Horror Fear-Trap (Dar ki Nayi Inteha)...

[Niks77kill]

7. Holi Masti Andddd....
Update 7
Ek naye couple ke liye holi se jyada romantic festival aur koi ho hi
nahi sakta. Holi ka time ho aur apne partner ka sath ho to koi bhi
khushi se bawla ho jaye. Aur yahi haal is waqt harshit aur pooja ka
tha. Inki holi ki masti dekhte hi banti thi. Dono poore garden mai
idhar se udhar bhagte phir rahe the aur ek dusre par rang lagane ka
koi mauka nahi chook rahe the. Isme bhi harshit ka utsah to dekhte
hi banta tha. Na jane kitni baar to wo use uthakar rang se bhare tub
mai daal chuka tha. Use is waqt koi fikra nahi thi ki uski mom aur
uske dost aditya aur priya in dono ki chuhalbazi dekh rahe hai aur
samajh rahe hai ki kya khichdi pak rahi hai. Garden ki ek side par
rakhe music system par baj rahe 'Balam Pichkari' aur 'Lets Play Holi'
jaise romantic holi songs rang ke is tyohar ko aur rangeen bana rahe
the.
"Bura na mano holi hai..." is baar priya ko uthakar rang wale tub mai
dalte huye harshit bola. Is waqt uska utsah dekhte hi banta tha.
"Abe hero.. pagal ho gaya hai kya??" Tub se nikalte huye priya gusse
se boli.
"Holi hai bhai holi hai.. bura na mano holi hai.." uski baat sunkar
harshit haste huye bola.
"Accha beta.. to le holi ke maze.." achanak peeche se aditya use
pakadte huye bola.
"Ae poo... jaldi aa.. bahut masti kar raha tha na ye.. ab maza chakhate
hai isko.." aditya pooja se bola. Pooja ne harshit ke pair pakde aur
aditya ne to pehle hi use chhati se jakad rakha tha. Dono ne use
uthaya aur jhoola jhulate huye use bhi rang wale tub mai daal diya.
Harshit ko dalte hi teeno khilkhilakar hasne lage. Pooja to apna pet
pakadkar itni jor se has rahi thi ki agar aditya ka sahara na leti to
jameen par hi gir jati.
Harshit ki mom garden ke ek kone mai recliner par baithi thi aur
bachho ki masti ka aanand le rahi thi. Khaskar harshit aur pooja ki.
Wo to pooja ko pehle hi apni bahu maan chuki thi aur janti thi ki dono
ek dusre se kitna pyar karte hai bas kehne se darte hai. Lekin unhe
ye nahi pata tha ki wo dar to kabka khatam ho chuka hai aur pooja ne
to harshit ke propse karne ke baad unke samne hi usse apna izhar-e￾ishq kiya tha.
"Bhagwan kare inki jodi hamesha aisi hi rahe.. kisi ki nazar na lage in
dono ko.." harshit ki mom dono ko door se hi ashirwad dete huye
sochti hai. Holi ki umang bade-bado ke andar ke bachhe ko khech lati
hai to harshit ki mom kaise isse door rehti. Wo bhi harshit ke tub
mai girte hi baad unki masti mai shamil ho gayi.
"Bada tang kar raha tha meri bachhi ko.. accha maza chakhaya.."
pooja ke sir par hath ferti huyi mom boli. Hatshit ab tak tub ke
bahar aa chuka tha.
"Kya mom aap bhi na... ab holi mai maze to karunga hi.. aiseeee..."
kehte huye harshit ne paas hi table par rakha peele rang ka packet
uthaya aur geele hatho se mom ke chehre par mal diya.
"Badmash... ruk abhi.." kehte huye mom ne bhi muthhi bhar neela
rang liya aur sookha hi uske baalo mai bhar diya.
"Ab chhudate rehna baalo se ye rang.. jitna pani dalega utna hi rang
niklega... haha..." kehte huye wo hasne lagi aur uske sath hi wo teeno
bhi hasne lage. Wahi harshit ka chehra hi latak gaya par phir sabko
hasta dekh usne bhi bura nahi mana aur phir un sabhi ki dhama￾chaukdi phir shuru ho gayi. Holi ka mauka ho aur thandayi ke sath
bhaang na ho aisa to ho hi nahi sakta. Halaki harshit ki mom ne use
strict warning di thi ki 'no bhaang' lekin iske bawjood harshit pehle
hi thandayi wale bartan mai dher sari bhang chupke se mila hi deta
hai. Rango se khelte huye unhe do ghante se jyada ho chuke the lekin
kisi ko kuch hosh nahi tha kyuki bhaang ab apne poore shabab par thi
Bhaang ka nasha sab par sir chadkar bol raha tha. Wo charo aur
harshit ki mom nashe mai jhoom rahe the. Nasha itna jyada tha ki
kabhi-kabhi to wo khali pichkari hi ek dusre par chala rahe the aur
khush ho rahe the.
"Tere ko bola tha na.. harshu.. bhaang.. nahi.. aane de.. papa ko.. kaisi
daat padwati hu.. dekhna" harshit ki mom nashe mai jhoomte huye
boli. Unki awaaj ladkhada rahi thi aur wo aditya ko harshit samajhkar
use hi suna rahi thi.
"Mom.. please dad se.. na kehna... wo bahut.. datenge.." Aur aditya bhi
araam se khud ko harshit samajhkar aunty ki daat sun raha tha aur
dad se daant ki baat sunkar sachmuch dar bhi raha tha. Priya araam
se khadi ye tamasha dekh rahi thi aur bewajah hi muskura rahi thi.
Ek to naye-naye pyar ka nasha aur us par bhi bhaang ka nasha doguna
asar kar rahe the harshit aur pooja par. Dono us waqt sabki nazro se
door ghar ke peeche ek dusre mai khoye huye the.
Harshit ne pooja ko ghar ki deewar ki taraf gher rakha tha. Uske
dono hath deewar par the jinke neeche pooja ke hath the. Dono ki
aankhe ek dusre se mili huyi thi aur ektak bina palke jhapkaye dono
ek dusre ko bas yu hi dekhe ja rahe the. Dono mai se koi kuch nahi
bol raha tha lekin aankho hi aankho mai dono chilla-chilla kar ek
dusre ke liye pyar ka izhar kar rahe the. Shayad bhaang ka hi asar tha ki harshit ne itna bada risk liya tha warna pooja ko khule mai is
tarah pakadne ki himmat to wo sapne mai bhi nahi kar sakta tha.
"Happy Holi.." pooja ke ek gaal par kiss karte huye wo bola. Nasha
uski awaaj mai saaf mehsoos kiya ja sakta tha.
Jawab mai pooja ne bhi uske gaal par kiss kiya aur boli, "Happy New
Year.."
Nasha use bhi utna hi chada hua tha.
"Happy Independence Day..." dusre gaal par kiss karte huye harshit
bola.
"Merry Christmas.." pooja ne bhi wahi kiya.
In dono ki is baat ka waise to koi matlab nahi tha lekin pyar aur
bhang ka nasha is kadar haavi tha ki dono faltu ki baatein kar rahe
the kyuki dimag to kaam karna band kar hi chuka tha.
"Happy Valentine's Day..." ek sarsarati awaaj harshit ke kaano mai
padi jisne ek second mai hi uska saara nasha choor kar diya. Ye awaaj
peeche se aayi thi aur itni darawani aur thandi thi ki harshit ke roye
khade ho gaye. Usne pooja ko apni pakad se ajaad kiya aur peeche
palatkar dekha to waha koi nahi tha. Usne wapas apna dhyan pooja
par lagana chaha lekin mauka dekhkar pooja 'faraar' ho chuki thi.
Harshit ne us awaaj ko dimag se jhatka aur wapas aage garden ki
taraf chal diya. Abhi wo chal hi tha ki koi taral cheez uske sir par
giri. Usne sir par hath fera to kisi chipchipi cheez mai lipta neela
rang uske hath mai aa gaya jo uski mom ne lagaya tha.
Us chipchipi cheez ko dekhte hi harshit ke chehre ka rang ud gaya.
Uski dhadkan kafi tez ho gayi thi.
"Ye.. ye to.. wahi cheez hai.. wo..wo.. wo thook.." harshit man hi man
darte huye bola. Bhaang ka nasha ab poori tarah ud chuka tha aur
uski jagah ab dar aur ghabrahat ne leli thi. Harshit ke theek 3 foot
upar is waqt wahi cheez hawa mai latki huyi thi jo usne sapne mai dekhi thi. Wo cheez hawa mai aise latki huyi thi mano abhi bhi chhat
se chipki huyi ho.
Harshit ne darte-darte apna chehra upar uthaya lekin ab upar koi
nahi tha. Usne hairani se upar har taraf dekha lekin kahi kuch nahi
tha aur jaise hi usne nazar neeche ki uska dil dar ke maare mano ruk
sa gaya. Harshit ke samne uske chehre se theek ek foot aage wahi
laal bona khada tha wo bhi hawa mai. Uski badi-badi safed aankhe use
hi dekh rahi thi. Wo bona mahaz do-dhayi foot ka tha lekin is waqt
hawa mai khara wo harshit ki nazar se nazar mila raha tha.
"Saaaammmm... iiiissss... iiinnnn... Feeeaaaarrrr..... trrrraaaaappppp...." wo
bona waisi hi awaaj mai sarsarate huye bola jo harshit ne abhi thodi
der pehle suni thi.
Bona ab dheere-dheere ek-ek inch hawa nai khisakta hua harshit ki
taraf badh raha tha. Ye sab ab Harshit ki bardasht ke bahar tha. Wo
wahi behosh hokar gir pada.
To be continued...

 

[Niks77kill]

8. Jungle Fear...
Update 8
Harshit is waqt khud ko ek jungle mai khada dekh raha tha. Raat ka
waqt tha aur jhinguro aur keet-patango ki awaaje, siyaro ke rone ki
awaaje har taraf se sunayi de rahi thi. Ye awaaje harshit ko apne
kaano mai chubhti mehsoos ho rahi thi. Use lag raha tha ki kahi wo
pagal na ho jaye lekin gupp andhera uske andar dar ko hawa de raha
tha. Use nahi pata tha ki wo yaha kaise pahucha lekin itna usko pata
tha ki is waqt wo yaha akela nahi hai. Aur hath mai thi ek talwar jo
andhere mai halki peeli aabha mai chamak rahi thi.
"Tashinaaaa... tashinaaaa..." achanak hawa mai thandi aur sarsarati
awaaj uske kaano mai padi. Awaaj kuch door se aayi thi lekin uski
hawa tight karne ke liye kafi thi.
"K..kaun hai?? K..k.kaun hai yaha??" Harshit talwar ko hawa mai tante
huye ladkhadati awaaj mai bola. Wo ghabrahat mai idhar-udhar
ghoom raha tha lekin use koi nahi dikh raha tha.
"Tashinaaa... tashinaaa..." phir se wahi thandi sarsarati awaaj use
sunayi di lekin is baar wo kuch paas se aayi thi. Awaaj ko paas aate
mehsoos kar harshit ki dhadkan badhne lagi thi. Mausam kafi thanda
tha lekin usme bhi harshit ka chehra pasine se naha chuka tha. Ek to
itna ghana andhera aur us par aisi bhayanak awaaj kisi ki bhi fadne ke
liye kafi thi.
Harshit ne apne hath mai pakdi talwar par ek nazar daudayi to paya
us par khoon laga hua hai. Ye dekh kar harshit ka dar aur badh gaya
lekin abhi ye talwar hi uski madad kar sakti thi. Achanak harshit ne
neeche dekha to paya ki ghaas par kuch pada hai aur wo bhi talwar ki
tarah chamak raha hai. Dar ki jagah ab jigyasa ne leli thi. Us cheez
ko uthane ke liye wo jhuka hi tha ki ek cheekh waha goonj uthi.
"Harshuuuuuuuu...."
Itni dardnak cheekh usne aaj tak nahi suni thi. Cheekh sunte hi mano
uski dhadkan hi ruk gayi thi aur jaisa wo jhuka hua tha waisa hi khada
raha. Aur phir use tezi se bhagta hua koi apni taraf aata mehsoos
hua. Tehniyo ki sarsarahat aur sookhe patto par padte kadam is baat
ki gawahi de rahe the.
Wo seedha hua hua aur talwar us or kardi jaha se ye awaaj aa rahi
thi. Awaaj paas aati ja rahi thi jisse harshit ke kapte hatho ki pakad
bhi talwar par mazboot hoti ja rahi thi.
Aur phir koi bijli se bhi tez raftar ke sath us jagah se nikla aur
hatshit ke bilkul kareeb se hota hua jungle ki dusri taraf nikal gaya.
"Itni tez??? Ye..ye k.kya chh..eez thi??" Harshit ne khud se poocha
par jawab na to milna tha aur na hi mila. Lekin is sawal ne uskee man
mai kayi sambhawnaye khadi kardi jo use aur jyada dara rahi thi.
"Tashinaaa... tashina..." aur is baar harshit ko ye awaaj apne kaan ke
bilkul peeche se aati huyi mehsoos huyi. Yani uske theek peeche koi
khada tha ye sochkar hi uske rongte khade ho gaye aur chehra
ekdum safed pad gaya.
Usne halke se apni gardan peeche ghumayi aur peeche khade shaks
ko dekhte hi uski cheekh nikal gayi.
Usne apne peeche khud ko hi dekha lekin peeche khade harshit ke
chehre par kharochne ke lambe-lambe aur kafi gehre nishan the
mano kisi ne apne poore nakhoon uske chehre par gada diye ho. Uski
aankhe poori tarah se kaali thi aur use hi ghoor rahi thi. Hoth bhi
buri tarah kate-fate se the jinse khoon ris raha tha lekin phir bhi un
par ek muskurahat bani huyi thi, ek shaitani muskurahat. Gardan ka
bilkul beech wale hisse ka maas udhda hua tha jisse andar ka khoon
aur kuch maas bahar latak raha tha. Kul milakar peeche khade
harshit ki jo halat thi usme koi bhi insan jinda to bilkul nahi ho sakta.
"Rondu harshu... mere ko miss kiya... aaja mere paas... Fear Of
Unknown Brings The Death... Fear-Trap...." ek dohri awaaj mai
peeche wala harshit bola. Uski awaaj sunkar aisa lag raha tha mano
do admi ek sath bol rahe ho aur dono ki hi awaaj baithi huyi hai.
Akhiri line jo usne kahi use harshit achhi yarah se janta tha. Ye fear-trap ki tagline thi jise usne na jane kitni baar suna tha. Ye kafi azeeb
tha lekin isse bhi azeeb tha ki us harshit ne use 'Rondu-harshu' kaha
jo poori duniya mai sirf ek hi shaks usse kehta tha aur uska yaha
hona to namumkin tha.
"S..s..sammm??" Thook gatakte huye harshit haklata hua bola.
Ye sunte hi us harshit ke chehre par mojoud muskurahat atthaas mai
badal gayi. Uski hasi itni darawani thi ki harshit ko laga ki abhi usko
heart-attack padne wala hai aur wo kayi kadam peeche hat gaya.
Haste-haste wo achanak ekdum se khamosh ho gaya aur uski taraf
badhne laga kuch badbadate huye-
"Uh ihan mas iam.. uh ihan mas iam.. uh ihan mas iam.."
Har baar usk awaaj uchi hoti ja rahi thi. Itni uchi ki harshit ke kaan
fatne lage the. Usne dono hath apne kaano par rakh rakhe the aur
aankhe kaskar band ki huyi thi.
Achanak wo hadbadakar utha to paya usne phir ek bura sapna dekha
tha. Usne aas paas dekha to paya ki is samay wo hospital ke bed par
leta hua tha aur paas hi pooja uske bed par sir tikakar ek stool par
baithi huyi thi aur shayad so chuki thi.
Harshit ne pyar se uske sir par hath fera to dil mai ek sukoon ki
lehar daudti mehsoos ki. Jo dil abhi dar ke mare bullet train ki tarah
bhag raha tha wo pooja ko choote hi apni normal speed mai aa gaya.
Hath lagte hi pooja ki neend khul gayi aur usne sir uthakar dekha.
Harshit usi ki taraf dekh raha tha aur uska hath abhi bhi pooja ke sir
par hi tha jise wo pyar se uske sir par fer raha tha. Harshit ko hosh
mai dekhte hi pooja ki aankho se ansoo beh nikle aur wo usse jor se
lipat gayi. Wo kisi bachhe ki tarah ro rahi thi jise dekhkar harshit ka
dil bhi baitha ja raha tha.
"Kya hua?? Aise kyu ro rahi hai??" Pooja ki peeth sehlate huye
harshit bola.
Jawab mai pooja usse alag huyi aur apne ansoo pochte huye hasne
lagi. Uska bartaw harshit ki samajh ke bahar tha. Abhi kuch seconds
pehle wo kisi bachhe ki tarah ro rahi thi aur ab has rahi thi.
"Pagal to nahi ho gayi tu??" Harshit hairani se use dekhte huye bola.
Par pooja bina use ek bhi lafz kahe khushi se chillati huyi room se
bahar nikal gayi. Aur kuch hi der baad uske room mai harshit ke
mom-dad aur 3-4 doctors ko lekar enter huyi. Jaha harshit ke
parents ki aankhe use hosh mai aaya dekhkar nam thi to wahi doctors
ki aankhe hairani se fati huyi thi.
"Harshu... mera beta uth gaya.. mera beta laut aaya.." Harshit ki mom
uske gale se lipatte huye boli. Wo bhi waise hi ro rahi thi jaise abhi
kuch der pehle pooja ro rahi thi.
Harshit ne dekha ki uski mom kafi thaki huyi si lag rahi thi aur unki
awaaj bhi kafi badli huyi si thi jaisi adhiktar mental patients ki hoti
hai.
Kafi der tak wo harshit ke gale se lipti rahi aur kabhi uske ek gaal ko
choomti to kabhi dusre ko. Unka bartaw is samay kafi kuch ek mental
patient jaisa hi tha.
Kafi der baad jab wo hati to harshit ke dad uske bed par aakar baith
gaye aur uske gaal ko sehlate huye bole-
"How are you feeling son??"
"Very well dad.. but aap to kal aane wale the na??" Harshit ne
poocha.
"Son... jaise hi mujhe pata chala ki mera harshu holi khelte huye
behosh ho gaya hai.. mai fauran chala aaya.. lekin jab yaha aaya to....."
harshit ke dad ne jaan-bhujkar baat adhoori chhod di kyuki unki
aankho ki nami ab ansuo mai badal chuki thi.
"To kya dad?? Please bataiye na??" Harshit ne vinti karte huye
poocha.
"Tum coma mai chale gaye the.. Brain Dead Coma... hum nahi jante
kaise... tumhari body kaam karna band kar chuki thi.. yaha tak ki
brain bhi.. sirf heart-beat chal rahi thi jo bata rahi thi ki tum jinda
ho.. aur is coma se bahar aane ke chances bahut hi low hote hai.. 1 out of a billion... but miraculously aaj poore do mahine tak brain dead
rehne ke baad tumhe hosh aaya hai..." jawab ek doctor ne diya.
To be continued...

 

[harshit1890]

maza aa rela hai aur chapo

 

[Niks77kill]

9. In Hospital
Update 9
Harshit ko kal subah discharge milna tha isliye uske liye aaj ki raat
katni kitni bhari pad rahi thi ye wahi janta hai. Use ghar ki bahut
yaad aa rahi thi isliye wo bechaini mai baar-baar karwat badal raha
tha. Pichhle ek hafte se jabse use hosh aaya hai wo hospital ke bistar
par pada-pada oob chuka tha. Waise bhi hospital ka to naam sunte hi
uske pet mai gud-gud hone lagti thi. Yaha ka mahaul aur hospital ki
wo dawaiyo wali gandi si mehak uska dimag kharab kiye huyi thi. Use
to bas jald se jald ghar pahuchna tha aur tazi hawa mai saans leni thi.
Raat ke 2 baj chuke the lekin uski aankho mai neend ka koi namo￾nishan nahi tha. Is samay wo seedha leta upar kamre ki chhat dekh
raha tha aur us pehle sapne wale din se lekar ab tak ghati sabhi
ghatnao par vichar kar raha tha.
"Ye mere sath akhir ho kya raha hai?? Jab se wo manhoos sapna aaya
hai.. tabhi se ye sab shuru hua hai... aur ye fear-trap ka aur sam ka
aapas mai kya connection ho sakta hai?? Wo to bas ek tv show hai..
aur kuch nahi.. magar phir kyu??" Aise hi sawal uske dimag mai ghoom
rahe the jinke jawab kisi ke paas nahi the. Raat ke 2 baje ho,
hospital mai aur dimag ye sab soch raha ho to dar lagna to swabhawik
hai aur wahi ho raha tha. Ye sab sochte-sochte harshit ke dimag mai
us laal bone ki tasweer ubhar aayi. Yahi wo ekmatra cheez ya shaks
tha jo behosh hone se pehle usne dekha tha. Badi-badi ghoorti huyi
aankhe, chhota sa shareer aur us par bhi laal rang se ranga hua poora
badan jaise kisi ne khoon se nehla diya ho.
Harshit abhi ye sab soch hi raha tha ki use bistar mai apne pairo ke
paas koi thandi aur naram si cheez mehsoos huyi. Ye kuch geeli aur
chipchipi si cheez thi jiske touch hote hi harshit ka gala sookh gaya.
Usne ek patla sa hospital wala safed kambal odh rakha tha. Jab usne
gardan uthakar kambal ke pair wale hisse ki taraf dekha to uski
aankhe aise badi ho gayi mano do kanche ho. Kambal par waha laal
rang laga hua tha jo shayad khoon tha. Waha itna jyada khoon tha ki
farsh par bhi tapak raha tha.
Khoon dekhkar ek to pehle hi harshit kharab ho rahi thi aur phir jab
usne mehsoos kiya ki wo cheez jo uske pair se touch huyi thi wo pairo
se upar badh rahi thi tab uski halat aisi ho gayi thi ki agar us waqt
koi halki si bhi awaaj hoti to wo wahi dam tod deta. Uska poora dhyan
is waqt kambal ke us ubhar par tha jo dheere-dheere upar uski taraf
badh raha tha. Harshit ki to mano kato to khoon nahi aisi halat
hogayi thi. Wo cheez dheere-dheere uski kamar tak pahuch chuki thi
aur upar seene ki taraf badh rahi thi. Harshit soch raha tha aaj to
uski maut pakki hai. Phir use khyal aaya ki kahi wo phirse sapna to
nahi dekh raha isliye usne turant apne hath par chikoti kati lekin
kuch nahi hua. Ye sapna nahi haqeeqat thi aur wo cheez sach mai uske
seene tak pahuch chuki thi. Dar itna jyada badh chuka tha ki ab uska
samna karne ka waqt aa gaya tha. Usne ek hichki ke sath thook gatka
aur phir kambal hata diya.
Kambal hatte hi uske ascharya ki koi seema nahi thi. Use yakeen hi
nahi ho raha tha lekin sach yahi tha ki waha kuch bhi nahi tha. Usne
poora kambal utha ke neeche farsh par fek diya lekin poore bed par
kuch bhi nahi tha.
"Aisa kaise ho sakta hai??" Harshit ne khud se man hi man sawal kiya
lekin ab to use aise sawalo ki aadat si ho gayi thi jinka uske paas koi
jawab nahi hota tha. Us cheez ke apne pairo par hote chipchipe aur
thande sparsh ko wo ab tak mehsoos kar pa raha tha. Usne apne
shareer par dekha to use ek aur bada jhatka laga. Jaha-jaha us
cheez ko usne apne shareer par mehsoos kiya tha waha-waha ek safed lislisi si cheez chipki huyi thi kuch thook jaisi. Yani ye uska
veham nahi tha, waha sach mai koi tha uske kambal ke andar. Usne
pehle kambal aur phir bed ke us hisse ki taraf nazar daudayi jaha
khoon tapak raha tha aur khoon ko abhi bhi mojoud dekh uska yakeen
aur pukhta ho gaya.
"Ye kya kar raha hai tu??" Achanak kisi ne uske kandhe par hath
rakhte huye kaha. Dar itna jyada tha ki awaaj sunte hi harshit uchhal
gaya aur bed ke dusri taraf bhaga. Waha pahuchkar usne dekha ki ye
awaaj aur sparsh pooja ke the jo hairani se uski harqato ko dekh rahi
thi.
"Poojaaaa.... tu??? Itni raat ko yaha kya kar rahi hai????" Harshit ne
thoda normal hote huye usse poocha.
"Poochna to mujhe chahiye ki tu ye kya kar raha hai?? Mai to yaha
bas tujhse kuch baat karne aayi thi.. lekin pehle tu bata ye kambal ko
neeche fek-kar tu kar kya raha hai?? Aur itna dara hua kyu hai??"
Pooja ne hairani se use dekhte huye kaha.
"Achha hua tu aa gayi poo.. pata nahi kuch dino se mere sath kya ho
raha hai.. mujhe azeeb-azeeb cheeze dikhti aur mehsoos hoti hai..
bahut hi darawne sapne aate hai.. abhi bhi yaha koi ya kuch tha mere
kambal mai.. wo dekh kitna sara khoon bhi hai.." lagbhag daudkar aate
huye harshit bola aur pooja ke gale lag gaya.
"Kaha hai khoon??" Pooja ne usse poocha.
"Wo dekh.. waha hai.." bina udhar dekhe aur pooja se alag huye
harshit ne hath se ishara karte huye kaha.
"Waha to kuch bhi nahi hai..." pooja ne kaha to harshit ko ek aur
jhatka laga. Usne turant waha nazre ghumayi jaha khoon tha lekin
waha ab kuch bhi nahi tha. Yaha tak ki kambal se bhi khoon ke nishan
ja chuke the. Use apni aankho par yakeen hi nahi ho raha tha aur wo
us jagah ko bas hairani se ghoore ja raha tha.
Harshit ko aise pareshan dekhkar pooja ne use wapas apne gale se
lagaya aur dilasa dete huye kaha-
"Tujhe veham hua hoga harshu.. waha kuch nahi hai.. aisa aksar hota
hai coma se bahar aaye patients ke sath.. pareshan na ho... sab theek
ho jayega.."
Pooja ki baat sunkar harshit ko kuch rahat mili. Usne mehsoos kiya ki
pooja ki pakad us par mazboot hoti ja rahi hai aur wo use apne se
kuch jyada hi kaskar chipkaye huye hai.
"Waise itni raat ko kya baat karni hai tereko.." harshit ne baat
badalne ke liye poocha.
"Wo fear-trap ka 13th season shuru hone wala hai.."
Pooja ke muh se ye sunte hi harshit ke andar dar ki ek lehar daud
gayi phir bhi usne khud ko samhale rakha. Fear-trap ke to use ab
naam se hi chid si ho gayi thi. Pooja ki pakad us par abhi bhi mazboot
hoti ja rahi thi.
"Itni raat ko tu ye kehne aayi hai??" Harshit ne saans bharte huye
kaha. Pooja ki pakad us par itni mszboot ho chuki thi ki use ab saans
lene mai bhi dikkat ho rahi thi.
"Nahi kuch aur bhi kehna tha.."
"Kyaaaa???"
"SAM IS IN FEAR-TRAP..." pooja ne kaha.
Ye sunte hi harshit ka chehra safed pad gaya. Pooja ke muh se sam
ke bare mai aaj usne pehli baar suna tha, ye to alag baat hai lekin jo
awaaj usne suni thi wo pooja ki to katayi nahi thi. Awaaj kisi aadmi ki
thi jafi moti aur kaano ko chubhne wali lekin sath hi sarsarati huyi
bhi. Harshit ke pair ab jawab dene lage the.
"P...poo.. t..teri awaaj ko.ko kya hua??" Harshit ne ladkhadati awaaj
mai kaha. Usne khud ko pooja ki pakad se chhudana chaha lekin
nakaam raha.
"SAM IS IN FEAR-TRAP.." jawab mai apni pakad aur kaste huye
pooja usi awaaj mai boli.
"Poo kya kar rahi hai.. chhod mujhe..." poori taqat ke sath pooja ko
dhakelte huye harshit bola. Usne itna tez dhakka diya tha ki pooja
farsh par ja giri.
Abhi harshit farsh par giri pooja ko dekh hi raha tha ki pooja ne apni
nazre uski taraf ki aur use ghoorte huye boli-
"SAM IS IN FEAR-TRAP"
Awaaj abhi waisi hi darawani thi aur pooja ki aankhe dekhkar to
harshit ki aur buri tarah se phat gayi. Uski neeli aankhe is samay
bilkul kali pad chuki thi mano aankho ki jagah wo kale gadde ho. Pooja
apne ghutno ke bal khadi huyi aur phir ghutno par hi uchalte huye
harshit ki taraf badhne lagi aur usi khaufnaak awaaj mai ek hi baat
badbada rahi thi-
"SAM IS IN FEAR-TRAP...."
Wo jab bhi apne ghutno par uchalne ke baad land karti to haddiyo ke
tadtadane ki awaaj saaf suni ja sakti thi. Raat ke dhayi baje agar koi
is tarah ka scene dekh le to mazboot se mazboot dil wala bhi ek sath do-teen heart-attack kha jaye. Harshit itna to samajh hi chuka tha ki ye pooja nahi hai isliye isse pehle ki wo apne ghutno par uchalti huyi us tak pahuche harshit chillata hua room se bahar bhag gaya.
Wo andha-dhund bhafmg raha tha kabji is corridor mai to kabhi us corridor mai. Usne peeche mudkar dekhne ki bhi koshish nahi ki aur ek double-door ko kholte huye us room mai ghus gaya aur andar aate hi us double-door ka lock laga diya.
Palatkar Jaise hi usne dekha ki wo kis room mai hai dar ke mare uske ansoo nikal aaye. Usne khud ko ek ke baad ek kayi baar phir chikotiya kati lekin sach yahi tha ki wo sach mai hospital ke 'Morgue Room' mai
tha.

 

[Niks77kill]

10. Morgue Terror
Update 10
Morgue room mai is waqt bas ek chhota sa night bulb jal raha tha jo
us room ke sannate ko aur darawana bana raha tha. Waha kayi sare
stretchers the jin par dead-bodies rakhi huyi thi. Raat ke dhayi baje
agar koi morgue room mai band ho jaye to uski to waise hi phategi
aur idhar to harshit ke peeche is waqt shaitano ki poori toli lagi huyi
thi to darna to swabhawik tha. Dar ke mare is waqt wo buri tarah se
ro raha tha aur gate se hi chipak ka baitha hua tha mano agar isse
jyada andar gaya to maut pakki hai. Uske liye to ek taraf kua aur
dusri taraf khayi thi. Na to bahar ja sakta tha aur nahi iise jyada
andar ja sakta tha. Morgue mai ek azeeb sa sannata chhaya hua tha,
maut ka sannata. Harshit ke kaan is waqt poori tarah khule huye the
aur halki se bhi halki awaaj ko pakad lena chahte the. Usne socha ki
ek baar uthkar bahar dekh le aur agar bahar pooja na ho to wo yaha
se nikal bhage. Morgue ke double-doors par chhoti glass windows
bani huyi thi. Wo bahut hi dheere-dheere utha aur ek window se
bahar jhankne ke liye apna sir us tak kiya hi tha ki samne pooja ko
dekhkar uski buri tarah phat gayi. Bahar pooja double-doors se sat
kar khadi huyi thi lekin farsh ki jagah chhat par. Wo ulti latak rahi
thi gate ke bilkul bahar aur un windows se andar jhaank rahi thi
harshit ki taraf. Uski aankhe abhi bhi waisi hi thi bilkul kali aur had
se jyada darawani. Ulte latke huye bhi uske chehre par ek muskan
bani huyi thi jo use aur bhayanak roop de rahi thi. Usne ulte latke
huye hi darwaza khatkhataya aur boli-
"Koi andar hai kya??"
Awaaj abhi bhi waisi hi darawani thi jise,sunkar harshit ki dhadkan
kayi guna aur badh gayi.
"Please jane do mujhe.. maine kya bigada hai tum logo ka... please
chsle jao.." harshit rote huye chillaya. Wo wapas zameen par wahi darwaze se satkar baith gaya tha aur poori taqat se darwaze se
bhida hua tha taki koi bhi andar na aa paye.
"Shhh.. aise nahi chillate.. andar log so rahe hai.. chillane se wo jaag
jayenge.." bahar se pooja ki waisi hi darawani awaaj aayi.
Harshit yeh sunte hi ekdum but ban gaya aur wapas haqeeqat ke
dharatal par aa gaya ki wo abhi bhi ek morgue-room mai hi hai. Usne
tezi se stretchers par aur idhar-udhar nazre daudayi par andar koi
halchal nahi thi. Ye dekhkar usne chain ki saans li aur wapas apna
dhyan aur kaan bahar ki taraf laga diye. Usne sunne ki bahut koshish
ki lekin ab bahar bhi poori tarah sannata chhaya hua tha. Usse na to
rote ban raha tha aur na sambhalte. Jaha tak uski yaddasht jati thi
usne aise halat ka samna aaj se pehle kabhi nahi kiya tha.
''Mmaamm.. mmaamm.." achanak andar stretchers ke paas se aati is
awaaj ne uske kaan khade kar diye. Awaaj kafi dheemi thi lekin phir
bhi saaf suni ja sakti thi. Ye kisi ke kuch khane ki awaaj tgi jo aksar
log jaan boojhkar khate waqt muh se nikalte hai. Usne safed chadaro
mai lipti stretchers par padi laasho ko ek baar phir dekha lekin unme
kisi mai koi halchal nahi thi. Dubara bahar jhankne ki usme himmat
nahi thi isliye ghutno ke bal kapte huye wo dheere-dheere rengta hua
stretchers ke kareeb jane laga. Ek-ek inch badhne mai wo ek-ek
minute laga raha tha aur baar-baar kabhi apne ghutno ko dekhte
huye to kabhi aas-paas dekhte huye aage badh raha tha. Usne peeche
palatkar dekha to pooja abhi bhi bahar waise hi ulti chhat se latki
huyi thi aur use ghoor rahi thi. Ye dekhkar harshit ka dar aur badh
gaya aur kapte huye wo phir un stretchers ki taraf badh gaya. Jab
wo un stretchers ke paas pahucha to waha usne dekha ki yaha kuch
bhi azeeb nahi hai to usne ek lambi rahat bhari saans li. Awaaj bhi
uske waha pahuchte hi gayab ho chuki thi. Ghutno par baitha hua wo
stretchers ke neeche jhaank hi raha tha ki use phir se wahi awaaj
aayi. Lekin is baar is awaaj ne use neeche tak hila diya kyuki ye awaaj usi stretchers ke upar se aa rahi thi jiske neeche wo jhaank raha tha.
Uska dil is waqt kisi race ke ghode ki tarah bhag raha tha. Darte￾darte usne sir uthakar stretcher ke upar dekha to dar ke mare uski
halki si cheekh nikal gayi aur wo turant peeche hatkar khada ho gaya.
Waha stretcher ke upar koi shaks safed chadar odhe palthi markar
baitha hua hai. Wo shaks baitha hua aage-peeche hil raha tha aur
shayad kuch kha raha tha jiski ye awaaj aa rahi thi. Us shaks ka
poora badan us chadar se dhaka hua tha jis karan uska chehra nahi
dikh raha tha.
Harshit door khada usi shaks ko dekh raha tha aur thar-thar kaap
raha tha. Us shaks ne chadar ke andar se hi bayi taraf khade harshit
ki taraf apna sir ghumaya aur kuch der use dekhne ke baad usne
wapas apna sir aage kiya aur jo kha raha tha khane laga.
"Dekh to le kaun hai..." bahar se pooja ki waisi hi darawani awaaj aayi
jise sunkar harshit ke dimag ki batti poori tarah bujh gayi aur na
jane kyu uski baat mante huye wo us shaks ki taraf badhne laga. Uska
hath hawa mai utha hua tha aur wo kapte kadamo se uske paas
pahuch gaya.
Uska hath buri tarah kaap raha tha jo dheere-dheere us shaks ki
chadar ki taraf badh raha tha. Usne pendulum ki tarah kapte hath se
jaise hi chadar hatayi to andar baithe shaks ko dekhkar darke mare
uski taange jawab de gayi aur wo neeche gir pada. Neeche girte hi wo
turant apne panjo ke bal peeche khiska aur stretcher ke upar baithi
pooja ko dekhne laga. Usne ek nazar morgue ke double-doors ki
khidki par dali lekin ab waha koi nahi tha.
Stretcher par baithi pooja is waqt kafi bhayanak lag rahi thi. Uske
baal is waqt poori tarah khule aur uljhe huye the. Aur wo gapagap
kuch kha rahi thi jo uske hotho ke aas-paas uske chehre par laga hua
tha. Jab harshit ne us cheez ko gaur se dekha to use laga ki ab to heart-attack aaya hi samjho. Wo usi lash ka adkhaya sir tha jiske stretcher par wo baithi huyi thi.
"Ye jaag gaya tha tumhari awaaj sunkar.. aur tumhe marna chahta
tha.. isliye maine ise phir se maar diya.." pooja masoomiyat se uski
taraf dekhte huye boli aur phir us sir se ek bite liya. Uski awaaj is
samay bilkul normal pooja jaisi hi thi jisse harshit ka dar aur badh
gaya. Haddiyo sahit wo us sir ko aise kha rahi thi mano seb kha rahi
ho. Khoon uske hotho se behta hua uske chin tak beh raha tha jise
usne apne hatho se poocha aur phir maze le lekar bite chabane lagi.
Pooja ke itne bhayanak roop ko dekhkar uski buri tarah phat gayi.
"Bachaoo...." chillate huye wo double-doors ki taraf bhaga. Wo itne
jor se unse takraya ki uski lagayi huyi kadi ek jhatke mai toot gayi
aur wo bahar bhag gaya.
"Hum tera intezar kar rahe hai.. tujhe aana hi hoga hamare paas.."
bhagte huye harshit se pooja boli. Uski awaaj mai aayi masoomiyat
phir se usi darindagi se bhari awaaj mai badal chuki thi. Harshit
lagatar yaha se waha bhag raha tha bina samne dekhe ki kaha ja raha
hai.
"Ye dekhiye... janab yaha lete huye hai??" Awaaj sunkar harshit
neend se jaga. Aankhe malte huye usne dekha samne pooja khadi thi
apne dono hath kamar par rakhe aur gusse use hi dekh rahi thi. Pooja ko dekhte hi use kal raat huyi sari ghatnaye yaad aa gayi aur wo jhatke ke sath khada ho gaya. Usne dekha pooja ke sath uske mom-dad bhi khade hai aur gusse aur chinta bhari nazro se dekh rahe the.
Usne aas-paas dekha to paya ki subah ho chuki thi aur wo is waqt hospital ki chhat par leta hua tha.
"Harshu.. tu yaha kya karne aaya tha?? Janta hai kab se dhoond rahe hai tere ko?? Yaha kya kar raha tha..." Harshit ki mom ne uske mathe par hath rakhte huye poocha.
"Tera matha to bahut garam ho raha hai.. aur ye tere kapdo par k..."
harshit ki mom boli lekin phir bolte-bolte ruk gayi jab unhone dekha ki wo kya cheez hai jo harshit ke kapdo par lagi huyi thi. Poore terah saal baad us cheez ko dekh rahi thi aur is baar bhi wo harshit ke kapdo par hi lagi huyi thi.
To be continued...

 

[Niks77kill]

11. Search For Answers
Update 11
Harshit ke kapdo par lagi us jani pehchani chip-chipi thook jaisi
cheez ne uski mom ke andar ek anjane dar ko janam de diya tha. Aur
jab unhone morgue mai mili ek azeeb lash ke bare mai suna to unka
dar aur pukhta ho gaya. Harshit is baar bhi nahi janta tha ki ye thook
jaisi cheez aayi kaha se aur kal raat jo uske sath hua wo use bhi kisi
ko nahi bata sakta tha kyuki adhe log uski baat par yakeen hi nahi
karte aur adhe uska mazak udate. Ab jab tak harshit discharge
hokar ghar nahi aa gaya uski mom ne ek pal ke liye bhi uska sath nahi
chhoda.
Hospital mai kayi din tak morgue mai mili us lash ki charcha hoti rahi
jiska sir 'pooja' ne khaya tha. Us lash ko ek din pehle hi morgue laya
gaya tha. Ys aadmi ki maut cardiac arrest se huyi thi aur lash ki halat
bilkul normal thi. Lekin jab subah hospital ke ek wardboy ne use
dekha to uski cheekh hi nikal gayi thi. Body ka,sir usse cheh foot
door morgue ke double-doors ke paas pada tha jis par us wardboy ne
galti se pair rakh diya tha. Sir aur stretcher par padi body ki gardan
ke aas-paas kafi matra mai khoon ikathha ho gaya tha. Sir ka adha
upari hissa gayab tha jaha nukile daato ke nishan saaf dekhe ja sakte
the lekin iske alawa us sir ya body par kahi kharoch tak ka nishan bhi
nahi tha. Aisa lag raha tha mano kisi ne bas sir ko ukhad liya ho jaise
jameen se podha ukhadte ho. Koi kehta ki ye kisi bhoot-pret ka kaam
hai, to koi kehta ki ye kisi janwar ka kaam hai to koi kehta ki ye kisi mansik rogi ke shaitani dimag ki karamaat hai. Par koi bhi yakeeni
taur par kuch nahi keh sakta tha kyuki is tarah ki koi cheez unhone
pehli baar dekhi thi.
Agle kayi din kafi shanti se gujre. Koi azeeb baat ya hadsa harshit ke
sath nahi hua. Harshit ko is baat ka ab yakeen ho chala tha ki uske
sath ghat rahi in darawani aur azeeb ghatnao ka fear-trap se kuch
sambandh jarur hai. Ek din jab wo bistar par pada bore ho raha tha
tab usne fear-trap ke bare mai jyada se jyada janne ke bare mai
socha aur is kaam mai uski madad sirf 'adhunik devta' hi kar sakta
tha yani Google. Isliye usne turant apne laptop par google site kholi
aur search bar mai type kiya "Fear Trap". Yaha jo bhi links mile wo
jyadatar pranks ke bare mai the ki kaise apne dosto aur siblings ko
daraya jaye. Ek bhi link uske kaam ka nahi tha. Usne phir se search
bar par cursor pahuchaya aur is bar show ka poora naam type kiya,
"Fear Trap.. Dar Ki Nayi Inteha.."
Use ye dekhkar bahut azeeb laga ki is baar sirf teen hi links aaye hai
page par. Pehla link show ki official site ka tha "www.fear-trap.com".
Harshit ne us link ko ek naye tab mai khola to site mai use kuch
khaas nahi mila siway iske ki show ka 13th season agle mahine se
start ho raha hai jiske liye contestants khoje rahe hai aur jiske liye
online registration bhi kiya ja raha hai. Har baar ki tarah is baar bhi
10 contestants ko chuna jana tha. Harshit show ka bahut bada fan
tha isliye janta tha ki show mai sirf civilians hi contestants banaye
jate hai. Usne kuch der socha aur phir na jane uske man mai kya aaya
usne online registration ka form khola. Jo page uske samne khula use
dekhkar wo shocked reh gaya kyuki yaha sabhi fields pehle se bhari
huyi thi. Uska naam, phone number, address, DOB, wagerah sab
bhare huye the wo bhi bilkul sahi-sahi. Yaha tak ki 'Any phobia' wala
column bhi bhara hua tha jis par likha hua tha "Scotophobia" yani
fear of darkness. Aisa lag raha tha mano ye page bas harshit ka hi
intezar kar raha tha ki kab wo aaye aur ise khole.
Use kuch samajh nahi aa raha tha ki ye sari info is site par pehle se
bhari hui kaise hai wo bji ekdum sateek. Use sach mai andhere se dar
lagta tha. Akhir wo is nateeze par pahucha ki jarur ye sari info is
site ne facebook se uthayi hai jaha isne ye sab kuch apni wall par
share kar rakha hai aur jo uske laptop par har waqt logged in rehti
thi. Apne dil ko 'jhooti tasalli' dekar Harshit ne page neeche scroll
kiya to dekha page ke neeche sirf submit ka option tha jo baar-baar
blink ho raha tha. Usne submit par click kiya to ek naya page khula jis
par likha tha "Thank You For Registration Harshit Gupta.. You Will
Be Contacted As Soon As Poosible.."
Isi ke sath neeche 13th season ki tagline likhi huyi thi jo thi- "Pray
To Devil Because God Cannot Save You". Ye tagline kafi azeeb thi
lekin harshit janta tha ki is show ki taglines ka yahi itihaas raha hai.
Official site par aur koi khaas jankari na pakar harshit ne wo tab
close ki aur dusre link ko checkout karne ki sochi jo ek 'wiki' site ka
link tha "www.fear-trap.wikia.com". Yaha usne socha use jo bhi jankari chahiye wo mil sakti hai isliye usne wo link open kar diya.
Usne jaisa socha waisa to nayi lekin kuch aisa jarur mila jisne use chaukne par mazbur kar diya. Us site ke mutabik fear-trap ka pehla season 2001 mai aaya tha yani terah saal pehle. Peha episode aaya tha 'Friday The 13th' April ko. Ye bahut azeeb tha kyuki isse theek ek mahine pehle hi sam aur uske sath wo hadsa hua tha jisse karan sam unse hamesha ke liye alag ho gaya. Aur to aur fear trap ka 13th season bhi 'Friday The 13th' June ko shuru ho raha tha. 13 ka ye combo harshit achhi tarah samajh raha tha kyuki wo janta tha ki 'Friday The 13th' ko lagbhag sabhi civilizations mai, chahe nayi ho ya
purani, shaitan ka ank mana jata hai. Isse bhi azeeb baat ye thi ki us site par show ki production team ya crew mai se kisi ka bhi naam us par nahi tha. Director, producer, writer, etc sabhi ke aage unknown likha hua tha. Ye dekhkar use dhyan aaya ki show par bhi kabhi credits nahi dikhaye jate the. Sirf season ke pehle episode mai
credits dikhaye jate the aur usme bhi sirf contestants ke naam hote the production team ya crew mai se kisi ka naam nahi hota tha. Har
ek ohde ke aage unknown likha hua tha. Harshit utsukta par uske
sath hi bechaini ke sath page neeche scroll kar raha tha ki tabhi use
ek naam mil gaya. Lekin is naam aur ohde ko dekhkar uski bechaini
aur badh gayi. Poori team and crew ke ohdo ke baad sabse akhir mai
likha tha 'Everything By- Tashina'.
Is page par rukna ab harshit ko aur jyada bechain kar raha tha isliye
usne is page ko band karke dusra page khola jo 'Season
Performance'. Yaha abhi tak huye 12 seasons ke contestants ke naam
season-wise likhe huye the. Season 1 ka jo contestant sabse aage
pahucha tha uska naam tha ravi jiska safar 6th level tak chala tha.
Isi tarah har season ke har contestant ka naam aur uski performance
likhi huyi thi jisme sabse aage the 12th season ke contestant milan,
salma, riya aur neerav.
In sab ko dekhne ke baad jo jankari wo kafi samay se janna chahta
tha use search karne laga. Itne season usne dekh liye the lekin use
aaj tak nahi malum tha ki akhir show par contestant ko akhir kya
karna hota hai. Aaj tak kisi season mai viewers ko ye nahi bataya
gaya ki akhir contestants ko level clear karne ke liye kya karna hota
hai. Pehli level mai unhe ek letter dhoodne ko kaha jata tha jisme
sara procedure likha rehta tha lekin viewers ke samne use disclose
nahi kiya jata tha. Viewers ko bas yahi samajh aata tha ki level clear
karne ke liye kuch artifacts dhoodne padte hai tabhi level clear hoti
thi. Aur akhiri level par kya hota hai ye to koi nahi janta tha kyuki
aaj tak koi akhiri level tak pahucha hi nahi tha. Usne poori site ko upar se lekar neeche tak chhan mara lekin us letter mai kya hota hai ye use kahi nahi mila. Poori wiki site check-out karne ke baad usne ye tab bhi band kardi.
Use jitna janna tha aur jitna jaan sakta tha wo jaan chuka tha. Iske aage uske kisi bhi sawal ka jawab us wiki site par nahi tha balki wo to uske samne aur bhi naye sawal khade kar rahi thi. Fear-trap ke bare mai uske sawalo ki list is wiki site ke karan chhoti hone ki jagah aur lambi ho gayi. Uski bechaini badhti ja rahi thi jo use sir-dard bhi de rahi thi isliye usne araam karne ki sochi. Wo abhi browser band karne hi wala tha ki uski nazar teesre link par gayi jise dekhkar wo ruk gaya. Ye kisi forum site ke ek discussion thread ka link tha jiska title tha- "Unknown Fate Of Fear-Trap Contestants".
To be continued...

 

[Niks77kill]

12. Fate
Update 12
"Unknown Fate Of Fear-Trap Contestants"
Thread ka title hi aisa tha ki harshit bina us par click kiye reh hi nahi
paya. Tezi se dhadakte dil ke sath usne us link par click kar diya. Link
jab nayi tab mai khula to usne dekha ki thread kareeb ek saal purana
tha jo aur thread-starter koi ladki thi jiski id ka naam tha
'kavita_21'. Jab harshit ne uski pehli post padhi to dil aur tezi se
dhadakne laga.
"Hi friends.. mera naam kavita hai aur mai yaha ek tv reality show ke
bare mai baat karna chahti hu jiska naam hai fear-trap. Ye apni tarah
ka world mai ekmatra horror reality show hai. Mere bhai kavi ne iske
season 11 mai participate kiya tha.
Show mai jane se pehle uska behavior kafi badal gaya tha. Use har
taraf bhoot vagerah hi dikhayi dene lage the. Show mai jane tak uske
sath ye sab hota raha aur show mai bhi uske sath ye sab zari raha.
Maine uske sare episode dekhe aur bata sakti thi ki wo acting nahi
kar raha tha. Aur jab 4th level par wo eliminate hua uske baad se aaj
tak uska kuch ata-pata nahi hai. Uske baad ye show bhi aana band ho
gaya hamare yaha.
Humne organisers se contact karna chaha lekin ek chhoti si bhi detail
hume unke ya show ke bare mai nahi mili. Jab channel walo se contact
kiya to unhone kaha ki aisa koi show hai hi nahi unke channel par.
Police ke paas gaye to unhone kaha ki wo kuch nahi kar sakte kyuki
unke mutabik aisa koi show hai hi nahi. Aaj poore 2 mahine ho chuke
hai aur mera bhai abhi tak lapata hai.
Mai nahi janti ki wo zinda bhi hai ya... Please kya koi meri help kar
sakta hai is show ke bare mai janne mai?? Kya koi janta hai ki ye
show akhir hai kya cheez?? Aisa kaise ho sakta hai ki koi show bina
bina channel ki frequency use kiye usi channel par itne salo tak
broadcast ho raha hai aur channel walo ko pata hi nahi hai? Humne
jinse bhi is show ke bare mai poocha sabne hamara mazak udaya. Sab
kehte hai ki aisa koi show hai hi nahi. Mera bhai ghar chhodkar bhag
gaya hai isliye hum pagal ho gaye hai.
Kya sach mai aisa koi show nahi hai? Kya sach mai hum pagal ho gaye
hai?"
Us ladki ka pehla post padte hi harshit ka dimag chakra gaya. Aisa
kaise ho sakta hai ki ek reality show ka participant aise achanak
gayab ho jaye aur itne famous show ka koi ata-pata hi na ho. Uski
jigyasa badhti ja rahi thi isliye usne neeche scroll kiya aur janna
chaha ki baki logo ne kya comment kiya hai. Neeche logo ke comment
kuch aise the-
"Ye kaunsa show hai?"
"Kis channel par aata hai?"
"Kitne baje aata hai?"
"Aisa koi show maine bhi nahi dekha."
"Tumhare bhai ke sath bahut bura hua."
Lagbhag 6-7 page tak aise hi comments aur us ladki ke wahi ek jaise
jawab the. Wo ab bore ho raha tha lekin jaise hi usne 7ve page ka
akhiri comment pada uski aankhe chamak uthi.
"Hi kavita.. meri kahani bhi tumhari tarah hi hai.. meri cousin salma
bhi fear-trap ke 12th season mai as a contestant gayi thi.. lekin wo
bhi aaj tak lapata hai.. kahi koi pata nahi.. humne jab organisers aur
channel se contact karna chah to wahi jawab mila jo tumhe mila.."
Iske aage kavita ka comment tha-
"Chalo koi to mila jisne bhi hamari tarah ye sab jhela hai.. iska matlab
mai aur mera pariwar pagal nahi hai.. sach mai aisa koi show hai.."
Iske baad in dono ki yu hi commenting chalti rahi aur dono ek dusre
se apna experience share karte rahe jo kuch khas nahi tha, bas utna
hi jitna wo apne bhai ya cousin ke show mai jane se pehle jante the.
Thread par mahine bhar tak dono ki yahi commenting chalti rahi.
Lekin aage ek comment aisa tha jo thread ka akhiri comment tha aur
jiske baad thread ko lock kar diya gaya tha. Wo akhiri comment tha-
"Fear-trap ke bare mai publicly baat karna mana hai.. tum dono ki iski
keemat chukani hogi.."
Ye comment harshit ke dil ki dhadkan badhane ke liye kafi tha. Aur
isse bhi jyada haitmran karne wala tha us id ka naam
"TASHINA_2001".
"Phir se yahi naam.." harshit ne man mai socha aur phir us ID par
click kar diya. Us ID ki registration date aur last seen date dono
wahi the jo us comment ke the. Yani wo ID sirf us comment ko karne
ke liye hi banayi gayi thi. Us ID ko close karke harshit ne jab kavita
aur us ladke ki ID "Avi94" kholi to un dono ki bhi last seen date wahi
thi. Ye aur bhi jyada azeeb tha kyuki isne us comment ka rehasya aur
gehra diya tha.
To kya sach mai koi tashina hai?? Kahi usne sach mai to in dono ko
kuch kar nahi diya?? Kya fear-trap wakayi itna khatarnaak hai??
Agar ha to kahi maine galti to nahi kardi registration form bharkar??
Aise na jane kitne sawal Harshit ke man mai dwand paida kar rahe
the jinke jawab uske paas nahi the. Ek tarah se ye shayad achha hi
tha kyuki in sawalo ke jawab uske antarman ko shant karne ki jagah
aur jyada uljha dete. Usne apna laptop shutdown kiya aur uski screen
jhukakar use bed par hi rakh liya aur khud bhi bed par hi let gaya.
Uska poora dimag bhanna chuka tha net par fear-trap ke bare mai
itna sab padhkar. Use ab khud par pachtawa ho raha tha ki kyu usne
wo registration form submit kiya. Form ka dhyan aate hi uski nazar
apne laptop par gayi to wo turant ek jhatke mai uthkar baith gaya
aur apne hi laptop ko ghoorne laga.
"Maine to ise shutdown kar diya tha.. phir ye kaise??" Laptop ki jhuki
huyi screen ke neeche se harshit ko light aati dikh rahi thi. Usne
darte-darte apna laptop uthaya aur uski screen wapas upar kardi.
Usne dekha ki na sirf laltop open hai balki uska browser bhi open hai
jis par uski Email ID khuli huyi thi.
"Ye maine kab kholi??" Harshit man hi man budbudaya aur browser ko
band karne laga lekin wo jitni baar bhi 'X' par click karta nateeza
sifar hi rehta. Browser bilkul bhi respond nahi kar raha tha. Aisa lag
raha tha mano browser khud hi band nahi hona chahta tha. Harshit ki
kheez badhti ja rahi thi lekin browser tas se mas nahi hua. Harshit
pareshan ho chuka tha lekin jaise hi uski nazar uske mail-inbox mai
padi latest email par gayi to uske chehre se kheez ki jagah jigyasa ne
leli. Kisi unknown ID se ek mail aayi thi uske paas jiska title tha "Congratulations".
Usne jab wo mail kholi to uska chehra aisa safed pad gaya mano kisi ne sara khoon nikal liya ho. Mail mai likha tha-
"Congrats mere rondu harshu. You have been selected as a
contestant for world's scariest reality tv show Fear-trap. We were
waiting for you from last thirteen years. Further details with our
parcel will be on your door within 2 minutes.
P.S- Sam is waiting for you."
Poori duniya mai sirf sam hi aisa tha jo harshit ko rondu harshu ke
naam se pukarta tha. Yani sach mai sam fear-trap mai tha.
"Mommm.... mommm...." chillata hua harshit hath mai laptop liye apne
kamre se bahar bhaga aur seedha jakar apne parents ke room mai
ghus gaya. Waha dekha ki uski mom waha nahi thi to usne bahar
kitchen par nazar daudayi lekin waha bhi uski mom nahi thi. Tabhi
ghar ki doorbell bazi. Harshit itna dara hua tha ki doorbell ki awaaj
kano mai padte hi laptop uske hath se chhutte-chhutte bacha. Usne
laptop ko hall mai table par rakha aur door ki taraf badhne laga.
"Lagta hai parcel aa gaya.. lekin itni jaldi.. kaise??" Harshit dheere￾dheere door ki taraf kadam badhata hua soch raha tha. Waha lagatar
doorbell baje ja rahi thi jisne Harshit ki chal aur dheemi kardi thi.
Jaise hi usne darwaza khola to dekha samne uski mom khadi hai
hairan-pareshan si hatho mai shopping bags liye.
"Are itni der kyu laga di re door kholne mai.. janta hai kitna dar gayi
thi mai ki kahi tu phir se to behosh nahi ho gaya..." mom andar aate
huye boli. Harshit ne turant darwaza band kiya aur bola-
"Momm... aap kaha gayi thi??"
"Bataya to tha tujhe shopping pe ja rahi hu.. teri tabiyat ab theek thi to maine socha ki kuch shopping kar aati hu.. tere liye bhi ek nayi jeans aur kuch shirts layi hu.. mujhe pehan ke dikhana.."
"Wo sab chhodiye mom.. ye mail dekhiye.. abhi ek minute pehle hi aaya hai.." harshit apni mom ka hath pakadkar unhe lagbhag kheechte huye andar laya aur laptop unki taraf ghuma diya. Mom wo mail padne
lagi aur phir khush hote huye boli-
"Are ye kaunsa tv show hai?? Fear-Trap?? Lekin chalo ye to achhi baat hai ki mera beta ab tv par aayega.. aaj to party honi chahiye.."
"Ye kya keh rahi ho mom.. isme aapko kuch bhi azee..." harshit laptop apni taraf ghumate huye bola aur phir bolte-bolte ruk gaya. Uski aankhe aise badi ho gayi jaise do kanche ho.
"Ye to impossible hai.. ye mail kaise change ho gayi.." harshit ascharya se bola. Tabhi phir se doorbell baji.
"Lagta hai parcel aa gaya.." harshit ki mom boli.
To be continued...

 

[harshit1890]

rongte khade ho gye mere to padh kar

 

[Jaknap]

 

[harshit1890]

Aage chapo bhai