aankhen malta hua vo kuchh der tak bistar par apni jagah hi betha raha. Bahar ab bhi andhera tha aur mausam mein halki thandak. Gali mein lage lamp post ki halki halki roshni band khidki ki darar se andar aa rahi thi.
Usne ek nazar apni bagal mein so rahi biwi par daali. Aksar aise hi subah ke waqt use is baat ka andaza hota tha ke vo kitni khoobsurat hai. Warna din bhar toh vo kabhi ghar ke kaam mein phasi, kabhi pados ki aurat se behas karti hui, kabhi beti par chillati hui, kabhi khud apne pati par kilasti hui ek aam si aurat hi lagti thi.
Par aise aksar subah ke waqt jab vo yun dniya se bekhabar, chehre par sukoon liye chain ke neend mein hoti toh use apni kismat par rashk hota tha. Vo sachmuch behad khoobsurat thi.
Usne chadar ko thoda uper khinch kar uske nange jism ko dhaka aur bistar se uth betha. Kal raat ki mohabbat ke aasar ab bhi uske chehre par baaki the. Baal bikhre hue aur hontho ki laali thodi pheli hui thi par ye sab sirf uski khoobsurati mein izaafa hi kar rahi thi.
Bistar se uth kar vo kamre ke beech unke bistar ke paas hi rakhe paalne ke paas pahuncha. Paalne mein uski dedh saal ki beti apna paon ka angutha haath mein pakde neend ki aagosh mein gum thi.
Pyaar se uske sar par haath pherte vo use dekh hi raha tha ke pichhe se biwi ki aawaz aayi.
"Choodiyon ka bada shauk hai tumhari beti ko. Saara din meri choodiyon ko khinchti rehti hai"
Usne palat kar dekha. Vo bistar par bethi apne kapde pehen rahi thi.
"Achha ji. Abhi se choodiyon ka shauk?"
"Haan aur nahi toh kya" Vo bistar se uth kar uske kareeb aayi "Meri kya, pados ki auraten bhi ise uthayen toh sidha unki choodiyon par haath daalti hai"
Usne jhuk kar beti ka matha choom liya.
"Ham aaj apni beti ke liye nayi choodiyan le aayenge. Phir kisi aur ki choodi nahi khinchni padegi. Hai na beta?"
"Kaanch wali mat lana. Toot jaayegi" Vo kamre ke ek kone mein rakhe stove ki taraf badhi.
"Theek hai"
"Doodh la do. Chaai bana deti hoon"
Zindagi bas isi dharre par chal rahi thi. Usko yaad bhi nahi tha ke uski zindagi mein aakhri baar kab kuchh alag hua tha. Vo subah uthta, doodh lene jata, chaai pita aur phir kaam par nikal padta.
Saara din shehar ki hazaron laakhon ki bheed mein vo bhi dhakke khata, shaam ko thaka hara ghar aata, naha dhokar khana khata, thoda TV ko dekhta, thoda biwi ko dekhta, thoda beti ke saath khelta aur so jata.
Aur agle din phir vahi kahani dohrayi jaati.
"Ek Marlboro ka packet" Sadak ke kinare bane panwadi ke paas ek kaale rang ki mehengi aur lambi gaadi aakar ruki aur ek haath ne 500 ka note bahar nikala. Gora chitta haath, haath par mehengi ghadi, haath mein 500 ka note, anguli mein sone ki anguthi. Dekh kar hi pata chalta tha ke kisi ameer ka haath hai.
Usne ek nazar apne haath par daali.
Kaale rang ka haath jo ab dhokar bhi saaf nahi hota tha, haath ki har nas bahar ko nikli hui, mazdoori kar karke sakht ho chuki khaal. Ye ek gareeb ka haath tha, ek mazdoor ka.....

 

[The Immortal]

PAAP

2. A FACE IN THE CROWD

UPDATE 2


"Ye le. Aur koi galti na ho. Bharosa kar rahe hain tujh par"
Usne haan mein haan milate hue apni gardan hilayi aur kaale rang ka bag uthaya.
"Shaam ko khabar kar dena. Apne paise bhi leta jana"
Usne phir haan mein haan milayi aur haath mein bag uthaye bahar aa gaya.
Mausam ab thanda ho chala tha par dopahar ke waqt kaafi tez dhoop hoti thi. Subah aur shaam ke waqt mausam kaafi dilkash rehta tha par din mein garmi ki tapish ab bhi kaafi thi.
"Garmi bahut padti hai yahan. Sardi toh bas ab naam ko hoti hai December aur January mein. Aur dopahar mein garmi saali aisi ke khade khade insaan jal kar koyla ho jaaye"
Use ab bhi yaad tha ke jab vo pehli baar apne gaon se is shehar mein aaya tha toh uske ek dost ne use ye baat batayi thi aur agle kuchh dino mein hi use is baat ka andaz bhi ho gaya tha.
Shehar kitna alag hota hai gaon se. Gaon mein uske paas waqt hi waqt hota tha. Saara din vo apne doston ke saath kabhi yahan betha hota tha toh kabhi vahan. Kabhi vo kheton mein pade hote the toh kabhi nehar mein dubki laga rahe hote the. Vahan na kisi ka darr tha aur na kisi ki sharam.
Aur kitna sukoon tha vahan. Subah shaam mandir ki aarti poore gaon mein goonjti aur din mein 5 baar azaan ki aawaz. Aur yahan shehar mein toh use apne ghar mein kabhi kabhi khud apni biwi ki aawaz sunai nahi deti thi. Gaon mein vo raat ko 2 roti khakar niche zameen par hi chadar bichha kar so jata tha aur kya neend aati thi.
Par vo baaten ab purani ho chali thi. 15 saal purani.
Pichhle 15 saal se vo bhi is shehar ki bheed ka ek hissa ban chuka tha. Yahan ke laakhon chehron mein ek chehra uska bhi shaamil ho chuka tha aur jis chehre ko shayad uski apni biwi ke siwa koi nahi pehchanta tha.
Saara din jaane kitni nigahen uske is chehre ko chhuti thi par na kisi nigah mein apnapan, na kisi mein hamdardi aur na kisi nigah mein pehchan.
Vo toh bas is bheed ke beshumar chehron mein khud bhi ek chehra tha. Ek chehra jo apni pehchan kabki kho chuka tha, ya shayad kabhi pehchan bana hi nahi paya tha.
"Dekh ye shehar hai. Gaon se bahut alag hai. Dil lagake mehnat kar, ek din saala lambhi gaadi mein ghoomega tu bhi"
Kitna galat saabit hui thi uske dost ki kahi ye baat. Pichhle 15 saal se din raat pis raha tha, mehnat kar raha tha par sawal ab bhi bas 2 waqt ki roti ka tha.
Jab aaya tha toh khyaal ye tha ke gaon vaapis jaayega lambhi si gaadi mein, yahan ek ghar kharidega aur yahin ki kisi gori chitti ladki se shaadi karega par waqt ne ek ek karke saare khyaal galat kar diye.
Vo aaj bhi kiraye ke makaan mein tha, aaj bhi city bus mein dhakke kha raha tha aur shaadi apne gaon mein jakar hi ki thi.
Aur waqt ne uske khyaal hi nahi, kahin zindagi ki is daud bhaag mein khud use bhi galat kar diya tha.
Ab toh use yaad bhi nahi tha ke vo kab aakhri baar apne gaon gaya tha. Bas yahin ka hokar reh gaya tha. Gaon mein ek waqt tha ke vo har kisi ki madad karne ko taiyyar rehta tha. Kabhi kisi ko inkaar nahi kiya aur ab ye waqt tha ke khabar hi nahi thi ke aakhri baar kisi ki madad kab ki thi.
Ab toh aalam ye tha ke apne liye madad dhoondhne se waqt milta toh shayad kisi ki madad karta.
Bachpan mein padosi ke ghar par har Sunday shaam ko picture dekhta tha aur un picture mein negative characters, gundo ko dekh kar hamesha ye sochta ke vo bada hokar ek achha aadmi banega.
"Kya hota kya hai achha aadmi" Ab zindagi ka sabse bada sawal ye ban gaya tha.
Jo apne pariwaar ka khyaal rakhe, uni zaroorat ko poora kar sake kya vo achha aadmi hota hai?
Ya jo society samaj ki ummeedon par khara utre vo achha aadmi hota hai?
Ya jo bhagwan ke raaste par chale vo achha aadmi hota hai?
Agar bhagwan mein achhai hai toh kya jo bhagwan ke naam par doosron ko maarte hain vo achhe aadmi hain?
Agar samaj ke saath chalne mein achhai hai toh kya jo samaj ke naam par apne bachchon ko isliye maar dete hain ke unhone dharam jaat ke bahar shaadi ki, kya vo achhe aadmi hain?
Aur agar pariwaar sabse pehle hai toh kya apni aur apne pariwaar ki zaroorat ko poora karne ke liye saara din doosron ka gala kaatne wale log, sarkardi daftaron mein rishwat lete babu aur na jaane aise kitne log, kya vo achhe aadmi hain?
Kya hota kya hai sala achha aadmi?....

 

[Alex123]

Interesting

 

[Alex123]

And impressive

 

[Alex123]

But I think everybody needs a happy ending

 

[The Immortal]

Interesting

And impressive

But I think everybody needs a happy ending

Shukariya bhai thread pe aane ke liye .
Insaan ko uske karam kahan se kahan se le jate hai ye story usi pe aadharit hai.
Keep reading & supporting.

 

[The Immortal]

PAAP

2. A FACE IN THE CROWD

UPDATE 3

"Dekh kaam sidha hai aur aasan hai aur paisa achha hai' Uske dost ne usko bataya tha
"Main kar nahi paoonga yaar" Usne hichakte hue kaha tha
"Arrey kaun sa rocket udana hai tune jo kar nahi paayega"
"Yaar magar"
"Dekh soch le. Maan ke pet se koi kuchh seekh kar nahi aata. Sab yahin aakar seekhte hain. Tu bhi seekh jaayega"
Aur aaj uska kaam par pehla din tha. Apne saare usool, saare iraade toh vo jaane kabke kho chuka tha, bhool chuka tha magar phir bhi kaam par pehla din har kisi ka mushkil hota hai.
"Yaar kabhi kabhi dil karta hai ke mauka mile toh apne desh ke liye sala kuchh karen. Kitna sardardi hai idhar. Dil karta hai ke ham bhi kuchh aisa karen jisse logo ka bhala ho, desh ki tarakki ho"
Vo aksar kaha karta tha aur jab kehta tha toh aisa kuchh karne ka irada bhi rakhta tha par ye sab waqt ke saath kabka badal chuka tha. Ab apne liye karne se fursat mile toh desh ka khyaal aaye.
Vo kabhi bhi dhaarmik ya mazhabhi kism ka nahi tha par uper wale mein uska poora yakeen tha. Kabhi koi bhi kaam karne se pehle yahi sochta tha ke uper wale ki nazron mein ye kaam sahi hoga ya galat. Koi bhi kaam shuru karta toh uperwale ka naam zaroor leta par aaj soch raha tha ke uperwale ka naam le ya nahi. Is bhaag daud mein us bananewale ko toh vo kabka bhool chuka tha.
Par phir bhi vo aaj vahan tha jahan hai. Uski zaroorat use aaj is darwaze tak bhi le aayi thi....

 

[The Immortal]

PAAP

2. A FACE IN THE CROWD

UPDATE 4

Pasine ki boondein uske maathe se hoti uske chehre ko gila kar rahi thi. Chehra kya vo poora hi pasine mein nahaya hua tha. Dopahar sar par thi aur aaj toh garmi ne jaise hadh hi kar di thi.
"Choodi laal rang ki laaiyega. Vo zyada pasand hai aapki beti sahiba ko" Uski biwi ne use ghar se nikalte hue kaha tha.
Choodi bazar kehne ko toh ek lambi si gali hi tha par saara din yahan itni bheed hoti thi ke insaan ka dam ghut jaaye. Kabhi kisi zamane mein yahan sirf choodiyan mila karti thi par guzarte waqt ke saath dheere dheere yahan bikne wali cheezon ki variety mein bhi izaafa ho gaya tha.
Har tarah ka sasta maal yahan mil jaata tha aur isi vajah se yahan poora din chehal pehal rehti thi. Par ab bhi yahan ki khaasiyat yahan bikne wali choodiyan hi thi.
Choodiyon ke saath saath ek aur cheez thi jiski yahan full variety maujood thi aur vo thi auraten.
Agar auraton ko classify kiya jata toh shuru karne ke liye ye ek achhhi jagah thi kyunki yahan har umar ki, har size ki, har dharam ki aurat mil sakti thi.
Vo ek pal ke liye khada sochta raha aur phir bheed mein ghusta hua choodiyon ki dukaan dekhta hua aage badhne laga.
Vo shayad zindagi mein isse zyada kabhi confuse bhi kabhi nahi hua tha.
Bheed bahut zyada thi aur usse kahin zyada thi garmi aur usse bhi zyada insaan ki shareer se uthti gandh. Uska dil chah raha tha ke vo fauran us jagah se nikal jaaye par jis kaam ke liye aaya tha vo toh karna hi tha. Ab palat kar jaana bevakoofi thi aur uske liye ab dair bhi ho chuki thi.
Badi mushkil se aur kaafi der baad use ek dukaan mein kuchh chhodiyan pasand aayi.
Choodi lekar kuchh der baad vo choodi bazaar se bahar nikla aur bus stand par aakar khada ho gaya. Phir kuchh soch kar vo paidal hi aage ko chal pada. Haathon mein laal rang ki chhoti chhoti choodiyan thi. Aur vahan bazar mein jaane aur bhi kitni chhoti chhoti bachchiyan apne liye choodiyan pasand kar rahi thi.
Kaun hota kaun hai achha aadmi?
Kya vo achha aadmi hai jo apne bachche ka pet bharne ke liye doosre ke bachche ke munh se niwala chheen le? Ya vo achha aadmi hai jo doosre ke bachche se niwala na chheene aur apne bachche ko bhookha sula de?
Sadak ke kinare khadi ek gaadi ke bahar lage rear view mirror mein usne apni shakal dekhi par faisla nahi kar saka ke ab vo shakal ek achhe aadmi ki thi ya ek bure aadmi ki.
Kya aaj vo shakal ke aadmi ki shakal bhi thi?
Shayad nahi. Aaine mein jo nazar aa raha tha vo toh bas ek chehra tha. Hazaron ki bheed mein khoya ek chehra.Na achha na bura, thoda achha thoda bura ek chehra.
Aur aise chehron ki koi kami thode hi hai shehar mein. Zindagi aur waqt ki maar pade toh har chehra aisa hi dikhega jaisa aaj uska tha.
Chalte hue use kitni der ho chuki thi iska use andaza na hota agar uske phone ki ghanti na bajti toh. Jeb se usne apna purana sa mobile phone nikala.
"Hello" Call ek anjaan landline number se thi.
"Main bol rahi hoon" Aawaz uski biwi ki thi.
"Haan bolo"
"Main ye keh rahi thi ke aap choodiyan mat kharidna"
"Kyun?" Usne puchha "Maine toh le li"
"Achha le li aapne? Vo main pados ki kuchh auraton ke saath choodi bazar aayi thi toh main soch rahi thi ke aapko mana kar doon. Main khud hi le leti choodiyan. Aur yahan aapki bitiya rani ko pehna kar size ka bhi sahi pata chal jata"
"Tum choodi bazar mein ho?" Uske pairon ke neeche se jaise zameen khisak gayi.
Ek saath 3 cheezen nazar ke saamne ghoom gayi.
Uski biwi ka chehra.
Uski beti ka chehra.
Aur vo kaale rang ka bag jo vo choodi bazaar mein chhod kar aaya tha.
Isse pehle ke uski biwi ka jawab aata, phone par ek oonchi dhamake jaisi aawaz sunai di aur line kat gayi...

THE END

 

[Alex123]

Mere khayal se jis Zindagi me koi family hi na ho wo Zindagi bhi kisi kaidkhane se Kam nahi .uski acchi buri Socha ne hi use le Mara khair Mai ye kahna chahta tha k AAP ki story thoda hat k lagi isliye padhi .