Romance Mentality [Completed]

[Champ_AK_81]

UPDATE 6​

Rahul subah ke 6 baje uth jaata hai...Uthne ka man to nahi tha fir bhi aaj usko college jana tha to uth jaata hai...
.Aur dusre bed me Ajay ki taraf dekhta hai jo bahut hi gehri neend me so raha tha...Wo bahar washroom me jaake fresh ho ke aata hai aur Ajay ko uthata hai.

Rahul:- Ajay jaldi se uth jaa yaar...Chhai peene ka time khatm ho raha hai...Tere liye hi wait kar raha hu...Jaldi se fresh ho ke aa.

Ajay:- Bhai please sone de na...Raat ke 1:00 baje soya tha...Uthne ka man nahi kar raha hai.

Rahul:- Raat ke 1:00 baje tak kya kar raha tha?

Ajay:- Raat me neend nahi lag raha tha isliye padh raha tha...Bahut mushkil se neend aaya wo bhi 1:00 baje.

Rahul:- Chal chhod ye baatein...Pehle chal chhai peeke aate hai...Uske baad tu fir se soo jaana.

Ajay:- Please yaar...Sone de na...Bahut neend lag raha hai...Chhai peene ka bhi man nahi hai.

Rahul:- Ok...Thik hai soo jaa.

Fir Rahul niche kitchen me jaake chhai peeta hai aur apne room me aa jaata hai...Aaj Ajay so raha tha to wo bhi bahut hi boring feel kar raha tha...Uske baad wo jaldi se ready hoke college chala jaata hai.

College me suru ke 4 lectures attend karne ke baad uska lunch time suru ho jaata hai...Wo canteen ki taraf jaata hai naashta karne ke liye lekin aaj ke menu card me Rahul ko koi bhi item achha nahi lagta...Isliye wo waha se nikal jaata hai...Lunch time pure 30 minutes ka tha aur wo soch raha tha ki ye time kaise spend kare...Wo akele hi idhar udhar chup chap chal raha tha aur galti se jaake ek Ladki se takra jaata hai....Wo Ladki kuch react karti uss se pehle hi Rahul usse kehta hai

Rahul:- Sorry...Galti se takra gaya....Please maaf kar do.

Rahul ki baat sunke to wo ladki bhi shocked ho jaati hai...Uss ladki ko Rahul ka sorry bolne ka tarika bilkul bhi pasand nahi aaya...Lekin ladki ne bhi Rahul ko aisa answer diya ki Rahul bhi shocked ho gaya.

Ladki:- Its ok...Kabhi Kabhi ho jaata hai...Agar main galat nahi hun to tum Rahul ho na.

Rahul shocked ho jaata hai ki iss Ladki ko uska naam kaise pata...Usne to kabhi bhi iss ladki ko aaj se pehle dekha nahi tha...Aur wo uss ladki se kehta hai.

Rahul:- Tumhe mere naam kaise pata? Kaise jaanti ho tum mujhe? Tum kaun ho?

Ladki:- Cool down Rahul...Main yahi khadi hun kahi jaa nahi rahi hun aaram se puchho sabhi questions ka answer de dungi.

Rahul:- Pehle tum bataao ki tum ho kaun?

Ladki:- Guess karo.

Rahul bahut der tak sochta hai ki aakhir ye ladki hai kaun aur usse itne acche se baat kyu kar rahi hai...Lekin bahut der tak sochne par bhi usko koi idea nahi aaya...Tabhi wo ladki has has kar kehti hai.

Ladki:- Are yaar...Pehle kabhi dekha ho to yaad aayega na...Tumne mujhe dekha nahi hoga maine 1 week pehle iss college me dusre college se transfer liya tha...Main commerce section me padhti hun.

Rahul:- Oh to ye baat hai...Main to picchle 1 saal se ye tak nahi jaan paaya hu ki hamare science section me kaun kaun students hai...Science ki baat chhodo mujhe to biology group ka bhi pata nahi hain...Tum to commerce section ki ho to koi chance hi nahi hai....

Ladki:- Logic accha dete ho...Maine picchle kuch dino se notice kiya hai ki tum lunch time me hamesha akele hi idhar udhar chalte rehte ho...Iski koi khas vajah.

Rahul:- Kya karu bachhpan ki aadat hai...Jaldi se chhod bhi nahi sakta...Tumne mera question ka answer nahi diya...Tum kaun ho? Aur tumhe mera naam kaise pataa?

Ladki:- My name is Priya...Tum kaafi din se aise hi akele ghum rahe the aur tumhari face me koi bhi tension nahi thi to main jaana chahti thi ki iske picche reason kya hai...Jab tumhe kal ek ladke ne name se pukara tha to mujhe tumhara naam bhi pata chal gaya.

Rahul ke pass ab pucchne ke liye koi sawaal baaki nahi tha aur wo Priya se kya baat kare ussi ke baare me soch raha tha...Kyuki Rahul ne aaj tak ladkiyon se acche se baat nahi ki thi aur aaj usse Priya se kya baat kare ye bhi samajh nahi aa raha tha...Fir bhi wo kehta hai.

Rahul:- Abhi Lunch time bhi khatm hone wali hai...Bye Priya abhi main jaata hun.

Rahul ko waha se jaldi se nikalna hi thik laga...Lekin

Priya:- Abhi bhi Lunch khattam hone me 15 minutes baaki hai...Chalo waha kursi par jaakar baithte hain.

Ab Rahul ko bhi waha se nikalne ke liye koi Idea nahi mil raha tha aur wo na chahte hue bhi Priya ke saath chala gaya baat karne ke liye.

Priya:- To Rahul pehle tum mujhe ye batao ki tum hamesha akele hi kyun rehte ho????Tumhare dost nahi hai kya.

Rahul to Priya se baat karne me bhi ghabra raha tha...Wo to pehle se hi ek sharmila ladka tha aur aaj kisi bhi ladki se iss tarah se pehli baar baat kar raha tha...Issliye usse samajh me nahi aa raha tha ki Priya se kaise baat kare...Fir bhi wo apne ghabrahat chhupate hue kehta hai.

Rahul:- Pehle bhi bataa diya tha...Bacchpan ki aadat hai.

Priya:-Oh...To tum bachpann se hi aise akele rehte ho...Aur ye batao ki tum mujhse baat karne me itna kyun ghabra rahe ho.

Rahul ke pass iss question ka koi answer nahi tha...Fir bhi wo apne aap ko defend karne ke liye kehta hai.

Rahul:- Ghabra nahi raha hu...Abhi tumhare saath kya baatein karu wo samajh me nahi aa raaha hai.

Rahul ne bas itna hi kaha tha ki lunch time over hone ki bell bajne lagta hai aur Rahul bahut hi relief feel kar raha tha.

Rahul:- Priya chalo ab lunch time bhi khatm ho chuka hai...Kal milte hain.

Itna keh kar Rahul waha se apni class ke taraf chala jaata hain...Usse aaj apne aap par bahut hi jyada gussa aa raha tha kyu ki wo aaj ek ladki se acche se baat nahi kar paa raha tha...Uska dhyaan abb padhayi me bilkul bhi nahi tha...Wo to aaj uske aur Priya ke hui baat ko soch soch kar time spend kar raha tha...Jaise taise college khatm hua aur wo apne hostel ki taraf jaane lagaa.

Apne hostel ki taraf jaate hue bhi wo yahi soch raha tha ki kyu wo ladkiyon se acche se baat nahi kar paa raha hai...Aur wo Priya bhi uss ke saath itne acche se kyu baat kar rahi hai...Kya iske pichhe Priya ki koi maksad hai? Kya wo usse se pyaar karti hai? Ya fir bas ye sab dosti tha? Ya fir koi khaas vajah nahi tha...Yahi sab sochte hue Rahul apne hostel pahuch jaata hai.

 

[Champ_AK_81]

Friends Update 6 is posted...Please read and give your valuable feedbacks.

 

[Champ_AK_81]

Index 1


PROLOGUE

Update 1
Update 2
Update 3
Update 4
Update 5
Update 6



​

Index Updated.

 

[kamdev99008]

Bahut khoob.....
To priya pahli ladki mili... Lekin bat nahi kar paya

 

[Champ_AK_81]

Bahut khoob.....
To priya pahli ladki mili... Lekin bat nahi kar paya

Thanks Kamdev bhai for your support and review...Keep supporting.

 

[Champ_AK_81]

UPDATE 7​

Rahul apne hostel pahunch kar sabse pehle lunch karta hai...Uske baad wo apne kamre me jaata hai...Uske baad fresh hoke wo apna bed par baith jaata hai aur ek kitaab bag se nikal kar padhne lagta hai...Bahut concentrate karne par bhi wo nahi padh paata hai...Usse baar baar Priya aur Priya ki baatein yaad aane lagta hai

Rahul (apne man me):- Ye aajkal mere saath kya ho raha hai...Kabhi bhi thik se nahi padh paata hu...Kabhi Ajay se baat karne me time nikal jaati hai...Kabhi Vijay se fight kar ke pura din barbaad ho jaata hai...Kabhi movie dekhne me to kabhi Internet...Aur to aur Jis din college nahi rehta hai us din bhi baahar ghumne nikal jaata hu Ajay ke saath...Padhne ke liye kabhi bhi mood banta hi nahi hai...11 class ke exams to bahut bura gaya tha...Socha tha ki 12 me acche se padhunga...Lekin kabhi mood banta hi nahi hai.

Socha tha aaj se acche se padhunga...Lekin baar baar Priya ki baat dimag me aa rahi hai...Aakhir usme kya hai jo mujhe uski taraf kheencha jaa raha hai...Nahi nahi main uski taraf attract nahi ho raha...Bas aaj pehli baar kisi ladki se akele me baat ki hai isliye aisa ho raha hai.

Rahul yahi sab soch soch ke pareshan ho chuka tha...Aaj bhi uska padhne ka mood off ho gaya tha...Usne socha ki kuch der rest karega aur utth ke padhega...Wo book ko side ke table par rakh kar rest karne lagta hai aur use pata hi nahi chalta hai ki kab wo neend ke agosh me chala jaata hai.

Shaam ke 5:30 ho chuka thaa...Ajay niche kitchen me se naasta kar ke upar aa chuka tha...Jaise hi wo apne room me aata hai saamne ka najara dekh ke shocked reh jaata hai...Uske saamne Rahul ghoda bech ke ekdam mast neend me soo raha tha....Wo Rahul ko sone dena chaahta tha lekin hostel ke rule anusar naashta ka time bhi khatam hone wala tha...Shaam ke 6:00 baje ke baad kisi ko dopahar ka naashta nahi diya jaata tha...Isiliye wo Rahul ko uthane laagta hai.

Ajay:- Rahul...Utth yaar aur kitna soyega...Jaldi se utth warna naashta ka time khatam ho jaayega.

Lekin Rahul nahi uthta hai....Ajay ke bahut koshish karne ke baad wo utth jaata hain.

Rahul:- Kya hua bhai...Sone de na...Kyun pareshaan kar raha hai...Subah ka badla le raha hai kya?

Ajay:- Nahi yaar koi badla nahi le raha hu...Tere bhalayi ke liye hi tujhe utha raha hu...Jaa jaldi se naashta karke aaja...Time khatam hone wala hai.

Rahul ko bhi bahut bhukh laga tha...College ke canteen me bhi aaj usne khaya nahi tha...Bas college se aake hostel me lunch kiya tha...Isliye wo jaldi se ghadi ki taraf dekhta hai...Ghadi 5:45 ka time show kar raha tha...Wo chup chap kitchen ki taraf nikal jaata hai...Waha se naashta karne ke baad wo apne room me aa jaata hai aur chup chap apne bed par baith jaata hai...Shaayad kuch soch raha tha.

Ajay ko aaj Rahul ka harkat bahut ajeeb sa lag raha tha...Kuch der tak sochta hai ki kya hua hoga...Lekin soch nahi paata hai...Aur Rahul se puchh leta hai.

Ajay:- Kya hua yaar...Kyu aisa khamosh baitha hai...College me kuch hua kya?

College ki baat sun kar Rahul ko phir se Priya ki yaad aane laagta hai...Aur wo Ajay se kehta hai.

Rahul:- Ajay...Dekh bhai tujhse jhuth nahi bolunga...Aaj Priya se mila tha college me pehli baar...Usse baat karne ke baad kuch soch bhi nahi paa raha hu ki kya karu ya kya nahi karu...I am totally confused...Bas baar baar uska chehra aur usse kiya hua baat yaad aa raha hai.

Ajay:- Matlab tujhe pyaar ho gaya hai bhai...Wo bhi Love at first sight.

Rahul:- Chup kamine...I dont believe in Love at first sight...Bas aaj usse kiya hua baat yaad aa raha hai.

Ajay:- Accha...To fir bataa ki kya baat kiya tune uske saath...Wo bhi pehli mulakaat me.

Rahul:- Are yaar maine usse koi baat nahi kiya...Usne mujhse baat kiya...Fir Rahul saari baat Ajay se share karta hai.

Ajay:- Ek baat bata tu itna ghabra kyu raha tha uske saath baat karne me...Tune to khud apni izzat mitti me mila diya...Ek ladka ho kar ghabra kar baat kar raha tha...Pata nahi wo ladki bhi kya soch rahi hogi tere baare me?

Rahul:- Wohi to yaar khud pe bahut gussa aa raha hai...Majaak ban gaya yaar uske saamne...Ab agar fir se kisi bhi ladki se baat karni pade to bilkul confidentally baat karunga.....Shaayad aaj pehli baar kisi ladki ke saath aise baat karne ke kaaran ghabra gaya tha.

Ajay:- Kya tune aaj se pehle kisi bhi ladki se baat nahi ki thi?

Rahul:- Kiya to tha...But kaam ke baat kiya tha naa ki time pass wala...Bas ek baat samajh me nahi aaya ki wo Ladki kyu mujhse itna frankly baat karna chahti thi.

Ajay:- Bahut se reason ho sakta hai...Wo ladki bhi tujhse pyaar karti hogi yaa fir bas dost ki haisiyat se baat ki hogi yaa fir wo bhi akele baithe bore ho rahi hogi aur jab tujh jaisa bakra mil gaya to baat ki hogi yaa fir wo ladki characterless hogi.

Jab Ajay ne characterless kaha to Rahul ko gussa aagaya phir bhi control karke usne kaha.

Rahul:- Pyar ki baat nahi ho sakta...Kyuki koi ladki mujhse pyaar kyu karegi? Naa jyada handsome hu...Naa hi accha khaasa body hai...Middle class family ka huu aur wo ladki bhi bahut sundar thi...Aakhir kyu wo mujhe pyaar karegi?

Ajay:- Dekh bhai...Pyaar rup rang se nahi hota hai...Pyaar dil se ki jaati hai...Usne tere achhe dil ko dekh kar pyar kiya hogaa...Tera behavior bahut hi achha hai Rahul...Tu ek gentleman hai...Kabhi kisi bhi ladki ko buri najaar se nahi dekhta...Kabhi kisi ka bura nahi chahta...Nasha bhi nahi karta...Sab ke saath achhe se behave karta hai...Padhayi me bhi accha hai.

Rahul:- Sab kuch aacha hai lekin mera gussa accha nahi hai...Jab bhi gussa aata hai apne aap par control nahi kar paata hu...Gussa mujhe ek jaanwar baana deta hai...Jab sehan shakti se gussa upaar chaala jaata hai to bahut hi ghatiya aadmi ban jaata hu......Ek baat bata tune uss ladki ko characterless kyun bola? Hame kisi ko bhi uska character jaane bina usske character par ungli uthane ka adhikaar nahi hai.

Ajay:- Bhai maine use kab characterless kaha...Main to sirf wo ladki aisa ho sakti hai ye bola tha...Aur tu bata ki kyun tu uss ladki ke baare me aisa sun nahi sakta hai...Mujhe lagta hai tujhe usse pyaar ho gaya hai.

Ajay ki baat se Rahul bhi soch me padd jaata hai...Kyun wo Priya ke baare me hi hamesha sochne laaga hai? Kyun usske baare me kucch bura nahi sunn sakta...Kya sacch me wo Priya se pyaar karne laga hai.

Rahul:- Bhai abhi kuch kehne ki haalat me nahi hu...Mujhe bhi nahi pata ki main usse pyar karta hu ki nahi...Thoda sa time deta hu khud ko tab jaake pata chalega ki ye pyar hai ya sirf aakarshan yaa fir kuchh bhi nahi...Abb Priya ke saath baat karne par hi aage ka baat ka pata chalega.

Ajay:- Ok bhai...Pyaar ki maamle me koi jaldbaazi nahi karna chahiye...Nahi to baad me pacchtana bhi padd sakta hai.

Rahul:- Chhal chhod ye baatein....Ab kuch padhte hain...Bahut din se book ko haath bhi nahi lagaya hai.

Ajay bhi kuch nahi kehta hai...Aur wo dono thodi der padhne laagte hai...Raat ke 8:00 baje wo dono kitchen se dinner karke aate hai aur phir dono kuch der padhne ke baad dono bed me lait jaate hai sone ke liye....Rahul ko to bas college jaa ke Priya se baat karne ki jaldi thi...Lekin ye baat usse pareshaan bhi kar raha tha ki kal Priya uss jagah par milegi ya nahi...Yahi soch me kab usse neend aa jati hai ye usse bhi pata nahi chalta hai.

 

[Champ_AK_81]

UPDATE 8​

Rahul fir se subah ka 6:00 baje uth gaya...Sabse pehle wo washroom se fresh ho kar aaya aur uske baad usne Ajay ko bhi uthaya...Ajay bhi jaldi se utth kar washroom se fresh ho kar aa gaya...Fir dono dost niche kitchen me chhai peene chale gaye...Chhai peene ke baad wo dono apne room me jaakar baat karne laage.

Ajay:- Bhai aaj to tu har kaam jaldi jaldi kar raha hai...Chhai bhi jaldi me pi liya tune aur jaldi se room me bhi aa gaya...Aur jaldi se ready ho raha hai college jaane ke liye...Kya baat hai?

Rahul:- Are nahi aisi koi baat nahi...Hamesha college time se just 5 minute pehle pahuchhta hu...Isiliye college me jo bhi log jaante hai wo sab college late aane wala student aur absent jyada rehne wala student ke roop me jaante hai mujhe...Isiliye aaj se college 15 minutes pehle jaaya karunga.

Ajay:- Tu kya mujhe bewkuf samajhta hai?Jitna main tujhe jaanta hu tujhe koi fark nahi padta ki log tere baare me kya kehte hai aur kya sochte hai...Tujhe to bas apne kaam se matlab hain...Tere jaldi college jaane ke pichhe koi aur vajah hai.

Rahul bhi kuch nahi bolta hai aur Ajay kuchh der sochne ke baad halki si muskuraahat ke saath bolta hai.

Ajay:- Kahin tere college jaldi jaane ke vajah Priya to nahi hai.

Rahul:- (Shocked hote hue) Tujhe kaise pata chala?

Ajay:- Bas guess kiya tha...Lekin tere aise react karne se confirm ho gaya ki yahi vajah hai.

Rahul kuch nahi bolta hai....Bas chup chap ready ho raha tha college jaane ke liye.

Ajay:- Bhai...Tu bahut badal gaya hai...Bachpann me main jis Rahul ko jaanta tha wo Rahul abb bahut badal gaya hai...Jo Rahul pehle ladkiyo se nafrat karta tha aur unn se baat bhi nahi karta tha...Ab wo Rahul to ek deewana ban gaya hai...Ek ladki se mile hue 1 din bhi nahi hua...Uske picche pura deewana ban gaya hai.

Rahul:- Tu apna bakwas band kar...Haa maanta hu ki bachhpann me main akela rehta tha aur ladkiyon se bilkul bhi baat nahi karta tha lekin abb time badal chuka hai...Aur hame bhi time ke saath aage badhna chahiye...Tab ki mere soch aur aab ki mere soch me bahut difference hai....Aur vakt ke saath insaan ki "mentality" bhi change hota hai.

Abb Rahul ready ho chuka tha...Aur college jaane ke liye bas nikalne hi wala tha ki.

Ajay:- Are yaar thodi der baith naa...Itna bhi kya jaldi hai.

Rahul:- Bhai tere saath baat kate hue 5 minute bit gaya...Socha tha uske saath 15 minutes baith ke baat karunga lekin abb 10 minutes hi bachhe hai....Ab tu chup chap se baith main nikalta hun...(Rahul ne puri baat bahut hi jaldi me keh diya)

Ajay:- Kamine tu to pyaar me pura andha ho gaya hai...Tune mujhe pehle hi bataya tha ki tere college me science ka class 7:00 baje se start hoti hai aur commerce ki 7:30 se....To kya Priya tere liye 45 minutes pehle aa jaayegi.

Rahul:- Ha yaar...Ye baat to mai bhul hi gaya tha...Par kya wo mere liye jaldi nahi aa sakti hai college?

Ajay:- Yaar tu bewkoof jaisi baat mat kar...Tujhe kya lagta hai ki koi ladki agar kisi se kuch der ke liye haas ke baat karegi to wo pyar hai...Bhai tu bhi sure nahi hai ki wo tujhse pyaar karti hai ya nahi...Pyaar ke maamle me jaldbaazi mat kar...Ab jab bhi tu usse milega usse aaram se baat karna...Aur ye baat notice karna ki wo tere baare me kya sochti hai...Bilkul bhi jaldbaazi mat karna...Nahi to kahi tera pyaar ek tarfa hi reh jaayega.

Rahul:- Maine kab kaha ki main usse pyaar karta hu...Mujhe to khud nahi pata ki ye pyaar hai ya attraction...Kuch din uske saath rehne ke baad hi decide kar paaunga...Bhai ab jaa raha hu college...Ab phir se disturb mat karna.

Ab Rahul bhi apne college ke liye nikal jaata hai...Class me pahunchne ke baad bhi wo bahut bechain tha...Usse to bas Priya se baat karne ka man kar raha tha...Lectures me bhi dhyaan nahi de raha tha...Jaise taise karke time spend kar raha tha aur Lunch ka wait kar raha tha...Jab Lunch time ho gaya to wo canteen ki jagah college ke park me chala jaata hai...Jaha par usne kal Priya se baat kiya tha.

Wo bas Priya ka wait kar raha tha...Lekin 15 minutes beet chuka tha aur ab bas 15 minutes baaki tha lunch time khatam hone me phir bhi Priya waha nahi aayi thi...Rahul ko bahut hi gussa aa raha tha aur nirash bhi ho gaya tha...Phir kuch der me Priya bhi park me aa gayi...Wo chupchap ek kone me baith gayi...Ye dekh ke Rahul ko aur bhi jyada gussa aa gaya aur wo hi Priya ke paas chala gaya...Priya ke paas pahunch kar.

Rahul:- Hi Priya...Kaisi ho????(Usne apne gusse ko bahut hi mushkil se control kiya tha)

Priya:- Hi Rahul...Kya baat hai...Kal to tum mujhse bhaag rahe the ...Aaj khud hi mujhse baat karne aa gaye.

Rahul ab soch raha tha ki kya jawaab du...Kuch der sochne ke baad.

Rahul:- Aisi koi baat nahi hai...Main yahi park me baitha hua tha...Jab tumhe dekha to aa gaya tumhaare paas tumhaari haalchaal pucchne.

Priya:- Tum kuch bhi bolne se pehle itna sochte kyun ho? Koi bahana dhundh rahe ho kya?

Rahul ab apna saara gussa bhul kar koi bahana dhundh raha tha...Jaise taise karke usne phir se ek bahana dhundh liya.

Rahul:- Nahi Priya...Actually baat ye hai ki aaj mera mood off hai...Aaj class me physics ke lecture me teacher ne mujhe bahut kuch keh diya homework nahi karne par...Isiliye abhi bhi wahi baatein yaad aa raha hai...(Rahul bahut hi achhe se jhuth bol raha tha aur Priya uski haalat pe muskura rahi thi)

Priya:- To galti to tumhara hi hai naa...Apni galti maane ki jagah tum teacher ki hi buraayi kar rahe ho.

Rahul:- Galti to mera hi thi lekin wo teacher ne bhi aaj over react kiya tha uss maamle me.

Priya:- Chalo chhodo ye sab baatein...Bekaar me apne mood kyu kharab kar rahe ho.

Priya ne bas itna hi kaha tha ki Lunch time khatam hone ka bell bajta hai.

Priya:- Rahul chalo ab class ki taraf...Lunch time khatm ho gaya hai...Kal phir milte hain yahi par.

Rahul ko to khud pe bahut gussa aa raha tha...Bas 15 minutes ka time mila tha baat karne ke liye...Socha tha ki acche achhe baate karega...Lekin usne apne bakwaas baat se pura time waste kar diya...Lekin iss baat ki khushi bhi tha ki Priya ne kal usse issi jagah par milne ki baat kahi hai.

Wo apne man me bahut kuch sochte hue apna class me jaata hai aur chup chap baaki ke Lecture attend karta hai...Lectures khattam hone ke baad wo apne Hostel chala jaata hai aur Hostel pahunchte hi apna Lunch karta hai...Usne kal raat se kuch nahi khaya tha issliye aaj bahut hi jyaada khaana kha liya...Aur chup chaap apne room ki taraf jaane lagta hai...Jab wo siddhi se upar chadhh raha tha to phir se Vijay mil jaata hai...Vijay uski taraf ek jehreli muskaan de raha tha...Lekin Rahul uss ko ignore karta hua apna room me chala jaata hai...Pata nahi uska Vijay ko ignore karna uske liye kya kya musibat laane wali hai.

Wo apne kamre me jaake bas pichhle 2 din ke baare me soch raha tha.....Kaise wo 2 din se Canteen ka khana miss kar raha hai...College me Lectures ki taraf dhyaan nahi de paata hai...Hostel me aake padhne ka man nahi karta hai aur bas Priya se baatein karne ka man karta hai...Wo yahi sab baatein sochte hue Ajay ka wait kar raha tha.

 

[Champ_AK_81]

Friends aaj 2 updates post kiya hai...Padh kar apna pratikriya jarur dijiye.

 

[Champ_AK_81]

Index 1


PROLOGUE

Update 1
Update 2
Update 3
Update 4
Update 5
Update 6
Update 7
Update 8



​

Index Updated.

 

[kamdev99008]

Rahul nahi samajh pa raha lekin priya samajh rahi hai....
Ki rahul usse milne aur bat karne ke bahane talash kar raha hai