Romance Ek Din Achanak

[Mbindas]

Waiting for next update bhai

 

[Guffy]

Update 77​

Ravi aakhir tha to dariyadil hi. Bade bujurgon ki kahi baatein use ab samajh aa rahi thi. Gussa insaan ke sochne samajhne ki shakti cheen leta hai. Jo insaan nahin chahta gussa usse wohi kaam karwata hai. Ravi ko ab apne kiye par pachtawa ho raha tha.

Itna wo gir sakta hai, itni ochi harkat wo kar sakta hai use vishwaas nahin ho raha tha. Use apne upar sharmindgi jaisa lag raha tha. Wo kabse aisa ban gaya. Wo to yaaron ka yaar tha. Koi bhi jara si takleef mein ho to turant uski help ke liye pahunch jaata tha. Aaj use kya ho gaya tha. Usne aisa kyun kiya? Ravi ki antaratma use jhakjhor rahi thi.

Usne faisla kar liya tha ki sir ko wo sabkuch bata dega. Halanki iska parinaam bahut bhayanak ho sakta tha. Ho sakta hai use sabke saamne lajjit hona pade, uska majak banaya jaye, use list se hata diya jaye yaa use college se restricate bhi kiya jaa sakta tha lekin use apni soch ko darkinar karte huye sach batane ka faisla kar hi liya aur sir ke free hone ka intezaar karne laga.

Thodi der mein hi sir free ho gaye aur result announch karne ke liye bol diya. Ravi chaunk pada kyunki usne to socha tha ki result baad mein announce hoga to wo akele mein sir ko sab bata dega lekin yahan to winner announce kiya jaa raha hai iska matlab use abhi sir ko sab sach batana padega. Uska dil bahut joron se dhadak raha tha lekin ab wo peeche nahin hat sakta tha. Usne man pakka kiya aur mauke dekhne laga ki kab wo sach bole.

Jaisa ki sabne andaaja lagaya tha teacher ne pehle third prize fir second prize aur fir Ravi ko first prize ke liye amantrit kiya. Prize ko agle din hi batne the principal sir ke haathon lekin sir ne filhaal sabko result bata diya tha. Ravi ko jab paas bulaya gaya to uske haath paanv phool rahe the. Dhadakte dil aur paseene se lathpath chehra lekar wo ghabrata huya sir ke najdeek gaya.

Sir ne use shabasi dete huye uski tareef ke pul baandhne shuru hi kiye the ki Ravi ne unhe tok diya “Sir mujhe aapse aur sab doston se ek baat kehni hai”

“Haan haan beta kaho kya kehna hai”

“Jis inaam ka hakdaar main hoon hi nahin wo main nahin le sakta”

“Tum kehna kya chahte ho Ravi saaf saaf kaho. Kahin Monika ki baat sach to nahin thi”

“Haan Sir wo sach keh rahi thi. Huya ye ki usne mere saath prank khela tha jiska badla lene ke liye hi maine ye sab kiya.”

“Kya badla lene ke liye tum kisi ke career ko bhi daanv par laga doge. Kitna gir gaye ho tum. College mein tumhari ginti ache ladkon mein hoti thi lekin tum…”

“Mujhe maaf kar dijiye sir. Ye majak itna bada ban jayega mujhe iska jara bhi andaaja nahin tha. Main uska dil nahin dukhana chahta tha aur na hi mujhe uske career mein upar uthne mein koi objection hai”

“Fir tumne aisa kyun aur kaise kiya?”

“Gusse mein insaan pagal ban jaata hai aur wohi mere saath huya. Aur kaise kiya wo huya yoon ki jab Monika reel dhulwane ke liye gayi to maine uska peecha kiya. Jahan usne reel dhulwayi khuskismati se wo mera dost tha. Fir to mera kaam asaan ho gaya aur maine apne dost ko samja diya ki wo reel abhi dene ki bajay raat mein de. Koi bhi bahana bana de. Meri dosti ki khaatir usne aisa kar diya.”

“Fir maine use in photos ki ek copy karne ke liye bola aur us par abhi ka time dalne ke liye bol diya aur Monika ki file par raat mein jab de tab ka aur is tarah meri file uski file se pehle banker tayyar ho gayi”

“Fir maine aapko ye file submit kar di aur aap bhi samay dekhkar meri baat sach maan baithe”

TADAKKK ki awaaz ke saath sir ka haath ravi ke gaal par pada aur uske gaal par ungliyan chap gayi. Lekin Ravi ne chupchap sab seh liya aakhir galti ki thi to saja bhi bhugatni hi thi.

“Sir mujhe maaf kar dijiye. Aayinda aisi galti kabhi nahin hogi”

“o mujhe bewkoof banana ka poora plan banaya huya tha tumne. Tumhari wajah se maine us masoom ladki ko kitna bhara bula kaha. Mujhe pehle hi samajh jaana chahiye tha ki wo ek achhi photo grapher hai aur tumhara door door tak isse koi lena dena nahin hai”

“Maafi mujhse nahin us ladki se mango jiska tumne dil toda hai. Main tumhe isliye principal sir ke paas nahin le jaa raha hoon kyunki tum ek acche aur brilliant student ho aur sabke saamne sach bolne ka sahas dikhaya hai”

Idhar Ravi sab ke saamne apni galti sudhar raha tha to udhar Monika ghar pahunch gayi aur seedhe apne kamre mein jaakar rone lagi. Naukron naukraniyon ne use dekha to use samjhane lage lekin usne kisi ki nahin suni to tab care taker ne kaha ki jaakar iske bhai ko bulao wo hi inhe samjhayenge. Hamari baat ye nahin sunengi.

Kisi naukar ne jaakar Monika ke bhai ko khabar di to wo sab kaam waam chod kar daudta huya Monika ke paas ja pahuncha. Usne Monika ke sar par pyaar se haath fera aur uska chehra apni taraf ghumaya.

Lagatar rone se Monika ki aankhen laal ho chuki thi. Chehra aisa ho gaya tha jaise kisi ne use bahut maara ho. Aur ye sach bhi hai kyunki use maar to andruni padhi hi thi. Usne Monika ka chehra apne haathon mein liya aur uske aansu poochte huye bola “Kaun hai wo jisne meri pyaari behan ki aankhon mein aansu laye. Tum jaanti ho na main sab bardhast kar sakta hoon lekin tumhari aankhon mein aansu nahin. Mummy papa ka pyaar kabhi mila nahin humein to hum dono hi to ek doosre ke sahare hain. Kisna kiya ye sab. Batao mujhe. Uski to wo haalat karunga ki uske farishtey bhi use nahin pehchaan payenge”

Monika ne rote rote poori baat use bata di. Ye sunkar uske bhai ka khoon khaul utha aur tuarant wo wahan se uthkar chala gaya.

Monika ko turant ye ehsaas huya ki ye usne kya kar diya. Kahin uska bhai Ravi ko jaan se na maar de. Usne apne bhai ko awaaz dekar rokna chaha “ALOK Bhaiyaa” lekin uski awaaz deewaron se takra kar reh gayi.


To be continued....

Kya baat hai maza aa gaya padh kar ravi ne sach bol hi diya sir ke samne ab dekho alok kya karta hai ravi ke sath aur ravi kaise sorry bolta hai monika ka ko dekhane wali baat hogi waiting next

 

[Sunilgupta]

Jbrdast update

 

[Ravi]

a lot doston

 

[Ravi]

Update 78​

Alok gusse mein fanfanata ja dhamka college mein. Saath mein apne do chaar ladke liye aur college mein pahunch kar Ravi ko dhoondhne laga. Ravi ko dhoondhte dhoondhte college Alok canteen tak pahunch gaya. Ravi ki marammat ke chakkar mein Ravi naam ke do chaar aur student pit gaye bechare.

Idhar Ravi ko sab samjha rahe the jo hua achha nahin hua. Use aisa nahin karna chahiye tha. Lekin Diya iske against thi. Usne tark diya ki Monika kaun si dhoodh ki dhuli hai. Usne kya Ravi ke saath achha kiya tha. Use sahi sabak mila hai. Isi tarah dui-pakshi baatchit chalti rahi lekin koi faisla nahin ho paya ki kya sahi tha aur kya galat.

Thodi der baad Ravi ko thoda stress feel hone laga to wo canteen se bahar aa gaya taaki khuli hawa mein saans le sake aur yahi uske liye ghatak sidh huya. Bahar uske saamne Alok khada tha. Alok ne usse poocha “B.A. third year mein padhne wale Ravi ko jaante ho. Kahan milega wo”

Ravi ne kaha “Main hi hoon Ravi. Kahiye kya kaam” Aur wo poora bol bhi nahin paya tha ki ek tej goonj use sunayi di aur uski aankhon ke aage ek shank e liye andhera cha gaya. Alok ka karara thappad uske gaal laal karta chala gaya.

“Are kaun ho tum”

Patak Fir thappad lagne ki awaaz. Is baar ek khun ka fawwara Ravi ki naak se behne laga.

“Meri baat to suno” Patak

“Mujhe kyun maar rahe ho” Patak

“Maine kya kiya” Patak

“Are kuch batayoge bhi ya yun hi maarte rahoge” Patak

Patak Patak Patak jaane kitne hi thappad Ravi ko adhmara karte chale gaye.

Thappad ruke nahin ki laat ghuson ki baarish bhi chalu ho gayi. Jab Ravi bilkul adhmara ho gaya to Alok use chetawani dete huye chala gaya “Aaj ke baad meri behan ke raaste mein aane ki bhool mat karna. Is baar to tumhein jinda chod raha hun lekin agar uski aankhon mein aansuon ka ek bhi katra mujhe dikhayi diya to wo tumhari jindagi ka aakhiri din hoga”

Idhar Ravi behosh pada tha doosri taraf uske sab dost canteen ke andar mast kha pee rahe the. Jab kaafi der ho gayi aur Ravi nahin aaya to sabko chinta huyi ki kya huya ye kahan reh gaya. Doosra sabko canteen se bahar shor gul sunai de raha tha. Sab dost bahar nikle dekhne ki aakhir majra kya hai to thodi door par unhone students ki bheed ko dekha jo kisi cheez ko gherkar khadi thi. Utsuktawash sab dost bhi wahan pahunch gaye aur bheed ko cheerte huye us cheez ko dekhne uske paas pahunch gaye. Wahan pahunch kar sabki aankhein hairat se fati ki fati reh gayi kyunki wahan koi cheez nahin Ravi behosh halat mein lahu luhan pada tha.

Ravi ko turant hospital le jaaya gaya. Dte udte ye khabar sab jagah fail gayi ki Ravi ki pitai Monika ke bhai ne ki hai. Diya ka to khoon khaul utha. Halanki sab dost gusse mein the lekin Diya kuch jyada upset thi Ravi ki haalat ko dekhkar. Hospital jaane ke poore raaste Diya Ravi ka sir apni godh mein liya baithe rahi. Ravio ardh murchit awastha mein tha. Usse aankhen nahin kholi jaa rahi thi lekin wo sab kuch sun aur samajh raha tha.

Idhar ye baat Monika tak bhi pahunchi aur wo hairan reh gayi apne bhai ke kaarname ko sunkar. Alok ke aane ke baad usne usse baat karni chahi lekin Alok ne ye kehkar use chup kara diya ki uski aankhon mein wo aansu nahin dekh sakta. Kisi ki wajah se bhi chahe wo koi bhi ho uski aankhon mein aansu aayega to wo use jinda nahin chodega. Ise to sirf usne peeta hai.

Monika ne use samjhane ki koshish ki lekin Alok ne uski ek nahin suni. Monika ko bahut feel huya ki uski wajah se Ravi ki itni buri halat huyi hai. Usne socha college jaakar wo apne bhai ki taraf se Ravi se maafi maang legi.

Usne turant college ka rukh kiya aur college pahunch gayi. Wahan jaane par use pata laga ki Ravi ko hospital le jaaya gaya hai. Ravi ki salamati ki dua karte huye wo bhagte huye hospital pahunchi. Lekin wahan use Ravi ki bajay Diya mil gayi.

“Ab kyun aayi ho yahan. Kya ye dekhne aayi ho ki wo jinda hai ya mar gaya.”

“main to usse”

“Tumne aur tumhare bhai ne to koi kasar nahin chodi thi use maarne mein lekin ye to bhagwan ka shukar hai ki wo sahi salamat hai.”

“Main apne bhai ki taraf se maafi maangne aayi hun”

“Kya baat hai! Bhai maar maar kar adhmara kar deta hai aur behan un ghaavo par marham lagane aayi hai”

“Pls mujhe ek baar Ravi se milne do”

“Koi jarurat nahin hai usse milne ki. Wo tumse nafrat karta hai aur ye tum achhi tarah samajh lo. Aayinda na to wo tumhare raaste mein aayega aur na hi tum uske saamne aana. Aur raha sawal tumhare gunde bhai ka use samjha dena ki aayinda agar usne Ravi ki taraf aankh utha kar dekha to hum sab use chodenge nahin”

Monika aur Diya ki baatein usi kamre ke bahar ho rahi thi jahan Ravi ko admit kiya huya tha. Unki saari baatein Ravi ne sun li thi lekin na to wo bol sakne ki haalat mein tha aur na hi chalne firne ki. Bas muk darshak bana dono ki baatchit sunta raha.

Ravi ko ehsaas tha ki isme Monika ki koi galti nahin hai. Infact shayad Monika ke bhai ki bhi poori tarah se galti nahin hai kyunki koi bhi bhai apni behan ki aankhon mein aansu nahin dekh sakta. Bas wo thoda over react kar gaya. Ravi ko Diya ke bartaav par sharmindgi ka ehsaas ho raha tha ki use Monika se aise baat nahin karni chahiye thi lekin ab pachtaye hot kya jab chidiya chug gayi khet.

Isliye Ravi ne theek hote hi sabse pehla kaam ye chuna ki wo Monika se maafi maangega.


To be continued....

 

[Guffy]

Bahot hi bura kiya alok ne ravi ko mar ke aur sahi bhi ki uski ek lauti bahen hai agar uski aankh mein aansu aayege toh woh bhadakega hi lekin itna nahi bhadakna tha usko ab diya ki bhi galat kiya monika ke sath aise behave nahi karna chahiye tha ravi ko bura lag gaya dekho ab ravi kaise mangata hai wating next

 

[Sunilgupta]

Super update bro

 

[rgcrazyboy]

mar pitit ho gai yaha to
bechara ravi

 

[Ravi]

a lot doston

 

[Ravi]

Update 79​

Dheere dheere Ravi ki haalat mein sudhar aata gaya. Lekin Ravi ke theek hone mein sabse bada haath Diya ka tha jo jyadatar apna college bunk karke Ravi ki sewa mein lagi rehti. Ravi ke mummy papa ko bhi Diya bahut pasand aa gayi. Aakhir kyun na aaye itni sewa jo kar rahi thi aur wo bhi bina kisi swarth ke. Diya bhi bas Ravi aur uske ma-baap ki sewa mein lagi rehti aur ho bhi kyun na uske hone waale saas sasur jo the.

Monika ne Ravi se milne ki yaa uske paas jaane ki dubara koi koshish nahin ki. Kaaran ek hi tha ki wo kaise Diya ke kadwe bol ka saamna karegi. Direct ho ya indirect wohi to thi Ravi ki is haalat ki jimmedar. Usne apne man to kada kiya aur faisla kiya ki college mein to Ravi se milakat ho hi jayegi aur wo usse wahin maafi maang legi. Use pata to chal gaya tha ki jis tarah Ravi ne sabke saamne apne galti maani thi wo ek nekdil aur shareef ladka hai aur wo use jaroor maaf karega.

Isi tarah ek hafta beet gaya aur Ravi kaafi had tak theek ho gaya. Use hospital se discharge kar diya gaya aur uske ma-baap use ghar le aaye. Ghar par sab dost uska haal chaal poochne aate rehte the aur Diya ka bhi ab kaafi aana ho gaya tha Ravi ke ghar par. Pawan to tha hi khair wahin uske paas. Diya to jaise ab us ghar ki sadasya ban gayi thi. Hasti, khelti, khilkhilati sabka manoranjan karti rehti. Ravi ki mummy to bahut khus thi kyunki unhen Diya ke roop mein unki hone wali bahu dikh rahi thi.

Lekin Ravi ko chain kahan tha. Use kisi bhi tarah Monika se milna tha. Jaise hi wo thoda theek hua to jhat se college pahunch gaya lekin Monika use kahin nahin dikhi. Usne kaafi dhoondha lekin koi safaslta uske haath nahin lagi. Thak haar kar jab wo park mein gaya to wahan ek kone mein use Monika akeli baithi dikhai di gumsum aur kuch sochti hui. Ravi kab aakar uske paas khada ho gaya use pata hi nahin chala.

Jab Ravi ne hello kaha tab uska dhyaan toota aur usne ek najar utha kar saamne ki taraf dekha. Ravi ko wahan dekhkar wo chaunk gayi aur wahaan ek kuch der ke liye sannata pasar gaya. Thodi der mein dono ki jubaan ek saath khuli aur dono ke muh se sirf ek shabd nikla “SORRY”

Ek min ke liye fir sannata cha gaya jise Ravi ne toda “Mujhe maaf kar do Monika. Maine tumhare saath bahut galat kiya. Lekin maine apni bhool sudhar li hai aur tumhi ko us competition mein first prize mila hai. Lekin main us din ke Diya dwara kiye gaye bartaw ke liye maafi maangna chahta hoon. Wo kuch jyada hi over react kar gayi. Pls Sorry uski taraf se bhi”

“Are nahin uski koi galti nahin hai. Main uski jagah hoti to pata nahin kya kar deti. Wo to bahut decent thi. Sorry to mujhe bolna chahiye kyunki meri wajah se tumhari ye halat huyi. Mere bhaiya mere liye bahut possessive hain. Pls unki taraf se main sorry bolti hoon”

“Kya baat hai! Hum dono ek doosre ko kisi doosre ki taraf se sorry keh rahe hain. Isn’t that amazing?”

“Haan bilkul” aur isi ke saath dono ke chehre par halki se muskaan ghir aayi. Dono aise baat karne lage jaise bahut pehle se ek doosre ko jaante ho. Don one kaise ek doosre ke liye planning ki, usmein kya kya pareshaniyan aayi aur kaise unhone us kaam ko anjaam diya ek doosre ko aise bata rahe the jaise koi kahani suna raha hai. Dono ek doosre ki baton par dil khol kar hans rahe the. Yahi to pyaar ki shuraat thi shayad dono mein.

Dheere dheere dono ke beech baatein, phir mulakatein hoti rahi. Dono ghanto park mein baithe rehte, hasi majak karte rehte, ruthna manana karte rehte aur ek din mauka dekhkar Ravi ne Monika ko “I Love You” bhi keh hi diya. Monika ka bhi dil dhadak hi raha tha Ravi ke liye to wo kaise mana karti. Usne bhi haan keh di aur dono ke beech nayi prem gatha shuru ho gayi.

Yahi pyaar umar bhar chahta hoon

Na ho khatam jo wo safar chahta hoon

Ye duniya ki daulat nahin chahiye ab

Mohabbat ka ho dil mein ek ghar chahta hoon

Tumhen bhoolne ki duayen to ki

Duayen ho saari beasar chahta hoon

Jo dil andhere mein bhar de ujala

Mein chahat ki aisi seher chahta hoon

Safar mein bahut akela hoon mein

Teri yaad ka humsafar chahta hoon​

Baarish ka mausam sabse pyaara hota hai khaskar premi yugal ke liye. Halki barsaat ho aur beech sunsaan sadak mein halki bearish ki fuhare chehre aur sharer par pad rahi hon aur baahon mein baahein dale dono chale jaa rahe hon. Na duniya ki koi khabar na kisi baat ki tension. Bas apni masti mein choor.

Dono ki bhi aisi hi haalat thi. Ek min ke liye bhi dono ko chain nahin aata tha. Phone to dono ke paas tha hi bas jab ek saath nahin hote the to phone par lage rehte the. Apne sunhere bhavishya ke sapne dekhte huye dono aane wale khatre se anjaan the. Unki jindagi kya mod lene waali hai dono ko iska jara sa bhi abhaas nahin tha.

Lekin kehte hain na pyaar kitna bhi chupa ke karo ye duniya wale jaan hi lete hain. College mein to pata lagna hi tha aur chupate chupate aakhir ye baat Diya ko bhi pata lag gayi. Uska to jaise dil hi toot gaya. Kitne saare armaan usne dekhe the ki uski aur Ravi ki shaadi hogi. Wo baahon mein baahon dale saari duniya ki sair karenge. Wo jab Ravi se rooth jayegi to Ravi use pyaar se manayega lekin uske saare sapne ek sheeshe jaise saabit huye jise Monika naam ke paththar ne chaknachoor kar diya tha.

Lekin wo haar maanne walon mein se nahin thi. Aakhir usne pakka faisla kar liya ki wo Ravi ko paakar hi dum legi chahe uske liye use kuch bhi karna pade.


To be continued....