Romance Ek Bhool(Completed)

[Champ_AK_81]

UPDATE 75​

Sameer ki baat ne anjaane me hi sahi fir se Priya ko Karan ki yaad dilaa diya.

Priya Karan ko jitna bhulne ki koshish kar rahi thi utna hi wo kisi na kisi vajah se yaad aa hi jaata tha...Pehla pyar ko bhulaane ki koshish ek baar fir nakaam ho gaya.

Karan ki yaad aate hi Priya ko fir se ek dard mehsoos hua...Thik waisa hi dard jo har ek insaan mehsoos karta hai apna pehla pyar tutne par.

Priya to Sameer ki taklif kam karne ke liye aayi thi lekin ulta Sameer ne hi anjaane me Priya ko uski adhuri pyar yaad dila kar ek dard diya.

Lekin Priya ne Sameer ko apna dard na dikhaate hue chhidh kar jawaab diya.

Priya:- Mujhe nahi pata aise pyar ke baare me...Maine kabhi kisi ke liye bura nahi chaaha...Maine to Karan se saccha pyar kiya tha...Mera pyar kabhi khudgarz aur laalchi nahi tha.

Priya ne chhidhte hue jawaab diya aur apna najar dusri taraf ghuma liya.

Sameer:- Maine kab kaha tumhaara pyar me khudgarzi aur laalach tha...Maine bas ye sawaal puccha tha ki pehli nazar ka pyar me bhi khudgarz aur laalach hota hai kya? Chalo chhodo ye baatein...Tumhe bhi iss baare me kuch pata nahi.

Sameer ki iss baat par Priya ne koi jawaab nahi diya...Wo dusri taraf hi dekhti rahi.

Kuch der idhar udhar dekhne ke baad usne Sameer se puccha.

Priya:- Lekin ye sab tum mujhse kyu keh rahe ho aur kyu puch rahe ho? Tum bhi kisi se pyar kar lo aur khud jaan jaaoge.

Priya ki aawaj me abhi bhi thoda frustration tha...Abhi bhi Priya ko Sameer par gussa aa raha tha Karan koi baat karne ki vajah se.

Sameer:- Niche room ki taraf jaa hi raha tha ki office wali baat yaad aa gaya...Issi liye puch liya tumse aur jaana chaahta tha ki tum iss baare me kya sochti ho.

Priya:- To tum aise hi tumhaari har personal baatein mere saath karke mera dimaag kharaab karoge.

Priya ki gussa Sameer ki baato se aur badh raha tha.

Sameer:- Sorry...Pata nahi tha tumhe meri baat itna bura lagega...Maine just friendly tumse ye baat puch liya tha.

Sameer ki baat sun kar Priya chaunk gayi...Kuch pal Sameer ko dekh kar usne kaha.

Priya:- Friend...Tumhara dimaag kharaab ho gaya hai kya? Hum kab friend bane? Jo tum mujhse friendly baat kar rahe ho?

Priya ko pehle se Sameer par gussa aa raha tha...Upar se Sameer ki baatein uska gussa aur badha raha tha.

Sameer ko bhi Priya ki aisi unchi (tej) aawaj me baat karne se gussa aane laga tha...Lekin wo kisi tarah apne upar control kar raha tha.

Sameer:- Mai soch raha tha ki jab tak tum yaha rehti ho tab tak tum se acche se behave karu...Matlab friendly tarike se...Uske baad to hum kabhi ek dusre ko dekhenge bhi nahi.

To fir kya faaidaa aur ladne se...Ye baat mai jaan gaya hu ki tumhari koi galti nahi hai...Suruwaat me bhi jo galatfehmi tha tumhaare liye wo Karan ki vajah se tha...Jo mai samajh nahi paaya.

Abb wo saari galtiya sudhaarna chaahta hu...Issliye soch raha hu jab tak tum yaha rehti ho tab tak tum tum thoda accha feel karo.

Aaj office me bhi issi baare me soch raha tha...Bahut sochne ke baad pata chala ki ham dono ki bich itni saari problem aur dushmani kyu hua...Ye sab ki vajah ek misunderstanding tha jisne baad me dushmani ka roop le liya.

(Kuch der chup rehne ke baad)

Mere khayal me hame ye dushmani khatam kar dena chaahiye...Ye dushmani kisi baat ka samadhaan (solution) nahi hai...Jab rak hamaare bich ye dushmani rahega tab tak hamaare dil aur dimaag me ek bojh sa rahega...Bas ek dusre ki galti hi dikhega...Kabhi ham ek dusre ki acchaayi nahi jaan paayenge...Hamaare bich jo bhi galatfehmiyan hai wo sab hamaare dushmani ki vajah se.

Ham kabhi ek dusre ke dost nahi the...Ek chhoti si ladaai wo bhi pehli hi mulaakat me hua tha jis vajah se ham dono ne ek dusre ko galat samajh liya aur hamaare bich ki dushmani bhi badhta chala gaya...Uss time dushmani me mai andha ho gaya tha aur tumhari baare me galat sochta tha...Jab ki tum bilkul bhi galat nahi thi...Kabhi apna gussa aur nafrat ki vajah se to kabhi Karan ki vajah se tumhe galat soch baitha.

Aur thik waisa hi tumne mere baare me...Jitna tum sochti thi mai utna bura nahi tha...Lekin humaara dushmani iss tarah se badh gaya ki mai ye bhool kar baitha.

Ek baar tum ye dushmani bhool kar to dekho...Mere baare me jo galatfehmi hai tumhaare wo sab dur ho jaayenge.


Sameer ne Priya ko samjhaane ki koshish kiya lekin wo iss baat se anjaan tha ki Priya iss baat ka kuch aur hi matlab nikaal legi.


Priya:- Abb tum mujhe sikaaoge mujhe kya karna chaahiye aur kya nahi...Tum chaahte ho ki mai tumhe maaf kar du? Tum khud hi bataao tumne maafi laayak kaam kiya hai kya?

Mere jindagi ka iss tarah se majaak udaane ke baad keh rahe ho ki mai ye sab bhool jaau aur tumhe maaf karke tumhaara dost ban jaau...Wo sab baatein bhool jaau jab tum sabke saamne mujhe beizzat karte the...Tumhe abhi bhi apni galti ka ehsaas nahi hua hai issi liye mujhse ye sab baat kar rahe ho...Agar tum apni galti maante tab aisi baat mujhse nahi karte.

Abb tumhe kuch pal sochne ke baad apni galti ka ehsaas hua aur kehte ho ki ye sab misunderstanding ki vajah se hua...Tab tumne ye baat kyu nahi socha...Agar tab tumhaare paas ye sab baat sochne ka fursat hota to shaayad ye galti tumse nahi hota.

Nahi hu Sameer mai utni mahaan...Jo tumhe maaf kar paau...Tumhari iss galti ko mai kabhi maaf nahi kar paaungi.

Aur tum apna comparison Karan se bilkul mat karna...Tum se laakh guna accha hai Karan...Kam se kam tumhaara jaisa galti to nahi kiya.

Aur tumhe meri fikar karne ki koi jarurat nahi hai...Tum sochte ho ki mai akeli bore ho jaaungi to mujhe tumse dosti kar leni chaahiye...Taaki mera time acche se kat sake.

Nahi Sameer...Mujhe tumse koi bhi rishta nahi rakhna...Naa hi dosti ka aur naa hi dushmani ka...Tum inn me se kuch bhi deserve nahi karte...Mai to bas itna chaahti hu ki kisi tarah ye divorce tak ka vakt acche se kat jaaye aur uske baad mai free ho jaaungi...Uske baad mujhe tumse koi matlab nahi.


Priya ne bhi gusse me Sameer ko bahut suna diya...Sameer pehle se hi apna gussa control kar raha tha...Lekin Priya ki iss baat par wo khud par kaabu nahi rakh saka...Usse pata chal gaya ki wo gusse me kuch bhi kar sakta hai...Iss liye Priya se dur chale jaane me hi usne apna bhalaayi samjha.

Wo teji se chhat ki dusri kona ki taraf chala gaya...Aur waha par khada ho kar gussa bhari nighaawo se jameen ki taraf dekhne laga...Priya bhi Sameer ka ye gussa wala roop dekh kar kuch samajh nahi paa rahi thi.

Shaadi ke baad pehli baar Sameer ko Priya par gussa aaya tha...Sameer shaayad Priya ki sabhi baatein seh leta lekin usko Priya ki uska Karan se compare karne waali baat bilkul bhi pasand nahi aaya...Priya ne Sameer ko Karan se bhi galat insaan keh diya tha jo Sameer se bardaast nahi hua.

Gusse me usne do jordaar punch diwaal (wall) par maara...Fir bhi uska gussa kam nahi hua...Wo abb sidha Priya ki taraf gusse me aaya...Usne soch liya abb bahut hua ek baar Priya se baat karke Priya ka galti bhi dikhana hoga.

Priya pehle se hi Sameer ka ye roop dekh kar hairaan thi aur abb Sameer ka aise gusse se uski taraf aane ki vajah se aur hairaan ho gayi...Lekin wo bilkul bhi dari hui nahi thi.

Kuch pal me Sameer uske paas aaya aur thoda tej aawaj me bolne laga.

 

[Champ_AK_81]

UPDATE 76​

Sameer:- Maanta hu maine galti kiya hai...Uss galti se tumhaari life me bahut bada tufaan aa gaya...Mai tumhaara gunehgaar hu...Issi liye tum jo kehti ho bina kuch jawaab diye sunn leta hu...Kabhi kabhi koi baat dil par chubh jaata hai lekin fir bhi kuch nahi bolta...Lekin iska matlab ye nahi ki tum kuch bhi bolo...Mera comparison uss ghatiya Karan se kar rahi ho...Aur mujhe usse bhi bura keh rahi ho.

Sameer ki har ek shabd me gussa bhara hua tha...Pata nahi kaha se aa gaya tha uske andar ye gussa jo aaj wo Priya par hi utaar raha tha...Shaayad Priya ka Sameer ko Karan ke saath compare karne ki vajah se Sameer ke self respect ko bahut gehra chot lag gaya tha.

Priya bas Sameer ko dekh rahi thi...Usne kuch jawaab nahi diya...Agar insaan jyada gussa me ho to kabhi kabhi uske dil me daba hua baat bhi nikal jaata hai.

Priya ko pata tha ki Sameer abhi bahut gusse me hai...Agar Sameer gussa me kuch bolega to uska dil se bhadaas bhi nikal jaayega aur Priya ko pata bhi chalega ki Sameer uske baare me kya sochta hai...Priya ye jaana chaahti thi ki Sameer kahi abhi bhi usse nafrat to nahi karta hai aur kahi accha banne ka naatak to nahi kar raha hai.

Issi liye Priya ne Sameer ko bolne diya.

Sameer:- Tum kehti ho na ki tum Karan se pyar karti ho...Waah bahut sacha pyar hai tumhaara...Sorry sorry saccha nahi andha pyar hai tumhaara...Jo abhi tak uss kutte se pyar karti ho aur abb bhi tumhe uska koi galti najar nahi aa raha hai.

Tum mujhe insensitive kehti ho na jisse pyar ka ehsas kabhi nahi hota hai...Aaj kal ke pyar ko dekh kar aisa ho gaya hu...Jiska ek udaharan (example) tumhaara aur Karan ka pyar hai.


Itna keh kar Sameer thodi der ke liye chup ho gaya...Sameer ki aawaj me pyar shabd ke liye kadwahat saaf mehsoos kiya jaa sakta tha.


Priya:- Bas bahut hua...Bahut bakwas kar liya tumne...Thoda bolne kya diya tum to bakwas karne lag gaye...Jaante hi kya ho tum pyar ke baare me...Kabhi kisi se pyar kiya hota tab tumhe pata chalta ki pyar ka matlab kya hai...Tumhe sirf badla lena aata hai Sameer pyar karna nahi aata.

Jab tumhe kisi se sache dil se pyar hoga na tab tumhe pyar ka arth samajh me aayega...Bina kuch jaane iss pabitra shabd ke baare me kuch mat kaho...Aur mere pyar ke baare me kuch na bolo to hi accha hai...


Priya aur bhi bahut kuch bolne wali thi lekin Sameer ki hansi ne usse bich me rok diya...Sameer ki hansi me bhi gussa bhara hua tha.


Sameer:- Ha ha ha...Bahut accha jokes maara tumne...Pyar karne se hi pata chalta hai pyar ka matlab kya hota hai...Tumhaara matlab hai ki insaan kisi se pyar karne se pehle pyar ke baare me kuch nahi jaanta...Pyar hone ke baad hi sab kuch pata chalta hi ki pyar kya hota hai...To fir mujhe ye bataao kisi ko pyar kaise hota hai jab usse pyar ke baare me pata hi nahi hai.

Itna keh kar Sameer ne ek najar Priya par daala...Abb hasna band karke usne firse kaha.

Sameer:- Insaan jab umar ke saath bada hone lagta hai tab usne bahut tarah ki feelings aane lagta hai...Unme se ek feeling pyar hai...Teenage se hi hame pata chalne lagta hai ki pyar kya hota hai...Dosto se, Movies se, Stories se aur aas paas ke maahaul se pata chal jaata hai ki pyar kya hota hai.

Yahi umar hota hai jab ham sochte hai ki ham sab bhi kisi se pyar kare kisi se aur wo bhi hamse pyar kare...Aur hamaari life ek dam mast ho jaaye.

Sabhi ka pyar ke baare me alag soch hota hai...Koi pyar ko vasna samajhta hai...To koi pyar ki puja karta hai aur jindagi bhar ap i pyar ki salamati ka dua maangta hai...Khud mar mitta hai lekin apne pyar ko thoda sa bhi taklif hone nahi deta hai.
Lekin aaj kal pyar ka matlab kahi kho sa gaya hai...Pyar ki pabitrata kam ho raha hai...Pyar ko pyar na maan kar ek majaak aur khel samajhne lage hai log...Aaj kal sabhi ke apne bf aur gf hote hai...Dekha hai maine mere dosto ko dusre dost se puchte hue "Bhai kitne gf hai tere." Aur dusre ka jawaab aata hai "Abhi tak to 5 hi hai...2 ladki aur dekh chuka hu jald hi wo bhi pat jaayegi."

Kya issi ko pyar kehte hai? Ye pyar kam vasna jyada hai...Aur iss tarah ke pyar karne walo ki sankhya(number) badhta jaa raha hai...Aaj kal har ladka ya ladki jo teenage ya usse thoda jyada ho jaate hai unka bf/gf ban hi jaate hai...Agar nahi bane to baaki ke log uss par shak karne lagte hai ki kahi isme koi kami to nahi hai.

Ye hua vaasna waala pyar.

Abb dusri tarah ka pyar ke baare me batata hu...Attraction.

Maanta hu attraction pyar ka suruwaat bhi hai...Agar attraction se suruwaat ho aur pyar par jaakar khatam ho to wo pyar mahan hai...Lekin aaj kal koi ladka kisi khubsurat ladki ko dekhta hai ya fir koi ladki handsome ladka ko dekhte hai to wo dono attract ho jaate hai...Unhe lagta hai wo ek dusre se pyar kar rahe hai aur unhe "love at first sight" hua hai...Ha hota hai kabhi kabhi love at first sight bhi sacha pyar hota hai.

Sacha pyar me attraction bhi jaruri hai...Agar ek dusre par attract nahi hote hai pyar karne waale jodi to uss pyar ka matlab hi nahi hai...Pyar me attraction hota hai...Lekin sirf attraction ko pyar maana bahut badi bhool hai...Aaj jo break up fashion ban gaya hai na ye sirf attraction ki vajah se hua hai...Jab bhi ladka ya ladki kisi dusre ki taraf jyada attract hote hai to break up ho jaata hai.

Kabhi kabhi to aisa bhi hota hai ki ladka aur ladki love marriage bhi kar lete hai...Lekin jab baat aata hai jindagi bhar saath bitaane ka tab kuch pal me hi ek dusre se bore ho jaate hai...Aur unka shaadi unka pyar wahi par barbaad ho jaata hai.


Maine kuch der pehle tumse pucha tha na "Kya pehli najar ka pyar bhi itna khudgarz hota hai ki apne pyar ki khaatir log dusro ki pyar tut jaaye aisa dua karte hai."...Maine tumse iss liye ye sawaal puccha tha ki mai ye jaana chaahta tha ki tum iss baare me kya sochti ho...mai jo soch raha hu iss baare me wo sahi hai ya galat...Lekin tumhe kuch pata nahi tha.

Mera maana hai ki ye pyar hi nahi hai...Sacha pyar me ham kabhi apne pyar ki buraai nahi sochte hai...Khud ko chaahe kitna bhi bura kyu na lage ham apne pyar karne waalon ke liye aisa bilkul bhi nahi sochte hai...Hame apna taklif ki jagah hamaare pyar ki khusi najar aata hai...Ye bhi bhul jaate hai ki hame hamaara pyar milega bhi ya nahi bas apne pyar ki chehre me khusi dekhna chaahte hai.

Anjali mujhse koi pyar nahi karti thi...Wo bas ek attraction tha...Jo shaayad 2 din tak bhi na tik paaye...Wo bhi aaj ke unn modern logo me se hai jo attraction ko pyar ka naam dete hai.

Unka soch ye hai ki pyar to insaan ko hota rehta hai...Ek ke saath toot gaya to dusre ke saath ho jaayega...Break up ke baad fir se naya pyar mil jaata hai...Aur issi tarah life aage badhta rehta hai.

Bahut kam hote hai jo aaj ki iss matlabi duniya me saccha pyar karte hai...Lekin unka pyar ka koi ehmiyat nahi hota hai...Dekha hai maine Mahesh ke pyar ko...Kitna toot kar usne saccha pyar kiya tha lekin uska pyar ko uss ladki ne majaak bana diya.

Pyar jitna aasan hota hai karna utna mushkil hota hai nibhaana...Agar kisi ka saccha pyar ke badle saccha pyar milta hai to shaayad uska kismat bahut accha hota hoga.

Aisa nahi hai ki saccha pyar aaj kal dekhne ko nahi milta hai...Saccha pyar bhi hota hai lekin bahut kam dekhne ko milta hai...Aaj kal pyar ka jo matlab hota hai shaayad uski vajah se sacche pyar bhi dab gaya hai thoda sa...Lekin kuch log exceptional bhi hote hai jo sacche pyar me vishwas karte hai aaj bhi.

Itna keh kar Sameer thodi der ke liye chup ho gaya...Wo fir se kuch bolne waala tha ki Priya ki hairaani se bhari hui aawaj uske kaaano me pahuncha.

Priya:- Lekin ye sab tum mujhe kyu bata rahe ho.

Sameer:- Iss liye kyuki tumne mujhe kaha tha mujhe pyar ke baare me kuch nahi pata hai...Iss liye kyuki abhi bhi tum uss fraud Karan ko mujhse accha keh rahi ho.

Maine tumse bas tumhaara raay jaana chaaha tha Anjali ke pyar ke baare me lekin tumse baat karne ke baad pata chala ki tumhe pyar ke baare me bahut si baatein pata nahi hai wohi bataa raha hu.

Sabse pehle to tum ye jaan lo ki tum Karan se utna bhi pyar nahi karti ho jitna tumhe lagta hai...Tumhe bhi Karan se attraction hi hua hai...Ye alag baat hai ki tumne kabhi Karan ka bura nahi chaaha yaa fir kabhi dhokha dene ka nahi socha...Lekin tumhe Karan se utna bhi saccha pyar nahi hua hai jitna tumhe lagta hai.

Wo fraud bhi kisi ka pyar deserve nahi karta hai...Aur aisi pyar kabhi sacha nahi hota hai jiska suruwaat hi dhokha se hua hai.

Itna kehkar Sameer chup ho gaya aur Priya ko dekhne laga.

Priya:- Ye kya bakwas kar rahe ho tum.

Priya ki aawaj me gussa aur hairaani dono tha...Wo kuch aur bolti Sameer ne usko chup kara kar bola...Abb Sameer ka gussa bhi dhire dhire kam ho raha tha.

Sameer:- Tumne hi kaha tha Karan ne mera ghadi churaya tha aur uske baad tumhe usse pyar hua ye soch kar hi usne tumhaara jaan bachaya.

Mai tumhe yakin shaayad nahi dilaa paaunga ki tumhaara pyar sacha nahi hai aur ye bas attraction hai kyuki tum meri koi bhi baat nahi maanogi...Bas kuch din intejaar karo tum Karan ko puri tarah se bhool jaaogi.

Mai aisa iss liye keh raha hu kyu ki maine tum me aisa koi dard nahi dekha hai jo pehla pyar tutne par hota hai...Ha kabhi kabhi bahut dard hota hoga tumhe bhi Karan ka dhokha ki vajah se lekin agle hi pal tum sambhal bhi jaati hogi...Lekin sacha pyar tutne par aisa nahi hota hai...Insaan ko jo dard hota hai wo itni jaldi khatam nahi hota hai.

Karan ki naatak se tum uski tarad attract hone lagi thi...Aur shaayad pyar bhi karne lagi thi...Lekin koi bhi pyar achanak se itna saccha nahi hota...Kuch vakt chaahiye hota hai kisi bhi pyar me vishwas aur yakin aane me...Uake baad hi pyar sacha hai ya attraction hai ye baat pata chalta hai...Tumhaara pyar suru hone ke kuch der baad me hi toot gaya...Mai nahi maanta ye pyar sacha tha aur Karan jitna bhi naatak karle tumhe apna pyar jataane ka wo kabhi jata nahi paayega jaise koi sacha aashiq apne premika se jataata hai.

Mai nahi jaanta ki tum dono ka pyar kaisa tha...Tum khud hi ek baar iss baare me thande dimaag se socho aur khud pata karo kaisa pyar tha tum dono ka.

Itna kehne ke baad Sameer ne fir Priya ko dekha...Priya ne kuch jawaab nahi diya.

Sameer:- Ha sach hai maine kisi se pyar nahi kiya hai lekin iska matlab ye nahi ki mujhe pyar ke baare me kuch nahi pata hai.

Bahut kuch janta hu pyar ke baare me...Lekin karne se darta hu kyuki mujhe bhi dar lagta hai ki kabhi pyar me mujhe dhokha na mile...Yaa fir ye keh lo ki kabhi mujhe meri type ki ladki nahi mili...Jisse dekhte hi lage ki mai iske saath pyar se aage ki jindagi kaat lunga...Kabhi aisa nahi laga ki uss ladki ke bina meri jindagi adhuri hai.

Shruti meri bahut acchi dost hai...Lekin usse kabhi pyar nahi hua...Har baar ye jaroori bhi to nahi hota hai ki jo hamse pyar karta hai ham bhi usse pyar kare...Shruti ki bahut si aadat hai jo mujhe pasand nahi hai...Shaayad iss vajah se mujhe usse pyar nahi hua hai...Kabhi mukhe ye mehsoos nahi hua hai ki mai usse pyar karta hu.

Dekhna tum agar mai kisi se pyar karunga to kitna toot kar karunga...Bas ek ladki mil jaaye jisko dekh mujhe ehsas ho jaaye ki mai isse pyar karta hu...Agar ye vishwaas ho jaaye ki wo ladki mujhe kabhi dhokha nahi degi aur jindagi bhar mujhe pyar karegi to jindagi bhar uska saath nahi chhodunga...Aisa pyar karunga ki usko bhi pata chal jaayega sacha pyar kya hota hai...Pyar karna kisse kehte hai.

Sameer ne ye baat apne dil ki gehraayi se kaha tha...Lekin agle hi pal ek niraash aawaj me usne kaha.

Sameer:- Nahi nahi kisi ladki se nahi...Shruti se...Abb mai kisi ladki ke baare me soch bhi nahi sakta...Agar jindagi me mujhe Shruti se pyar ho gaya tab usse bhi ehsas ho jaayega ki sacha pyar kya hota hai.

Isse aage Sameer se isa topic ke baare ne kuch nahi bola gaya...jald hi usne topic badal kar kaha.

Sameer:- Priya shaayad aaj tak meri vajah se tumhaare saath galat hi hua hai...Lekin abhi kuch baatein bataane ja raha hu jisko sunne ke baad shaayad tumhe aage jaakar fir aisi mushibaton ka saamna karna na pade.

Tum Karan se pyar karne lagi thi...Aisa pyar jisme shaayad jarurat se jyada vishwaas tha...Aisa pyar kabhi mat karna kisi se bhi...Pyar me vishwaas jaruri hai lekin vishwaas itna bhi andhaa nahi hona chaahiye jo tumhe baad me taklif pahunchaaye.

Tumhe lagta tha ki shaayad Karan tumse sacha pyar karta tha...Lekin mai yakin ke saath keh raha hu ki wo sirf naatak kar raha tha...Usne tumse pyar ka naatak issliye kiya hoga kyuki wo tumhaare saath sirf time pass karna chaahta tha.

Shaadi to wo tumse kabhi karta hi nahi...Aur tumhaara aur mera shaadi se usko ek bahana mil gaya tumse break up ka...Agar wo tumhe sach me pyar karta to aaj tum mere saath nahi hoti...Mai bhi gadha hi hu jo uss par ek pal ke liye vishwaas karke tumse shaadi kar liya ye soch kar ki tumhaara yaha aane ke baad tum dono ka shaadi ho jaayega...Divya ko iss baare me pucha bhi tha lekin usko bhi nahi pata tha Karan iss tarah se tumhe dhokha dega.

Karan to mujhe pehle hi najar me fraud lagta tha...Tum se bhi pehle hi najar me nafrat ho gaya tha...Baad me socha ki tumhe Karan ke baare me bata kar saawdhan kardu lekin ye sochkar chup rehta tha ki tum meri baat nahi maanogi...Bahut baar tumhe hamaare paas aa kar dimaag kharab karne ke liye mana kiya tha...Lekin tum aur wo kabhi nahi maante the...To socha ye baat bhi tum nahi maanogi.

Life me tumhe Karan jaise bahut log milenge...Jo pyar ka Dikhaawa karke ladki ka istemaal karte hai aur bich raaste me chhod dete hai.

Pyar karna galat nahi hai lekin andha pyar karna galat hai jaise tumne Karan se kiya tha...Mai ek ladka hu aur ladko ki aadat bahut acche se jaanta hu...Koi bahut sharif bhi hote hai...Aur koi bahut ghatiya...Bahut se dost mere Karan ki tarah hi the...Jo sirf ladkiyo ka istemaal karke unka faaidaa uthaana jaante hai pyar karna nahi jaante hai.

Mai tumhe ye nahi keh raha hu ki kisi se pyar karne se pehle unpar shak karo...Agar shak galat saabit hua to pyar karo...Karan jaise log double standard hote hai...Do tarah ki baat karte hai aise log...Ek tumhaare saamne aur dusra tumhaara pith piche.

Kabhi na kabhi inki baato se shak ho hi jaayega ki ye kis tarah ka insaan hai...Kabhi kabhi inke aas paas ke logo se bhi puchna ye kaise log hai...Sab kuch pata chal jaayega inka charecter ke baare me.

Bas itna kahunga ki apne pyar par vishwas karo...Kyuki vishwas se hi pyar tika hua hota hai...Lekin vishwas hadd se bhi jyada nahi hona chaahiye ki saamne waalo ka bada sa bada galti bhi najar andaaz kardo...Jo baad me tumhe hi nukshaan pahuchaayega...Aur pacchtaane ke liye kuch baaki nahi rahega.

Mujhe pata hai tum shayad pyar ke baare me jyada nahi jaanti thi iss liye Karan ka ghatiya soch ke baare me nahi jaanti thi...Jaanta hu tumhaare pyar saaf tha...Lekin Karan ka ghatiya pyar ke baare me nahi jaanti thi...Issi ka shikaar ho gayi ho tum.

Itna kehne ke baad Sameer ne Priya ko dekha aur kaha.

Sameer:- Mujhe lagta hai shaayad tumhe meri baat samajh me aa gaya hoga.

Itna keh kar Sameer niche room me jaane laga.

Kuch kadam aage hi badhaya tha ki ussi jagah khada hokar piche mud kar shaant aawaj me kaha.

Sameer:- Maine shaayad kuch jyada hi gusse me tumse baat kar liya...Iske liye sorry...Gussa me pata nahi kyu lekin paagal hone lag gaya hu aajkal...Lekin kya karu mai ye bardaast nahi kar paaya ki tumne mujhe Karan se bhi ghatiya keh diya.

Maanta hu mai tumhaare liye galat hu...Lekin Karan jitna ghatiya nahi hu...Mujhe gussa aur nafrat ne galat banaya...Lekin kabhi kisi ko Karan ki tarah dhokha nahi diya hai aur naahi kabhi dunga...Sache pyar ki puja karta hu...Respect karta hu...Karan ki tarah nahi jo pyar ko majaak samjhe...Aur sabse badi baat mai anjaane me kisi ki buraai nahi chaahta...Hamesha se saaf dil insaan hu aur kabhi double standard behave nahi kiya hai.

Tumhaara mujhe insensitive aur Karan se ghatiya kehna pasand nahi aaya tha iss liye itna kuch bol diya...Pata nahi gusse me kya kya bol diya...Agar kuch bhi bura laga ho to "I am sorry".

Itna keh kar Sameer niche chala gaya.

Sameer ke jane ke baad Priya Sameer ki kahi ek ek baat sochne lagi...Usko Sameer ki sabhi baat sach laga bas ek baat ko chhod kar ki wo Karan se sacha pyar nahi karti...Usse abhi bhi lagta hai ki usne Karan ko sache dil se pyar kiya tha...Pehla pyar ka ehsas ya fir attraction hota hi aisa hai ki sabko yahi lagta hai ki uska pyar sacha tha...Priya ne iss baat ko aane wale vakt par chhod diya.

Aur wo bhi niche apne room ki taraf chali gayi.

Aaj Sameer ne gusse me hi sahi Priya ko apna feelings bata diya...Priya ko ye baat pata chal vaya ki Sameer pyar ke baare me kya sochta hai aur Sameer ka ek naya roop bhi dekh liya Priya ne jo abb tak wo usse anjaan thi.

 

[Champ_AK_81]

UPDATE 77​

Raat ke 11:00 pm baj raha tha.

Priya se baat karne ke baad Sameer apne room me chala gaya...Apne room me pahunchte hi Sameer bed par lait gaya...Aur aaj din se raat tak hua sabhi ghatna ke baare me sochne laga.

Sabse pehle usse Anjali aur uska pehli najar ka yaad aur uska proposal yaad aaya...Iss baare me Sameer ne jyada nahi socha kyuki usse pata tha ki ye pyar nahi attraction hai aur Sameer ko bhi Anjali par koi dilchaspi nahi tha.

Uske baad Sameer ko chhat me Priya se jo baat kiya tha uska yaad aaya.

Priya se hui baatein ko yaad karte hue Sameer ke chehre me hairaani ki lakeerein najar aane laga...Aur wo sochne laga...

Kitna galat sochta tha Priya ke baare me...Pehchaane me galti kar diya...Bahut acchi hai wo...Maine uske saath itna galat kar diya lekin usko mera pareshaani bhi dikh gaya...Mera ghutan aur paschaatap bhi dekh liya usne...Aur mere liye mere Papa ko bhi keh diya ki mere saath itni berukhi aur gusse se baat na karein.

Uski jagah koi aur hota to shaayad mujhe aur pareshaan karti...Mujhe apne hi najar me aur giraane ki koshish karti...Kabhi ek pal ke liye bhi chhain se jeene nahi deti...Har pal mujhe uske najaro ke saamne jhuk kar rehna padta.

Agar wo bhi ye sab karti hai to ye galat nahi hoga...Kyu ki kaam hi maine aisa kiya hai...Mai maafi bhi nahi maang sakta usse...Maaf karna ya nahi karna ye bhi uske hi haath me hai...Pata nahi kabhi wo mujhe mera iss bhool ke liye maafi milega ya nahi...Agar maaf kar bhi diya to kya ho jaayega uska wo vakt kabhi waapas nahi laa sakta mai...Uska jindagi ke saath maine khilwaad karke bilkul accha nahi kiya.

Koi hak nahi tha mujhe apna badla, gussa aur nafrat kisi par utaarne ka...Meri ek galti ki vajah se sabhi ki jindagi kitna buri tarah se prabhaawit ho gaya...Abb pacchtane se bhi kuch nahi hoga...Galti to ho gaya hai mujhse aur shaayad isse sudhaar bhi nahi sakta.

Nafrat ne bhi mujhe kitna galat aur nirdayi bana diya aur mai apna badla ke liye bina koi anjaam soche chal pada ek khatarnaak kadam uthaane...Sach me nafrat aur gussa hi insaan ka sabse bada dushman hai.

Insaan kisi se to bach kar bhaag sakta hai ya fir kisi ka bhi saamna kar sakta hai lekin khud se dur nahi bhaag sakta aur khud se ladna bhi bahut mushkil hota hai.

Ek baat to sikh liya hai maine...Jaldbaazi me kabhi koi kadam nahi uthaana chaahiye...Aur gussa aur nafrat kisi ka bhi saga nahi hota...Har parishthiti me kadam soch samajh kar rakhna chaahiye.

Kabhi kabhi to khud par hi gussa aata hai...Mai kisi ko bhi pehchaane me itna bada galti kaise kar sakta hu...Priya ko ek chhota sa jhagada ki vajah se galat man liya...Aur uske saath dushmani badhte chala gaya jiska natija aaj saamne hai.

Rajesh ne bhi bahut baar samjhaya tha Priya itna bhi buri ladki nahi hai jitna mai samajhta tha...Lekin kabhi uski baat ko seriously nahi liya aur upar se umar ka josh...Hamesha khud ko hi sahi maanta tha.

Upar se Shruti ka saath...Wo bhi mujhe Priya ki hi galti dikhaati thi...Uski baat sunne aur maane ki vajah se mera aur Priya ki bich ki dushmani badhta chala gaya...Abb Shruti ko bhi dosh nahi de sakta...Galti mera hai...Baat maane wala, sunne wala aur faisla karne wala bhi mai hi tha.

Sach hai ye baat aankho se dekha aur kaano se suna baat hamesha sach nahi hota hai...Apni najaro se Priya ki buraayi hi dekha lekin aaj pata chal raha hai kitna galat tha mai.

Kaash ye baat pehle samajh gaya hota mai...To aaj jo haalat hai wo nahi hote...Apni hi najaro me iss tarah girna nahi padta aur Priya ka gunehgaar bhi nahi banna padta.

Isme sabse bada galti uss fraud Karan ka hai...Priya ka uske saath hona bhi ek vajah tha mujhe Priya ko galat samajhne me...Karan ko Pehchaane me koi galti nahi kiya...Wo kutta galat tha aur hai...Jitna socha tha usse bhi bada kamina nikla wo.

Khair ye sab baatein soch kar koi faaidaa nahi...Abb aage kya karu wo sochna chaahiye...Kya karu mai Priya ke liye ki wo mujhe maaf kar de...Kuch to karna hi hoga...Yaha iss tarah ghut kar rehna bhi uske liye kitna mushkil ho raha hoga ye baat bhi mai acche se jaanta hu...Sab kuch meri vajah se hua hai aur mai kuch kar bhi nahi paa raha hu.

(Sameer kuch der issi baare me sochne laga.)

Kuch samajh me nahi aa raha hai...Aaj usko dosti ke liye bhi puch liya...Bewkoof hu mai jo ye soch liye ki wo mere saath dosti kar legi...Itna kuch karne ke baad wo mujhe dekhna tak pasand nahi karti hogi aur mai dosti ka soch raha hu...Nahi kuch aur hi sochna hoga.

(Kuch der aur sochne ke baad bhi usko kuch samajh me nahi aaya.)

Kuch samajh me nahi aa raha hai kya karu...Shaayadye faisla ko vakt par chhod dena chaahiye...Vakt aane par kuch na kuch to hoga hi...Abhi jaldbaazi me kahi kuch bigad na jaaye...Pehle hi ek Jaldbaazi kar chuka hua aur uska fal aaj bhugat raha hu.




Dusri taraf Priya bhi apne bed par laiti hui thi...Wo bhi apne soch me dubi hui thi...Usse bhi ek hi baat baar baar yaad aa raha tha.

Sameer ka ye kehne ki Priya Karan se pyar nahi karti thi...Ye sirf uska attraction tha...Yahi baat Priya ko bahut der se pareshaan kar raha tha...Aur wo bhi apne ateet ki yaado me chali gayi...Aur ek baar fir apna aur Karan ke prem kahani ke baare me sochne lagi.

Apne prem kahani ko yaad karte hi sabse pehle usse yaad aaya...Uska pyar ka suruwaat kaise hua tha...Ek dhokha aur chhal se...Karan ka apna jaan par khel kar usko bachaana hi pehli ghatna tha jis vajah se Priya Karan se impress hui thi aur uski taraf aakarshit hone lagi thi.

Aaj Priya ko pata tha ki ye sab jhut tha...Ye sab Sameer ne kiya tha aur Karan ne jhuth bol kar apna naam keh diya tha Priya ko...Ek jhuth aur dhokha se suru hua pyar kabhi apni manjil tak nahi pahunchta ye baat Priya ko bhi pata tha...Aaj pehli baar Priya ko Karan par nafrat aa raha tha...Usne uska dost hone ke baawjood usse dhokha dene ka koshish kiya tha.

Abb Priya ko Karan me jo bhi buraayi tha wo sab dikhne laga...Usse yaad aaya ki uska aur Karan ka dosti kaise hua tha...Sameer se hui fight ki vajah se.

Dono me dosti iss liye hua tha kyuki dono ke ek maatra dushman Sameer tha...Kehte hai naa dushman ka dushman dost hota tha...Jab Karan aur Priya ka dosti hua tha...Unn dono me baat bhi issi baare me hota tha ki Sameer se badla kaise lenge...Kaise Sameer se apne badla lenge aur kaise Sameer ko haara hua dekhenge.

Lekin unka koi plan kaam ka saabit nahi hua aur ulta unn par hi bhaari pad gaya...Aur wo bhi haar maane walo me se nahi tha...Bas planning ki vajah se hi dono ke bich ki dosti badhta chala gaya...Lekin Priya ko Karan se pyar tab tak nahi hua jab tak Sameer ne usko khaayi me niche girne se nahi bachaya.

Priya ko bhi abb lagne laga ki usko Karan ke liye koi feeling nahi tha pehle aur achanak hi usko pyar ho gaya Karan se...Abb usse samajh me aaya ki ye pyar nahi aakarshan tha uss vakt...Kya koi kisi ka jaan bacha leta hai to usse pyar ho jaata hai...Agar aisa hota to jo bhi uski jaan bachata unn sabse Priya ko pyar ho jaata...Abb Priya ko apni murkhata samajh me aaya.

Lekin jab aakarshan hi sahi jo usko Karan se hua tha usko lagne laga ki sach me wo Karan se pyar karti thi aur shaayad ye sach bhi tha...Pyar ka suruwat dhokha aur attraction se hi sahi lekin Priya Karan se saccha pyar karne lag gayi thi.

Abb Priya ko Karan ki double standard baatein yaad aane laga tha jo usne pehle ignore kar diya tha...Priya ko aaj pata chal gaya tha ki Karan kitna bada dhokhebaaz aur fraud hai...Usne kabhi Priya se pyar kiya hi nahi tha...Lekin Priya abhi bhi acche se jaan nahi paayi thi ki wo Karan ke liye pyar karti thi ya attraction...Usne bhi iss faisle ko vakt par chhod diya.

Lekin aaj Sameer se hui baato ki vajah se Karan se nafrat ho gaya tha usko...Apna dil tootne ka dard usko abhi bhi tha lekin abb Karan ki chehra yaad aate hi usko Karan se nafrat sa ho gaya tha.

Ateet ki yaado se baahar nikalte hi Priya Sameer ke baare me sochne lagi...Sameer se jitni baar milti thi har baar usse ek naya hi Sameer milta tha...Puraana Sameer maano kahi gaayab sa ho gaya tha...Jo har baar usko apna ghamand dikhaata tha...Uska majaak udaata tha...Uske saath baat karte vakt hamesha berukhi hota tha.

Jo Sameer hameaha khud ko sahi maanta tha wo aaj dikh hi nahi raha tha...Shaadi ki baad pehli baar Priya ne Sameer ko maafi maangte hue dekha tha...Wo maafi bhi Sameer ne dil se maanga tha aur usse apna bhool ka ehsaas tha.

Abb jo Sameer ko Priya dekh rahi thi wo Sameer aur puraane Sameer me bahut badlaaw aa gaya tha...Aaj Priya Sameer ki sacchaayi aur acchaayi dekh rahi thi...Pehli baar pata chala ki Sameer utna bura nahi tha jitna wo galat samajhti thi...Lekin baar baar usse Sameer ka bhool yaad aa jaata tha jiska sajaa usse mil raha tha...Iss bhool ki vajah se Priya ko kya kya sehna pas raha tha ye sirf Priya hi jaanti thi.

Naa kisi ko apna ghutan aur dard bata sakti thi waha par nahi ghut ghut kar jee paa rahi thi...Kabhi kabhi usko jor se rona aata tha lekin kar bhi kya sakti thi...Khud hi aansu poch leti thi aur aage ke baare me sochti thi.

Har baar Sameer se yahi sawal puchti thi "Agar tum itna accha ho Sameer to mere saath itna galat kyu kiya...Kyu mere jindagi ke saath aisa majaak kiya?"

 

[Champ_AK_81]

UPDATE 78​

1 Week Later


Sameer aur Priya ka soch ek dusre ke liye dhire dhire badalne laga...Abb dono ko ek dusre me acchaayi dikhne laga.

Sameer har ek pal apne bhool ke liye pachtaata rehta...Wo har baar ek hi baat sochta tha..."Kaash maine aisa nahi kiya hota...Aisa karke maine kisi ke saath accha nahi kiya...Naa hi khud ke saath, na Priya, na Shruti aur nahi Maa aur Papa ke saath...Kabhi kisi ke liye bura nahi socha...Fir bhi aaj sabhi ke liye bura ban gaya hu...Yaha tak ki apni najro me bhi gir gaya hu."

Bas yahi soch ke saath Sameer har pal ghut ta rehta tha...Agar kabhi jyada pareshaan hota tha to usse apne Maa ki kahi hui baat yaad aa jaata tha...Wo kisi tarah khud ko sambhaal kar apne aap ko majbut banane ki koshish karta tha.

Din me to wo office jaata tha iss liye kisi tarah wo khud ko kaamo me vyast rakh leta tha...Lekin har ek shaam aur raat ko kaatna bahut mushkil hota tha uske liye...Na chaahte hue bhi wo apni bhool ke baare me sochne par majbur ho jaata tha...Jindagi me pehli baar Sameer iss tarah se aatmaglaani mehsus kar raha tha.

Kabhi khud par jyada hi ghamand karne wala Sameer ne kabhi socha nahi tha ki usko jindagi me aisa din bhi dekhna padega...Abhi wo koshish kar raha tha kisi tarah haalato ko sambhalne ka...Lekin usse samajh me nahi aa raha tha ki usko kya karna chaahiye...Bas khud ki pareshaani me hi uljhaa hua tha.

Dusri taraf Priya ko bhi Sameer ke ghar me rehna pasand nahi tha...Lekin uski bhi majburi thi Sameer ke ghar me rehna...Wo apna ghar me bhi nahi rehna chaahti thi apni Papa ki vajah se...Priya ko apne Papa se itna nafrat ho gaya tha ki abb wo uska chehra tak dekhna pasand nahi karti thi.

Kisi tarah 1 saal yahi bitaane ke baad wo sab kuch chhod kar kahi dur jaane ka soch rahi thi aur apni jindagi ka ek nayi tarah se suruwaat karne.

Priya ke liye Sameer ke ghar me rehna itna bhi aasan nahi tha...Waha uska apna kehne ke liye koi bhi nahi tha...Wo bahut akeli mehsus karti thi waha par...Bas kabhi kabhi Sameer ki Maa se uski thodi bahut baat ho jaata tha...Iske alawa 1 hafta se usne kisi ke saath baat nahi kiya.

Abb bhi Sameer ke ghar me rehna uske liye aashaan nahi tha fir bhi abb usko thoda aadat ho gaya tha.

Sameer ka ye badla hua chehra jab bhi Priya dekhti thi wo Sameer ke baare me sochne par majbur ho jaati thi...Baar baar wo Sameer ke baare me yahi sochti thi ki Sameer accha hai ya bura.

Shaadi se pehle to Priya ne Sameer ko hamesha se hi ghamandi aur awara ladka maana tha...Jo apne dost (Shruti) ke saath mil kar dusro ka majaak udaana hi jaanta hai...Iske alawa college me kuch maar peet ki vajah se bade ghar ka bigda hua ladka ya fir gunda type ka image ban gaya tha.

Shaadi ki vakt Sameer se itna jyada gussa aur nafrat karne lagi thi ki shaayad hi kabhi Sameer ko maaf karti.

Lekin abb badla hua Sameer ka dekh Priya bahut hairaan thi...Abb usse bhi lagne laga tha ki kahi usne Sameer ko pehchaane me pehle galti to nahi kar diya tha.

Sameer aur uske behavior ke baare me bahut saare khayal aane ke baawjood Priya ne soch liya tha ki wo Sameer ko kabhi maaf nahi karegi.

After Dinner


Dinner karne ke baad Sameer apne room me baith kar rest kar hi raha tha ki uske mobile me Mahesh ka phone aaya...Bina koi der kiye Sameer ne phone utha liya.

Mahesh:- Kaisa hai yaar...Bahut dino se baat bhi nahi kiya hai?

Sameer:- Khud ki tension me uljha hua hu yaar...Tu bhi jaanta hai sab kuch.

Mahesh:- Abhi tak wo baat nahi bhula tu!

Mahesh ne hairaan hone ka naatak karte hue kaha...Wo Sameer ke baare me sab kuch jaanta tha fir bhi usne Sameer ko inn saari baato se baahar nikalne ke liye kaha.

Sameer:- Tujhe itna aashaan lagta hai kya ye sab bhulna...Mere liye to nahi hai...Apni galti ko ignore nahi kar sakta aur nahi dur bhi bhaag sakta hu.

Mahesh:- Accha ye bata party kab dega tu?

Mahesh ko pata chal chuka tha ki agar Sameer se iss baare me baat karta raha to kabhi iss baat se baahar nahi nikal paayega...Issi liye Mahesh ne baat badal diya.

Sameer:- Party!!! Kis liye?

Sameer ne hairan hokar pucha...Usse samajh me nahi aa raha tha ki Mahesh kis baat ke liye party maang raha hai.

Mahesh:- Are tujhe job mil gaya hai na...Iss liye party maang raha hu...Bata kab dega party?

Sameer:- Kya yaar...Tujhe bhi bakwas baato ke liye party chaahiye...Ye job nahi time pass hai mere liye.

Sameer ne sar peet te hue kaha.

Mahesh:- Matlab.

Sameer:- Ye job mai iss liye kar raha hu kyu ki mai Priya ke saamne nahi jaana chaahta hu...Agar ghar me raha to uska saamna to hoga hi...Issi liye uske najaro me nahi aana chahta hu.

Wo bhi mujhe dekhna pasand nahi karti hai...Kisi tarah 1 saal tak issi job me apna time pass kar lunga...Uske baad 1 accha sa job karke life me settle ho jaaunga.

Mahesh:- To tujhe lagta hai ki iss tarah se tu bach jaayega Priya se...Pehli baar tujhe kisi se bhaagta hua dekh raha hu Sameer.

Sameer:- Mai kisi se nahi khud se bhaag raha hu kuch time ke liye...Jitna din Priya se dur rahunga utna hi accha rahega khud ko sambhaalne ke liye.

Tujhe ya fir kisi ko bhi hairani ho sakta hai mera harkat dekh kar...Agar tu meri jagah me hota to tujhe pata chalta kya beet raha hai mujh par.

Meri galti aur bewkoofi ki vajah se kisi ki life me itna tufan aa raha hai...Inn sabhi ke liye mai hi jimmedaar hu...Kabhi kisi ke liye buara nahi chaaha lekin aaj mai bahut bura ban gaya hu ki apni hi najar me gir gaya hu.

Jab bhi Priya ko dekhta hu khud par hi gussa aata hai...Nafrat me mai itna andha kaise ban gaya yaar ki itna ghatiya kaam kiya maine.

Aaj Priya ko dekh kar aisa lag raha hai ki maine ek nahi do bhool kiya hai.

Pehla galti ye hai ki Priya ko pehchaane me galti kar diya...Kitna galat sochta tha uske baare me...Lekin wo kabhi buri ladki nahi thi...Wo Karan ki vajah se bhi shaayad aisa hua tha...Jo bhi ho galti mera aur mera soch ka tha.

Aur dusra galti mera sabse bada bhool hai...Anjaane me ya fir nafrat ki aag me maine aisa kadam uthaaya ki uss kadam se ham sabhi ki life me ek bahut bada tufaan aa gaya.

Itna keh kar Sameer chup ho gaya...Usne apne bhool ki kahani ek baar fir Mahesh ko suna diya.

Mahesh:- Accha ye sab chhod...Aur bata ki tu Karan ko comedian kyu bolta tha...Jitna Rajesh ne mujhe bataya Karan ke baare me usse to mujhe nahi lagta ki Karan ne tere saamne kabhi comedy kiya hai.

Mahesh ne baat badalne ke liye fir se topic badal diya...Wo kisi bhi tarah se Sameer ko Priya se related baato se dur rakhna chaahta tha...Lekin kisi na kisi vajah se Sameer ki baat fir se Priya par aakar hi khatam hota tha.

Karan ka naam sun kar Sameer ko bahut gussa aaya...Kisi tarah apbe gussa par kaabu karke Sameer ne kaha.

Sameer:- Ha comedy to nahi karta tha...Lekin uski bewkoofo wali baat se hansi aa jaaata tha...Uski baatein aur dhamki hi aisa hota tha ki sun kar hi hansi aa jaata tha...Hansi aa jaata tha uski baatein sun kar iss liye comedian kehta tha.

Kuch nahi kar sakta tha mere saamne lekin bahut jyada bhaunkta tha...Kehte hai na "Empty vessel sounds louder"

Ye kehte hue Sameer ka Karan ke liye gussa bahut badh gaya...Kuch der shaant rehne ke baad usne kaha.

Bas abb yahi dua hai ki wo mere saamne kabhi nahi dikhe...Agar dikh gaya to pata nahi uska kya haal hoga...Mai soch bhi nahi sakta.

Isse aage Sameer kuch bol nahi paaya...Karan ke baare me baat karte hue Sameer ka gussa bahut badh gaya tha...Aur issi gusse me usne phone kaat diya.

Mahesh ne bhi dubaara phone nahi kiya...Usne Sameer ka gussa phone me aa rahi aawaj se hi pata laga liya tha...Aise me Sameer se baat karna usse thik nahi laga.

Uska Sameer se baat karke usko samjhaane ka mauka Sameer ki gussa ke saamne kaam nahi kiya.


Idhar Sameer bhi gusse me apne room me tehalta raha...Fir bhi uska gussa kam nahi ho raha tha...Wo apna mood fresh karne ke liye chhat me chala gaya.

Wo chhat tak gusse me pahunch gaya lekin jaise hi wo chhat me gaya uska gussa pal bhar me gaayab ho gaya...Saamne Priya thi...Jo chhat ke ek kone me baithi niche ki taraf dekh rahi thi.

Sameer ki taraf Priya ka peeth tha...Sameer bhi chhat ki dusra kona ki taraf chala gaya...Sameer ki kadmo ki aawaj se Priya ko pata chal gaya ki Sameer bhi chhat me aa gaya hai lekin usne kuch react nahi kiya.

Kareeb 15 minute baad Sameer ka gussa bhi kam hua...Tab jaa kar usse yaad aaya ki usne 1 hafta se Priya ke saath baat hi nahi kiya hai.

Wo Priya ki taraf gaya aur dheemi aawaj me Priya se pucha.

Sameer:- Kaisi ho?

Sameer ki aawaj aur sawal sun kar Priya chaunk gayi...Usse Sameer ka ye sawal ne hairan kar diya.

Sameer ki taraf mudte hue Priya ne hairan ho kar bas itna hi kaha.

Priya:- Thik hu.

Sameer:- Koi taklif to nahi hai na.

Priya:- Taklif to bahut hai ye shaadi ke baad...Khair usse bhulne ki koshish kar rahi hu...Lekin bhula paana itna bhi ashaan nahi hai.

Filhaal to akela pan hi sabse badi taklif hai mere liye...Kisi tarah 1 saal bitaane ka soch rahi hu.

1 tumhaari Maa hi hai jiske saath baat karke thoda bahut time pass ho raha hai...Warna aur bhi taklif hota yaha rehne me.

Priya ne dusri taraf munh ghuma kar kaha.

Sameer ne abb koi jawab nahi diya.

Kuch der baad Priya ne Sameer se pucha.

Priya:- Lekin tum bahut pareshaan najar aa rahe ho kuch dino se...Hamesha office aur apne room ke hi chakkar lagate ho.

Priya ne hairaani ke saath pucha.

Sameer:- Bahut tension hai abhi aur pareshaani bhi.

Kisi tarah mood thik ho jaaye ye soch kar office jaata hu...Aur khud ko busy rakhna chaata hu...Lekin office me bhi wo Anjali picha nahi chodti hai baat karne ke liye...Abhi tak to kisi tarah ignore kar raha hu usse...Pata nahi kab tak wo aur uski tension piche padi rahegi.

Priya ko jawaab dene ke baad Sameer ko fir se Anjali ka yaad aa gaya...Pehle Karan aur abb Anjali inn dono ki vajah se Sameer ka gussa aur frustration bahut badh gaya.

Kisi bhi tarah wo khud par control karke Priya ki agli baat ka intejaar karne laga...Lekin Priya ne kuch nahi kaha.

Abb Sameer ke paas waha Rene ki koi vajah nahi tha aur naa hi wo waha rukna chaahta tha...Bina kuch bole wo sidhe apne room ki taraf niche chala gaya.

Sameer ka mood kharab ho gaya tha abhi Karan aur Anjali ko yaad karne ke baad...Usko samajh me nahi aa raha tha ki usse kya karna chaahiye...Usne socha ki abhi soo jaana hi uske liye behtar hoga...Isse usse aur tension nahi hoga kuch vakt ke liye.

Sote vakt usko yaad aaya ki Priya ne kaha tha usse ki Priya Sameer ki Maa ke saath baat karti hai...Abb Sameer ne socha ki kal wo apni Maa se puchega ki Priya unse kya baat karti hai...Aur uske baare me bhi kuch kehti hai ya nahi.

 

[Champ_AK_81]

Friends aaj bhi 4 updates post kiya hai...Spelling mistake check kiya nahi hai...Agar kahi par mile to please adjust kar lijiye...Aur apna feedbacks jarur dijiye.

 

[kamdev99008]

bahut khoob................ab barf pighalne lagi hai dhire-dhire

 

[Champ_AK_81]

bahut khoob................ab barf pighalne lagi hai dhire-dhire

Thanks Kamdev bhai for your support and review...Keep supporting.

 

[Akki ❸❸❸]

Aaj hi bhai ji complete story padi,,,, aur kya kahani h bhai,, jabardast,,,,,

Kahani ko bina sex ke bhi itne bdiya tareeke se likha ja sakta h aur readers ko bandhe rakha ja sakta h, ye iss story se pata chalta h

Story me koi sex scene nahi h,,,, last me sirf ek kiss scene h uske bawjood bi kahani bhot bdiya h

Story ka end bi beautiful h,,, almost sari story lajwaab h,, emotion, anger, love sab h is kahaani me

Champ bhai bhot shukriya apka,, jo apne itni achi story padne ko di

 

[Champ_AK_81]

Aaj hi bhai ji complete story padi,,,, aur kya kahani h bhai,, jabardast,,,,,

Kahani ko bina sex ke bhi itne bdiya tareeke se likha ja sakta h aur readers ko bandhe rakha ja sakta h, ye iss story se pata chalta h

Story me koi sex scene nahi h,,,, last me sirf ek kiss scene h uske bawjood bi kahani bhot bdiya h

Story ka end bi beautiful h,,, almost sari story lajwaab h,, emotion, anger, love sab h is kahaani me

Champ bhai bhot shukriya apka,, jo apne itni achi story padne ko di

Thanks Akki bhai for your support and such a nice review...But ek confusion hai bhai...Aapka ye review iss story (Ek Bhool) ke liye hai yaa fir mere dusri stories Kasam aur Khwahishein ke liye? Kyu ki abhi ye story complete hone me thoda time hai aur kiss scene abhi tak iss story me shayad nahi aaya!!!

 

[Akki ❸❸❸]

Are bhai ji apne hi kaha tha ki ye story to compete h,, to mne pdf se padi,,,, vese pdf ko phone me padne me thodi dikkat ayi,,, lekin update ka intezar nahi hua champ bhai