Romance Ek Din Achanak

[king of darkness0411]

Update 78​

Alok gusse mein fanfanata ja dhamka college mein. Saath mein apne do chaar ladke liye aur college mein pahunch kar Ravi ko dhoondhne laga. Ravi ko dhoondhte dhoondhte college Alok canteen tak pahunch gaya. Ravi ki marammat ke chakkar mein Ravi naam ke do chaar aur student pit gaye bechare.

Idhar Ravi ko sab samjha rahe the jo hua achha nahin hua. Use aisa nahin karna chahiye tha. Lekin Diya iske against thi. Usne tark diya ki Monika kaun si dhoodh ki dhuli hai. Usne kya Ravi ke saath achha kiya tha. Use sahi sabak mila hai. Isi tarah dui-pakshi baatchit chalti rahi lekin koi faisla nahin ho paya ki kya sahi tha aur kya galat.

Thodi der baad Ravi ko thoda stress feel hone laga to wo canteen se bahar aa gaya taaki khuli hawa mein saans le sake aur yahi uske liye ghatak sidh huya. Bahar uske saamne Alok khada tha. Alok ne usse poocha “B.A. third year mein padhne wale Ravi ko jaante ho. Kahan milega wo”

Ravi ne kaha “Main hi hoon Ravi. Kahiye kya kaam” Aur wo poora bol bhi nahin paya tha ki ek tej goonj use sunayi di aur uski aankhon ke aage ek shank e liye andhera cha gaya. Alok ka karara thappad uske gaal laal karta chala gaya.

“Are kaun ho tum”

Patak Fir thappad lagne ki awaaz. Is baar ek khun ka fawwara Ravi ki naak se behne laga.

“Meri baat to suno” Patak

“Mujhe kyun maar rahe ho” Patak

“Maine kya kiya” Patak

“Are kuch batayoge bhi ya yun hi maarte rahoge” Patak

Patak Patak Patak jaane kitne hi thappad Ravi ko adhmara karte chale gaye.

Thappad ruke nahin ki laat ghuson ki baarish bhi chalu ho gayi. Jab Ravi bilkul adhmara ho gaya to Alok use chetawani dete huye chala gaya “Aaj ke baad meri behan ke raaste mein aane ki bhool mat karna. Is baar to tumhein jinda chod raha hun lekin agar uski aankhon mein aansuon ka ek bhi katra mujhe dikhayi diya to wo tumhari jindagi ka aakhiri din hoga”

Idhar Ravi behosh pada tha doosri taraf uske sab dost canteen ke andar mast kha pee rahe the. Jab kaafi der ho gayi aur Ravi nahin aaya to sabko chinta huyi ki kya huya ye kahan reh gaya. Doosra sabko canteen se bahar shor gul sunai de raha tha. Sab dost bahar nikle dekhne ki aakhir majra kya hai to thodi door par unhone students ki bheed ko dekha jo kisi cheez ko gherkar khadi thi. Utsuktawash sab dost bhi wahan pahunch gaye aur bheed ko cheerte huye us cheez ko dekhne uske paas pahunch gaye. Wahan pahunch kar sabki aankhein hairat se fati ki fati reh gayi kyunki wahan koi cheez nahin Ravi behosh halat mein lahu luhan pada tha.

Ravi ko turant hospital le jaaya gaya. Dte udte ye khabar sab jagah fail gayi ki Ravi ki pitai Monika ke bhai ne ki hai. Diya ka to khoon khaul utha. Halanki sab dost gusse mein the lekin Diya kuch jyada upset thi Ravi ki haalat ko dekhkar. Hospital jaane ke poore raaste Diya Ravi ka sir apni godh mein liya baithe rahi. Ravio ardh murchit awastha mein tha. Usse aankhen nahin kholi jaa rahi thi lekin wo sab kuch sun aur samajh raha tha.

Idhar ye baat Monika tak bhi pahunchi aur wo hairan reh gayi apne bhai ke kaarname ko sunkar. Alok ke aane ke baad usne usse baat karni chahi lekin Alok ne ye kehkar use chup kara diya ki uski aankhon mein wo aansu nahin dekh sakta. Kisi ki wajah se bhi chahe wo koi bhi ho uski aankhon mein aansu aayega to wo use jinda nahin chodega. Ise to sirf usne peeta hai.

Monika ne use samjhane ki koshish ki lekin Alok ne uski ek nahin suni. Monika ko bahut feel huya ki uski wajah se Ravi ki itni buri halat huyi hai. Usne socha college jaakar wo apne bhai ki taraf se Ravi se maafi maang legi.

Usne turant college ka rukh kiya aur college pahunch gayi. Wahan jaane par use pata laga ki Ravi ko hospital le jaaya gaya hai. Ravi ki salamati ki dua karte huye wo bhagte huye hospital pahunchi. Lekin wahan use Ravi ki bajay Diya mil gayi.

“Ab kyun aayi ho yahan. Kya ye dekhne aayi ho ki wo jinda hai ya mar gaya.”

“main to usse”

“Tumne aur tumhare bhai ne to koi kasar nahin chodi thi use maarne mein lekin ye to bhagwan ka shukar hai ki wo sahi salamat hai.”

“Main apne bhai ki taraf se maafi maangne aayi hun”

“Kya baat hai! Bhai maar maar kar adhmara kar deta hai aur behan un ghaavo par marham lagane aayi hai”

“Pls mujhe ek baar Ravi se milne do”

“Koi jarurat nahin hai usse milne ki. Wo tumse nafrat karta hai aur ye tum achhi tarah samajh lo. Aayinda na to wo tumhare raaste mein aayega aur na hi tum uske saamne aana. Aur raha sawal tumhare gunde bhai ka use samjha dena ki aayinda agar usne Ravi ki taraf aankh utha kar dekha to hum sab use chodenge nahin”

Monika aur Diya ki baatein usi kamre ke bahar ho rahi thi jahan Ravi ko admit kiya huya tha. Unki saari baatein Ravi ne sun li thi lekin na to wo bol sakne ki haalat mein tha aur na hi chalne firne ki. Bas muk darshak bana dono ki baatchit sunta raha.

Ravi ko ehsaas tha ki isme Monika ki koi galti nahin hai. Infact shayad Monika ke bhai ki bhi poori tarah se galti nahin hai kyunki koi bhi bhai apni behan ki aankhon mein aansu nahin dekh sakta. Bas wo thoda over react kar gaya. Ravi ko Diya ke bartaav par sharmindgi ka ehsaas ho raha tha ki use Monika se aise baat nahin karni chahiye thi lekin ab pachtaye hot kya jab chidiya chug gayi khet.

Isliye Ravi ne theek hote hi sabse pehla kaam ye chuna ki wo Monika se maafi maangega.


To be continued....

Super update

 

[king of darkness0411]

Update 79​

Dheere dheere Ravi ki haalat mein sudhar aata gaya. Lekin Ravi ke theek hone mein sabse bada haath Diya ka tha jo jyadatar apna college bunk karke Ravi ki sewa mein lagi rehti. Ravi ke mummy papa ko bhi Diya bahut pasand aa gayi. Aakhir kyun na aaye itni sewa jo kar rahi thi aur wo bhi bina kisi swarth ke. Diya bhi bas Ravi aur uske ma-baap ki sewa mein lagi rehti aur ho bhi kyun na uske hone waale saas sasur jo the.

Monika ne Ravi se milne ki yaa uske paas jaane ki dubara koi koshish nahin ki. Kaaran ek hi tha ki wo kaise Diya ke kadwe bol ka saamna karegi. Direct ho ya indirect wohi to thi Ravi ki is haalat ki jimmedar. Usne apne man to kada kiya aur faisla kiya ki college mein to Ravi se milakat ho hi jayegi aur wo usse wahin maafi maang legi. Use pata to chal gaya tha ki jis tarah Ravi ne sabke saamne apne galti maani thi wo ek nekdil aur shareef ladka hai aur wo use jaroor maaf karega.

Isi tarah ek hafta beet gaya aur Ravi kaafi had tak theek ho gaya. Use hospital se discharge kar diya gaya aur uske ma-baap use ghar le aaye. Ghar par sab dost uska haal chaal poochne aate rehte the aur Diya ka bhi ab kaafi aana ho gaya tha Ravi ke ghar par. Pawan to tha hi khair wahin uske paas. Diya to jaise ab us ghar ki sadasya ban gayi thi. Hasti, khelti, khilkhilati sabka manoranjan karti rehti. Ravi ki mummy to bahut khus thi kyunki unhen Diya ke roop mein unki hone wali bahu dikh rahi thi.

Lekin Ravi ko chain kahan tha. Use kisi bhi tarah Monika se milna tha. Jaise hi wo thoda theek hua to jhat se college pahunch gaya lekin Monika use kahin nahin dikhi. Usne kaafi dhoondha lekin koi safaslta uske haath nahin lagi. Thak haar kar jab wo park mein gaya to wahan ek kone mein use Monika akeli baithi dikhai di gumsum aur kuch sochti hui. Ravi kab aakar uske paas khada ho gaya use pata hi nahin chala.

Jab Ravi ne hello kaha tab uska dhyaan toota aur usne ek najar utha kar saamne ki taraf dekha. Ravi ko wahan dekhkar wo chaunk gayi aur wahaan ek kuch der ke liye sannata pasar gaya. Thodi der mein dono ki jubaan ek saath khuli aur dono ke muh se sirf ek shabd nikla “SORRY”

Ek min ke liye fir sannata cha gaya jise Ravi ne toda “Mujhe maaf kar do Monika. Maine tumhare saath bahut galat kiya. Lekin maine apni bhool sudhar li hai aur tumhi ko us competition mein first prize mila hai. Lekin main us din ke Diya dwara kiye gaye bartaw ke liye maafi maangna chahta hoon. Wo kuch jyada hi over react kar gayi. Pls Sorry uski taraf se bhi”

“Are nahin uski koi galti nahin hai. Main uski jagah hoti to pata nahin kya kar deti. Wo to bahut decent thi. Sorry to mujhe bolna chahiye kyunki meri wajah se tumhari ye halat huyi. Mere bhaiya mere liye bahut possessive hain. Pls unki taraf se main sorry bolti hoon”

“Kya baat hai! Hum dono ek doosre ko kisi doosre ki taraf se sorry keh rahe hain. Isn’t that amazing?”

“Haan bilkul” aur isi ke saath dono ke chehre par halki se muskaan ghir aayi. Dono aise baat karne lage jaise bahut pehle se ek doosre ko jaante ho. Don one kaise ek doosre ke liye planning ki, usmein kya kya pareshaniyan aayi aur kaise unhone us kaam ko anjaam diya ek doosre ko aise bata rahe the jaise koi kahani suna raha hai. Dono ek doosre ki baton par dil khol kar hans rahe the. Yahi to pyaar ki shuraat thi shayad dono mein.

Dheere dheere dono ke beech baatein, phir mulakatein hoti rahi. Dono ghanto park mein baithe rehte, hasi majak karte rehte, ruthna manana karte rehte aur ek din mauka dekhkar Ravi ne Monika ko “I Love You” bhi keh hi diya. Monika ka bhi dil dhadak hi raha tha Ravi ke liye to wo kaise mana karti. Usne bhi haan keh di aur dono ke beech nayi prem gatha shuru ho gayi.

Yahi pyaar umar bhar chahta hoon

Na ho khatam jo wo safar chahta hoon

Ye duniya ki daulat nahin chahiye ab

Mohabbat ka ho dil mein ek ghar chahta hoon

Tumhen bhoolne ki duayen to ki

Duayen ho saari beasar chahta hoon

Jo dil andhere mein bhar de ujala

Mein chahat ki aisi seher chahta hoon

Safar mein bahut akela hoon mein

Teri yaad ka humsafar chahta hoon​

Baarish ka mausam sabse pyaara hota hai khaskar premi yugal ke liye. Halki barsaat ho aur beech sunsaan sadak mein halki bearish ki fuhare chehre aur sharer par pad rahi hon aur baahon mein baahein dale dono chale jaa rahe hon. Na duniya ki koi khabar na kisi baat ki tension. Bas apni masti mein choor.

Dono ki bhi aisi hi haalat thi. Ek min ke liye bhi dono ko chain nahin aata tha. Phone to dono ke paas tha hi bas jab ek saath nahin hote the to phone par lage rehte the. Apne sunhere bhavishya ke sapne dekhte huye dono aane wale khatre se anjaan the. Unki jindagi kya mod lene waali hai dono ko iska jara sa bhi abhaas nahin tha.

Lekin kehte hain na pyaar kitna bhi chupa ke karo ye duniya wale jaan hi lete hain. College mein to pata lagna hi tha aur chupate chupate aakhir ye baat Diya ko bhi pata lag gayi. Uska to jaise dil hi toot gaya. Kitne saare armaan usne dekhe the ki uski aur Ravi ki shaadi hogi. Wo baahon mein baahon dale saari duniya ki sair karenge. Wo jab Ravi se rooth jayegi to Ravi use pyaar se manayega lekin uske saare sapne ek sheeshe jaise saabit huye jise Monika naam ke paththar ne chaknachoor kar diya tha.

Lekin wo haar maanne walon mein se nahin thi. Aakhir usne pakka faisla kar liya ki wo Ravi ko paakar hi dum legi chahe uske liye use kuch bhi karna pade.


To be continued....

Nice update

 

[Mbindas]

Nice update bhai

 

[Guffy]

Yeh kya ravi ko monika se pyar ho gaya aur divya ka patta kat gaya lekin maza aa gaya ab dekho divya kya karti hai ravi ki mummy ne toh divya ko bahu man liya hai unko ravi kaise samjhata hai dekhane wali baat hogi aur sab se last par sab se best shayri bahot hi jabarjast thi maza aa gaya padh kar waiting next aur sorry late review ke liye din bhar busy tha bhai

 

[Ravi]

a lot doston

 

[Ravi]

Update 80​

Lekin Diya ko samajh nahin aa raha tha ki kya kiya jaye taaki ye Monika naam ka kanta hamesha ke liye Ravi aur uski jindagi se nikal jaye. Tarah tarah ke wo plan banati lekin fir hi unko nakar deti. Kabhi sochti ki Ravi ke mummy papa ko bata dun lekin fir socha ki Ravi unka eklauta beta hai aur wo use behad pyaar karte hain to uski khushi ke liye wo Monika ko apni bahu banane ke liye tayyar ho jayenge. Aakhir bete ki khushi hi unke liye sab kuch hai. Ye Idea achha nahin hai.

Fir usne socha ki kyun na Monika ke bhai ko bata dun lekin fir socha ki wo garam dimaag ka hai. Monika jara sa royi to usne Ravi ki ye haalat kar di thi aur agar use sab bata diya to pata nahin wo kya karega. Kahin Ravi ke saath wo kuch kar na de. Main Ravi ki jaan khatre mein nahin dal sakti. Aakhir usi mein to meri jaan atki hai. Bhagwan na kare agar use kuch ho gaya to main apne aap ko kabhi maaf nahin kar paungi. Main ye nahin kar sakti.

Kabhi sochti ki Ravi se baat kare lekin fir socha Ravi pehle bhi ek baar uske pyaar ko nakaar chuka hai lekin tab Diya ko ek baat ki tasalli thi ki wo Ravi ki dost hai aur Ravi ki jindagi mein aur koi ladki nahin hai. Lekin aaj halat doosre the. Ravi Monika se pyaar karta tha aur is baar Diya ko wo nakaar dega ko Diya bardhast nahin kar payegi. Ravi ke muh se na sunne ki usme himmat nahin thi. Wo ye nahin seh sakti thi ki Ravi uske muh par use mana kar de. Isliye usne is idea ko bhi khaarij kar diya.

Isi tarah kayi plan banati gayi aur khud hi unhen sire se nakarti gayi. Aakhirkar usne faisla kiya ki wo Monika se face to face baat kare is bare mein. Halanki isme koi surety nahin thi ki wo manegi lekin ab yahi tareeka bacha tha Ravi ko pane ka. Agar Monika pyaar se maan jaati hai to theek nahin to Diya ko kuch aur raasta apnana padega.

Sahi kaha hai kisi ne pyaar mein insaan pagal ho jaata hai. Acche bure ki samajh wo kho deta hai. Kayi baar wo jaldbaazi mein galat faisle le leta hai jiske liye use jindagi bhar pachtana padta hai. Lekin tab tak bahut der ho chuki hoti hai. Koi kuch bhi kahe ya use galat faisla lene se rokne ki koshish kare to pyaar mein paagal aadmi ko wo apna sabse bada dushman lagne lagta hai. Apne pyaar ko pane ke liye insaan kisi bhi had tak gujar jaane se nahin hichakta aur yahi haal is samay Diya ka tha jisne Ravi aur Monika ko alag karne ka faisla le liya tha.

Aaj college mein result ka din tha aur sab bahut excited the apne result ke liye. Ravi aur uske dost khush the kyunki sabke papers acche gaye the aur sabko vishwaas tha ki wo aasani se paas ho jayenge. Sab pahunch gaye result dekhne. Ravi aur uske dost sab paas ho gaye the. Poora college ka vatavaran aur uski rangat badli huyi thi. Ek mila jula roop dekhne ko mil raha tha sabke chehron par. Jyadatar students ke chehre par khushi chalak rahi thi paas hone ki khushi mein to kayi students ke chehre nirasha mein latke huye the lekin aankhon mein ek ummed ke saath ki agli baar wo jaroor kamyab honge.

Sab doston ne milkar ek choti si party organize ki jahan wo apni kamyaabi ka jashan manana chahte the. Monika, Saloni aur uski behan, Manish aur Jawed in sab ko bhi bulaya gaya tha taaki sab dost ikkatthe is khushi ko celebrate Karen. Shaam ka samay tay hua aur sab pahunch gaye niyat samay par. Party bhi apne time pe shuru ho gayi aur cake kaat kar sabne uska sriganesh kiya. Ek doosre ko ye log cake muh se kam chehre se jyada khila rahe the, sab ek doosre ko nahin uske chehre aur uske kapdo ko cake khila rahe the.

Jab cake ka naamonishan nahin bacha tab jaakar unhen chain aaya. Iske baad col drinks ka number aaya to sabne use bhi samphane ki tarah istemaal karna shuru kar diya. Ek doosre ke upar wo coldrinks uda rahe the aur masti mein choor ho rahe the. Isi bhaag daud mein sab thak gaye to sabne kuch khane ki sochi. Aaj ummed ke viprit saara kharcha Sanju ki taraf se tha. Sab hairan the use kharcha karte dekhkar. Khair kha pee kar music system chala diya gaya jiske madhur sangeet mein sabke pair thirakne lage.

Sab jode aapas mein dance karne lage. Ravi Monika ke saath, Pawan Riya ke saath, Jawed Saloni ke saath, Manish Saloni ki behan ke saath aur Sanju ne bhi apni nayi girlfriend banayi thi jise wo party mein saath laya tha uske saath nach raha tha. Diya na chahte huye bhi sabke saath thirak rahi thi lekin uski nigahen Ravi aur Monika ki taraf hi thi.

Ravi aur Monika din duniya se bekhabar ek doosre ki baahon mein samaye apni hi dhun mein naach rahe the. Sab jodo ek doosre ki baahon mein baahein dale naach rahe the. Diya ka dil ro raha tha lekin aankhon ko aansu bahane se kisi tarah usne khud ko roke huye tha. Sabse wo haske bol rahi thi aur thoda naach kar wo bardhast na kar pane ke kaaran kursi par jaakar baith jaati thi. Lekin fir use koi na koi kheench lata tha aur majboran use fir se sabka saath dena padta tha.

Kehte hain dil jab tootta hai to awaaz nahin hoti lekin jab dil tootta hai to zarra zarra hila kar rakh deta hai. Toota dil pahadon ka bhi seena cheer sakta hai, samunder mein se bhi raasta bana sakta hai. Wo har kaam kar sakta hai jise aap aam jindagi mein soch bhi nahin sakte kyunki toota dil bas ek hi lakshya lekar chalta hai ki kisi bhi tarah apne dil tootne ki wajah ko door kiya jaye ya jiske kaaran dil toota hai uska badla wo kaise le.

Thodi der mein Monika ko washroom jaane ki jarurat padi to wo Ravi ko bolkar washroom ki taraf chal di. Diya ko laga ki yahi sahi mauka hai jab wo Monika se baat kar sakti hai. Aaj nahin to kabhi nahin. Aaj wo isse baat karke saara jhanjhat ki khatam kar degi. Isliye wo bhi sabko excuse bolkar Monika ke peeche peeche washroom ki taraf chal di.


To be continued....

 

[Mbindas]

Bohot khub bhai

 

[Guffy]

Bahot khub bhai maza aa gaya padh kar ab dekho divya kya karti hai kaise monika se baat karti hai monika manegi ya nahi manegi dekhane wali baat hai waiting next

 

[Mayaviguru]

Hamko pta tha writer bina bakchodi kiye nhi manega ...sala sabka chutiya katega pehle pawan ka kuch dino ke liye ..jay ka to gandi trike se kata..jassi ka kata
Sanju ka lifetime kata .diya ka bhi kata ravi ka bhi kata ...mtlb kisi ka happy ending nhi kar sakta tha ...faltu ka bakchodi krne se acha ach ravi ka diya se accept kra deta aur sanju ko apna pyar monicamai dikh jata...

 

[Ravi]

a lot doston